مي: يعني انت يا سليم مش عايز نبقي صحاب حتي؟!
سليم: مي انا قلت اللي عندي..معتش ينفع..
مي: طب ليه مصمم تتعامل معايا كأني غريبة؟
سليم: لأنك فعلًا بقيتي غريبة.
مي سكتت لحظة، وبصتله بحزن: للدرجة دي؟
سليم: أنا مش عايز أفتح الكلام ده تاني.
مي: تمام وانا مش هفتح الموضوع ده تاني..
سليم: أتمنى.
مي: أنا فعلًا جاية أشتغل..ومش عايزة منك حاجة.
سليم: يبقى تمام..خلي كل واحد في حاله.
مي هزت راسها وقالت:ماشي..ومشيت.
سليم فضل واقف مكانه ثواني، وبعدين رفع عينيه لقى ضحي ورُقيه جايين ناحيته.
ضحي: هي مي بتعمل ايه هنا..؟
سليم: مش ناويه تبطل وتقتنع انه خلاص اللي بينا خلص..
ضحي: هي قالتلك إيه؟
سليم:بتقول إنها هتشتغل هنا..
ضحي: هتشتغل هنا فعلًا؟
سليم: أيوه.
ضحي: طب وانت كنت متضايق منها أوي كده ليه..وانت بتكلمها؟
سليم اتنهد وقال: عشان أنا مش عايز أشوفها تاني يا ضحي..قولتلها كده أكتر من مرة، بس هي مصرة.
ضحي: يمكن عندها سبب لده.
سليم: سبب إيه؟
ضحي: معرفش..بس يمكن لسه بتحبك وعايزه ترجعك..
سليم: حتي لو كده هي فاهمه اني مش هرجع تاني..هو بالعافيه..
رُقيه كانت ساكتة، لحد ما سليم بص لها فجأةوقال: مش كده؟
رُقيه باستغراب:مش كده ايه؟
سليم: يعني مش بالعافيه ولاإنتي رأيك إيه؟
رُقيه قالت بهدوء: الواحد المفروض لما يلاقي حد بيتجنبه..يبعد.
سليم هز راسه: أهو ده اللي بقوله.
رُقيه كملت:بس مش كل الناس بتبعد.
سليم: يعني؟
رُقيه: يعني فيه ناس لما تلاقي حد بيتجنبها، بدل ما تبعد على طول بتحاول تعرف السبب الأول.
ضحي بصت لرُقيه، وابتسمت ابتسامة صغيرة.
سليم: ولو السبب واضح؟
رُقيه: حتى لو فاكر انه واضح...مش شرط يكون صح..هو بالنسبة كبيره مش هيكون صح..اصل مفيش حد بيبعد بدون سبب..
سليم: يعني من وجهة نظرك..يفضل يحاول؟
رُقيه: مش طول الوقت..
سليم: إزاي يعني؟
رُقيه: يتكلم مرة..واتنين..ويحاول يفهم. لو لقى إن التاني فعلًا مش عايز يتكلم، ساعتها يبعد ويحترم رغبته.
سليم فضل باصص لها شوية، وكأنه بيفكر في كلامها.
ضحي: يعني قصدك انه يحاول يفهم السبب مش يبعد وخلاص..
رُقيه: صح..بس يبقي السبب واضح مش نقول هنكمل ونخنق الطرف التاني..
ضحي ضحكت وقالت: زي واحده كده..
سليم: يعني ممكن الشخص مش عايز يبعد بس فيه حاجه خليته يعمل كده..
رقيه: بالظبط..
سليم هز رأسه وقال: تمام..
ضحي: طب يا فيلسوفة العالم..هنروح المحاضرة ولا هنقعد نحل مشاكل سليم باشا..
رُقيه ضحكت وقالت: طيب يلا يا بنتي..
سليم مشي وراهم، لكنه فضل ساكت شوية وبيفكر في الكلام
سليم: رُقيه.
رُقيه لفت: نعم؟
سليم: طب ايه السبب..مثلا يمكن يكون الشخص ده زعله او كده..
رُقيه: لا مش شرط..احيانا بنضطر نبعد عشان ده احسن..وعشان ده الصح..
سليم حس انه فهم وابتسم وقال: فهمت قصدك..مش كل حاجه بتمشي بسهوله زي ماحنا عايزين..
رقيه بابتسامة: دي حقيقه..
سليم: بس احنا نقدر نوصل لوضع كويس..
رقيه: ايوا طبعا..هنحاول نوصل لوضع مناسب من غير ما نضطر نبعد..
سليم: صح..
ضحي: ايه شغل الالغاز خلص ولا لسه..
سليم بص لرُقيه وقال: يعني نقدر نقول اه..
>>>>>>>>>>>>>>>
بليل رقيه كانت قاعده في اوضتها ولقت موبايلها بيرن..بصت لقت اسم سليم..
اتوترت شويه بس خدت نفس عميق وردت..
سليم: الو يا رقيه..
رُقيه: الو يا سليم..ازيك؟
سليم: كويس الحمد لله..معلش رنيت دلوقتى بس عايز اقول حاجه مهمه..
رُقيه: ولا يهمك..اتفضل..
سليم: طبعا انتي عارفه عيد ميلاد ضحي بكره..وانا عايز مفجأه في كافيه كده وواحد صاحبي هيساعدني..
رقيه: تمام فكره حلوه هتفرح اوي..
سليم: ايوا انا اللي انا هطلبه منك بس انك تجيبها علي المكان..انا هبقي ابعتلك اللوكاشن..قوليلها تعالي نخرج او اي حاجه..
رقيه: تمام سيبها عليا..ومتقلقش..
سليم: خلاص ماشي..هبقي ابعتلك ماسدج عشان تجيبيها..
رقيه: حاضر..
سليم: تمام..مع السلامه..
رقيه: سليم!!
سليم: نعم..
رقيه: انت اخ جدع اوي..دايما واقف جنبها وبتحب تفرحها..
سليم: ضحي دي حبيبتي..اختي اللي مليش غيرها..
رُقيه: ربنا يخليكوا لبعض..
سليم: امين يارب..
رقيه: مع السلامه..
سليم: سلام..
رقيه قفلت الموبايل وحطته بس كانت مبتسمة وهي شايفه ان قد ايه سليم حد كويس..
>>>>>>>>>>>>>>>>>>
تاني يوم، كانت رُقيه بتكلم ضحي في الموبايل.
رُقيه: يلا يا ضحي.. البسي وتعالي نخرج شوية.
ضحي: نخرج فين؟
رُقيه: مش عارفة.. أي حتة نغير جو..
ضحي: إنتي اول مره تقولي نخرج..
رُقيه ضحكت: يلا بس بدل ما اغير رأيي..
ضحي: لا خلاص هلبس..
بعد شوية، رُقيه وصلت عند ضحي، وخرجوا سوا، وبعدها راحت بيها على المكان اللي سليم كان باعتلها اللوكيشن بتاعه.
ضحي وهي بتبص حواليها: حلو الكافيه ده اول مره اجي هنا..
رُقيه: ادخلي بس هيعجبك اكتر..
دخلوا الكافيه، وأول ما ضحي دخلت، لقت المكان متزين بشكل بسيط، وعلى الترابيزة كيك صغيرة وعليها اسمها.
ضحي وقفت مكانها باستغراب: إيه ده؟
رُقيه ابتسمت: كل سنة وانتي طيبة يا قلبي..
ضحي: إنتي كنتي فاكره..
رُقيه: طبعًا..فاكرة انا هنسى عيد ميلادك يعني؟
ضحي حضنتها بسرعة: بحبك أوي.
رُقيه ضحكت: انا اكتر والله بصي كده..
وفجأة ظهر سليم من وراهم وهو ماسك هدية صغيرة.
سليم: كل سنة وانتي طيبة يا حبيبتي.
ضحي بصتله بفرحة: سليم!
سليم: إيه رأيك في المفجأه؟
ضحي: حلوه أوي.. أنا كنت فاكرة إن رُقيه اللي عاملة الموضوع لوحدها
رُقيه: لا يا ستي سليم هو اللي عامل كل ده..
سليم: عجبك الديكور..؟
ضحي: توحفه والله تسلم ايدك..
سليم: انا عندي كام ضحي..كل سنه وانتي طيبه يا حبيبتي وعقبال مليون سنه..
ضحي ابتسمت وحضنته.
ضحي: ربنا يخليك ليا يا سليم.
سليم: ويخليكي ليا يا حبيبتي..
دخل سيف الكافيه وراح ناحيتهم..
سيف: السلام عليكم.
رُقيه وضحي: وعليكم السلام.
سليم: إيه يا سيف؟ اتأخرت ليه؟
سيف: والله ما كنت عارف أجيب إيه فقعدت ألف شوية.
سليم بابتسامة: سيف هو اللي ساعدني في كل ده ياضحي..
ضحي بابتسامة: بجد..متشكره اوي يا سيف..تعبتك معايا..
سيف بابتسامة: ولا تعب ولا حاجه..واداها الهديه وقال..كل سنه وانتي طيبه..
ضحي بابتسامة: وانت طيب يا سيف..وشكرا علي الهديه كمان..
سيف: انا هستأذن انا بقي..
سليم: انت رايح فين؟
ضحي: لا هتمشي ازاي بس..انت هتقعد معانا..
سيف: عندي حاجه هعملها ضروي بس
سليم: انت بتهزر يا سيف مش هسيبك تمشي..وانت وراك ايه اصلا
سيف: ميعاد شغل..
سليم: ميعاد الشغل االلي لسه بليل..اقعد يا سيف..
سيف سكت ثواني وبعدين: طيب..
ضحي ابتسمت لما هو قعد..
>>>>>>>>>>>>>>>>>>>
ضحي : كويس إنك قعدت..كنت هزعل لو مشيت.
سيف بابتسامة: هتزعلي ليه؟
ضحي: يعني مش قصدي..قصدي بعد ما تعبت تمشي يعني..
سيف: اه..فكرت حاجه تانيه..
ضحي: حاجه ايه؟
سيف: يعني انك عايزاني ابقي موجود..
ضحي: طب منا عايزاك تبقي موجود..
سيف بصلها و ابتسم وقال: بجد؟!
ضحي اتوترت وقالت: يعني عشان تتبسط معانا..
سيف: امم طيب..
ضحي بابتسامة: حلوه التورته..
سيف: انا اللي مختارها..
ضحي: عارفه..
سيف: ايه الثقه دي..
ضحي: ده ذوقك عمتا..
سيف: ايوا الناس اللي عارفه ذوقي..
ضحي: يابني بطل بقي..كل يا سيف..
سيف ضحك وقال: حاضر...
رُقيه بصت لسليم بابتسامة وقالت: بجد اليوم كان حلو أوي.
سليم: كويس ان ضحي اتبسطت..
رُقيه: جدًا..باين عليها.
سليم : ايوا..الحمد لله..
رُقيه: بس على فكرة ذوقك حلو..والديكور شكله جميل..
سليم: جبت شكل ونفذته علي قد ما اقدر..
رقيه: برافو بجد..زمانك تعبت فيه..
سليم: يعني اه بس عشان كنت عايزها تفرح بيه..
رُقيه ابتسمت: انت فرحتها فعلا..هتسيب جواها ذكري حلوه..
سليم بص لها ثواني وقال: وده المطلوب وإنتي كمان ساعدتيني علي فكره..
رُقيه: أنا معملتش حاجة.
سليم: لا عملتي..لو مكنتيش جيبتيها، المفاجأة مكنتش هتنجح.
رُقيه ضحكت: دي حاجة بسيطة.
سليم: بالنسبة لي مش بسيطة.
رُقيه: بس مفكرتش اني ممكن معرفش أجيبها..
سليم ابتسم وقال: معرفش..بس كنت متأكد إنك هتساعديني.
رُقيه: واثق فيا للدرجة دي؟
سليم: آه.
رُقيه ابتسمت وقالت: يعني شكرا..
سليم كمل: بقيتي من الناس اللي بحس إني أقدر أعتمد عليهم.
رُقيه بصتله للحظة، وقالت بهدوء: وانت كمان علفكره..
سليم ابتسم: بجد كويس..
رُقيه : يعني انت من اول يوم وانت بتساعدني لما احتاجك..دي حاجه مش قليله برضو .
سليم بابتسامة: بالنسبة قليله جدا..قصاد انك اشوفك مرتاحه..
رُقيه بصت الناحية التانية وهي بتحاول تخبي ابتسامتها.
وفي اللحظة دي رجعت ضحي وهي ماسكة طبق صغير.
ضحي: إيه يا جماعة؟ سايبيني مع سيف لوحدي؟
سليم: ما إنتي اللي روحتي.
ضحي: طب يلا نقعد كلنا.
رُقيه قامت وهي بتبتسم، لكن جملة سليم فضلت في دماغها..
>>>>>>>>>>>>>>>>
رُقيه كانت ماشية مع ضحي ولسه بيتكلموا، لحد ما ضحي وقفت.
رُقيه: وقفتي ليه؟
ضحي بصت قدامها وقالت: مي.
رُقيه بصت لقت مي واقفة بتتكلم مع حد من الدكاتره..
رُقيه: هي بتعمل إيه هنا؟
ضحي: شكلها بدأت شغلها فعلًا.
رقيه: يعني كده هتبقي موجوده علطول..
مي خلصت كلامها، ولما لمحتهم ابتسمت واتجهت ناحيتهم.
مي: صباح الخير.
ضحي: صباح النور.
مي بصت لرُقيه: إنتِ رُقيه صح؟
رُقيه: أيوه.
مي: اتشرفت بيكي.
رُقيه بابتسامة بسيطة: وأنا كمان.
مي سكتت لحظة وبعدين قالت: إنتِ قريبة من سليم أوي كده؟
رُقيه اتوترت وقالت: أنا؟ لا..يعني أنا صاحبة ضحي وبنتعامل كلنا مع بعض.
مي ابتسمت ابتسامة صغيرة: آه..تمام..اصلي فكرت غير كده..يعني اصلي عرفت اسمك لما سمعته بينادي عليكي..وكزا مره اشوفكوا واقفين سوا..
ضحي بصتلها وقالت: في ايه يعني صاحبتي..
مي: لا خالص..كنت بس بسأل.
رُقيه: ليه السؤال؟
مي بصت لها وقالت بهدوء: بحب اعرف اللي حوالين سليم دايما..
ضحي: ليه يا مي؟
مي بابتسامة: كده..تقدري تقولي تعود وبصت لرقيه وقالت اصلنا مع بعض من خمس سنين عرفنا بعض في الكليه اصلا..
رقيه حست انها اتضايقت من كلامها
ضحي: وخلاص الموضوع انتهي..بلاش نفتحه تاني..
مي ضحكت وقالت: يعني منتهاش اوي..
وبعدين بصت لرُقيه وقالت: عموماً اتبسطت إني عرفتك.
رُقيه: شكرا
مي: أشوفكم بعدين.ومشيت.
رُقيه فضلت باصة وراها شوية، وبعدها بصت لضحي.
رُقيه: هي كانت تقصد إيه؟
ضحي: متشغليش بالك بيها..شكلها مش هتسكت..
رُقيه: يعني ايه منتهاش تفتكري سليم ممكن يرجعلها..
ضحي: من كلامه واضح انه لا..بس مش عارفه هي هتعمل معاه..
رُقيه هزت راسها وقالت: هنشوف..
وفي نفس اللحظة، سليم جه وندي عليهم..
سليم: ضحي!
ضحي لفت: أيوه؟
سليم قرب منهم، وبص لرُقيه بابتسامة.
سليم: صباح الخير يا رُقيه.
رُقيه سكتت ثواني وافتكرت كلام مي بعدين قالت: صباح النور.
سليم استغرب سكوتها، لكنه ابتسم وقال: مالك؟
رُقيه: مفيش..أنا كويسة.
سليم فضل باصص لها لحظة، وكأنه حاسس إن في حاجة حصلت بينما رُقيه كانت لسه بتفكر في سؤال واحد:
"هو فعلًا ممكن يكون لسه بيحب مي ويرجعلها؟"
>>>>>>>>>>>>>>>
في نفس اليوم..
رقيه كانت باصه في الكتاب بس كانت سرحانة..
ضحي: إنتي مالك من ساعة ما شوفتِ مي؟
رُقيه: مفيش..بس كلامها ضايقني شوية.
ضحي: متشغليش بالك بيها، هي أصلًا عايزة تستفزك.
رُقيه: مش عارفة..بس لما قالت إنهم كانوا مع بعض خمس سنين، حسيت إن الموضوع مش بسيط.
ضحي: رُقيه، سليم بنفسه قالها إن الموضوع انتهى.
رُقيه: عارفة.
ضحي: أمال مالك؟
رُقيه سكتت لحظة وقالت: مش عارفة أنا.
وقبل ما تكمل سليم قرب منهم.
سليم: ايه بتعملوا ايه..
ضحي: قاعدين..
سليم: بتذاكري ايه يا رقيه..
رُقيه رفعت عينيها وقالت: المحاضره اللي خدنها..
سليم بص لها شوية وقال: إنتي كويسة؟
رُقيه: آه.
سليم: يعني مفيش حاجه مضايقاكي؟
رُقيه بابتسامة بسيطة: لا انا كويسه..
سليم ابتسم وقال: طب استني..شكلك محتاجه قهوه؟
رقيه: لا مش عايزه..
ضحي: هاتلي معاك..
سليم: طيب..
بعد دقايق رجع وهو ماسك قهوة ومدها لها.
سليم: خدي.
رُقيه بصت للكوباية باستغراب: إيه ده انا قلت مش عايزه علي فكره..
سليم: امسكي بس..
رُقيه: طيب..
ضحي: دانت ما بتصدق اقولك مش عايزه..عشان متجيبش..ولا انا عشان مش اسمي رقيه؟
سليم: بالظبط كده..
رقيه ابتسمت من كلامه..
ضحي: ماشي يا باشا شكرا..
سليم: العفو..
وبعدها بص للكتاب اللي قدام رقيه..
سليم: خلصتي الجزء ده؟
رُقيه: تقريبًا.
سليم: طب لو في حاجة واقفة معاكي قوليلي.
رُقيه: حاضر.
ضحي: يا اخي قولي عامله ايه حتي..
سليم: انا ماشي..عندي محاضرة..
ضحي: قولي الاول..
سليم: اما اجي..
رقيه ضحكت عليهم..
ضحي: اضحكي ياختي..
>>>>>>>>>>>>>>>>
بالليل..
رُقيه دخلت أوضتها وقفلت الباب وراها، ورمت نفسها على السرير وهي لسه بتفكر في سليم واللي حصل انهارده..
رُقيه لنفسها: أنا مالي أصلًا؟.. هي قالت إنهم كانوا مع بعض خمس سنين.. طب وأنا مضايقة ليه؟
سكتت لحظة، وبعدين افتكرت كلام سليم ليها وافتكرت لما جاب لها القهوة رغم إنها قالت إنها مش عايزة، واهتمامه بيها في كل مرة كانت محتاجة حاجة.
ابتسمت تلقائي وبعدين قالت: يعني ايه يا رقيه؟.. أنا ليه كل كلمة منه بتفرق معايا؟.. وليه لما بيتعامل معايا ببرود بزعل، ولما يهتم بيا أفضل أفكر في الموقف طول اليوم؟
سكتت شويه وبعدين قالت:يا رُقيه..إنتي وقعتِ ولا إيه؟
وبعدها هزت راسها بسرعة وقالت: لا..لا طبعًا..يمكن بس عشان بقينا بنتعامل كتير..أكيد ده السبب.
سكتت لحظة، وأخذت نفسًا عميقًا وافتكرت كل احساس توتر لما تشوفه ولما يقول اي كلمه تبين اهتمامه قلبها يفضل يدق..
رُقيه ابتسمت وقالت: " انا فعلا شكلي بدأت احبه ولا ايه"