قلتا ليهو يا امجد ما ينفع إنو نحن نكمل مع بعض انتا إنسان طيب وعلى قدر حالك بس انا عندي احلام كتيره ما عايزه احبطك لكن انا ما عايزه يكون الزواج عائق بالنسبه لي حاسه الزواج دا مسئوليه وإلتزامات وانا ما بفكر فيهو اي صح انا وافقتا عليك بس يا امجد ما بي إرادتي وحتى لمن وافقتا عليك دا لانو إنتا اول إنسان اعرفو ويتقدم لي وكدا بس لمن راجعتا نفسي وكبرتا وفهمتا لقيت إنو القرار دا ما في صالحي ولا انا عايزاهو عارفه إنو قراري دا جاء فجأه بس إتمنا يا امجد تتقبل كلامي وياريت لو ممكن تطلقني ما ردا علي والعملو بس كان بعاين لي بعد مسافه قال لي انا بعيق مستقبلك !! لمار انا بشوف فيك الما قدرتا احققو في نفسي انا بحس إنو نجاحك نجاحي انا عمري ما إتخيلتا إنو ممكن اكون ليك عائق لكن اي حاجه كانت واضحه من البدايه كلامك صح نحن ما بننفع لي بعض إنتي زول متعلمه وقاريه وانا لأ إنتي عندك مستقبل باهر وانا لأ وعشان كدا انا ح ابقى ليك عائق كلامك صح مشكلتك يا لمار بتشوفي الامور من منظورك إنتي عمرك ما شفتيها من منظور تاني عمرك ما قدرتيني ولا حتى اديتيني مكانه رغم إنو انا عاقد عليك ولينا تلاته سنه بس عمري ما شفتا منك حاجه سمحه قلتا ليهو الافضل كل زول يسلك طريقو إنتا ربنا يديك بت الحلال التسعدك وتستاهلا وانا ربنا يوفقني واكملي دراستي واحقق احلامي وطلعتا طوالي اجرتا عربيه ومشيت البيت ما إنتظرتو حتى انا متأكده ميه بالميه إني كسرتو وشديد طول التلاته سنه دي كنتا بشوفو بس السند البقيف معاي في اي لحظه ما حصل إحتجتا ليهو ما لقيتو ياخ لو إحتجتا لي اي حاجه بلقاهو هو اول زول رجعتا البيت لاقتني لجين قالت لي إشي على الطلوعات يلا احكي لي مشيتو وين قلتا ليها ما عارفه وخليني في حالي يا لجين دخلتا وقفلتا الباب وراي قعدتا في السرير بفكر في العملتو ممكن بي سبب الحصل دا عادي لو امجد كلم اهلو علاقتنا ما تبقى زي اول ودا عيب العرس من الاهل بس إن شاء الله امجد يوافق يطلقني دي اهمه حاجه في الموضوع مرة زي تلاته يوم ما شفتا فيها امجد نهائي غير مره واحده لاقيتو وما إتكلم معاي حاول يتجنبني والتلاته يوم بقوا شهر نزلتا كورسات لي تالت وبقيت امشي كل يوم مره سمعتا خالتو فوزيه جات لي امي وإتكلمت معاها تقريبا قالت ليها إنو نحن متشكلين لانو امي جات سألتني مشيتا بس قلتا ليها مافي حاجه لحدي ما نزلتا تالت.....
الفصل السادس
لمن نزلتا تالت امجد طلقني وسافر طوالي ما عارفه ليه بس زعلتا لكن مع ضغطت تالت نسيت الموضوع سريع إجتهدتا شديد نفسي ادخل طب قريت وساهرتا وتعبتا لحدي ما الامتحانات جات يمكن الفتره دي اكتر فتره تعبتا فيها واكتر فتره كانت صعبه لحدي ما إمتحنتا وإنتهيت امجد ما شفتوا ولو بالصدفه وحتى اخبارو عننا إنقطعت فقدتو كتير ايام الامتحانات كان دايما بشجعني ولمن اخلص يجيب لي هدايا بس خلاص اي زول شاف طريقو بقيت منتظره الجامعه وبختار في الجامعات ال ح اقرأ فيها طب فكرتا في ام درمان والسودان وجامعات كتيره وحتى بحثتا عن الجامعات المميزه والبيئه ما خليت حاجه ناس بيتنا كانو متوقعين يزيعوني عديل لحدي ما جاء يوم النتيجه كان اصعب يوم في حياتي وحلفتا ما ادي زول رقم الجلوس حقي ابوي رسل لي الرصيد قال لي شوفيها شلتا تلفوني وكتبتا رقم الجلوس من الخوف لمن كتبتو غلط قبل اعمل إرسال دققتا فيهو لقيتو غلط مسحتو وكتبتو تاني وعملتا إرسال ياخ لمن سمعتا صوت الرساله لمن قلبي قرب يقيف ما قدرتا اشوفا اديت لجين قلتا ليها شوفيها مسكت التلفون فرحانه واول مل شافتو حسيت بي إبتسامتا إختفت تدريجيا قلتا ليها مالك انا نجحتا صح جبتا نسبه كويسه صح؟! في شنو يا لجين ردي؟! قالت لي يا لمار إنتي نجحتي الحمد لله ونسبتك سمحه شديد بس ما أظن النسبه الانتي دايراها قلتا ليها كيف ما فهمتا شلتا منها التلفون وشفتا النسبه!!!