رواية عانيت لأحبك الجزء الثاني2 الفصل السابع والثلاثون37 والثامن والثلاثون38 بقلم فاطمه محمود

" رواية عانيت لاحُبك 2 "

                    صرت انت

" البارت السابع وثلاثون "

" الكاتبة فاطمة محمود "

في جناح ايان وغزل

غزل كانت نايمه بعمق وشعرها نازل علي وشها

ايان كان فايق وقاعد علي السرير ماسك الفون بتاعه

اول محس بتحركاتها وأنها هتفوق ساب الفون وبصلها

فتحت عيونها غزل ببطئ وشافت ايان بيبصلها ابتسمت

واتكلمت برقه : صباح الخير

ايان : صباح الورد يحبيبتي

غزل لسه هتتحرك وهتقوم افتكرت اللي حصل امبارح

وبصت علي هدومها اللي مرميه اخر السرير فتحت عيونها بصدمه وكسوف وفضلت نايمه وهي مش عارفه تعمل ايه

ايان فهمها وابتسم : زوزو

غزل بصتله وهي ساكته

ايان : مكنتش عارف اني هبقا مبسوط معاكي بالشكل دا

حضنك بجد نساني اي تعب في حياتي

غزل سكتت شويه وبصتله : انا اسفه لو هقول حاجه انت

مش مستنيها مني انا بجد متلغبظه ومتوتره شويه

ايان مسك ايديها : انا فاهمك يغزل.. وعايزك تتصرفي

براحتك متعمليش حاجه انت مش مرتاحه فيها

غزل هزت راسها : ممكن تقوم

ايان : حاضر انا هعمل مكالمه ونتي قومي البسي حاجه

غزل كسوفها زاد اكتر وايان ضحك وقام اخد فونه وخرج

في البلكونه

..

ديما وهي واقفه مكانها كانه اتكب عليها تلج من الصدمه

فضلت دموعها تنزل وهي بتهزر راسها بلاا : احنا اتفقنا

انك تفضلي معايا اوعي تمشي وتسبيني يحبيبتي

اتحركت ببطئ وهي حاسه بوجع كبير وقعدت وهي مش عارفه تستنجد بمين وبعد وقت وقف النزيف وحاولت

تخفي الدم اللي مالي الحمام وبعدين قررت تاخد شاور

عشان تهدي شويه وتشوف هتعمل ايه

..

في فيلا العيله تحت

الشباب متجمعين في الريسبشن والماميز بيحضروا

الفطار

في المطبخ

آيه : عارفين يبنات وحشتني اوي العماره وشقه نونا

اللي كنا بنقضي فيها اغلب الوقت

سلمي : اها والله يتوتا كانت اجمل السنين واجمل ذكريات

في شقتنا

آيه : مين كان بصدق أن احنا هنخلف و ولاد يكبروا ويتجوزو هما كمان وهيخلفوا.. انا لسه حاسه اني

قابلت مالك امبارح

شهد : لو بتتكلمي عن انك كبرتي فا انتي اللي لوحدك

كبرتي يتوتا انا لسه صغيره يحبيبتي

سلمي ضحكت : صغيره ايه بس دا انتي قريب هتبقي

تيتا

شهد : انا الفكره دي بترعبني علي قد ما انا مبسوطه اني

شايفه ولادي كل واحد اخد الحب اللي كان بيتمنا علي قد

ما انا بحس بجد اني خلاص هكبر وهتروح عليا

نور : تروح عليكي ايه بس يشوشو ما انا هبقا تيتا وسلمي

وتوتا كمان ومع ذلك هنفضل قمرات البيت زي ما احنا مش كدا ولا ايه

شهد : صح ينور.. نسيت لقولك مبروك

نور : علي ايه

شهد : رجوع يوسف وفيروز دا انا كنت بتمنالهم دا

واهو الحمدلله رجعوا لبعض

سلمي : ربنا يهديهم ويبعد عنهم اي مشاكل

نور : امين يارب

آيه : انا عارفه حبيب عمتو بيحب ومبيقدرش يستغني

سلمي : اها وكمان من صغرهم سوا

نور : ربنا يسعدكم كلهم يارب

البنات : امين

بيدخل سيف المطبخ : خير بتدعوا علي مين

نور ضحكت : لاا بندعيلهم

سيف : مين دول يعني

شهد : البنات والشباب

سيف : دعوه حلوه لجوزك بقا عشان اليوم يفتح معاه

شهد رفعت ايديها : روح يسيف الهي متشوف غيري ولو شوفت عينك تدب فيها رصاصه

البنات ضحكوا وسيف عيونه علي شهد : انا اشوف غيرك

يشهدتي انا لو كنت عاوز اشوف كنت شوفت السنين اللي فاتت يحبيبتي

شهد : طيب ما ممكن شوفت من ورايا ما انت مين شايفك

نور : احتمال كبير برضو

سيف : اخرسي ينور ونتي يحبيبتي اوعي حد يأثر

عليكي دا انتي القلب والشرايين يابت

شهد ابتسمت : ماشي

سيف : طيب يلاا بقا عاوز اروح الشغل

شهد : حاضر عنيا

سيف : تسلم عيونك يعيوني

نور : مخلاص ياعم الحبوب اطلع برا يلاا

سيف : اما شوف جوزك انا عشان تسكتي

نور ضحكت : ماشي

..

في جناح زين وحياه

زين وحياه كانوا نايمين في حضن بعض وباين علي شكلهم

الراحه وبان الضيق فجاه علي ملامح حياه لما سمعت رن الفون حياه بنوم : زين رد عليه الفون انا عاوزه انام

زين فتح عيونه وبص علي الفون : حاضر

وكان هيقوم يتعدل عشان يرد بس حياه كانت ماسكه

فيه جامد واتكلمت وهي نايمه : ممنوع تبعد عني

زين ابتسم واخدها في حضنه وقرب من كتفها وباسها

بعد عنها شويه ورد علي الفون : دا وقتك يعني يا آسر

آسر وهو بيكتم ضحكته : شكلي قطعت حبل القرب

زين : لاا يحبيبي مقطعتش حاجه

آسر : طيب يلاا انزل

زين : انا لو نزلت فعلا هعلقك من هدومك يا آسر

آسر ضحك : بهزر معاك يزين افضل عندك زي ما تحبي

يحبيبي أن شاء الله متنزلش ابدا

زين : مش عاوز اشوف رقمك بيرن عليا تاني

آسر : حاضر انا هروح ارخم علي ايان

زين : طمني عليك بعدها

آسر : والله انتو الاتنين محدش يقدر يتكلم معاكم الواحد بيبقا خايف علي نفسه

زين كان هيرد حياه شدت منه الفون : اقفل بقا يا آسر

وقفلت الفون

زين رفع حاجبه ليها وقرص خدها : قصري في الكلام

ومتكلميش بنيابة عني تاني مفهوم

حياه مسكت وشه بايديها : بتغيري عليا يزينو

زين قرب منها اوي ودفن راسها في رقابتها : لاا مش بغير

واتكلم بهمس سمعته حياه : بغير اوي

ابتسمت حياه وحضنته بحب

..

في جناح فهد وداليدا

فهد خرج من الدرسنج روم وماسك في ايديه جاكت

البدله بيلبس فيه

داليدا خرجت من الحمام وهي لابسه قميص بيت طويل

وبطنها بارزة فيه رغم وسعه

فهد اول مشافها ابتسم وداليدا قربت منه ومسكت جاكت

بدلته ظبطته وحطت ايديها علي كتفه : حاسه اني هولد

النهارده

فهد : لسه بدري يحبيبتي هو بس تعبك اللي محسسك

كدا

ومسك راسها بايديها وباسها : تبطلي تعملي مجهود عشان

تولدي بخير

داليدا : حاضر

فهد : البسي طرحه علي شعرك ويلاا ننزل

داليدا مسكت الطرحه اللي علي السرير ولبستها

فهد فضل يبصلها ودخل الخصلة اللي كانت باينه من شعر داليدا وخرجوا من الجناح ونزلوا تحت قعدوا مع العيله

العيله كانت متجمعه علي السفره بتفطر

ادهم كان قاعد جمب ليلي وعيونه عليها وهو خايف

عليها بجد من سرعه اكلها : براحه يا ليلي حرام عليكي

انتي كدا هتخنقي البيبي من كتر الاكل دا

ليلي وقفت اكل وبصتله : هو اشتكالك

ادهم : ما هو للاسف ميعرفش يتكلم بس انا ابوها

وحاسس بيها

ليلي : باباها اها.. بقولك يا ادهم هات طبق البيض دا

ادهم : بيض ايه والله ما هتاكلي حاجه تانيه

ليلي عقدت حواجبها بزعل

عمر : متسبها يا ادهم مالكش دعوه

ادهم بص لعمر : ماليش ازاي يعمو دي خلاص هتنفجر

مصطفي مسك الطبق ومده لـ ليلي : اتفضلي يلولي كولي

براحتك يحبيبتي مالكيش دعوه بالواد دا

ليلي اخدت الطبق بفرحه كبيره : حبيبي يصافي

ليلي حطت الطبق قدامها وبصت لـ ادهم وشافت

علي ملامحه الجديه والعصبية زقت الطبق بايديها

ورجعت علي الكرسي ربعت ايديها وعيونها علي الطبق

داليدا وهي بتدايق ليلي : هاتي الطبق اللي جمبك دا يمريومه

ليلي اول مسمعت كلام داليدا بصتله ورجعت بصت لطبق

مريم مسكته ولسه هتمده لداليدا ادهم اخده منها بسرعه

وحطه قدام ليلي : الطبق دا لمراتي

ليلي بصتله بفرحه وادهم هز رأسه : كولي ياستي

فهد : ولااا هات الطبق دا مراتي عاوزه تاكل منه برضو

ادهم : ماليش دعوه مراتي كانت عاوزه الاول

داليدا : بقا كدا يا ادهم ماشي

ادهم : انتي حبيبتي يداليدا والله بس معنديش اغلي منها

فهد : طيب اظبط نفسك

ادهم : اهو جبتيلنا الكلام

داليدا ضحكت

اسما : خلاص اهدوا شويه ونت يفهد خد طبق البيض دا

فهد اخد الطبق من اسما وحطه قدام داليدا

عمر : عيال تافها كل الخناقه دي عشان بيض

ادهم : ما انت مريت بتجربة الجواز يعمو عمر واكيد فاهم

التفهات دي

عمر : معاك حق يابني والله

مريم : كول يعمر

عمر : حاضر باكل اهو

الكل ضحك عليهم

داليدا : انا روز وحشتيني

مريم : البت ناقص من غيرها

ليلي والاكل في بوقها : ونا كمان وحشتيني

ادهم قلدها هو وبيضحك : ونا كمان وحشتيني

ليلي ضحكت وضربت في كتفه : بس يا ادهم

ابتسموا علي شقاوتهم واتكلمت اسما : هي دلوقتي في

مكانها وبيتها الصح ودا اهم حاجه

مصطفي : معاكي حق ربنا يسعدهم

عمر : امين يارب

فهد : مهما كان اللي حصل في الاخر عرفوا غلط بعض

وفهموا يعني ايه طلاق

ادهم : الحمدلله انهم عرفوا واخدها كانوا زهقونا معاهم

طول الفتره اللي فاتت

الكل ضحك عليه لان كلامه شبه صحيح

..

في جناح يوسف وفيروز

يوسف كان نايم وفيروز نايمه في حضنه وبتبصله بحب

وحطت ايديها علي وشه واتكلمت بهمس : يوسف

يوسف شدها في حضنه اوي وفيروز ابتسمت ومسكت

شعره : قوم بقا كفايه نوم

يوسف وهو في حضنها : انا مقرر اني مش هبعد عن

حضنك ابدا فـ متحاوليش معايا يفيروز

فيروز : بس انت لازم تقوم يحبيبي عشان شغلك

يوسف مردش عليها وبعد عنها بالعافيه فتح عيونه

وبصلها : فكرتيني ليه دلوقتي

فيروز : انا افتكرت انك هتقولي اتاخرت بس شكلك

تعبان ومرهق شويه افضل النهارده مش هيحصل

حاجه

يوسف : انا لو عليا مبعدش عنك حضنك دا نهائي

واسيب الدنيا تولع

يوسف سكت وقرب منها وسند جبينه علي جبينها : طول

الفتره اللي فاتت مكنتش بعرف انام كان بيوحشني اصحي

الصبح وتكوني في حضني وافضل ابصلك زي دلوقتي بس

الحمدلله اللي كنت بتمناه حصل

فيروز كانت مبسوطه اوي من جواها من كلام يوسف ليها

مسكت وشه واتكلمت بحب : انا مكنتش عارفه اعيش من

غيرك كنت دايما في تفكيري وعقلي كنت واخد مني كل حاجه لما بعدنا عن بعض عرفت اني من غيرك ولا حاجه

انت كنت حياتي يا يوسف وعرفت كمان اني بحبك اوي

فوق ما تتخيل

يوسف : ينفع بعد الكلام دا كله اقوم وابعد عنك

فيروز ابتسمت : غصب عنك انا عارفه انك حابب تفضل

معايا بس برضو لازم نشوف حياتنا مش هنفضل طول

الوقت كدا

يوسف قرب منها باس خدها بوسه طويله وبعد وعيونه

في عيونها : هقوم انا يحبيبتي

فيروز مشت ايدها علي خده وهزت راسها يوسف باس

ايديها وقام من علي السرير ودخل الحمام

فيروز قامت اتعدلت قعدت علي السرير والإبتسامة

مرسومه علي وشها

..

فيلا العيله 

كانوا متجمعين علي السفره بيفطرو

ديما كانت بتحرك في طبقها وسرحانه

فريد بصلها واتكلم بهمس : في ايه يحبيبتي الاكل

مش عاجبك

ديما بصتله وابتسمت : لاا ابدا يحبيبي بس انا شبعت

فريد : انتي لحقتي تاكلي يديما

نور : عادي يحبيبي بيحصل اوقات في الحمل نفسها

تبقا مسدودة متقلقش

فريد هز راسه : هو يوسف منزلش ليه

آسر ضحك : ما هو عريس برضو يفريد

فارس : اكيد هينزل دلوقتي يا آسر

سيف : ينزل فين بس يفارس النهارده اجازه

آسر : والله سيف بيتكلم صح

يوسف الكبير : بس يوسف مش هيعدي يوم ومينزلش

الشركه

آسر : كان نفسي يكون قد ثقتك فيه يعمو يوسف بس

للاسف خذلك المرادي

بيدخل يوسف وفيروز وبيقعدوا : صباح الخير

الكل رد عليه : صباح الخير

نور : نورتي بيتك يحبيبتي

فيروز : منور بيكي ينوري

فريد : تعرف يا يوسف ان آسر بيقول انك مش هتروح

الشغل النهارده وبيتكلم بثقه كمان

يوسف : طول عمره بيكسف نفسه

آسر بصله ورجع بص لفيروز : مقدرتيش تخليه مينزلش

وترفعي راسي شويه

فيروز ضحكت : انت لو كنت قولتلي كان دا حصل

يوسف بصلها : هو ايه دا اللي يحصل

فيروز : اني اصحيك بدري تروح الشغل يا يوسف

يوسف : اها بحسب

آسر : يجبانه

دانيه : ما انت في نفس موقف فيروز يا آسر

آسر : مبلاش تنزلي شكلي اكتر من كدا يدانيه

دانيه ضحكت : حاضر

..

في الشركه في مكتب نغم كانت قاعده بتشتغل علي

اللاب توب وبتفكر في يامن اللي مجيش ليها كالعاده

يتكلم معاها

قفلت اللاب بزهق وفضلت تفكر شويه وقامت تروح

الكوفي كورنر تجيب قهوة ليها قبل ما الصداع يسيطر

عليها

واول موصلت شافت يامن قاعد وباين عليه سرحان في تفكير عميق لدرجة أنه محسش بيها وهي واقفة قريب منه

نغم : يامن .. يامن

نغم اتحرجت من عدم رد يامن ليها وفهمت انه مش حابب

يتكلم معاها فقررت تاخد بعضها وتمشي

عم هاني : عاوزه تشربي حاجه معينه يبنتي

يامن فاق علي صوته وبص حواليه وشاف نغم واقفة

فضل يبصلها : نغم

نغم كانت عيونها في الارض ورفعت وشها : لاا

شكرا يعمو

واتحركت مشيت بس ايد يامن منعتها تكمل طريقها

نغم وقفت ويامن اتحرك وقف قدامها : انتي هنا

من امتي

نغم : من وقت ما انا بكلمك ونت مبتردش عليا

يامن فهم انها ادايقت : انا آسف مسمعتش كلامك ليا

كنت سرحان شويه

نغم ابتسمت لما فهمت أنها غلط ولسه هتكلم يامن ساب ايديها وبصلها بنظره بدون اي مشاعر أو حماس من اللي متعوده عليه منه : عن اذنك معايا شغل

يامن مشي ونغم فضلت واقفه وزعلت انه سابها ومشي

وهي مش عارفه ماله وأنه اول مره يكون متغير معاها كدا

فضلت واقفه شويه ومشيت تجاه عم هاني : عاوزه إسبرسو لو سمحت يعمو

عم هاني : حاضر يا بنتي

نغم رجعت بصت علي الطريق اللي مشي منه يامن

وهاني شاف نظراتها : تلاقيه مخنوق من حاجه حصلت

معاه أو من الشغل وهيرجع طبيعي بس خليكي جمبه

الفتره دي

نغم ركزت مع كلامه وهزت راسها واكتفت بالصمت

..

في المستشفى

بيوصل فريد لمكتب نهي وبيخبط الباب

نهي من جوا المكتب : اتفضل

بيدخل فريد : ازيك يدكتور

نهي : اهلا بيك يا استاذ فريد.. اتفضل اقعد

فريد : شكرا

 نهي : اخبار ديما والحمل معاها ايه

فريد ابتسم : الحمدلله كويسه بيحصل لها شويه تعب كدا

ومبقتش تاكل ونا بقنعها انها تجيلك يدكتور نطمن عليها

اكتر رغم انكم صحاب برضو موافقتش قالتلي انا كويسه

وفي نفس الوقت محبتش اضغطت عليها هي الحمدلله كويسه واكيد يعني لما تحس بحاجه هتقولي.. هو بس يدكتور في حاجه غريبه بتحصلها ممكن تفضل نايم كتير وفجاه تقوم تجري علي الحمام وبيبقا شكلها مرهق واوقات بتبقا كويسه جدا.. هو دا عادي ولا قلقي ملوش لازمه

نهي ابتسمت بتوتر : عادي بيحصل كدا كتير متقلقش

فريد : الحمدلله شهرين بالكتير وتولد بخير وتخلص 

نهي : انا لازم اقول لحضرتك حاجه مهمة

..

ديما دخلت المستشفى وهي بتداري تعبها وبتتمني

محدش يشوفها من الشباب ويسالها عن وجودها هنا

لكن هي وماشيه شافتها انجي وندهت عليها : ديما

ديما وقفت ولفت بصتلها : عامله ايه يا انجي

انجي : أنا الحمدلله طمنيني عليكي انتي اخبار البيبي

ديما : الحمدلله يا انوج تعباني جدا

انجي ضحكت : معلش يحبيبتي خلاص هانت وتقومي

بالسلامه يارب

ديما ابتسمت : يارب

انجي : جايه هنا عشان حاجه ولا ايه

ديما : اها جايه اشوف وحده صحبتي

انجي : ماشي يحبيبتي هروح اكمل شغلي أنا ونتي

كملي طريقك

ديما : اوك

انجي : يبقا سلميلي علي البنات كتير

ديما : الله يسلمك

انجي : اخبار ايه

ديما : والله احنا مشوفناش وشهم خالص النهارده

انجي ضحكت : ماشي يدمدومه

انجي مشيت وديما كملت طريقها لدكتوره نهي

وقفت ممرضة تسالها عنها : دكتور نهي موجوده

في مكتبها 

الممرضة : اها موجوده بس هي حاليا مشغول معاها

حد في المكتب

ديما : طيب انا هستنها في مكتبي وممكن تبلغيني لما تخلص

الممرضة : لو حابه حضرتك تروح ليها المكتب مفيش مانع

هو جوز حضرتك مش هيبقا في مشكلة

ديما فتحت عيونها بصدمه : جوزي

الممرضة : هو مش حضرتك جوزك بشمهندس فريد الدسوقي

ديما هزت راسها وهي في صدمتها

..

في جناح زين وحياه

زين كان واقف قدام المرايا بيعدل لياقه قميصه

وحياه واقف مربعه ايديها قدامها والضيق علي

ملامحها : يعني ايه حضرتك هتروح الشغل النهارده

زين من غير ميبصلها : مش هتاخر عليكي يحبيبتي

ساعتين زمان وهرجع

حياه : لاا طبعا مش موافقه

زين بصلها ومسك دراعاتها بين ايديه : يحياه انا هفضل

هنا اعمل ايه لازم اروح شغلي ومش هتاخر عليكي

حياه : تقعد معايا يا اخي دا النهارده اول يوم جواز لينا

تعالي علي نفسك ومتخرجش من البيت اعتبرني زي

مراتك

زين : تعرفي انك زي مراتي واكتر

حياه : بلاش تتريق عليا يزين

زين : ومين قال إني بتريق

حياه سكتت وهي مدايقه منه ومن بروده

وزين رجع وقف قدام المرايا وفتح اول زرارين من 

القميص

حياه بغيره : ما تفتحه كله احسن يحبيبي

زين كتم ضحكته : انتي رايك كدا

حياه بانفعال : زين احترم نفسك واقفل القميص دا

وافتكر انك ابن ناس محترمه

زين مقدرش يقاوم وفضل يضحك عليها وحياه ابتسمت

فجاه علي ضحكته اللي بتغير شكله نهائي واول ما افتكرت

رجعت رسمت ملامح الضيق علي وشها

زين قرب منها والإبتسامة علي وشه باسها من خدها بعد 

عنها وبصلها : مش هتاخر

حياه مقدرتش تزعق ولا تكلم معاه من لمسته ليها

وزين مشي من قدامها وفاقت علي نفسها وطلعت

تجري ورا : زيـن

زين كان طلع من باب الجناح ووقف يصلها : يابت

خلاص بقولك

حياه بصوت عالي : لاا مش خلاص ولو روحت الشغل

انا مش قعده لك في البيت دا وهطلقني

في نفس اللحظة ايان وغزل طلعوا من الجناح الخاص

بيهم وهما سامعين خناق حياه مع زين

زين بصلها بجمود : انتي قولتي ايه

حياه بخوف : قولت بحبك

زين : ماشي انا هنزل دلوقتي وصوتك دا مسمعوش

انتي فاهمه

حياه هزت راسها وسكتت

زين بص لإيان : انتو هنا من امتي

ايان ضحك : من وقت بحبك

زين ابتسم وبص ليحياه اللي باصه قدامها بزعل

ورجع بص ليهم : عامله ايه يزوزو

غزل : الحمدلله بخير يحبيبي

ايان : بقولك ايه مراتي متدلعش غير مني لو سمحت

زين : انت بتكلمني انا يا ايان

ايان : احم لاا يحبيبي

ايان بص لـ غزل : يلاا ننزل

غزل مسكت ايدو ونزلوا سوا

زين بص لـ حياه : بلاش نتخانق قدام حد كل حاجه

تخصنا متطلعش من الجناح دا

حياه بصتله ومشيت بدون اي كلمه

زين بعصبية : حـيـاه

حياه اتنفضت مكانها ووقفت بصتله

زين كان مدايق منها انها مشيت وسابته قرب منها

وحياه كانت خايفه يعمل حاجه ليها ولسه هترجع

لورا زين مسك ايديها وبصلها نظره اخير قبل ما ينزلوا

..

في مكتب نهي

فريد : اتكلمي يدكتور في ايه

ديما بتفتح الباب وهي بتاخد نفسها وعيونها علي

فريد ونهي وهي خايفه تكون قالتله حاجه

ديما : عايزه اقولك انك لازم تهتم بيا اكتر عن كدا

فريد فضل باصص لديما و نهي وهو حاسس بحاجة غريبة

نهي هزت راسها : ياريت تاخد بالك منها كويس

فريد ابتسم : في عنيا

نهي وقفت : طيب عن ازنكم هسيبكم شويه لوحدكم

وبصت لديما اللي واقفه عند الباب وهزت راسها بعدم رضا

وخرجت من المكتب

ديما فضلت باصه عليها بعد ما خرجت

فريد : هتفضلي واقفة كتير كدا

ديما بصتله ودخلت قفلت الباب وقعدت علي الكرسي

اللي قصاده فضلت ساكته وباصه قدامها

فريد : ديما

ديما : نعم

فريد : مالك وبعدين انتي ايه جابك المستشفى من

غير ما تقوليلي

ديما : كنت جايه اشوف نهي يفريد

فريد : طيب ما انا طلبت منك واجي معاكي كمان

ونتي رفضتي ايه اتغير؟

ديما : يحبيبي انا بس مش عاوزه اشغلك وبصراحه زهقت من قعده البيت قولت اجي اشوفها شويه

فريد : انا عاوزك تشغلني يديما عاوز نهتم بكل حاجه عشان تبقي بخير انتي دلوقتي حامل ومش عاوز مخاطره ليكي

وبلاش مغامره كتير يحبيبتي ولما تحبي تيجي هنا تكلميني اوك

ديما : اوك.. تعال نروح المكتب بتاعي كفايه انها طلعت

وسابت لينا المكتب

فريد ابتسم : حاضر

..

في الشركة في مكتب يوسف

يامن ساكت ويوسف عيونه عليه مستني يتكلم

يوسف : في إيه معاك أنا مش عارف

يامن بصله : مفيش

يوسف : إنت ممكن تخبي على نغم عادي بس أنا لازم أعرف في إيه

يامن اتكلم وهو مخنوق : بابا رفض جوازي من نغم

يوسف : إيه السبب اللي يخليه يرفض

يامن : حكيت له كل اللي كنت عاوز أقوله ليه وكلمته عن عيلتها إنها وحيدة قالي مش هنوافق دي واحدة اتربت في الشارع... وكلام مش حلو خالص

يوسف : كل حاجة هتبقى كويسة وطول ما إنت عندك نفس تحارب هتبقى من نصيبك في الآخر. بس ممكن تخبي زعلك ده لحد ما يحصل، وترجع تتعامل عادي مع نغم لأن شكلها متضايقة منك

يامن : حاضر... يوسف أنا حابب أتكلم معاها بس مش عارف إزاي

يوسف : أنا هتصرف

يامن ابتسم : ماشي

يوسف ابتسم لصاحبه : مبسوط

يامن : اوي

..

في مكتب ديما

فريد كان واقف جمبك الشباك وديما قاعده علي الكرسي

فضلت باصه عليه : ممكن تيجي تقعد

فريد : حاضر

فريد قعد وديما اخدت نفس قبل متكلم : فريد هو انت

جيت هنا ليه.. نهي طلبت منك

فريد : لاا انا جيت عشان اعرف انتي مخبيه ايه

ديما اتوترت : ونا هخبي عنك ايه يحبيبي

فريد أبتسم : بهزر معاكي انا بس جيت اطمن علي اللي بيحصلك دا طبيعي ولا ايه

ديما : وصدقت دلوقتي كلامي

فريد : انا بس كنت قلقان عليكي

ديما مسكت ايدو : طيب ممكن متقلقش تاني عشان خاطري

فريد : حاضر هحاول

ديما : انت هترجع الشركه تاني

فريد : ايوا في اجتماع كمان ساعه

ديما : طيب انا هروح اشوف نهي وهرجعلك نمشي سوا

فريد : خدي بالك من نفسك

ديما هزت راسها وخرجت من المكتب وفريد افتكر توترها 

لما قالها مخبيه عنه وهو حاسس بحاجة ميعرفهاش وتصرفاتها اللي مبقاش فاهمها

..

فيلا العيله

سلمي : يعني ايه يحبيبي بجد تروح الشغل النهارده

انت لسه متجوز امبارح

حياه : انا قولتله الكلام دا بالظبط وهو دماغه حجر

وزعـ

زين بصلها بنظره اخرستها : حياه حبيبتي احنا اتكلمنا

صح

كان كلام زين وحنيته معاها عكس نظراته اللي بتطلع شرار

وكانه هيقتلها بعيونه

حياه زعلت منه اوي وان اول يوم جواز ليها بالخناق والشكل

دا وكانت فاكره هتبقا احلا ايام في حياتها

قامت وهي مش شايفه قدامها وطلعت السلم وعيون زين

كانت عليها

نور : انت مبسوط يعني لما زعلتها عشان شغلك اللي متقدرش تستغني عنه

زين : هتكلم معاها لما ارجع يعمتو

آيه : هتسبها دلوقتي يعني

زين : خليها تهدي

شهد : انا مش هقولك حاجه غير انك تحاول تقصر

اي خناق يحصل ما بينكم يحبيبي

زين : حاضر.. عن ازنكم

بص لسلم وخرج من الفيلا ومعاه ايان

دانيه بصت لغزل : انتي مش مدايقه من ايان يغزل

غزل : ادايقت طبعا ومقدرتش اقوله لاا

فيروز : معلش يزوزو متزعليش

آيه : احنا لازم نمنعهم يروحوا الشغل بكرا ولو محدش

فيهم سمع يبقا يوسف يتكلم معاهم

دانيه : صعبتيها عليهم كدا يتوتا

سلمي : يستاهلوا في واحد عاقل يسيب مراته ويروح

الشغل اول يوم جواز لي

فيروز : انا بجد زعلانه علي حياه

دانيه : باين عليهم متخانقين من قبل ما ينزلوا

غزل : لما طلعت انا وايان كانوا بيتكلموا قدام الجناح

شهد : طيب تعالوا نطلع نشوفها واهو نفرفشها شويه بدل النكد اللي نكده عليها ابنك

البنات قاموا وطلعوا لحياه...

..

في مكتب نهي

بتدخل ديما وبتقف تبصلها شويه وبتقرب من مكتبها

وبتتكلم بتحذير : نهي انا بحذرك انتي لو عملتي كدا

وقولتي لفريد كل حاجه انا بجد هخسرك وللابد

نهي : انتي لو مش بتكلمي تحت ضغط انا اللي كنت

قطعت صداقتي بيكي.. ديما انتي فاهمه هيحصلك ايه

البيبي اللي كبر جوا بطنك دا هيسببلك ايه

ديما : عارفه وراضيه لو دا نصيبي اني اموت كدا انا

مش معترضة

نهي : وجوزك هيعمل ايه لما يعرف انتي كدا انانيه يديما

ومش بتحبيه نهائي

ديما عيونها اتمليت دموع : لاا بحبه وبحبه اوي كمان عاوزه

اشوفه اسعد انسان انا بعمل كدا عشانه عشان علي الاقل ابقا جبتله البنوته اللي نفسه فيها انا عارفه أن دا غلط في

حق نفسي بس مقدرش احرمه من الحاجة دي مقدرش

ديما قعدت علي الكرسي ودموعها فضلت تنزل زي الشلال

وتمسح فيها ومفيش فايده : انا تعبت والله ونا كل يوم

بخبي عليه وعلي عيلتي بس مقدرش اكسر فرحتهم

حاولت كتير يا نهي.. والله حاولت

فضلت تعيط ونهي قربت منها مسكت ايديها : انا نفسي

اساعدك يديما نفسي اريحك من كل اللي انتي فيه

ديما مسحت دموعها وحاولت تتنفس عشان تعرف تهدي

وبصت لنهي : عاوزه تساعديني بجد.. مش عاوزه حد يعرف

لحد ما اولد

نهي زعلت علي حاله ديما : حاضر

..

في مكتب يامن كان واقف قدام الشباك وهو سرحان

فاق علي صوت خبط الباب : تعالي ينغم

نغم دخلت وهي مبعدة عيونها من عليه : مستر يوسف

طلب مني اجبلك الملف دا

يامن اخد الملف منها وحطه علي المكتب ولاول مره يقرب منها ويحضنها

نغم كانت هتبعده عنه بس فضلت ساكته ودموعها نزلت

اول ما بعد يامن وشاف دموعها مسحها بايده : انا جاهز

لاي عقاب انتي عايزاه

نغم رفعت عيونها : انك تبعد عني وترجع زي الاول ما تطقنيش

يا يامن 

يامن : انتي كدا بتحكمي عليا بالموت ينغم

نغم : دا احسن ما نعامل بعض وحش

يامن : انا آسف انا بس كنت مضغوط في الشغل وقرفان

شويه

نغم : وايه اللي حصل يخليك في الحاله دي شغلك طول

عمرك متعود عليه وبتحبه ايه الجديد

يامن : طيب بلاش تزعلي زعلك مقدرش عليه

نغم بصتله وسكتت

يامن : انا بعاملك كـحبيبتي بس لحد دلوقتي مقولتيش

ليكي اني بحبك

نغم عيونها لمعت من الفرحه وابتسمت من اعترافه ليها

يامن مسك خدها وهو مبتسم ونفسه بجد يكونوا سوا

نغم بعدت ايده عنها : ايدك لتوحشك 

يامن بذهول : ايدي لتوحشني؟!.. هو انا وقعت في حب بلطجية ولا ايه

نغم : اها لو كان عاجبك بقا

يامن بهمس : ولو قولت مش عاجبني ايه هيتغير

نغم : انا قولت ايه

يامن بص حواليه وبصلها مسك ايديها : قولت هاتي بوسه

نغم شدت ايديها وزقته ومشيت

يامن مثل التعب : اهاا

وقفت نغم بخوف ورجعت بصيت ليامن وقربت منه : يامن انت كويس 

يامن قرب من وشها : هبقا كويس طول ما انتي قريبة

مني 

نغم بعدت عنه : بتكدب عليا طيب انا غلطانه اني خوفت

عليك

يامن ابتسم : بجد خوفتي عليا

نغم هزت راسها : ايوا.. وسع كدا عشان اروح اشوف

شغلي

يامن بعد من قدامها : ماشي ينغومتي

نغم خرجت وابتسمت وهي بتخرج من مكتبه

يامن : ابتسمتي صح

نغم بصتله من برا المكتب وضحكت ومشيت

يامن قعد علي الكرسي وهو مبسوط

..

فيلا العيلة

كانوا البنات متجمعين في جناح زين وبيحاولوا يطلعوا حياة من الزعل اللي هي فيه وعلى جنب تاني في البلكونة كانت واقفة داليدا مع فيروز

فيروز : عارفة يا داليدا إني مبسوطة ومرتاحة من جوايا بجد حاسة إني دلوقتي عايشة حياتي بجد بعيد عن الشغل اللي مبقاش فارق معايا أكتر من يوسف شخص حنين ولسه لحد دلوقتي حبه ليا ما اتغيرش ومش عاوزة أي مشكلة تحصل بينا تاني

داليدا ابتسمت : ربنا يخليكم لبعض يروز ويسعدكم يا حبيبتي... البيت بقى وحش من غيرك كلنا مفتقدينك

فيروز بهزار : خلاص هرجع ليكم

داليدا : لاا ترجعي إيه ده أحنا مصدقنا

فيروز : ما صدقتوا إنكم خلصتوا مني صح

داليدا ضحكت : أها

فيروز ابتسمت وسكتت بصت لحياه اللي قاعدين حواليها البنات وبرضو ساكتة : شايفة حياه رغم إننا كلنا معاها ولسه زعلانة

داليدا بصت على حياه : حياه متعلقة بزين أوي حتى لما سافر شوفت حبها ليه بجد لما فضلت تعيط

فيروز : بس زين ليه خرج بجد النهارده كان فضل عشانها

داليدا : إحنا عارفين شخصية زين وشغله طبعاً ما يقدرش يبعد عنه يوم بالذات هو

فيروز : مع فرق شخصياتهم إلا إنهم متفقين سوا حتى لو حصلت خناقة ما بينهم

داليدا : أيوا... دلوقتي يرجع وهتنطنط قدامنا

فيروز ضحكت : تعملها

مريم دخلت البلكونة : إيه يروز

فيروز : إيه يا ماما

داليدا فهمت إنها عاوزة تتكلم معاها : طيب أنا هسيبكم

خرجت داليدا من البلكونة وراحت للبنات

داليدا : الجناح بقى حلو أوي يا بت يحياه

حياه : لو عاوزة تاخديه خديه

داليدا : والله فكرة... إنتي ارجعي اقعدي في أوضتك كده كده زين قاعد في شغله

ملك : داليدا بلاش تزعليها

حياه : ما دي الحقيقة هو اللي جابلي الكلام من اللي يسوى ومن اللي ما يسواش

داليدا : حبيبتي يا حياه

سلمى ضحكت وبصت لداليدا : اسكتي إنتي بقى

داليدا : حاضر

سلمى : وإنتي ما تزعليش يا حياه أكيد قرب يرجع

حياه : عدى أكتر من ساعتين وهو مرجعش وأنا وحشني

نور : ما تتقلي شوية يا حياة عشان كده يحبيبتي هو هيطفش

حياه : إنتوا بتحاولوا تدايقوني وأنا مش هريحكم

سلمى : جدعة يحياه وزين بيموت فيكي يا حبيبتي هو

بس تقيل حبتين ومش بيبين حبه

حياه : متأكدة طبعاً يا سلمى

شهد : تقيل زي يوسف بالظبط

آية : وأكتر كمان

سلمى : هو تقيل أها بس من ناحية الرومانسية ما أقولش ليكم

دانيه : لاا قولي والنبي

سلمى ضحكت : أقول إيه يا دودو بس

ليلى قربت من حياه وميلت عليها واتكلمت بهمس : متحكيلي عن رومانسية امبارح

حياه ضحكت : اتلمي يا ليلى

ليلى : حاضر

عند مريم وفيروز:

مريم : طمنيني عليكي امبارح حصل حاجة

فيروز : أها تمام يا ماما

مريم : إيه تمام دي يا بت

فيروز اتكسفت : ما بلاش تكسفيني يا مريومة

مريم ضحكت : ماشي

سكتت وبصت لبنتها بحب : اطمنت عليكي لما رجعتي لجوزك وبيتك يا حبيبتي وعاوزة منك دايماً تسمعيه وأوعي في يوم تقفي قدامه يا فيروز وما تخليش الزعل يطول ما بينكم يا حبيبتي

فيروز قربت منها وحضنتها : صدقيني أنا من كل قلبي هعمل كده عشان الجواز ده يستمر ويعيش

مريم : اتعاملنا كويس يعني

فيروز : كويس جداً كمان

مريم حضنتها : طيب تعالي نشوف البنات

فيروز بعدت عنها : يلاا

آيه كانت قاعده جمب غزل وبصت ليها : انا اول مره

اعرف ان ابني غبي بالشكل دا

غزل : ليه بس يتوتا

آيه : سايب قمر يقلب توتا

ليلي : ايان راح الشغل عشان زين غير كدا كنتي لاقتيه

لازق في القمر

آيه : ليلي بتكلم صح هو زين

اسما ضحكت : امال ايه دي خبره

ليلي بتصنع الغرور : دي أقل حاجه اقولها

داليدا رمت عليها المخده وكلهم ضحكوا عليها

..

في مكتب زين في القطاع 

كان قاعد على الكرسي بتاعه وقدامه ملف مركز فيه

وايان واقف جنبه

زين وعينه في الملف : ايان هي القضية دي مش اتحلت

ايان مردش وزين رفع وشه وشافه سرحان : ايان

ايان بصله : نعم يا زين

زين : أنا كنت بقولك إيه

  

ايان : أكيد بتقول يلا نروح

زينو: امم.. وياترى قولت إيه كمان

ايان : لا إنت قولت كدا بس

زين : طيب الأحسن إنك تركز شوية وشيل أي حاجة من دماغك لو عاوز تروح بجد

ايان اتحرك من جنب زين وقعد على الكرسي : أنا مش عارف إزاي سمعت كلامك وجيت النهارده كل اللي يشوفني يبصلي ويقولي مبروك يا عريس كأنهم بيقولوا هو دا إيه جايبه هنا

زين : طيب وفيها إيه

ايان : فيها مينفعش كدا أنا غزل وحشتني

زين بصله ورجع عينه على الملف

ايان : هو إنت حياه موحشتكش يا زين

زين مردش عليه وابتسم

ايان : يبقى تقوم دلوقتي

زين قفل الملف وحطه على المكتب : يا ابني هو عشان وحشتني يبقى أرجع دلوقتي وأسيب شغلي وبعدين إنت لو مشغّل دماغك شوية يا إيان كنت عرفت إني بخلص الشغل الضروري عشان نعرف نسافر وناخد الوقت اللي عاوزينه

ايان ابتسم : ما عليك أفكار يا ابن اللذينة

 

زين : طيب قوم يلا شوف شغلك

ايان : ماشي

ايان خرج من المكتب وزين فتح الملف تاني وجات على باله حياه مسك الفون وفتح الواتساب وبعتلها : وحشتيني

في نفس اللحظة حياه مسكت فونها وشافت رسالته فرحت أوي ولسه هترد افتكرت اللي حصل وقفلت الفون

زين اتضايق إنها شافت رسالته ومردّتش قفل الفون وحطه على المكتب ورجع يكمل شغله...

..

فيلا العيلة

الماميز كانوا في المطبخ بيجهزوا الغدا

والبنات في التراس

داليدا : هي ديما اتأخرت ليه

دانيه : قالت هتشوف واحدة صاحبتها

فيروز : في المستشفى

دانيه : مش عارفة

ليلى : ديما مخبية حاجة محدش يعرفها 

داليدا : لا هو التفكير حلو بس ما تألفيش قصص كتير

ليلى : طيب ركزي بقت تختفي كتير ليه وبقت تخرج لوحدها

غزل : ديما كالعادة مبتحبش الروتين ودايما بتخرج

 والحمل كمان معاها صعب شويه فأكيد كلام داليدا صح مفيش حاجة

دانيه : وأكيد كانت هتقولنا مش هتخبي علينا إحنا يعني

 

ليلى : صح شكلي سرحت بخيالي شوية

داليدا : قولي شويتين تلاتة

ليلى : ما خلاص يا داليدا

حياه : زمانها هترجع مع فريد  

وأول ما خلصت كلامها سمعت صوت عربية : أكيد هما

ليلى : دا إنتي بتعرفي اللي هيحصل يا حياة

حياة ضحكت : يا بنتي أنا قولت هيرجعوا هي صدفة

..  

قدام الفيلا

ديما كانت هتنزل بس منعها إيد فريد اللي مسكت إيديها

فريد : ديما إنتي من وقت ما خرجتي من عند دكتور نهي وإنتي شكلك اتغير في إيه ممكن أفهم

ديما كانت باصة قدام : فريد إنت سألتني السؤال ده أكتر من مرة وأنا قولتلك مفيش حاجة

  

فريد : مش مصدق

ديما : ليه مش مصدق

فريد : عشان إنتي مخبية حاجة أنا معرفهاش

ديما : مش مخبية حاجة لو سمحت صدقني

فريد ساب إيديها : تمام.. انزلي

ديما بصتله وفتحت الباب نزلت ودخلت الفيلا 

فريد كانت عينه عليها واتحرك بعد ما اختفت من قدامه

دخلت ديما وشافوها البنات

غزل : ديما

وقفت ديما وراحت ليهم : إزيكم يا بنات

 

حياه : الحمدلله إنتي كويسة شكلك كدا ليه

ديما : أنا كويسة يا حياه بس تعبانة شوية.

فيروز : سلامتك يا دمدومة

ديما : الله يسلمك يا روز.. إنتي قاعدة هنا ليه يا حياة إنتي وغزل هو النهارده مش أول يوم جواز ليكم

حياة: دي الناس الطبيعية إنما إحنا العيلة دي كل حاجة مختلفة الأستاذ سابني وراح الشغل وغزل نفس الكلام

 

ديما ضحكت : طول عمره جامد زين بيفاجئنا دايما هو وإيان

دانيه : مفاجآت ولا حصلت

 

داليدا : اقعدي يا ديما واقفة ليه

ديما: بجد كان نفسي بس تعبانة شوية يا داليدا

داليدا : ماشي يا حبيبتي

ديما : عن إذنكم يا بنات

ديما طلعت على السلم والماميز خرجوا من المطبخ وقعدوا مع البنات

شهد: مين اللي رجع من الشباب

فيروز : دا فريد وصل ديما ومشي

نور: هي فين وكويسة

حياه : أها كويسة بس طلعت ترتاح شوية

سلمي : ربنا يقومها بالسلامة بتتعب أوي

نور : يا رب يا سلمى

آية : وإنتي إمتى هتولدي يا داليدا

داليدا : والله مش عارفة يا توتا بس ممكن في أي وقت عشان خلاص أنا في آخر شهر

  

آية : ربنا يقومكم كلكم بالسلامة يا حبايبي

 

البنات : آمين يا رب

ملك : وإنتي ربنا يرزقك يا يروز

فيروز : إن شاء الله يا كوكي

مريم : وحياه وغزل كمان يا رب

حياه : لاا حياه إيه سبوني أفرح بيه هو شوية الأول

 وبعدين الموضوع دا

البنات كلهم انفجروا في الضحك عليها

..

في الشركة

فريد وصل الشركة ودخل أوضة الاجتماعات 

والشباب كانوا متجمعين

فريد قعد : آسف على التأخير هو الاجتماع خلص ولا إيه

يوسف الكبير : لالسه هيبدأ كمان شوية

فريد : طيب كويس

سيف: كنت فين يا فريد  

فريد : مفيش كنت مع ديما في المستشفى

فارس اتعدل في قعدته : ليه ديما مالها

 

فريد : مفيش حاجة يا عمو هي بخير

يوسف : طيب أومال رحتوا المستشفى ليه

فريد : أنا روحت وهي كانت مع صاحبتها أخدتها وصلتها وجيت

يوسف الكبير : أهم حاجة إنها بخير

فريد : الحمدلله

مراد : نبدأ الاجتماع بقا

..

بيوصل زين وإيان كل واحد بينزل من عربيته وبيدخلوا الفيلا 

الفيلا كانت هادية والماميز موجودين في الريسبشن

زين : مساء الخير 

سلمى : حمدلله على سلامتكم

زين وايان : الله يسلمك

آية : ارتحت يا زين روحت الشغل

زين : ما خلاص بقى يا خالتو حصل إيه يعني ما أنا روحت أنا وايان ورجعنا أهو

شهد : اللي حصل إن بنتي منهارة فوق يا أستاذ زين وقافلة على نفسها من وقت ما طلعت ولا بترد على حد فين

زين بقلق : وإنتو إزاي تسيبوها كدا

نور : كنا هنعمل إيه يعني منقدرش نكسر الباب

زين مشي بسرعة من قدامهم والماميز ضحكوا

ايان فهم إن مفيش أي حاجة حصلت من اللي قالوها لزين : والله حرام عليكم الواد طلع وهو هيموت من القلق

مريم بضحك : عشان يحرم يعملها تاني

 

ايان ضحك : لو كدا تمام ويسيبني في حالي شوية

آية : طيب اطلع إنت كمان لمراتك

 

ايان : حاضر

..  

كان زين وصل قدام الجناح وفضل يخبط حياه مردتش عليه

طلع المفتاح اللي معاه وفتح الجناح وكان كله ضلمة وهادي

زين بقلق على حبيبته : حياه إنتي فين 

مشي تجاه الشباك وشد الستارة والنور ملى الجناح

لسه هيتحرك بيشوف حياه نايمة على السرير ولابسة قميص أسود من هدومه واسع عليها شوية إلا إنه يجنن عليها وشعرها كان نازل على كتفها المكشوف

زين فضل يبصلها ومش عارف يسيطر على نفسه من شكلها

بلع في ريقه اكتر من مرة واتحرك تجاهها.. قعد على السرير وزاح شعرها من على كتفها وبدأ يبوس كتفها ورقبتها وبعد عنها ما اتحكم في نفسه

حياة فتحت عيونها ومسكته بإيدها من رقبته وقربت من ودنه وهمست : ما تبعدش

زين أول ما سمع كلمتها قرب منها...

..  

جناح إيان وغزل

إيان كان بياخد شاور في الحمام وغزل قاعدة على الكنبة

ايان : غزل

غزل قامت وراحت وقفت جمب الحمام : نعم يا ايان

ايان : هاتي المنشفة

غزل : ما إنت خدتها معاك 

ايان : يا ستي وقعت مني هاتي منشفة بسرعة 

غزل : حاضر

مشيت غزل تجيب منشفة

ايان : يلا يا غزل

غزل : حاضر جاية أهو

غزل فتحت الباب ودخلت إيديها بالمنشفة وإيان شدها جوا الحمام غزل اتخضت : إنت بتعمل إيه

إيان : لسه معملتش حاجه

غزل : ايان ابعد وسيبني أخرج

 

ايان شدها ليه : لاا

غزل حطت إيدها على وشها بكسوف وايان شال إيديها وحطها ورا ضهرها : انسي اي كسوف دلوقتي

..

الشباب كلهم مشيوا من الشركة

يوسف ويامن كانوا خارجين من الشركة سوا

يوسف : طمني

يامن : الدنيا ماشية حلو بس هتكمل كدا

يوسف : هو باباك جاي إمتى

يامن : يومين ويوصل

يوسف وقف قدام الشركة : بعد أسبوع هيكون فرحك يا عريس

يامن : أسبوع إيه يا يوسف أبويا دا لو فضلت سنة مش هتعرف تقنعه

يوسف مشي : هتشوف بنفسك بس خليك جاهز

يامن مشي وراه : طيب استنى قولي هتعمل إيه

يوسف : مالكش دعوة إنت

يامن : ماشي يا يوسف

يوسف : باي

يامن : باي

ركب يوسف عربيته ومشي وخرجت نغم من الشركة 

وقربت من يامن : واقف كدا ليه

يامن : مستنيكي طبعا

نغم : طيب يلا

يامن فتح لها الباب نغم ركب قفل الباب وركب واتحرك بالعربية

..

فيلا العيلة

الشباب كانوا قاعدين في الريسبشن

سلمى راحت ليوسف : لو سمحت يا سيف ممكن أتكلم مع يوسف شوية

سيف : أكيد يا سلمى اتفضلي

قام يوسف وقعدت سلمى جنبه

يوسف : في إيه يا سلمى

سلمى : هتعرف دلوقتي.. ابنك النهارده راح الشغل فاهم يعني إيه واحد يسيب عروسته في يوم زي دا

يوسف ضحك : وإنتي جاية تقوليلي عشان أمنعه

سلمى : أها تمنعه

يوسف : بس زين مش هيجي كدا أنا هتكلم معاه والحرية ليه في الآخر أنا مش هضغط عليه يعمل كدا بس هو هيفهم

سلمى : ماشي يا يوسف أي حل يجي معاه عشان بجد ابنك دا هيجننا خلاص

يوسف : سلامتك يا حبيبتي

وفجأة سمعوا صوت عالي من برا

سيف : فارس هو دا مش يوسف

فارس : مش عارف

مالك : تعالوا نطلع نشوف

الشباب والماميز كلهم خرجوا من الفيلا

يوسف كان واقف ساند على العربية وباصص لفوق وكانت فيروز باصة عليه من البلكونة وهي بتضحك

يوسف بصوت عالي : بحبك

بيخرج آسر من الفيلا وهو بيجري : في إيه يا جماعة

سيف ضحك : تعال يا آسر

بص آسر على يوسف ووقع على الأرض من الضحك

فارس : إنت بتعمل إيه يا يوسف

يوسف بص عليهم كلهم واتحرج : كنت بحب مراتي يا بابا

فارس : ملقتش غير هنا

نور: طيب والله عسل يا حبيبي

شهد بصت فوق لفيروز : أقنعتيه إزاي يا روز

فيروز حطت إيديها على بوقها ورجعت لورا وفضلت تضحك

آسر ضحك : إنت مش يوسف والله أكيد حصلك حاجة

مراد : الحب بيعمل أكتر من كدا

يوسف الكبير : طيب تعال يا يوسف ادخل واطلع لمراتك وقول لها اللي إنت عايزه

يوسف : حاضر

يوسف بص لفيروز ودخل الفيلا وآسر حط إيده على كتف يوسف : ما تنساش تعلي صوتك

يوسف : مستفز

آسر ضحك وطلع جناحه.. يوسف فضل واقف شويه

فارس : اطلع يحبيبي

يوسف ضحك : حاضر

يوسف طلع وهو لسه محرج شويه ضحك علي جنانك ووصل قدام الجناح ولسه هيخبط فيروز فتحت الباب

وهي بتضحك : ايه اللي انت عملته تحت دا

يوسف دخل وقفل الباب وراه وفضل يبصلها

فيروز : في ايه مالك

يوسف قرب منها ورجع شعرها وحط ايدو علي وسطها : كنت بقول الحقيقة

فيروز : قدامهم كدا

يوسف ابتسم : ونا هخاف ليه.. انتي مراتي وبحبك ولو الدنيا كلها اتلمت هقولها ليكي تاني

فيروز قلبها دق جامد من كلامه ليها وقربت منه اكتر : طيب قولها تاني

يوسف بعشق : بحبك يفيروز وبحب جنانك وضحكتك وانك بتخليني اعمل حاجات عمري ما كنت اتخيل اني اعملها

فيروز : ومبسوط اين بخليك بتعمل حاجات عمرك معملتها

يوسف : هتصدقيني لو قولتلك انا اسعد واحد في العالم

فيروز : هصدقك

يوسف سحبها من ايديها وقعدها علي السرير جنبه : تعالي بقا عشان اعوضك عن اليوم اللي سيبتك فيه طول النهار

فيروز : وهتعوضني ازاي يا بشمهندس

يوسف مال عليها وهمس في ودنها : هتشوفي

وقرب منها...

..

في جناح فريد وديما

فريد كان نايم وضهره لديما ومش مبطل تفكير

ديما كانت قاعدة على السرير بتبصله قربت منه وحضنته من ضهره

فريد اتنفس بتعب ولف ليها خدها في حضنه

ديما بصتله : فريد أنا..

فريد قاطعها : مش عايز نتكلم لو مش هنوصل لحاجة يا ديما

ديما : ديما بقيت ديما بالنسبالك يفريدي  

فريد : مهما يحصل ما بينا هتفضلي دمدومتي

ديما : بتحبني

فريد : مجنونة إنتي يعني لو اتخانقنا هكرهك

ديما : ممكن

 

فريد : يعني إنتي لما بنتخانق بتكرهيني

ديما : أها

فريد : شايفة الفرق بينك وبيني

  

ديما ضحكت وحضنته وفريد ابتسم

..

في فيلا عمر ومصطفى

كانوا كلهم قاعدين في الريسبشن بيتفرجوا على فيلم

فهد بص لداليدا اللي مندمجة في الفيلم : داليدا قومي نطلع ننام

 

داليدا : استني شوية يا فهد الفيلم حلو خلينا نشوف هيعمل إيه

فهد : يعمل ولا ما يعملش مالناش دعوة قومي يا حبيبتي ننام

مريم : روح إنت نام يا فهد وداليدا هتخلص الفيلم وهتطلع وراك

أدهم : هتخلصه إمتى دا شغال له ساعتين ولسه ما خلصش عند أمه دمه وخلص وفيلم تافه أصلا والبطل تافه كمان

ليلى : بقى القمر المز دا تافه

أدهم : احترمي نفسك يا ليلى

ليلى : بهزر يدومي هو يجي جنبك حاجة

  

أدهم : أيوا اتعدلي كدا

أسما : بس بجد الفيلم دا تحفة يا بنات أول مرة أشوف أجنبي بالحلاوة دي

مصطفى : والمصري أحلى كمان

 

أسما : دا أكيد طبعا

فهد : داليدا أنا مش هتكلم كتير

داليدا قامت : حاضر أهو

وطلعت مع فهد.. 

 

فهد بصلها ومسك إيديها : السهر غلط عليكي يا مدام ما تنسيش إنك حامل

داليدا : أنا زي الفل قدامك أهو دا كله كلام أنا ممكن أتشقلب قدامك دلوقتي عشان تعرف إني تمام

فهد : تتشقلبي

داليدا : أها

فهد شدها من إيديها : طيب تعالي واتشقلبي فوق

داليدا : لاا لاا إنت فهمتني غلط أنا هموت من التعب

فهد : مش هصدق تمثيلك

خلص كلامه ودخلوا الجناح

..

في جناح مراد وملك

ملك كانت نايمة في حضن مراد وفجأة فاقت مخضوضة

مراد فتح عيونه : في إيه يا حبيبتي مالك

ملك : مش عارفة بس حلمت بكابوس وحش يا مراد

مراد قام ومسكها بين حضنه : احكيلي طيب

ملك : داليدا مش كويسة كان في دم حواليها كتير هي 

ممكن تكون..

وعيونها اتملت دموع

مراد خدها في حضنه : ما تفكريش كدا يا حبيبتي هي أكيد كويسة ولو حصلت حاجة ليها بعد الشر يعني كان كلمنا فهد

رن فون مراد وملك بعدت عنه : أكيد فهد رد بسرعة

مراد : حاضر.. ممكن تهدي الأول

ملك هزت راسها ومراد مسك الفون ورد:

مراد : أيوا يا فهد  

فهد : عمو مراد تعال بسرعة إنت وخالتو ملك

مراد : في إيه طيب

فهد : مفيش وقت أشرح تعال دلوقتي

مراد : حاضر

مراد قفل وملك فضلت تعيط : داليدا مالها

مراد : داليدا كويسه بلاش تعيطي واهدي يملك...