رواية العرجاء الجميلة الفصل الحادي عشر11والاخيربقلم جمانه السعيدي
كمال...اني قبل طلبت ايد رزق بس اكو ناس الله لا يسامحهم خربو كلشي ووصلولنا كلام
وخربت الخطبه
اكيد قصدهم يخربون هذا الزواج
اني هم ازوجت بس جان اختياري غلط
بعد خمس سنوات انفصلنا وكلمن راح بطريقه
عقيل...منو ذوله الناس اني لازم اعرفهم
سعد....هذا الحجي من زمان صار عشر سنوات عوفو الماضي وخلينا بلجديد
كمال جاي يريد رزق ومستعد الكل طلباتكم
ولد الحرام الله يجازيهم بلاخير كلشي قسمه ونصيب
واحتمال اليوم هو نصيبهم
انتم تعرفون كمال زين وتعرفون اهله مايحتاج تسئلون
كمال عنده بيت وسياره ووضيفه وحالتهم الماديه زينه
اعتقد كمال مناسب الرزق
عقيل...ليش ماتكول منو الي خرب الزواج اول مره
سعد....راح تصير مشاكل احنا بغنى عنها
ليش ما ننسى الماضي ونبدي من جديد
خل نفتح صفحه جديده
عسى رب العالمين يبارك الهم
عقيل...طبعا كمال غني عن التعريف وسمعته سابقته
بس الرائ الاخير يبقى الرزق اذا توافق ماعندي مانع
هيه الي راح تزوج مو اني
سعد....واحنا هم عشمنا بيك جبير انت ماقصرت وياها
بعد ما مات ابوها
عقيل..... الله يحفظكم
كمال....ممكن احجي ويا رزق بس لاتكول كمال
العريس اصلا اني ماقبلت سعد يكول اني الي اجيت اطلب ايدها خليها مفاجئه
سعد....اني راح انتظرك بلسياره من تتفقون اروح اجيب الشيخ حتى تعقدون هسه وناخذ رزق ويانا
عقيل...هيج بهلسرعه
سعد....خير البر عاجله شما نستعجل احسن حتى لا يدخل بيها طرف ثالث وتخرب
عقيل...تمام
طلع سعد كعد بسيارته بلشارع
وعقيل دخل للبيت يصيح رزق ..رزق وينج
العريس يريد يشوفج ويحجي وياج
سمر...منو العريس
عقيل....ما تعرفي ليش اسئلين
سمر...حتى انت ما تعرفه
عقيل....انتي ليش اسئلين مو كلتي اي احد وافق علي
سمر...اي ووافق وافق اهم شي رزق تزوج
شالت رزق صينية الجاي واجت تدخل وكفت بلباب ترددت شويه
عقيل...جيبي الصينيه اني اشيلها دنك عليها عقيل يحجي بصوت ناصي اخاف عليج من المفاحئه
رزق...اي مفاجئه
عقيل...تعالي وانتي تعرفين
دخل عقيل ودخلت ورا رفعت عيني اريد اسلم
جان يوكف كمال لابس قميص ابيض وبنطلون اسود
نفس شكله وبعد صاير احلى ااكو كم شيبه بلحيته
زايده وقار وجمال
من شفته انصدمت عبالك الساني انبلع
كمال...شلونج رزق
بقيت اباوع علي ومارديت السلام
رزق....كمال اي هو هذا كمال كمال جاي يخطبني مره ثانيه
عقيل....رزق ردي السلام
كمال...عوفها براحتها
رزق...لزمني عقيل من ايدي وكعدني على القنفه كبال كمال
كمال....اعرف تفاجئتي بس ولله ااكو ضروف صارت
وخربت كلشي بينا
رزق...بقيت ساكته بس كلبي يدك على السريع
مدري فرحانه مدري متفاجئه مشاعري تخربطت
دنكت راسي وغمضت عيوني راسا دموعي نزلن
اريد احجي اريد اكول وينك من زمان ليش عفتني كل هذا الوقت
.عقيل....من رخصتكم شويه وارجع
رزق...عقيل عرف ااكو كلام لازم ينكال بينا حتى الكلوب تتصافه
جمانه السعيدي
بس طلع عقيل كام كمال من مكانه واجا كعد بصفي
مسحت دموعي
كمال....ليش تبجين اني اسف اذا اذيتج
بس مو بيدي ولله غصبا ما عليه لو احجبلج الي صار وياي تعذريني شغله ابد ما تتوقعينها ولا تخطر على بالج
رزق....رجعن نزلن دموعي ومسحتهن ليش احس نفسي ضعيفه لاحول ولا قوه
كمال....ليش تبجين
رزق....انت ليش رجعت مو عفتني وماتريدني
كمال....احبج ولله العظيم احبج بس كتلج صارت شغله
خربت كلشي مااريد احجي بيها هسه لان احتمال
اذا حجيتها ترجع تخرب زواجنا مره ثانيه
واني هلمره لو اموت مااعوفج بس ولله الشي الي صار أقوى مني ومنج
رزق...مسحت دموعي اريد اعرفه قبل ماااقرر
كمال...اذا عرفتي راح تصير مشكله جبيره ونرجع النقطة البدايه وهذا الزواج مراح يكمل ابد
وافقي خل نزوج هسه نزوج اروح اجيب الشيخ ونعقد
وأخذج البيتي وهناك احجيلج كلشي صار وياي بلتفصيل
رزق...مااكدر اوافق انت خذلتني اول مره خليتني اتعلق بيك وعفتني بدون مااعرف شنو السبب
اني انصدمت بيك صدمة عمري
شلون اكدر اوافق بهاي السهوله
كمال...شو باوعي عليه مد ايده وخلاها جوه حنجي
ورفع راسي رفعت عيوني اجن بعيونه
كمال...احساسج هسه شيكول امشي ورا احساسج
انتي هسه مصدكه كلامي لو لا
اذا مصدكه كلامي خل نعقد هسه وأخذج البيتي
وهناك راح احجيلج كلشي صار وياي بلتفصيل
واذا تحسين اني اجذب ارفضي كلشي واني بعد
مارجع هنا ابد
رزق...انت مزوج واني مااقبل اكون زوجه ثانيه
كمال....اني منفصل ماارتاحيت وياها وكلمن راح بحال سبيله هيه ازوجت واني بعدني
هااا شكلتي لا اضيعين اللحظه الحلوه العمر ما بقى بي
شي يسوه نضيعه
رزق...احجيلي ليش عفتني اول مره ووافق
جمانه السعيدي
سمر من دخل عليها عقيل بقت تسئل منو العريس
منو العريس لازم اعرف
عقيل ماقبل يكول منو العريس لان يعرف سمر ماتحب الخير الرزق
ومن حاولت سمر تسمع شيكولون العريس ورزق
منعها عقيل تقرب على الباب
دفعها عقيل عن الباب حتى لاتسمع كلام رزق ويا العريس
انشحطت نشغت حيل ونشحطت
كامت تكح بس مو كحه طبيعيه
تكح كحه مستمره تحس نفسها راح تتقئ من كد الكحه
راحت كعدت بلحمام ومستمره تكح
نرجع الرزق وكمال
كمال....جيبي القراءن احلفلج علي اني اولا احبج
من عرفت انتي لسه مامزوجه فرحت من كل كلبي والسر الي خلاني ابتعد عنج مااكدر احجي قبل لا نزوج
اذا حجيت هسه راح يخرب زواجنا للمره الثانيه
وافقي خل نزوج ونعوض كل الايام الي فاتت
باوعي عليه انتي مصدكتني لو لا
رزق...هزيت راسي
كمال...مادام مصدكتني لا اضيعين وقتنا هااا اصيح عقيل
رزق...بهذا الوقت تحديدا كنت احس نفسي مثل الغركان ويريد يجلب بكشايه وكمال كان آخر امل اليه
لازم اتمسك بي حتى اطلع من ضلم سمر
ومهما كانت الأسباب الي خلته يتخلى عني اني مسامحته
مادام رجع وتقدمي مره ثانيه اني موافقه علي
رزق...اني اصيح عقيل
كمت من مكاني لزمني من ايدي التفتت علي
كمال...شكرا لان سامحتيني وصدكتيني اوعدج مراح تتندمين بيوم من الايام
رزق...طلعت سمعت سمر تكح بصوت عالي
وعقيل كاعد بلهول
رزق...شبيها سمر
عقيل...ماببها شي انشحطت هسه تاخذ حباية حساسيه وتصير زينه هااا شنو الاخبار
رزق...اني موافقه بس كمال يكول نعقد هسه
خاف نأجل وتخرب الخطبه مثل قبل
عقيل.... انتي موافقه تعقدون هسه
رزق...اي موافقه
عقيل...تمام روحي غيري ملابس البسي شي غير الاسود
علما يجيب الشيخ يعقدلكم
اذا سئلتج سمر كولي مااعرف العريس منو خلي هاي اليله تعدي على خير
دخل عقيل على كمال بعدين كمال طلع هو وسعد يجيبون الشيخ ويجون
رزق...قبل لا اصعد اغير ملابسي طلعت سمر من الحمام
كوه اجر النفس حتى ما سئلتني شصار
ووجها احمر وصوتها مبحوح
سمر....رزق الحكي عليه اريد حباية حساسيه
متت مو عبالك انشحطت ولج متت
رزق...رحت جبتلها حباية حساسيه بلعتها ودخلت غرفتها
تمددت بلكوه تحجي وصوتها مبحوح
دخلت غرفتها بعد ما طلعت منها
رزق...صعدت الغرفتي لبست فستان وردي فاتح وشال ابيض وخليت شوية مكياج وعطر
وحضرت كم قطعة ملابس اليه خاف صدك كمال يصمم
ياخذني ويااا
هلمره اني الي اريد هذا الزواج يكمل بيه خوفه
من خطوبتنا القديمه خاف هم تخرب
احس هاي الفرصه دزها اليه رب العالمين حتى ينقذني
من ضلم سمر واعيش حياتي بعد كل الظروف الصعبه الي مريت بيها من مات ابوي لليوم
صاح عقيل يله رزق الشيخ اجا
نزلت من فوك لزمني عقيل من ايدي ودخلنا عليهم
سلمت وكعدت بصف عقيل
كمال...هذا مهر رزق هاي خمسه مليون وسجلو غايب
شكد ماتريدون ماعندي مشكله
الشيخ...بابا انتي موافقه على هذا المهر
رزق...هزيت راسي
الشيخ احجي اريد اسمع صوتج
رزق...موافقه
بدا الشيخ يعقدلنا والشهود عقيل وسعد
من كملنا وراح الشيخ
سعد....ناخذ عروستنا ويانا
كمال...اي ولله اني اريد مرتي وكدام سعد باجر اخذها للمحكمة واعقدلها
عقيل... شنو رائيج موافقه
رزق...بكيفك
عقيل.. انتي العروس بكيفج
رزق....هزيت راسي
عقيل.... ليش مااتاجلون العرس لمن اجهز نفسها
كمال...لا دخيل الله ودخيلك اني اخاف من التاجيل
هسه اخذها وياي
عقيل....على بركة رب العالمين
رزق.. اجيب جنطتي واجي
جمانه السعيدي
دخلت للبيت سمعت سمر بعدها تكح عبالك مختنكه
بس اني اليوم مو بحالها صعدت نزلت جنطتي
ودخلت عليهم
عقيل...مبروك الف مبروك حبيبتي اسمع كمال اذا ضوجت اختي حسابك وياي
كمال...بعمري مراح ازعلها شكرا خويه عقيل
لان قدرتني وحترمتني الف شكر
سعد...نتشكر منك ابو علاوي الورد
جمانه السعيدي
رزق...شال كمال جنطتي وطلع كدامي
شغل سعد سيارته ووصلنا البيتنا يمكن اني ماسويت عرس مثل البنات ومالبست البدله البيضه
بس اهم شي اخذت انسان مقتنعه بي واحبه
اول ما وصلنا البيتنا كمال اتصل على امه
كمال...يمه باركيلي ازوجت
ام كمال...ازوجت ياا تحجي صدك
كمال.. اي احجي صدك اخذت حبيبتي رزق باجر
نجيج اني وياها حضريلنا غده ونحجيلج قصتنا
كمال...تعالي شوفي البيت هذا بيتج
رزق...قبل كلشي احجيلي منو الي خرب خطوبتنا الاولى
كمال...خاف اضوجين
رزق...واذا ماعرفت كلشي هسه مااكدر انام
كمال....اكعدي واني راح احجيلج كلشي
رزق...بدا كمال يحجيلي شلون سمر راحت اول مره سوتلي سحر تعطيل وشلون سحرها اثر على حياتي وحتى المدرسه عفتها وشلون اتصلت بي وطعنت بشرفي
وخلت كمال يتخلى عني
رزق...كمت ابجي ما مصدكه اكو واحد.يكرهني الهلدرجه
معقوله ضاع من عمري ١٢ سنه مرض وضلم وحرمان
بسبب سمر ليش اني شسويتلها ليش تكرهني هيج
قرب عليه كمال وكمبز يم رجليه مسح دموعي
لا تبجين محد يستاهل هاي الدموع تنزل علموده
ااكيد ربج راح ياخذ حقج منها
رزق...بعديش عمري ضاع بسببها
كمال....وانتي ناويه اضيعين باقي عمرج تبجين على الراح
انسي كلشي وخل نعيش ونبدي من جديد
صدكي راح اعوضج على كل يوم وكل دقيقه ضاعت من حياتج عوفيها الله ياخذ حقج منها
كمال...تعالي نروح نتعشى برا اني عازمج
يله كافي زعل اليلة ليلة عرسنا كومي يله
طلعنا رحنا تعشينا بمطعم راقي وكمال اخذني اشترالي
حلقه ذهب وتراجي هديه عرسنا رجعنا البيتنا
وقررت من هاي اللحظه انسى كلشي وابدي من جديد
ثاني يوم اتصل عليه عقيل يطمن
رزق...الحمد لله انت شلونك
عقيل...البارحه بتت بلطوارء سمر ماكدرت تنام اختنكت
وأخذتها للطوارئ خليتلها اوكسجين والجهال بقو وحدهم بلبيت سمر تكول ليش طلعت بدون ماتودعني جنها ماصدكت تعرس
رزق....غير شردت منها هيه كالت اطلعي من بيتي اريد اخذ راحتي
عقيل.... بس اتصير زينه اني اعلمها
رزق...محتاجني اجي اساعدك
عقيل....لا بس ذكري كمال بعقد المحكمه
رزق...اليوم كعدنا متاخرين وخالتي عزمتنا على الغده
باجر نعقد
عقيل...هم حجالج كمال منو الي خرب خطوبتكم قبل
من البارحه لليوم افكر
رزق...اي كالي بس اشوفك احجيلك كلشي مراح اتصدك منو الي جان مخرب حياتي صار ١٢ سنه حتى قبل مااعرف كمال
عقيل...ليش ما تحجيلي هسه
رزق...اريد احجيلك وانت كبالي حتى اشوف ملامح وجهك
عقيل....بسلا سمر
رزق...من اشوفك احجيلك
رزق...ام كمال فرحانه بينا عبالك ما مصدكه احنا ازوجنا
كل حمويني وحمواتي اجونا للبيت يباركولنا وجابولنا هدايه
ثاني يوم رحنا عقدنا بلمحكمه كملنا كل الاجراءات
فرحت كمال بيه ما تنوصف عبالك يحبني من زمان وماصدك اخذني طاير بيه
الحمد لله والشكر حتى اني ما مصدكه ازوجت
وأخذت كمال واستقريت بيت وحدي
كمال...فلوس المهر اشتري بيهن ذهب واني اشتريلج ملابس
على حسابي
اخذني كمال جبت ذهب بخمس ملايين وهو اشترالي ملابس تخبل على حسابه
اخذني شهر عسل الاربيل
هناك اتصل عليه عقيل يطمن عني
رزق...احنا باربيل الحمد لله زينيبن انت شلونك
عقيل...شلوني حالة سمر موزينه حيل
رزق...شبيها ياستار
عقيل...طلع بيها خبيث منشر بلرئه وصاير على شكل عنقود حول القلب الدكتور يكول واصله مرحله متقدمه بلمرض
واي علاج مايفيدها
ماكو غير رحمة رب العالمين
رزق... هيج بسرعه بليله عرسنا كلشي مابيها
عقيل....اي منتشر بجسمها وهيه ما تعرف
.رزق........ خل احجي ويا كمال نرجع علمود جهالك
عقيل...جهالي جدتهم ام سمر كاعده وياهم بيتنا
رزق...الله يساعدك
عقيل...راح تأخذ جرع كيميائية بلكت تتحسن ولو الدكتور يكول
الجرعه مجازفه لان المرض منتشر بجسمها
والأمل ضعيف مراح تكدر تقاوم المرض
رزق...كلت بكلبي هذا انتقام الدنيا وبعد الاخره هاي حوبتي اللهم لا شماته
رزق..بقينا اسبوعين هناك باربيل ورجعنا اجوني اخواني هما ونسوانهم يباركولي وجايبلي هدايه
وهم جايين يسئلون على سمر بعد ماعرفو حالتها ادهورت حيل
من بعدها اخذها عقيل الايران حتى باايران ااكدو
المرض واصل مرحلة الخطر وبعد مايفيد العلاج
عقيل يكول تبجي ليل نهار
ماكو على السانها غير بعدني زغيره شلون اموت
فعلا هيه زغيره عمرها ٣٧ سنه
اني الصراحه مارحت اشوفها لان كلبي مورم من ضلمها
من يوم ازوجت لليوم مارحت البيت عقيل بس كل يوم عقيل يتصل يطمن عليه
بعد شهرين من زواجي اتصل عليه عقيل
عقيل...رزق تعالي سمر تريد تحجي وياج
رزق....شكووو شذكرها بيه
عقيل...سمر راح تموت وتكول اريد احجي ويا رزق
رزق...خل يرجع كمال واخلي يجيبني البيتكم
اول مادخلت للشارع اذكرت ضلمها اذكرت حقدها
اذكرت ليلة عرسي لمن شردت منها خاف تخرب عرسي
دخلت عليها لكيت امها تبجي عليها
وعقيل كاعد يم رجليها
ضعفانه حيل حيل باقيه بس جلد وعظم بس شافتني
نزلن دموعها كبل
سمر....رزق سامحيني
رزق...على شنو اسامحج وحده ثنيبن
سمر...اني الي عطلت قسمتج بلسحر واني الي خربت زواجج من كمال واني الي اخذت فلوس الورث سامحيني
طمعت بلدنيا عبالي اعيش
بس رب العالمين اخذ حقج مني رزق اني راح انحرم من جهالي
راح اموت وبعد ما اشوفهم
رزق....استغفر الله
التفت على امها يمه جيبي الذهب
راحت امها جابت علبة ذهب من الكنتور
وخلتها كدامي
كل هذا وعقيل متفاجئ من كلامها كام وكف على حيله
سمر.... اني اخذت الورث واشتريت بي ذهب وخليته يم امي هذا الذهب من حقج
الله عليج سامحيني الدنيا عمت عيني مااعرف ليش جنت اكرهج رغم انتي كلشي ماسويتلي
بس اريد اطلب منج طلب جهالي عينج عليهم
ادري ببج حنينه وتحبيهم ديري بالج عليهم فدوه العينج
رفعت ايدها تريد تاخذ ايدي تبوسها بس اني ماقبلت
سمر...كولي مسامحتج خل ارتاح قبل لا اموت
رزق...كسرت خاطري خطيه بعد كل ذيج القوه والجبروت
المرض هزمها وكاعده تتوسل بيه
رزق...اني مسامحتج من كلب والسان
عقيل.....والحلفان الي حلفتي وكلتي مااخذت الفلوس
ليش هيج شسوتلج رزق
سمر....رزق سامحيني
رزق.....اخذت الذهب خليته بجنطتي بقت باقي الوقت يمها توضيت وقريتلها قراءن
بس تبجي عينها على اطفالها وتبجي
بليل رجعت للبيت مقهوره عليها شوف الانسان شكد يحس نفسه قوي ويضلم ويااذي الناس ومايدري رب العالمين
شراح يسلط علي بلحظه ويخلي اصعف مخلوق على وجه الارض
اسبوع واحد وماتت سمر ماتت وبكلبها حسره على جهالها
ماشبعت منهم
بقيت شهر بيت عقيل علمود جهاله
بعدين بيبتهم اخذتهم يمها وعقيل كل يوم يروح يشوفهم ويرجع
اني اروح انظف واطبخ العقيل وارجع البيتي
رجعلي حقي من سمر الذهب صاعد سعره ووصل ااكثر من قيمة الفلوس الي اخذتهن سمر
اني بس قيمت سعره ما بعته ضميته على الذهب الي جابه اليه كمال
سنة ٢١ جبت ولد يعني بعد سنه ونص من زواجي
وسنة ٢٣ جبت ولد ثاني وسنة ٢٥ جبت بنيه نسخه مني
بس مو عرجه تخبل عبالك لعابه
ابوها ميت عليها يحبها اكثر من اخوانها
كلما اشوفه شلون يحبها وشلون يعاملها اذكر ابوي الله يرحمه يعاملها مثل ماجان ابوي يعاملني قبل
ازوج عقيل بعد وفاة سمر بسنتين ووحده مطلقه ما تخلف
بنيه محترمه بت اوادم وتموت على جهاله
لو جهالها ما تحبهم هلكد
الحمدلله الي غير حالنا من حال إلى حال بعد ماكرهة الدنيا نزل رحمته عليه الف الحمدلله والشكر على النعم والعطايا