رواية عانيت لأحبك الجزء الثاني2 الفصل التاسع9 والعاشر10 بقلم فاطمه محمود

دانيه بصوت عالي : آسر آسرر

العيله كلها كانت متجمعه واستغربو صوت دانيه عالي ليه

ملك : في ايه يدانيه صوتك عالي ليه

دانيه مرديتش علي ملك وعيونها كانت علي السلم و اتكلمت بصوت عالي : آسر

مراد : في ايه يدانيه فهمينا

مالك : ردي يحبيبتي علينا وقولينا في ايه وماله آسر

دانيه بصيت لمالك : هتعرف دلوقتي ماله آسر

آسر بينزل علي السلم

دانيه : اخيرا حضرتك نزلت

آسر : في ايه وليه بتزعقي وصوتك عالي

دانيه بعصبية : عاوز تعرف ليه صوتي عالي ما انت السبب

في اللي بيحصل دلوقتي

آسر : انا مش فاهم حاجه

دانيه : يعني مجرم وكداب كمان وكل دا وبتعرف تمثل انا

بجد مصدومه فيك ازاي قدرت تعمل فيا كدا هو انا عدوتك

ولا عمري اذيتك ليه تعمل فيا كدا

دانيه انهيت كلامها بعصبية وكسره

مالك : آسر هي دانيه بتكلم عن ايه

دانيه : مترد ساكت ليه ولا تحب اقولهم انا

آيه : آسر اوعي تكون عملت حاجه مش كويسه

دانيه : هو لسه هيعمل دا عمل وفي مين فيا انا بنت عمته

ملك : حد يقول في ايه بلاش تسبونا مش فاهمين حاجه كدا

آسر كان ساكت وعيونه علي دانيه اللي متعصبه

يوسف : آسر بلاش تفضل ساكت

فارس : اتكلم ولو في اي حاجه نقدر نتصرف

دانيه : هتتصرف ازاي هترجع ليا كسرتي وحيرتي وكدبي

علي اهلي كل دا حصل بسببه منك لله يا آسر

عمر : اهدي يحبيبتي

مالك اتعصب من آسر اللي ساكت وظاهر عليه البرود

واتكلم بعصبية : آسر اتكلم

آسر بصله ورجع بص لدانيه : خلصتي خلاص طلعتي

عصبيتك

دانيه اتمليت عيونها دموع : انت ازاي قادر تتعامل معايا ببرود كدا بعد اللي عملته هو انت بجد مش حاسس باي حاجه

آسر : عملت ايه هددت ايهاب بأنه يبعد عنك ويختفي

من حياتك ويسيبك في حيره واجبره يقدم استقالته

عشان ميربطهوش ولا شغل ولا اي حاجه معاكي هو

دا اللي عاوزه تقوليه اها انا عملت كدا ولو كنت قادر

اخفيه من علي الارض مكنتش هتردد بس مسالتش

نفسك لو لمره وحده انا ليه عملت كدا

دانيه ابتسمت بوجع : اكيد عاوز تكسرني مش محتاجه

افكر

آسر قرب منها ومسك دراعها : وليه ميكونش عملت كل دا

عشان بحبك .. اها بحبك يدانيه حاولت مدايقش ومفكرش في الموضوع بس مقدرتش اشوفك مع شخص غيري  حسيت انك ليا وبس ولو رجع بيا الزمن هعمل كدا تاني

الكل كانوا واقفين مصدومين من كلام آسر و مالك مسك

دراعه وشده بعصبية : انا ممكن اضربك دلوقتي واربيك

من اول وجديد معنديش مانع

ايان : بابا آسر عمل اللي كان اي حد لازم يعمل

مالك بصله بصدمه : يعني حضرتك كنت عارف

ايان : اها عارف

مالك : هو انا مخلف عصابه انت ازاي توافق علي حاجه زي

دي ونا اللي بقول عليك العاقل والناصح اللي المفروض انك اخوه الكبير تقوله علي الغلط والصح اللي ميعرفوش

آسر : بابا ايان معملش حاجه هو بس كان يع

مالك قاطعه بعصبية : انت تخرس خالص و وشك دا مش عاوز اشوفه دلوقتي

آيه : مالك انت بتقول ايه

مالك : قولت اللي عندي

آسر : تمام انا هخرج ومعنديش اي مانع مرجعش تاني انا بس كل اللي فارق معايا دانيه

دانيه بصتله بدموع و آسر مسك أيدها : انا آسف علي كل

اللي عملته واسف علي كدبك وحيرتك وكسرتك بسببي بس

صدقيني انا لو مكنتش حاسس انك انتي كمان بتحبيني

زي مبحبك انا مكنتش عملت كل دا

مراد مسك ايد دانيه وبعدها عن آسر

آسر بصله ورجع بص دانيه : خلي بالك من نفسك لحد مرجعلك ونتجوز انا مش هسيبك بعد كل اللي عملته علشانك دا

آسر بصلها وكانه بيودعها

مالك : تبقا بتحلم لو فكرت انك ممكن تبقا ليك بعد اللي عملته

آسر بصله : ودانيه مش هتبقا لحد غيري يمالك عزالدين

آسر خرج من الفيلا

مالك : انا مش عارف اقولك ايه يمراد بجد انا آسف علي

كل اللي حصل ونا عارف اسفي مش هيعمل حاجه ونتي

كمان يملك انا والله مدايق من اللي عمله آسر

مراد : انا همشي بي بنتي من هنا

يوسف : مراد

مراد خرج هو وملك و دانيه

سيف : سيبه يا يوسف دلوقتي

زين : عمو مالك اللي حصل مش هيرجع حاجه آسر لازم

يرجع وتحاول تفهم اللي عمله عشان حبه ليها

مالك : حبه ليها بانه ياذيها

ادهم : محدش بيقصد ياذي حد بيحبه من كل قلبه واكيد محدش هيعمل اللي عمله آسر غير اللي بيحب بجد

مصطفي : هو اللي حصل من آسر صعب علي دانيه بس ادهم معا حق كلنا لما نبحب مبنفكرش احنا بنعمل ايه

غير أن الشخص اللي بنحبه يبقا لينا في الاخر

مالك : آسر غلطان ودي حاجه مش هتتغير

يوسف : انا من رأي كفايه كلام وكل واحد يهدي عشان

نعرف نفكر صح

..

في اوضه دانيه قاعده بتعيط وبيدخل مراد وبيقعد جمبها

دانيه بتمسح دموعها و مراد بيبصلها

مراد : انا ومامتك متجوزناش بالساهل كدا قابلنا مشاكل

ورفض من الأهالي ومكنتش اقدر اشوفها بس انا عمري

ما استسلمت وفضلت أحاول لحد متجوزنا وكانت ام ملك وافقت على جوازنا وبعد الجواز حصلت مشاكل كتيره

بس بردو عمري مبعدت عن ملك وكنت دايما الداعم ليها

وهي كانت السند ليا .. انتي بتحبي آسر يدانيه وباين حبك

في عيونك

دانيه كانت ساكته وباصه قدامها مراد مسك ايدها : آسر غلط ونا مش هنكر دا بس كمان متاكد من حبه ليكي

مراد أبتسم وباس راسها وملك دخلت وقعدت جمب دانيه: كلنا بنتمني في حياتنا حد يحبنا من كل قلبه ويحارب عشانا

ويقول قدام كل الناس انه بيحبنا ونتي لقيتي آسر زي ما انا لقيت مراد وصدقيني قليل جدا اللي بيعمل كل دا عشان حد بيحبه .. خدي وقتك يحبيبتي ازعلي وعيطي بس ترجعي دانيه البنوته الشقيه اللي بتعمل جو في اي مكان وتفكري في آسر وحبه ليكي ومحدش هيجبرك علي حاجه انتي اللي هتوافقي أو ترفضي

دانيه بصت لمراد وملك : انا بحبكم

مراد حضن ملك و دانيه : ونا بشكر ربنا انكم في حياتي

..

آسر كان قاعد في عربيته قدام البحر وفونه بيرن برقم

ادهم

ادهم : انت فين يا آسر

آسر : قاعد في العربية

ادهم : طيب اجيلك ما انا مش هسيبك لوحدك

آسر : متشغلش بالك بيا اهم حاجه دانيه كويسه

ادهم : من بعد مخرجت عمو مراد خدها وخرج من الفيلا

بس متقلقش اكيد مش هيقولها حاجه

آسر رجع رأسه علي الكرسي بتعب : انا عارف عمو مراد

هيتكلم معاها عشان يخفف تفكيرها بس انا قلقان عليها

من عياطها وزعلها مني

ادهم : هتاخد وقتها وهتهدي .. طيب انت هتبات فين

يابني تعالي عندي وخليك معايا

آسر : لاا يا ادهم انا عاوز ابقا لوحدي

ادهم : طيب يبقا طمني عليك

آسر : حاضر

آسر بيقفل وبيفكر في دانيه وبيمسك الفون وبيرن عليها

دانيه كانت نايمه وبصيت للفون اللي رن باسم آسر

فضلت تبصله وبعدين قفلت و حاولت تنام

آسر كان مستني أنها ترد بص للفون : ونت فاكر أنها هترد عليك

سكت وهو حاسس بقلق عليها واطمئن بأنها قلبها معاه

قطع تفكيره رن الفون

آسر : كل المكالمات دا عشان غبت عن البيت

ايان : دا انا مش اول واحد

آسر : ادهم كلمني

ايان : طيب انت ازاي هتفضل برا البيت

آسر : متقلقش انا كويس وكل حاجه تمام

ايان : آسر روح اقعد في الشقه اللي بنروحلها ونقعد فيها

آسر : دلوقتي حابب ابقا هنا وبعدين يبقا اروح

ايان : طيب ونا هتكلم مع بابا واشوف هيفضل كدا لحد امتي

آسر : بلاش تكلم معاه انا تمام كدا

ايان : تمام كدا امال ازاي هتجوز البت هتاخدها معاك

بعيد عننا

آسر : بفكر اعمل كدا

ايان : مجنون وتعملها

آسر ابتسم : طيب روح نام انت الوقت اتاخر

ايان : تصبح على خير

آسر : ونت من أهله

..

في جناح مالك و آيه

آيه : هو انت ازاي تبعد ابني عني يمالك وتطردته من الفيلا

هو انا حمل قلق عليه مش كفايه اللي حصل كان ايه لازمته

اللي عملته

مالك : عشان يعرف اللي عمله غلط حتي لو كان بدافع الحب مينفعش يهدد الشاب ويعيشها في حيره وزعل

بأنها عملت ايه عشان هو يختفي كدا

آيه : كلنا قولنا أنه غلط وكلنا بردو فهمنا حبه ليها حتى لو

كانت طريقه غلط بس انت بس اللي مش عاوز تفهم

مالك : انا فاهم يا آيه بس الغلطه هتفضل غلطه وكلنا بنغلط احنا مش ملايكه بس كان فكر فيها الاول اللي هيحصل تمنه كبير

آيه : مالك انا عاوزه ابني يرجع انا سكت تحت ومقولتش حاجه عشان مكسرش كلمتك بس ابني لو مرجعش بكرا انا مش هفضل هنا

مالك : ومين قالك اني مبسوط باللي عملته انا مدايق زيك

ويمكن اكتر اها باين عليا اني قسيت عليه بس مينفعش غلط زي دا اطبط عليه واخده في حضني واقوله برافو

اهو حتي لو فكر بغلط المره الجايه يفكر في كلامي لي

قبل ميعمل اي حاجه

آيه قربت منه وسندت علي كتفه : اكيد هيفهم بس عشان

خاطري سيبه يرجع

مالك : انا مكنتش هوافق أنه يفضل بعيد عني اكتر من

كدا و حاضر هيرجع بكرا بس بطلي قلق

..

آسر كان واقف بالعربية بعيد عن الفيلا شويه وشاف دانيه

خارجه من الفيلا نزل بسرعه وراح عندها ومسك أيدها

آسر : دانيه

دانيه بصتله : انت ايه اللي جابك هنا

آسر : جاي عشانك

دانيه : ونا مش عاوزه اشوفك اتفضل امشي

آسر : مش بمزاجك انتي طول الوقت في بالي وقلقان عليكي وكنت خايف تحصلك حاجه بسببي

دانيه كانت بصاله في عيونه و آسر مسك خدها : بلاش

عناد يدانيه احنا بنحب بعض انسي اللي حصل وخلينا

نبدا حياه جديده سوا

دانيه بعدت أيدها عنها : ونا مش عاوزه اي حاجه تربطني بيك ومش عاوزه اشوفك تاني

آسر : ونا مش هبعد عنك لو طلبتي مني مليون مره انا

مش هبعد ونا متاكد هيجي يوم وتطلبي مني انك تبقي

معايا

دانيه : تبقي بتحلم لو حصل اي حاجه من اللي بتقولها

آسر : بحلم والحلم هيتحقق

دانيه بصتله وبعدين ركبت عربيه مراد واديتله ضهرها

مراد قرب من آسر و آسر بصله

آسر : انا اسف

مراد ابتسم : انا كنت مدايق منك ومن اللي عملته بس بعدين فكرت وحسيت بجد انك بتحب دانيه

آسر : اعمل ايه طيب بنتك مش عاوزه تكلم معايا دلوقتي ولا طيقاني

مراد : اديلها وقتها وهتوافق وهتنسا اللي حصل

آسر : بجد ريحتني يمراد كنت خايف من خناقك معايا وقولت كمان هتعاند ومش هتوافق علي جوازنا

مراد ضحك : لاا متقلقش حماك طيب وغلبان ركز بس دلوقتي وشوف هتعمل مع دانيه ايه

آسر : لاا متقلقش مش هتاخد يومين وهتوافق علطول

يا حمايا

مراد : واثق أوي كدا بس تعملها وتعمل اللي محدش يصدقه

آسر : اطمن متقلقش

مراد طبطت علي كتف آسر : مطمن عشان دانيه لقيت الشخص اللي يحبها وعارف يتعامل معاها

دانيه بصتلهم وهي جوا العربية واتكلمت بعصبية : بابا

مراد : جاي يحبيبتي

آسر : انا بقول تمشي عشان ميطلعش جنانها علينا

مراد ضحك : ماشي سلام

آسر : سلام

مراد ركب العربية و آسر كانت عيونه علي دانيه و مراد

اتحرك ومشي بالعربية

بيخرج ادهم من الفيلا وبيشوف آسر واقف : آسر انت هنا

آسر بصله : زي ما انت شايفني قدامك

ادهم : كويس انك رجعت عشان تعرف تتصرف في اللي حصل

آسر : بس انا مرجعتش

ادهم : يعني مش عمو مالك اللي طلب منك تيجي

آسر : لاا انا جيت اشوف دانيه و ماشي

ادهم : ليه يا آسر ادخل الفيلا و ارجع شغلك عمو مالك

مش هيرفض

آسر : لاا يا ادهم انا مش هرجع دلوقتي

ادهم : طيب انت قاعد فين

آسر : في شقه اللي بنروحلها وكنا نقعد فيها

ادهم : طيب انا هروح الشغل ويبقا اعدي عليك لما اخلص

آسر : ماشي يحبيبي

ادهم بيركب عربيته وبيمشي و آسر بيركب هو كمان عربيته

والفون بيرن ورد عليه : ايوا يا ايان

ايان : انت فين

آسر : انا قدام الفيلا و ماشي دلوقتي

ايان : استني انا نازل ليك

آسر : تمام

..

دانيه كانت بتبص لمراد و عاوزه تساله كان بيتكلم في ايه مع آسر

مراد : عاوزه تعرفي اتكلمت مع آسر في ايه

دانيه : لاا مش عاوزه اعرف ولا يهمني آسر نفسه اصلا

مراد : متاكده

دانيه : اها متاكده

مراد : لو بتحبي آسر و عاوزه تتقلي عليه شويه ماشي ونا اول واحد هكون معاكي بس مش عاوز دور المش فارق دا

دانيه : بابا انا ولا بحبه ولا بطيقه اصلا وهو بجد مش فارق

مراد : ماشي يدانيه

..

في عربيه آسر بيكون ايان قاعد معاه

ايان : آسر انزل يلاا مفيش انك تبات تاني برا البيت

آسر : انت ليه مش عاوز تفهم اني مش هرجع غير لما بابا يطلب مني كدا

ايان : طيب و ماما مفكرتش فيها دي هتموت من القلق عليك وحتي جربت ترن عليك وفونك كان مقفول لحد

ما انا طمنتها بأني اتكلمت معاك وقولت ليها اكيد فصل شحن وهديت بالعافيه ماما مش عارفه تنام ونت مش موجود

آسر اتنفس بصعوبة : والله يا ايان انا مش حابب كل اللي بيحصل دا ولا حابب ماما انها تتعب بسببي بس انا مقدرش

اكسر كلمه بابا قدام الكل وهفضل مستني منه أنه يقولي  ارجع يا آسر

ايان : طيب يا آسر

آسر : ايان كنت عاوز منك تجبلي هدوم عشان مفيش اي هدوم في الشقه

ايان : طيب متطلع تطمن علي ماما وتجيب اللي انت عاوزه

آسر : هكلمها في الفون و اطمن عليها

ايام : يا اخي اسمع كلامي لو لمره وحده باني اخوك الكبير

وانزل من العربية واهو تطمن وتشوفك قدامها

آسر : ماشي يا اخويا الكبير

ايان : انزل يلاا

بينزل ايان و آسر وبيدخلوا الفيلا سوا

..

في جناح فريد و ديما

فريد بيفوق من النوم وبيدخل الحمام ياخد شاور وبيخرج وبيلبس هدومه وبيقف قدام المرايا يصفف شعره ويرش برفان ديما بتفوق علي ريحه برفانه وبتقعد وبتفضل تبصله

بحب و اعجاب من اناقته

فريد بيخلص وبيبصلها : صباح الخير

ديما ابتسمت : صباح الخير .. كل الشياكه دي عشان الشغل

بس انا هغير عليك من الموظفين

فريد قعد علي الكنبه عشان يلبس الجزمه : متقلقيش مفيش وحده هتقدر تاخد مكانك

ديما : طيب يا زوجي العزيز المفروض بعد الكلمتين الحلوين دول يكون في بوسه

فريد ابتسم وقام وقرب منها وقعد جمبها علي السرير وباس  خدها وكان هيقوم ديما مسكته من الجاكت وقربت من شفايفه وباسته فريد اندمج معاها وبعدين بعد عنها

فريد : لو فضلت اكتر من كدا اكيد مش هخرج ونا لازم امشي عشان الشغل

ديما : ماشي يحبيبي

فريد : قومي البسي عشان اوصلك

ديما : لاا امشي انت عشان متتاخرش ونا هخلي السواق يوصلني

فريد : خد بالك من نفسك

ديم : حاضر

..

في فيلا العيله

ايان : ادخل وهات هدومك انت ونا معايا مكالمه فون

آسر : تمام

ايان بيمشي و آسر بيدخل جناحه و بيشوف مالك و آيه موجودين

آيه بتبصله بلهفه وبتقوم تحضنه : آسر رجعت يحبيبي

آسر كان ساكت و آيه بعدت عنه : قولي يحبيبي انت

كويس نمت فين و اكلت

آسر : انا كويس يماما اطمني و اكلت ونمت وعملت كل حاجه بس انتي اهدي

آيه : اكيد مفطرتش يحبيبي يلاا تعال ننزل و اعملك الفطار اللي بتحبه

آسر : ممكن ثانيه يماما

آسر بيبص لمالك اللي قاعد : انا بس جيت عشان اخد هدوم ليا و اشوف ماما مش بكسر كلمتك ابدا ونا مش هرجع غير لما تطلب مني وتقولي ارجع يا آسر

آيه : باباك كان هيقولك ارجع يحبيبي اطمن انت

آسر : انا مش هرجع غير لما أسمعها من بابا يماما

مالك بصله وقام و وقف قصاده : مكنتش عارف انك هتبقا واعي وناضج في يوم وشايل مسؤوليه وانك تفضل برا البيت عشان متكسرش كلمتي مبسوط بيك يا آسر ونا عارف اني اتصرفت بطريقه مش حلوه بس انت غلطت

بردو

آسر نزل راسه و مالك مسك وش آسر ورفعه لي : آسر مالك عزالدين ابني مينزلش راسه ابدا

آسر : انا آسف يبابا انا كنت مدايق من اللي بعمله وعلي

اللي حصل لدانيه بسببي بس والله كان غصب عني دا اللي كان قدامي مكنش قادر اني اقولك أو اقول ليكم اني بحبها

وتسيب ايهاب للاسف مكانش هينفع بس والله انا بحب دانيه ومتقدرش اشوفها معاه ونا بتالم

آسر خلص كلامه ودموعه فضلت تنزل

مالك مسح دموعه : بس يحبيبي خلاص متعيطش

آسر بدموع : انا آسف

مالك اخده في حضنه : اشش بس عياط عشان معيطش انا كمان

آسر ابتسم ما بين دموعه هو وفي حضن مالك و ايان بيدخل وبيشوف شكلهم : آسر بجد انا مش قادر اصدق التغير اللي عملته دانيه انت بتعيط

آيه مسحت دموعها : بس يا ايان

ايان ابتسم وحضنها : حاضر يتوتا بس متعيطش انتي

كمان كفايه هما

مالك بعد عن آسر : عاوز دانيه تنسي اللي حصل وترجع دانيه اللي نعرفها

آسر : متقلقش يبابا كل حاجه هترجع زي الاول و احسن

مالك : انا قلقان من متقلقش

آسر ابتسم

مالك : ايوا كدا يحبيبي عاوز منك انت كمان متزعلش مني

مكنتش أقصد

آسر : مش زعلان منك يبابا بالعكس أنا عرفت غلطي حتي

لو كنت بعمله علي حساب حبي

مالك ابتسم : طيب يحبيبي اسيبك تغير هدومك

مالك بيخرج من الجناح

آيه : متتاخرش يحبيبي عشان نفطر سوا

ايان : حب ودلع مش هيخلصو ابدا

آسر ضحك: دا عرض بشهرين

آيه مسكت ودن ايان : مش بتشوفه الدلع دا نهائي انت يعني

ايان : لاا بشوفه يا ست الكل

آسر : اخيرا شوفتك تحت التهديد

ايان : عاجبك كدا بتشمتي فينا اللي يسوي واللي ميسواش

آيه ضحكت : طيب يلاا بينا ننزل

ايان : يلاا

آيه و ايان بيخرجوا وبيشوفه غزل

غزل : صباح الخير يتوتا

آيه : صباح الخير يزوزو

غزل : آسر جوا

آيه : اها يحبيبتي ادخلي لي

غزل : تمام عن ازنك

آيه : اتفضلي يحبيبتي

غزل دخلت جناح آسر و ايان اللي عيونه عليها وبص ل آيه اللي بتكلمه

آيه : هو في حاجه حصلت ما بينكم

ايان : لاا يماما مفيش

آيه : ماشي بس انا عاوزه بعد آسر تجوز انت و غزل انا بقولك اهو

ايان : طيب يماما انا هنزل

آيه : استني انزل معاك

آيه و ايان بينزلوا سوا و ايان بيروح الجناح بتاعه عشان يلبس ويروح الشغل و آيه بتروح للبنات تحضر الفطار معاهم

..

في جناح آسر

غزل : آسر انا جايه اشوفك انت مش نتكلم عن ايان

آسر : عارف يحبيبتي بس آسر قالي لما طلبت منه انه

يبعد عنك وكان مدايق وزعلان جدا والله هو بس مشكله

انه غبي ومش عاوز يفهم انه بيحبك

غزل : بجد يا آسر مش مهم يعرف لاني خلاص مش عاوزه منه حاجه

آسر بيقعد جمب غزل وبيحط ايدو علي كتفها : غزل انتي اختي ونا عارف انك بتحبيه ومن واجبي اني انصحك بانك تحاول تفهميه وتصبري عليه

غزل : يا آسر انا مقولتش حاجه وكنت مستنيه بس هو

بيتعامل معاها وبيعمل حاجات وبعدين يقولي انا بعاملك عادي

آسر : بصراحه انا طقيت منه بقولك انتي تفضلي كدا وهو

في الاخر البطيخ اللي في دماغه دا هيطلع ويفهم انه بيحبك

غزل : حياه قالتلي زي كدا تجاهليه

آسر : اسمعي منها اول مره تكلم صح

غزل ضحكت : طيب انا هسيبك دلوقتي

آسر : ماشي يحبيبتي

غزل خرجت من الجناح و آسر قام دخل الحمام ياخد شاور

..

الشباب كانوا قاعدين بيتكلموا في الريسبشن

يوسف : كويس انك عملت كدا يا مالك ورجعت آسر

فارس : وهو كان لازم يرجع وميفضلش برا البيت تاني

مالك : انا بس كنت عاوز اعرفه غلطيته و مبسوط أنه

رفض يفضل ومكسرش كلمتي

سيف : آسر شاب وفاهم كل حاجه يمالك ولو علي الغلطه كلنا غلطنا بس اهم حاجه نتعلم ودا شفنا في آسر

مالك : فعلا معاك حق يا سيف

نور بتدخل : كفايه كلام ويلاا الفطار جاهز

الشباب و البنات بيتجمعو علي السفره وكلهم بيبقو موجودين ما عدا آسر

آيه : آسر منزلش ليه يا ايان

آسر بيدخل : انا اهو يماما

آيه : اقعد يحبيبي افطر

آسر بيقعد

يوسف : حمدالله على سلامتك يا آسر

آسر : الله يسلمك يا عمو يوسف

سلمي : نورت بيتك يحبيبي

آسر : تسلملي يا خالتو

سيف : كفاره يمعلم

آسر : لاا كدا تاهت منك يا سيف هو انا كنت في السجن

يجدع

سيف ضحك : كنت في سجن مالك

مالك : متفكرنيش يا اخي

آسر ضحك

شهد : البيت كان وحش وملوش اي طعم من غيرك يا اسوره

آسر بص لسيف : سامع بدلعني

سيف : خليها تدلعك

فارس : انا مش شايف اي تغير فيك يا آسر

آسر : ليه كدا بس يخالو

فارس : خالو .. لا انت اتغيرت بجد وبقيت تحترمني كمان

آسر ابتسم : ياسيدي متزعلش لو مره ادايقت مني

فارس : لاا يحبيبي مزعلش منك

نور : دا انت اللي محلي حياتنا يحبيبي

زين : اها يعني كدا آسر هو بس اللي محلي العيله دي

نور : اكيد كلكم يحبايبي

سلمي : دا انتو الورد بتاع العيله

فريد : دا احنا كدا نشوف نفسنا بقا

سيف : هتتغرو انتو عشان سمعتو كلمتين حلوين طيب

 احنا اساس الورد يحبيبي لو فاكر

فريد : محدش يقدر يقول حاجه طبعا يا سيف بيه

سيف : دا اكيد يحبيبي

آسر بص ليوسف : وحشتك يا يوسف

يوسف الصغير : لاا بصراحه

آسر : عارفك النداله في دمك

حياه : وحشتيني انا يا اسوره

آسر : ونا اللي كنت مستغرب انتي ليه ساكته

حياه : لقيت كله بيتكلم قولت أما يخلصوا عشان اعرف اطبلك

ايان : قوم اتحزملها عشان ترقص

آسر : شايفه بيقول ايه و ايه اطبلك دي يحياه طيب قوليها بس مش قدام العيله

سيف : ليه مالناش نفس نشوف رقصك

آسر : لاا انا مش بتاع الكلام دا انا راجل تقيل

ديما : تقيل هي دانيه عملت المعجزه دي ازاي

آسر : وقعت في حبها وكفايه اساله من دي بتكسف

ديما ضحكت : حاضر

..

في المستشفى

دانيه كانت واقفه في كفتريا المستشفى وبتقرب منها

انجي ومعاها قهوة

انجي : اتفضلي يدانيه

دانيه ابتسمت : شكرا يا انجي

انجي : علي ايه بس

دانيه شربت من القهوة وفضلت ساكته

انجي : انا حاسه انك مدايقه

دانيه بصتلها : يعني شويه

انجي : مهما كان إللي بتمري بيه صدقيني هيخلص وربنا هيفرحك

دانيه : أن شاء الله يا انجي .. انتي عامله ايه في الشغل

انجي : الحمدلله اهو ماشي بس عارفه بيجي علينا فجاه كدا ملل واكتئاب

دانيه ضحكت : اها والله

انجي : بس يعني الحياه ماشيه والحمدلله

دانيه : الحمدلله

آسر بيجي وبتشوفه انجي بس دانيه بتكون ضهرها لي

انجي : طيب انا هروح اشوف الشغل يدانيه

دانيه : تمام

انجي بتمشي و آسر بيقرب من دانيه اللي بتاخد نفس

كبير وبتخرجه

آسر : دانيه

دانيه بصتله واتكلمت بنفعال : هو انت هتفضل تطلعلي في كل حته اسبلك المستشفى كمان

آسر : ليه العصبية دي كلها وبعدين انا دكتور وجاي اشوف شغلي

دانيه : روح شوف شغلك اللي جايه عشانه

آسر : ما انا بشوفه قدامي اهو

دانيه مكانتش فاهمه وبعدين فهمت قصده عليها بتبصله وبتمشي من قدامه و آسر بيمشي وراها كانه الحارس الشخصي بتاعها دانيه بتدخل المكتب و بتقفل الباب آسر بيمسكه قبل ميتقفل وبيدخل ويقفل الباب دانيه بتبصله : اطلع برا يا آسر

آسر : نتكلم الاول

دانيه : ونا مش عاوزه اتكلم معاك

آسر : بس انا عاوز مش مهم انتي تبقي عاوزه ولا لا

دانيه : نعم

آسر فضل يبصلها من فوق لتحت ويركز في كل حاجه فيها و دانيه اتكسفت من نظراته ليها

آسر : شكلك حلو اوي قلبي اول مبيشوفك بتخطفيه

دانيه : بقولك ايه متبصليش كدا واطلع

آسر : رجعي قلبي ونا هطلع

دانيه : مش عاوزه قلبك انا اصلا

آسر : دانيه بجد يعني ليه مش عاوزه اني ابقا حبيبك وجوزك

دانيه : عشان انا بكرهك

آسر قرب منها : بجد بتكرهيني

دانيه فضلت بصله في عيونه و اتوترت من قربه ليها وزقته بعيد عنها

آسر ابتسم : انا اتاكدت انك بتكرهيني

آسر خرج و دانيه قعدت علي الكرسي : هو كان لازم

اتوترت قدامه وافضح مشاعري

..

فريد و يوسف كانوا موجودين في مطعم مع شخصين

بيمضو سفقه

فريد : كدا كله تمام العقد اتمضي والتسليم كمان خمس شهور

تمام يفريد بيه

يوسف : تقدروا تيجو الموقع وتتابعه الشغل عشان تطمنو علي كل حاجه

احنا واثقين اكيد بان الشغل هيخلص في اقرب وقت

فون فريد بيرن وبتكون ديما وبيقفل الفون

فريد : بس دا ميمنعش لو حابين تشوفه كل حاجه

اكيد يفندم عن ازنكم ونتقابل في الشغل

يوسف : أكيد اتفضل

العملاء بيمشوا وفريد بيقف

فريد : انت هتفضل هنا ولا ايه

يوسف : اها فيروز جايه ونقعد شويه

فريد : طيب انا همشي سلام

يوسف : سلام

فريد بيخرج من المطعم و يوسف بيشاور ل الجرسون

بيعدي وقت وبتدخل فيروز وبيشاور ليها يوسف وبتروح عنده وبتقعد

فيروز : مساء الخير

يوسف : مساء الورد

فيروز : جايبني علي ملي وشي في ايه

يوسف : مفيش هندردش شويه في الشغل في ايه يفيروز انتي مش شايفه الشمع اللي قدامك

فيروز : اها بجد هو ايه الشموع و الورد والمكان الهادي

دا انت بتحب ولا ايه

يوسف ابتسم وهو راسها بااه

فيروز : كنت عارفه ينمس هي مين قولي

يوسف : اسكتي شويه طيب خليني افتكر الكلمتين اللي كنت محضرهم

فيروز : حاضر يباشا اتكلم

يوسف : فيروز الواحد بيحس فجاه كدا بمشاعر و بيحاول بيخبيها بس مبيعرفش يتحكم في مشاعره ولما تبقا هي موجوده قدامه كمان مشاعر بتبقا مفضوحه اوي مش عارف هي اخدت بالها ولا لسه بس انا قعدت مع نفسي وقررت اني اقولها

فيروز : تقولها ايه بقا

يوسف : هقولها اني انا

وبيسمعوه صوت خناق عالي جاي من قدام المطعم..