رواية العرجاء الجميلة الفصل السابع7بقلم جمانه السعيدي
رزق....خل نرجع بلوقت شويه ورا
ونشوف شنو خطة سمر
من ماتت امي وعقيل بقى وياي وماعافني ابد
هذا الموضوع حيل غثها
تعاركت ويااا اكثر من مره حتى يبطل يسئل عني
بس عقيل ماقبل يعوفني لان هاي وصية ابوي
لمن شافت كل محاولاتها فشلت
قررت تغير الخطه وتخلي عقيل يجيبني اسكن وياها بلبيت حتى اصير تحت ايدها
مو بس هاي بعد عدها خطه ثانيه هسه راح تبين
سمر...عقيل حبيبي بمكان ما انت بمكان واني وجهالك بمكان
جيب رزق تعيش ويانا
عقيل...شعجب طلعت منج هاي السالفه
سمر...ليش هيج تكول عليه اني احبها واذا جان اكو مشاكل بينا قديمه ننساها
بعد رزق بقت وحدها واذا مو اني زوجت اخوها الجبير اوكف وياها منو يوكف وياها
جيبها هنا وخل ننجمع كلنا بهذا البيت
على الاقل نعيش سوا وكل واحد يدير باله على الثاني
عقيل..مراح تقبل
سمر...اخذني واني اقنعها تجي هنا تعيش ويانا
رزق...فعلا عقيل جابها ويا
من شفتها تفاجئت بيها
سمر...حبيبتي رزق رغم كل الظروف الي مرينا بيها قبل
نبقى عائله وحده
واتمنى تقبلين اعتذاري
ونفتح صفحه جديده
عاجبج وضعنا هذا عقيل بمكان واني وجهالي بمكان
اني جايه اطلب منج تجين بيتنا وكلنا نعيش سوا
جان جبت الجهال واجينا نعيش هنا
بس اذا بقيتي هنا راح تبقى الذكريات الحزينه
مسيطره عليج تعالي ويانا غيري مكانج
واذا ما عجبج تعيشين ويانا
بيت ابوج موجود وارجعي علي
فدوه انسي كلشي مر عليج وتعالي نفتح صفحه جديده
خل هاي العائله ترجع تنجمع
يعني إلى متى عقيل يبقى هيج
مو الولد تبهذل بين الدوام وبين بيتنا وبينج
حتى مجاي يشبع نوم وجهاله مشتاقيله
تعالي ويانا واذا ماعجبج الوضع ارجعي
خل ابوسج وارجع اعتذر منج مره ثانيه
جمانه السعيدي
رزق...استغربت منها معقوله هيه هاي سمر نفسها
معقوله تغيرت بهاي السرعه
بس كلامها معقول
فعلا إلى متى راح يبقى عقيل يركض بين الدوام
وبيني وبين بيته
اذا رحت اعيش وياهم وما عجبني الوضع
ارجع بيت ابوي
حتلو فتره بس حتى عقيل يرتاح
بقت سمر وياي بلبيت يومين نظفت البيت وطبخت
وعزلت الغراض
وكل شويه تكعد تقنع بيه الحد ما قنعتني
قررت اروح وياهم البيتهم
اني محتاجه اغير مكاني حتى تتحسن نفسيتي
بس ولله ماهان عليه اعوف بيت اهلي
بقيت ابجي منا لمن وصلت البيتهم
رغم بيتهم زغير بس لكيت سمر محضرتلي غرفه فوك
فارشتها ومخليه جربايه وكنتور زغير
شهر كامل وهيه تعاملني احلى معامله
ماتقبل اشتغل ولا اشيل اي شي من البيت
تفرض على عقيل يجيبلي حلويات وكرزات خاصه بس الي
اشترتلي ملابس جدد
تحاول تخفف عني تسولف وياي
تخلي الاكل وما تقبل تاكل اله اكعد اني اول وحده
رزق...حمدت ربي وشكرته الف مره
صح رب العالمين اخذ مني امي وابوي
بس عوضني بعائله حنونه
حسيت نفسي بديت اتعافى شويه شويه
من بعد ما خلص اول شهر
بيوم كعدنا اني وياها نسولف جان سالفه اجيب سالفه
منا لمن وصلت للموضوع الي تريد تحجي بي وياي
سمر....طبعا اني اتمنى عقيل يفتح مشروع
يشتغل ويا وظيفته
جماعته كلهم فتحو مشاريع تعرفين الضروف صعبه
والراتب مايكفي
جهالنا الكبار ثنيبنهم بلمدرسه
وطلباتهم ما تخلص وهذا الزغير ناويه السنه اسجله بلروضه
بس اي مشروع حتلو بسيط
محتاج راس مال
واحنا بطرك الراتب يخلص نص الشهر
ونبقى نلزك بيها تلزيك
جمانه السعيدي
رزق....حقكم اي ولله صح العيشه صعبه حيل
سمر...اني البارحه احجي بيني وبين نفسي
ااكول لو عندي شي ابيعه
حتى عقيل يفتح مشروعه جان بعته
ولو اكو واحد يقرضنا كم فلس نمشي نفسنا بيهن
بس محد يقرض
واني مااريد عقيل يسحب فلوس بلفايض
لان المبلغ يتضاعف بسرعه
وكل الأرباح تروح من عدنا
صدكي ما انام اليل بس افكر شلون نكدر نحسن وضعنا
تعرفين الراتب نصه يروح للقرض مال البناء
حتى عقيل مطلوب فلوس وولد جماعته قرضو
صح هما ما مطالبينه بلفلوس هسه
بس اكيد راح يطلبوهن بيوم من الايام
رزق....الله يساعده ويفرج عنه
سمر...هو اكو حل بس لازم انتي توافقين
رزق.. اني اوافق شلون اني لو عندي فلوس
لو ذهب مجان اقصر ابد
عقيل عزيز عليه ومااكدر اشوفه عايش ضروف صعبه واسكت
سمر...راح اكولج الحل شنو بس مو تكولين العقيل سمر كالت
رزق....لا مااكول شنو الحل
سمر....بيت عمي بمكان مافارغ هيج نبيعه
وكلمن ياخذ حصته
يعني تتوقعين اخوج الي بلبصره عنده سكن مجاني
وراتبه خير من الله راح يرجع يسكن بهذا البيت
لو الثاني نسيبه انطا بيت جاهز
وزوجته بت عز وخير يرجع يكعد بهذا البيت
اصلا همايفرحون ينباع البيت
كل واحد ياخذ حصته يستفاد منها
حتى انتي مستحيل ترجعين تكعدين بهذا البيت
وحدج عقيل ما يقبل
ليش ما ينباع وكلمن ياخذ حصته
عقيل يفتح مشروعه وحالتنا الماديه تصير احسن
رزق....بيت اهلي ينباع
سمر....يعني عاجبج يبقى مقفول هيج
حتلو أجرنا شكد يجيب اجار ولازم يتوزع الاجار على الكل
وبلاخير هم ينباع
اذا تكدرين تساعدينا وتحسنيين وضعنا المعيشي اكون شاكره اللج
بس لاتكولين سمر كالت
كولي اني اريده ينباع وكلمن ياخذ حصته
رزق...هاي خطة سمر الجهنميه تجيبني بيتها
وتقنعني نبيع البيت حتى حصتي تروح
الها والجهالها وهيج تضرب عصفورين بحجر واحد
رجعت عقيل للبيت وخلتني جوه عينها
وبعقلها تاكل حصتي من البيت
الصراحه اني هلكد ما طيبه وعلى نيتي صدكت
كلامها
جمانه السعيدي
رحت احجي ويا عقيل
رزق....عقيل اريد احجي وياك بموضوع مهم
عقيل.... شكو احد مضوجج هنا
رزق....لا اريدك تبيع البيت
عقيل...اي بيت
رزق....بيت اهلي ليش باقي مقفول وانت واخواني
عدكم عوائل وكل واحد بيكم محتاج
هاي الفلوس شكد مراح يبقى مقفول بلاخير لازم ينباع
وكلمن ياخذ حصته
عقيل....تحجين صدك
رزق...اي احجي صدك انت مديون وراتبك قليل
وعندك عائله
اخذ حصتك افتح بيها مشروع
وحسن وضعك وحتى اخواني اني متاكده
كل واحد بيهم محتاج حصته من الفلوس
حتى يغير حياته
عقيل...يعني اكيد ما تزعلين اذا انباع البيت
رزق...مستحيل ارجع اكعد بي وحدي
وانت وسمر ما مقصرين وياي ابد
المهم اقتنع عقيل يبيع البيت
اصلا فرح لان فعلا هو مطلوب ومحتاج المبلغ
الي يطلعله من الورث
اتصل على اخواني كلهم رحبو بلفكره
بعدها بيوم انكتب على بيت اهلي الدار للبيع
يافرحة سمر ودها تشيلني وتفتر بيه من الفرحه
بهاي الايام دللتني دلال ماصاير ولا داير
بعد شهر ونص تقريبا انباع البيت
وعقيل باع الأثاث كله
واجو اخواني اتجمعنا بيت عقيل
وتقسم الورث وكل واحد اخذ حصته
وعقيل شال حصتي على فلوس الأثاث ونطانياهن
سمر شافته انطاني حصتي وتخبلت
خلت اخواني يطلعون من البيت
وأخذت عقيل بلغرفه
بس ماكدرت تحجي بصوت ناصي
انفاعلها غلبها صوتها وصل للجوارين
سمر...شنو تنطي رزق حصتها
عقيل....حصتها الها ليش اخذها
سمر....كاعده بيتنا وتأكل وتشرب ويانا شسوي بحصتها
عقيل...انتي ليش اصيحين
حصتها وهيه حره مثل مااني اخذت حصتي
هيه تاخذ حصتها
سمر...لا ماتاخذ اي شي بنيه لامزوجه
لا تطلع لا تدخل شسوي بهيج مبلغ
انت أولى بهاي الفلوس هيه عايشه ويانا
وتاكل وتشرب ويانا واذا احتاجت شي انت ما تقصر وياها
ليش تأخذ هيج مبلغ
عقيل...اس ممنوع اسمعج تحجين بهيج موضوع مره
ثانيه
ولا تخلينها تسمع كلمه وحده منج فهمتي لو لا
رزق....انصدمت من كلامها اني لو عقيل طالب هذا المبلغ مني انطي بدون مااتردد لحظه وحده
بس هيه تتعارك علمود تاخذ الفلوس
هااا هسه افتهمت ليش تلح على البيت
تريد تاخذ حصتي
اخذت الفلوس وصعدت ضميتهن بغرفني
سمر مو سهله جاي تخطط الشي الله يستر منها
ثاني يوم نزلت لكيت عقيل يتريك
رزق....صباح الخير
عقيل...صباح الخيرات
رزق....اذا تحتاج الفلوس اخذهن اشتغل وسد الديون
اني ما محتاجتهن
عقيل...ذني فلوسج حقج
تردين تشترين بيهن ذهب وضمينه للوكت
تردين تشترين قطعة ارض
هذا الوكت مامضمون ابد
من يكول اني راح ابقى وياج العمر كله
ايحوز يصير عليه شي لا سامح الله
رزق....اسم الله عليك
عقيل...محد يعرف يومه وانت بنيه
فكري تردين تشترين بيهن ذهب لو قطعة ارض
واني اخذج بايدي اشتريلج
رزق...فكرت بكلامه معقوله صح اني بنيه يتيمه
ومااعرف هذا الزمن شضاملي
طلع عقيل للدوام
انتظرت سمر لمن طلع من البيت
سمر....رزق ليش اخذتي الفلوس من عقيل
رزق....اني كتله اخذهن ماقبل
سمر...انتي شسوين بلفلوس هو محتاجهن يفتح بيهن مشروع ويسد الدين
رزق...بس ذني حقي واني لازوجت ولا طلعت من هاي الدنيا بشي
ومااعرف باجر شراح يصير
سمر...شراح يصير قابل راح نشمرج بلشارع
رزق....النفوس تتغير الله اعلم
سمر....بكيفج اذا انتي ما يحن كلبج على اخوج
قابل اني اجبرج هيه كوه
رزق...توقعت النقاش هنا ونتهى وسمر اقتنعت خلاص
بس هيه حضرت خطه حتى تاخذ الفلوس مني