رواية قبل فوات الاوان الفصل السادس6 بقلم ايه طه
بعد العصر...أمينة كانت في المطبخ بتعمل محشي.وسارة كانت بتلف معاه.
أمينة قالت وهي مبتسمة: لا يا ساره ورق العنب مش بيتلف كده... بصي.
سارة ضحكت: أهو رجعنا للتعليم تاني.
أمينة ضحكت هي كمان: الله غصب عني... لما بشوف حاجة مش مظبوطه لازم أقول.
سارة بصتلها: هو انتي كنتي كده مع كريم وهو صغير؟
ابتسمت أمينة: وأكتر من كده كمان
ساره: وهو كان بيسمع الكلام؟
امينه: لا... كان عنيد.دا كان مطلع عيني..
ضحكوا هما الاتنين.في اللحظة دي دخل كريم.وقف عند باب المطبخ وهو مبتسم.
أول مرة يشوف أمه ومراته بيضحكوا مع بعض.
كريم: يا سلام... أخيرا هدنة؟ وبقيت اسمع صوت ضحك بدل الخناق..
سارة ردت وهي بتبص لأمينة: هممم يعني هدنة مؤقتة.
أمينة هزت كتفها: المهم إن البيت يفضل هادي.
بالليل...أمينة دخلت أوضتها تنام.بعد شوية خرجت وهي متوترة.
امينه: يا سارة... مشوفتيش ورقة كانت هناك على الكومدينو؟
ساره: ورقة؟ آه... وقعت على الأرض وانا بكنس، وأنا حطيتها فوق الكومودينو.
أمينة جريت على الأوضة.دورت.يمين.وشمال.فتحت الدرج.
بدأ نفسها يعلى.
دخل كريم: مالك يا أمي؟
امينه: الورقة... مش لاقياها.مشفتهاش يا كريم؟
سارة دخلت تدور معاهم.بعد عشر دقايق...
لقيتها بين الملاية والكومودينو.
أمينة خطفتها من إيديها بسرعة.وضمتها لصدرها.
كريم استغرب: هي إيه الورقة دي؟ ومالك مهتمه بيها كدا ليه؟
ابتسمت أمينة ابتسامة متوترة: لا يا حبيبي متشغلش بالك دي شوية تحاليل قديمة.
كريم: طيب هاتيها لما نشوفها، يمكن تحتاجي نعيدها.
ردت بسرعة، وبحدة خفيفة: لا... ملهاش لازمة. يلا تصبحو على خير..
كريم بص لسارة.بس سارة كانت سرحانة.
افتكرت كمان كلمة صاحبة أمينة: أوعي تهملي العلاج.بدأت تشك...بس أقنعت نفسها إن أكيد عندها ضغط أو سكر، ومش حابة تشغلهم بيها.
****************
عدى أسبوع...والبيت بقى أهدى.مش لأن المشاكل انتهت...لكن لأن كل واحدة بقت تعرف إمتى تسكت.
الصبح...سارة كانت واقفة قدام البوتاجاز.
وريحة البصل المحمر مالية الشقة.دخلت أمينة.وقفت دقيقة.وسارة استعدت لسماع التعليق المعتاد...
لكن أمينة قالت بهدوء: ريحته حلوة.
سارة لفت ناحيتها باستغراب: بجد؟ أول مرة تمدحي أكلي.
ابتسمت أمينة: علشان أول مرة تعملي المكرونة بالطريقة اللي قولتلك عليها.
ضحكت سارة: يعني لسه بردو الفضل يرجعلك.
ضحكت أمينة هي كمان: طبعا امال انتى مفكره ايه
بعد الغدا...كان كريم قاعد بيتفرج على الماتش.وفجأة سمع صوت ضحك جاي من المطبخ.دخل يستخبى ورا باب المطبخ.
لقى سارة وأمينة بيضحكوا.سارة كانت بتحاول تعمل الرقاق.والرقاقة اتقطعت منها.
أمينة ضحكت وقالت: يخرابيتك... دي مش صينيه رقاقة، دي بقت خريطة أفريقيا!
سارة انفجرت من الضحك: وانا مالي... والله هي اللي اتقطعت لوحدها...
امينه: طب سيبيها... وانا هوريكي تعمليها ازاى..
كريم فضل واقف يبتسم.ومن غير ما يدخل...رجع مكانه.وقال لنفسه: الحمد لله... يمكن الأزمة خلصت. و اتععدوا على بعض اخيرا...
في المغرب...ملك رجعت من النادي.وشها مكشر.
سارة سألتها: مالك؟ حد. ضايقك فى النادي..
ملك: ماما... البنات بيقولوا إن تيتا عجوزه ومش بتعرف تلعب. ومتجبيهاش معاكي النادي تاني..
أمينة دخلت أوضتها.وقفلت الباب.
سارة بصت لملك: هو انا مش قولتلك قبل كدا مينفعش حد يعيب على الكبير.كدا عيب..
ملك: انا معيبتش على تيتا بس هما اللي قالوا. وفضلوا يضحكو عليا...
ساره: حتى لو هما اللى قالو كان الفروض إنك تدافعي عنها. مش تزعلي وتيجي تتكلمي بالطريقه دي..
ملك نزلت راسها: حاضر انا اسفه يا ماما وهدخل اعتذر من تيتا..
بعد شوية...سارة خبطت على باب أوضة أمينة دخلت.لاقيتها قاعدة قدام صورة جوزها.
ساره: هو حضرتك زعلانة؟ ملك متقصدش والله
ابتسمت أمينة: مش زعلانه وبعدين العيال مبيغلطوش...هما بيقولوا اللي بيسمعوه.
وانا مش زعلانه من كلامهم.من إن الزمن اللى جري.امبارح كنت أنا اللي بجري ورا كريم.النهارده بقيت تيتا وبكرة...الله أعلم.
سارة مسكت وقالت: متقوليش كدا ربنا يديكي الصحة وطولة العمر.
بصتلها أمينة...وعينيها لمعت.وقالت بهدوء:
ربنا يخليكي يا... بنتي.
سارة اتجمدت.دي أول مرة...أمينة تقولها يا بنتي.مش يا مرات ابني ولا يا سارة.
في نفس الليلة...صحى كريم على صوت حركة في الصالة.لاقى أمينة واقفة قدام باب الشقة.لابسة إسدالها.وماسكة مفاتيحها.
كريم بخضة: أمي! رايحة فين الساعة اتنين بالليل؟
امينه بصت حواليها...كأنها مش فاهمة هو بيقول إيه.وبعدين قالت بتوتر: أنا...أنا كنت...كنت نازلة...
وقفت.حطت إيديها على دماغها.
كريم قرب منها: نازلة فين الساعه دي؟
بصت له بعينين مليانين حيرة...وقالت :
نسيت...
وبعدين قعدت على الكرسي وفضلت تبكي بصمت وكريم واقف أدامها مش عارف يواسيها ازاى... ولا فاهم ايه اللى بيحصل مع امه...
**************
فضل كريم صاحي لحد الفجر...كل شوية يبص على أوضة أمه.وكل ما يفتكر شكلها وهي واقفة قدام باب الشقة، مش عارفة هي نازلة فين...يحس إن قلبه بيتقبض.
أما سارة...كانت قاعدة جنبه على الكنبة.
ولأول مرة من شهور...ولا واحد فيهم كان بيتكلم عن الخناقات.كل كلامهم كان عن أمينة.
سارة: كريم...أنا خايفة.دي مش مامتك اللي كنت أعرفها.
كريم اتنهد: لا... مش هي.أنا لازم أعرف في إيه.
تاني يوم...أمينة صحيت بدري كعادتها.
حضرت الفطار.وبتضحك مع الولاد كأن حاجة محصلتش.كريم فضل يراقبها.كل حركة.كل كلمة.كان بيدور على أي حاجة غريبة.وفجأة...أمينة حطت السكر في طبق الجبنة بدل الملح.
ملك ضحكت: تيتا... ده السكر.
أمينة بصت للطبق.وبعدين ضحكت هي كمان: يا خبر... شكلي لسه نايمة.
بس الضحكة كانت مكسورة.وكريم لمحها.بعد ما نزل الشغل...بدل ما يروح الشركة...راح عند بيت أمه.فتح الباب بالمفتاح اللي معاه.دخل يدور على أي حاجة.يمكن دوا. او روشتة. او حتى رقم دكتور. وقعت عينه على نوتة صغيرة فوق الكومودينو.كانت مجرد مواعيد...وفواتير.
لكن في آخر صفحة...
مكتوب "الأربع... الساعة 5... دكتور سامح."
مفيش أي تفاصيل تانية.
بالليل...رجع كريم البيت.
سارة: ها وصلت لحاجة؟ عرفت اي حاجه؟
كريم هز راسه: لأ. بس هستنى يوم الأربع.
ساره: ليه؟ واشمعنه يوم الاربع؟
كريم: لأن ماما عندها دكتور وهو دا اللى هعرف منه ايه الحكايه بالظبط..
سارة اتفاجئت: ايه دكتور؟ بس مامتك مقالتليش انه عندها دكتور يوم الاربع...
كريم: ولا قالتلي... بس هانت
الأربع جه...وأمينة لبست وخرجت.قبل ما تقفل الباب...
قالت: انا خارجه وهتأخر شوية. هروح اقعد شويه مع ام فوزي...
سارة سألتها: تحبي أوصلك يا ماما؟
امينه: لا... هعرف اروح لوحدي كتر خيرك خلي بالك بس انتى من البيت ومن العيال..
ومشيت.بعد خمس دقايق...خرج كريم وراها.من غير ما تحس.شافها تركب تاكسي.ركب تاكسي تاني وراه.فضل ماشي وراها...لحد ما العربية وقفت قدام عيادة. وقف كريم في الشارع.حاول يدخل.
لكن رجع في آخر لحظة.
وقال لنفسه: انا لو دخلت... هكون كسرت ثقتها. واحتمال تزعل منى علشان موثقتش فيها.. وجيت وراها بالشكل دا
قرر انه يوقف يستني بره.بعد حوالي ساعة...خرجت أمينة.كان وشها شاحب.
وفي إيدها كيس علاج.حطته بسرعة جوه شنطتها..كريم...استخبى ورا عربية...
وقلبه بيقوله إن أمه مخبية وجع كبير.
بس لسه...مش عارف هو إيه.
يتبع
لقراءة باقي الفصول من هنا