جاء يوم ح نمشي الاقامه الريفيه جهزنا حاجاتنا من بدري وطلعنا على اساس ماشين معانا دكتور امجد ودكتوره سماح ودكتور عبد الغني بس لمن وصلنا الجامعه لقينا امجد وسماح كان جايبين بص ركبنا وإتحركنا طول الطريق انا وريم قاعدين نتصور بس ونصور في الاماكن ريم قالت لي عايني المكان دا حلو كيف كلو اخضر قلتا ليها اي حلو شديد لحدي ما وصلنا قاعدين نعلق في الاماكن نزلنا كان عاملين لينا زي مخيم كبيير للبنات وواحد تاني بعيد حبه للأولاد نزلنا دخلنا المخيمات وبدينا طوالي تجهيز لبسنا اللابكودات والسماعات ما تديك الدرب والاجهزه وكنا عاملين بوسترات برضو طلعناهم ولا خلونا نرتاح طوالي طلعنا إتقسمنا قروبات ناس بفحصوا وناس بشرحوا الامراض الشائعه وكدا انا كنتا بفحص معاي علا الليدر وسبعه بنات تاني اما ريم ومعاها بنات مسكوا ترتيب الادويه بدينا نفحص لي ناس الضغط والسكري المهم بنعمل ليهم فحص عام ياخ تعبنا تعب سجلنا قريب ٢٠٠ نفر الباقين قلنا ليهم يجو بكره لمن خلصنا العصر ازن لمينا حاجاتنا ومشينا المخيم صلينا بعد خلصنا ريم قالت لي ارح نستكشف المكان قلتا ليها هي انا نعسانه عايزه انوم قالت لي ياخ نحن جينا عشان ننوم ارح ياخ جرتني طلعنا قعدنا نستكشف المكان يا سلام كان في طبيعه حلوه خلاص قالت لي يا سلام المكان حلو شديد انا غايتو ما راجعه قلتا ليها دا كلام عجيب قعدنا نضحك قالت لي هسي كان نسونا هنا مالوا قلتا ليها ينسوك براك انا ما بنسوني زي ما عارفه انا زوله معروفه🙂 قالت لي يابت زول بتزكرك غيري ماف وانا زاتي لو ما بسمع اسمك في ورقة الاتندس ما بتزكرك قعدتا اضحك من قلبي قلتا ليها ايواا والكان بتصل لي لمن أتأخر دقيقه وحده ويقعد يقول لي وين إنتي يابت ح تتأخري على المحاضره دا منو يا ربي يابت أعترفي إنتي من دوني ولا حاجه قالت لي في دي معاك حق والله ربنا ما يفرقنا ابدا قلتا ليها اللهم امين قالت لي ارح نرجع رجلي وجعوني قلتا ليها ارح راجعين كدا شفنا امجد قاعد في بنشات جمب المخيم ريم قالت لي والله دكتور امجد دا كاريزما ما شاء الله قلتا ليها ارح خلي التعاليق مشينا المخيم رقدنا نمنا بالليل عملنا قعده سوينا شاي بلبن وجبنا بسكويت من الدكان دكتوره سماح جات قعدت معانا ما شاء الله دكتوره ظريفه خلاص قعدت تتونس معانا
المهم الايام مرت سريع وفي اخر يوم في المخيم لمن خلصنا عملنا قعده ظابطه قهوه ومقرمشات مفترض نرجع طوالي بكره تمينا باقي اليوم الصباح بدري صحينا كنتا مشتاقه لي لجين وتالين وناس امي شوق مبالغه تقول ما خمسه يوم قشرنا كلنا ومشينا ركبنا البص دورنا البنات قعدن يغنن ريم قالت لي هسي في داعي للزي دا قلتا ليها ما علينا يازوله لمن كتروها امجد قال ليهم اسكتوا خلاص عفيت منو في دي والله البص مليان اولاد يغنوا كيف نزلنا في الجامعه ياخ لاقونا ليك البرالمه كان عاملين لينا فعاليه عديل ياخ فرحنا فرح بيهم قعدنا حبه في الجامعه ومشيت البيت من وصلتا لاقتني تالين جمب الباب شلتها وقعدتا اسلم فيها قلتا ليها ماما وين اشرت لي جوه مشيت لقيت امي ولجين سلمتا عليهم وقعدتا احكي ليهم في الحصل لجين قالت لي شكلها كانت ايام حلوه قلتا ليها شديد والمكان كان سمح سماحه قالت لي حظكم غيرتوا جو قلتا ليها شديد دخلتا أستحميت وغيرتا وصليت العصر رقدتا حبه بس ما نمتا ابوي وعلي جو سلمتا عليهم وابوي دا إتشعلقتا فيهو عديل لجين قالت لي دي ما كان خمسه يوم قلتا ليها إنتي مفتكراني متبلدة المشاعر زيك قالت لي طلعتيني متبلدة المشاعر ابوي قال لينا خلو نقاركم دا قعدتا احكي لي ابوي الحصل من الالف للياء ..
المهم مره باقي اليوم واليوم البعدو برضو اصلا ما كان عندنا جامعه عشان كدا مره سريع صباح اليوم البعدو كان يوم التلاتاء صحيت بدري جهزتا نفسي ومشيت الجامعه لمن وصلتا لقيتا جايطه فتشتا ريم قلتا ليها الليله الحاصل شنو قالت لي يابت الليله وداع دكتور امجد ما عارفه قلتا ليها وداعو؟! قالت لي اي قال العقد حقو مع الجامعه خلص وهو راجع السعوديه راجع لي شغلو يا حليلو ..
بقيت افكر يعني امجد تاني ح يرجع يختفي زي زمان وتاني م ح اشوفو بس انا لحدي هسي ما أعتزرتا ليهو عن الحصل ما عارفه ال ح يحصل شنو بس لازم اعتزر ليهو ريم قالت لي جبتي هديه قلتا ليها لالا نسيت قالت لي حتى انا ارح نشتري هسي ونجي لسه فاضل للمحاضره نص ساعه قلتا ليها نشتري من وين قالت لي من مكان قريب منها ارح مشيت معاها هي أشترت ليهو ساعه انا قعدتا افتش ساعه لحدي ما لقيت العطر البحبو إشتريتو ومشينا نغلف قلتا للبت ممكن النوتات بتاعت الكتابه دي قالت لي إتفضلي شلتهم منها وكتبتا كلام كتير وغلفناهم وشلناهم ومشينا ريم قالت لي ارح اسرعي عشان نصل قبل الوقت بقينا خابين خب لحدي ما وصلنا لمن وصلنا لقينا الدكتور خلاص عايز يدخل جرينا جري دخلنا حضرنا المحاضره كان عاملين الفعاليه بعد المحاضره حضرنا الفعاليه لمن جو لي وقت التكريم ياخ الطلاب ديل كلهم بكو بجد امجد ما قصر معانا كان قريب لي كل الدفع ولو إحتجنا لي حاجه بنلقاهو طوالي ما أكذب حتى انا بكيت الدكاتره ديل شكروهو شكر لمن جو لي مرحلة تقديم الهدايه كل الطلاب مشوا حتى ريم انا ما مشيت فضلتا واقفه لحدي ما كلهم قدموا ليهو هداياهم حتن مشيت انا اخر وحده مديت ليهو الهديه قال لي شكر قلتا ليهو ممكن تفتح حقتي اول قال لي طيب إبتسمتا ليهو ونزلتا مشيت ما إنتظرتا ريم زاتو مشيت البيت على كدا ح اقفل قصة امجد دي نهائي كدا يا دوب ح أحس بي إنو ضميري مرتاح...
الفصل الثامن عشر
صباح اليوم المسافر فيهو امجد امي قالت ماشه تودعو قلتا ليها انا ماشه معاك قالت لي إنتي ح تأخريني تعالي وراي قلتا ليها طيب لبستا عبايه هي مشت كانت شايله معاها ابري وحاجات كتيره عشان كدا مشت قدامي لبستا ومشيت لحقتها لمن وصلتا إتوقعتا القاهم كلهم بره بس ما لقيت زول جيت عايزه ادخل صادفتا امجد وهو جاي تغريبا من الدكان قال لي لمار قلتا ليهو اهلين قال لي كيفك قلتا ليهو كويسه الحمد لله بس إنتا ما مسافر؟! قال لي السفريه إتأجلتا قلتا ليهو اها قال لي بالمناسبه فتحتا الهديه حقتك العطر عجبني شديد شكرا ليك قلتا ليهو العفو ما عملتا حاجه دا اقل واجب قال لي بالنسبه للرساله لمار ماف داعي تعتزري إنتي ما قلتي حاجه غلط وقتها وانا متفهم اي حاجه قلتا ليهو لأ يا امجد انا غلطانه ومتأكده من كدا قال لي اصلا كدا كدا الموضوع إنتهى قلتا ليهو فعلا قال لي ح تعملي شنو بعد تتخرجي قلت ليهو ما عارفه ما فكرتا ح اعمل شنو واساسا التمريض ما واقع لي قال لي جربي ادي التمريض فرصه يمكن يكون بداية جديده لي حلم جديد التمريض حلو وحلاوتو ما بتتوصف بالكلام جربي مره وحده ادي التمريض فرصه ما تعايني ليهو من جهة إنو ما رغبتك جربي عايني ليهو من جهة إنو حاضرك ومستقبلك وإنو هو المكان الربنا ختاك فيهو لانو فيهو بس ح تبقى متميزه قلتا ليهو بحاول قال لي إتفضلي قلتا ليهو ما تعاملني كاني غريبه ياخ دا بيت خالي ما بقولوا لي إتفضلي قال لي طيب اقول ليك شنو🤣 قلتا ليهو ولا حاجه بدخل براي دخلتا وهو دخل وراي مشى الصالون وانا مشيت البيت بهناك لقيتهم بتكلموا في موضوع خالتو فوزيه قالت لي امي ياخ بتعرفيها يا صفا ..دخلتا سلمتا على خالتو فوزيه امي قالت ليها قصدك بت محاسن إنتي؟ قالت ليها لالا بت نضال اخت محاسن قالت ليها ايواا عرفتها مالا قالت لي امي ياهو ما قلتا ليك ولد عمار اخوي دايرها ماشين نتقدم ليها امي قالت ليها ما شاء الله والله عاد ولد عمار ما شاء الله عليهو راجل ومالي مركزو وهي ما شاء الله حلاتا تستاهلو خالتو فوزيه قالت ليها اي والله عقبال عند وليداتنا يا صفا امي قالت ليها إن شاؤ الله يا فوزيه الله يسمع منك خالتو فوزيه قبلت علي قالت لي هسي يابتي إنتي وامجد ما كنتوا حلوين مع بعض الحصل شنو امي قالت ليها والله كلامك صح يا فوزيه لي اخر مره كانوا كويسين مع بعض فجأه أختلفوا ما تعرفي الحصل شنو خالتو فوزيه قالت لي والله يا لمار الشي البعرفو إنو امجد ولدي لسه باقي عليك وزي ما متأكده إنو إنتي برضو باقيه عليهو ما تكابرو يا بتي ما قدرتا ارد عليهم سكتا بس لحدي ما غيرو الموضوع اصلا من البدايه القصه دي حصلت بي سببهم ما عايزاهم يجبروني على حاجه زي دي تاني قاعدين كدا جات لجين اختي وسمر اخت امجد داخلين قعدن يتونسن لجين مسكتني بتها وطلعت جزمه خلاص قعدتا العب فيها وهي تضحك في الاخير لمن زهجتا طلعتا بيها بره الشارع وماسكاها وشغاله ليها عايني انننن عربيه وهي شغاله تردد انننن قلتا ليها اي اننن عايني دا شنو موتر قولي موتر سكتت غلبا تنطق قعدتا اضحك عليها
المهم مرة الايام وبدينا في بحث التخرج خلاص الايام في خواتيمها قررتا اعمل بي نصيحة امجد وادي التمريض فرصه إجتهدتا شديد في بحث التخرج وكنتا جاريه وراهو شديد والشي الحلو امجد ما خلاني ساعدني ووقف معاي بجد ما ح اقدر اوفيلو حقو 🥺 لمن بدينا الامتحانات إنضغتا شديد وبقيت اربعه وعشرين ساعه حابسه نفسي في غرفتي وبقرأ الامتحان النظري كان اسبوع والعملي إسبوع ياخ لمن خلصنا اخر امتحان عملي من الفرح لمن قعدتا ابكي لكن الفرحه ما تمت بقينا في جري المناقشه تاني ولسوء حظي الطقم الاشتريتو للمناقشه جربتو طلع ضيق قعدتا ابكي لي ريم في المكالمه قالت لي يا بت بتتحلى قلتا ليها تتحلى كيف يابت وبعد بكره المناقشه قالت لي بنلقى حل اصبري قلتا ليها طيب فكري معاي قالت لي ممكن تطلبي طقم من النت قلتا ليها لالا طقوم النت ما سمحه قالت لي طيب دقيقه اقفلي قفلتا منها وطلعتا لي ناس امي في الحوش قلتا لي امي انا نسيت اعدل طقم المناقشه مع إنو خاتاهو في الاولويات بس مع الجري نسيتو امي قالت لي البسي حق لجين قلتا ليها امي حق لجين شنو يا أمي إنتي عارفاني بكره اللون الزيتي ولا الاخضر دا ومستحيل البسوا في يوم من الايام قالت لي نان اعمل ليك شنو امشي السوق إشتري قلتا ليها إلا اعمل كدا مشيت لي ناس ابوي في الديوان لقيت علي قاعد وابوي بصلي في العصر قلتا لي علي ارح معاي السوق عايزه إشتري طقم المناقشه قال لي طيب اصلي واجي قلتا ليهو تمام ..
طلعتا قعدتا جمب امي الباب دقه قالت لي امشي افتحي جريت لبست طرحه فتحتا لقيت دي لجين قلتا ليها يا بت إنتي بيتك دا خاتين ليك فيهو نار قالت لي اسكتي وزحي من شارعي دخلت كانت شايله اكياس معاها قالت لي تعالي شوفي دا مشيت لقيتا جايبه لي طقم ياخ فرحتا فرح قالت لي رهيب صح قلتا ليها شديد وكمان لوني المفضل كان بالعنابي قالت لي عايني دي فتحت لي علبه بتاعة طقم حق اكسسوار بالفضي قلتا ليها لجين إنتي عارفاني بحبك صح قالت لي ايواا عارفه بس دي ما انا الجبتا الحاجات🤣