بالعصر خالتو فوزيه جاتنا دخلتا جوه وبالي كان معاهم كانوا بتونسوا ونسه عاديه إرتحتا حبه مشيت قعدتا في سريري إتزكرتا الجبنه في النار طلعتا لقيتا فارت نزلتها وكبيتا في الحافظه ورصيت الكبابي في الصينيه كنتا عامله فشار وامي جايبه فنكوش جاهز كبيتهم وشلتها ومشيت ختيتا وقعدتا اكب ليهم في القهوه لمن خلصتا مديت لي خالتو فوزيه وأمي ولجين وقعدتا كبيت لي نفسي خالتو فوزيه قالت لي أمي بالنسبه لي موضوع امجد ولمار انا عارفه إنو امجد ولدي إتأخر شديد بس الحمد لله امجد لقى ليهو شغل كويس ح يتم تشطيب البيت ويجي يتم العرس أمي قالت ليها ربنا يتمم ليهم انا شغاله اقول في سري الله يطلعني من المصيبه الدخلتا نفسي فيها دي
مرت الايام ونزلتا إمتحانات قعدتا اقرأ وضغطا نفسي شديد كنتا عايزه ادخل علمي ولازم اجيب نسبه سمحه تأهلني ادخلوا سمعتا إنو امجد جاء بس لاهو جاني لا انا مشيت ليهم لحدي ما خلصتا الامتحانات حتن إرتحتا جيت من المدرسه فرحانه فرح إنو خلاص إنتهيت طلعتا تلفوني من الدولاب وفتحتو دخلتا الفيس والواتساب إتصفحتا كدا وقفلتوا بالعصر جاتنا خالتي بي اولادا شفع وعبيطين عباطه عملتا قهوه وشلتها وديتا لي خالتي وقعدنا نتونس مع خالتي هي عندها ولدين محمد واحمد ما توأم محمد عمرو خمسه سنه واحمد سنتين نتونس كدا بلا اشوفهم ليك دخلوا غرفتنا ياخ بقيت قاعده على اعصابي وجاتني تخيلات إنهم لمسوا مكياجاتي ولا ملابسي جريت لحقتهم لقيت تلفوني الما بغباني واقع في الارض والشاشه في مكان والبطاريه في مكان قلبي وقع معاهو مشيت ليهم وانا زعلانه زعل دقيتهم لمن بكو وطلعتهم من الغرفه لقطتا تلفوني وقعدتا ابكي ما كان فيهو حته سليمه شكيتم طلعتا امي قالت لي مالك على الاولاد ديل قدرك قلتا ليها كسرو تلفوني شوفي وريتا التلفون خالتي هرجتهم لمن بكوا امي قالت ليها خليهم وإنتي اصبري لي بس زعلتا زعل مشيت خليتهم لبستا توبي وطلعتا مشيت ناس نسرين صحبتي قعدتا إتونستا معاها حبه ووريتا التلفون قالت لي مبالغه وقع من وين؟! حكيت ليها القصه قالت لي إنتي من البدايه تلميهو ما تخليهو ليهم قلتا ليها انا كنتا عارفه إنهم جايين؟ اكيد لو عارفه ما كنتا خليتو ليهم قالت لي إنتي امجد بتاع تلفونات ممكن يصلحو ليك صح قلتا ليها اي بصلحو قالت لي طيب وديهو ليهو يشوفو ليك قبل الشمس تغيب قلتا ليها احسن اوديهو ليهو بكره الصباح قالت لي يابت احسن هسي بكون مافي زحمه جمبو اخير ليك عشان يشتغلو ليك سمح قلتا ليها على فكره حتى لو مشيت ليهو الصباح بشتغلو لي هو عندو غيري 😌 قالت لي اكيد لأ قلتا ليها ارح معاي نمشي ليهو قالت لي دقيقه بس البس عبايتي ونمشي....
الفصل الرابع
بتاع امجد هو محزرني ما اجي بي توب بس انا بحب التوب وما بقدر البس العبايه بحس بيها تقييله ومقيده لقينا في كم زول كدا واقفين إنتظرناهم ودخلنا ليهو كان منتبه مع جهاز شديد حتى ما إنتبه لينا إلا بعد إتكلمتا رفع راسو عاين لينا قال لي لمار قلتا ليهو شوف يا امجد تلفوني حصل فيهو شنو مسكو مني وشافو قال لي داير شاشه رميتي كيف إنتي حكيت ليهو الحصل قال لي طيب دقيقه جاب ليهو شاشه فتح التلفون وغير الشاشه كلها المهم قريب نص ساعه واقفين
نسرين قالت لي انا ح امشي قدامك شكلو ح تطولي قلتا ليها إنتظريني ياخ قالت لي يابت امي ح تقتلني والمغرب ازن تعالي مع امجد ومشت خلتني قعدتا في الكراسي ومنتظراهو لحدي ما خلص قال لي عملتا ليهو إستيكر ووقف جاب لي جرابات قال لي إختاري واحد اخترتا منهم ركبو لي واداني التلفون منظرو بقى حلو شديد قال لي حافظي عليهو تاني مره قلتا ليهو سمح رجع للتلفون الاول قلتا ليهو طيب انا ح امشي قال لي دقيقه اقعدي عاينتا ليهو قال لي اقعدي قعدتا إنتظرتو لحدي ما خلص قال لي ارح قفل المحل وجينا طالعين سوا قال لي انا كم مره حزرتك ما تلبسي توب مارديت عليهو قعدتا اتمتم بي براحه قال لي ما سامعك قلتا ليها مافي حاجه ولبستا التوب بعدين إنتا مالك ما عشان عقدتا علي تتخيل إنك ممكن تتحكم فوقي في الطالعه والنازله بعدين كل البنات بلبسوا تياب وقفت علي؟!
سكت ما قال لي حاجه لحدي ما وصلني ومشي دخلتا لاقتني لجين قالت لي كنتي وين قلتا ليها مشيت صلحتا تلفوني مالك قالت لي ادخلي غسلي العده ديك انا من الصباح شغاله دخلتا غسلتا العده ومشيت رقدتا...
مرة الايام ونتيجتنا طلعت وزي كل مره نجاح امي وابوي جابو لي هدايا وامجد وعدني إنو يطلعني مشوار فكرتا فيها وقلتا في نفسي دي فرصتي إتكلم معاهو بي وضوح واوريهو اي حاجه عشان اي زول يشوف طريقو لمن جاء اليوم ال ح نطلع فيهو جهزتا نفسي من بدري لمن إتصل لي طوالي طلعتا ليهو عزمني في مطعم كان سايق عربية واحد صحبو مشينا قعدنا قال لي نطلب شنو قلتا ليهو اي حاجه طلب بيتزا وكوكتيل قال لي اها قررتي علمي ولا ادبي قلتا ليهو علمي طبعا عايزه ابقى دكتوره قال لي حلو بعدين ح نستقر في الخرطوم تشتغلي هناك رأيك شنو قلتا ليهو بي مناسبة نستقر دي امجد انا عايزه إتكلم معاك في موضوع قال لي اتكلمي من متين بتستأذني يعني سكتا مسافه وقلتا ليهو يا امجد ما ينفع إنو نحن نكمل مع بعض.....