رواية عانيت لأحبك الجزء الثاني2 الفصل الخامس والعشرون25 والسادس والعشرون26 بقلم فاطمه محمود

" رواية عانيت لاحُبك 2 "

                     صرت انت

" البارت الخامس وعشرون "

" الكاتبة فاطمة محمود "

نغم: مستر يوسف روحت فين

يوسف كان واقف بيبص لعربية عمر اللي مشيت وفاق من تفكيره: اها معاكي 

نغم: طيب حضرتك هتكون في المكتب امتى

يوسف: ساعة بالكتير وأكون عندك

نغم: تمام يفندم في انتظارك

يوسف قفل مع نغم ودخل الفيلا وطلع الجناح بتاعه وتفكيره في فيروز اللي أول ما شافها مقدرش يتجاهلها

يوسف بيكلم نفسه: يوسف حاول تتحكم في مشاعرك ودي حاجة انتهت. أرجوك بلاش تضيعنا

فتح باب الجناح ودخل ياخد شاور ويجهز شنطته اللي هياخدها شرم بعد ما يخلص الشغل

..

في عربية عمر

فيروز كانت ساكتة وسرحانة في تفكيرها وعمر بصلها في المرايا وفهم إنها بتفكر في يوسف. تنهد بزعل ومريم أخدت بالها بصتله ومسكت إيده. عمر بصلها ومريم هزت راسها بمعنى بلاش تضايق. عمر مسك إيدها وبص قدامه وركز 

في الطريق

..

بتفتح عيونها غزل وبتبص حواليها وبتلاقي نفسها في أوضة في الفندق اللي قاعدين فيه. بتفضل تفكر هي جت هنا إزاي وهي آخر حاجة فاكراها كانت مع إيان. قطع تفكيرها خبط الباب. بتقوم وبتمسك الطرحة وبتفتح الباب وبيكون إيان

إيان ابتسم: صباح الجمال يروحي

غزل: صباح الخير

إيان: ينفع أدخل طيب

غزل: آه آسفة. ادخل

إيان دخل وقعد على كنبة موجودة وغزل بتفضل واقفة وهي بصالّه. إيان بيبصلها وبيمد إيده ليها وغزل بتمسك إيده وإيان بيقعدها جمبه وبيبصلها

إيان: امبارح نمتي واحنا بنتكلم ومقدرتش أفوقك بصراحة فـ شيلتك وجبتك هنا تنامي

غزل بصتله وفتحت عيونها بصدمة: إيه

إيان ضحك على شكلها: يا ستي والله معملتش حاجة

غزل: إيان انت مش شايف إننا قريبين أكتر من اللازم

إيان استغرب كلامها وفهم إنها متضايقة من قربه ليها: أنا آسف لو ضايقتك من طريقتي معاكي

وبص قدامه بزعل وغزل مسكت وشه بإيدها: انت فهمتني غلط يا ايان

إيان: أومال قصدك إيه

غزل: أنا قصدي على شعري إنك شوفته وده حرام وكمان

إيان: أنا عارف ومعاكي حق بس أنا شوفته قبل كده ومحبتش إنك تبقي مخنوقة وانتي نايمة وبصراحة مقاومتش شكله وجماله

غزل افتكرت لما يوهان شال الطرحة من على شعرها وإيان شافه والخوف ظهر في عيونها. إيان اتضايق من اللي قاله ومفكرش فيه قبل ما يقوله وأخدها في حضنه

إيان: أنا معاكي يحبيبتي ومفيش أي حد يقدر يقربلك

غزل بعدت عنه: أهو ده غلط 

إيان بص لشفايفها: طيب هاتي بوسة وأنا مش هقربلك تاني

غزل مسكت المخدة وضربت إيان بيها: إيان

إيان ضحك وأخد المخدة منها: خلاص بهزر معاكي

غزل بصتله وابتسمت وبصت للصندوق اللي جمب إيان: إيه الصندوق دا

إيان: كنت هنسى

إيان مسك الصندوق وفتحه وطلع منها فستان أبيض وكان شكله هادي وجميل أوي. غزل بصتله بابتسامة: ده شكله حلو أوي

إيان ابتسم: كل سنة وانتي في قلبي والسنة الجاية نكون مع بعض أنا وانتي وبنتنا يروحي

غزل عيونها اتملت دموع من كلام إيان ليها وإيان مسح دموعها: مش عاوز العيون دي تعيط

غزل: بجد مش مصدقة

إيان: لأ يروحي صدقي

غزل قربت منه وحضنته

إيان بهزار: أهو انتي اللي قربتي مني

غزل ضحكت وهي حضناه: بقولك قد إيه إني بحبك يحبيبي

إيان: مش أكتر مني يروحي

غزل بعدت عنه وبصت للفستان: زوقك حلو أوي

إيان: ده متصمم مخصوص ليكي

غزل: إزاي

إيان: أنا من فترة كدا كان في دماغي إني أعملك حاجة انتي بتحبيها والفستان ده مفيش منه أصلاً يعني انتي الوحيدة اللي هتلبسيه

غزل: انت بجد عارف كل حاجة بحبها إزاي

إيان: عشان بحبك أوي وعاوز أعرف كل تفاصيل عنك. ويلا قومي غيري هدومك بقى عشان ننزل نفطر ونقضي شوية وقت مع بعض قبل ما العيلة تيجي عشان هياخدوكي مني

غزل ضحكت: حاضر

إيان ابتسم وبص لغزل أوي وهي استغربت ده وفجأة إيان قرب من خدها وباسها وبعد عنها وغزل كانت بصالّه

إيان ضحك: آسف

غزل ضربته في كتفه بخفة: اخرج من هنا يا ايان

إيان ضحك: حاضر

إيان قام وغزل كانت بتزقه بإيدها وهو بيضحك

إيان: متتأخريش عليا

غزل: امشي من هنا

إيان ضحك ومشي وغزل قفلت الباب وابتسمت وحطت إيدها على خدها وهي مبسوطة

..

في الشركة

بيدخل يامن ونغم كانت في مكتبها ومش مركزة في دخول يامن

يامن: انتي اللي قاعدة

نغم بصتله: بتكلمني أنا

يامن: هو في غيرك هنا

نغم بضيق: نعم حضرتك عاوز إيه

يامن: متقومي تقفي يا بت وانتي بتكلميني

نغم: ليه شايف إننا في الكلاس يمستر

يامن خبط على المكتب واتكلم بعصبية: انتي بتتريقي

نغم اتخضت واتكلمت بهمس: يخرب بيتك

يامن: بتقولي إيه

نغم: بقول إنك تهدى يأستاذ وقول عاوز إيه

يامن: الميتنج أجليه انهارده

نغم: مش هينفع والله

يامن: نعم. انتي فاكرة نفسك إيه

نغم: لسه مفكرتش بس عندي سؤال ونفسي أقوله ليك

يامن: سؤال إيه

نغم: شايف نفسك على إيه

يامن: انتي بتكلميني أنا كده يا بت انتي

نغم: مش طلبت منك أسألك وانت وافقت

يامن: أنا يامن. بتاع الـ 3D والرندر

نغم: اممم بتلون الصور يعني

يامن اتضايق جداً من استهزائها بشغله: اللي انتي واخداه تريقة ده أهم من شغلك

نغم: ليه هو أنا فاضية زيك

يامن كان هيرد عليها بس يوسف دخل وشافهم بيتخانقوا

يوسف: في إيه. صوتكم جايب آخر الشركة

يامن بص ليوسف: انت أكيد فاهم في إيه

يوسف: اهدى وبلاش تتعصب طيب أكيد نغم متقصدش تضايقك

نغم: والله يمستر يوسف كنت قاعدة بشتغل وهو جاي متخانق مع دبان وشه واتخانق معايا

يامن: دبان إيه. القرف اللي بتقوليه ده المفروض إنك مثقفة والكلام ده ميتقالش في الشركة

نغم ولا اهتمت بكلامه وكانت باصة ليوسف: شايف يفندم

يوسف: معلش ينغم حقك عليا أنا وانت اتفضل معايا المكتب

يامن مشي مع يوسف وهو متعصب ودخلوا المكتب ونغم بصت ليامن وبعدين قعدت: الواد ده مش هينفع أشوفه كتير

..

في عربية زين

حياه كانت مشغلة مهرجان وبتغني وبتعمل حركات مجنونة وزين مش قادر يبطل ضحك عليها

حياه وهي مندمجة ومش شايفة زين اللي بيضحك عليها وبتعمل حركات بإيدها: بص ياوحش أنا مش بعرف أطير 

بس أنا أخطر من أي خطير. لو ع الأكشن والتخطير هتشوف واحد مجرم. إسأل قبل ما تتورط ياه. خد فكرة عن العبد لله. متجيش مع حد دماغه تعباه. تلشاني لما أهجم

زين قفل الكاست وحياه بصتله

حياه: ليه كده يزين

زين: يابنتي إيه اللي انتي بتسمعيه ده بتجيبي الأغاني دي منين ومين ده اللي مصدعاني بأغانيه

حياه رفعت رجليها واتربعت على الكرسي وبصت لزين: انت بجد متعرفش مين ده يزين

زين بصلها ورجع يركز في السواقة: لا والله محصليش الشرف

حياه: ده نجمي المفضل على فكرة

زين: والله

حياه: آه والله انت لو سمعت كل أغانيه هتحبه زي

زين: لاا أنا مش زيك بحب أكتر من حد

حياه فهمت إنه غيران وابتسمت: طيب قولي يزينو بتحب مين

زين: لا خلاص بقى مالهوش داعي إني أقول

حياه مسكت دراعه: قول بس يزين

زين بصلها: واحدة مجنونة قاعدة جمبي وبتكلمني أهو

حياه مسكت وشه بإيدها وخليته يبص قدامه: الطريق

زين ابتسم: طيب إيه هي مش هتردي يعني

حياه: لا

زين: ماشي يحياه

حياه: شغلنا حاجة بقى

زين: لا ونبي يحياه بلاش الزفت اللي بتسمعيله ده

حياه ضحكت: حاضر هغيره

شغلت الكاست حياه واشتغلت أغنية أنا شوفت حلاوة الطلة

حياه ابتسمت وبصت لزين وفضلت تغنيله وزين يبصلها وهو مبسوط بوجودها معاه

..

في مكتب يوسف

يوسف: انت مش هتبطل تتخانق معاها

يامن بصله: ياعم أنا البنت دي من أول ما جت الشركة وأنا مش طايقها وانت عارف كده. وأنا متخانقتش معاها أصلاً كنت بقولها الغي الميتنج عشان انت مسافر قالتلي لأ. وبعدين كمان تتريق على شغلي. تقولي إيه بتلون صور يعني. حتة بت متجيش عشرة سنتي تكلمني أنا كده

يوسف بيحاول يكتم ضحكته: ما هي معاها حق

يامن: حتى انت يا يوسف شايف كده. على العموم تمام أوي

يوسف ضحك: متزعلش يا يامن بقى. والله انت وجودك مهم أوي معانا هنا

يامن: ما أنا عارف. مش مستنيك تقولي

يوسف ابتسم: ماشي يا عم

يامن: هو انت مش قولتلي إنك مسافر. جيت فجأة كده ونجّدت البت دي من تحت إيدي إزاي

يوسف: ما فعلاً كنت هسافر بس محبتش نأجل الميتنج. فـ على آخر لحظة قررت أحضره وأمضي العقد وبعدين أسافر

يامن: طيب كويس

يوسف: خلاص فكك من نغم شوية

يامن: متفكرنيش بيها

يوسف ضحك: حاضر

..

في مطعم الفندق اللي نازل فيه إيان

إيان كان قاعد مستني غزل اللي اتأخرت عليه وصوت رنة فونه قطع تفكيره. رد

زين: إيه يأستاذ إيان كل ده متردش علينا

إيان: تصدق أنا كنت عاوز أرمي الفون ده من أول ما وصلت شرم

زين: والله أنا لو مكانك كنت هعمل نفس الفكرة

حياة بصتله: تعمل إيه يزين

زين: لا يحبيبتي مفيش. بكلم إيان بس

إيان ضحك: هي حياة جنبك

زين ابتسم: آه في الطريق خلاص قربنا نوصل. المهم غزل عاملة إيه

إيان: يعني أقلق عليها وهي معايا. ده اسمه كلام

زين: أكيد لأ طبعاً. ببقى مطمن. بس بسأل على أختي حبيبتي مشوفتهاش امبارح

إيان: أختك بقالي ساعة مستنيها وهي منزلتش لحد دلوقتي

زين: أكيد يعني هتنزل دلوقتي

إيان: آه أهي وصلت

غزل بصتله وقعدت: بتكلم مين

إيان: زين

غزل خدت الفون من إيان بسرعة: زين وحشتيني

زين: وانتي كمان يقلبي. طمنيني عنك مبسوطة

غزل هزت راسها وابتسمت: آه يحبيبي. قولي بابا وماما فين

زين: في العربية يحبيبتي احنا كلها ساعتين ونوصل عندك

غزل: توصلوا بالسلامة

زين: الله يسلمك

حياة: أنا عاوزة أكلم غزل يزين

زين: ماشي يحبيبتي

إيان خد الفون من غزل ورد على حياة: بقولك إيه يحياة 

انتو خلاص هتوصلوا فكلميها براحتك. سيبيها دلوقتي 

معايا شوية. وحياة زين

حياة: ماشي يا إيان ماشي

إيان: مشكورلك والله

إيان قفل وبص لغزل: انتي كنتي فين كل ده

غزل: مش أنا قدامك أهو. يبقى ليه نفكر كنت فين

إيان: على رأيك. و أهو نستغل الوقت اللي باقيلنا نقضيه سوا

غزل: طيب أنا جعانة

إيان: عيوني. شوفي عندك المنيو تحبي تاكلي إيه

غزل: اطلبلي علي زوقك

إيان: حاضر يروحي

..

في عربية يوسف

كان سايق وبص لسلمى اللي باين عليها التوتر شوية

يوسف: قلقانة ليه طيب

سلمى: أنا بس مش متعودة يا يوسف إن المغامرة دي تحصل معانا ومشوفش غزل يوم كامل

يوسف ابتسم: أهو إيان هيخليكي تشوفي كل حاجة

سلمى: بجد الولد ده بيجيب أفكار ويفاجئنا دايماً

يوسف: طالع لعمو يوسف

سلمى: وانت مبسوط إنه زيك

يوسف: طبعاً مبسوط إني لقيت شاب يحب بنتي ويخاف عليها أكتر من نفسه. زي ما أنا بحبك يسلمى

سلمى: معاك حق. حب إيان لغزل تحسه مختلف وظاهر أوي. بس انت يا يوسف بجد مفيش زيك

يوسف بصلها بحب ومسك إيدها باسها: وأنا عمري ما هلاقي حد زيك يحبيبتي

..

في الشركة

في أوضة الاجتماعات بالتحديد كانوا موجود عميل الصفقة الجديد باسل الحسيني والسكرتير الخاص بيه ويوسف ويامن. نغم كانت موجودة معاهم

وبعد دردشة في الشغل واتفقوا ويوسف والعميل مضوا العقد

باسل: كنت حابب إني أشوف 3D النهائي يمستر يوسف

يامن كان هيرد بس نغم قاطعته: على آخر الأسبوع يفندم هيبقى جاهز وتقدر تشوفه براحتك. مستر يامن بدأ فيه من امبارح أول ما أخد تفاصيل المشروع من حضرتك

يامن كان باصص ليها وهو مش مصدق اللي عملته واتفاجئ كمان أنها عارفه أنه بدأ في المشروع

باسل: تمام. كنت حابب أعرف الشغل هياخد وقت قد إيه

نغم: والله يفندم احنا لسه مبنناش طوبة وحضرتك أكيد عارف بس انت متحمس ونسيت إننا بنتفق الأول ونمضي العقد وتشوف الـ 3D وبنبدأ على طول

باسل ابتسم: آه عندك حق. بصراحة متحمس للشغل معاكم

نغم: و الشغل بتاعنا هيعجبك وزي ما انت عاوز بالظبط

باسل: أتمنى. مستر يوسف هي دي تبقى إيه

يوسف ابتسم وبص لنغم: تسمحيلي أتكلم

نغم: اتفضل يفندم أكيد

يوسف لباسل: دي نغم السكرتيرة الخاصة بيا وزي ما انت شايف شاطرة جداً وبعتمد عليها. مخلتنيش أتكلم كلمة وكل حاجة ظبطتها

يوسف نهى كلامه وضحك وباسل ابتسم

باسل: تمام يمستر يوسف أنا همشي وهستنى إنك تبلغني إن 3D جاهز و اقدر اشوفه

يوسف: تمام يباسل بيه

باسل قام وسلم على يوسف وخرج هو والسكرتير بتاعه

يوسف بص لنغم وهو مبتسم

نغم بصتله: آسفة يفندم لو كنت عملت حاجة دايقتك. الحماس كان واخدني في حتة تانية ومكنتش قادرة أسكت

يوسف: انتي أبهرتيني. بجد يعتمد عليكي ينغم

نغم: ميرسي يفندم

يوسف: احنا خلاص مش هنقلق تاني على الشركة طول ما انتي موجودة

نغم ابتسمت: أكيد وجودكم مهم يفندم. أنا هنا بس بسد حاجة بسيطة من شغلكم وشطارتكم

يوسف ابتسم. يامن كان باصص ليها وهو مش طايقها

يامن: هو انتي فاكرة إنك بتتكلمي مكان حد المفروض هو بس اللي يرد تبقى دي شطارة

نغم: أكيد طالما مستر يوسف قال كده

يامن بص ليوسف: هو بينفخ ريشك ع الفاضي مش عارف ليه

يوسف ضحك: في إيه يا يامن مش دي الحقيقة. وبصراحة هي شاطرة جداً

يامن بصله وسكت. وبصلها بضيق

يوسف: طيب أنا همشي دلوقتي وانت ظبط كل حاجة يا يامن ولو حصل أي حاجة بلغني أوك

نغم: متقلقش يفندم كل حاجة تحت السيطرة

يامن على صوته: ما تيجي تقعدي مكاني أحسن

نغم كانت بصالّه ببرود وهي مبسوطة من جواها إنها دايقته وأخدت حقها

يوسف: خلاص محصلش حاجة اهدى

نغم: طيب يفندم أنا هخرج. محتاج أي حاجة

يوسف: لا اتفضلي

نغم مشيت وكانت هتفتح الباب بس وقفت على صوت يوسف

يوسف: نغم ما تيجي تسافري معايا

نغم: أنا

يوسف: آه تعالي اقعدي الأول

نغم رجعت وقعدت ويوسف بصلها: أنا هسافر شرم عيد ميلاد بنت خالو والعيلة كلها موجودة هناك. وكنت قولت أحصلهم لما أخلص وأهو تتعرفي على البنات

نغم ابتسمت: في بنات كمان

يوسف: آه بنات العيلة كتير شوية وهتحبيهم. وهو يوم غيري جو شوية وبكرا هنرجع

نغم: موافقة

يامن بص لنغم: إزاي بس دي هي اللي هتشيل الشركة على كتافها

نغم: انت الخير والبركة بردو يأستاذ يامن

يوسف: ما تيجي تسافر انت كمان معانا يا يامن

يامن: والشركة اللي مكلفني بيها البوص مقدرش أسيبها

يامن بص لنغم: خدها هي أكيد أول مرة تسمع عن شرم

نغم حبت تدايقه: آه أهو آخد فكرة وانت ركز هنا في الشركة ولون الورق بضمير وارجع بالذكريات بقى

يامن خبط على المكتب وبصلها بتوعد وبص ليوسف: سفرية لذيذة

يامن خرج من المكتب ويوسف بص لنغم وضحك: زودتيها شوية انتي ينغم

نغم ابتسمت وهزت راسها بلا

يوسف: طيب يلا نخرج

يوسف ونغم خرجوا من أوضة الاجتماعات

يوسف: أنا هدخل المكتب ثواني وأرجعلك أوصلك بيتك تجيبي هدوم وبعدين نمشي

نغم: تمام يفندم

يوسف دخل مكتبه ونغم وقفت وبصت ليامن اللي واقف مع موظف بيتكلم وأخد باله ليها وبصلها بضيق وهي ضحكت

..

العيله كلها وصلت قدام الفيلا الخاصه بي يوسف في شرم وكل واحد نزل هو ومراته و الشباب خرجوا الشنط من شنطه العربيه و البنات دخلوا الفيلا والشباب دخلوا وراهم بالشنط وطلعوا فوق والبنات والشباب الكبار قعدو في الريسبشن

وبعد مخلصوا كلهم قعدو سوا

سيف : حد يكلم الواد ايان يجي هو و زوزو

زين : هكلمه انا

زين رن علي ايان اللي رد بعد ثواني

ايان : ايه وصلتو

زين : اها وصلنا تعال انت وغزل العيله مستنياكم

ايان : تمام هكون عندك بعد شويه

زين قفل الفون وبص للعيله : كلها ساعه و ايان و غزل يوصلو

يوسف : ماشي يحبيبي 

سلمي : هو ليه ايان مفضلش هنا هو وغزل بدل مراحو فندق

نور : اكيد كان في افكار في دماغه وحب ينزل في فندق

شهد : بس تصدقو الفيلا وحشتني اوي يبنات بقالنا قد ايه

مجيناش هنا

حياه : هو انتو جيتو هنا قبل كدا يماما

شهد : اها يحبيبتي وبعد ما جيتي انتي واخوكي عينك ما تشوف إلا النور مخرجناش تاني نهائي وباباكي وقته كان كله شغل والوقت عدا

سيف : نعمل ايه بس يشوشو حياه لوحدها مش بنخلص

من مشاكلها

حياه : كدا يسيفو

العيله كلها ضحكت

احمد : دي حبيبه قلبي حياه 

حياه : حبيبي يجدو

..

غزل كانت قاعده في العربية و ايان حط الشنط وقفل

شنطه العربية وراح فتح باب العربية وركب وبص لغزل

و ابتسم

ايان ساق العربية وكان باصص للطريق : كان نفسي نقضي

وقت اكتر من كدا مع بعض بس عليا اول منتجوز هنسافر

و ننسا اي حاجه

غزل بصتله : ما احنا دلوقتي هنقضي وقت حلو اوي مع العيله كلها

ايان : ماهو حلو مختلفناش بس مش زي ما كنا لوحدنا

غزل : ايه كنا لوحدنا دي يا ايان متظبط كلامك

ايان : أظبط كلامي؟ انتي اتعديتي من حياه من كتر قعدتك معاه

غزل : لاا متعديتش ولا حاجه بس يعني بحس من كلام اننا

كنا مع بعض و....

ايان : و ايه كملي

غزل بصتله وسكتت

ايان : انا فاهمك علفكرا ومقصدش حاجة غلط من اللي 

قولته

غزل : انت زعلت مني

ايان بصلها : لاا بس انتي بقيتي فجاه بتحطي بينك وبيني حواجز مش فاهم ليه

غزل : عشان بحبك يا ايان مش عاوزه من حبنا لبعض نعمل

حاجه تغضب ربنا

ايان فهم غزل و انبسط من كلامها : حاضر يحبيبتي هحاول والله

غزل ابتسمت وكانت باصه ل ايان طول الطريق و ايان

كان واخد باله و ابتسم

..

يوسف كان واقف بعربيته قدام العماره اللي ساكنه فيها نغم. بعد دقايق بتنزل وهي معاها شنطه وبتفتح الباب الورا وتحط الشنطه وبتقفله وبتفتح الباب وبتركب قدام 

نغم : آسفين يهندسه على التأخير

يوسف : ولا يهمك

يوسف اتحرك بالعربية و الصمت كان مسيطر

نغم : ممكن سؤال شخصي لو مش هضايق حضرتك

يوسف : اتفضلي بس بلاش حضرتك انسي دلوقتي اني مديرك

نغم : طيب اقولك ايه

يوسف : يوسف عادي. ايه سؤالك

نغم : انت حياتك كلها شغل وبس

يوسف : قصدك عاطفياً

نغم : اها بالظبط يعني شاب زيك وسيم ناجح في شغله ابن

عيلة كويسه فيك صفات حلوة كتير أو شكلك انت اللي مش

حابب ورافض ومن الشباب اللي مش عندهم استعجال في

حياتهم

يوسف ابتسم علي كلامها : شكلك بتشوفي اكشن و غموض

كتير

نغم : اها انت عرفت ازاي

يوسف : من كلامك 

نغم : يعني التحليل اللي قولته ليك غلط

يوسف : للأسف اها

نغم : اول مره متظبطش معايا

يوسف ضحك عليها وسكت شويه وبعدين اتكلم : بصي

يا ستي انا دلوقتي اكتر حاجه مركز عليها في حياتي هي

الشغل و اتجوزت قبل كدا ومنجحتش في دا و انفصلت

نغم : انت بتتكلم جد

يوسف : ايوا

نغم : هو انت عندك كام سنه

يوسف ضحك و بصلها ورجع بص قدامه : شوفي خبرتك وقوليلي

نغم : امم ممكن يعني 26

يوسف ابتسم ونغم بصتله : اوعي تقول غلط

يوسف : طلعت من تحت ايدك المرادي ينغم انا عندي 30

نغم : مبلاش صدمات يمستر مين دا اللي عنده 30

يوسف ضحك : انا والله

نغم : بجد ازاي مش عارفه

يوسف : عموما السن دا مجرد رقم. لما تشيلي مسؤولية

بتحسي انك كبرتي ولما تحصل حاجه حلوه تفرحك بتبقي 

مبسوطه وتحسي انك بتصغري كانك طفله يعني الاحساس هو اللي بيعيشك سنك فهمتني صح

نغم : معاك حق

رجع الصمت للحظات و يوسف كسره المرادي

يوسف : انتي عايشه لوحدك

نغم : ايوا

يوسف : مبتخافيش من الوحدة لانك بنت يعني

نغم : اتعودت عليها بقيت هي صديقتي الوحيده

يوسف : هو انتي مش عندك حد من اهل

نغم : هو فيه بس ميتقالش عليهم الكلمه الكبيره دي اهلي..

ونا بنسبالي من وقت ما ماما و بابا اتوفوا ونا اهلي كلهم ماتوا

يوسف : ربنا يرحمهم

نغم : يارب

..

من جهة تانيه كانت قاعده نور مع البنات و بالها مشغول 

مع يوسف ابنها و فارس لاحظ دا وراح عندها وقعد جمبها

فارس : اطمني قرب يوصل

نور : كلمه يفارس

فارس : حاضر

فارس رن علي يوسف ورد بعد ثواني : ايوا يبابا

فارس : ايه يحبيبي قربت توصل

يوسف : يعني لسه شويه 

فارس : طيب مامتك عاوزه تكلمك

نور اخدت الفون من فارس : بلاش تتاخر يا يوسف

يوسف : حاضر يحبيبتي بس تقلقي مفيش اي حاجه

نور : هطمن لما تكون قدامي

يوسف : حاضر مسافه السكه اهو 

نور : خد بالك من نفسك

يوسف : ماشي. باي

نور : باي

فارس اخد الفون وبصلها : انبسطي مع البنات و يوسف

هيوصل

نور هزت راسها و فارس رجع يقعد مع الشباب

..

نغم بصيت ليوسف

نغم : دي مامتك

يوسف : ايوا 

يوسف يصلها و ابتسم : باين اوي من قلقها صح

نغم ابتسمت : اها

يوسف : مش عارف ليه بيقلقو لو غبنا عنهم

نغم : عشان حتة منهم ولما بتغيب طبيعي تقلق وتفكر

فيك

يوسف هز رأسه و ابتسم

نغم : أنا شكلي صدعتك 

يوسف : لاا أبدا

نغم : الا انا عارفه بس اكيد انت محرج تقولي عشان زوق

وكدا كل اللي اعرفهم يقولولي بطلي رغي وفضوليه زياده

عن اللزوم بس انا اعمل ايه بقا 

يوسف ضحك : ايه

نغم : افضل اتكلم واتصرف بطريقتي ولا بيهمني

يوسف : بجد دي احلي حاجه فيكي قصدي انك يعني مش هامك كلامهم ومتغيرتيش لسه علي طبيعتك

نغم : بس برضو مقولتليش انت زيهم يعني اتضايقت

يوسف : لاا بالعكس أنا مبسوط 

نغم : عنيا هصدعك

يوسف ضحك : لاا مش اوي كدا

..

في جنينه الفيلا كانوا الشباب موجودين. احمد ومحمد بيلعبوا ضومنة والشباب قاعدين بيتكلموا سوا والماميز

في المطبخ بيعملوا اكل والبنات كانوا مختفين

احمد : خلاص هغلبك اهو استسلم

محمد : مين دا اللي يستسلم دا انا اللي علطول بغلبك

آسر : طيب ايه مين هيغلب التاني

محمد بثقه : جدك طبعا يولاا

آسر ثقف عل ايدو : حلاوتك يجدو يلاا عاوزين نشوف

احمد : طيب ايه يفريد شجعني انا كمان 

فريد ضحك : بس كدا عنيا ليك يحبيبي

احمد : انا متاكد اني هفوز طالما حفيدي معايا

سيف : استهدو بالله يجماعه دي مجرد لعبه

عمر ضحك : انت كدا بتسخنها

سيف ضحك : ما دا المطلوب

فارس : طالما آسر فيها يبقا منطمنش

محمد بص لفارس : لاا دا حبيبي 

آسر باس راس محمد ومثل إنه بيزعق: مسمعش حس حد 

بعد كدا

سيف : مالك ابنك الحرارة عليت عنده وبقا بيزعق

مالك ضحك : مش عمو محمد هو اللي خلاه مش شايف حد

احمد : ايوووا اخيرا فزت عليك يمحمد

..

الماميز في المطبخ بيحضروا الاكل والتيتات قاعدين

علي كراسي السفره الله موجود في المطبخ

نور : هما البنات اختفوا وراحو فين

سلمي : من اول مرجعتش غزل مع ايان وقعدو سوا

مشوفتش منهم حد تاني

شهد : شكلهم بيحضروا لكارثه

نجلاء : أو بمعني حياه اللي بتحضر و محتجاهم معاها

مريم ضحكت : اها والله يطنط تعملها دي ياما جننتنا معاها

اسما : ولسه

هناء : بس لذيذه اوي والله

شهد : حماتشي حبيبتي

..

البنات كانوا قاعدين في اوضه ما عدا فيروز

حياه : يعني ايه يداليدا انتي مش موافقه

داليدا : انا معقول اوافق علي الهبل اللي بتقوليه دا

حياه : طيب يلاا يابت من هنا

داليدا : انا كنت ماشيه اصلا 

داليدا خرجت من الاوضه و حياه بصيت للبنات

غزل : استني يداليدا

غزل خرجت من الاوضه ورا داليدا

حياه بصتلها : بت يغزل انتي كمان معاها. ماشي يغزل

حد منكم عاوز يخرج انتو كمان

ليلي : انتي عارفه انا معاكي في اي حاجه يزميل

ديما ضحكت : ونا حابه كدا اوي

دانيه : ونا موافقه خلينا نكسر الملل دا

حياه : لاا والله طمرطت فيكم تربيتي

ليلي : طيب يلاا ننزل

حياه : يلاا

..

داليدا كانت هتنزل بس افتكرت فيروز وقررت تروح تشوفها 

غزل : داليدا

داليدا وقفت وبصتلها : زوزو تعالي

غزل راحت عندها : هي فيروز فين مشوفتهاش

داليدا بصيت للاوضه : قاعده في الاوضه جالسه نفسها

غزل : تعالي نشوفها

دخلت داليدا و غزل لفيروز اللي كانت واقفه قدام الشباك

غزل : روز

فيروز بصتله : زوزو رجعتي

غزل راحت عندها وحضنتها : اها وحشتيني

فيروز ابتسمت : ونتي كمان يروحي

داليدا : بتعملي هنا اي احنا مش قولنا مش هنقعد لوحدنا

تاني

فيروز بصتلها وسكتت وغزل حبيت تكسر التوتر دا

غزل : تعال ننزل ونشوف حياه

فيروز : مالها حياه

داليدا ضحكت : تعالي وهتنبهري جامد المرادي

فيروز : ماشي

خرجوا البنات من الاوضه ونزلوا

..

محمد بصله : ايه دا ازاي اكيد غشيت

احمد ضحك : اهو قدامك

يوسف ابتسم : معلش يعمو محمد المره الجايه نعوضها

محمد : احنا فيها يلاا نلعب تاني

وفجاه اشتغل صوت اغاني عالي جاي من جوا الفيلا

الشباب كانوا مستغربين مين مشغل الاغاني دي

وبتخرج حياه من الفيلا لجنينه وهي لابسه فستان 

ابيض بسيط وهادي وطرحه فرح علي رأسها وماسكه 

سماعه صغيره وبترقص

..

البنات سمعوا صوت الاغاني من المطبخ واستغربو

ملك : ايه دا

زينب ضحكت : اكيد حياه 

شهد : دا اكيد

آيه : تعالو نشوفها

الماميز والتيتات خرجوا من المطبخ وراحو الجنينه 

واتصدمو من شكل حياه و سيف

..

يامن كان قاعد في مكتبه بيشتغل علي المشروع و افتكر

نغم و تريقتها علي شغله

يامن : كان نفسي ادعي عليكي واقول روحي اللهي تعملي

حادثه وينكسر صف سنانك عشان ارتاح منك. بس كان 

علي عيني. بس مش هسيبك في حالك روحي اللهي 

تقعي متعرفي تقومي يبعيده امين يارب

سكت شويه وهو متغاظ منها

يامن : منك لله 

..

حياه كانت بترقص هي وسيف

حياه : آه يا أحلى عروسة 

ديما و ليلي و دانيه : آه

حياه : من العين محروسة 

سيف : آه

حياه شاورت بايدها الاتنين على زين : سيد العرسان يا عريسنا ده معاك الفرح أنسنا شوف حلوة ازاي بيك الليلة

آسر وهو قعد في الارض من الضحك : ارقص معاها يعرسنا

زين بصله ومقدرش ميضحكش علي جنان حياه اللي كل

مره بيتفاجي بيها اكتر

حياه كانت حاطه ايديها علي أكتاف سيف وبترقص معاه :

يا ليالي ألف ليلة وليلة .. الليلة دي أحلى فرحة وأحلى ليلة

آه يا أحلى عروسة آه .. من العين محروسة آه

سيف و حياه فضلوا يرقصو ويتجننو وشهد تضحك عليهم

وفريد مبقاش قادر حتي ديما مراته بقيت زيهم

..

يوسف كان وصل قدام الفيلا و وقف بالعربية وهو سامع

الاغاني 

نغم : انت متاكد ان هي الفيلا دي يا يوسف

يوسف : اها اصل انت متعرفيش في عيلتي بنت فرفوشه

او بمعني اصح مجنونه اوي

نغم ضحكت : الله بجد

يوسف ابتسم : اها انزلي يلاا 

نغم : اوك

يوسف نزل و نغم كانت نازله ورجليها اتلويت وصرخت

يوسف اتخض وراح ليها بسرعه

يوسف بقلق : في ايه مالك

نغم : اها رجلي اتلويت وجعاني. انا كنت عارفه أنه مش

هيسبني في حالي هو السبب والله

يوسف بإستغراب : هو مين

نغم : يامن الكلب

يوسف : اكيد لاا ينغم هو ساحر يعني

نغم : لاا بس اكيد دعي عليا

يوسف : طيب اهدي الاول واسندي عليا 

نغم : لاا سبني شويه مش قادره بجد

يوسف : طيب اقعدي و اهدي شويه

نغم قعدت علي الكرسي وهو بتتالم

ويوسف عمل تليفون ورجع يطمن عليها

..

نور وهي بتضحك : يخرب بيتك يحياه خلاص مبقتش 

قادره اكتر من كدا بطني وجعتني

آسر ضحكت : انا هموت و اعرف جبتي الطرحه دي منين

حياه : دي خبرتي بقا

ادهم : لاا و الاجمد الاغنيه

فهد : و الاحلا الاحلام يعني عمو سيف 

زين كان ساكت وهو بيضحك

فارس ضحك : متقول حاجه يعرسنا

زين بصله : بس يخالو بقا

مالك ضحك : متكسفش يحبيبي احنا عيله مع بعض

سلمي ضحكت : في ايه يجماعه متسيبو الواد في حاله..

سوري يحبيبي بس حياه مخليتش حد فينا يقدر يبطل

ضحك

مصطفي : خدو عندكم دي ثلاثه المرح ديما و دانيه و ليلي

الله اكبر عليهم لما يقولوا آه

اسما ضحكت : حياه حبيبتي انتي ازاي اقنعتيهم بكدا

حياه : اسكتي البت داليدا و غزل ولا وحده وافقت وحبايبي

دول وقفو معايا

ايان ضحك : غزل مين اللي تبقا معاكي دي ارق من الهوا

فهد ضحك وبص لداليدا اللي بتضحك : كنت عارف مراتي

عاقله ومش بتاعت الهبل دا

فريد : ونتو بقا مش فضلتوا تغنو خدو التريقه دي بقا ليكم

حياه : مقولتليش بحمايا رايك ايه

يوسف : اكيد انتي عارفه يحبيبتي

حياه : عارفه بس بحب اسمعه

يوسف ضحك : لاا بجد كنت تجنني

سيف ضحك : بيتريق علينا يحياه انا عارفه

حياه : خليهم يتريقو اهم حاجه ضحكتهم

زين ابتسم علي كلام حياه أنها مزعلتش من تريقتهم : بجد خفه دمك ولذاذتك دول بحبهم اوي فيكي يحياتي

حياه اتكسفت ومرديتش

سيف : في ايه يابني المنشاوي وحده وحده حياتي مره وحده قدامنا كدا

زين بصله وضحك وسكت

..

يوسف : بقيتي كويسه شويه

نغم : مش حاسه بكدا

يوسف : طيب تعالي ندخل ونا طلبتلك مرهم وهتبقي كويسة

نغم هزت راسها

يوسف : هاتي ايدك

نغم بصتله ومديت ايديها ويوسف مسكها وسندها عليه

ونغم بدأت تمشي براحه ودخلوا الفيلا والعيله كانت 

بتهزر ومش واخدين بالهم

يوسف : امشي براحه ومتخافيش انا معاكي

العيله سمعوا صوت يوسف وبصوله والشباب اتفاجئو من وجود نغم معاه والبنات اتصدمو لانهم اول مره يشفوها

وبالإخص فيروز اللي اول مشافتهم تنحت...