شلتا منها التلفون وشفتا النسبه!!! لمار احمد عبد الرحيم عثمان 85% بقيت اعاين طشاش طشاش ٨٥ كيف يعني لالا دي ما نسبتي دخلتا في حاله بتاعة صدمه قويه لجين قالت لي يا لمار استهدي بالله والله النسبه حلوه شديد اي صح ما بتدخلك طب بس بتدخلك تمريض التمريض برضو حلو وزي الطب ما فارقه قلتا ليها يا لجين انا ما عايزه تمريض انا عايزه طب إنتي فاهمه يعني شنو رغبتي لجين انا كدا مستقبلي ضاع ح اعمل شنو هسي😭 ولا ابوي وامي املهم كان فيني انا خزلتهم يا لجين قالت لي يا بت قولي بسم الله بعدين ما خزلتيهم والله النسبه دي برضو حلوه وإنتي عملتي العليك بس دا المقدر ليك يا لمار ارضي بي قدر ربنا بس قلتا ليها ونعم بالله وسكتا بس دموعي كانت ماشه ما قدرتا اوقفا وكل ما إتزكر ٨٥ دي ببكي زياده بعدها التلفونات بقت تتصل والناس جو يباركوا في نص الزحمه بتاعت الناس دي كنتا مفتقدا زول والله بالجد اليوم امجد فرق معاي اكتر من قبل كنتا عايزه افضفض ليهو فتحتا تلفوني ووقفتا قصاد رقمو كتير ليه ما إتصل يسأل مني يعرف انا جبتا كم ليه؟! كنتا عايزه إتصل ليهو بس إتراجعتا وطلعتا من جهات الاتصال ودخلتا الواتس رفعتا حاله كتبتا فيها الحمد لله على كل حال وقفلتو ختيتو في الشاحن خالتو فايزه جات دقائق بس وطلعت كان نفسي اسألا منو بس بياتو حق قعدتا افكر مع نفسي ح اعمل شنو بالنسبه دي ما قادره إستوعب لحدي هسي إني جبتا ٨٥ بالعصر صحباتي جن لي وباركن لي قعدتا إتونس معاهم لحدي المغرب ازن هم مشوا صليت وإستخرتا وفتحتا تلفوني دخلتا النت وبقيت اقلب في التقديم حق السنه الفاتت وعاينتا للنسبه حقت طب كانت كبيره كلها ٨٩ و٨٨ مستحيل ادخلوا إلا خاص 😭 قفلتا التلفون بي زهج ورميتو جمبي في السرير وقعدتا ابكي ..
بعد اسبوع التقديم نزل مشيت قدمتا طب و تمريض محل يشيلوني يشيلوني بس قدمتا في جامعات كتيره كنتا متأكده م ح يشيلوني في طب بس....
يوم النتيجه حقت التقديم كنتا متوتره وفي امل بسيط بقول لي ح يشيلوك طب ما عارفه ليه كنتا متمسكه بيهو دخلتا الفيسبوك شايفه الناس بتعلق إنو نتيجتهم ظهرت وكل زول يقول أسم الجامعه فرحان طلعتا من الفيسبوك وبديت انزل في رقم الاستماره وانا خايفه طبعا قافله نفسي في الغرفه براي ديل قدر ما إتكلمو معاي ابيت افتح ليهم خلوني نزلتا الرقم وعملتا إرسال طوالي الرساله جات الوقت كان عصريه كدا يديني تلجو فتحتها وكانت صدمت عمري لمن شفتها مكتوبه كبيييره إستنفاد رغبات💔 كيف يعني إستنفاد رغبات انا نسبتي بتدخلني تمريض ليه ما شالوني تمريض ليه😭 قريت الرساله قريب خمسه مرات والاسم ورقم الاستماره كلهم صاح بكيت شديد ما كنتا راضيه بالنسبه والتمريض وهسي بتمنا لو شالوني فيهو بس😭 لجين دقت لي الباب فتحتا ليها وريتا الرساله من شافتا قالت لي كلو لي خير بعدين لسه في تقديمين تاني يا لمار خلي ثقتك بي ربنا كبيره يا لمار قلتا ليها يا لجين التقديم الجاي دا خاص وانا مستحيل اقدم في الخاص ياخ ديل مبالغهم خياليه ابوي ح يجيب القروش من وين قالت لي كلنا بنقيف معاك ما تخافي وقدمي ساي القروش بتجي يا لمار إن شاء الله نلمها مليم مليم بتجي بس إنتي ارضي بالكتبو ليك ربنا وهو ح ينصرك بأذن الله قلتا ليها إن شاء الله ومن دون ما اشعر دموعي بدت تجري لجين ضمتني وقعدت تمسد لي في راسي قالت لي ما تبكي كلو لي خيير..
بعد التقديم دا طلع تقريبا صحباتي كلهم شالوهن جامعات إلا انا💔 عزلتا نفسي تماما عنهم وبقيت عازله نفسي حتى من ناس البيت زعلتا زعل يوم قاعده سمعتا ابوي بكورك بعد مسافه جاء قال لي يا لمار اعملي شاي او قهوه جايني ضيوف قلتا ليهو سمح مشيت عملتا قهوه بالهبهان ظبطها علي جاء شالا ومشى رجعتا قعدتا في مكاني سمعتا صوت ابوي بقول اقعدوا يا امجد اشربوا القهوه والله ما تمشوا لو ما شربتوا القهوه !!...
معقوله ابوي قاصد امجد ود خالي ؟ معقوله طيب امجد مسافر جاء متين مشيت اعاين كدا عسى اشوفهم عيني وقعت فوقو ياهو امجد زاتو بس إتغير شديد كان معاهو ولدين كان لابس بدله بنيه بتشيرت اسود معقوله دا الشغل الجديد إشتغل شنو هو اصلا كنتا قاعده اسأل في نفسي شفتو مدى لي ابوي تلفونو تقريبا كتب رقم لي ابوي ما كنتا قادره اسمع بقولوا في شنو بعد مسافه طلعوا وابوي طلع معاهم يقدمهم مشيت لميت الكبابي غسلتهن ورتبتا المكان وبعدها رجعتا غرفتي طبعا لجين وأمي كانوا عند جارتنا والده خلوني براي مع المغرب كدا جن ابوي جمعنا قال عايزنا في موضوع قعدنا كلنا منتظرنوا يتكلم قال لي لجين جاك عريس وعاين لي في نفس الوقت انا من عاين لي فهمتا حاجات كتيره معقوله امجد جاي يتقدم لي لجين؟!!
الفصل الثامن
ابوي جمعنا قال عايزنا في موضوع قعدنا كلنا منتظرنوا يتكلم قال لي لجين جاك عريس وعاين لي في نفس الوقت انا من عاين لي فهمتا حاجات كتيره معقوله امجد جاي يتقدم لي لجين؟!! خلاص قرر بجد يكمل حياتو ما عارفه ليه بس لقيت نفسي ببتسم لا إراديا ابوي واصل كلامو وقال لي لجين الولد دا كان خاطب قبل كدا وعلاقتو معها ما كانت كويسه وقبل فتره لغو الخطوبه المهم هو ولد ممتاز جدا جاي من طرف امجد !!وصحبو من الخرطوم لكن انا ما اديتم اي رأي لحدي ما اشوف رأيك إستخيري وبعدين قرري لمن قال كدا حسيت عقلي عمل error يعني امجد ما هو العايز لجين طيب هو هسي عايز يتزوج ويكمل حياتو ولا لأ ياااخ انا مالي ومالو موش انا كنتا عايزه كدا يلا كدا كويس احسن يشوف حياتو...
صباح اليوم التاني كان اول يوم للتقديم الخاص ما كنتا عايزه اقدم بس امي وابوي اصروا علي مشيت قدمتا الدور دا كتبتا تمريض بس مع إنو ما كنتا مقتنعه بيهو بس حاولتا إتأقلم رفعوا لي الاستماره كانت معاي امي إنتظرتني لحدي ما خلصتا
وبعدها رجعنا البيت مرة الايام ولجين وافقت على خطوبه تتعرف فيها على وجدي ونتيجة التقديم طلعت شالوني تمريض جامعة بحري فرحتا إنو شالوني بس كنتا شايله هم القروش حددوا وقت الخطوبه لي لجين بقيت جاريه معاها إشترينا كريمات جهزنا نفسنا كويس للخطوبه حجزت في كوفير وحجزت لي معاها يوم الخطوبه من الصباح بنات خالتي جن رتبن البيت وامي معاهم وبدو تجهيزات ساعدتهم حبه العصر طلعنا انا ولجين مشينا الكوفير لجين عملت مكياج خفيف وانا عملتوا تقيل حبه🤣🤣 قلتا ليها عشان اطفي نورتك وفي النهايه هي طلعت حلوه🤣🤣 رجعنا البيت اجرنا عربيه وصلنا قبل المغرب دقوا لينا دلوكه لمن جينا داخلين رقصنا حبه بعدها وجدي واهلو ومعاهو اصحابوا وامجد معاهم جابو قولة خير ولا إسمها شنو🤣 المهم وبعدها لبسوا الدبل انا كنتا بصور فيهم ما شاء الله وجدي كان سمح بس لجين احلى امي جرتني قالت لي وزعو الحاجات للناس ديل مشيت سقتا بنات خالتي وزعنا للناس كلهم مويه وعصير واطباق لمن جيت عند امجد قبل امد ليهو قال لي عايز مويه بس مديتا ليهو وختيت ليهو طبق بعد خلصنا بدينا في موال العشاء لمن زهجتا مشيت مسحتا المكياج وعملتا لي روج بس قعدتا اطنطن هو وقت عاملين ليهم عزومه كامله ما كان يعقدو بس المهم اليوم مره بي خيرو بي شرو مره صحيت الصباح ارتب واقول ما رتبتا لمن ظهري إتقصا وغسلتا العده مع البنات لحدي قريب الضهر نحنا نرتب لمن خلصنا رقدتا نمتا من التعب قمتا بعد مسافه صليت الظهر وواصلتا نوم لحدي العصر لقيت خالاتي مشن لقيت امي ولجين مفرشات في الحوش مشيت صليت وجيت قعدتا جم لجين قلتا ليها يا لجين في زول لبس الدبله بعدك قالت لي دا سؤال شنو قلتا ليها موش بقولوا البت لمن تلبس الدبله بعد العروس طوالي بتعرس بعدا🤣 قالت لي دي خرافه قلتا ليها المهم جيبي اجربا طلعتا ادتني ليها قبل تديني ليها قالت لي كوني حزره قلتا ليها عارفه الاكعب من البوره شنو فكت البوره قالت لي بايره في عينك يختي شلتا الدبله منها لبستها وإتصورتا بيها كم صوره ورفعتهم حاله وكتبتا فيهم كلام كتير كدا اثناء ما بكتب جاتني رساله إنو....