هل يمكننا يا عزيزتي ان نختم ذلك السطر الحزين بنقطه ونبدأ من جديد؟
قلتا ليها لجين إنتي عارفاني بحبك صح قالت لي ايواا عارفه بس دي ما انا الجبتا الحاجات🤣 قبل ارد عليها تلفونا إتصل ردت بقت تكورك وبتكرر كيف يعني والحصل شنو طيب دقيقه جاياكم دقيقه قفلت التلفون انا وامي في نفس الوقت قلنا ليها مالك في شنو قالت لينا دي مرت جيرانا يا امي سلمى تتزكريها قالت ليها اي مالا قالت ليها قالوا ضربتا عربيه وهسي في المستشفى امي قالت ليها لاحولا ولاقوة إلا بالله دقيقه البس وأمشي معاك قلتا لي لجين هسي حالتا كيف قالوا ليك قالت لي في العنايه والله يا لمار مره مسكينه خلاص وظروفهم صعبه قلتا ليها لاحولا ولا قوة إلا بالله قالت لي إلا نرفع ليها حوجه قلتا ليها اي الا كدا ابوي جاء قال لي إنتي ماشه السوق قلتا ليهو لالا خليتو في نفس الوقت امي جات قالت لي لجين ارح ابوي قال ليهم ماشين وين امي قالت ليهو سلمى جارت لجين ديك تتزكرا قال ليها اي مرت ولد عوض صح قالت ليهو اي بس قال ليها مالا قالت ليهو ضربتا عربيه ابوي قال ليها لا حولا ولا قوة ألا بالله متين الكلام دا لجين قالت ليهو قبل شويه كدا امي قالت ليها ارح شالت من ابوي قروش وطلعوا ابوي مشى الصالون علي جاء قال لي خليتي مشي السوق مالك قلتا ليهو لجين جابت لي بدله قال لي تمام طلع مشى كان عندو كوره شلتا الحاجات ودخلتا جوه لقيت ريم متصله لي كتير رجعتا ليها قالت لي مشيتي وين قلتا ليها كنتا في الحوش والتلفون في الغرفه قالت لي اها عملتي شنو في موضوع البدله قلتا ليها جاتني وحده لحدي عندي قالت لي احلفي الجابا ليك منو قلتا ليها لحدي هسي ما عارفه تصدقي قالت لي كيف دا قلتا ليها والله جابتا لي لجين وقالت لي جابوها ليك هديه قالت لي ما شاء الله هدايا وكدا قلتا ليها دا كلامك🤣 قالت لي انا حالتي مشيت اسأل ليك من ناس توصيل من محلات العمرابي قلتا ليها اشي من العامرابي عديل قالت لي اي يابت يا العامرابي يا ناس قشره قلتا ليها اها وعندهم توصيل قالت لي اي ادوني الرقم كمان قلتا ليها المره الجايه قالت لي هسي البدله دي قدرك ولا ساي قلتا ليها طق طرق ولونا احزري شنو قالت لي اها قلتا ليها عنابي قالت لي لالا اول حاجه نفس مقاسك ولونك يكون جابا ليك زول بعرفك شديد اكيد دي اختك زاتا قلتا ليها حتى انا قلتا كدا المهم جاهزه إنتي للمناقشه قالت لي من بدري مفتكراني زيك قلتا ليها اي اي إتمسخري علي قالت لي موقفك دا ما سبقك عليه احد من العالمين🤣 ياخ زول يمشي يشتري بي نفسو ما عارف مقاسو 🤣🤣 والله انا زاتي قعدتا اضحك على نفسي قلتا ليها الله يجازيك ياخ اقطعي وشك قالت لي اصلا ماشه اشوف تجهيزات مناقشتي ماشه كيف باي قلتا ليها مع السلامه قفلت جربتا البدله والاكسسوار ياخ عجبوني عجب كانت حاجه في قمة الروعه والعجيب إنو كانت بي إسكيرت زي ما كنتا عايزاها بالضبط قعدتا اعاين لي نفسي في المرايا ياخ شعور إني خريجه حلو خلاص لميت الاكياس عايزه ارميها وقع منها حاجه رفعتها لقيتو وشاح كان مكتوب فيهو الف مبروك الخريجه لمار كان لونو اسود والكتابه بالفضي رميت الاكياس وجيت لبستو يا سلام شكلوا كان حلو حلا وخصوصا مع البدله والاكسسوارات كان حاجه في قمة الروعه لبستا طرحه بالرمادي جات ظابطه معاهو بعد داك طلعتهم وختيتهم في الدولاب إنتظرتا ناس امي جو بالليل لجين مشت بيتا وأمي جات قلتا ليها اها المره بقت كيف قالت لي يا حليلا قالوا عندها كسر في الحوض ويدها مكسوره وجسمها كلو ماف حته سليمه كلو جروح قلتا ليها خلوكم تشوفوها؟! قالت لي بري ديل اخواتا ورونا ما خلونا ندخل ليها حالتا صعبه قالوا قلتا ليها ربنا يقوما بالسلامه
قالت لي إن شاء الله يارب دخلت غيرت وعملنا العشا إتعشينا ونمنا ..
يوم المناقشه الصباح صحيت متوتره لقيت بيتنا مليان خالاتي وعماتي وحتى حريم خيلاني قاعدات وبناتهم يا حليلهم ما خلوني براي نهائي ولجين كلو شويه تجي تقول لي ما تتوتري وما تخافي نهائي دي حاجه عاديه بس انا كنتا متوتره شديد ريم إتصلت لي قالت لي يابت جاهزه قلتا ليها لسه قالت لي نص ساعه القاك وصلتي دايره تتأخري دي ما محاضره قلتا ليها إنتي طلعتي قالت لي قبيل قربتا للجامعه قلتا ليها خلاص اقفلي.. جري جريت إستحميت وغيرتا لبستا البدله وعملتا لي روج خفيف وشلتا الوشاح وطلعتا بره لجين قالت لي إتحصني بسحروك وبنات خالاتي برضو قلتا ليهم سمح قلتا لجين إنتي م ح تمشي معاي قالت لالا ح تمشي معاك امي نحن ح نجي وراكم قلتا ليها ليه ياخ انا عايزاك تمشي معاي انا متوتره قالت لي ما تتوتري وبعدين انا ح اجي وراكم طوالي وأمي معاك ما تخافي دي حاجه عاديه ضمتني عليها قلتا ليها ما تتأخري تعالي وراي طوالي قالت لي سمح طلعتا لقيت امي منتظراني ولابسه قاشره قشره حتى ابوي واقف معاها مشيت ليهم ابوي قال لي ابشري ابشري امي قعدت تزغرد مشيت سلمتا على ابوي في راسو وقعدتا ابكي قال لي ما تبكي الليله يومك امي قالت لي سجم المكياج قعدتا اضحك طلعنا انا وأمي ابوي قال بجي ورانا وقفنا في الشارع قالت لي امجد لسه ما جاء قلتا ليها نحن ح نمشي مع امجد؟ قالت لي اي قلتا ليها يا أمي ياخ قالت لي إنتي براك متأخره دايرانا نمشي بالمواصلات بعدين هو براهو قال لينا ح اوصلكم اثناء كلامنا عربيتو وقفت قدامنا امي ركبت قدام وانا ركبتا ورا طول الطريق امي وامجد يتونسوا وانا ساكته حتى ما دخلوني في كلامهم😒 لمن وصلنا نزلنا امجد وقف يتكلم في التلفون دخلنا انا وأمي مشيت لقيت ريم واقفه قالت لي إتأخرتي هسي دي ثواني قلتا ليها ما مشكله هسي ما دخلوا قالت لي اي ما دخلوا بقينا منتظرين لحدي القروب الاول ما دخل نحنا كنا القروب التاني لمن جاء دورنا رجلي لمن بردوا دخلنا كانت المناقشه قريب الساعه لمن جينا طالعين فرحانين فرح واخيرا ناقشنا امي ولجين لاقوني اول ناس حضنوني قعدتا ابكي من شدة الفرح عملوا لي البخاخ داك ال برش حاجه بيضا داك🤣 ملو لي وشي غايتو وبنات اهلنا ما قصرنا برضو قلتا ليهم خربتوا لي بدلة المناقشه في الاخير لاقيت امجد كان فرحان اكتر مني قال لي الف الف مبروك قلتا ليهو الله يبارك فيك ما قصرتا معاي تسلم إبتسم قال لي ماف شكر على الواجب إبتسمتا ليهو لجين جات قالت لي بالمناسبه يا لمار ما شكرتي امجد على البدله....
الفصل العشرون20 الاخير
انا اعمل ليك شنو قولي لي اعمل ليك شنو يا لجين قالت لي على فكره الموضوع عادي ما فيهو حاجه قلتا ليها عادي كيف يعني ياخ كان عندك مليون فرصه تكلميني إنو هو جاب لي الطقم في داعي تحرجيني احراج قدر دا قالت لي ياخ ما تكوركي خلاص بعدين هو القال لي ما اوريك قلتا ليها اصلا ح يقول ليك انتي عارفه وهو عارف إني حاجه جابا هو ما ح البسا ليه تصغريني قدر دا قالت لي اصلا طول عمرك دي تصرفاتك لا بتقدري ولا حتى كلام سمح ما بتعرفي تقوليهو كتر خيرو الجابو ليك بس إنتي ما تستاهلي وانا ما اختك بس بتمنى امجد دا يعرس وحده افضل منك لانو إنتي ما بتستاهليهو نهائي قلتا ليها يلا تمام لو لقيتي الوحده دي بالله عرسيها ليهو وكلامك دا ما تفتكري بمحي الغلط الانتي عملتيهو قالت لي خلاص قفلي وبعدين خالاتك وعماتك ديل بره امشي اقعدي معاهم نتناقش في الموضوع دا بعدين قلتا ليها ماف بعدين ولا زفتين وطلعتا خليتا تصرفا ما عجبني نهائي مشيت قعدتا في الصاله جم بنات اهلنا طبعا ابوي كان ضابح لي لانو اهلنا كلهم جو ف ضبح لي وعملنا عزومه عشاء كلهم كانو بجهزو لي العزومه انا كنتا قاعده ساي بقلب في تلفوني وما كان عندي نفس اعمل اي حاجه وبتعزز فيهم برضو نظام انا خريجه قاعده كدا جاء علي قعد جمبي ما ركزتا معاهو إلا لمن قال لي لمار رفعتا راسي لقيتو قاعده قلتا ليهو علي؟! الجابك بجاي شنو اجي قال لي مرسل ومنتظر امي المهم عايني عايز إتكلم معاك في موضوع قلتا ليهو خير في شنو قال لي سمر بت خالي قلتا ليهو مالا قال لي عايزك تشوفيها لي قلتا ليهو اشوفا ليك كيف ما فهمتا قال لي ياخ إنتي هبله تشوفيها لي يعني اقولا ليك كيف عايزا على سنة الله ورسوله صرخته قفل لي خشمي قال لي يا هبله اسكتي قلتا ليهو احلف إنك جادي قال لي والله جادي قلتا ليهو من عيوني دي قبل دي اشوفا ليك انا عندي كم اخو يا هو واحد بس كمان ..عاين لي بطرف عينو قال لي فهمتا الانتي عايزاهو اطلبي قلتا ليهو تمام إتفقنا امي جات مشى ليها بقيت قاعده افكر إتكلم مع سمر كيف وما ح اكلم لجين لانو انا عامله نفسي زعلانه منها في الاخير مشيت غرفتي لقيت لجين مافي فكرتا إتصل ليها واقول ليها تعالي غرفتي وإتكلم معاها طبعا هي عبيطه حبه وانا اساسا ما عندي رصيد نزلتا رصيد من بنكك وإتصلتا ليها المره الاولى ماردت إتصلتا ليها تاني بعد الجرس التالت ردت قلتا ليها سمورتي وبت قلبي عايزاك في موضوع ....سمعتا صوت زول بقول بس انا ما سمر لكن قولي بكلما با الموضوع ركزتا في ضحكتو قلتا ليهو منو معاي امجد؟ قال لي ايوا عاينتا للرقم لقيتو حق سمر قلتا ليهو طيب دا ما رقم سمر قال لي دا رقمي سمر كانت شغاله بيهو قلتا ليهو طيب عايزه رقم سمر مليني ليهو ملاني ليهو قلتا ليهو شكرا وقفلتا الخط إتصلتا لي سمر ردت طوالي اصلا. الفارغه يخلوها ليها قالت لي الوو منو معاي قلتا ليها انا لمار يابت تعالي لي في غرفتي عايزاك قالت لي لمار منو وغرفة شنو قلتا ليها إنتي سجمانه كيف لمار منو بتعرفي كم لمار قالت لي وحده بت عمتي بس قلتا ليها انجزي طيب قالت لي سمح انتظرتها لمن جات قالت لي اها خير في شنو قلتا ليها اقعدي عايزه اقول ليك حاجه قالت لي اها قلتا ليها رأيك شنو في علي اخوي قالت لي علي؟ مالو زول كويس بس ليه سألتيني السؤال دا قلتا ليها لا بس عايزه اشوف ليهو وحده صحبتي قالت لي المفترض توريني صفات البت وتقولي لي رأيك فيها شنو علي انا بعرفو قلتا ليها اي بوريك بس عايزه اشوف علي اخوي من وجهة نظرك عشان احكي ليها عنو عايزه اشوفو من وجهة نظر زول تاني🐸 قالت لي ما فاهمه عليك والله قربتا اقول ليها انا زاتي مافاهمه بقول في شنو🐸 واصلت قالت لي بس علي والله زول ما شاء الله مؤدب وزول ممتاز وبتتمناهو الف بت وغير كدا اخلاقو عاليه وبالو طويل ودي حاجه مميزه جدا قلتا ليها طيب ح اوريك البت وإنتي قرري قالت لي طيب قلتا ليها عايزاك..عايزاك إنتي لي اخوي رأيك شنو عاينت لي بي دهشه قالت لي انا؟ قلتا ليها ايوا وعلى فكره علي اخوي هو القال لي اشوفك ليهو قالت لي والله يا لمار ما عارفه اقول شنو قلتا ليها يابت اخدي وقتك وقرري يا سمر وبعدين نحن صحبات الروح بالروح واي حاجه كنا بنحكيها لي بعض تتزكري؟ اي حاجه في قلبك احكيها لي تمام حتى لو عايزه تعرفي اي حاجه عنو تعالي لي بحكي ليك قالت لي سمح وطلعت كانت متوتره🤣 يا حليلا صدمتها ليك صدمه🤣 طلعتا وراها قعدتا مع البنات كان في شفع صغار يغنن ناديتم قلتا ليهم إنتوا غايلنو بيت عرس ومعاها حميره كدا قالوا لي لالا قلتا ليهم خلاص امشوا امشوا غنو ساي مشوا يدقدقوا وحده فيهم ما شاء الله حافظه الاغاني دي حفظ ما كنتا مركزه معاهم بس لفتتني لمن قالت الرمبزه بنيه لموره بت حينا قعدت اضحك قلتا ليهم ابشروا ابشروا المشكله ما هنا المشكله البنات قعدن يزغردن والله دي مشكله دي🤣 فرحانين اكتر مني امي جات وقفت قدامي قالت لي يابت إنتي من قبيل بفتش فيك امشي إشتغلي مع البنات ديل حاجه بالغتي عديل قلتا ليها سمح مشيت قعدتا جمبهم ساي في الاخير مسكوني الشمار دقيتو ليهم بعد المغرب الناس بدت تجي طلعنا الصواني وبدينا نعبي في الاكل ونوزع ما شاء الله الناس كانو كتار لمن خلصنا الساعه ١٠ جات.،، اخر صينيه قعدنا فيها نحن طبعا فتحوا سيرة درامات اليوم وحدة كشحة الشمار ووحده كسرت ليها صحنه و و و قلتا ليهم سمح انا عارفه شغلكم بلا ضمير لكن بنخدمكم في السمح اصبروا بس،، قعدن يضحكن🤣 مره زي يومين كدا وعلي اخوي ساق امي وابوي ومشوا إتقدموا لي سمر وهي وافقت فرحتا ليهم فرح عملنا الخطوبه طوالي والعرس بعد شهر طبعا عشان لمن علي يجهز البيت اصلا ابوي مقسم لينا قطع وعلي من بدري بنى بيتو وفيهو اثاث بس ما كتير ياهو الشهر دا عشان يكمل باقي الاثاث طبعا إشترا لي فستان حسب الاتفاق ولبستو في الخطوبه خالتو فوزيه قالت عايزه تشوف لي امجد عروس برضو عشان يعمل عرسوا مع سمر وعلي خصوصا إنو إجازتو قربت تخلص وح يرجع السعوديه جاتني كذا مره وانا رفضتا في الاخير شافت ليهو وحده من بنات اخوانا ..
مره الشهر سريع والعرس تمه وانا بقيت جاريه وراء خدمتي لحدي ما خلصتا السنه وبعد خلصتا لقيت إنو التمريض ما كعب زي ما انا كنتا متخيلاهو بل بالعكس التمريض كان شغل سمح شديد والممرض هو الوحيد البقيف مع المريض لحدي ما يبقى كويس إشتغلتا في مستشفى خاص وامي وابوي كان داعمني شديد بديت سطر جديد من حياتي وطورتا من نفسي واليوم انا بقيف ومعاي درجة ماجستير في تمريض الطوارئ وإتعاونتا مع جامعه بقيت اقري محاضرات وشغاله في المستشفى وبرضو ما وريتكم إتعرفتا على دكتور وائل جراح ومحضر ماستر كمان وجاء خطبني من ابوي وهسي عرسنا بعد شهرين اما علي ف رزق بي بت سماها صبا وامجد برضو رزق بي بت سماها لمار طبعا ناس بيتنا كانو بشغلوها ليهو ما جم مرتو طبعا بس كان بقول ليهم اصلا عاجبني الاسم🤣 اما لجين ف جابت تيسير وهسي حامل طبعا سافرت مع راجلا السعوديه..
بيتنا إتغير وبقى مسيخ بعد لجين سافرت بس خالتو فوزيه كانت بتجينا من فتره لي فتره
بعد شهرين كان عرسي على من إرتضاه الله لي وإرتضيته بالحلال ❤️
وكدا إنتهت قصتنا ومنها يمكن نتعلم ما إنو كل الفي اليد لينا لانو في بعض الاحيان بتجي نقطه في اخر السطر ونبدأ من جديد وما كل حاجه جات عكس توقعاتنا معناها كعبه لأ دي حاجه من اختيار ربنا وربنا دايما اختيارو جميل ف ما كل نقطه معناها نهاية الطريق لانو دائما بكون في سطر جديد
تمت بحمد الله