شلتا الدبله منها لبستها وإتصورتا بيها كم صوره ورفعتهم حاله وكتبتا فيهم كلام كتير كدا اثناء ما بكتب جاتني رساله إنو ننزل الجامعه كلمتا امي قالت لي بكره سوقي لجين تمشي معاك قلتا ليها سمح المهم مره باقي اليوم صباح اليوم التاني طلعنا انا ولجين قالت لي كلمتا وجدي قال ح يجينا بالعربيه قلتا ليها كويس إنتظرناهو زي ربع ساعه كدا جاء كان معاهو امجد🙂 راكب قدام ركبتا طول الطريق ساكتين مره مره لجين ووجدي يتكلموا لحدي ما وصلنا السوق دخلنا انا ولجين خليناهم واقفين قالوا بنتظرونا في العربيه إشتريت حاجات الجامعه كلها إشتريت لي تلاته عبايات اصلا عندي كتار ديل زياده بس وإشتريت لي تلاته اسبورتات ودفاتر واقلام وشنطه لمن جيت احاسب حسبوهم لي جابن ٢٠٠ الف ونحنا شايلين ١٥٠ رجعتا جزو من الحاجات وحاسبنا وطلعنا ركبنا وجدي رجعنا البيت ومشوا دا كان اخر يوم اشوف فيهو امجد لانو سافر بعدها السعوديه قالوا لي شغل
بعد تلاته يوم امي مشت السوق جابت لي باقي الحاجات ونزلتا الجامعه بقيت مع جري الجامعه والمحاضرات السنه الاولى كانت صعبه شديد والقرايه بالانجليزي كلها إجتهدتا فيها شديد وكنتا بقرأ اول بي اول بس مرات بتجيني إنتكاسه ولمن إتزكر إني قاريه تمريض ما طب بقعد ابكي لسه ما إتعودتا على تمريض...
بعد مرور تلاته سنه
يا الله يا لجين بتك دي شيليها من جمبي ياخ بوظت لي الشيتات كلها ما ممكن معاكم ياخ عاملا ليك بيت ما تمشي بيتك وإنتي قبلتا على بتها قلتا ليها إنتي كمان ما اشوفك جمب الشيتات دي تاني فاهمه هي بس قاعده تعاين لي وفي الاخير لمن قلبتا الحيله بكت لجين جات شالتا قالت ليها دي لمار دي بري بري خلاص ما تبكي ندقها لمن نكون ما شين بيتنا خلاص شالتا ومشيت عاينتا للشيتات لقيتا كلها باظت جزو مشرطات وجزو مشخبط بالحبر وغايتو عليهم حاله يرثى لها عديل شلتهم رميتم في السله اصلا نفسي قافله من القرايه فتحتا تلفوني إتصفحتا حبه كدا وطلعتا منو قمتا جهزتا ملابسي حقت بكره
طبعا في التلاته سنه دي الانجاز الوحيد الحصل إنو وجدي ولجين إتزوجوا وجابو بت عمرها سنتين اسمها تالين وياهو انا وصلتا تالت بس دا كل الحصل بعد خلصتا مكوه مشيت قعدتا مع ناس امي سمعتا امي قالت ماشه ناس خالي عاملين ليهم كرامه قلتا ليها في شنو عندهم قالت لي امجد جاء من السعوديه ما شاء الله صلح ليهم البيت قالوا فوزيه الدهب لبستو الحمد لله ربنا فتحها عليهو قلتا ليها إن شاء الله دايما وقمتا من جمبهم إتصلتا على ريم دي صحبتي الانتيم في الجامعه قلتا ليها رسلي لي PDF محاضرة الفسيولوجي قالت لي ما طلعتيهم شيتات إنتي حكيت ليها قعدت تضحك قالت لي إتحملي بس ح تعملي شنو🤣🤣 قلتا ليها فعلا ح اعمل شنو يعني قالت لي بالمناسبه بكره دكتور الكميونتي جاي قلتا ليها جد قالت لي اي الحمد لله ح نبداها قلتا ليها سمح رسلي لي الpdf هسي ولمن نتلاقى نتكلم قالت لي سمح....
الفصل العاشر
صباح اليوم التاني لبستا ومشيت الجامعه إتصلتا على ريم قلتا ليها جيتي قالت لي اي تعالي القاعه الخامسه المحاضره فيها قلتا ليها تمام جايه مشيت لقيتا في جزو من البنات قاعدات لمحتها مشيت سلمتا عليها وقعدتا جمبها قالت لي ما شفتي الاخبار قلتا ليها شنو قالت لي الدكتور الجاي يقرينا دا قالوا قاري جامعة الخرطوم زول خبره يابت قلتا ليها إن شاء الله يكون بعرف يشرح بس قالت لي إن شاء الله قلتا ليها محاضرتو متين هي قالت لي التانيه الاولى بدياترك وبعدها كميونتي والاخير مدسن قلتا ليها كويس
بعد مسافه القاعه إتملت وقت المحاضره جاء والدكتوره لسه ما جات ريم قالت لي دكتوره سلوى مالا الليله الليدر جات قالت لينا الليله ماف بدياترك وكميونتي عندكم مدسن بس وح يقدموها الدفعه كلها فرحة فرح اخيرا الليله ما عندنا محاضرات كتار إنتظرنا نص ساعه بتاع الميدسن جاء ادانا المحاضره وطلع ريم قالت لي ارح الكافتريا ناكل حاجه ونطلع قلتا ليها ارح مشينا الكافتريا طلبنا سندوتشات طعميه اثناء ما بناكل جات بت قالت لينا انتوا تمريض قلنا ليها ايوا سلمت علينا قالت لينا انا اولى تمريض وإنتوا قلنا ليها تالت قالت لينا ممكن اسألكم سؤال قلنا ليها إتفضلي فتحت الشيت كانت شايلاهو قالت لينا ممكن بس تشرحوا لي الجزئيه دي مشيت المكتب للدكتوره لقيتا ماف وعندنا بعد شويه امتحان قلتا ليها جيبي الشيت مسكتو قريت الكلام شرحتا ليها الموضوع وفي الاخير قلتا ليها دي بالنسبه لي درجه الحراره لمن تكون عاليه بحصل توسيع للاوعيه ولمن تكون منخفضه بحصل تضييق عشان الدم بساعد على خفض برودة الجسم قالت لي نوروينج يعني تضييق قلتا ليها ايوا قالت لي من قبيل واقفه لي الكلمه دي شكرا ليك قلتا ليها ولو متى ما عايزه تعالي لو إحتجتي لي اي حاجه نحن موجودين جيبي اكتب ليك رقمي مدت لي دفتر كتبتا ليها الرقم قلتا ليها لو وقفت ليك اي حاجه إتصلي طوالي قالت لي تسلمي كتير والله ربنا يجبر بخاطرك زي ما جبرتي بي خاطري قلتا ليها اللهم امين تسلمي البت مشت ريم قالت لي ارح البيت طلعنا مشنا الموقف ركبنا ومشينا البيت وصلتا مع ازان الضهر عايزه اجر السلك افتح الباب الباب فتح رفعتا راسي لقيت دا امجد!!...