رواية زوجة علي ورق الفصل الاخير بقلم هويدا زغلول

وبعدها قعد أحمد وهند وسامح اتفقوا على كل تفاصيل الشغل وكل واحد عرف هيحط كام والفلوس هتدخل فين والمكسب هيتقسم بينهم إزاي وبعدين خرجوا من الشركة وركبوا العربية وهما راجعين البيت

أحمد

ربنا يستر يا هند أنا مش عارف ليه مش مرتاح لابن خالتك وحاسس إن فيه حاجة كده مش داخلة دماغي من أول ما قعدنا معاه

هند

من أولها كده مش مرتاح له طب لما إنت مش مرتاح له سبت له فلوسك وانت مطمن ليه وقعدت معاه واتفقنا وخلصنا كل حاجة

أحمد

ما هو أنا مشيت وراكي يا هند وإنتي اللي قولتي لي إن سامح ثقة وإن الشغلانة دي مضمونة وأنا أخدت بكلامك وقولت يمكن فعلا تكون فرصة كويسة لينا

هند

بقول لك إيه يا حبيبي أنا اللي عملت كده عشان خاطرك عايزاك تبقى كويس في السوق ويبقى معاك فلوس أكتر وما تفضلش واقف مكانك 

أحمد

ماشي يا هند لما نشوف أخرتها إيه وربنا يسترها علينا وعلى الفلوس اللي حطيناها وإن شاء الله يكون إحساسي غلط وسامح يطلع قد الثقة

هند

متقلقش يا أحمد أنا عارفة ابن خالتي كويس ده مش ممكن يعمل حاجة تضرنا وبعدين إنت بنفسك شوفت الشركة والشغل والناس اللي موجودة هناك

وبعدها وصلوا البيت وهند قالت له 

هند

طبعا انت هتفضل معايا النهارده ومش هتروح البيت التاني 

أحمد 

ماشي يا هند هطلع معاكي انا اصلا كده كده فاضي لك النهارده وهكون معاكي انتي وبس 

هند 

يا حبيبي يلا بينا ده انا هعملك احلي أكل النهارده 

وعند ملك كانت واقفة في بلكونة شقتها وبصت من فوق ناحية باب العمارة وفجأة شافت رقيه وهي داخلة من تحت

ملك

الحمد لله رقيه بنت عمي جات اهي الله بس هي متصلتش ليه علي العموم أنا هدخل أستناها جوه على بال ما تطلع

ودخلت ملك الشقة وقعدت مستنية رقيه لكن الوقت عدى ورقيه ما طلعتش

ملك

الله هي رقيه راحت فين هي مش كانت داخلة العمارة يبقا أكيد دخلت عند حماتي ولا حاجة أنا هنزل أشوفها يمكن تكون قاعدة تحت

ونزلت ملك ولما وصلت عند شقة حماتها لقت الباب موارب وسمعت صوت رقيه من جوه وقفت مكانها وبدأت تسمع اللي بيتقال 

رقيه

طيب وأنا هعمل لك إيه تاني يا سحر ما أنا كل شوية أقعد أقول لها عليه كلام وحش وأحاول أفهمها إنه مش كويس وهي برضو لسه متمسكة بيه ومش عايزة تسمع مني أنا مالي بقى أعمل لها إيه أكتر من كده

سحر

يعني إيه البت دي هتفضل واثقة فيه كده ولزقة فيه أنا عايزاها تطلق منه وخلاص ومش عايزة أشوفها في البيت ده أكتر من كده 

فايزة

بقول لك إيه يا سحر وبعدين معاكي إنتي كده عايزة تلعبي مع أخوكي وتقفي قدامه وتعملي مشكلة بينك وبينه 

سحر

وهو إنتي مش عايزاني أقف قدامه واسيبه ياخد كل الورث بتاع بابا إنتي عارفة إن بابا سايب وصية وكاتب فيها إن أحمد يورث كل حاجة لما يتجوز ملك وأنا دلوقتي مش عايزاه يفضل متجوزها عشان أخد معاه من فلوس أبويا 

رقيه

طب ما أنا قايلة لك إن ملك أصلا واقعة فيه وكانت بتحبه من زمان بس هو اللي ما بيحبهاش وأخوكي اتجوزها طبعا عشان الفلوس وهي متعرفش كده وعايزة تفضل متمسكة بيه مهما حصل

سحر

خلاص يبقا نعرفها اللعبه اللي هو لعبها عليها دي وبعدين اصلا انا مستغربه من الوصيه اللي ابويا سابها دي 

رقيه 

ماهو انا برضو مستغربه ليه عمي كمال يسيب وصيه زي دي 

سحر 

اسمعي يا رقيه انتي لازم تخليها تطلب الطلاق منه عشان هو ما ياخدش الوصية كلها لنفسه لانها لو اطلقت يبقا الوصيه تسقط وانا اخد معاه في الورث وساعتها بقا هديكي اللي انتي عايزاه 

فايزة

بس أخوكي أحمد لو عرف إنك بتخططي لكده يا سحر مش هيسكت وهيعرف إنك عايزة تفرقي بينه وبين مراته عشان الفلوس

سحر

يعني هو لما خطط ودبر من ورايا كنتي عايزاني أسكت ده انا ربنا ألهمني وخلاني أروح للمحامي وأسأله عن الوصية من بعد شوية الفتافيت اللي ابنك رماها لي وقال لي إن دول هما ورثي من أبويا ولو أنا ما كنتش سألت المحامي عن الوصية كان زماني دلوقتي ضعت وما كنتش أعرف إن أبويا كاتب لابنك وصية بفلوس كتيرة أكتر من اللي هو اداهالي بكتير 

فايزة

يا بنتي اهدى وخليكي عاقلة يمكن الوصية دي كان ليها سبب وأخوكي ما عملش حاجة غلط

سحر

أخويا عايز يكوش على كل حاجة زي عادته عشان هو طول عمره طماع وبيبص للفلوس وبس وأنا مش هسيبه ياخد حقي ويحرمني من نصيبي

رقيه

أيوه ما هو أمال هو اتجوز ملك ليه هو اتجوزها عشان خاطر الفلوس اصل أخوكي ده طول عمره أناني وبيفكر في مصلحته وبس 

فايزة

هو انتي متأكدة يا سحر من الكلام اللي المحامي قالهولك عن الوصية اللي ابوكي كاتبها مش يمكن تكوني انتي فهمتي الموضوع غلط 

سحر

غلط ازاي يا ماما انا فاكرة كويس المحامي قالي ايه بعد ما عدي فترة لما ابنك جالي وسلمني فلوس الورث اللي قالي انها نصيبي 

#فلاش باااك

في بيت سحر كانت قاعده مع جوزها محمود وأحمد اخوها راح لها وهو شايل شنطة في إيده وقعد قدامها

أحمد

خدي يا سحر دول نصيبك من ورث بابا وأنا مش عايز أفضل شايل الفلوس دي عندي أكتر من كده عشان تبقي أخدتي حقك 

سحر

وهما كام دول يا أحمد يعني بابا سايب لي قد إيه

أحمد

دول حوالي 300 ألف جنيه فلوسك من ورث بابا وأنا جبتهم لك عشان ما تقوليش في يوم إني أكلت حقك أو إني ما اديتكيش نصيبك

سحر

نعم ليه بقى إن شاء الله يبقا المبلغ ده بس وأنا عارفة إن بابا كان معاه فلوس أكتر من كده بكتير وإنت أكيد عارف إن أملاك بابا وفلوسه كانت أكبر من الرقم ده

أحمد

سحر يا حبيبتي دي فلوس أبوكي اللي سابها لك وما فيش حاجة تانية وأنا مش عايزك تتكلمي كتير في الموضوع ده وأحمدي ربنا إني جبت لك نصيبك بدل ما نفضل نفتح في كلام مالوش لازمة

سحر

لا كتر خيرك يا أخويا إنك افتكرتني وجبت لي نصيبي على العموم ماشي يا أحمد ومتشكرة قوي إنك تعبت نفسك وجبت لي الفلوس

أحمد

خلاص يا سحر خدي فلوسك وربنا يبارك لك فيها وأنا مش عايز كلام كتير تاني عن الموضوع ده

وبعدها أحمد قام ومشي وسحر فضلت باصة للفلوس وهي مش مقتنعة بالكلام اللي قاله وقالت لمحمود جوزها 

سحر

أنا مش عارفة يا محمود أنا شكة في أخويا وحاسة إنه ضحك عليا في الفلوس دي أنا عارفة إن بابا كان معاه فلوس كتير أوي ومش معقول يكون كل اللي سابه لي هو المبلغ ده

محمود

شاكه في إيه يا سحر وإنتي معندكيش دليل على حاجة وبعدين ما تقفيش قدام أخوكي إنتي عارفة إن أحمد صعب وإن أي حد بيتعامل معاه لازم يبقى عارف هو بيعمل إيه

سحر

ما أنا مش هتكلم دلوقتي يا محمود بس أنا حاسة إن فيه حاجة مستخبية وأنا مش هفضل ساكتة طول عمري لو عرفت إن حقي اتاخد مني

محمود

ماشي يا حبيبتي بس خليكي عاقلة وماتعمليش مشكلة مع أخوكي 

وبعدها بكام شهر  من وفاة ابوهم أحمد اتجوز ملك وسحر وامها ما يعرفوش هو عمل كده ليه وفي يوم سحر قررت تروح للمحامي اللي كان ابوها بيتعامل معاه

سحر

انا كنت جايه أسألك عن بابا يا استاذ فريد عايزة أعرف هو ساب لك وصية هنا قبل ما يموت ولا لأ 

فريد

أيوه يا مدام سحر أنا كان عندي وصية من  والدك فعلا وأنا فتحتها لأستاذ أحمد بعد وفاة والدك لأن هو كان الطرف اللي الوصية مرتبطة بيه

سحر

وهي الوصية دي كان فيها إيه يا أستاذ فريد وليه أحمد هو اللي عرفها وأنا ما كنتش عارفة عنها حاجة

فريد

الوصية كانت بتقول إن أحمد عشان ياخد كل املاك والدك لازم ينفذ الشرط اللي المرحوم كتبه في الوصيه والشرط ده كان عبارة عن ان احمد لازم يتجوز الآنسة ملك بنت الأستاذ فتحي الله يرحمه ويفضلوا متجوزين لمدة سنة كاملة وبعدها لو هي اطلقت في الفترة اللي قبل السنه ما تخلص يبقا الورث مش من حقه ويتوزع عليكم 

سحر

نعم يعني إيه يعني هو اتجوزها عشان كده عشان الشرط اللي في الوصيه 

فريد

أيوه يا مدام سحر أستاذ أحمد اتجوز الآنسة ملك بنت الأستاذ فتحي عشان الوصية كانت واضحة في النقطة دي ووالدك كان رابط انتقال كل الأملاك بالجوازة دي

سحر

طيب وده ليه بقى إن شاء الله بابا يعمل كده وليه يكتب كل حاجة لأخويا بالشكل ده انا مش فاهمه حاجه ايه اصلا اللي يدخل ملك في الحوار ده 

فريد

والله يا مدام سحر أنا ما أعرفش السبب بالضبط لكن واضح إن كان فيه حسابات واتفاقات قديمة بين والدك وبين الحاج فتحي الله يرحمه وأنا ما ينفعش أقول حاجة مش موجودة في الورق

سحر

يعني أفهم من كلامك إن أحمد اتجوز البنت دي عشان الوصية وإن بابا كاتب له كل الأملاك لو اتجوزها عشان كده هو طمع في كل حاجه وعصر علي نفسه لمونه واتجوز البت 

فريد

والمفروض ان لو ملك اتطلقت منه قبل ما السنة ما تخلص يبقا التركة هتتوزع بالشكل اللي حدده والدك بينك وبين أحمد ووالدته لكن لو ملك كملت مع أحمد لحد نهاية السنة فهو هياخد كل الأملاك وده حسب نص الوصية

سحر

أيوه أيوه طيب ماشي يا أستاذ فريد متشكرة قوي على وقتك وعلى إنك وضحت لي الحقيقة

وبعدها سحر قامت من مكانها وخرجت من عند المحامي وهي مصدومة 

#باك

سحر

أنا بقا لو ما كنتش عرفت إن الوصية بتقول كده كنت قولت إن أخويا ده اتجنن عشان يتجوز البنت دي ويعيش معاها وهو أصلا مش بيحبها 

وكانت ملك واقفة برة وسمعت كل كلام سحر وحطت إيدها على بوقها وهي مش قادرة تستوعب وقالت لنفسها وهي بتعيط 

ملك

يعني لما احمد جه واتقدم ليا وطلب ايدي من عمي كان عشان ورث أبوه وأنا كنت فاكرة إنه اختارني أنا من دون البنات كلهم عشان كده هو بعيد طول الوقت لا وكمان رقيه متفقه عليا مع اخته انا مش قادرة استوعب اللي انا فيه 

طلعت بسرعه علي شقتها من غير ما حد يحس بيها ودخلت وهي محتارة تعمل ايه وقررت تروح عند صاحبتها اميرة وقالت لها علي كل حاجه وأميرة قالت 

أميرة

طب وإنتي دلوقتي هتعملي إيه يا ملك بعد ما سمعتي الكلام ده أنا عارفة إن اللي حصل صدمة كبيرة بس لازم تفكري كويس قبل ما تاخدي أي قرار 

ملك

مش عارفة يا أميرة بس أنا دلوقتي لازم أطلب منه الطلاق عشان أنا لا يمكن أعيش مع واحد زي ده واحد أناني ومش بيفكر غير في الفلوس وبس وعشان كده هو بعيد عني طول الوقت وإنتي ما تعرفيش هو بيعاملني إزاي أنا عايشة معاه في البيت كأني واحدة غريبة عنه

أميرة

طيب فكري شوية في الموضوع يا بنتي وخدي وقتك عشان تعرفي تاخدي حقك وما تندميش بعد كده لأن الطلاق دلوقتي ممكن يضيع عليك حاجات كتير وإنتي لسه مش عارفة كل الحقيقه وليه ابوه عمل كده 

ملك

تصدقي فعلا بس انا آخد حقي إزاي يا أميرة وكلهم طلعوا بيضحكوا عليا أحمد ورقيه وسحر وكل اللي حواليا كانوا عارفين وأنا الوحيدة اللي كنت عايشة ومصدقة إن جوزي اختارني عشان بيحبني 

أميرة

اهدي يا حبيبتي أنا والله مش عارفة أقول لك إيه بس أنا فاهمة إن اللي حصل وجعك قوي ومش سهل أبدا إنك تكتشفي إن جوازك ممكن يكون مبني على حاجة إنتي ما كنتيش تعرفي عنها حاجة

وفي الوقت ده دخل حازم أخو أميرة وهو بيبص لملك باستغراب

حازم

ايه ده معقوله ملك عندنا هنا إزيك يا ملك عاملة إيه والله عاش من شافك إنتي بقالك فترة كبيرة ما جيتيش هنا خالص ولا بقيتي تباني زي زمان

ملك

الحمد لله يا حازم والله أنا بخير ومعلش بقى الجواز خدني شوية عنكم وما بقيتش بعرف أخرج زي الأول

أميرة

ما إنت عارف بقى إنها اتجوزت يا حازم وما بقتش بتبان ولا بتخرج زي زمان

حازم

آه صح طيب قولي لي إنتي عاملة إيه مع جوزك يا ملك والدنيا بينكم ماشية كويس ولا إيه طمنيني 

ملك بحزن 

كويسة الحمد لله يا حازم ماشي الحال 

وسكتت ملك شوية وبعدها دموعها نزلت غصب عنها

حازم

ايه في إيه يا ملك إنتي بتعيطي ليه كده هو حصل بينك وبين أحمد حاجة ولا إيه اتكلمي قولي لي انتي يا اميرة مالها 

أميرة

أصل في موضوع كده حصل وخلاها زعلانة ومن ساعة ما جات وهي مش عايزة تبطل عياط خالص يا حازم 

حازم

طيب احكوا لي الموضوع يمكن نقدر نفكر سوا ونشوف نقدر نعمل إيه

أميرة

ملك سمعت بالصدفة كلام عن أحمد وعرفت إنه اتجوزها بسبب وصية والده وإن الجوازة مرتبطة بالفلوس وهي دلوقتي مش عارفة تعمل إيه وبتقول انها عايزة تطلب منه الطلاق 

حازم

طيب بصي يا ملك انتي ليكي حق تزعلي طبعا من اللي عرفتيه بس تبقي غلطانة لو فكرتي تطلبي الطلاق دلوقتي لأنك لو عملتي كده من غير ما تعرفي أحمد مخبي إيه ممكن تندمي بعدين حتي الاقل تعرفي ابوه عمل كده ليه 

أميرة 

هو ده الكلام اللي انا قولته بالظبط والله يا حازم 

ملك

طيب وأنا المفروض يعني أرجع له وأعيش معاه كأني ما سمعتش حاجة وأنا دلوقتي عارفة إنه اتجوزني عشان الفلوس مش عارفه هعملها ازاي بس 

حازم

أيوه هترجعي وتتعاملِي طبيعي جدا كأنك ما عرفتيش حاجة لأن أهم حاجة دلوقتي إنك تعرفي الحقيقة كلها وتعرفي أحمد بيعمل إيه 

ملك

بس أنا مش هقدر أتعامل طبيعي بعد اللي سمعته أنا حاسة إن الدنيا كلها اتقلبت فوق دماغي ومش عارفة حتى أبص له بحب زي ما كنت 

حازم

أنا فاهمك بس لو بينتي له إنك عرفتي هيبدأ يخبي كل حاجه عشان كده خليكي هادية وسيبي الموضوع عليا وأنا هحاول أعرف لك كل حاجة من غير ما يحس

ملك

بجد يا حازم يعني انت هتساعدني لأني  مش عارفة أعمل إيه لوحدي وحاسة إني تايهة ومحتاجة حد يقف جنبي بجد 

حازم

متقلقيش أنا معاك بس بشرط واحد إنك ما تبينيش لأحمد أي حاجة وإنك تفضلي تتعاملي معاه بشكل طبيعي لحد ما نعرف هو بيخطط لإيه

أميرة

شايفة يا بنتي أخويا جدع وهيقف جنبك ومش هيسيبك وإنتي بقى اسمعي الكلام اللي هو بيقول لك عليه ومتخليش غضبك يخليكي تاخدي قرار تندمي عليه

ملك

مش عارفة أقول لك إيه يا حازم ربنا يخليك وأنا هحاول أعمل اللي قولت عليه بس والله الموضوع صعب عليا قوي

حازم

ما تقوليش حاجة يا ملك وسيبيني بس دلوقتي أعرف كل تحركات أحمد وإنتي تقولي لي بيشتغل فين وبيروح الشركة إمتى وبيخرج منها إمتى 

ملك

الشركة في العنوان ده وهو بيروح الصبح وبيفضل هناك ساعات وبعدها بيرجع البيت بالليل وأوقات بيخرج يقابل ناس تانية بس أنا مش عارفة مين

حازم

تمام كده وانا هجيب لك قرارة 

ملك

ماشي يا حازم طيب انا همشي بقا عشان الحق ارجع البيت 

أميرة

ربنا يسترها عليكي يا ملك وخلي بالك من نفسك وما تاخديش أي قرار وإنتي متعصبة

وبعدها رجعت ملك البيت وقعدت وفضلت تكلم نفسها وقالت 

ملك

انا لازم أكون قوية دلوقتي لو أحمد فعلا مخبي عليا حاجة لازم أعرفها 

وبالليل متأخر أحمد رجع وهو دخل لاقاها قاعدة علي السرير وقالها ببرود 

أحمد

ايه ده إنتي لسه صاحية ليه لحد دلوقتي 

ملك

عشان مستنياك وقولت يمكن ترجع جعان وأجهز لك الأكل قبل ما تدخل تنام وأهو نقعد سوا شوية بدل ما كل واحد يفضل لوحده

أحمد

غريبة إنتي النهارده شكلك مختلفة يعني 

ملك

مفيش حاجة يا أحمد أنا بس قولت أغير الجو شوية ويمكن لو قعدنا مع بعض الدنيا بينا تتحسن

أحمد

طيب ماشي يا ملك بس أنا راجع تعبان شوية ومش هقدر أقعد معاكي 

ملك

طيب تحب هحط لك تأكل ده انا عامله أكل وان شاء الله يعجبك 

أحمد 

مش عايز اكل ولا عايز حاجه انا كل اللي عايزة اني ادخل ارتاح لاني تعبان من الشغل طول النهار 

ملك 

طيب انا عايزة أسألك سؤال واحد يا أحمد 

احمد 

خير يا ملك 

ملك 

انا عايزة افهم انت اتجوزتني ليه طلما مش عايز تقرب مني وربنا اللي يعلم انا بحبك اد بقالي 6 شهور معاك في البيت زي اختك 

أحمد 

عشان مش بحبك ولا عمري هحبك ومش قادر اغصب علي نفسي اني اكمل في الجواز اكتر من كده 

ملك بعصبية 

اااه كده فعلا الامور وضحت قدامي خلاص انا دلوقتي فهمت كل حاجه وعرفت فعلا انت عملت كده 

احمد بص لها باستغراب وقال 

احمد 

يعني ايه الكلام اللي انتي بتقوليه ده انا مش فاهم حاجة انتي بتتكلمي كده ليه يا ملك 

ملك بارتباك 

مفيش يا احمد انا بس بقولك اني دلوقتي أتأكد انك بتكرهني بس طالما انت بتكرهني اتجوزتني ليه 

احمد

اتجوزتك عشان ابويا هو اللي هو طلب مني في وصيه اني اتجوزك 

ملك بصت لأحمد وهي مش مصدقة اللي سمعته ودموعها نزلت من عينيها وقالت له

ملك

 يعني ايه ابوك كان كاتب في وصية ان انت تتجوزني فهمني يا احمد انا عايزة افهم كل حاجة 

احمد

 ايوه يا ملك ابويا هو اللي كتب الوصية دي وانا نفذت اللي هو طلبه وخلاص ومش عايز اسمع منك اسئلة كتير عن الموضوع ده

ملك 

بس انا من حقي أعرف انت اتجوزتني على اساس ايه وانت كنت ساكت طول الوقت ومخليني عايشة معاك كأني واحدة غريبة وعارف اني بحبك

احمد

 انا قولت لك اللي عندي ومش عايز اسمع صوتك تاني في الموضوع ده وانتي لو فتحتي الكلام ده مع اي حد هتندمي فاهمة ولا لا

ملك

 انت بتهددني كمان يا احمد بعد كل اللي عرفته وبعد ما عرفت ان جوازنا كله كان بسبب وصية وفلوس

احمد

 انا مش بهددك انا بحذرك ودي اخر مرة هتكلم معاكي في الموضوع ده

وبعدها احمد دخل اوضته وقفلت وراه الباب وساب ملك قاعدة لوحدها وهي منهارة من العياط واتصلت بأميرة

ملك 

اميرة انا عرفت الحقيقة احمد بنفسه اعترف لي ان ابوه هو اللي كتب في الوصية انه يتجوزني وانا مش عارفة اعمل ايه

اميرة

 خلاص يا ملك سيبيه دلوقتي وما تفتحيش معاه كلام تاني وكده كده الامور بدأت توضح قدامك واحنا لازم نستنى حازم ونشوف هيعرف لنا ايه

ملك 

انا مش قادرة اصدق ان الانسان اللي حبيته كل ده كان داخل حياتي بسبب وصية وفلوس

اميرة 

اهدي يا ملك ومتعمليش حاجة من ورا دماغك لحد ما حازم يعرف الحقيقة 

وبعدها حازم بدأ يراقب تحركات احمد من بعيد وكان بيتابع الشركة والناس اللي بيتعامل معاه وفي يوم اتصل بملك

حازم

 ملك انا عرفت حاجة لازم تعرفيها بس لازم تكوني هادية وانتي بتسمعيني

ملك

 خير يا حازم انت قلقتني في ايه

حازم

 انا عرفت ان فيه شحنة ممنوعات داخلة باسم جوزك والشحنة دي فيها مخدرات والموضوع لو ثبت عليه ممكن يدخله في قضية كبيرة

ملك

 انت بتقول ايه يا حازم لا يمكن احمد يعمل كده انا مش قادرة اصدق اللي انت بتقوله

حازم

 صدقيني يا ملك انا مش هقول لك حاجة من غير ما اتأكد والشحنة فعلا مرتبطة باسمه

ملك 

يا نهار اسود يعني احمد ممكن يدخل السجن انا مش مصدقة اللي بيحصل لي ده

حازم

 ولسه فيه حاجة تانية عرفتها ومش عارف اقولها لك ازاي

ملك 

قول يا حازم انا خلاص مستعدة لأي حاجة

حازم

 احمد متجوز عليكي واحدة تانية يا ملك

ملك انهارت في العياط وحطت ايدها على وشها وقالت

ملك 

معقول احمد يعمل فيا كده ليه انا كنت انا كنت بحبه وكنت فاكرة ان مهما حصل بينا هو في يوم من الايام هيحس بيا انا ما كنتش متوقعة انه يوصل للدرجة دي

حازم

 انا عارف ان الكلام صعب بس لازم تعرفي الحقيقة عشان ما تفضليش عايشة في وهم

وقفلت معاه ونزلت عند حماتها وسحر كانت قاعده وملك قالت 

ملك

 ابنكم اتجوز وانتم كنتم عارفين انه متجوز

فايزة 

ابني متجوز ازاي انتي يا بنتي بتقولي ايه احمد عمره ما قال لنا حاجة زي دي

ملك

 طيب احمد فعلا متجوز واحدة تانية وعلى فكرة مراته دي غرقته في مصيبة وابنك هيدخل السجن قريب

سحر

 انتي بتقولي ايه سجن ايه اللي احمد هيدخله

ملك

 ايوه أخوكي هيدخل السجن بسبب شحنة مخدرات داخلة باسمه وانا عايزة اعرف هو عمل فيا كده ليه وليه ابوكم كتب له وصية تخليه ياخد كل حاجة لما يتجوزني

فايزة

 والله يا ملك انا ما كنتش اعرف حاجة عن الموضوع ده واحنا نفسنا مش فاهمين ابراهيم عمل كده ليه

سحر

 انا كمان ما كنتش عارفة غير موضوع الوصية وان احمد اتجوزك عشان الشرط اللي فيها 

ملك 

يبقى لازم نعرف هو عمل كده ليه ولازم نروح له ونخليه يقول كل حاجه 

وفعلاً خرجت ملك مع سحر وفايزة وراحوا الشركة لكن قبل ما يوصلوا كان احمد اتقبض عليه بسبب قضية المخدرات والشحنة اللي وصلت باسمه

سحر

 يا نهار اسود احمد اتقبض عليه يا ماما 

ملك

 انا مش مصدقة ان كل ده حصل في يوم واحد

فايزة 

يا حبيبي يا بني مين اللي عمل فيه كده 

وبعدها راحوا لأحمد بعد القبض عليه وسألوه عن سبب الوصية وهو حكي وقال 

#فلاش باااك

 كان فتحي ابو ملك بيتكلم مع ابراهيم ابو احمد  

فتحي

اسمع يا ابراهيم انا حطيت لك كل الفلوس اللي كانت معايا في الشغلانه اللي انت غرقتني فيها دي يبقا انت لازم تتصرف وتشوف لي موضوع الفلوس ده لان انا ما بقاش حاجه 

ابراهيم 

وانا مالي يا فتحي هو مش انت اللي حطيت الفلوس وانت عارف انها دخلت شغل

فتحي

 ما انا حطيت كل اللي معايا وكل ده راح وخسرنا 

ابراهيم

 ايوه خسرنا والفلوس كلها راحت وانا ما اقدرش ارجع لك الفلوس دي 

فتحي 

طيب وانا هعمل ايه دلوقتي بيتي ما فيهوش جنيه واحد انا جبت لك كل الفلوس اللي معايا وكمان بعت دهب مراتي حرام عليك يا ابراهيم ليه تعمل فيا كده وانت كنت عارف ان الشغلانة خسرانة من الاول

ابراهيم 

هو انا كنت اعرف منين يا فتحي انا كنت فاكر ان الشغل كويس وان الفلوس هتدخل لنا مكسب كبير

فتحي

 منك لله يا شيخ ربنا ينتقم منك الفلوس دي في رقبتك انت

وفجأة فتحي وقع على الارض ومات وبعدها عرف ابراهيم ان فتحي مات بجلطه في القلب وحس  بالندم  وراح لابنه احمد وقال له

ابراهيم

اسمع يا احمد انا عايزك تتجوز بنت فتحي وتعوضها عن كل حاجة حصلت لابوها وبعد ما تعدي سنة كاملة ترجع لها فلوس ابوها اللي كانت معايا وتقول لها الحقيقة كلها

احمد

 بس انا مش هينفع اقول لها الكلام ده يا بابا دلوقتي هي لسه صغيرة ومش هتقدر تستوعب 

ابراهيم

 انا عارف عشان كده هتستنى لحد ما تكبر وتفهم لكن لازم كل شهر تبعت لهم فلوس هي وامها ومهما حصل ما تسيبش حق البنت يضيع

احمد 

حاضر يا بابا انا هنفذ اللي انت عايزه

وبعد فترة مات ابراهيم وفضل احمد شايل السر لوحده لحد ما اتجوز ملك ونفذ وصية والده

#باااااك

 ملك كانت بتعيط ومش قادرة تستوعب اللي سمعته

ملك

 انا مش قادرة اصدق ان كل اللي حصل ده كان بسبب فلوس ابويا حرام عليكم انت وابوك انا كنت عايشة طول الوقت وانا فاكرة اني اتجوزت عشان احمد اختارني

فايزة

 خلاص يا ملك ابني دلوقتي في اللي هو فيه وكل حاجة راحت منه وانتي عرفتي الحقيقة خلاص سيبيه في حاله

ملك 

انا مش عايزة منه حاجة غير انه هو يطلقني وبس 

وبعدها احمد طلق ملك واتسجن بسبب المخدرات وعدت الايام وملك فلوس من ورث احمد وبعدها حازم راح يطمن عليها

حازم

 عامله ايه يا ملك طمنيني عليكي ايه الاخبار 

ملك

 انا متشكرة قوي ليك يا حازم انا ما كنتش عارفة اعمل ايه من غيرك انت الوحيد اللي وقفت جنبي

حازم

 ما تقوليش كده يا ملك انا في ضهرك دايما واللي انتي عايزاه كله هعمله لك المهم انك تبدأي حياة جديدة وتنسي اللي فات

ملك

 ربنا يخليك يا حازم بجد انا مش هنسي وقفتك جنبي

وبعد فترة حازم قرب من ملك اوي وبقوا يتكلموا علطول لحد لما اتقدم لها وفعلا وافقت عليه واتجوزته وبعدها رقيه حاولت تكلمها بس هي رفضت وعاشت مع حازم في سعادة 

                تمت بحمد الله 

لقراءة باقي الفصول من هنا