رواية الغرور والحديد الفصل السابع7 بقلم فاطمة محمود
دنيا كانت بتحاول تزقه وهي بتضرب فيه وبدأت تصرخ اما لقيت نفسها مش قادره عليه
طلعت شمس من الأوضة علي صراخ دنيا واتصدمت
دنيا دموعها نزلت وشافت شمس واقفه اتكلمت بصعوبة: الحقيني يا شمس
جريت شمس عليهم ومسكت هشام: انت اتجننت ياهشام ابعد عنها
وقع هشام شمس بايديه علي الارض شمس بصت حواليها وهي بتدور علي الفون عشان تكلم ياسر يلحقهم
لقيته في وشها داخل الشقه هو ومنصور وهاجر واتصدموا
من منظر دنيا
قرب ياسر من هشام بسرعة وزقه جامد هشام اتخبط في الحيطه ومن صدمه الخبطه اغمي عليه
هاجر قربت من دنيا حضنتها وفضلت تهدي فيها
نزل ياسر لمستوي شمس وحاول يرفعها شمس استغلت الفرصه وحضنته جامد كأنها خايفه من اللي حصل..
ياسر معرفش يعملها حاجه وبعد دقيقه بعدها عنه
ياسر: انتي كويسه
شمس: اها
بص ياسر لدنيا اللي ماسكه في هاجر وبتعيط
ياسر: آسف يا دنيا عن اللي عمله الكلب دا معاكي
دنيا مرديتش وفضلت تعيط
هاجر: حقك عليا يابنتي مش عارفه ايه اللي وصل هشام لكدا
منصور: بطلي عياط انتي ونا لما يفوق هخليه ازاي يفكر مجرد تفكير يعمل معاكي كدا
ياسر بعصبية: انا مستنيه يفوق بفارغ الصبر عشان محتاج إعادة تربية من اول وجديد
منصور: مش وقت الكلام دا اسنده ونزله تحت في الشقة
ياسر: انا مش عارف جايب البرود دا منين
منصور: ياسررر.. ما انت شايف قدامه مغمي عليه هفضل اضرب فيك عشان اخلص عليه خالص
ياسر: ياريت لو هنرتاح منه ونخلص من قرفه
هاجر: ياسر متنساش أنه اخوك بعد الشر عليه
ياسر: حاضر يا امي
منصور: اتفضل اسنده
بص ياسر لهشام بقرف: انا بجد قرفان منه حرفيا
قرب ياسر من هشام سنده عليه وطلع من الشقة
هاجر: كفايه عياط يا دنيا عشان خاطري وادخلي نامي ونتي يا شمس خليكي جنبها اوعي تسبيها
شمس: حاضر يا مرات عمي
مسكت دنيا ايد هاجر: لا خليكي انتي معايا يا ماما
منصور: خلاص يا هاجر افضلي معاها لحد الصبح.. يلا تصبحوا علي خير
شمس: ونت من أهل الخير يا عمي
خرج منصور من الشقة ونزل ودخلت هاجر بـ دنيا الاوضه
قفلت شمس الباب: ياه ياريت لو تعمل كدا كل يوم يا هشام عشان احضن براحتي ياسر حبيبي
ودخلت اوضتها وهي مبتسمة كأنه ولا حصل اي حاجه
~~~~~
في منزل ناديه الحديدي
بيتفتح باب الشقة وبتدخل ناديه وامل كانت طالعه من اوضتها
امل: صباح الخير
قعدت ناديه: صباح الخير ياختي كل دا نوم
امل: طيب وفيها ايه هي الساعه دلوقتي يعني
ناديه: الساعه تسعه
امل: الدنيا لسه بدري اهو.. انتي كنتي فين
ناديه: كنت بسلم علي عمار قبل ما يمشي
امل: انتي بتهزري يا ماما صح
ناديه: ههزر ليه نزلت الصبح اطمن علي قاسم لقيت عمار خارج من الشقة سلم عليا ومشي
نفخت امل بضيق: كنتي وقفتيه دقيقه انزل اشوفه علي الاقل انا معرفش امتي هيرجع
ناديه: مش هينفع أقوله استني امل يا عمار تسلم عليك
امل: طيب هو نزل دلوقتي حالا
ناديه: ايوا
اخدت امل الطرحه حطتها علي شعرها وخرجت من الشقة بسرعة
نادية: بت يا امل راحة فين
امل نازله علي السلم: راجعه حالا
نزلت امل وهي بتجري تلحق عمار قبل ما يمشي
وخالد كان طالع من شقتهم وخبطت فيه بسبب سرعتها
ركز خالد علي شكلها وامل بصتله وبعدت عنه بسرعة: خالد
انا آسفة علي الوضع دا
خالد: محصلش حاجه انتي نازله بتجري كدا ليه
امل: اصلا انا كنت عايزه اشوف
سكتت امل ومكملتش كلامها
خالد باستغراب: تشوفي مين
امل: خديجة نازله اشوف خديجة قبل ما تنزل شغلها عشان كدا بجري
خالد: هي موجوده لسه بس متجريش مره تاني ليجرالك حاجه
امل: تمام رايح الشغل انت
خالد: ايوا
امل: بالتوفيق
ابتسم خالد: شكرا.. محتاجه حاجه
امل: لا يا خالد
دق قلب خالد من نطق اسمه وكان مبسوط اوي من جواه بصلها وبعدين نزل
~~~~~
في فيلا شاهين الصياد
متجمعين علي السفره بيفطروا وبيقوم شاهين بيبوس خد مرام: عايزة حاجه يا حبيبتي
ابتسمت مرام: لا حياتي
شاهين: طيب يا حبيبتي.. إلياس يلا يا حبيبي اوصلك
إلياس: حاضر
قام إلياس وخرج من الفيلا مع شاهين نزلت سيليا وقعدت علي السفرة: صباح الخير
مرام: صباح الخير
سيليا: شكلكم اتصالحتوا
مرام: قصدك مين
سيليا: قصدي علي انتي وبابا
مرام: احنا ما كنا متزعلين اصلا لحتي نتصالح
سيليا: بإمارة انك رفضتي تخليه يبات معاكي في الجناح
رفعت مرام عيون لسيليا مصدومه: لك ما في شي بيتخبي بهالبيت
سيليا: قولي مفيش حاجه بتتخبي عن سيليا
مرام: وشو بتعرفي كمان احكي
سيليا: اقول ليه ما انتي مش عايزة تحكي
مرام: هي كانت مشكلة صغيرة سوء تفاهم وخلص
سيليا: تمام يا مرام هانم
جرس باب الفيلا رن وفتحت الخدامة ودخل نديم: يا صباح الورد
ابتسمت مرام ووقفت: صباح الخير حبيبي كيفك
سلم عليها نديم: بخير الحمدلله
قرب نديم من سيليا وحضنها: عامله ايه يا سيليا
سيليا: انا كويسه ونت
نديم: انا تمام كنتي وحشاني
سيليا: ونت اكتر يعيوني
نديم: خلاص يعني هنستقر هنا وعجبتنا الحياة في مصر
بصيت سيليا لمرام: اها حلوه جدا.. هسيبكم مع بعض ونا خارجه
نديم: ماشي يا حبيبتي
خرجت سيليا ومسكت مرام ايد نديم: اقعد الي زمان ما شفتك
نديم: اعمل ايه يا خالتو مشغول والله
مرام: بعرف حبيبي طمني كل شي معك منيح
نديم: الحمدلله كله تمام
~~~~~
في منزل منصور العطار
قاعد ياسر في الصالون ومنصور قصاده عيونه عليه
منصور: انت مش هتروح شغلك ولا ايه يا ياسر
ياسر من غير ما يبصله: لو عايز تمشيني وتداري علي عمايل ابنك المرادي احب اطمنك قاعد ومش همشي غير لما اشوفه
منصور: انا كل اللي اقصده هتستفاد ايه انك تكلمه دلوقتي سيبه يفوق كويس ولما ترجع اتكلم معاه براحتك
ياسر: اسيبه!.. الحيوان دا اتعدي علي خطيبة انت فاهم الوضع البنت اتصدمت وياه عالم هترجع طبيعية ولا ايه
منصور: متكبرش الموضوع اوي كدا كلها يوم وتنسي اللي حصل
ياسر: معاك حق انا فعلا بكبر المواضيع كلها عندك تفاهات المهم اللي بجد لمنصور العطار انه يشوف
قاطعه منصور بصوت كله عصبية: جر ايه يا ولد انت هتنسي نفسك وهتغلط فيا خليك دايما فاكر اني في الاخر ابوك مهما
عملت
ياسر: للأسف
منصور: مش سامعك بتقول ايه
وقف ياسر: مبقولش حاجه
اتفتح باب اوضه هشام وطلع وبص عليهم اتكلم لما برود: صباح الخير
ياسر: ايه نمت كويس
هشام باستغراب: ونت ليه هامك النهاردة
ياسر: لا انا في الحقيقة ميهمنيش اي حاجه انت نفسك متهمنيش
اضيق هشام: بقولك ايه أنا صاحي مصدع ومش ناقص اي كلام معاك وابعد عني عشان ما اطلعش انا الوحش بعدين
مشي هشام خطوة وقبل ما يختفي شده ياسر من دراعه جامد ورجعه قدامه واتكلم بصوته كله: هي البجاحه وصلتك كمان انك تنسي اللي عملته امبارح يا زباله
شد هشام دراعه من ياسر: صوتك ميعلاش ونت بتكلمني متنساش اني الاكبر وحاجه ايه اللي بتكلم عنها دي ولا انت عايز تعمل ايه حدوته وخلاص
ياسر: دنيا
هشام: مالها دنيا
ياسر: انت بتستعبط يعني ولا ايه
هشام: ما تنطق وتخلصني انا اكيد مش حابب الكلام معاك
ياسر بص لمنصور: اتكلم انت لأن بجد مش عارف ازاي هقول وحاول تبقا اب فعلا وانصحه
منصور: امشي يا ياسر ونا هتكلم معاه
ياسر: والله عارف ما هيبقا فيه اي نتيجة
واخد الفون بتاعه ومفتاح العربية وخرج من الشقة
بص هشام لمنصور: ماله الزفت دا عمال يرغي علي ايه
منصور بشك: انت بجد مش فاكر ياواد يا هشام
هشام: والله ما فاكر في ايه بقا
منصور: طيب روح الحمام اغسل وشك وفوق كدا وبعدين نتكلم
هشام: تمام
~~~~~
في اوضه رنا
قاعده علي سريرها وخديجة جنبها
بصت خديجة عليها: مالك يا رينو مدايقة من ايه
رنا: ياسر
خديجة: ماله ياسر
رنا: من امبارح ما بيردش عليا ابدا
خديجة: يمكن مشغول يا حبيبتي
رنا: انتي بتاخديني علي قد عقلي يا خوخا هيبقا مشغول في ايه اول ما بيخلص شغل بيكلمني علطول
خديجة: الغايب عذره معاه.. هو اللي يبقا عايش مع منصور يضمن اليوم يعدي بهدوء
رنا بقلق: يعني ممكن يكون في مشكلة معاه
خديجة: لا يا رينو أن شاء الله انا بس بحاول اخليكي تفكي
شويه
رنا: بس انا قلقانه عليه
خديجة: خلاص روحي بيتهم واسالي عليه
رنا: بتهزري كمان
خديجة: بتكلم جد
رنا: اسكتي يا مجنونة
خديجة: حاولي تكلميه تاني لحد ما يرد وتهدي دا انتي
بقالك ساعه قلقانة علي حبيب القلب
رنا: ماشي
~~~~~
في الصالون قاعده هدي ومعاها آمنة
آمنة: الشاب مناسب ليها والله يا هدي والبت دماغها ناشفه ولا حتي موافقة تشوفه
هدي: خلاص طالما مش عايزة تشوفه سبيها علي راحتها والبنت لسه صغيره
آمنة: انت بتفكريني بجلال كل ما افتح الموضوع دا يقولي صغيرة خديجة عندها 26 سنه يا هدهد يعني مناسب جدا
سنها لجواز لحد امتي هتفضل كدا
هدي: لحد ما يجي نصيبها متستعجليش علي حاجه بكرا تتجوز وتجبلك احفاد كمان
آمنة: بتمني اشوف اليوم دا
هدي: أن شاء الله يا حبيبتي
~~~~~
في منزل نصار العطار
في اوضه دنيا
مغمضة عيونها ونايمه علي رجل هاجر وبتملس بايديها هاجر علي شعر دنيا
فتحت دنيا عيونها وللحظه افتكرت اللي حصل قامت ودموعها نزلت
حضنتها هاجر: اي كلام هقوله مفيش منه أي فايده بس انتي عارفه اني بحس انك بنتي يا دنيا وغالية اوي عندي حقك عليا يا حبيبتي صدقيني مش هعديها لهشام
دنيا كانت ساكته
هاجر: دنيا
طبطبت هاجر علي كتفها
~~~~~
في فرع ورشة الحديدي بالقاهرة
كان وصل عمار من شويه والشباب رحبوا بيه كلهم واتكلم معاهم عن اخبار الشغل وكان ماشي كويس جدا وممتاز
بعد عنهم عمار شويه ورن علي حسن وبعد شويه رد عليه
حسن: ايه يا عمورة لحقت اوحشك
عمار: انا مفيش حاجه وحشتني غير الورشة
حسن بهزار: ما تقولش هي اكتر منك من اول ما مشيت وحالها واقف
عمار بقلق: حسن بتكلم بجد
حسن: لا ياعم بهزر معاك الشغل ماشي زي الفل هنا طمني عندك
عمار: الشغل هنا تمام بس هفضل اسبوع كدا اشوف الأمور كلها عشان ابقا مطمن اكتر
حسن: ماشي
عمار: طيب هقفل واكلمك تاني
حسن: مع السلامه
قفل عمار مع حسن ورن علي أبوه: طمني عنك عامل ايه دلوقتي
قاسم: أما كويس يا حبيبي متقلقش
عمار: اوعي تنسي تاخد العلاج في وقته ومتنساش تاكل كمان
قاسم: لا من الجهه دي اطمن خالص هدهد مش بتفوت ثانيه في معاد العلاج
عمار: ماشي عاوز اي حاجه قبل ما اقفل
قاسم: لا يا حبيبي الدنيا عندك ايه
عمار: كله تمام طول ما انا موجود اطمن
قاسم: متاكد من دا
عمار: سلام
قاسم: سلام
قفل عمار ودخل يشوف الشغل جوا الورشة
~~~~~
في شركة شاهين الصياد في مكتبة
قاعد شاهين علي كرسي المكتب بتاعه وفي أيده سيجارة وعيونه علي الملفات اللي قدامه
بيخبط الباب وبيسمح شاهين له بالدخول
خالد: ازاي حضرتك يا شاهين بيه
رفع عيونه شاهين من الملفات وبص لخالد: الظاهر انك مش مركز في شغلك يا استاذ خالد
خالد: ليه بس يا فندم حصل مني غلط
شاهين: ونا هطلب منك تيجي مكتبي ليه لو حضرتك مش شايف شغلك كويس
خالد: آسف ممكن اعرف انا غلطت في ايه
رفع شاهين الملف في وش خالد: ازاي حسابات الملف دا ناقص انت عارف الارقام اللي مش كامله دي ممكن تعمل
في الشركة ايه
بص خالد للملف: بس يا فندم الشغل دا مـ
سكت خالد..
شاهين: طبيعي للبني آدم ما بيعترفش بغلطه ولا يوافق بيه..
اسمع يا خالد انا مش هستني منك اي غلطة تانيه والشركة بتستغني عادي مش هتقف علي اي حد
هز رأسه خالد: تمام يا فندم
شاهين رف الملف لخالد: اتفضل
اخد الملف خالد من شاهين وخرج من المكتب وقفل الباب ورا
قسم الحسابات
رمي خالد الملف علي مكتب عبدالله
رفع عيونه عبدالله علي خالد: ايه دا
قعد خالد علي مكتبه: شغلك ناقص وراح لصاحب الشركة وافتكرني انا وبسببك اخدت مرشح في التزام الشغل وكتر
خيره مطردنيش
عبدالله: انا فعلا نسيت اكمله
اسلام: ودلوقتي اللي افتكرت يا استاذ عبدالله
عبدالله: والله في الف حاجة في دماغي مش عارف اركز
خالد: يبقا تقعد في البيت احسن
عبدالله: عشان ملاقيش اكل نهائي
اسلام: يعدي عليك ايام اوحش من اللي شفته يعني
عبدالله: علي رايك.. اوعي تزعل مني يا خالد انا بنفسي هروحله واقوله دا شغلي انا
خالد: هتجن اكتر ما انت مجنون
عبدالله: لا يا خالد انا بتكلم جد
خالد: انت صاحبي وكلنا بنغلط عادي انت ركز في شغلك وميحصلش منك اي غلطة تاني
عبدالله: هعمل كدا اكيد
اسلام: ايه يا عبود مش جعان
عبدالله: دا انا ميت جوع
ضحك اسلام وخالد
اسلام: عمره ما هيتغير الاكل اهم حاجه عنده
عبدالله: وهيفضل التوب بالنسبالي
~~~~~
في ورشة الاكسسوارات الجديدة لنيللي
واقفه نيللي مع شاب مهندس ديكور بيوريها رسومات الرفوف والإضاءة
وسيليا قاعده علي الكرسي بملل طلعت الفون بتاعها من الشنطة ورنيت علي رنا
رنا: اخيرا جيت علي بال القمر
سيليا: انتي طول الوقت علي بالي يا رينو
رنا: قلب رينو عامله ايه
سيليا: مع نيللي في الورشة الجديدة بتظبط المكان ونا زهقت من القعدة
رنا: طيب ما تيجي تقعدي معانا شوية دا انتي وحشتينا
سيليا: حبيبتي.. هو عمار موجود
ابتسمت رنا: هو في الحقيقة مش موجود بس لو عايزة تشوفيه اقولك مكانه
سيليا بقلق: ليه هو مش كويس
رنا: لا مش قصدي كدا متقلقيش عليه
سيليا: انا مش قلقانه
رنا: امم واضح اوي المهم ياستي هو موجود حاليا في القاهرة
سيليا: في القاهرة..!
رنا: ايوا بيروح كل فتره يطمن علي الشغل
سيليا: في ورشة تصليح في القاهرة يعتي
رنا: بالظبط احنا مسمعين في كل حته يا سولي
ضحكت سيليا: دا كدا كدا
رنا: طيب ايه هتيجي النهاردة
سيليا: بصي انا معايا كام حاجه كدا لو خلصت يبقا اشوفك
رنا: ماشي ركزي في الكام حاجه دول وسلميلي علي عمار
سيليا: بس انا مش هشوفه
رنا: هفهم العكس عشان انا مش بصدق
سيليا: انتي بجد حاجه تحفه يا رنا
رنا: انا عارفه دا
ابتسمت سيليا: طيب هكلمك تاني
رنا: تمام يقلبي
قفلت سيليا وقامت راحت لنيللي: نيللي
نيللي: لحظة يا شباب
قربت منها نيللي: في ايه
سيليا: انا همشي دلوقتي
نيللي: راحه فين
سيليا: عمار
نيللي: يعني هتتاخري
سيليا: لا هو موجود في القاهرة هنا مش هتاخر كتير وهرجع اشوف اللي هتختاريه
نيللي: خلي بالك من نفسك
سيليا: اوك باي
نيللي: باي
خرجت سيليا من المكان ركبت العربية ورجعت نيللي لشاب تكمل وتشوف هتختار ايه
~~~~~
نزلت هاجر من عند دنيا ودخلت الشقة ولقيت هشام لابس
هاجر: لابس كدا ليه
هشام: هكون لابس كدا ليه خارج
هاجر: اتكلم بطريقة احسن من كدا
هشام: بلاش تتكلمي معايا انتي احسن
هاجر: هشااااام
رفع عيونه هشام لفوق بضيق: انا رايق ومش عايز اضيع المزاج اللي عامله بطلي تعلي صوتك
هاجر: انت هتسيب دنيا
هشام: دنيا مين دي اللي اسيبها
ضحك هشام ضحكة مستفزة: دي هي اللي متقدرش تسيبني
بتموت فيا انت عارفه ابنك جامد وكاريزما وهي لو عملت معاها ايه عمرها ما هتفكر بس تفكير تبعد عني
هاجر: احترم نفسك.. انا مش هخليك تعملها حاجه طول
ما انا عايشة فاهم دا
هشام: لا مش فاهم ومتمشيش كلامك عليا اوعي من وشي
زق هشام هاجر بكتفه وطلع من الشقة
هاجر: ربنا يهديك يا ابن بطني
~~~~~
في ورشة الحديدي بالسيدة زينب
حسن وجلال كل واحد فيهم بيشتغل وصوت الورشة مالي الحارة عكس ورشة منصور العطار
قاعد منصور قدام ورشتة وجنبه الشيشة بيشرب منها
نزل هشام وبصله منصور: هشام
هشام: نعم يا حاج
منصور: لازم تطلع لدنيا تطمن عليها وتقولها ما كنتش في وعيك عايزك تخليها تنسي اللي حصل وتصعب عليها
هشام: حاضر انا ارجع
منصور: مش عاوز الغلط دا يحصل البت دا هتغير رأيها
هشام: متقلقش عايز حاجه
منصور: لا
مشي هشام ورجع منصور كل تركيزه علي ورشة الحديدي
في ورشة الحديدي...
حسن: قولي يا جلال هو ابويا كان شكله ازاي زمان
جلال: ابوك دا كان راجل مفيش زيه جدع مع ناس الحارة كلهم لو في ضيقة اول واحد تلاقيه جنبك وحنين خالص
يا حسن وكان دمه خفيف الناس كلها بتحبه
قاسم واخد منه كتير حته في شكله كانوا دايما بيقولوا قاسم كانه سالم الحديدي بالظبط
حسن: انا اها مش فاكر ابويا اوي بس من كلامك حسيت انك زيه برضو يا جلال جدع وعمرك ما تخون
ابتسم جلال: ونت سكر العيلة يا ابو علي بدمك الشربات دا
حسن: هتصدقني لو قلتلك بحبك يا جلجل
ضحك جلال: هصدقك يا ابو علي
ضحك حسن ورجعوا يكموا تصليح العربيات
صبحي كان واقف قدام الورشة بيسمع كلام جلال وحسن كانه بيشوف الشغل ومشمش كانت عيونه عليه
بص صبحي لمنصور ومشمش شاف نظراتهم واول ملاحظ صبحي مشمش اتوتر ودخل جوا
~~~~~
وصلت سيليا مكان ورشة الحديدي بالقاهرة ونزلت شافت عمار واقف بيتكلم مع شاب سندت علي العربية وفضلت تبصله وتبتسم ومش حاسه بنفسها
عند عمار واحمد
احمد: الشغل ماشي زي ما انت عايز يا عمار باشا
عمار: بلاش باشا دي احنا نعرف بعض كويس
احمد: بحترمك ودا حق مني ليك
عمار: ولا انت اتكلم زي ما انا بكلمك كدا
ضحك احمد: ماشي يا عمار انا هروح اجيب فطار وارجع
انت فطرت ولا لسه
عمار: امي لو هيحصل ايه مستحيل تخليني انزل من غير فطار
احمد: ايوا ياعم يا بختك
ابتسم عمار: روح انت يلا
احمد: ماشي
احمد كان هيمشي شاف سيليا واقفه سرحانه في عمار
صفر احمد بإعجاب: اوباا ايه الصاروخ اللي واقفه هناك دي
عمار من قبل ما يبص حس انها هي بس كدب إحساسه واتكلم: امشي يا احمد
احمد: يعني ينفع امشي واسيب المزه دي لوحدها هنا
عمار: احمدد
مشي احمد وقربت سيليا عند عمار ووقفت جنبه: انت علطول هتفضل عامل نفسك مش واخد بالك عليا
تجاهل عمار كلامها وبصلها من تحت لفوق: ايه اللي انتي لابساه دا
ابتسمت سيليا: حلو مش كدا
عمار: زفت علي دماغك عاجبك ونتي بتتعاكسي يعني
ربعت سيليا ايديها قدامها وبصتله بضيق: عادي مش مهم بالنسبالي
رفع عمار حاجبه باستهتارها وكان هيمشي من قدامها سيليا اتحركت بسرعه وكانت هتقع عمار لحقها ووقعت بين دراعاته
سيليا بصوت ناعم هادي: شكلك من قريب يجنن يعموري
بصله عمار في عيونها بتركيز وحرك عيونه علي ملامحها كلها
خرج احمد من الورشة وشافهم قريبين من بعض: احنا لحقنا بالسرعة دي
فاق عمار علي كلام احمد وبعدها عنه
عمار بصله: شوف هتعمل ايه يا احمد
رجع عيونه علي سيليا: هتفضلي واقفة
سيليا: انت عايز ايه
عمار: تمشي
سيليا: بس انا حابه اقعد معاك
عمار: ونا عايزك تمشي
سيليا: هو انت ليه كل ما اقربلك بتتعامل معايا كدا هو انا بدايقك اوي كدا
عمار: مش بدايق
سيليا: يبقا اكيد في وحده في حياتك ومش حابب تخليها تشوفني معاك
عمار: لا مفيش
سيليا: لا فيه ومتكذبش
عمار: ياستي بقولك مفيش اي وحده
سيليا: يعني انت مش مرتبط
بصله عمار نظرة فهم اللي قالته كان غرضها تعرف ايه: ممكن تمشي
سيليا: متخلنيش اندم اني جيت اشوفك
عمار: احنا هنا كلنا شباب مينفعش بنت شابة تفضل معانا
فـ اتفضلي امشي
سيليا: تمام انا مش هوريك تاني وشي دا
مشيت سيليا من قدامه وهي متعصبة وركبت عربيتها ومشيت
بص عمار عليها ورجع يشوف الشغل
~~~~~
قرب ياسر علي رنا كانت واقفه في ساحة الشركة
ياسر: رنا ايه اللي جابك هنا
رنا: جايه اشوفك
ياسر: مش هينفع اتكلم معاكي كتير روحي دلوقتي ولما اخلص شغل يبقا اكلمك
رنا: ونت بترد علي مكالماتي عشان تكلمني لما تخلص شغلك
ياسر: الفون كان بعيد عني طول الوقت امبارح عشان كدا
ما شوفتش مكالماتك
قربت بنت زميلة ياسر في الشغل وحطيت ايدها علي دراعه: ياسر انا هجيب كوفي اجبلك معايا
ياسر: لا شكرا يا ميرنا
بص ياسر لرنا اللي مبرقة عيونها
ميرنا: اوك.. مين دي يا ياسر
رنا: انتي اللي مين
ميرنا: انا صديقتة وزميلته في الشركة
رنا: هو عشان زميلة يبقا ليكي الحق تحطي ايدك علي دراعه كدا
ضحكت ميرنا ومسكت دراع ياسر بايديها وسندت عليه: فيها ايه احنا صحاب قريبين عادي
ياسر: ميرنا مينفعش كدا احنا في شركة
بعدت ميرنا عنه وبصت علي رنا: هو علطول كدا لما اقرب منه قافل اوي.. عن اذنكم
مشيت ميرنا وياسر قلق من هدوء رنا ومسك ايديها: رنا
شديت رنا أيدها بعصبية: ابعد ايدك عني انت طلعت قذر
ولا يتأمنلك زيك زي اخوك بالظبط ونا غلطانه اني خليتك تبقا جزء من حياتي يا مقرف
ياسر: رنا بطلي كلامك العبيط دا مفيش اي حاجه صح
زقت رنا ياسر واتكلمت بصوت عالي: لا صح وخليك معاها حلو متبقاش قافل مش حلو ليك وذوقك معفن يا بشمهندس
خرجت رنا من الشركة وياسر بص حواليه وشاف الموظفين بيبصوا عليهم خرج من الشركة ورا رنا
رنا كانت خرجت من الشركة وياسر خرج واول ما شافها فضل ينادي عليها: رنا.. رنا
رنا مرديتش عليه وكملت طريقها وياسر لحقها ومسك أيديها وشدها
رنا: وربنا لو مل بعدت عني لفرج الشركة كلها عليك
ياسر بعصبية: ما تبطلي جنان واهدي بلاش فضايح
رنا بصوت عالي: هي دي حقيقتك كل همك منظرك قدام الناس وبس
ياسر: رنا متستفزنيش انتي خلتيني اتعصب غصب عني وبعدين زي ما بيفرق معايا شكلي فارق معايا شكلك برضو انتي كدا بتقللي مننا احنا الاتنين
رنا: لا يا حبيبي مفيش حاجه اسمها غصب عنك انت
ما صدقت اني عملت كدا اصلا عشان الجو يحلو ليك
مع السنيورة
ياسر: متعصبنيش يا رنا انا علي اخري
رنا: علي نفسك ميهمنيش
ياسر: انا بحاول اهدي ونتي بكلامك المستفز دا هتخليني اضربك
رنا: ولا تقدر اصلا
ابتسم ياسر: مقدرش طبعا انتي حبيبتي
رنا: لا بقولك ايه كلام بينا تاني مش هيحصل
مشيت رنا وفضل ياسر واقف عينه عليها حط ايديه علي رأسها بتعب من جنان رنا وبعدين دخل الشركة
كانت ماشيه رنا في الشارع بتكلم نفسها: انا يحصل فيا الموقف دا الدنيا جر فيها ايه حته بت متسواش حاجه
في صنف النسوان تحرجني انا كدا لا مش مصدقه بجد
والله لخلي ليلك نهارك ونهارك ليلك يا ياسر الكلب عشان تخلي وحده مسهوكة زي دي تقربلك تاني
وقفت بعد ما خلصت كلامها وهي بدور بعيونها علي عربيه توصلها: وبعدين في اليوم اللي ما بينلوش وش.. علي جنب يسطاا
وقف الميكروباص وركبت رنا
~~~~~
في منزل قاسم الحديدي
في الصالون
قاعد قاسم وجنبه جلال بيتكلموا وعلي جنب تاني
قاعدين هدي وآمنة ونادية وامل ورنا ساكته تماما
بتقوم رنا وهدي بتبصلها: راحه فين
رنا: هشوف خديجة
آمنة: روحي يا حبيبتي
نادية: طيب ما تجبيها هنا واقعدوا معانا
رنا: لا يا عمتي هنقعد هناك
نادية: ماشي يا حبيبتي
خرجت رنا من الشقة ودخلت شقة عمها جلال اللي قصادهم وكان بابها مفتوح: خوخا فينك يابت
خديجة جيه صوتها من اوضتها: تعالي انا هنا
اتحركت رنا لاوضه خديجة ودخلت لقيتها نائمة علي السرير وماسكه الفون
رنا: مشغوله ولا ايه
اتعدلت خديجة: لا تعالي اقعدي
قعدت رنا جنب خديجة علي السرير: نايمه بدري النهاردة
خديجة: رجعت من الشغل هلكانة قولت اريح شوية مش قادره اعمل حاجه
رنا: ربنا يعينك يا حبيبي
خديجة: يارب يا رينو.. في ايه مالك
رنا: مفيش انا تمام
خديجة: مالك يا رنا انا حاسه انك معيطة
نزلت دموع رنا: لا عياط ايه اللي بتكلمي عنه انا كويسه
ضحكت خديجة: ونبي انتي مصدقة نفسك يعني بتعيطي وتقولي كويسه احكيلي فضفضيلي عشان ترتاحي
رنا: ياسر خاني
خديجة: انتي متاكده من اللي بتقوليه دا
رنا: بقولك خاني هو ايه اللي متاكده
خديجة: انا مش مصدقه بصراحه
زادت دموع رنا: لا صدقي انا بقولك بنفسي أنه خاني مع وحده معفنه زيه
حضنتها خديجة وطبطبت علي ضهرها: طيب متعيطيش هو ما يستهلش الدموع دي تنزل عليه
رنا: انا مش عايزة اعرفه تاني يا خديجة انا بكره من قلبي
خديجة: كل اللي عايزة هيحصل
~~~~~
قدام ورشة الحديدي
قاعد حسن علي الكرسي وعيونه علي الشغل وبيقرب عليه خالد: ازيك يا حسن
حسن: ايه حسن دي قولي ازيك يا عمي
ضحك خالد: حاضر يا عمي
ابتسم حسن وشد كرسي جنبه: اقعد
قعد خالد علي الكرسي وسكت
حسن: انت جاي تقعد جنبي عشان تسكت يا خالد
معاك مشكلة في الشغل
خالد: لا مفيش اي مشكلة
حسن: طيب كويس
خالد: حسن هو لو في شاب بيحب بنت بس مش شايف منها أي اهتمام يعمل ايه
حسن: مين الشاب دا
خالد: واحد صاحبي
حسن: هو يتكلم معاها ويصارحها بمشاعره
خالد: اكيد مش هينفع طيب لو هي كانت مش بتحبه هو هيبقا شكله ازاي
حسن بخبث: وهي مين اللي متحبش ابن جلال الحديدي
اتوتر خالد: ابن جلال الحديدي ايه يا حسن بقولك واحد صاحبي
حسن: والله طيب يبقا سلملي علي صاحبك
خالد: حاضر هسلملك عليه
حسن: سلملي عليه اوي وبوسهولي
خالد: حاضر يا حسن انا هطلع اغير هدومي
حسن: ماشي
قام خالد ودخل العمارة وابتسم حسن عليه
~~~~~
في شقة نيللي في البلكونة
قاعده سيليا باصه علي الشارع سرحانه مع غروب الشمس
ونيللي جنبها بتتكلم: استنيتك كتير تيجي تشوفي شكل الديكورات اللي اختارتها ما جيتيش كان نفسي اوي تشوفيهم يجننوا زي ما كنت عايزهم بالظبط سولي سيليا
بصتلها سيليا: اسفه يا نيللي سرحت شويه
نيللي: سرحتي في ايه عمار
سيليا: ما تفكرينيش بيه دا انسان غريب بعد ما روحتله وبدأت اتقرب منه يقولي امشي دا بدأ يشككني في قدراتي انا طول عمري اي حد يتمني ابصله بص وهو كل ما يشوفني عايز بس
امشي من قدامه
نيللي: الله مش انتي اللي مصممه عليه استحملي
سيليا: ومش هسيبه غير لما اتاكد انه ميقدرش يعيش من غيري
نيللي: هنشوف الكلام دا
سيليا: بس هو محتاج وقت يمكن بيكابر ليه لا اللي زيه ميعرفوش يعني إيه حب فاتلاقيه مش عارف يحدد مشاعره
نيللي: لحقتي تحللي شخصية بالسرعة دي
سيليا بغرور: طبعا
نيللي: حلوة طبعا الواثقة دي
ضحكت سيليا ونيللي
~~~~~
في منزل نصار العطار
قاعدة دنيا في اوضتها علي سجادة الصلاة بتدعي بعد ما خلصت صلاة المغرب ودموعها بتنزل غصب عنها وبتكلم بصوت هامس: يارب أهديه واصلح حاله ووجه لطريقك الصح وابعد عنه اي شر
بتملس ايديها علي وشها وبتمسح دموعها وبتقوم تقعد علي سريرها
برا الأوضة بيرن جرس باب الشقة وبتطلع شمس من اوضتها:
هو انا اللي لازم افتح الباب دا
فتحت الباب وكان ياسر اول ما شافته ابتسمت: ياسر اتفضل
ياسر: ازيك يا شمس
شمس: انا الحمدلله
ياسر: دنيا فين
شمس: في اوضتها تحب اناديهالك
ياسر: ياريت عاوز اطمن عليها
شمس: حاضر اتفضل اقعد
هز ياسر رأسه وقعد علي الركنة ودخلت شمس اوضه دنيا
شمس: ياسر برا عاوز يشوفك
بصتلها دنيا وسكتت
شمس: لا اخلصي هو مش هيفضل مستنيكي
دنيا: اطلعي وجايه وراكي
شمس: ماشي ياختي
خرجت شمس من الأوضة وقعدت مع ياسر: منور يا ياسر
ياسر: تسلمي
شمس: اخبار الشغل معاك ايه
ياسر: الحمدلله
شمس: هو في الشركة معاكم بنات
استغرب ياسر سوالها ورد عليها: اكيد
اديقت شمس: يعني بتشوفهم هما حلوين
ياسر: في ايه يا شمس بتسالي اساله غريبة ليه
شمس: ايه الغريب في اسالتي
ياسر: مش عارف والله
خرجت دنيا من اوضتها: مساء الخير
وقف ياسر وسلم عليها: مساء الخير عامله ايه يا دنيا
دنيا: الحمدلله
قعدت دنيا وبصيت لشمس: قومي اعملي شاي لياسر
يا شمس
شمس: طيب
قامت شمس دخلت المطبخ
ياسر: دنيا
بصتله دنيا وهي ساكته
ياسر: انتي بجد كويسة
دنيا: متقلقش يا ياسر انا كويسه
ياسر: طيب انا همشي هرجع اطمن عليكي تاني
دنيا: ماشي
ياسر: خلي بالك من نفسك
هزت دنيا راسها وقام ياسر فتح باب الشقة وخرج وقفل الباب ورا
طلعت شمس من المطبخ علي صوت الباب: هو مشي طيب والشاي اللي بعمله دا اعمل فيه ايه
دنيا: اشربيه
دخلت دنيا اوضتها بصتلها شمس بضيق
~~~~~
نايم عمار علي السرير وعيونه مفتوحة بيفكر في سيليا
وكلامها لي النهاردة غمض عيونه بتعب
والفون رن ابتسم تلقائيا بدون ما يحس وكأنه كان مستني
رنه الفون دي سحب الفون من جنبه وبص عليه ابتسامتة
اختفيت ورد: عامله ايه يا امي
هدي: الحمدلله يا حبيبي طمني عنك انت كويس
عمار: انا كويس يا حبيبتي
هدي: اكلت كويس
عمار: اها اكلت
هدي: مرتاح عندك في نومك
عمار: هو انا اول مره اجي هنا يا ماما ما انا موجود في
الشقة اللي اشتريتها في العمارة اللي جنب الورشة
عشان ابقا قريب منها
هدي: كل الحماية بطمن عليك يا عمار
عمار: عارف والله يا حبيبتي وعشان كدا انا بقولك اطمني
هدي: ماشي ترجعلنا بالف سلامه
عمار: الله يسلمك يغالية
هدي: تصبح على خير
عمار: ونتي من أهل الخير
قفل عمار الفون وحطه جنبه ورجع يفكر في سيليا
ويفتكر شكلها وهي قريبه منه ويبتسم
~~~
يوم جديد الساعه 7 صباحا
طول الليل عمار معرفش ينام من تفكيره وفضل صاحي لحد الصبح واول ما الصبح طلع نزل من الشقة
خرج عمار من العمارة وكان لابس سويت شيرت باللون الرمادي وبنطلون رياضي اسود
وقف قدام الورشة وكان بيبص عليها وفجاه سمع صوت ركن
عربية بص وراه وشاف سيليا بتنزل من العربية وبتشد في
خطواتها تجاه
عمار: انتي بتعملي ايه هنا
سيليا كانت بصاله في عيونه بتركيز: في حاجه مهمه لازم اقولها ليك مش هينفع اسكت
عمار: حاجه ايه اللي تخليكي تيجي وش الصبح كدا
سيليا: انا معرفتش انام بسببك مسيطر علي تفكيري
عمار بيبصلها وفضل ساكت
سيليا: عمار انا بحبك...