رواية بيتزا وشنب الفصل السادس6بقلم شيماء يسري زهران
- ده اكيد هزار صح؟
- هو ايه اللي هزار! بتبوظلي الشغل!
- شغل ايه؟؟ انا مش فاهم حاجة، أنتِ ايه جابك هنا!
- جاية اشتغل، ايه مشبهش؟
- وتشتغلي هنا ازاي!!! ايه جابك في المكان اللي انا فيه!!! أنتِ مراقباني!!!
- اراقبك انت؟؟؟ يخربيت المقلب اللي واخده في نفسك.
- لأ بقى مانا مش فاهم يعني سيبتي مصر كلها وجاية تشتغلي هنا ازاي!
- معرفش اهي صدفة حقي.رة.
- وطبعًا هتمشي بقى دلوقتي وتطلعي جدعة صح؟
- امشي؟؟؟ مشيت الماية في زورك يالا! ده انا هاخد عشرتلاف جنيه وتقولي امشي!
- نعم!! يعني ايه يعني؟؟ يعني انتِ هتفضلي هنا؟؟ اتقي الله أنا لسه مستلم الشغل من أسبوع ده فندق فرصة ليا انا كشيف.
- وانا اعملك ايه؟؟ وبعدين مش دراعك كان متجبس؟
- خفيت، إرادة ربنا، اعتراضي.
- امممم، غريبة، طب اوعى كده وريني المطبخ ده، في اكل هنا؟
اتعصب وقال:
- لأ بقولك ايه أنتِ جاية تطفحي!! المدير لو شافك هيمشيكي!
- جعانة مفطرتش، وطي صوتك هديك بالكف على وشك يالا.
- أنتِ اتجننتي؟! كف مين؟؟؟ هو انا يابت عشان كل ده ساكتلك؟؟
- شششش في اكل هنا يتاكل بقول؟
- عايزة تطفحي ايه يعني؟
- اي حاجة، ما تعملي فطار نشوف عمايل ايدك.
- فطار! هو أنتِ فاكراني خدامة أبوكي جايبهالك؟
مردتش عليه وببرود فتحت الحلة اللي هو كان شغال عليها قبل ما اجي، شميت ريحتها، ضرب كف ايدي:
- اااه، يا حيو.ان!!
- سيبي الحلة! هو أي لعب!!!
- ما تغرفلي طبق، دي شوربة ايه دي؟
- سي فود.
- ده زي الطبيخ؟
بربش قدامي واتنهد بقلة صبر، قال:
- لأ يا جاهلة، سي فود ده اكل بحري وكده.
- لحظة..طب وده ايه علاقته بمطعم ايطالي؟ مش ايطاليا اسمع انها بتحب بيتزاهات بقى وكده؟ وسوشي ده بتاع الصين؟
- اه، أخيرًا قولتي شيء يبدو صح، بس عادي، ده عشان في ناس بييجوا المطعم ده من أنحاء العالم، صاحب الفندق ده اصلا ايطالي وممسكه لمدير مصري وكده فاهمة؟
- امممم، وانت بتعرف تتكلم خواجاتي بقى؟
- كتك القرف هرجع، ايه خواجاتي ده!!! انجليزي قصدك؟
ضحكت ضحكتي المعتادة، رجع لورا مخضوض:
- ايه ده؟؟
- ايه؟
- الصوت ده طلع منين؟
- صوت ايه؟
- أنتِ بالعة راجل؟ بالعة قهوة رجالة؟ أنتِ راجل متحول يابنتي؟
- جرا ايه ياض ما تظبط كلامك!!!!
- أنتِ ازاي كده!!!
- نينينيي، عيل فافي، المهم، بتعرف تتكلم زفت لغة؟
- اه، بتكلم انجليزي لكن مش بتكلم ايطالي غير خفيف بس.
- امممم بتعملوها ازاي دي، انا بحاول اجمع عربي.
- شششش، هو أنتِ هترغي كتير؟ جعانة تطفحي؟
- ماشي، عايزة من الشوربة دي.
- لأ!
- هو ايه اللي لأ؟! فاكرني هتحرج؟؟ بقولك اغرفلي يالا!!!
- حاضر، نزلي السك*#*#ينة دي هنروح في داهية.
غرفلي طبق، خدت الطبق وقعدت على الكرسي اشرب الشوربة بصوت عالي، حط ايده على ودنه:
- الصوت، ارحميني ودني حرام عليكي.
- طب اهو، سووووب.
- همجية.
- طب والله طعمها تحفة ياض، طلعت طباخ شاطر، اوف ايه ده!!!! ده الجمبري؟؟؟؟؟
- ده لو ممثل مش هتعملي كده!
- بشوفه في محلات السمك، بس ده الكبير كمان امسك ياض الطبق ده، امسك.
خد مني الطبق وهو خايف، عضيت الجمبرياية وقعدت اكلها.
- بت!!! كفاية كده! قومي اغسلي ايدك بدل ما تكوني مطرودة من الشغل ده النهاردة!
رفعت عيني وابتسمت بشر وقولت:
- ايه رايك امسح ايدي فيك؟
- نعم يا روح امك؟؟؟
رجع خطوة لورا خايف ضحكت وجريت وراه، قعد يجري مني يشتم، لحد ما مسك ايدي الاتنين جامد وهو متعصب:
- كفاية هبل!!
قولت وانا بضحك وبنهج:
- انا فرهدت، عايزة ماية اشرب.
- تعالي اغسلي ايدك الأول تحت الحنفية.
فتح الحنفية وحط ايدي تحتهم واداني الفوطة وهو متعصبة وقال:
- لو جاية تبوظيلي شغلي قوليلي وانا امشي من النهاردة..تمام؟ لكن لو هنشتغل بجد معنديش مانع.
وسابني وخرج برا المطبخ، فكرت في كلامه لوهلة.. أنا فعلًا جاية عشان اغير حياتي ولا عشان اتخا.نق؟
دخل المطبخ بعد شوية لقاني واقفة بنضف المطبخ وبروقه، استغرب شوية، لفيت ورايا ..قولت:
- أنا عايزة اشتغل بجد، وعشان كده جيت هنا.
ضيق عينيه وقال في شك:
- ودلوقتي هتعملي مقلب وتديني ضربة كده ولا كده؟
ابتسمت وقولت:
- لأ.
مد ايده وقال:
- يبقى تسمعي كلامي في كل كلمة هقولها هنا عشان نعرف نعمل مطبخ ناجح، تمام؟
- موافقة! وبجد شكرًا انك اكلتني انا كنت جعانة.
- أيوة بس ده مش كل يوم! لازم تيجي فطرانة!
- حاضر..انا اسمي زلطة و..
- لأ ..اسمك الحقيقي ايه؟
- مرام.
- مرام! اسمك مرام ومسمية نفسك زلطة؟ اللهم لا اعتراض..اسمك جميل يابنتي عيشي بيه عادي.
- أيوة، بس ده عشان بابا سماني كده من وانا شغالة معاه في الميكانيكا من وانا عيلة.
- معندكيش اخوات ولاد صح؟
- لأ اكيد، ماهو عشان كده شغلني بدالهم بقى.
- ودرستي ايه؟
- درست ايه؟ انا يابني معايا اعدادية، ابويا الله يسامحه منعني م التعليم عشان المحل.
- لسه صغيرة ممكن تدرسي حاجات بتحبيها، مش أنتِ في العشرينات؟ كام سنة؟
- أنا ٢٢، انت كام سنة؟
- تديني كام مثلا؟
- يعني يدوبك قيمة ٢٦؟
- لأ أنا ٢٨.
- امممم ودرست طبعًا؟
- درست فنون جميلة، بس طول عمري بحب الطبخ من وانا طفل، اكيد مكنتش هروح ارسمه، بقيت اطبخه.
- معلش هي فنون جميلة دي يعني ايه؟
- هقولك، دي كلية بتاعت رسم، كلها ناس فنانين بيرسموا وكده.
- يعني انت بتعرف ترسم!!
قالي وهو بيمسك الخضار:
- أيوة.
حسيت باستغراب بجد!! قولت:
- هو انت ازاي كده!
قضب حواجبه وقالي باستغراب وهو بيبدء يقط.ع الخضار:
- مش فاهم؟
- بتتكلم لغات وبترسم وطباخ، ايه ده بجد!!
لف ليا يبتسم وقال:
- المظاهر خداعة، انا مش بيرفكت اوي كده.
مردتش في احراج، قال:
- بيرفكت يعني انا مش كامل اوي، عادي كل ده عادي..هعلمك الطبخ.
- بجد!!!
ضحك على شكلي وانا فرحانة.
ـــــــــــــــــــــــــــــ
جات الساعة ١١ الضُهر، قولت:
- هو أنا المفروض امشي دلوقتي صح؟
- هو مش قانون يعني، عادي ساعات هتضطري تمشي بالليل بس ده مش كل دلوقتي.
- بالليل!!! يالهوي!
- في ايه يابنتي!
- ابويا! مضطرة امشي دلوقتي، انا مش قايلاله اني بشتغل.
- طب ليه فهميني؟
- هفهمك بكرة سلام.
سيبت الفندق ومشيت، نزلت غيرت هدومي وركبت المواصلات.
ـــــــــــــــــــــــــــــــ
- اصحى يابا مش هتفتح المحل النهاردة ولا ايه؟
- يووه عايز انام.
- يابا الساعة ١٢ الضهر.
- جرا ايه يا زلطة! ايه النشاط ده كله يعني!
- ها.. أبدا اصل عندنا شغل كتير وكده.
- طب انزلي تحت حضري الفطار وهاجي وراكي.
كلمة حضري الفطار فكرتني بالمطبخ، نزلت المحل تحت حاولت ابتكر واعمل نفسي شيف، مسكت طبق الفول وقطعت عليه حاجات مختلفة:
نزل طلعت:
- هاتي الفطار جعان، جيبتي طعمية؟
- أيوة، دوق الفول كده؟
- ايه ده في ايه ياض، هتسمني؟
- ياعم دوق بس.
داق، استطعتم، قام تف وقال:
- خيار؟؟ الفول مش بيتقطع عليه خيار يابنت الهبلة.
- بجد! مش عارفة، فكرت اعمل حاجة مختلفة.
- بيتقطع عليه اوطة وزيت وفلفل ولمون، بس انا اللي معنديش وقت اعمل ده فبفطر اي حاجة.
- اممم، طيب اجيبلك فول غيره؟
- لأ حلو خلينا نفطر ونبدء شغل عشان عايز اخلص بدري واطلع انام عندي برد تعبان.
ــــــــــــــــــــــــــــــــ
تاني يوم دخل مراد المطبخ لسه هيرمي الصباح لكن قال مستغرب:
- ايه ده!!!
لو ضحكتك في مرة ادعيلي بضهر الغيب 🤎.
تتوقعوا شاف ايه؟؟؟