رواية نقطة سطر جديد الفصل الحادي عشر11 والثاني عشر12 بقلم تقي محمد

الفصل الثاني عشر12 

الليدر رسلت في القروب تعالوا القاعه الدكتور جاء سمعنا السلام عليكم رفعتا راسي لقيت دا امجد!! إنصدمتا اكيد امجد ما الدكتور بس الجابو شنو جامعتنا اكيد في لخبطه في الموضوع بقيت اعاين إتجاه الباب مافي زول جاء بس في كم بت دخلوا وبعدها امجد قفل الباب قال لينا كيف يا شباب انا دكتور امجد ح امسك معاكم بدياترك وكميونتي!! لحدي دكتوره سلوى ما تجي تمسك مادتا طبعا لمن قال كدا راسي ضرب عديل كدا امجد ودكتور؟! معقوله؟! كيف حصل كدا اصلا؟! امجد دا كان قاري تالت بس ومستحيل التلاته سنه القضاها في السعوديه دي توصلوا المرحله دي؟! قال لينا طبعا ياشباب انا خريج جامعة الخرطوم تمريض عامل ماجستير NP في زول بعرف حاجه عن الNP؟ ماف زول جاوب قال لينا تمام نبدأ محاضرتنا عايز انبه لي قوانيني ممنوع كلام اثناء المحاضره والغياب اكتر من تلاته محاضرات ممنوع يدخل معاي محاضره تاني لحدي نهاية السنه تالت حاجه ودي الاهم ماف زول يدخل بعدي نهائي مفهوم قالوا ليهو مفهوم ريم قالت لي شكلوا دكتور صعب ما رديت ليها فتح المحاضره وقعد يشرح كان بتحرك ويشرح لمن جاء بي جهتنا عاين لي وواصل شرح لمن خلص قال لينا في اسايمنت ح تكتبوهو ح ارسلوا ليكم مع علا الليدر قال لي علا بعدين رسلي ليهم في القروب قالت ليهو حاضر طلع ريم قالت لي من اول يوم اسايمنت هوي الله يجيب لينا سلوى طلعنا من الجامعه وانا لسه ما مصدقه إنو دا امجد مشيت البيت استحميت وبدلتا ملابس اكلتا لي حاجه ولبستا عبايتي قلتا لي امي ماشه لي لجين دقائق وجايه قالت لي امشي ليها العصر قلتا ليها عندي حاجه مهمه عايزه اشيلا منها بمشي خمسه دقائق وبجي ما بتأخر طلعتا   مشيت لي لجين في البيت دقيت مسافه ما فتحت إتصلتا ليها قلتا ليها انا بره افتحي قالت لي دقيقه بس ،،جات فتحت لي دخلتا جابت لي عصير ومويه قلتا ليها يا لجين انا عايزه اسألك سؤال جاوبيني بي صراحه قالت لي اسألي من متين بتستأزني قلتا ليها دي مقدمه ما إستئزان قالت لي اسألي الله يستر في شنو قلتا ليها امجد شغال شنو في السعوديه؟! قالت لي ولشنو السؤال يعني انتي عارفه علمي علمك ما بعرف عنو اي حاجه بعدين إنتي ما خليتيهو تاني في شنو قلتا ليها ما تلفي وتدوري امجد قرأ تمريض متين؟ اكيد عارفه الكلام دا قالت لي اي عارفه وحاليا شغال دكتور قاري تمريض وشايل ماجستير كمان هو كان بقرأ من لمن جاء وعقد عليك بدأ يقرأ صاح هو خلى القرايه فتره بس تاني رجع ليها كلنا ما كنا عارفين بالكلام دا يمكن عرفنا لمن أتخرج من الجامعه بس حتى إتفاجأنا كلنا زيك كدا قلتا ليها اتخرج متين هو قالت لي لمن انتي كنتي في تالت يعني السنه الاطلقتوا فيها!! قلتا ليها طيب ليه انا ما عارفه دا كلو قالت لي إنتي حصل سألتيهو عشان تعرفي ياخ إنتي كنتي بتعامليهو معامله كعبه شديد يا لمار إنتي كنتي شايفه روحك عليهو وهو بالرغم من إنو قاري ومتعلم واكتر منك كمان بس عمرو ما شاف نفسو عليك بل كان بقدرك شديد كان طوالي بدافع عنك وقبل تحتاجيهو تلقيهو واقف معاك كان شايف إنك جوهره ما بتتكرر كان بعمل ليك اي حاجه لو عايزه نجوم السماء بجيبا ليك ياخ كنتي بتلبسي احلى لبس وشايله احدث تلفون في الحله وبعد دا ما كان عاجبك الوضع هو فعلياً عمل اي حاجه بقدر عليها بس إنتي عملتي شنو بكل بجاحة الدنيا يا لمار قلت ليهو إنك بتعيق مستقبلي اي ما تستغربي قال لي الكلام دا قالوا وهو موجوع هو يعيق مستقبل يا لمار هو؟! والله يا لمار انا ماعرفتا اقول ليهو شنو قلتا ليها يا لجين معقوله انا كنتا كدا ياخ الصوره البتقوليها عني دي بشعه شديد انا ما كدا قالت لي يمكن إنتي ما تشوفي نفسك كدا بس دي الصوره الكلنا شايفنها يا لمار وأمجد فعلا يستاهل بت حلال تسعدو وتهنيهو وإنتي كمان ربنا يهديك ويديك البسعدك يا اختي عاينتا ليها ومن دون اشعر قعدتا ابكي بكيت قدرتي هي بس كانت بتهدي فيني ادتني مويه شربتها وتاني قعدتا ابكي ضمتني وبقت تمسد لي في شعري تالين لمن شافتني ابكي قعدت تبكي حتى هي لجين قالت لينا خلاص اسكتوا صدعتوا بي سكتنا قالت لي إنتي يا لمار الخلاك تفتحي سيرت امجد شنو ؟ حكيت ليها إنو جانا في الجامعه والكلام القالوا قالت لي كويس ما دام بقى دكتوركم بتنجحوا🤣 قلتا لها بس كان شكلوا جادي شديد🙄 قالت لي اصلا الدكاتره بكونوا كدا بعد دا نشوف ليهو عروس سكتا ما رديت عليها بس افكاري مشت بعيد معقوله امجد يعرس قالت لي مالك سكتي قلتا ليها مافي حاجه انا ماشه عندي قرايه قالت لي تمام امشي 🤣 قلتا ليها في شنو بتضحكي قالت لي لالا مافي حاجه طلعتا منها مشيت البيت طلعتا العبايه ورقدتا نمتا صحيت العصر قريت حبه كان عندنا بكره إجازه والجمعه والسبت ننزل يوم الاحد 

مره زي اسبوع امجد بقرينا بس نهائي ما قاعده اركز كلو ما احاول اركز ما بقدر يوم قاعدين انا وريم قالت لي إنتي مالك الفتره دي قلتا ليها ماف حاجه قالت لي لالا والله في حاجه إلا تقولي لي في شنو قلتا ليها تتزكري لمن حكيت ليك إني كنتا متزوجه قالت لي اي بتزكر في شنو ؟ قلتا ليها تتزكري كان قلتا ليك اسم راجلي منو قالت لي اي بتزكر كان قولتي اسمو امجد تقريبا بس في شنو مالك يابت خوفتيني إتكلمي قلتا ليها يا ريم امجد دا ياهو نفسو دكتور امجد البقرينا !! قالت لي شنو؟ إنتي جاده طيب ما قلتي إنو هو ما قاري كيف بقى دكتور هو ما طلع من المدرسه في تالت؟! كيف بقى دكتور قلتا ليها انا زاتي ما مصدقه يا ريم قالت لي هوي يا لمار مستحيل دا يكون الزول الكنتي بتتكلمي لي عنو حتى لو مشى قرأ تالت تاني ما بلحق يبقى دكتور في التلاته سنه الغاب فيها دي وما سمعتي قال عندو ماجستير يمكن إنتي مشبهاهو قلتا ليها يا ريم إنتي غبيه كيف مشبهاهو هو ولد خالي معقوله ما بعرف ولد خالي من زول تاني ؟! بعدين طلعتا انا الما عارفه عنو حاجه هو كان بيقرأ من بدري تخيلي منظري لمن قلتا ليهو إنتا بتعيق مستقبلي واي يا ريم😭😭 الكلمه دي موجعاني شديد قالت لي فعلا والله ما معاك حق هسي خليك من دا يا لمار هسي ح تعملي شنو ما عايزه ترجعي ليهو قبيل كان السبب إنو ما متعلم وهسي بقى متعلم