_وياريت انتِ كمان يا زهره تنسي كريم عشان انا بقا مش ناويه اسيبه خالص مهما حصل..!
كنت بصالها بصدمه
يعني قصدها ايه مش فاهمه؟!
اما نبقا صحاب و تفضل تأذيني او تبعد و تبعد كريم عني؟!
هى ازاي اصلا عايزاني ابقا معاها و هى مختله كده..!؟
كلمتها بعنف و انا بزقها بايدي السليمه :
_برااا
اطلعي برا و ياريت ماشفش وشك تاني.!
بصت لي بصه أخيرا كلها اصرار و مشيت..!
كنت لسه واقفه مكاني مصدومه فيها و حسيت ب ماما و هى بطبطب عليا و انا لفيت لها ف حضنتني و انا عيطت في حضنها :
_خلاص يا زهره يا حبيبتي انسيها
و احنا كويس اننا عرفناها على حقيقتها ..!
ماما فضلت جنبي لحد ما هديت بعدها نيمتني على السرير و قعدت جنبي تطبطب عليا و بصت لي :
_مفيش حاجة حابه تحكيهالي يا زهره؟!
سكت و ماردتش عليها و هى كملت :
_ممكن اعرف حكاية كريم اللى هى بتحكي عنه ده..؟!
لفيت وشي الناحيه التانيه و انا مش عارفه اقولها ايه
و هى مسكت وشي و خلتني ابص لها و اتكلمت بحنيه :
_عايزه اسمع الحكاية منك يا زهره
ماتخبيش عليا.!
اتنهدت و بصيت لها:
_حاضر يا ماما هحكيلك كل حاجة من الاول خالص.!
•♡♡♡•♡♡♡♡•♡♡•
اللهمَّ يا مُقلب القلوب ثبت قلبى على دينك.
•♡♡♡•♡♡♡♡•♡♡•
_ايوه يعني انتَ جدك مش موافق على الجوازه
و كمان عايزني اوفقك بعد ما عرفت انك كنت عريس سلمى صاحبة بنتي؟؟!
_لا انا ماكنتش عريس سلمى و على فكرة انا اول مره شوفت سلمى كانت امبارح و بس في المستشفى
غير كده انا مكنتش اعرفها ولا عمري شوفتها.!
_طب و بالنسبه لرفض جدك ده؟!
هل تعتقد اني ممكن اوافق اجوزك بنتي و جدك رافض..؟!
_بص يا عمي انا والدي و والدتي متوفيين من حوالي تلت سنين
و انا كل اللى كان هيهمني لو كانوا عايشيين هو رأيهم و رأي اخواتي البنات وبس
و انا مش صغير عشان جدي يرفض فـ اسمع كلامه و مع احترامي لجدي بس هو الصراحة ميهمهوش راحتي ولا رأيي اصلا..!
علي بص لكريم و افتكر انه في يوم من الايام كان مكانه كده
في نفس موقفه
ابوه مش موافق على الجوازه و مع ذلك هو اتجوز عائشه عشان بيحبها...
ابتسم و شرب من فنجانه بعدها بص ل كريم و سأله :
_طب افرض كده انا وافقت يا كريم
و انتَ خطبت زهره و خلاص هتتجوزوا بس جدك اتبرى منك او حرمك من املاكك مثلاً كنوع من العقاب
هتعمل ايه..؟!
كريم ابتسم و رد عليه:
_انا ميهمنيش في الدنيا قد اني اكون مع زهره و مستعد اسيب كل حاجة ورايا عشانها هى وبس.!
علي ابتسم و قام من مكانه قعد على الكرسي اللى قصاد كريم و اتكلم :
_تعرف يا كريم ان انا في يوم من الايام كنت في نفس موقفك ده؟!
و اخترت نفس اختيارك برضوا
فانا يشرفني نسبك يا كريم
بس انتَ عارف حالة زهره دلوقتي متجبسه و متبهدله خالص
استنى لما تفك الجبس و تروق كده و نحدد ميعاد سوا.!
_هستنى شهر يعني عشان تفك الجبس؟؟!
_يعني تجيلها و هى متجبسه يا كريم؟!
و بعدين انا لسه هاخد رأيها.!
كريم اتكلم بهدوء :
_طب ايه رايك يا عمي تاخد رأيها و ترد عليا
و نحدد ميعاد نيجي نتفقك و نقرا فاتحه و نخلي الخطوبه لما تخف.؟!
علي بص له و سكت و كان بيفكر بعدها ابتسم و اتكلم بجديه :
_ماشي يا كريم اللى تشوفه
انا هكلمها و هديك خبر .!
♡♡♡♡•♡♡♡♡♡♡•
لا إلهَ إلا أنت سُبحانك إنّي كُنت من الظالِمين.
♡♡♡♡•♡♡♡♡♡♡•
_بابا انا موافقه على جوازي من كريم
و المرادي موافقه بجد.!
عدلي كان قاعد على السفره بيتغدا و هو ماسك تاب بيتابع اخبار الشغل
بص ل سلمى اللى واقفه قدامه بتتكلم بجديه و كلمها بأستغراب :
_وليه وافقتي دلوقتي ما الموضوع فشكل بسببك..
ردت بثقة :
_لا ولا فشكل ولا حاجة انا اللى كنت رافضه في الاول و بعرف كريم اني رافضه
بس دلوقتي انا غيرت رأيي و موافقة...
بص لها بشك و اتكلم :
_و ده بجد ولا دي اشتغاله جديده!!؟
سلمى شدت كرسي و قعدت جنبه و بدأت تاكل و هى بتتكلم ببرود :
_لا جد الجد كمان و مستعده اقول لكريم و جده اني موافقه قدامك كمان عشان تعرف ان المشكلة مش مني.!
_قصدك ايه ان المشكلة مش منك؟
_قصدي ان كريم هيرفض يا بابا بس انا بقولك عايزه الجوازة تتم ف اتصرف بقا..
عدلي ضيق عينه و اتكلم :
_و انتِ غيرتي رأيك ليه طلاما انتو الاتنين ماكنتوش موافقين؟!
بصت له بتحدي و اتكلمت :
_عشان لما بسيب حاجة بتاعتي بحب اسيبها بمزاجي و بس ..!
عدلي ماهتمش بقصدها و اهتم ان هى وافقت و بس
ابتسم و بص لها :
_ تعرفي انك اول مره تعملي حاجة صح يا سلمى.؟!
اتكلمت ببرود من غير ما تبص له :
_طب كويس ان حد فينا عمل للتاني حاجة صح...
بصت له بعدها كملت كلامها :
_بس قولي كده
هو انتَ ليه عايزني اتجوز كريم؟
يعني اصرارك غريب مش كده؟!
مسك التاب تاني و قلب فيه و هو بيتكلم :
_بصي ياستي انا بحب أكبر شركتي و نفوذي اكتر ف بالتالي بعمل استثمارات اكتر بس مع اللى هيفيدني اكتر..!
بصت له بتركيز و اتكلمت :
_يعني؟!
ساب التاب و بص لها :
_يعني يا سلمى شركة زي شركة الحسيني لصناعة السيارت دي من اكبر الشركات اللى بتصنع سيارات في الشرق الأوسط
شركة كبيرة و كل استثمارتها كبيرة
بس تخيلي كده شركة بالحجم ده تعمل استثمار كبير و عقد اتفاقيه مهمه مع شركة من شركات أوروبا بمبلغ كبير
بس يطلع الموضع نصب و الاتفاقية راحت
و عزت الحسيني خسر كم كبير من السيارات و خسر ملايين و خسر عملاء مهميين كمان
ف اكيد واحد زيه شركته بتقع هيبقى عايز يلحقها
و انا اللى هلحقها بس بالمقابل اللى يستاهل ...
_و انتَ هتستفاد ايه من شركته بعد ما افلست كده..!؟
_شركته ماأفلستش يا سلمى
هى على وشك الافلاس و انا لحقتها باستثمار معاه
عزت عملائه قلت ف كسب مستسمر كبير زيي
و كمان جايب له مستسمرين تانين
ده غير اني هسد الدين اللى على شركته كمان....
سلمى بصت له بذهول :
_ ثواني بس انا مش فاهمه حاجة
انتَ هتجيب الفلوس دي منين اصلا؟
ده مبلغ كبير اوي انت بتقول ملايين...
ده غير اني برضوا مش فاهمه انتَ ليه تساعده مصلحتك ايه؟!
_مصلحتي 40% من أسهم شركته
و كده دي مش خساره ليا انا كده خدت من اسهم الشركة و باقي الفلوس هتبقا دين عليه...
اما بقا جبت الفلوس منين ف أنا معارفي كتير يا سلمى هينفعوني باستثمارتهم و جزء صغير من الفلوس خدته منهم
متقلقيش يعني انا مظبط الدنيا..!
سلمى بصت له و هى ساكته تمامًا و مره واحده سألته :
_طب ايه علاقة ده بالجوازه.؟!
_علاقته ان بعد ما الامور تهدى الشركه هتكبر تاني و الدنيا هتتظبط تاني مع عيلة الحسيني
و انا شايف ان نسبنا معاهم اكبر مكسب لينا اكتر بكتير من ال 40% بتوعي دول
لو اتجوزتي كريم الحسيني و جبتي الوريث الاول و الاكبر ل اولاد الحسيني تخيلي هتبقي عايشه ازاي كده..؟!
عن القليلة هبقا مطمن عليكي اني سيبت وراكي ضهر يسندك..!
سلمى الكلام عجبها و تخيلت انها فعلاً لو وافقت على الجوازه دي و جابت وريث لعيلة الحسيني حياتها هتتغير للاحسن
بصت ل ابوها و اتكلمت بسخرية رغم انها اقتنعت بكلامه :
_بس نظريتك للمستقبل مختلفه فعلاً
يعني بدل ماتقولي هصالح ابني اللى راميه ومعرفش عنه حاجة و أرجعه
هنا تاني يبقالك ضهر و سند من بعدي
تقولي هعملك فلوس و ورث كبير يبقالك سند و ضهر..؟!
عدلي قام من مكانه و هو بيرد عليها :
_اخوكي ده مش ابني
هو اللى عصا أوامري و قرر يتجوز و يستقر برا مصر بقالي ٣ سنين معرفش عنه حاجة
و مش مهتم اعرف حتى..!
خلص كلامه و مشي بس سلمى وقفته بسرعة و هى طالعه وراه :
_انا هتجوز كريم بس بشرط انك ترجع فارس تاني
خليه وسطنا هنا هو و مراته لو سمحت..!
عدلي لف لها و بص لها لحظات بملامح بارده
بعدها مشي من غير مايتكلم معاها حتى..!
«««««««««««««««««««••
سُبحـانَ الله وبِحمـدِه عددَ خلـقِه ورضـا نفسِـه وزِنَـة عَـرشِـه ومِـدادَ كلِمـاتـه
»»»»»»»»»»»»»»»»»»»••
_يعني ايه اللي بتقوله ده يا جدي؟
انا بقولك خلاص اتكلمت مع الراجل و خدت ميعاد معاه
مش هينفع ارجع في كلامي.!
كريم بص لعزت اللى اتكلم بصرامه :
_و انا قايلك من الاول ان جوازك من سلمى أمر ولازم يتنفذ يا كريم
انتَ ياما عارضت كلامي مره في تعليم جودي و مره في جوازة ريم
بس المرادي لأ
كلامي هيتنفذ يا كريم...!
كريم حاول يتمالك اعصابه و اتكلم بهدوء :
_يا جدي انا مش بعارض كلامك خالص
انا بس مكنتش عايز ريم تتجوز واحد غير اللى هى حبته و لا جودي تدرس هندسه و هى ميولها حاجة تانيه
انا حرفيًا اي حاجة بتطلبها مني بعملها يا جدي و حضرتك اللى مش بتتهتم برأيي خالص
حتى لما قولتلك على الثفقة اللى فاتت بلاش تخاطر بمبلغ زي ده مع شركة اول مره نتعامل معاها ة انتَ خدت الموضوع عند اللى هو انتَ رافض يا كريم؟
طب انا هستثمر و فعلاً استثمرت فلوسك فيها و ضعيت الشركة و بيعت أسهم منها كمان...
بس معلش بقا انا مليش دعوه بصفقاتك مع عدلي يا جدي
حياتي مش صفقة للنقاش يا جدي انا أخترت زهره و عايزها هى مش عايز سلمى دي..!
كريم خلص كلامه و مشي من مكتب جده و هو مضايق منه و مكانش عايزه النقاش بينهم يطول عن كده..
عزت قعد على مكتبه و بدأ يفكر و مش عارف يعمل ايه
اتنهد و مسك تليفونه و طلب عدلي :
_ايوه يا عدلي انا عايزك في موضوع مهم ياريت تجيلي بكرا الشركة عشان نتناقش فيه..!
_تمام، بس انا كمان كنت عايز اعرفك اني اتكلمت تاني مع سلمى و هى وافقت خلاص شوف هنعلن الخطوبه امتى عشان نمضي العقود..!
عزت سكت و معرفش يرد و بعد لحظات اتكلم :
_طب يا عدلي احنا نمضي العقود بكرا و نبقا نعلن الخطوبه بعدين المهم نخلص من ديون الشركة دي..!
عدلي قعد و حط رجل على رجل و ابتسم لانه فهم عزت عايز يعمل ايه و اتكلم :
_نحدد الخطوبه الاول بعدها هشتري الاسهم يا عزت بيه
و بعد فرح كريم و سلمى مستثمريني هيبدوا ينوروا الشركة ..!
_طب بص يا عدلي من الاخر كده
انتَ خدت وقت عبال ماتقنع سلمى و انا عايز وقت اقنع كريم برضو..
_وقت قد ايه..؟!
_من الاخر كده يا عدلي كريم في دماغه واحده و انا مش عايز اغصبه على حاجة
سيبه حاليًا يتسلى برحته بعدها هخطبه سلمى بنتك
بس احنا عايزين نسد ديون الشركة الاول ..!
عدلي سكت كام لحظه يفكر بعدها رد عليه :
_تمام يا عزت بيه
و انا موافق، هنأجل خطوبة سلمى و كريم بس وقت بسيط ياريت تقدر تقنعه و تعرفه مصلحته
و بكرا نمضي العقود بس مش هنسد نص الديون بس و الباقي لما الاتفاق يتم..!
عزت زفر بضيق و اتكلم :
_ماشي يا عدلي اللى تشوفه..!
✿✿✿
سبحان الله وبحمده، سبحان الله العظيم
✿✿✿
كنت لسه في أوضتي و حكيت لماما كل حاجة من البداية خالص
حتى عرفتها ان العربية اتخبطت و ان كريم اللى خبطها و ان دي كانت اول مره اشوفه
و على مقابلتي معاه و خروجي معاه و انه قالي هيتقدملي قولتلها كل ده
و عرفت ان كريم ده هو نفسه اللى جالي المستشفى مع بابا يطمن عليا....
ماما ظهر عليها الضيق و انا بحكيلها بس كانت ساكته وسمعتني للآخر بعدها بصت لي بعين كلها حنية وعتاب :
_يعني خرجتي معاه من ورا باباكي ومن ورايا؟ يا زهرة إنتِ عارفة إن الغلط بدايته كده... كذبة صغيرة تجر وراها مليون كذبة.
هزيت راسها بندم :
_عارفة يا ماما اني غلطت بس هو فعلاً محترم ومأذانيش في حاجة
ودلوقتي أنا قطعت علاقتي بيه خلاص قولتله مفيش ولا كلام ولا يلام تاني و هو اصلا المفروض هيقابل بابا انهارده ..!
ماما سكتت و انا اتكلمت بقلق :
_هو تفتكري بابا ممكن يوافق؟!
_انتِ موافقة؟!
بصيت لها بتردد و هزيت كتفي اتكلمت بحيره:
_مش عارفه...
ممكن اه يعني حابه الموضوع
و ممكن لا عشان قلقانه..!
مسكت ايدي و اتكلمت بهدوء :
_اه ايه و لا ايه؟
يعني حابه الموضوع ازاي و قلقانه من ايه؟!
_حابه اني اكون معاه، معرفش ازاي بس انا حسيت بفرحه معاه
حسيته فاهمني اوي و بيعمل اللى يريحني و يطمني
يعني قالي انا رغم اني حابب اخرج معاكي بس لو مش مطمنه بلاش نخرج
ولما قولتله مانخرجش تاني قالي ماشي بس هقابل والدك عشان انا حابب امون معاكِ
و كمان صريح في مشاعره اوي مش بحسه بيلف و يدور عليا قالي انا معجب و حابب اتعرف ف اتقدم لي
ماقليش انا حبيتك و بتاع و كلام فاضي،
لا قالي شعوره بصراحة
و كمان بيهتم بادق التفاصيل يعني لما خرجت معاه يا ماما
لقيته عارف تفاصيل مهمه عني
عارف اني بحب الخيل ف عمل سباق معايا
و خسر نفسه عشان نقضي وقت اطول مع بعض...،
انهارده لما جيه مع اخته جابلي كذا حاجة بتدل انه مهتم بالتفاصيل التافهه حتى...،
و جيته امبارح مع بابا فرحتني الصراحه، يعني رغم ان بابا ممكن يشك فيه هو ماهتمش و أصر يجيي معاه و ده يدل انه واخد الموضوع جدي فعلاً مش تسلية و خلاص ..!
ماما كانت بصالي و سمعاني و هى ساكته تمامًا مستنياني اخلص
اتكلمت بهدوء :
_يعني لو بابا جيه و فاتحك في الموضوع ده هتوافقي؟!
_هو انا عايزه اوافق بس خايفة..!
بصت لي باستغراب :
_خايفة من ايه؟!
_خايفة يا ماما اتعلق بيه او احبه بجد و يختفي فجاءه
يعني اصرار سلمى ده خوفني شويا
ده غير اني عرفت ان كريم على خلاف دائماً مع جده
ممكن جده يرفض عشان شراكته مع عدلي ف ساعتها كريم يسيبني عشان جده..!
ماما ابتسمت :
_طب تعرفي يا زهره ان لو كريم سابك عشان جده تعرفي انه ماكنش خير ليكي و مش بيحبك؟
يعني ليه يكون بيحبك و يسيبك عشان جده قاله كده؟!
هزيت كتفي و رديت ببساطه :
_ممكن عشان مضطر..!
_لا يا زهره مفيش حاجة اسمها كده
الانسان لما بيحب يا زهره بيضحي عشان يبقا مع حبيبه مش يقول معلش اصلي مضطر
ابوكي زمان ساب ابوه و اخوه و فلوسه و املاكه كلها عشاني
عارفه ليه؟
عشان بيحبني يا زهره
سابهم كلهم و اختارني
ساب الشركة و الفيلا و العربيات و ده كله و عيشنا في حاره بسيطه كذا سنه
فضلنا كذا سنه بعيد عنهم و مبسوطين
سابهم عشاني
عشان بيحبني بجد، ف كريم لو اتحط في نفس الموقف ده ف ده هيحدد هو بيحبك ولا لأ
و لو هيسيبك ف تعرفي انه مكانش خير ليكِ
كان تجربه ربنا بعتها ليكِ عشان تتعلمي منها درس مهم اوي من دروس الحياة
كل مشكلة بتواجهنا يا زهره بتبقى درس لينا
اما نتعلم منه و نفهم اللعبه
او نفضل معميين و نقع كل لما نقوم لحد ما نتعلم بجد ..!
ماما خلصت كلامها و كانت لسه ماسكه ايدي و بتطبطب عليا
و انا سرحت في كلامها، كلامها صح فعلاً احنا ليه نخاف نواجه على طول؟
طب ما نغامر بس لازم نتعلم فعلاً..!
طلعت و سابتني لوحدي و انا فضلت مكاني لحد مانمت
ممكن بتهرب من بابا مش عارفه هو وافق اصلا ولا لأ
او كريم كلمه ولا لسه..!
••••••••♡♡••••••••
الحمد لله يارب كما ينبغي لجلال وجهك ولعظيم سلطانك.
•••••••••••♡♡•••••••
تاني يوم صحيت على صوت خبط على الباب و صوت فادية
_حاضر يا فادية صحيت خلاص.!
_طب انزلي بسرعة عشان علي بيه عايزك قبل مايمشي و هو كده هيتأخر..!
_حاضر يا فادية قوليله نازله ..!
قومت غسلت وشي و لبست الاسدال على البيجامه و نزلتلهم تحت
كانوا خلصوا فطار و قاعدين في الليفنج ماما و بابا بس اعتقد يحيى راح على الشركة
_صباح الخير..!
ردت ماما :
_صباح الخير يا زهرتي تعالى اقعدي بابا عايزك في موضوع مهم ..!
قعدت جنبها و قصاد بابا و انا بصاله بتوتر و هو ابتسم و بص لي و هو بيمد ايده ليا عشان اجي اقعد جنبه :
_ تعالي يا زوزو جنبي هنا عايزك..!
قومت قعدت جنبه على الكنبه و هو حط ايده على كتفي و حضني
بصيت لماما نظره معناها "قوليله؟ "
بس هو فهم النظره و رد عليا هو
_قالت لي يا زهره قالت لي..!
بصيت لها بدهشه و اتكلمت :
_لحقتي يا ماما..؟
ماما اتكلمت بدفاع :
_هو اللى جالي امبارح عارف كل حاجة و انا قولتله اللى اعرفه و بس.!
بصت لبابا باستغراب و هو اتكلم :
_ كريم اللى قالي يا زهره..!
_كريم؟!
_امم، جالي و حكالي كل حاجة و متقدملك
عايز يجي اليومين دول نقراء فاتحه و نتفق و لما تفكي الجبس نحدد خطوبة
انتِ ايه رايك..؟!
كنت لسه ساكته و انا بصاله بتردد مش عارفه اوافق و لا ارفض
انا مش بحب كريم بس بطمن معاه
و بحب اشوفه
و بحب اشوف اهتمامه بيا و خوفه عليا
و بحب اكون معاه كمان..!
كنت سرحانه و لسه بفكر لقيت ماما اتكلمت :
_هااا يا زهره؟
موافقه..؟!