تاني يوم...سارة قامت بدري جدا.
قالت لنفسها: انا النهارده هسبقها.
دخلت المطبخ.ابتسمت.فتحت التلاجة.اتفاجئت.الخضار متقطع.الفراخ متتبلة.العجين متخمر.والرز مغسول.
سمعت صوت وراها.
امينه: صباح الخير.
ساره: هو حضرتك صحيتي إمتى؟
امينه: انا صاحيه من الساعه خمسة.
سارة فتحت بقها: ايه الساعه خمسة! ليه؟
امينه: ايوا اصل النوم الكتير بيكسر الجسم.وانا متعوده على كدا من زمان بس مبسوطه انك بداتى تتعلمي وتصحي بدري اهو...
بعد الظهر...سارة كانت بتلم هدوم الغسيل.
أمينة قربت منها.شالت قميص كريم.
امينه: لا لا لا...قمصان كريم متتعلقش كده.لازم الزرار يتقفل.
وبدأت تعيد نشر الغسيل كله.
سارة سابت اللي في إيديها وقالت بهدوء:
يا ماما... سيبيه زي ما هو. انا متعوده انشره كدا وهو كدا بينشف وبلمه وبكويه...
امينه: وانا بقولك لا والغسيل مش هيتنشر كدا علشان أنا عارفة.
ساره: بس أنا اللي بغسل.وبنشر بقالي سنين مش من يوم ولا اتنين...
امينه: وأنا اللي ربيت كريم. وعارفه حاجته تتعمل ازاى
سارة لأول مرة صوتها علي: بس دلوقتي هو جوزي. مش ابنك بس وهو خلاص كبر واتجوز وبقاله بيت وزوجه وعيال...
سكت البيت كله.أمينة بصتلها.ملامحها اتغيرت.لكنها مردتش.
لفت ودخلت أوضتها.
رجع كريم بالليل.أول ما دخل حس إن الجو مكهرب.
ملك جريت عليه: بابا... ماما وتيتا اتخانقوا.
كريم قلبه وقع.دخل المطبخ.لقى سارة واقفة.
كريم: حصل إيه؟ ملك قالتلي انك انتي وماما اتخانقتوا...
ساره قالت وهي بتحاول تمسك دموعها:
ايوا يا كريم... اسأل والدتك.
دخل لأوضة أمه.لقاها قاعدة على السرير وساكتة.
كريم: مالك يا أمي؟ ايه اللى حصل
قالت من غير ما تبصله: مراتك شايفة إني ماليش لازمة. قالتلي: "ده جوزي." يعنى بمعنى اصح ملكيش دعوة ومتدخليش
كريم تنهد: بس يا ماما ساره مستحيل تقول وتقصد كدا اكيد انتى فهمتيها غلط...
امينه بصتله ومردتش عليه وهو خرج تاني.
وقف بين الأوضتين.حاسس إنه لو دخل ناحية... هيخسر الناحية التانية.ولأول مرة، حس إن البيت اللي كان مليان راحة... بدأ يتحول لساحة حرب هادية.
*************
عدى يومين...ولا سارة كلمت أمينة غير في أضيق الحدود.ولا أمينة حاولت تبدأ كلام.
كل واحدة بتعمل اللي عليها... وكأن التانية مش موجودة.
الصبح...سارة كانت بتحضر سندوتشات الأولاد..
ملك جريت عليها: ماما... عايزة شوكولاتة.
قبل ما تحطها...أمينة أخدت السندوتش من إيدها: لا مفيش شيكولاته
ملك بصتلها: بس ليه يا تيتا؟ انا كنت شاطره وبسمع الكلام ومعملتش اي شقاوة
امينه: عارفه بس الصبح جبنة أو بيض. مفيش شيكولاته..
سارة أخدت نفس: يا ماما... مرة واحدة مش هتضر.البت فعلا انا وعدتها وهي نفسها تروح بيها للمدرسه..
امينه: لا... العيال لازم يتعودوا على الأكل الصحي. ولما ترجع من المدرسه تبقى تاخد الشيكولاته بتاعتها ولا انتي عايزاها تتعب وسنانها تبوظ...
سارة حاولت تفضل هادية: لا يا ماما أنا أمهم، وأنا اللي بحدد ياكلوا إيه. واكيد مش هبقى عايزه اضرهم يعني...
أمينة ردت بنفس الهدوء: وأنا أكبر منك، وخبرتي أكتر. وانا افهم اكتر فى تربيه العيال...
ملك بصت بين الاتنين وهي خايفة.
أما آدم فوشوش أخته: هي ماما هتتخانق مع تيتا تاني.
كريم خرج من أوضته وهو بيسمع آخر الجملة.بص لمراته.بص لأمه.
وقال في نفسه: يا رب عدي اليوم على خير.
~~~~~~~~~~~~~
بعد ما كريم نزل شغله...سارة كانت بتلمع السفرة.دخلت أمينة، وعدت بإيدها على سطح الترابيزة.بصت لصباعها.
امينه: ايه دا يا ساره لسه فيها تراب.
سارة سابت الفوطة: حضرتك بتهزري؟ أنا منضفاها حالا.
امينه: عارفه بس يمكن عينك مش واخدة بالها بقولك علشان تاخدي بالك...
سارة قربت منها: يعني أنا مش بعرف أنضف؟ قصدك إيه؟
امينه: قصدي إن النظافة ليها أصول. وبعرفهالك..
سارة ضحكت بمرارة: يعني طول الأربع سنين اللي فاتوا كنت عايشة في زريبة؟
أمينة سكتت.لكن سكوتها كان كفاية يضايق سارة أكتر.
العصر...أمينة نزلت تشتري خضار.رجعت بعد ساعة.شايلة خمس أكياس.
سارة أول ما شافتهم قالت: ايه دا يا ماما كل ده ليه؟ عشر كيلو طماطم. وإحنا أربعة.
امينه: ايوا كان فى عرض وهنعملهم صلصه... نسهر عليهم. نخزنهم فى التلاجه
سارة حطت إيديها على دماغها: يا ماما... أنا معنديش وقت. العيال والبيت ودروس وتمارين اجيب وقت منين اعمل 10 كيلو طماطم صلصه بس
بعد ساعتين...المطبخ كله طماطم.الحلل على النار.والبوتاجاز شغال.وسارة وشها كله عرق.
قالت وهي بتتنهد: خلاص يا ماما... كفاية كدا الحمد لله كدا يكفينا وزياده...
أمينة وقفت فجأة.وبصت حواليها باستغراب.
امينه: هو... إحنا كنا بنعمل إيه؟ وايه اللى كركب المطبخ دا كدا..
سارة استغربت: نعم؟ كنا بنعمل صلصه ب10 كيلو طماطم اللى جبتيهم اللى كان عليهم عرض..
امينه: اه صح نسيت شكلي كبرت..
بالليل...كريم رجع.لقى البيت هادي بشكل غريب.
ملك قربت منه: بابا.تيتا كانت بتدور على نضارتها. وهي كانت لابساها.
كريم ضحك: عادي يا حبيبتي بتحصل تيتا كبرت زي ما انا ساعات كدا بدور على الريموت وهو في ايدي..
ملك كملت: لا يا بابا... تيتا بعدها سألتني جدو فين. وليه مش معانا واتاخر برا..
كريم سكت: بس انا ابويا متوفي من أكتر من عشر سنين. يمكن سرحت.
بعد العشا...أمينة دخلت أوضتها.سارة كانت بتحضر شنطة الأولاد.لقيت كريم بيبصلها.
قال بهدوء: ماما شكلها تعبانة شوية. ملاحظتيش عليها حاجه غريبه....
سارة ردت بسرعة: تعبت من كتر الحركة. دي جابت 10 كيلو طماطم علشان نعملها صلصة..
كريم: يمكن.بس لاحظتي إنها بقت تنسى؟
سارة هزت كتفها: السن يا كريم... طبيعي العادي يعني بتاع الامهات..
هز راسه.لكن جواه كان فيه إحساس غريب...إحساس بيقوله إن اللي بيحصل مش مجرد كبر سن.وفي نفس الوقت...
داخل أوضتها...كانت أمينة قاعدة على السرير، ماسكة صورة قديمة لصاحبتها
بصتلها والدموع نزلت من غير صوت...
وقالت بهمس: وحشتيني يا فاطمة... من يوم ما مشيتي وأنا بقيت تايهة.
***************
كانت الساعة داخلة على تسعة الصبح.
سارة خرجت من أوضتها وهي مستعجلة.
ساره: كريم... متتأخرش، وصل ملك وادم المدرسة وأنا هجهز نفسي للشغل.
كريم وهو بيلبس الجزمة: حاضر.
أمينة خرجت من المطبخ وهي شايلة طبق فول.
امينه: استنوا... محدش ينزل من غير فطار.
كريم ضحك: مره تانيه يا أمي إحنا متأخرين.
امينه: خمس دقايق مش هيضيعوا الدنيا. الفطار ضروري قبل ما تنزلوا
سارة قالت بلطف: يا ماما، الولاد بيفطروا في المدرسة. واحنا بنفطر فى الشغل..
أمينة عقدت حواجبها: يا سلام يعني في مدرستهم إيه أحسن من أكل البيت؟
بعد ما الكل نزل...سارة رجعت من شغلها العصر.فتحت الباب.وسكتت.الصالون كله اتغير.الكنبة اتنقلت.السفرة بقت ناحية الشباك.النجفة متعلقة فيها شرايط قماش.
حتى الستاير اتغيرت.
ساره بصوت عالي: يا ماما! حضرتك عملتي إيه؟
امينه: مفاجاه رتبت البيت.كده أحسن بكتير.
سارة كانت بتحاول تتمالك نفسها: بس... من غير ما تقوليلي؟
امينه: ليه هو أنا غريبة؟
ساره: لا... بس ده بيتي. واحبه زي ما هو او على الاقل تبلغيني باي تغيير هيحصل فيه
أمينة ردت بهدوء: والله دا بيتي أنا كمان.واعمل اللى اشوفه احسن وافضل..
رجع كريم.أول ما دخل وقف مكانه.
كريم: ايه دا؟ هو... إحنا في بيتنا؟
أمينة ضحكت: إيه رأيك؟ مش كدا احسن
كريم: بصراحة... مختلف. حلو اوي
وش سارة اتغير.استنت لما أمينة تدخل المطبخ.
ساره: حلو؟ ومختلف ها... واللى كان قبل ايه يا استاذ كريم
كريم فهم إنه غلط.
بالليل...سارة كانت بتحضر هدوم كريم للشغل.
دخلت أمينة: لا القميص ده مش مع البنطلون ده.
ساره: بس هو كريم اللي اختاره.
امينه: وأنا امه وهختارله الأحسن.
طلعت قميص تاني.وسابته على السرير.سارة أخدت القميص ورجعته مكانه.
هيخرج باللي هو اختاره.
أمينة قالت بثقة: لا هيغيره.وهينزل باللى اختارته..
وفعلا...كريم خرج من الحمام.بص للقميصين. واختار القميص اللى طلعته امينه من غير ما يعرف انها اللى اختارته..