وبعدها وهدان قرر يروح لهالة البيت عند أمها عشان يشوفها ولما وصل خبط على الباب وفتحت له سنية وأول ما شافته اتغير وشها وبصت له بغضب
سنية
خير يا وهدان بيه انت جاي هنا ليه بعد كل اللي عملتوه في بنتي مش كفاية اللي حصل لها ولا لسه جاي تكمل عليها وفاكر انك تقدر تدخل بيتنا وكأن مفيش حاجة حصلت
وهدان
انا جاي أطمن علي هالة يا سنية وعايز اشوفها ضروري ومش جاي علشان اعمل مشكلة انا بس عايز اطمن عليها
سنية
وتشوفها ليه مش كفاية اللي عملتوه وبعدين على فكرة انا عارفة ان انتم اللي عملتوا فيها كده ولو فاكر ان هالة ضحكت عليا بكلمتين وقالت انها ما تعرفش مين اللي كانوا خاطفينها تبقى غلطان
وهدان
خلاص بقى يا سنية خلصنا من الموال ده وخليني اشوفها واطمن عليها وبعدها انا همشي من غير وجع دماغ
سنية
ماشي استنا هنا وانا هنادي لك بس ياريت تكون جاي عشان تطمن عليها فعلا مش تزود عليها اللي هي فيه
وبعدها دخلت سنية عند هالة ولقتها قاعدة على السرير
سنية
يا هالة وهدان جه بره وعايز يشوفك انتي عايزة تقابليه ولا لا تنا ممكن اخليه يمشي
هالة
لا لا خليه يا ياما انا هاجي اشوفو هو جاي وعايز ايه
وبعدها هاله خرجت ووقفت قدام واهدان وهو مش عارف يبدأ كلامه ازاي
هالة
خير يا وهدان ايه اللي جابك عايز مني ايه تاني
وهدان
انا جيت عشان اطمن عليكي يا هاله واشوفك عامله ايه دلوقتي
هاله
اطمن اديني لسه عايشه ولو كان ابني راح مني اعتقد اني كنت مت بجد
واهدان
بعد الشر عليكي وانا ما قدرتش اقتل ابننا يا هالة وخليت محروس يحافظ عليكي وبدل ما يعمل اللي بهيرة طلبته منه خليته يروح يقول لها انه هو اللي عمل كده وان الحمل نزل عشان تسيبك
هالة
كتر خيرك يا وهدان المهم ان خلاص الموضوع انتهى وانا اصلا مش عايزة افتكر اي حاجة ويا ريت بقى تسيبني في حالي
وهدان
طب انا عايز اقعد معاكي شوية يا هالة انتي وحشاني قوي وعايز اتكلم معاكي حتى لو هتسمعيني بس ومش هتردي عليا
هالة
وانا مش عايزة اتكلم معاك وسيبني في حالي الله يخليك كفاية اللي جرى لي وكفاية الوجع اللي شوفته بسببك بعد الحب اللي انا حبيتهولك سبتني لمراتك تعمل فيا اللي هي عايزاه
وهدان
والله يا هاله انا كمان بحبك اوي واوعدك اني هرجع كل حاجه زي ما كانت وانتي هترجعي مراتي وهنربي ابننا سوا مش عايزك تزعلي مني ارجوكي يا هالة انا عارف اني غلطت في حقك بس صدقيني انا هصلح كل ده
هالة
خلاص يا وهدان اللي حصل حصل ومفيش كلام هيغير اللي فات وانا مش هستني منك وعود تاني
وهدان
لا أرجوكي صدقيني وانا والله بوعدك اني هخلص كل ده وهرجعك تاني وهنعيش مع بعض
هالة
اعمل اللي تعمله يا وهدان وانا مش هستني اي وعد تاني وهسيب الايام هي اللي تثبت لي صدق كلامك
وهدان
والله انا بتكلم بجد وبقولك من دلوقتي انا مش هسمح لبهيرة أنها تفضل متحكمة في حياتي أكتر من كده وهتشوفي
هالة
خلاص بقى يا وهدان اعمل اللي انت عايزة بس ارجوك انا مش عايزة وجع تاني
وهدان
مفيش وجع تاني خلاص انا عايزك خلي بالك من نفسك ومن اللي في بطنك وانا هاجي لك تاني ومش هسيبك مهما حصل
وبعدها خرج وهدان من عندها وافتكر اليوم اللي اتفق فيه مع محروس
#فلاش باك
وهدان
بقولك ايه يا محروس انا عايزك في موضوع مهم ومش عايز الكلام ده يطلع لحد مهما حصل
محروس
خير يا بيه اؤمرني وانا تحت أمرك واللي حضرتك هتقوله هيكون بيني وبينك
وهدان
خد الفلوس دي كلها ليك انت بس وانا عايزك تعمل حاجة مهمة هطلبها منك من غير بهيرة ما تعرف
محروس
ايه ده يا وهدان بيه معقوله كل الفلوس دي ليا ده تؤمرني وانت عارف اني خدامك وعمري ما هرفض لك طلب
وهدان
انا عايزك تروح لبهيرة وتقول لها انك نفذت اللي هي طلبته وانك خليت هالة تنزل الحمل وخليها تصدق ان العيل اللي في بطن هاله نزل خلاص
محروس
ايوه يا بيه بس ده لو بهيرة هانم عرفت اني بضحك عليها جنابك عارف كويس هي ممكن تعمل فيا ايه
وهدان
بهيرة مش هتعرف حاجة انت بس نفذ اللي انا بقول لك عليه وخد الفلوس دي وهديك فلوس تاني وماتقلقش من حاجة
محروس
وانا خدامك يا بيه وهعمل لك كل اللي انت عايزه حاضر انا هروح لبهيرة هانم وهقول لها اني خلصت على العيل اللي في بطن الست هالة
وهدان
برافو عليك يا محروس وافتكر ان حياة هالة أمانة في رقبتك ومش عايز يحصل لها أي أذى
#باك
وبعدها عسران راح عند اخته سنية علشان يطمن على هالة ولما دخل البيت لقاها
عسران
الحمد لله اني لقيتك موجودة يا هالة واطمنت عليكي بس قوليلي ايه اللي حصل لك كنتي فين كل الفترة دي
هالة
مافيش يا خالي اللي حصل حصل وانا رجعت اهو وفي بيتنا ومش عايزة حد يفتح معايا في المواضيع دي تاني ولا يفكرني باللي حصل لي
عسران
بس يا بنتي احنا خايفين عليكي وعايزين نعرف ايه اللي حصلك علشان نقدر نحميكي
هالة
انا فاهمة يا خالي بس انا دلوقتي لازم ادخل استريح عن اذنكم
وبعدها سابتهم ودخلت اوضتها وقفلت الباب وعسران قال لسنيه
عسران
هي بنتك مالها يا سنية مش طايقة نفسها ليه كده وبعدين هي كانت فين
سنية
ما اعرفش يا عسران هي من ساعة ما رجعت وهي ساكتة ومش عايزة تحكي أي حاجة وكل ما اسألها تقولي سيبيني انسى اللي حصل
عسران
ماشي يا سنية ربنا يصلح حالها ويهديها وان شاء الله الأيام الجاية تكشف لنا كل اللي مستخبي
وعند بهيرة في الفيلا كانت قاعدة لوحدها وبعد شوية دخلت الدكتورة اللي كانت كشفه عندها ومعاها التحاليل وبهيرة قالت لها باستغراب
بهيرة
خير يا دكتورة في حاجة ولا ايه انتي جاية ليه دلوقتي
الدكتورة
انا كنت جاية لحضرتك يا بهيرة هانم علشان موضوع مهم قوي ومش حبيت اتأخر في اني ابلغك بيه
بهيرة
في ايه وايه الموضوع المهم اللي انتي جاية لي فيه انتي قلقتيني كده اتكلمي وقولي في ايه
الدكتورة
دلوقتي التحاليل اللي كانت معمولة لحضرتك عندنا اتبدلت مع تحاليل حد تاني وانا للأسف اكتشفت الغلط بعد ما النتيجة اتسجلت والتحاليل اللي معاكي دي مش بتاعتك يعني انتي مش حامل ولا حاجه
بهيرة
انتي بتقولي ايه انتي مجنونة ولا ايه انتي عقلك خف ولا إيه يا دكتورة ازاي يعني التحاليل اللي معايا مش بتاعتي وانتي بنفسك قولتيلي اني حامل
الدكتورة
يا بهيرة هانم اهدي وانا جايه اكلمك بالراحة واقول لك على اللي حصل وفعلا التحاليل اللي معاكي مش بتاعتك والبنت اللي في المعمل هي اللي غلطت في النتيجة من غير قصد
بهيرة
انا ما يهمنيش البنت اللي غلطت ولا المعمل كله انا دلوقتي اللي يهمني ان انا اكون ام وانتي جايه بتقوليلي بعد كل الفرحة اللي عشتها اني مش حامل ازاي الكلام ده يحصل وانا كنت مصدقة ان جوايا طفل
الدكتورة
انا مقدرة صدمتك والله وعشان كده جيت لك بنفسي وانا بقول لك الحقيقة علشان ما تفضليش واهمه نفسك انك حامل وانتي في الحقيقة مش حامل
بهيرة
خلاص يبقى انا لازم ابقى حامل وانتي اللي تجيبي لي طفل
الدكتورة
أجيب لك طفل يعني ايه يا بهيرة هانم انا مش فاهمة حضرتك عايزة مني اعمل ايه
بهيرة
يعني انا عايزاكي تتصرفي وتجيبي لي عيل وانا هعمل نفسي حامل ولو ما نفذتيش اللي انا بطلبه منك انتي ما تعرفيش انا هعمل فيكي ايه انا ممكن اخليكي تندمي انك جيتي لي هنا
الدكتورة
ارجوكي يا بهيرة هانم انا ما بتهددش ولا ليا علاقة بأي حاجة غير التحاليل وانا عملت اللي عليا وجيت اقول لك الحقيقة
بهيرة
وانا ما بهددش يا دكتورة انا بنفذ على طول وانتي تعملي اللي انا بقول لك عليه وتجيبي لي عيل ضروري انتي سامعه ولا لأ
الدكتورة
ايوه بس اجيبه لك منين يا هانم انا مش فاهمة حضرتك انتي فاكراني ايه بالظبط
بهيرة
بصي انا ما اعرفش الكلام اللي انتي بتقولي عليه ده انتي بس عليكي تتصرفي وتجيبي لي عيل وانا يكون عندي طفل والموضوع ده ما يخرجش من البيت ده ولا حد يعرف حاجه
الدكتورة
خلاص انا هشوف انا هقدر اعمل ايه بس ارجوكي سيبيني امشي دلوقتي
بهيرة
اتفضلي امشي بس خليكي فاكرة اني مستنية منك حل ومش عايزة اسمع كلمة معرفش تاني
وبعدها الدكتورة سابت الفيلا ومشيت وفضلت بهيرة قاعدة مكانها وهي متضايقة ومش مصدقة اللي سمعته وفضلت تكلم نفسها
بهيرة
انا هعمل ايه دلوقتي يعني وهقول لوهدان ايه انا كنت فاكرة ان كل حاجة خلصت وان الحمل هيخليني اضمنه دلوقتي هتصرف ازاي انا مش عارفة اعمل ايه
وبعد شوية دخل وهدان الفيلا ولما شافها قاعدة لوحدها وبتتكلم مع نفسها قرب منها باستغراب
وهدان
في ايه يا بهيرة مالك بتكلمي نفسك كده ليه من ساعة ما دخلت وانتي عماله بتكلمي نفسك في إيه
بهيرة
لا لا مافيش يا وهدان وبعدين هو انت كنت فين كده بقى لك من الصبح يعني بقى لي فترة مش شايفاك انت فين يا حبيبي
وهدان
هكون فين يعني وبعدين ما انتي عارفة اني كنت في الشونة بشوف الشغل وبتابع الاشغال بتاعتي يعني هكون فين يعني
بهيرة
اه طيب يا حبيبي على العموم انا طالعة استريح اصل الحمل تاعبني قوي وحاسة ان جسمي كله مهدود
وهدان
الف سلامة عليكي يا حبيبتي روحي استريحي يا بهيرة وماتتعبيش نفسك
بهيرة
حاضر يا وهدان تصبح على خير
وبعدها طلعت بهيرة اوضتها ووهدان قاعد لوحده وكان عقله مشغول بهالة وفضل يفكر فيها ومش قادر ينساها وعدت الأيام وفي يوم وبهيرة راحت للدكتورة
بهيرة
هاا يا دكتورة شوفتي لي حل ولا لسه ما شوفتيش ما هو انا مش هفضل مستنية كده كتير انا عايزة حل للموضوع ده بسرعة
الدكتورة
انتي عايزة مني ايه يا بهيرة هانم يعني انا قولت لك اللي حصل وبلغتك انك مش حامل ومش عارفة اعمل لك اكتر من كده
بهيرة
انا عايزاكي تشوفي لي حل في موضوع العيل ده وتجيبي لي طفل صغير وانا اللي هكون امه ومحدش يعرف حاجه انتي سامعه كلامي ولا لا
الدكتورة
طيب ما انتي عندك الخدامة بتاعتك حامل وبتجي تتابع هنا وانتي ممكن تتفقي معاها وتاخدي منها الطفل اللي في بطنها وتربيه انتي
بهيرة باستغراب
الخدامة بتاعتي مين دي انتي بتتكلمي عن مين بالظبط يا دكتورة
الدكتورة
الخدامة بتاعتك اللي اسمها هالة ما هي بتيجي تتابع هنا عندي في المستشفى وانا اللي بكشف عليها بنفسي وهي كمان حامل في الشهر الرابع
بهيرة
انتي بتقولي ايه يعني هالة لسه حامل
الدكتورة
ايوه هالة حامل وبتجي هنا علشان تتابع الحمل عندي في المستشفى
بهيرة
طيب اسمعي يا دكتورة انا عايزاكي لما هالة تيجي لك هنا تتصلي بيا فورا وتعرفيني انها جات لك ومش عايزاها تحس بأي حاجة
الدكتورة
طيب ليه يعني هي مش شغالة عندك برضو وبتروح لك الفيلا عشان تشوف شغلها
بهيرة
لا مش عندي اصلها ماشية بقالها فترة وانا مش عايزة حد يعرف حاجه وانتي لازم تعرفيني اول لما تيجي هنا
الدكتورة
ماشي يا بهيرة هانم وانا هعملك اللي انتي عايزاه لما نشوف اخرتها إيه
بهيرة
تمام يبقا تنفذي اللي انا طلبته منك ولو ما نفذتيش انتي عارفة كويس انا ممكن اعمل ايه
الدكتورة
خلاص من غير ما تهدديني تاني انا هعمل اللي عليا وهبلغك اول لما هالة تيجي عندي
وبعد كام يوم هالة راحت المستشفى علشان تكشف وتطمن على حملها ودخلت عند الدكتورة وقالت لها
هالة
ازيك يا دكتورة انا كنت جاية لك النهارده عشان اطمن على الحمل أصل انا الفترة دي تعبانة شوية ومحتاجة اعرف كل حاجة كويسة ولا إيه
الدكتورة
اهلا يا هالة من عنيا هكشف عليكي طيب اديني بس الملف بتاعك واستني هنا دقيقة واحدة
هالة
حاضر يا دكتورة بس متتأخريش عليا
الدكتورة
طيب ثانية واحدة انا جاية لك حالا
وخرجت الدكتورة بسرعة من الاوضه ومسكَت تليفونها واتصلت ببهيرة
الدكتورة
هالة وصلت يا بهيرة هانم وهي موجودة عندي دلوقتي
بهيرة
خليها مكانها ومتقوليلهاش حاجة انا جاية حالا
الدكتورة
بس خلي بالك يا بهيرة انا مش عايزة يحصل لها حاجة عشان دي مسؤلية
بهيرة
انتي مالكيش دعوة انتي بس اعملي اللي اتفقنا عليه
وبعدها خرجت بهيرة من الفيلا وخدت معاها اتنين من رجالتها وراحت المستشفى ولما وصلت خلت الرجاله تخطف هالة وبعدها أخدتها لمكان بعيد وحبستها تاني
هالة
انتي عايزة مني ايه يا بهيرة وليه جبتيني هنا انا كنت عند الدكتورة علشان اكشف على حملي
بهيرة
هو انتي مش المفروض ان الحمل ده نزل يا هالة ولا ايه وازاي حامل لسه
هالة
الحمل ما نزلش ولا حاجة ومحروس ما عملش حاجة انتي كنتي فاكرة ان كلامه كان حقيقي هو ضحك عليكي
بهيرة
بقى كده يا حيوانة انتي خليتي محروس ايتفق معاكي عليا
هالة
والله مافي واحده حيوانه غيرك وانتي كمان واحدة واطية وما عندكيش اصل انا عملت لك ايه علشان تعملي فيا كل ده
بهيرة
بقا انا ما عنديش اصل طب انا هوريكي يعني ايه الكلام اللي انتي قولتيه وهخليكي تعرفي ان اللي بدأته معاكي لسه ما خلصش
هالة
حرام عليكي انتي بتعملي فيا كده ليه منك لله وربنا ينتقم منك على كل اللي بتعمليه فيا
بهيرة
انا هوريكي بقى انا هعمل فيكي ايه انتي هتفضلي هنا لحد ما تخلفي العيل اللي في بطنك ده ومش هتشوفيه بعد كده ولا هتعرفي هو راح فين
هالة
لا يا بهيرة حرام عليكي سيبيني امشي انا مش عايزة منك حاجة ولا حتى وهدان انا عايزة ابني وبس
بهيرة
العيل ده هو اللي انا نفسي فيه وهتجيبيه لي سواء عجبك الكلام او لا وانتي هتفضلي هنا ومحدش هيعرف مكانك ولا هيوصل لك لحد ما تخلفي
هالة
انتي ظالمة وربنا مش هيسيبك ومهما عملتي فيا الحق هيظهر في يوم من الأيام
بهيرة
خليكي فاكرة كلامك ده وانتي قاعدة هنا لوحدك
وبعدها سابت بهيرة ومشيت وقفلت عليها المكان وهالة فضلت قاعدة وهي بتعيط
هالة
يا رب انا ماليش غيرك يا رب رجعني لأمي واحفظ ابني من كل شر وخلي الحقيقة تظهر قبل ما يكون فات الأوان
بعد يومين من خروج هالة من البيت كانت سنية قلقانه عليها
سنية
يا ترى بنتي راحت فين بس من يوم ما خرجت عشان تروح تكشف عند الدكتورة وهي ما رجعتش أنا لحد دلوقتي وأنا قلبي مش مطاوعني وحاسة إن في حاجة حصلت لها
وبعدها خرجت سنية بسرعة وراحت على المستشفى عشان تسأل على هالة وراحت للدكتورة اللي كانت هالة بتكشف عندها
سنية
لو سمحتي يا دكتورة أنا جاية أسأل على هالة بنتي هي كانت عندك هنا من يومين عشان تكشف وأنا من ساعتها مش عارفة هي راحت فين ولا رجعت البيت
الدكتورة
أيوه فعلا هالة كانت عندي فعلا وكشفت وخلصت الكشف وبعدها أخدت بعضها ومشيت وأنا معرفش هي راحت فين بعد ما خرجت من عندي
سنية
يلهوي يعني هي راحت فين يا دكتورة دي ما رجعتش لحد دلوقتي وأنا أمها وقلبي واكلني عليها ومش عارفة أدور عليها فين ولا أجيب بنتي منين
الدكتورة
والله يا ست سنية أنا ما أعرفش هي راحت فين هي خرجت من المستشفى لوحدها وأنا شفتها وهي ماشية من عندي دوري عليها في أي مكان تاني يمكن تكون راحت عند حد من قرايبها
وخرجت سنية من المستشفى وهي حاطة إيدها على قلبها ودموعها نازلة ومش عارفة تعمل إيه وبعدها قررت تروح على وهدان يمكن هو الوحيد اللي يقدر يساعدها ويدور على هالة
سنية
الحقني يا وهدان بيه أنا مش عارفة أعمل إيه هالة راحت تكشف في المستشفى وبعد كده اختفت ولما رحت أسأل عليها قالوا لي إنها مشيت وأنا بقى لي يومين مستنية بنتي ترجع ومش عارفة عنها أي حاجة
وهدان
يعني إيه يا سنية هالة ما رجعتش البيت من يوم ما راحت المستشفى
سنية
أيوه يا وهدان بيه بنتي بقى لها يومين بره وأنا مش عارفة عنها حاجة الله يخليك دور لي عليها وهاتها لي أنا قلبي واكلني عليها وحاسة إن بنتي في خطر
وهدان
طيب طيب اهدي يا سنية وأنا هدور عليها بنفسي وهشوف راحت فين ومش هسيب الموضوع ده غير لما أعرف هاله فين
وبعدها وهدان راح المستشفى وهو غضبان ودخل على الدكتورة وسألها عن هالة
وهدان
هاله فين يا دكتورة ولو ما قلتليش الحقيقة انا هطربق المستشفى دي على دماغك دلوقتي حالا
الدكتورة
هو في إيه يا وهدان بيه هو حضرتك داخل عليا كده ليه وبعدين أنا ما أعرفش إنت بتتكلم عن إيه وليه داخل عليا بالطريقة دي
وهدان
بتكلم عن هالة اللي جت تكشف عندك هنا من يومين وبعدها خرجت وما رجعتش بيتها وأنا عايز أعرف هي خرجت من هنا راحت فين
الدكتورة
وأنا قولت إنها فعلا جت عندي وكشفت وبعد كده مشيت وأنا ما أعرفش راحت فين ولا عندي أي معلومة تانية عنها
وهدان
طيب اسمعيني كويس أنا لو عرفت إن ليكي يد في اختفاء هالة أو إنك مخبية عني أي حاجة أنا مش هرحمك وساعتها متلوميش غير نفسك
وبعدها سابها ومشي والدكتورة فضلت واقفة مكانها مستغربة من تهديده
الدكتورة
هو إيه الناس دي مفيش عندهم غير التهديد ولا إيه يا ساتر يا رب أنا مالي ومال الحكاية دي كلها
وبعدها لما خرج من عندها ومسكت التليفون واتصلت ببهيرة
الدكتورة
الو ايوه يا بهيرة هانم عايزة اقولك ان وهدان بيه جه عندي النهارده وسألني عن هالة وكان عايز يعرف هي خرجت من المستشفى راحت فين وأنا خفت جدا من كلامه وحسيت إنه شاكك في حاجة
بهيرة
انتي بتقولي إيه بقا وهدان راح لك وسألك على هالة أوعي تكوني قولتي له حاجة أو فتحتي بوقك بكلمة واحدة
الدكتورة
لا طبعا أنا مش مجنونة عشان أقول له بس هو هددني وقال لي إنه لو عرف إن لي يد في اختفائها هيطربق الدنيا على دماغي وأنا بصراحة خايفة ومش عارفة أعمل إيه
بهيرة
معلش يا دكتورة أنا هتصرف وما تحطيش الكلام ده في دماغك هو أصلا كده كده مش هيعرف يوصل لهالة ومحدش يعرف مكانها غيرنا
الدكتورة
ربنا يستر يا بهيرة هانم أنا خايفة قوي من اللي ممكن يحصل لو وهدان بيه عرف الحقيقة
بهيرة
ما تخافيش من حاجة وخليكي هادية ولو كلمك تاني قولي له نفس الكلام اللي قلتيه قبل كده وأنا هتصرف في الباقي
وبعدها عدت الأيام وهالة لسه محبوسه وكانت حالتها بتضعف يوم بعد يوم وأمها لسه بتدور عليها وبعد شهور طويلة وهالة لسه محدش عارف عنها حاجة لحد ما في يوم بهيرة كانت قاعدة في البيت وتليفونها رن ولما ردت سمعت صوت الممرضة اللي كانت سايباها مع هالة
الممرضة
الووو ايوه يا بهي ة هانم الحقيني المدام اللي هنا تعبانة اوي وأنا قولت أبلغك ان حالتها بقت صعبة جدا ولازم تتنقل المستشفى حالا عشان تولد فيها
بهيرة
لا لا مستشفي ايه أنا مش هولدها في المستشفى وأنا هجيب لها الدكتورة تولدها في المخزن اللي هي محبوسة فيه عندك انتي بس خلي بالك منها لحد لما اجيب الدكتورة
الممرضة
إزاي يا بهيرة هانم ده لازم تروح المستشفى دي تعبانة جدا وحالتها خطر وممكن يحصل لها حاجة هي والطفل
بهيرة
أنا مش عايزة أسمع الكلام ده خليكي معاها وأنا هجيب لها الدكتورة وأجي
وقفلت بهيرة التليفون وخرجت بسرعة من البيت وهي مش عارفة إن وهدان كان قريب وسمع كلامها كله وفهم إن هالة عندها وركب عربيته وفضل ماشي وراها من غير ما تحس
وبهيرة دخلت على الدكتورة وخدتها معاها وبعدها خرجوا وراحوا المخزن اللي هالة كانت موجودة فيه ووهدان فضل وراهم لحد ما عرف المكان
أول ما الدكتورة شافت هالة اتخضت من حالتها
الدكتورة
يا خبر ابيض دي يا بهيرة هانم حالتها صعبة جدا ولازم تتنقل المستشفى حالا دي قربت تولد ومينفعش أبدا نولدها هنا في المكان ده عشان عايزة مكان يكون في تجهيزات
بهيرة
وانا هجيب لك هنا كل اللي إنتي عايزاه بس تولديها هنا أنا مش عايزة حد يعرف مكانها
الدكتورة
أولدها هنا إزاي دي حالتها خطيرة وممكن يحصل لها مضاعفات وتموت وهي والطفل محتاجين مستشفى وتجهيز كامل
بهيرة
تموت ولا تغور في داهية المهم عندي إن الطفل يطلع عايش وأنا عايزة الطفل وخلاص
الدكتورة
طيب عشان خاطر سلامتها وسلامة ابنها لازم تروح المستشفى دي مش حاجة نقدر نتهاون فيها
بهيرة
اسمعي الكلام يا دكتورة ونفذي اللي أنا بقول لك عليه ومفيش كلمة تانية
وفجأة الباب اتفتح ودخل وهدان ومعاه رجالته وهو باصص لبهيرة بغضب شديد
وهدان
إيه اللي إنتي عاملاه ده يا بهيرة معقولة إنتي اللي خطفاها يا حيوانة وحابسها هنا كل المدة دي انتي ايه مش بني ادمه ولا إيه
بهيرة
إنت عايز إيه يا وهدان وإيه اللي جابك هنا
وهدان
إيه اللي جابني هنا اللي جابني هنا إن اللي إنتي عاملاه ده مش حرام عليكي اللي إنتي عاملاه فيها ده وإنتي يا دكتورة إزاي تطاوعيها على كده
الدكتورة
والله يا وهدان بيه هي مهدداني وقالت لي لو ما نفذتش كلامها مش هتسيبني في حالي وأنا كنت خايفة منها
وهدان
طب إنتي بقى هتقدري تعترفي بكل اللي حصل قدام الحكومة عشان أنا هجيب الحكومة دلوقتي وهوديكم في ستين داهية
بهيرة
إنت هتوديني في داهية يا وهدان
وهدان
أيوه عشان أنا عرفت إنك مش حامل وعرفت إنك كنتي بتضحكي عليا وشوفت تقرير التحليل وعرفت إن كل اللي قلتيه لي كان كدب
بهيرة
ابعد عني يا وهدان وسيبني في اللي أنا بعمله
وهدان
أسيبك إزاي وإنتي مخبية هاله والحكومة علي وصول بس قبل ماتتسجني إنتي هتمضي هنا على التنازل ده دلوقتي حالا والا هوديكي في ستين داهية إنتي والدكتورة دي
بهيرة
يعني لو مضيت لك دلوقتي هتسيبني
وهدان
امضي يا بهيرة أمضي انتي ليكيعين تتكلمي
واضطرت بهيرة تمضي الورق وهي مرعوبة وبعد ما خلصت وهدان قرب من هالة ولما شاف مش قادرة تتكلم جري عليها
وهدان
هالة إنتي كويسة ردي عليا أنا جيت أخدك ومش هسيبك هنا يا حبيبتي
هالة
أنا تعبانة قوي يا وهدان ومش قادرة اخد نفسي أنا حاسة إني هموت
وهدان
بعد الشر عليكي ياحبيبتي هتروحي المستشفى دلوقتي وأنا هفضل جنبك ومش هسيبك لحظة واحدة
وشالها وخرج بيها بسرعة والعربية وراح للمستشفى وبعدها اتصل بالحكومة ووصلت وقبضت على بهيرة والدكتورة وبعد التحقيقات ظهرت جرائم تانية كانت بهيرة بتخبيها عن وهدان وظهر إنها كانت بتتاجر في المخدرات من وراه وبعدها دخل السجن
وهالة فدخلت المستشفى وبعد وقت وبعدها ولدت وفضل وهدان جنبها لحد ما سمع صوت الطفل وبعد ما هالة فاقت لقت وهدان قاعد جنبها والطفل نايم قريب منها
هالة
إنت لسه هنا يا وهدان وقاعد جنبي
وهدان
أيوه لسه هنا وهفضل جنبك علطول ومهما حصل مش هسيبك تاني أنا آسف على كل لحظة خوف عدت عليكي وإنتي لوحدك وأنا ما كنتش عارف أوصلك
هالة
أنا كنت فاكرة إني مش هشوفك تاني وكنت خايفة على ابني بس أول ما سمعت صوتك حسيت إني في امان وانت معايا
وهدان
وأنا لما لقيتك عرفت إن كل حاجة في الدنيا تهون قصاد إنك ترجعي لي سالمة أنا مش عايز منك غير إنك تنسي اللي فات وتبدأي معايا من جديد وإحنا ومعانا ابننا
هالة
طيب اوعدني يا وهدان إنك مهما حصل ما تسيبنيش لوحدي تاني أبدا
وهدان
أوعدك يا هالة ومن النهارده إنتي وابننا مسؤوليتي ومحدش هيقدر يبعدني عنكم مهما حصل
هالة
ربنا يخليك ليا يا وهدان يا حبيبي
ودخلت امها وزرغت لما شافت هاله كويسه وبعدها خرجوا من المستشفى علي بيت وهدان وعاشت معاه في سعاده
تمت بحمد الله