قالت لي فعلا والله ما معاك حق هسي خليك من دا يا لمار هسي ح تعملي شنو ما عايزه ترجعي ليهو قبيل كان السبب إنو ما متعلم وهسي بقى متعلم قلتا ليها عليك الله يا ريم ما تمليني فقر هو خلاص اختار طريقو و إحتمال يتزوج كمان ما عايزه إدخل في حياتو انا بقول ليك ما قادره إتجاوز الكلام القلتو ليهو وإنتي بتقولي لي في شنو قالت لي يا لمار دي حاجه طبيعيه بعدين هو لمن إتزوجك إنتي كنتي صغيره وما فاهمه حاجه الكلام الانتي قلتيهو كلام عادي جدا ولاحظي لانك ما قلتي ليهو بالمعنى الحرفي إنو بعيق مستقبلك عشان كدا إتجاوزي قلتا ليها عليك الله يا ريم اسكتي وخلينا نمشي الكافتريا نطلب حاجه ناكلا قبل نمشي البيت قالت لي ارح مشينا طلبنا بعد خلصنا مشينا البيت كان فاضل لينا اسبوع واحد ونخلص السمستر الاول في تالت في الاسبوع دا إنضغطنا شديد خلصنا جزو من المواد نزلنا امتحانات اخر امتحان كان كميونتي ياخ الكميونتي دي بكره كره من اولى كرهتها وهسي تاني جاتنا طبعا دي الماده الماسكا امجد ماده غياظه خلاص ريم جاتني قالت لي نقعد نقرأ سوا بدينا فيها من اول اسلايت ما فهمنا حاجه ريم قعدت تضحك قالت لي بكره ح نسقط في الامتحان دا قلتا ليها قلبك ميت هسي نحن ح نسقط تضحكي قالت لي عندي فكره كلمي ولد خالك دا يجي يشرحا لينا قلتا ليها لالا ياخ قالت لي ماف حل غير كدا صدقيني بكره ح نسقط والمشكله الماده دي مهمه قلتا ليها برضو ما بتصل ليهو تعالي نشوف البنات في القروب يمكن نلقى وحده فاهمه تشرح لينا قالت لي سمح اسأليهم دخلتا رسلتا ليهم في بنات كانن داخلات قالن لي كلنا ما فاهمين حاجه يادوب ماشين نقراها ريم قالت لي اها ح نعمل شنو قلتا ليها ح نقرأ بس إنتي ترجمي المحاضره دي وانا بترجم دي ونجي نشرحها امسكي بدينا نترجم لحدي ما خلصنا بقيت اشرح ليها وهي تشرح لي لحدي ما خلصنا عملنا لي بعض اختبار ريم قالت لي انا ح امشي الوقت إتأخر قلتا ليها اقعدي حبه بقدمك قالت لي لالا هوي المغرب قرب يأذن ما بقدر اقعد قلتا ليها طيب إنتظري البس توبي واقدمك مشيت لبستا توبي وطلعتا قدمتها حبه وجيت راجعه لاقوني لجين وتالين في الشارع قلتا ليها ماشه وين يا وليه بعد المغرب🙂 قالت لي بت حلال والله هاكي مدت لي قروش قلتا ليها دا شنو قالت لي جيبي لي لبن رطل من الدكان وعايزه لي سكر بي ٢٠٠٠ والباقي جيبيهو لبان قلتا ليها هوي انا بكره عندي امتحان قالت لي هاك يا اختي فرجي كربتي الله بفرج كربتك مسكتا منها القروش وحمرتا ليها قالت لي بنتظرك في البيت اسرعي قلتا ليها امري لله مشيت وقاعده اتكلم مع نفسي بالله الدكان كلو فلعة حجر سجمانه خلاص وإنتكاليه ما عارفه راجلا دا زاتو متحملا كيف سمعتا زول بقول لي جنيتي؟ إتلفتا لقيت دي سهى بت جيرانا قلتا ليها فاضل لي حبه قالت لي الله يعينك وصلتا الدكان إشتريتا الحاجات وطلعتا ولسوء حظي لمن وصلتا الدكان كان المغرب صلوا لمن طلعتا من الدكان الكهربه قطعت والارض كلها ضلمت بقيت ماشه ويدي في قلبي وشايله الحاجات حسيت بزول ماشي وراي ولمن إتلفت ما بلقى حاجه خفتا زياده اخر مره إتلفتا ما لقيت حاجه بس خوفي زاد بقيت ماشه سريع سريع الساعه السمعتا صوت كلب نبح فكيت الجريه ما وقفتا إلا جم حلتنا قلبي بضرب من شدة الخوف ياخ انا بكره الضلام دا كره ختيت يدي في وشي بستغفر صلحتا توبي ومشيت على البيت سمعتا صوت ناس بتكلموا يا دوب إطمنتا لمحتهم لقيت ديل اولاد حلتنا طالعين من الجامع ومعاهم علي اخوي بس بقيت ماشه وراهم لحدي ما وصلتا البيت دخلتا لقيت الباب فاتح وسامعه في صوت ناس جوه ما دخلتا قعدتا في الحوش حبه غسلتا رجليني ووشي وصلحتا التوب دخلتا لقيت دي خالتو فوزيه ام امجد وبناتا عندها بتين امنه وامل سلمتا عليهم لجين قالت لي إتأخرتي مالك قلتا ليها كان في زحمه في الدكان .قعدتا معاهم حبه وبعدها مشيت اكمل قرايتي
الفصل الرابع عشر
صباح اخر امتحان صحيت بدري جهزتا نفسي مشيت الموقف عايزه اركب في عربيه وقفت قدامي الباب فتح لقيت دا امجد قال لي ارح اركبي اوصلك معاي ما قدرتا اعترض ركبتا دور ماشين على الجامعه قال لي كيف الامتحانات معاكم قلتا ليهو الحمد لله كويسه بس خايفه من الكميونتي قال لي مالا الكميونتي قلتا ليهو بصراحه ما بحبها قال لي عشان انا بقريكم ليها ؟ وإنتي بتكرهيني عشان كدا بقيتي تكرهي الماده؟ قلتا ليهو ما تفسر من راسك من زمان بكرها والله بحس إنو فيها معلومات ما منها فايده قال لي زي شنو قلتا ليهو يعني صحة المجتمع وتلوث الهواء والكلام دا دا كلام فارغ ساي قال لي هو ما فارغ بس حسب إنتي بتعايني ليهو من ياتو ناحيه قلتا ليهو كيف يعني ما فهمتا قال لي مثلا لو قريتي الكميونتي وإتخيلتي الموضوع على إنك حاليا في الطبيعه ح تفهمي حاجات كتيره قلتا ليهو ياخ انا ما بحب حاجات التخيل دي عشان كدا ما بحبها قال لي بتتبسط لو عملتي كدا المهم جاهزه ل أمتحان الليله قلتا ليهو قريت بس الباقي توفيق من الله بعدها سكتنا لمن قربنا نصل قلتا ليهو امجد... قال لي ايواا قلتا ليهو خلاص خليتك كان نفسي اقول ليهو انا اسفه حتى لو الاعتزار ما بمحي حاجه بس على الاقل ما يكون زعلان مني وصلنا الجامعه نزلتا شكرتو ومشيت قبل إنتظر ردو وصلتا مكان قاعة الامتحانات لقيت ريم واقفه بره وتراجع قلتا ليها اها كيف وكيف قالت لي اسكتي يدي في قلبي إن شاء الله يجينا ساهل قلتا ليها إن شاء الله راجعتا معاها لمن وقت الامتحان جاء دخلنا سبحان الله جاء ساهل دي اول مره تجيني الكميونتي سهله حليتا وطلعتا إنتظرتا ريم جات بعدي تجري قالت لي واو الامتحان رهابه عديل كدا والله انا بديت احب دكتور امجد دا🤣 قلتا ليها هوي إتلمي قالت لي ما قلتا حاجه كلامي عادي قلتا ليها المهم نحنا خلصنا ارح نطلع محل نفرق قالت لي ارح كوين قلتا ليها نمشي ناكل اسكريم قالت لي اي الحجم العائلي🤣 قلتا ليها سمح نمشي العصر قالت لي ظابط ارح ناكل حاسه إني فقدتا سوائل كتيره ايام الامتحانات دي قلتا ليها ارح مشينا طلبنا وقعدنا ناكل قالت لي هسي يا لمار بكون دكتور امجد دا جاب لينا امتحان ساهل ليه مع إنو هو دكتور صعب🐸 قلتا ليها وانا البعرفني شنو اجي قالت لي شكلوا ما عايز زول يسقط في الامتحان🥺 طلع دكتور بحس ما زي باقي الدكاتره🙂 قلتا ليها المهم جانا ساهل ودا الاهم....اثناء ما بتكلم فهمتها هي بتلمح لي شنو قلتا ليها احسن ليك تاكلي وإنتي ساكته يا ريم عشان ما اقبل عليك قالت لي حاضر اكلنا وبعدها طلعنا مشينا البيت العصر إظبطا وكلمتا ناس البيت إني طالعه مع ريم ،،،،جاتني وطلعنا مشينا كوين طلبنا ايسكريم الاتنين مجنونات فراوله بالشوكلاته بنحبها حب طلبنا الحجم العائلي🤣 وإتصورنا وإتعاورنا سمح وبعدها اكلنا الايسكريم