رواية ضره من عالم اخر الفصل الثالث عشر13بقلم نوسه حمد
بعد سند حكا لي انو خلاص اتخلص من الجنيه خيرني بي اني اوافق ارجع معاهو او اذا مصره انو يطلقني بس ح يديني وقت افكر فيهو قلت ليهو اي انت زوجي في الورق بس انا ما متزكراك اصلا وانا محرمه نفسي عليك ما لم اتزكرك والحمد لله انو ربنا شفاك واهلك خت ليهم عزر وسامحهم قال لي اسامحهم كيف وهم عاملو حالتي بالقسوه وانتي الغريبه رغم العذاب الشفتيهو معاي سوقتيني للطريق الصاح ليه هم م فكرو زيك وليه مافتشو لي حلول وليه اكتفو بي انهم يطردوني انا مهما كان جناهم سواء مجنون او عاقل بس للاسف الزمن دا انت عاقل اشيلوك من الارض شيل انت مجنون او عليك مصيبه تبقا ملطشتهم ما بكلفو نفسهم انهم يقيفو جنبك اتزكرت اهلي ودمعتي نزلت قلت ليهو ربنا كريم وربنا يسهل ليك طريقك ويوفقك قال لي امين يارب انا ح اخليك تفكري ودا رقمي قلت ليهو طيب انا هسي عاوزه افيق لنفسي وارجع شغلي وامسك نفسي بعد اهلي استغنو عني قال لي انا السبب قلت ليهو لخير وربنا عوضني بي اهل بس برضو مادقادره اتجاوز امي وابوي الكانو حنينين علي اكيد انا مريت جنبهم بتجربه مخيفه وقاسيه قال لي معليش المهم انا قاعد متي م احتجتي لي انا موجود وفات بعد فات محمد جا قال لي اها بشري ان شاءالله خير قلت ليهو خير ان شاءالله انا عاوزه اتزكر ماضيني ماعاوزه اخوض تاني تجربه زي دي قال لي يا زوله ولا يهمك نحنا معاك في اي قرار لو قلتي تقعدي ميه سنه معانا حبابك انا كده كده ح اتزوج وزوجتي طبعها م ح يعجب امي عاوز اسكن براي وابتهال ح تمشي مع راجلها قلت ليهو ان شاء الله ربنا مايفرقكم من بعض قال لي امين وبالمناسبه دي طبعا لقيت ليك وظيفه لو قبلوك حظك قلت ليهو ان شاء الله قال لي لكن المشكله محتاجين ايميل ليك انا سجلت ليك بالايميل بتاعي وانا مرات بكون مشغول ومافاهم شي قلت ليهو طيب سجل بالايميل بتاع ابتهال قال لي وليه ما اجيب ليك تلفونك ونكتب الايميل بتاعك عشان تتابعي قلت ليهو لا والله م محتاجه اصلا قال لي ما علي كيفك وعلي الطلاق ولا كلمه قعدت اضحك قلت ليهو تطلق منو قال لي انتي مالك ومشا محمد انسان طيب ومحترم اتمنيت ليهو سعاده من قلبي دخلت كلمت ابتهال بي سند قالت لي نوسه مدام بقا كويس وافقي بيهو يابت دا فتي احلام كل بت قلت ليها كل بت وجنيه ابتهال انا بجد لو ما اتزكرت ماضيني معاهو ما ح اوافق ارجع ليهو قالت لي يازوله ولا يهمك انتي زاتك لو رجعتي ليهو ح نفقدك قلت ليها انا كمان اتعودت عليكم عاوزه افرح معاكم بالعرس قالت لي اكيد ابتهال جاها اتصال من خطيبا قالت لي معليش قلت ليها اخدي راحتك انا عاوزه اقيم الليل قالت لي تمام ادعي لي معاك قلت ليها اصلا م بنساكم وطلعت اتوضيت وصليت وادعيت ربنا انو اشيلوني في الوظيفه دي عاوزه احس اني زول مهم مش واحده تاكل وتشرب وتنوم بالذات انا في وضع زي دا محتاجه اطلع عشان ما تجيني نفسيات وبقيت ادعي ربنا للصباح صليت الصبح ونومتا واظني غرقت في النوم شديد وبين حلمانه وواعيه اتزكرت المناظر الكنت بشوفها في ايامي العيشتها مع سند لدرجه حسيت من الخوف اني ح انشل في النوم ما ح اصحا شديده بقدره قادر حتي وعيت واظني كنت بكورك ام محمد جات وكانت خايفه علي وماسكه ليها انا اتزكرت وانا م راجعه لسند وكنت ببكي ما خافت مني ولا قالت البت دي اهلا قالو ملبوسه ضمتني عليها وبقت تقرا لي لغايه ما هديت وحكيت ليها بالشفتو قالت لي اتبسملي وقومي اتوضي وصلي وما تخافي نحنا معاك لا سند لا غيرو ما ح يسوقوك بالغصب مننا قلت ليها الله اخليك لي يمه اتمنيت الحنيه دي القاها من امي قالت لي وانا امك م تشيلي هم
مشيت اتوضيت وصليت وكنت تعبانه لسه نومتا من غير كوابيس بس لمن صحيت بديت اتزكر واليوم كلو سرحانه معقوله انا عيشتا الحاجات دي ناس البيت لاحظو لي بقيت اسرح كتير بخيالي كانو خايفين علي انا قلت ليهم انا اتزكرت حياتي مع سند وما عاوزه ارجع ليهو قالو لي من حقك في عز ونستنا محمد جا مبسوط قال لي نوسه عندي ليك مفاجاه قلت ليهو ان شاء الله خير قال لي وكل خير الليله جاني ايميل بالموافقه عليك انا سجدت سجده شكر وكلهم باركو لي وفرحو لي من قلبهم شكرتهم علي مشاعرهم الحلوه دي
محمد اداني تلفون قال لي انا عملت ليك ايميل وح يتواصلو معاك فيهو قلت ليهو تمام انا ح اشيل التلفون بس ح ارد ليك حقو قال لي تمام
مرت الايام ونزلت شغل في شركه تقول للشركه الكنت شغاله فيها شنو حاجه فخمه شديد والعجب الموظفين ناس من الطبقات العاليه حسيت نفسي في مكان م مكاني اتجنبت اتكلم مع اي زول اتعرفت عليهم بس لكن اكتفيت بي اني اشوف شغلي اكتر من اشوف الناس المدير عمل لي معاينه وقال لي ممتاز ووراني امسك شنو وكنت في القسم معاي بتين اتعرفت عليهم واحده اسمها متاب بت محترمه وملتزمه حسيت اني مايله ليها والتانيه عبير وبرضو كويسه ما كعبه نهاي من اول يوم اثبت نفسي وكنت بارعه في شغلي
مرت الايام وانا اثبت نفسي في الشغل وسند بجي وبلقاني في الشغل وشكلو عرف مكان شغلي وصفو ليهو محمد وانا طالعه من الدوام معاي متاب لانو بنركب مواصلات واحده سمعت صوت راجل بنادي علي اتلفت وراي لقيتو سند متاب لمن شافتو لمن شهقت قالت لي دا زولك ما رديت عليها قالت لي مبالغه مشيت منها سلمت عليهو قال لي مبروك الشغل كلمني محمد انا كمان نزلت شغل في القسم بتاع بحري وكان لابس لبس الشرطه قلت ليهو م شاء الله ربنا يوفقك ان شالله قال لي جمعا انا منتظر منك رد قلت ليهو سند ربنا ارزقك بي بت الحلال تسعدك وتسعدا انا الحمد لله اتزكرت اي شي وكل ما اتزكر بتعب قال لي نوسه انا معاك ودا ماضي انا اوعدك ما ح اسبب ليك الم تاني بس ما تحرميني منك انا متمسك بيك شديد قلت ليهو انا ما لقيت نفسي معاك قال لي يعني دا اخر كلام عندك
قلت ليهو اي حسيتو حزين وما قادر انطق حرف مشيت منو متاب قالت لي مبالغه يا نوسه بس ان شاءالله اكون جادي م يغش عليك لانو الاولاد السمحين دايما بغشو علي البنات بالذات لمن اكونو هم احلي عليها عاينت ليها وما نطقت حرف قالت لي نوسه بعتزر م قصدي بس قصدي ليك ماتثقي شديد فيهو قلت ليها متاب دا زوجي قالت لي واي لا م بصدق وطيب مالك م محننه ولا اثر حنه في ضفرك مافي انتو زعلانين من بعض ولا شنو قلت ليها عاوزه انفصل قالت لي م جاده يا غبيه دا بنفصلو منو ما رديت عليها وعزرتها ما انا زمان عجبني شكلو من غير ما احس انو في عواقب تانيه ح تجيني قلت ليها كلو قسمه ونصيب زواجي منو نصيب وطلاقي ح يكون نصيب قالت لي بي ضحكه كده سمح اديني ليهو قلت ليها لو دايراهو هداك امشي ليهو قالت لي ممكن اعرف سبب طلاقك او مشكلتكم شنو قلت ليها لا دي خصوصيات بس عاوزه انبهك يا متاب ليك ولي زمانك الراجل ما وجاهه في حاجات تانيه ح تنصدمي فيها قالت لي اوعا تقولي لي م راجل قعدت اضحك قلت ليها فهمك عميق انا م قصدي قالت لي نوسه النبي قولي قلت ليها يابت اقول شنو قالت لي ما كويس صح قلت ليها لا كويس وماقصدي الخطر في بالك في حاجات كتيره بتكون مبهمه قالت لي يازوله كلو هين الله خلقنا للمكافحه قلت ليها انتي فكرتي في ولا شنو قالت لي لو بتحبيهو والله عيني ما ارفعها فيهو ولو ما بتحبي وقنعانه منو مالو حسيتو محترم وهادي وراجل ود رجال وانا بعدين بحب الولد الطويل ومعضل قلت ليها كويس نزلت منها قصاد بيتنا وكنت بشوف كلامها دا هظار ولعب ما اظن الدنيا تجمعها بي سند قلت انبهرت بي جمالو بس لو عاشت ربع العيشتو انا دا كان طارت من حاجه اسمها راجل سمح
مرت الايام وبقينا نجهز لي زواج محمد ومشينا خطبنا ليهو كانت خطيبتو رهيبه وصغيره ومسكينه ما زي بنات الزمن دا واهلا ناس محترمين ام محمد اتكيفت منهم وانبسطت شديد بيهم وقالت لمحمد ما تقصر منهم نهاي اشترا ليها شنطه وشبكه مبالغه الصاله بتاعتهم مليناها استاندات واكرمونا وحددو العرس لانو اهلا مسافرين وطبعا هي جميله م محتاجه لي حبسه كنت محتاجه لحبسه انا اول مرتب لي مشيت اشتريت كل النفسي فيهو واشتريت فستان لعرس محمد وجبتا لي كريمات قلت اطلع من الانا فيهو دا واخدت اجازه اسبوع عشان اقيف مع ام محمد المدير وافق علي الاجازه بشرط لو في شغل ضاغط اجي او اشتغل في البيت وافقت علي كده وانا وام محمد جهزنا اي شي واهلهم ناس الجزيره كلهم جو وكلهم عاوزين يعرفو قصتي شنو بس فضلت السكوت ما حكيت ليهم شي
جا يوم العرس وكانت الفرحه ما سايعانا ومحمد عزم كل زملائو من ضمنهم المدير حقنا وشكلو عزم سند لانو بعد الحفله خلصت وانا طالعه سند وقفني سلم علي وقال لي منتظر منك خبر وشكلك انتي قفلتي بابي وانا بابي فاتح ليك في اي وقت ح تكوني زوجتي الاولي وانا عاوز اقول ليك زواجي الجمعه الجايه ان شالله من دون اهل ومن دون اي شي عزمت محمد وامو لو جو تعالي معاهم قلت ليهو الف مبروك بس دي منو سعيده الحظ دي قال لي بت اتعرفت عليها ح تشوفيها ان شاءالله