رواية النغم الحزين بقلم فاطيما يوسف
رواية النغم الحزين الفصل الثاني والاربعون42 بقلم فاطيما يوسف
رجع من شغله ما كانش شافها بقاله أسبوع في حوارات التحقيق مع "كرم" ونقل "نورا" لبيتها وتظبيط أمورها،
أول ما دخل كانت بتحاول تنيم "نوح" ، الاتنين نظراتهم اتقابلت بمعاني مختلفة، نظرات مليانة عتاب على شجن على لهفة على اشتياق،
كانت ملامحها وحشاه لدرجة انه نفسه يرتمي في أحضانها ويتنعم بقربها ويتشبع ملامحها ، ويشم أنفاسها اللي وحشته،
بصت له بنظرة عتاب ورحبت بيه بنبرة حزينة وهي من جواها الود ودها تقوم ترتمي في أحضانه:
ـ حمد لله على السلامة، عودا حميدا.
كانت قاصدة انها تضغط على كلمتها الأخيرة وكملت وهي بتسأله بنفس الجمود:
ـ تحب أجهز لك العشا؟
خلع الملحفة بتاعته اللي بيلبسها فوق جلابيته ورماها على الكنبة وقعد جنبها وحط وشه بين ايديه وقال لها:
ـ لساتك مركبة الوش الخشب وعاملة حالك زعلانة يا ست "نغم" هانم مع إن حضرتك اللي غلطانة وقلت أريحك من طلتي علشان تهدي ولكن حضرتك بوتجاز خمسة شعلة مهتنطفيش بسهولة.
برقت عيونها بصدمة من كلامه الجامد ليها ورفعت حاجبها بغيظ:
ـ شكراً يا ملاك الرحمة، ياللي مهتغلطش خالص وأني اللي منكدة على جنابك طول الوقت.
التفت لها بنظرات قوية ورد بسخرية:
ـ خلي بالك إنتي بقى لسانك طويل، ما هو اني مربكيش على انك تُبقى قوية ويوم ما تستخدمي قوتك تستخدميها على "سند" الناجي.
وقرب منها لحد ما بقى ملتصق بيها ورفع وشها بسبابته وهو بيكمل كلامه بنفس النبرة:
ـ مش على بابا يا حبيبي، اظبطي لسانك المعووج دي وياي يا إما إنتي حرة بقى ومترجعيش تزعلى مني .
ضمت شفايفها بغيظ من كلامه واتحدته وهي بتشيل ايديه اللي ماسكة وشها بتملك رهيب وقالت له اللي خلاه اتجنن وشال منها نوح وحطه على سريره، وشدها من ايديها :
ـ طب بعد يدك داي متلمسنيش طول ما احنا متخاصمين تلتزم الخصام بيناتنا لحد ما نوصل لحل وتراضيني.
بص لها "سند" بنظرة طويلة مليانة تحدي وخبث، وابتسم ابتسامة جانبية خلت عروق رقبته تظهر من كتر ما كان كاتم ضحكته على شقاوتها وعنادها اللي مش بينتهي:
ـ أراضيكي؟! يا سلام! هو اللي بيراضى يا ست "نغم" مش هيكون هو اللي غلطان في حق التاني؟ طب دي على جثتي لو حُصلت! إنتي فاكرة كلمتين العند دول هيمشوا عليّ ولا هيخلوني ألف حوالين نفسي؟ لو تفتكري يا هانم إنك إنتي اللي عليتي صوتك وغلطتي في حق جوزك، في عز ما أني محتاج هدوئك وياي .
رجعت "نغم" لورا خطوتين وعيونها بتلمع بجرأة وتحدي ما يقلش عن غروره، وكتفت إيديها قدام صدرها وهي رافعة راسها لفوق بتبص له بندية:
ـ أمال تحسبها كيف يا "سند"؟ تعلي صوتك علي وتغيب عني أني وولدك أسبوع كامل، وتاجي بعد دي كلاته رايدني أفتح لك دراعاتي بالأحضان؟! انت معدتش تحبني ولا عدت طايقني، ماهو فيه دم وروح جَديدة دخلت حياتنا آمال إيه، طلتها هتبهر جنابك ومخلياك مهتم بجنابها على الآخر .
ضحك "سند" ضحكة رجولية على غيرتها وهو مديها ضهره علشان متشفهوش، ضحكة مليانة ثقة وتوعد، واتقدم ناحيتها بخطوات بطيئة وثابتة كأنه أسد بيحاصر فريسته وهي بتكابر:
ـ يادي السيرة الغم اللي مهتتقفلش واصل، إنتي المفروض كبرتي وبقيتي أم لتلت أطفال والمفروض يكون عقلك هيكبر معاكي وتعرِفي توزني الأمور كيف.
وكمل وهو بيحاول يستفز غيرتها أكتر وهو عاجبه جداً طريقتها وغيرتها الطفولية:
ـ هي كل واحدة ربنا خالقها جميلة هتعامل وياها بمنطقك إنتي، نفسي أعرِف ايه اللي حُصل يستدعي غيرتك الغير مبررة داي كلاتها؟
حاولت تبان ثابتة ومش مهتمة بكلامه في بدايته، بس قرب تدريجي وخفقان قلبها خانوها، فقالت بصوت مرتبك وهي بتزقه بخفة من صدره وجواها نار قايدة من وصفه ليها وثباتها المزعوم اتهز في نفس اللحظة:
ـ وانت عرفت منين إنها جَميلة هو حضرتك كنت هتركز في تفاصيلها وملامحها يا "سند"!
قول بقى إني من ساعة ما خلفت وأني اوحشيت في نظرك ورايد تجدد شبابك ، معلوم ما هي على قولك فعلا جميلة وزينة وتقول للقمر قوم وهي تُبقى مكانه، مش دي اللي انت رايد توصله لي علشان تحـ.ــرق دمي ؟
وبقت لازقالي هي وقضية أخوها والموضوع بقى رايح جاي وليلة كبيرة قوي.
اتغيرت ملامح "سند" شوية للجدية، ونزل بعيونه عليها بحنان ظاهر رغم حدة الموقف، مسك كف إيدها اللي كانت بتزقه، وشدها له بهدوء رغم محاولاتها الضعيفة للرفض:
ـ "كرم" انتهى أمره وما عادش له عتب ناحيتنا خالص، وشلت من قدامه أي طريق للوصول لينا مرة تانية، و"نورا" بقى ليها بيتها واتحطت في مكانها الصُح عشان نقفل البيبان المفتوحة داي كلاتها وخلاص مليش مرواح عندها ، أني مجرد فاعل خير وياها هعمله لله علشان يترد لي في عيالي.
وكمل وهو بيشاغبها :
ـ مفيش قدامي دلوك غير هم واحد قاعد قبالي وهيعاندني وعايز يقل هناي، شكل ما تكوني متوصية عليا بالنكد.
بصت له بنظرة عتاب نارية وهي بتسحب إيدها بغيظ وما زالت غيرتها مسيطرة عليها:
ـ أني دلوك بقيت هم يا "سند"!
وكملت وهي بتربع ايديها حوالين صدرها وبتهز رجليها في الأرض زي العيال الصغيرين وبتتحداه بكلامها علشان تغيظه:
ـ الله يرحم لما كنت هتلف وراي من الأوضة داي للأوضة داي علشان بس أرضى عنك وتلمس يدي بس، خلاص شكلك شبعت وزهقت وعايز تجدد الصنف أمال ايه، ما انت جوز الاتنين ومش بَعيد تجيب لينا التالتة، معلوم ما إنت قادر وتعملها.
اتنفس بضيق وزهق عليها وهو بيعلي صوته:
ـ إنتي عايزة ايه إنتي دلوك في أم الليلة اللي مفيتاش داي، اُنطقي علشان جبت أخري منك، أها علشان أبقى قادر كيف ما هتقولي؟!
جريت من قدامه بخوف وهو بيزعق لها وهي بتستخبي منه ورا الكنبة، من جواه لما شاف حركتها كان عايز يضحك على طريقتها الطفوليه وضـ.ــرب كف على كف وهو بيردد باستغراب:
ـ يمين بالله أني متجوَز عيلة كانها لسه في ابتدائي، إنتي ايه يا حبيبتي الشعلة اللي جواكي ومخلياكي قايدة نـ.ــار مهتنطفيش إلا لما نختم الليلة داي بغم ولا ايه بالظبط؟
وكمل وهو بيقرب منها وكل لما يحاول يقرب هي تبعد وبتنكمش على نفسها فسالها تاني باستغراب:
ـ هو انتي مالك اكده خايفة هو انتي مفكره اني همد يدي عليكي! من ميته حُصل الكلام دي؟!
اعقلي يا "نغم" وخلي الليله تعدي على خير وهاتي من الآخر عايزه ايه علشان البوتاجاز اللي جواكي دي يهدى؟
جاوبته بتحدي وعناد وهي شايفه نفسها أهم حاجة عنده وما ينفعش يهتم بأي ست غيرها:
ـ مالكش صالح باللي اسمها "نورا" داي خالص من النهاردة، انت خلاص عِملت اللي عليك ولا تروح تزورها ولا تتابع حالتها ولا ليك علاقة بيها نهائي، رايد تطمَن عليها تبعتني أني أو أم "مازن" غير اكده ما لكش صالح بيها نهائي ها.
رفع حاجبه بسخرية وهو بيحاول يقرب منها بهدوء:
ـ عال والله وبقيتي تدي أوامر كمان!
آمال ايه، طب وجناب الأميرة تؤمر بايه تاني علشان ننول الرضا يا ست "نغم" هانم ؟
بصت له بتحدي وهي بتربع ايديها على صدرها واصطنعت الطيبة:
ـ أني مليش أوامر الأمر لله وحده، بلاش تتريق علي .
وكملت بتبرير وهي بتصطنع الطيبة:
ـ أني بطلب حقي فيك، مليكش صالح بأي ست غيري، ولا تطيب خاطر اي ست غيري، انت جوزي ومن حقي عليك إن مشاعرك تكون ملكي ومهقبلش لواحدة تاخدك مني واصل، ومههداش الا لما تبعد عن "نورا" داي.
في لحظة قرب منها وشدها لحضنه وارتطمت بعظام صدره بعد ما كانت بتهرب بعيد عنه
ومسك دقنها بأصابعه برقة، ورفع وشها خلاها غصب عنها تبص في عيونه اللي كانت بتلمع بشوق جارف وصدق يهد أي زعل:
ـ طيب هو انتي لساتك هتحتاجي إثباتات إني ليكي لوحدك يا طماعة، إنتي النهاردة ورتيني وشك المجنون طلعتي مش سهلة واصل.
حركت سبابتها على صدره وهي بترد بدلال:
ـ وماله لما أطمع في جوزي وأحافظ عليه، كل حاجة وأي مشاعر مني ليك مباحة ومن حقي يا "سند"، حقي ولا مش حقي؟
شاغبها باللي جننها:
ـ أني راجل حر وأعمل اللي على كيفي .
حست بغصة في حلقها من صدق كلامه، وكل دفاعاتها اتبخرت في ثواني، بس كبرياءها كان لسه بيشدها للمكابرة، فمطت شفايفها بدلال وقالت له بتملك:
ـ لااااه يا حبيبي انت حر في كل حاجة إلا قلبك مش ملكك بتاعي لوحدي ، وعلى فكرة بقى أني لسه زعلانة.. ومش هقبل اعتذار كلام وبس، أني عايزة فعل، وريني هتعمل إيه عشان تُبقى تنسيني الأسبوع اللي فات دي كلاته وانت بَعيد عني .
قرب وشه من أذنها لحد ما بقت أنفاسه الساخنة بتداعب رقبتها، وهمس بصوت مبحوح ودايب في عشقها :
ـ طلعتي خَطر وخطرك واعر وخابرة كيف تعلي على مشاعري، يا زين ما ربيت يا "سند" يا ناجي .
برقت عيونها بخجل وقالت وهي بتضـ.ــربه على صدره بخفة:
ـ قول لنفسك بقى اني رباية يدك، واعمل حسابك إني مش طيبة ولا هبلة وانت مليكش صالح بأي ست مهما كانت .
رفع حاجبه باستمتاع وقال لها :
ـ طيبة ايه بقى دي كان زمان .
وكمل وهو بيلاوعها بعبث وهو من جواه عايز يجننها أكتر :
ـ بس أعمل ايه في قلبي الضعيف مهيتحملش يشوف ست في لحظة ضعف أو وجع ومرضيش ضميري، القلب الطيب دايما هيودي صاحبه في داهية، واها طيبتي خلتك فهمتيني غلط .
ضـ.ــربته في صدره وهي بتدب رجليها في الأرض وردت بغيظ:
ـ انت مستفز قوي على فكرة وانت قاصد تجنني، انت ايه الجبروت اللي حداك دي يا "سند"؟! والله إنك رخم .
شدها لحضنه بقوة وهو بيضحك ضحكة عالية رملت جدران الأوضة، وقال وهو بيمسح على شعرها بحنان واعترف لها بحبه:
ـ ماهو إنتي لازمن تتوكدي إن قلبي مليان بعشقك إنتي وتبطلي جنانك دي يا روحي .
ما قدرش "سند" يستحمل طريقتها ولا عصبيتها اللي زايدة عن حدها، وطلع من جواه ضحكة عالية رجت أركان الأوضة، وهو شايفها واقفة قدامه مربعة إيديها وبتهز رجلها بغيظ وعيونها مليانة شرار الغيرة، مد إيده بسرعة قبل ما تحاول تبعد، وشدها من خصرها بحركة سريعة ومباغتة، لقاها ارتمت فجأة على صدره وكأنها كانت مستنية اللحظة دي بس بتكابر، اتنفضت في حضنه وحاولت تبعده عنها بكل قوة وهي بتتحرك بعشوائية:
ـ بعد عني يا "سند" قلت لك مليكش صالح بيا بقي ! إنت قلبك جامد وما بتفتكرش غير إنك تمسك على عِندي ، سيبني بقول لك!
حاصرها بين دراعه القوي وصدره العريض، وثبتها مكانها طفلة عنيدة بتتمرد، ونزل بوشه لحد ما بقت أنفاسه الساخنة بتداعب خدها المشتعل، وقال بصوت مبحوح ودايب في عشقها، صوت فيه نبرة تملّك تخلي قلبها يدق بعـ.ــنف:
ـ أسيبك فين بس يا مجنونة إنتي؟ دي أني لسه بقول يا هادي من بعاد أسبوع كامل، تاجي إنتي تاني تتطيري لي برج من دماغي بغيرتك اللي هتجنن عقلي داي؟ بقى غيرانة من "نورا" يا "نغم"؟! للدرجة داي ممصدقاش إن قلب "سند" الناجي مقفول بالمفتاح عليكي إنت وبس؟
رفعت عيونها ليه بعتاب وهي حاسة بدموع الغيرة بتجمع في رموشها، بس كبرياءها منعها تنزلهم، وقالت بصوت متهدج:
ـ أمال عايزني أعمل إيه يعني وأنت رايح جاي عليها وبتهتم بأمورها وكأنها تخصك أو انت ولي أمرها؟ ما تفكرش إني قليلة الأصل عشان أزعل من واحدة مكسورة، بس غيرتي عليك غصب عني هتاكل في روحي، ومش هقبل تكون لغيري حتى لو في البِر وفاعل خير كيف ما هتقول .
دوبته من كلامها ونعومتها، وحس إن غيرتها دي هي أكبر دليل على إنها بتموت فيه زي ما هو بيموت في بعادها، رقق نبرة صوته وبقى يمسح على شعرها بحنان طاغٍ، ويهمس جنب أذنها كأنه بيقرأ تعويذة تهدي ثورتها:
ـ يا قلب "سند" وعقله وكل دنيته... اسمعي مني وافتحي مخك دي زين "نورا" داي مرت أخوي حتى لو على الورق وقدام الناس مينفعش أرميها وتبقى صورتنا وحشة قدام الخلق ، وهي مشيت خلاص ومهتعتبش البيت اهنه تاني لأنها بقت مستقرة خلاص، وعشان أريحك أكتر وأقفل باب الوسواس دي خالص، أي حاجة تخصها بعد اكده هبعت حد من الغفر يخلصها، ولا كأني أعرفها من أساسه ،مرتاح اكده قلبك يا ست "نغم" ولا أجيب لك صك إدانة لنفسي كمان وأكتب لك تعهد؟
بصت له بنظرة تفحصه وهي بتحاول تستوعب كلامه، وحست إن نبرة الصدق اللي في صوته هدت النـ.ــار اللي كانت قايدة في صدرها، بس برضه حبت تتقل عليه شوية كمان:
ـ يعني خلاص؟ مفيش مرواح هناك تاني ولا كلام عنها قدامي؟
ابتسم "سند" ابتسامة جانبية واسعة، وغمز لها بشقاوة تليق براجل بيعرف إزاي يروّض مراته:
ـ ولا حتى هجيب سيرتها على لساني تاني، اعتبريها مشكلة وخلصت خلاص.
وكمل بمكر وهو بيداعب خدودها بطريقة جننتها:
ـ بس في المقابل بقى هتعملي إيه في الجريمة اللي عِملتيها فيا الأسبوع اللي فات كله، وإزاي هتعوضي "سند" الغلبان اللي كان نايم بعيد عن حبيبه ملاقيش حضن يلمه؟
رفعت حاجبها بدلال عابس، وردت عليه وهي بتلعب بأزرار جلابيته:
ـ أعوضك كيف يعني؟ إنت اللي مشيت وسيبتني لوحدي في وسط زعلي، يُبقى إنت اللي تدور على طريقة تراضي بيها مرتك يا روحي.
ضحك ضحكة رجولية عميقة، وشدد على حضنها لحد ما التصقت فيه تماماً، وقال وهو بيطبع بوسة رقيقة على جبهتها:
ـ أممم.. أدور على طريقة أراضيكي بيها؟! دي أني عندي ليكي طُرق ياما، بس شكلنا اكده هنقعد للصبح نتفق على شروط الصلح، و"نوح" ممكن يصحي في أي لحظة يخرب علينا السهرة.
بصت لـ"نوح" النايم بعمق على السرير، ورجعت بصت له وهي بتتنفس بعمق، وحست إن كل التعب والهموم اللي عاشتها في غيابه طاروا في الهوا بمجرد ما دخلت حضنه واستقررت راسها على صدره، رفعت عيونها ليه وقالت بصوت هادي ودايب وهي بتغمز له بدلالها اللي بيجننه:
ـ ما يخربش ولا حاجة ياروحي، سيبه نايم في أمان الله، وخلينا فينا إحنا... إنت وحشتني قوي يا "سند"، بجد وحشتني.
كلماتها نزلت على قلبه زي المطر البارد اللي طفى آخر شعلة تعب كانت جواه، ما استناش ثانية واحدة، قرب منها بقبلاته المشتاقة اللي امتزجت فيها كل مشاعر الشوق واللهفة وقسوة البعد، وقفلت بينهم كل أبواب الخصام والزعل، وسابوا الدنيا بحالها بره بابهم، عشان تبدأ ليلتهم الحقيقية على ريحة العشق الصافي.
******
كان يا دوب لسه واصل من السفر وقابلته بالأحضان كعادتها في الوقت ده كانت بطنها بدأت تظهر وأول ما دخل رمى شنطته وجري عليها واخدها في حضنه ورفعها من الأرض وهو بيدور بيها فحذرته:
ـ لااااه اهدى يا "يونس" إنت ناسي إن في نونو في بطني.
نزلها "يونس" بالراحة ودفن ايده بين شعرها وسند جبهته بجبهتها وهو بيقول لها:
ـ وحشتيني قوي، خلاص ما بقتش قادر استغنى عنك وما بقتش عارف اركز في الشغل بسببك؛ وبعدين معاكي يا مهرتي؟
ابتسمت له ابتسامتها الساحرة وجاوبته وهي بتحسس على بطنها برفق :
ـ انت بقى ى مش بقيت توحشني قوي حبه صغننين علشان معاي ونس منك، اللهم بارك ولادك الاتنين قايمين بالواجب وزيادة معاي، ومش اكده بس دول كمان مخليين شكلي بدأ يوحش؛ حاسه إن مناخيري كبرت شويه، وجسمي زاد شويتين علشان اكده من الأفضل إنك ما تشوفنيش لحد ما أولد عشان هبقى وحشة خالص.
قطب جبينه بعبث وبعد عنها وهو بيمسك ايديها وبيلففها حوالين نفسها زي الأميرة وأكد لها وهو بيتشبع النظر لملامحها بعيون شايفاها أجمل وأرق ست في الكون:
ـ مين قال الكلام ده! والله أجمل "مهرة" وارق "مهرة"، وأصلا أحسن حاجة الواحد يتصبح بيها كل يوم هو وشك.
وكمل وهو بيغمز لها بشقاوة وبيبص على تفاصيل جسمها اللي امتلى شوية :
ـ التجدد مطلوب بردو، وبصراحة الجسم الكيرفي لايق عليكي جداً يا مهرتي وكمان في اكتشافات جديدة، أنا بحب كل ما هو جديد.
وفجأة عيونه برقت وهو بيبص على رقبتها وقرب منها وهو بيشيل شعرها وبيسألها:
ـ ايه ده اتطورنا خالص وبقينا نرسم تاتو في أماكن مغرية يا مهرتي.
وكمل بنفس شقاوته وهو بيتمعن النظر برغبة لكل تفاصيلها:
ـ لاااااا انا لازم أعمل لحضرتك كشف هيئه علشان أكيد ما خفي كان أعظم، وأنا راجل ظابط مخابراتي ما ينفعش حاجة تعدي من تحت ايدي غير لما اكتشفها، بس بصراحة الاكتشاف النهارده عظيم.
ضحكت بخجل وهي بتضـ.ــربه على صدره بهدوء:
ـ "يونس"! انت بجد كلامك بيكسفني، بطل بقى؛ على فكرة أني آخر ست فكرت ترسم التاتو دي، وطبعا تحت إشراف "مريم" أختك اللي فضلت وراي لحد ما عملته .
غمز لها بمكر وشاغبها:
ـ بتتكسفي ازاي يا بطل انتي! آمال التوأم اللي في بطنك دول محلهم إيه من الإعراب، ده تعبي وشقايا مع بعض الشقاء منك .
وكمل وهو بيبتسم بإعجاب لفكرة التاتو:
ـ البت "مريم" دي حبيبة أخوها أصلا، عارفة إن أخوها مش شوية وبيحب الدلال والدلع فعملت معاكي الصح، ابقي فكريني أكلمها كمان شوية أشكرها علشان مش فاضي لها دلوقتي.
شهقت "مهرة" باعتراض على كلامه وهي بتقلده بسخرية:
ـ بعض الشقاء منك!! دي ايه الكرم بتاع سيادتك دي كلاته يا سيادة الرائد؟! على فكرة الشقاء ليا أني اللي حامل في ولادك التوأم وتاعبيني جدا؛ وفي الآخر تقول لي تعبك وشقاك! طب نعقلها كيف داي اذا كنت اني اللي بتعب وبتحمل ألم الحمل وكل الشقاء هيُبقى عليا اني؟!
فضل يقرب منها وهي تبعد لحد ما بقت الحيطه وراها وصدرها قدامه فحاصرها بين الحيطه وصدره وهو بيكمل مشاغبته ليها بنفس العبث:
ـ هو انتي هتبقي زي القطط بتاكلي وتنكري! انتي مفكرة إن الحمل ده يجي حاجة جنب شقاء وعناء المجهود الجبار اللي أنا عملته علشان تكوني حامل في توام؟
أهو أنتم الستات كده دايما مفكرين نفسكم انتم اللي بتتعبوا واحنا ما علينا غير اننا بننبسط.
وفضل يشاغبها بكلامه وفي طريقته وبأفعاله اللي دايما بتخليها مبسوطة، وهو كمان الاتنين في وقت بعدهم عن بعض بتبقى حياتهم ملهاش طعم، وسحبها لحضنه وهو بيتنعم بقربها وريحتها وبيتنفس ويتشبع من ملامحها الجميلة، ودخلها عالمه الخاص اللي مفيهوش غير "مهرة" و"يونس" .
تاني يوم الصبح كانت بتجهز شنطهم وهي بتنادي عليه كان في الحمام بياخد شاور:
ـ يالا يا "يونس" علشان "شيماء" اكده هتزعل مني معايزاش أتأخر عليها ورانا حاجات كَتير لتجهيز الخطوبة ولسه قدامنا سفر .
في العربية وهما مسافرين لقنا علشان خطوبة "شيماء" و"علي" ، طلع "يونس" تليفونه وهو سايق وثبته على الرينح لايت قدامه وحط السماعة في ودانه واتصل فيديو كول على "مريم" أخته اللي أول ما ردت عاتبته بمشاغبة:
ـ اه من لقى أحبابه نسي أصحابه ياسي "يونس" ياللي رجعت ومفكرتش تسأل على أمك وأختك اليتيمة .
ضحك على أخته وبص على "مهرة" اللي قاعدة جنبه مبتسمة وبتحب حوارهم مع بعض جداً وغمز لها وهو بيرد على أخته بخفته المعتادة:
ـ أعمل ايه يعني يا مريوم أخوكي غلبان وضعيف قدام عيونها، بتنسيني حتى نفسي، معلش بقى يا روحي، وبعدين يتيمة ايه ياماما ده إنتي رهيبة ملكيش كتالوج وتسدي قصاد هولاكو نفسه.
ضحكوا كلهم على كلام "يونس" و"مريم" قالت له من بين ضحكاتها:
ـ تصدق خسارة فيك الواجب اللي عملته معاك، وحتى مشكرتنيش على أفكاري وابداعاتي علشان جنابك ينبسط وينبهر .
غمز لها بشقارة:
ـ أها يابت يا "مريم" أخوكي انبهر انبهار منبهرهوش حد في حياته، إنتي دماغك ألماظ تتلف في حرير فعلاً بنت عقيد رحمة الله عليه وأخت رائد مخابراتي محنك، ابقى فنني كل مرة علشان تبسطي أخوكي الغلبان الفقير الى الله.
رفعت "مريم" شفايفها باستنكار وقالت له:
ـ هو ماله دايما شكرك على إبداعاتي ناشف كدة يا حبيب أختك؟!
إنت أخ جاحد يا "يونس" وناكر للجميل ولو معملتش الصح معايا مش هتشوف حاجة من إبداعاتي تاني .
ضحك بصوت عالي على كلامها ورد عليها بهزاره المعتاد:
ـ خلاص متزعليش نفسك يا مريوم لما نرجع من السفر ابقى فكريني أجيب لك صندل بيزمر ومصاصة ولا تزعلي نفسك .
كلهم انفطروا من الضحك على كلام "يونس" وفضلت مكالمتهم على نفس الهزار طول الطريق في الجو من الألفة والسعادة وده لأن "يونس" دمه خفيف وبيحب الهزار والضحك و"مهرة" كانت محتاجه واحد زي "يونس" في حياتها دايما يرسم الابتسامة على وشها،
*******
خدتني للحب في غمضة عين.. وريتني حلاوة الأيام فين ، الليل بعد ما كان غربة.. مليته أمان والعمر اللي كان صحرا.. صبح بستان ،يا حبيبي.. يلا نعيش في عيون الليل
كانت مشغلة الأغنية دي وبتدندن معاها وهي حاضنة ابنها وبتتمشى بيه وبتحضنه بحنان ونظراتها ليه كأنها شايفة صورة أبوه قدامها،
كان واقف ساند على الباب ومربع ايديه حوالين صدره وشايف رقتها وجمالها وهدوئها ولوهلة حس بالغيرة وفجأة فصل سرحانها وهو بيسألها بنبرة صوت ملهوفة وعيون بتتشبع بملامحها الرقيقة وقلب بينبض من جواه ومش متحمل نعومتها:
ـ طب لما دي كلاته لـ"نوح" أبو "نوح" يُبقى نصيبه ايه يا "نغم" هانم...
شهقت بخضة وهي بتلتفت وبتبص لقيته وراها ومد ايده أخد منها "نوح" كان واحشه جداً وفضل يداعبه ويلاعبه وقربت منه وهي بتشيل ايد "نوح" من بقه وهمست له بنعومة:
ـ ماهو "نوح" يتحب قوي علشان منك يا "سند"، هو خاطـ.ــف قلبي كيف ما أبوه خـ.ــطف قلبي وعقلي .
ابتسم لها "سند" وهو بيبص لـ"نوح" ابنهم وبيوجه كلامه ليه:
ـ شايف يا "نوح" أمك هتعاكس أبوك على حسك، يكون في معلومك أمك طلعت من برة شئ ومن جوة شئ تاني خالص.
ربعت ايديها حوالين صدرها وهي بترد عليه بنفس طريقته الماكرة:
ـ علشان تكون خابر يا "نوح" ويُبقى عندك علم بالمستقبل مع مرتك اني سمعت الشيخ هيقول إن مش عيب الست تغازل جوزها وتصارحه بمشاعرها علشان ما يُبقاش ليه عين يبص لبرة وأني هحب أسمع كلام الشيوخ علشان أحافظ على جوزي علشان لو بعد اكده فكر يبص لبرة يا ويله من كيد النسا.
وكملت وهي بتقرب منه وبتتمسك بلياقة جلابيته بإيديها الاتنين وهمست له بدلال ونعومة دايما بيخلوها تنتصر عليه :
ـ يعني أعاكس براحتي يا "نوح" دي حقي وكل حقي كمان.
باسه "سند" من راسه وقبل باطن ايديه بشغف وداعب خدوده بحنان ورفع عينه بنص ابتسامة ليها والنص التاني لـ"نوح" :
ـ خابر زين يا "نوح" هتاخد دروس تتاقل بالدهب على يد البروفيسورة "نغم" هانم أمك، حطها حلقة في ودنك انت مش كد مكر وكيد الحريم يا ولدي .
حسست "نغم" على شعر "نوح" الأسود الناعم وردت عليه:
ـ أشطر شطور يا "سند" هتسمع الكلام زين بدأت أطمن اني مسيطرة.
رفع حاجبه باستمتاع لطريقة الحوار بينهم واستفزها بكلامه علشان يثير غيرتها:
ـ بمزاجي يا قلب "سند"، سايبك تفرحي انك مسيطرة؛ هو أني هعمل عقلي بعقلك بردوا وأجيب لنفسي وجع الراس يا حبيبي، لااااه الطيب أحسن افتكري كيف ما انتي رايدة.
جزيت على أسنانها بغيظ وقالت له :
ـ يووووه منك قادر وتعرف ايه كمان يا "سند"؟
ـ ايه يا قلب "سند"؟
ـ ورخم ومغرور وكياد موووت.
ـ أني دي كلاته معقولة؟
ـ آه معقول ها .
ابتسم على طريقتها الطفولية وحب يغازلها:
ـ هو إحساس حلو إني متجوز طفلة ، يعني في الشكل طولك نص طولي، في التفكير مجنونة وغيورة جداً ومجنناني معاكي، يعني "سند" وقع في العشق بعد العمر دي كلاته مع عيلة فلازمن أتحمل طولة لسانك وجنونك.
وفضل يلاعب "نوح" وولادها رجعوا من المدرسة فسابت "سند" ونوح وراحت استقبلتهم بالأحضان وبحنان جارف لأنهم روحها اللي متقدرش تستغني عنهم ولا تعيش من غيرهم ، وسأل "محمد" عن أخوه:
ـ آمال فين أخوي "نوح" يا ماما هو لساته نايم مصحيش ؟
جاوبته بحنان وهي بتشاور على أوضتها:
ـ "نوح" جوه مع بابا "سند" تعالى الاول غير هدومك واتوضا وصلي الظهر وبعدين العب مع "نوح" كيف ما انت عايز وكمان هنمشي علشان نروح عند تيته هنبات هناك النهاردة عشان خطوبة وكتب كتاب خالتو "شيماء" .
في اللحظة دي خرج "سند" وسمعها:
ـ أممم... بقيتي تقرري إنك هتباتي هناك لحالك اكده؟
جاوبته بابتسامة عريضة:
ـ لو هتبات وياي معنديش اعتراض أبداً إيه رأيك؟
رفع حاجبه لمكرها :
ـ لااااه روحي معنديش مانع يا حبيبي أني هبات عند "دعاء" .
بصت له بنظرة غيرة غصب عنها لكن مقدرتش تعلق ولا تتكلم ودخلت تجهز الغدا لولادها.
******
الليلة دي مكنتش مجرد ليلة عادية تعدي على دار "الحناوي" والبيوت اللي حواليهم في البلد، دي كانت الليلة اللي ربنا سبحانه وتعالى أذن فيها للفرحة إنه تدق الأبواب بقوة، وتطرد أي عتمة، أو وجع، أو دمعة قديمة اتحفرت في جدار القلوب، الدنيا كانت غرقانة في بهجة حقيقية طال انتظارها، وكأن الفرحة لابسة ثوب أبيض وبتلف على كل ركن في البيت، تثبت للكل إن الصبر لما بيطول، بيبقى عوض وربنا كرمه أوسع وأجمل بكتير من اللي أي عقل بشري ممكن يتصوره أو يتخيله،
جوه أوضة "شيماء"، كانت الدنيا مقلوبة بريحة البخور الصافي، والمسك، والعطور الهادية اللي مالية المكان، والأنوار الصفرا الدافية منعكسة على حيطان الأوضة مديّة دفا مريح للنفس والأعصاب، "شيماء" كانت قاعدة قدام المراية، قلبها بيدق جوه ضلوعها زي الطبول السريعة، وبتترعش كأنها طفلة صغيرة خايفة وتايهة في نفس الوقت، كانت بتبص لملامحها في المراية، وحاسة إن كل اللي بيحصل حواليها ده عبارة عن حلم جميل خايفة تصحى منه على واقع مر،
"مهرة" كانت قاعدة جنبها على حرف السرير، وبطنها اللي بدأ يظهر شوية مديها هيبة ورقة غير معتادة، وعمالة تظبط لها تفاصيل فستانها الأبيض البسيط الراقي بكل حب وحنان، وفي الناحية التانية، كانت "نغم" واقفة وراها، عمالة تضحك وتشاكسها بلسانها العسل علشان تكسر حاجز الخوف والتوتر اللي مسيطر على عروسة الليلة ومخلي جسمها يرجف،
قربت "نغم" بخطوات خفيفة، وحطت إيديها الاتنين على كتف "شيماء"، وبصت لها في المراية وقالت بصوتها الدافي اللي كله شقاوة وحب:
ـ يا بتي بطلي توتر بقى واهدي يا حبيبتي لاحسن تبوظي الماكياج اللي قعدت الميكب أرتيست معاكي ساعتين تعمله لك!
الموضوع مش محتاج قلقك وخجلك دي كلاته يا ست البنات.
بصت لها "شيماء" بعيون خجولة ومتوترة وقالت بصوت متهدج ومش قادرة تطلع الكلمات من كتر التأثر:
ـ معرفاش يا "نغم" حاسة إن جسمي كلاته وأعصابي سايبة، على قد ما أني فرحانة إن ربنا أخيراً هيجمعني بحب عمري على قد ما أني حاسة بمشاعر متضاربة جواي.
قعدت "مهرة" قدامها على الكرسي الصغير، ومسكت إيديها الباردة بين إيديها الدافيين وقالت بنبرة حنونة تريح القلب:
ـ القمر الصغنون بتاعنا أخيراً بقت عروسة كيف القمر يا ناس، والله أني مشفقة على العريس اللي برة دي هياخد حتة سكر هتدوبه، خليكي ريلاكس يا روحي إحنا حواليكي أها وافرحي يا قلب أختك إنتي من حقك تفرحي ومن حقك الخير اللي في الدنيا بحالها يكون بين ايديكي.
ضحكت "شيماء" وسط دموعها ضحكة خفيفة، وقالت وهي بتلمس فستانها برقة:
ـ ربنا ما يحرمني منكم أبداً، لولا وقفتكم جنبي في كل حاجة في قصتي مع"علي" ، كنت زماني تايهة ومش عارفة أصلح اللي باظ في دنيتي، إنتوا مش مجرد إخوات وبس، أنتم السند الحقيقي اللي الواحد بيستند عليه وقت ما الدنيا تقفل أبوابها في وشي.
وفي الناحية التانية من البيت، وبالتحديد جوه صالون الاستقبال الواسع، كانت قعدة الرجالة تليق بمقام ليلة زي دي، "سند" قاعد بجلابيته الصعيدي وعبايته وعمامته اللي بتملى المكان هيبة ووقار، وجنبه "يونس" لابس جلابية سمرا مظبوطة عليه وعلى هيئته اللي بتزيده وسامته هيبة وقوة، وفي النص، كان قاعد "علي" على كرسيه المتحرك ، ملامحه لسه باين عليها آثار التعب، ولسه رحلة علاجه وسفره برة قدامهم شوية، بس عيونه كانت بتلمع بنور غريب، نور راجع للحياة بعد ما كان خلاص فقد الأمل ودخل في نفق الموت النفسي،
بص "علي" لـ"سند" و"يونس" بعيون بتلمع بالفرحة، وقال بنبرة سعيدة من كتر التأثر والامتنان:
ـ إن شاء الله ربنا يتمم لنا على خير اني "وشيماء" بفضل ربنا ووقوفكم جنبي وانكم رضيتوا إننا نتمم الموضوع رغم ظروفي الصحية، بس أوعدكم إني أحافظ على "شيماء" وأحطها جوة عيوني، وربنا يتمم شفاي على خير وهي جنبي الموضوع هيعدي بإذن الله.
حط "سند" إيده على كتف "علي" وشدد عليها بقوة راجل فاهم أصول الرجال ومعدنهم الحقيقي، وقال بنبرة رجولية حاسمة:
ـ إيه الكلام اللي ما لوش لازمة ده يا دَكتور "علي" ؟! إحنا غرضنا ايه غير إنكم تكونوا مبسوطين وربنا يجمعكم على خير وتكونوا سند لبعض، وإن شاء الله ربنا هيجبر بخاطرك ربنا وضعك في اختبار ولازمن تتحمل ابتلاؤه ،
واحنا ميهمناش غير سعادة "شيماء" ، خلى بالك إنها في مقام بنتي الكبيرة واللي يزعلها يزعلني واللي يبسطها ويريحها ويحسسها بقيمتها ويحافظ عليها هنشيله فوق راسنا وجوة عينينا، وإن شاء الله تفرح بيها وهي تفرح بيك وانتو جار بعضكم بما يرضي الله .
هز "يونس" رأسه بتأييد قوي، وقرب منه وهمس له بمشاغبته المعهودة وهو بيفتكر يوم كتب كتابه وان "سند" كان واقف له على الواحدة بس بصوت واطي علشان "سند" ميسمعهوش:
ـ سمعت يا عم "علي"؟ خلي بالك ممنوع اللمس والاقتراب حكم هو عنده قرون استشعار لو جربت تمسك يدها حتى هتلاقيه واقف فوق راسك، ده خلاني اتجننت يوم كتب كتابي، حكم هو رجولة وبيعتبر نفسه مكان أبو البنات الله يرحمه وبصراحة هو جدع جدا .
ضحك "علي" ضحكة صافية من قلبه، وحس إن هموم الدنيا كلها نزلت من على كتافه، وإن ربنا أكرمه بناس تشتريه حتى في وقت الشدة وما تسيبهوش لوحده في محنته الصعبة وإنه لسه مرغوب فيه،
وبعد لحظات، دق باب البيت، ودخل الشيخ عبد التواب المأذون بوقاره وبشاشته المعهودة، فاستقبله "سند" بكل ترحاب وحرارة تليق بمقامه، وقعدوا في الصالون، وبدأت الإجراءات الرسمية لكتب الكتاب، والأوراق بتترتب وسط تهليل وزغاريد ملت المكان،
برة الأوضة بشوية، كانت "شيماء" مواربة الباب، وسامعة صوت المأذون وهو بيقول بصوته العالي والواضح:
ـ بارك الله لكما وبارك عليكما وجمع بينكما في خير.. اتفضل يا عريس امضي على كتاب الله وسنة رسوله، وكن لها السكن والمأوى.
في اللحظة دي، مسك "علي" القلم بإيد بترتجف من كتر الفرحة والتوتر والانفعال، وكتب اسمه في قسيمة الزواج بخط واضح، ونطق بصوت عالي مليان الإحساس والحب:
ـ قَبِلتُ زواجها على كتاب الله وسنة رسوله، وراضي أكون لها السند.
ومن جواه كمل وهو بيمضي:
ـ والعين اللي تشوف بيها الدنيا الجميلة، وعهد عليّ ما أخليها تنزل دمعة من عيونها بعد ما اختاراتني في عز ضعفي .
أول ما نطق كلامه ورا المأذون انطلقت الزغاريد في البيت كله من "نغم" و"مهرة" والستات اللي واقفة برة، وكأن الحيطان نفسها بتردد وراهم، فتحت "شيماء" باب الأوضة بشوية، وعيونها كانت شلالات دموع فرح مش مكفياها الدنيا، علي بص ناحيتها، ونظرة واحدة بينيهم كانت كفيلة تحكي سنين من العذاب والندم والشوق على قصتهم المختلفة من البداية للنهاية،
دخل "سند" ليهم علشان يمضي "شيماء" على العقد و"يونس" كمان قرب من "مهرة" وباس راسها بحنان قدام الكل:
ـ مبروك لأختك يا "مهرة" وعقبال ما نحتفل بالكتاكيت الصغننين اللي جايين في الطريق ويعملوا لنا دوشة في البيت ويجننونا زيك ياروحي.
ضـ.ــربته "مهرة" بخفة على صدره وهي بتبتسم على خفته المعتادة:
ـ بس يا "يونس"! بقى اني مجنونة، طب لما الدنيا تفضى حوالينا هوريك الجنان على اصوله يا ابن النعمان .
أما "سند" فبص لـ"نغم" اللي كانت عيونها بتلمع بالفرحة كأنها هي العروسة، قرب منها وباس راسها قدام الكل وهمس في ودنها بصوت مبحوح ودافي يخصها لوحدها:
ـ مبروك يا أم "نوح" عقبال الفرحة الكبيرة وتروح لبيت جوزها، وتفرحي بولادنا كلاتهم يارب.
ابتسمت "نغم" بدلال ورفعت عيونها ليه بامتنان وعشق ملوش آخر:
ـ ربنا ما يحرمني منك ولا من كلامك الحلو يا سندي.
وفي وسط اللمة والضحك والزغاريد، اتحرك كرسي "علي" بالراحة وبطء لحد ما وقف قدام باب الأوضة بالضبط، ومن غير أي تفكير ولا تردد، قعدت "شيماء" على كرسي قدامه وهو م ايده وحضن إيديها الاتنين بين كفوفه لأول مرة وقلبه بيدق بين ضلوعه بفرحة :
ـ مبروك يا شوشو، مليون مبروك يا حبيبي.
الكل انفض من حواليهم وبقوا في الأوضة لوحدهم واستغل "علي" الفرصة وحضن إيديها الاتنين وباسهم بحرارة وشوق جارف، ومن جواه كأن روحه طايرة من السعادة والبسمة ملت وشه، من وقت ما عمل حادثته الضحكة فارقته ولأول مرة النهاردة تترسم على معالم وشه وهي طالعه من قلبه وهو بيقول لها:
ـ أني محظوظ بيكي يا "شيماء" إنتِ مبقتيش مرتي وبس، إنتِ الروح اللي رجعت لجسدي بعد ما كان خلاص ودع الدنيا.
البيت كله برة حواليهم كان بيضج بالتصفيق الحار والفرحة اللي ملهاش مثيل، وانعزلت العيلة في لحظة حب حقيقي تثبت إن اللي بيكتب ربنا هو الصح، وإن الصبر دايماً آخره نور، وإن الأيام الحلوة مهما غابت لابد ترجع وتدّق الأبواب من تاني، على تلت بنات سقاهم أناس الزمن من كاس المر،
وسألها بشجن ومن جواه حاسس بالانكسار لأنه كان نفسه في اللحظة دي يكون واقف على رجليه ويفرحها بيه وبيومهم ده:
ـ هتقدري تتحملي معاي يا "شيماء" طريقي صعب قوي وانتي لساتك صغيرة؟
قامت من مكانها وهي بتبتسم له وحركته بالكرسي وراحت بيه ناحية الركنة وقربت منه وسندته إنه يتنقل عليها من على الكرسي المتحرك وسط ذهوله من مساعدتها ليه بكل أريحية وبعدت الكرسي عنه وقعدت قصاده ايديها في ايديه وجاوبته :
ـ دلوك أني وانت قاعدين نفس القعدة على نفس المكان، ايه اللي ينقصك يا "علي" دلوك علشان محسش إني عروسة وفرحانة بعريسها؟
أني طول مااحنا مع بعض أني قد الدنيا باللي فيها.
ونزلت راسها بخجل وقالت له :
ـ احنا خلاص بقينا واحد يا "علي" .
"علي" شدها برفق ناحيته ورفع وشها بسبابته
و حس كأن روحه رجعت تتنفس من جديد؛ الحركة البسيطة اللي عملتها، وثباتها، وطريقتها وهي بتتعامل معاه بكل حب وتلقائية كأن مفيش أي عائق بينهم، محت كل ذرة انكسار كانت جوه قلبه، لقى نفسه بيستسلم لسحر عيونها، ومد إيده برفق لمس دقنها ورفع وشها بالراحة عشان تخترق عيونه تفاصيل وجهها اللي بقى هو كل دنيته،
بص لها نظرة مليانة بحر من الكلام اللي مش محتاج حروف، نظرة راجل حس أخيرًا إنه لقى مرساه بعد عاصفة هدّت حيله وكيانه اتكلم بصوت مبحوح ودايب:
ـ ياااه يا "شيماء" إنتي كيف بالقلب الكبير دي؟ إزاي قادرة تطفي نار وجعي بنظرة واحدة من عيونك؟ أني كنت هكلم روحي وأقول إني بقيت ميت بالحيا، إني هكون قيد على قلبك وأنتِ لساتك في أول زهرة عمرك.. بس إنتي النهاردة مسحتي كل المخاوف داي برقتك.
حطت "شيماء" كفها الناعم فوق إيده اللي ماسكة دقنها، وضغطت عليه بحنان طاغٍ، وقالت بصوت متهدج ودايب في غرامه:
ـ علشان إنت مبقتش مجرد جوزي وبس يا "علي" إنت بقيت سقيا الروح اللي لو خرجت مني أموت بعدها، أني عشت سنين تايهة بخاف من نفسي وبخاف من بكرة، ولما حصلت حادثتك، فاكرة إني كنت بموت في اليوم ألف مرة لاني حسيت إني هخسرك.. وعمري ما هسمح لنفسي أكرر الغلط ولا أبعد عن حضن أماني تاني.، إنت مش ناقص حاجة في نظري يا "علي" إنت أقوى راجل في الدنيا دي كلاتها بعين قلبي.
كلامها نزل على قلبه زي المطر اللي غسل كل أوجاع السنين اللي فاتت. ما قدرش يستحمل أكتر من كده، قربها ليه أكتر لحد ما بقت أنفاسهم واحدة تحت خجلها وهي بتلمس شعره بحنان،
مال براسه وطبع بوسة طويلة وعميقة على جبينها، بوسة اختصرت كل المعاني، وكل الأسف، وكل العشق اللي كان مكتوم جوه صدره، وبعدين همس جنب أذنها بصوت دايب:
ـ بحبك يا "شيماء" بحبك لدرجة إن لو العمر كله وقف بينا في اللحظة داي، هكون راضي ومكتفي، إنتي عوض ربنا اللي ما بعده عوض.
رفعت راسها وعيونها بتلمع بدموع الفرح، وقالت بدلال وابتسامة صافية:
ـ وأني عشت عُمري كلاته مستنية الكلمة دي منك يا حبيب قلبي، ابتسم بقى وخلي الليلة دي تضحك لنا بكل ألوانها، لأن الجاي كله لينا إحنا وبس.
قعدوا مع بعض ساعات تحولت لدقائق من كتر الانسجام، نظراتهم كانت بتدوب أي مسافة، ولمسات إيديهم لبعض كانت بتكتب عهد جديد بالحب والصبر والوفاء، عهد ميهدوش ريح ولا يقدر أي ظرف في الدنيا يكسره.
******
ـ هتتصلي ليه في الوقت دي يا "جليلة" شكلك وراكي مصيبة يا وش النكد إنتي ؟
لوت "جليلة" شفايفها بامتعاض وردت عليه بزهق من اللي شايفاه من "نورا":
ـ يا دي "جليلة" اللي هتلبس مصايب كل اللي حواليها وهي ملهاش ذنب يا سي "سند" بيه، والله انت ظالمني .
اتأفف بضيق من كلامها:
ـ جرى ايه يا "جليلة" إنتي هتتصلي بيا الساعة واحدة بعد نص الليل علشان تشكي لي أوجاعك ، اخلصي وبطلي رط ملهوش عازة وقولي ايه المصيبة اللي وراكي.
رفعت حاجبها باستنكار وقالت:
ـ يقطع "جليلة" وسنينها، الست "نورا" من امبارح بالليل محطتش الزاد في بقها وهتبكي ليل ونهار وهتقول عايزة "سند" ومفيش على لسانها غير انها رايدة تشوفك يا سي "سند" بيه....