ليلي
انت ليه بتعمل كده ليه عايز تساعدني انا خايفه تكون بتقول لي الكلام ده وخلاص وتطلع في الاخر متفق مع نادر عليا
ياسين
على فكره انا لو عايز اخدعك فانا مش خايف منك مش ياسين الراوي اللي يجي على واحده ست
ليلي
اتمنى تكون صادق معايا بجد انت متعرفش ان انا بحارب لوحدي بحارب فى حق من حقوقى لا عندي اخ وولدي كبير واختي الصغيره اكيد مش هتقدر تقف معايا وسابته ومشيت
ياسين
اكيد ده استعطاف لان نبره صوتها كانت فيها وجع كبير وبتوعد قال يانا يا انت يا نادر لو كنت فاكر انك كسبت جوله فالجولات اللي جايه كتيره
في الفيلا نادر كان قاعد ومعاه كمال اللي قال
كمال
طب انت مش خايف من اللي اسمه ياسين ده شكله مش سهل وكمان هدوءه دا مش مطمني
نادر
ياسين طول عمره واحد جبان عمره ما سأل على اخته وهي تعبانه وكان بيتحجج بالشغل وانا جيت اخد كل حاجه ليا
كمال
اتمنى متنساش اخوك اللي وقف جنبك واللي وجهك وجابلك العروسه من البدايه ها هتديني كم في الميه
نادر
يا عم اصبر مش لما نشوف ام المحامي الاول هيتنيل يكتب نصيد الواد المفعوص ده ولا لا انت مستعجل ليه اذا كان انا اصلا ما خدتش حاجه انا كل اللي ضامنه حاليا في ايدي ان الواد معايا وهو اللي هيجيبلي كل حاجه
وعند ليلى وصلت البيت لقيت ابوها وناريمان قاعدين مستنينها واول ما ابوها شافها قال
الاب
بردو عملتي اللي في راسك وروحتي بردو عنده هو انتي هتفرحي لما يعمل فيكي حاجه لا والموضوع مش مقتصر عليكي انتي انا واختك كمان هنتجر في الرجلين
ليلي
ممكن تبطل تضغط على الجرح وتخليه ينذف هو كدا كدا جاتله غرغرينا انت قولت كلمتك وخلاص حياتى وانا حره بقا ولسه هتدخل الاوضه سمعته بيقول
الاب
انا من بكرا اى حد هيتقدملك انا هوافق عليه كفايه بقى مشاكل وحوارات وكله من تحت راس الكلب اللي انتي روحتي ليه من البدايه
ليلي
بابا انا بحترمك وبحترم قراراتك بس حياتي الشخصيه لا انا مش عايزه اتجوز على الاقل حاليا لسه في فتره النقاهة عن اذنك ودخلت اوضتها وقفلت الباب
ناريمان
قولتلك يستحيل توافق انت عاوز تطفشها من البيت ولا ايه يا بابا حرام كده مش كفايه اللي هي بتواجهه لوحدها
الاب
حرمت عليكي عيشتك انتي وهي هو انا هتعب وانا شباب وهتعب وانا في السن ده ايه هرتاح امتى وبعدين هو حد قالها تواجه ولا تتنيل هي اللي بتحب وجع الدماغ كتكو نيله خلفه تعر ادخلوا جوا بقي مش عايز اشوف واحده فيكم هنا
وثاني يوم ليلى راحت الفيلا واتفاجأت ب نادر بيزعق لابنها جربت عليه حضنته وقالت
ليلي
انت مجنون هو فاهم حاجه عشان تزعق ليه بالطريقه دي
نادر
انا شايف ان انت واخده راحتك أوي وكل شويه تحطي رجليكي هنا خير ان شاء الله معقول اكون وحشتك
ليلي
اخرس ده انا يوحشني عقرب ولا ان انت توحشني انا وحشتني قال انا جايه اشوف ابني واقعد معايا عندك مانع
نادر قرب منها وهمس جنب ودانها وقال
نادر
معنديش مانع انك تقعدي وتربيه كمان بس عايز ال 100 جرام ذهب اللي انتي شايلاهم معلش اصل انا مزنوق فيهم انت كده كده مش هتحتاجيهم في حاجه
ليلى زقته وبغيظ قالت
هو انت مش بتشبع مش عاجبك اللي انت قاعد فيه ده كله عايز ايه ثاني
نادر
عايزك ترجعيلي انتي مش متخيله انا لفيت كتير قد ايه وملقتش حد يكيفنى زيك
ليلي
ابعد ايدك دي عني انا يستحيل ارجعلك نجوم السماء اقربلك خليك انت اقعد رمرم كل شويه لكن انا خلاص
نادر كان هيشد منها الولد بس ليلي كانت اسرع منه وخدته فى حضنها وقالت
ليلي
قلتلك انا هقعدو معايا شويه وبس اوعى تفتكر ان اللعبه اللي انت عملتها دي دخلت عليا انا وانت عارفين بعض كويس جشعك وطمعك اخرتهم وحشه قوي
نادر
وماله ما تقعدى معاه انا عاوزه يشبع حنيه اصله يا حرام أمه ماتت وبمكر قال وكانت حلوه اوى
ليلى من غير ما ياخد باله خدت شعر من راس ابنها وبعد كده باسته بدموع قالت
ليلي
حبيبي انا راجعه لك تاني ماما عمرها ما تسيبك وبصت على نادر وقالت في الدنيا ان البني ادم ده يبقى ابوك ونزلته على الأرض ومشيت بسرعه قبل ما تضعف وتنهار
في الوقت ده ياسين كان مستنيها في عربيته قريب من الفيلا واول ما شافها بتجري بالطريقه دي نزل بسرعه من العربيه وقف قدامها وقال
ياسين
في ايه انتى بتجري كده ليه الكلب دا عملك حاجه ولسه هيتحرك ليلى مسكت ايده وقالت
ليلي
هو فضل يلمح بالكلام بس لكن مش لمسني يلا بسرعه على المعمل نعمل التحاليل عشان اثبت للدنيا كلها أن دا ابني مش ابن حد تانى
ياسين فتحلها باب العربيه عشان تركب وهي فضلت واقفه متنحه من الحركه دي وغصب عنها بدات تقارن بين ياسين وبين نادر
ياسين
مش كل الرجاله زيه او بالأحرى مفيش راجل اصلا يعمل اللى هو بيعمله الا اذا كان قليل الاصل عديم الرجوله
ليلي ركبت من غير ما تتكلم وياسين خدها وراح المعمل يعملو تحاليل
عند نادر كان قاعد بيشرب القهوه وبيتكلم مع المحامى فى التليفون وقال
نادر
جرى ايه يا متر مالك مستخبي ليه هنفضل امتى ساكتين عايز اعرف اللي ليا واللى عليا
المحامي وكان اسمه سعيد رد عليه ببرود وقال
المحامي
انا الصراحه مستغربك يعني اخوها ما طلبش مني ان انا اوزع ولا قال عايزه اشوف ليا ايه ولا عليا ايه هو انت مستعجل ليه
نادر
وانا مالي ومال اخوها دا عنده مشاغل وشركه فمش محتاج اصلا المفروض يبقى ملوش اصلا اي حاجه وبعدين ما الحي ابقى من الميت ولا انت رايك ايه
سعيد
والله انا قلت لك اللي عندي اتصل بالباشمهندس ياسين واتفق معاه على معاد وعرفونى ساعتها انا هاجي اوزع كل حاجه زي ما الشرع قال
نادر
انا اتصل بالباشمهندس ياسين دا لا انا ولا هو بنطيق بعض ما تمشي انت الدنيا تخلي الأمور زى السكينه في الحلاوه وليك عمولتك بردو انا مش هنساك
سعيد
معلش يا نادر انا عندى شغل هستأذنك اقفل ووقت ما افضي هبقي اكلمك وقفل فى وشه قبل ما يسمع رده
نادر
اه يا ابن ال بتهرب مني ماشي مسيرك تقع تحت ايدي قال اكلم الباشمهندس قال الاهى عربيه تخبطك انت وهو عشان أخلص منكم
عند ياسين كان قاعد مستنى التحاليل بفارغ الصبر وعينه جت غصب عنه على ليلي وسرح فيها وبهمس قال
ياسين
غبي اللي طفاكى بالشكل دا انا مش عارف هو مقدر اللي ضيعه من ايده ولا لا وفاق على صوت الدكتور وهو بيديه نتيجة التحاليل
ليلي
قبل ما تفتحه انت متأكد أن محدش لعب في العينات او بدل النتيجه
نادر
اهدي شويه واطمني متقلقيش انا متابع كل حاجه بنفسي وفتح الملف يشوف اللي فيه وابتسم لما لقى التحليل ايجابي
ليلي شدت منه الورقه وشافتها وبدموع قالت
ليلي
كنت عارفه والله ان هو اتنين انتوا ليه مش عاوزين تصدقوا وبصت ل ياسين وقالت انا عاوزه مازن ابني لو سمحت
ياسين
استني بس ما تتسرعيش مش بالسهوله دي لان لو نادر شم خبر ان احنا كشفنا اللعبه بتاعته هو ممكن يقتله
ليلي قعدت على الأرض وبانهيار قالت
ليلي
الغلط عندي انا من البدايه انا اللي وافقت عليه وهرد اهلي عشانه كنت فاكره ان هو بني ادم طلع شيطان
ياسين
لو كل واحد اتجوز وطلع شريك حياته مثالي وقالوا ان ده بشطارته فدا غلط طبعا عندك مثلا اسيا مرات فرعون ربنا بنالها بيت فى الجنه وشوفى كانت متجوزه مين فرعون اللى كان بيقول انا ربكم الاعلى فبلاش تفضلي تجلدى في نفسك وبصي لقدام وشدها قومها
ليلي
انت ازاي كده التعامل معاك مريح لدرجه ان انا بطمن في وجودك هو ده طبيعي
ياسين مش عارف يقول لها ايه لان هو كمان بدأ يحس بمشاعر ناحيتها وبهمس قال
ياسين
انت بقيتي خطر عليا انا لازم اقلل خروج معاكي مش ينفع افضل احتك بيكي بالطريقه دي
ليلي
بتقول ايه انا مش سمعتك انا اسفه على الكلام السخيف اللي قلت من شويه اعتبرها كانت لحظه ضعف مني
ياسين
ولا يهمك المفروض دلوقتي نبدا نخطط ازاي نوقع نادر في شر اعماله لازم نلاقي خطه محكمه علشان لما يقع مش يقوم منها
عند نادر كان قاعد فى الجنينه وبص للسما وقال
نادر
معقول العز ده كله هيكون لي انا لوحدي انا مش مصدق
سوزى من وراه قالت
سوزي
انت طلعت جبان يا خساره الوقت اللي انا ضيعته عشانك قبلت بيك وانت جربان وجعان ودلوقتي لما طاقه القدر اتفتحتلك مفكرتش حتى ترفع سماعة التليفون
وفي الوقت ده قام نادر. وقال ليها
نادر
سوزى انتى ايه اللى جابك قصدى جيتي ازاى وليه مش قولتى انك نازله من امريكا
سوزى
انت غيرت خط موبايلك وفاكر ان انا مش هعرف اوصلك لا فوق ده انا سوزي اشهر من النار على العلم
انا اللي لميتك وخليتك بني ادم لما الكل رماك
نادر فضل واقف متنح وافتكر اليوم اللى اتعرف فيه على سوزى
فلااااش بااااك
نادر بعد ما وصل لامريكا إتأجر شقه يقعد فيها ولسه هيدخل يغير هدومه لقي الباب بيخبط
نادر بص للى واقفه على الباب وقال
نادي
افندم حضرتك محتاجه حاجه
سوزى
انا قلت برده الخلقه دي اكيد جايه من مصر ام الدنيا يعني ابن بلدي انت جديد في المنطقه هنا صح
نادر
اه جديد ومن نفسها قال والسنيوره رقاصه مش كده
سوزى
يا سلام على نباهتك عرفتها لوحدك ولا حد قالك وزقت الباب ودخلت وهى بتقول ده معروفه عننا اننا بنكرم الضيف وانت ما شاء الله بقى لك ساعه موقفني على الباب
نادر
يا الف مليون اهلا وسهلا نورتي بيت اخوكي
سوزى
اخويا بردو كلهم بيقولوا كده في الاول بعد كده بيتحولوا
نادر
ده انت خبره بقى على كده احب انا اللي مذاكر بيجيب الدرجات النهائيه فى الإمتحانات
سوزى
لا متقلقش انا حافظه المنهج صم وبعدين يا اخويا مالك داخل عليا حامي كده ليه متعرفناش بالمحترم
نادر
محسوبك نادر زهق من الحلويات الشرقيه وحابب يجرب الشرقي اللي اتغرب وغمز لها بعينه.
سوزى
والله من ساعه ما شفتك وانا قلت ان انت شقي على كده بقى جاي في شغل ولا جاي تدلع وبس
نادر
لسه بدور على شغل مستني بقى فرج ربنا وبص لها بتقييمها الفرج جالي طريقه ثانيه
سوزى
طب يا اخويا الناس لبعضيها انا شغاله في ديسكو ومحتاجه صبي يلم ورايا النقطه و انا وانت ستر وغطا على بعض
وبالفعل سوزي و نادر قربوا من بعض جدا وكان بينزل معاها يوميا الديسكو وعجبته الشغلانه عشان كان بياخد منها فلوس كثير
بااااك
نادر
انتى بتتكلمى معايا كأنك مراتي اللي كان بينا كان مصلحه شغل وخلصت وقضينا وقت مع بعض
سوزى
احمد يا عمر قال اللى بينا خلص قال هو انت عايز تاخدني لحمه وترميني عضم لا ما انا مش زي النسوان اللي انت عرفتهم قبلي انا وليه قادره
نادر
عاوزه ايه يا سوزى هو يوم مش معدى انا عارف دا ايه السواد أبو ريحه دا
سوزى
النص بالنص يا قلبي انت فضلت تمص في دمي لحد لما صفيت دمى وقولت مش مشكله على قلبي زي العسل بكره لما تاخذ الورث اللي انت بتحفي وراه هتفتكرنى بس انت طلعت قليل الاصل
نادر
النص بالنص ده في المشمش هو انتى بتحلمي وجايه تتحققي احلامك معايا وبعدين انا مش ضربتك على ايدك وقولتلك شوفي ليا شغل انتي اللي كنتي سهله الصراحه
سوزي
طب ليك عليا بقى لاكون فضحاك قدام اهل مراتك واقولهم ان ابنها مات فعلا وانك واخد ابنك من طليقتك وبتضحك عليهم علشان تلهف الجمل بما حمل وزقته عشان تدخل الفيلا وبزعيق قالت انتم اللي هنا يا اللي مقعدين كداب في البيت عندكم
نادر مش حس بنفسه الا وهو بيزقها وقعها على الارض وقعد فوقها يخنقها بايده وبغل قال
نادر
لا ما انا مش هسمحلك تبوظيلي كل اللي انا تعبت عشانه انا مش هفضل طول عمري متمرمط يمين وشمال انا عايز أعيش ملك وارتاح وبس
سوزي فضلت ترفص برجليها علشان يسيبها لانها مش قادره تتنفس تخبط فيه وتخربش وشه ونادر عمال يضغط اكتر على زورها لحد ما سكتت
نادر قام من عليها وحط ايده على قلبها وملقاش نبض
وبخوف قال
نادر
لا لا لا لا دي ماتت انا مستحيل اكون قتلتها
مازن الصغير كان واقف وسمع كل حاجه وطلع يجري على بره عشان كان خايف منه مخدش باله من العربيه اللي جايه قصاده واللى ضربت فرامل على اخر لحظه
ياسين نزل بسرعه من العربيه وخده فى حضنه يطمن أنه كويس وبخوف قال
ياسين
كده يا مازن ايه اللي خلاك تجري بالطريقه دي لولا ستر ربنا كنت دهستك بالعربيه
مازن
انا مش عاوز ارجع تانى انا عاوز ماما وقبل ما يكمل كلامه اغمى عليه من الخوف
ياسين بذهول شاله قبل ما يقع على الأرض وقال
ياسين
مازن ينهار أبيض لازم اطلع بيك على المستشفى فورا وبص على الفيلا وقال حسابك تقل معايا يا نادر والله العظيم ما هسيبك
عند نادر طلع موبايله اتصل على كمال وبخوف قال
نادر
الحقني يا كمال انا قتلت ساعدني ابوس ايدك ده انا كده هروح ورا الشمس
كمال بخضه قال
قتل ايه يا متخلف انت هو دا وقت مقالبك قطعتلى الخلف يا جدع مش كدا
نادر
هو انت فاكرني بهزر هو الموضوع ده فيه هزار وحكاله على اللي حصل
كمال بتوتر قال
لا بقول لك ايه ما اتفقناش ان يكون فيها قتل مش كفايه انك خاطف الواد انت عايز تلبسني في الحيطه معاك لا يا عم انا بره اللعبه
نادر
هديك 60% من اللي هيطلعلي بس ساعدني بالله عليك
كمال
لا يا عم الله الغني هعمل بيهم ايه لما اتشنق من اللحظه دى انت فى طريق وانا فى طريق أقفل يا عم مش ناقصة جنان على المسا وقفل الموبايل فى وشه
نادر باصص على جثة سوزى بتوتر وقال
اعمل ايه دلوقتي انا ايه اللى عملته فى نفسي دا اولع فيها وأتاويها ولا أعمل ايه
فى الوقت دا ليلي كانت داخله الفيلا عاوزه تشوف مازن اتفاجأت ب نادر بيحفر فى الجنينه وجنبه بنت نايمه على الأرض وبذهول قالت
انت بتعمل ايه الله يخرب بيتك معقول تكون قتلتها انت بتحفر في الارض ليه
نادر بصلها بغل وقال
انا مش عارف انت ايه اللي جايبك وقام من على الارض ونفض هدومه وقال بس ملحوقه انا مش عارف انا صابر عليك ده كله ليه ولسه هيقرب عليها ليلى طلعت تجري على بره وهي بتصرخ
ليلي
عمري ما توقعت انك تبقى قاتل الله يخرب بيت اليوم اللي عرفتك فيه يا اخي هتفضل وصمه عار في حياتي لحد ما اموت
نادر
يا شيخه ده انت عامله زي اللعنه ده انا هوزع على روحك شربات
ليلى فضلت تيجي ووقفت مره واحده لما لقيت عربيه قدامها وحمدت ربنا لما لقته ياسين جريت عليه وقالت
ليلي
الحقني دا عاوز يقتلني وفى بنت جوه مرميه على الارض وانا شوفته بعيني وهو بيحفر فى الجنينه
ياسين
عشان كدا مازن طلع يجرى منه وأغمى عليه لما سألته عن اللى حصل
ليلي
ابني ماله وراحت عند نادر وضربته بالقلم عملت ايه فى ابني
ياسين شدها ودخلها العربيه وقال
مش تنزلى وكلامى يتسمع ومش تقلقي مازن كويس أنا خدته عند والدك هو بس عنده صدمه نفسيه من اللي شافه اما الكلب ده فانا ليه كلام معايا
نادر حاول يهرب بس ياسين مسكه من قفاه ونزل عليه بالبونيات وقال
ياسين
يعني مش مكفيك انك خاطف الولد من حضن امه وانت حد شخصيه ظابط علشان تسبك الموضوع ومع كل كلمه بيقولها كان بيضربوا
نادر طلع مطوه من جيبه وكان هيضرب ياسين فى بطنه بس ياسين قفشوا وضربوا بالروسيه ونتش المطوه منه
ياسين
انت شيطان انا بنفسي اللي هوصلك على حبل المشنقه يا كلب انا مش عارف انت عملت ايه في حنان عشان توافق تتجوزك ازاي اصلا توافق على حيوان زيك
ليلي خافت ان الموضوع يكبر وبلغت ان في جريمه قتل وعرفتهم المكان
نادر
اهي حنان دى اكتر مغفله قابلتها في حياتي كانت متجوزه عشان نفسها تخلف وانا كنت بحط ليها ادويه في الاكل عشان تجهض وفي الاخر ولدت البيبي ميت
ليلى حطت ايديها على ودانها مش عايزه تسمع اي حاجه مكنتش متخيله ان هو بالشر ده كله
ياسين طلع مسدسه وحطه فى وش نادر وقال
ياسين
هقتلك يا كلب بحق كل دمعه نزلت من اختي لما كانت بتشتكيلي منك
في اللحظه دي ليلى مش قدرت تقعد في العربيه نزلت بسرعه ومسكت ايد ياسين وقالت
ليلي
لا يا ياسين هو مش يستاهل اوعى تضيع نفسك علشان واحد زي ده
نادر
اه قولي كده انت ما بتضيعيش وقت فاضي ترجعيلي عشان حبيتيه لا ذكيه مش طلعتي سهله ابدا فضلتي تلفي وتدوري لحد ما وقعتي الرأس الكبيره
ليلي
اخرس قطع لسانك مش كل الناس زيك جشعه وخاينه
في الوقت ده وصل البوليس ودخلو الفيلا وقبضو على نادر
عدى سنه على الأحداث دى ومازن تم خمس سنين وكانت ليلى عزمت ياسين على حفله عيد ميلاد مازن
ليلي
انا متشكره انك لبيت الدعوه رغم مشاغلك بس كون انك قدرت ان ابني عايز يشوفك دى عندي كبيره
مازن جرى على ياسين وحضنه وقال
مازن
وحشتني يا عمو ياسين جبتلى هدية ايه بقا
ياسين شاله وباسه من خده وقال
خد اللاب توب اللي كان نفسك فيه يا بطل علشان تتفرج على الانمي براحتك
مازن حضنه وبحب قال
بحبك أوى يا بابا ياسين تسمحلى أقولك بابا ولا بتتضايق
ليلي اتفاجأت من كلامه وقالت
مازن ممكن تنزل يلا هنطفي الشمع عشان عمو ياسين مش يتأخر
ياسين نزل مازن اللى جرى يلعب مع أصحابه وقبل ما ليلي تتحرك قال
ياسين
اتحكم عليه بالاعدام وكمال خد 20 سنه سجن مع الاشغال الشقه
ليلي فهمت قصده وقالت
الشخص اللي انت بتتكلم عنه ده انا خلاص قفلت صفحته وولعت فيها ملهاش لازمه انك تجيب سيرته عشان مازن كمان انا ما صدقت انه بقى كويس
مازن واقف قدام تورته على يمينه ليلي وعلى شماله ياسين
ليلي
يلا يا حبيبي اتمنى امنيه وطفي الشمع
مازن بصوت واطي بس سمعه ياسين
يا رب انا عايز بابا ياسين يقعد معايا في البيت ويحب ماما ويبقى عندي اب وام زي بقيت صحابي وطفي الشمع
ناريمان قربت من مازن ومسكته من خدوده وقالت
الصغير حبيب قلبي اللي كبر وبقى خمس سنين يا ناس كل سنه وانت طيب يا نور عيني
الاب من وراها قال
ما توسعي بقى حبيب جدو تعالى خد هديتك شوف جبت ايه
مازن بص على ياسين وقال
بس انا مش عايز اي هدايا انا عايز بابا ياسين انت وعدتني انك هتسمع كلامى انا مش عاوزك تمشي انا عاوز ماما وبابا يكونو مع بعض
ليلي
مازن ايه الكلام دا اتفضل ادخل اوضتك لو سمحت
مازن دخل اوضته وهو زعلان وباصص على ياسين اللي اتضايق من دموعه
ياسين
كان ممكن نلاقي طريقه افضل نتكلم بيها مع الولد ونفهمه بدل ما تحرجيه بالطريقه دي
ليلي
شايفاك واخد راحتك اوي بس احب افكرك ده ابني انا وانا حره في الطريقه اللي أربيه بيها
الاب
طول عمري بقول عنك انك مسحوبه من لسانك والنهارده اكتشفت ان انت غبيه
ليلي
وايه لازمته بس يا بابا الكلام ده انت مش فاهم مازن عايز ايه
ناريمان
طب وبعدين هتفضلي تسكتي كل شويه بالطريقه دي ما هو طبيعي ان هو عايز باباه ده طفل ومحتاج الاحتواء والحنيه
ياسين
انا ما عنديش مانع وموافق على طلب مازن
ليلي
انت بتقول ايه هو انت واعي ليه بتقوله عارف مازن عايز ايه
ياسين
ايوه طبعا عارف هو عايز ايه وانا ربنا مش رايد ان انا اخلف وبعتبر مازن ابني ومستعد أتكفل بكل طلباته من الالف للياء المهم انه يكون هو مبسوط وفرحان
مازن طلع يجرى عليه وحضنه وقال
انا بحبك أوي يا بابا عشان خاطري مش تمشي وبص على ليلى وقال علشان خاطري يا ماما انا محتاجكم انتم الاثنين
ليلي قلبها وجعها على ابنها وتحت ضغط كل الموجودين وافقت
الاب
حيث كده بقى انتم مش محتاجين خطوبه انا هكلم الماذون وتكتبو الكتاب فورا
مازن حضن جده وقال
حبيبي يا جدو انا بحبك اوى مسك ايد ليلى وياسين وقال هنعيش كلنا في بيت واحد اخيرا هستقر
وبالفعل جه الماذون وكتب كتابهم وليلي حاسه انها بتحلم وخايفه تصدق الحلم يتحول كابوس
مازن شد ياسين وليلي ودخلهم الاوضه وقعد معاهم وقال
مازن
انا مش عاوزكو تتفرقو وحط ايديهم فى ايد بعض وأيده فوقهم وقال هنبقي عيله حلوه
ياسين
ممكن تطلعي يا مازن محتاج اتكلم مع ماما شويه
و بالفعل مازن طلع وسابهم
ياسين
انا عارف ان الموضوع جه بسرعه بس انا بحبك يا ليلي ومن زمان عندى مشاعر عندك وكان لازم استغلها فى الحلال
ليلي
بس انا معنديش اى مشاعر من ناحيتك انت
ياسين
كدابه يا ليلي مشاعرك فضحتك وعيونك بتقول حاجه عكس لسانك
ليلي كانت هتهرب منه بس ياسين مسكها وقفل الباب وقال
مش تحاولى تنكري مشاعرك انا بقيت جوزك على سنه الله ورسوله
ليلي
جوزى انت صدقت نفسك ولا ايه انت مجرد
ياسين حط ايده على بوقها يمنعها تتكلم وقال
انا وانت محتاجين فرصه نقرب من بعض لان انا واثق زي ما انا بحبك انت كمان بتحبيني وحطي في بالك مصلحه مازن ها يا ليلى قولتي ايه
ليلي بعد تفكير ثوانى
موافقه بس هتديني وقتي اتعود عليك
ياسين باس راسها وقال
حبيبتي معك العمر كله انا مش مستعجل كفايه ان انت قدامي وقريبه مني مش هطمع واطلب اكتر من كده
ليلى كانت هتتكلم بس مازن دخل عليهم ولاقاهم قريبين من بعض وقال
مازن
معنى كده ان انت مش هتمشي صح كده وهيبقى عندي بابا
ياسين
اكيد طبعا هبقى ابوك واخوك وسندك في الدنيا
مازن شد ليلى وياسين يقعدوا قدامه على الارض وحضن الاتنين مع بعض وقال
انا بحبكو اوي دي اجمل هديه جاتلي في عيد ميلادي
ليلى وياسين حضنوه وقالوا في نفس الوقت
واحنا كمان بنحبك يا مازن
ياسين بص ل ليلى وبهمس قال
عقبال ما اسمع الكلمه دي منك انا كمان وغمز لها بعينه
تمت بحمد الله