رواية معشوقتي العنيدة الفصل الخامس5الاخير بقلم صباح عبد الله فتحي
في صوان الانتخابات كان الكل قاعد مبسوط باللي بيحصل وحمدان وعمران بيوزعوا اللحمة على الناس وفجأة سمعوا صوت صفير ميكروفون عالي لفت انتباه الجميع وتفاجئ الكل بشاشة كبيرة على خشب المسرح بتعرض تسجيل ظاهر فيه عمران بيقتل رغدة الكل بص لعمران بصدمة اللي كان مصدوم ومرعوب وقال بغضب
عمران
مين مين اللي مشغل القرف ده أنا أنا ما قتلتهاش أكيد حد عامل المقلب ده أكيد حد قاصد يوقعني أنا عارف
طلع رائفت ووسام من خلف خشبة المسرح
رائفت بجمود
وهيكون مين غيري يعني يا عمران بيه
حمدان بغضب
إنت إيه اللي جابك تاني يا واد إنت مش كنت غورت في داهية وإيه الهبل اللي بتعمله ده
رائفت
جاي آخد حقي وحق بنت عمي اللي ابن أخوك قتلها علشان يداري وسخته يا حمدان
حمدان بغضب
حمدان حاف كده إنت نسيت نفسك ولا إيه
وسام بغيظ
المرة الجاية هنجيب رغيفين نخمسها ولا تزعل ما هي الجلابية النظيفة مش هتداري ريحتكم المعفنة ابن أخوك قتل أختي وزي ما بيقول ربنا من قتل يُقتل وكلكم شوفتوا الدليل بعينيكم أهو
عمران بخوف
دي دي بتكدب أنا ما أعرفش هي بتتكلم عن إيه
ظهر المؤمر من نفس المكان اللي طلع منه رائفت ووسام
المؤمر
هنبقى نقولك في مخفر الشرطة يا عمران بيه( بص للعساكر) اقبضوا عليه
عمران
يقبضوا عليا ليه أنا ما عملتش حاجة صدقني يا عمي ما عملتش حاجة
حمدان بص للناس بقلق وفكر شوية وفجأة ضرب عمران بالقلم قدام الكل
حمدان
ما عملتش حاجة ده إزاي والبت الغلبانة اللي قتلتها دي وكلنا شوفنا بعينينا مفكرني علشان ابن أخويا وجوز بنتي هسيب حق الغلبانة دي كل بت وكل واد في البلد دي عيالي إنت فاهم
عمران بغيظ
يعني إنت كده مفكر الناس هتحبك وبتقدمني كبش فداء يا عمدة
حمدان خاف لا يقول حاجة وراح ضربه قلم كمان وهو بيزقه يوقعه على الأرض
حمدان
اخرس يا كلب يا واطي يا عديم الشرف
وسام بسخرية
لا حوش إنت اللي شريف قوي يا عمدة (بصت للكل) عمدكم المحترم اللي حماكم طلع تاجر سلاح ومخدرات
حمدان برق بصدمة وعمران ابتسم بسخرية وهو باصص لحمدان بغيظ
عمران
وأنا شاهد على الكلام ده العمدة المحترم تاجر سلاح ومخدرات ومعايا اللي يثبت كلامي
حمدان اتجمد مكانه من الصدمة وعمران ابتسم بسخرية
عمران
كنت فاكرني هقع لوحدي يا عمي غلط لما فكرت تضحي بيا
رائفت
فعلاً الكلب لما تجوع بتاكل في بعضها
المؤمر
اقبضوا عليهم هم الاتنين واسحبوا اسم العمدة من العمدية والانتخابات دي
سكت شوية وبص لرائفت وابتسم وهو بيفتكر اللي حصل
فلاش باك
في الحمامات كان المؤمر طالع من الحمام وفجأة جه رائفت من وراه وهو ماسك سكينة مثبتها عليه
رائفت
اسمعني كويس يا حضرة جناب المؤمر أبوس إيدك أنا مش عاوز أذيك بس الناس دي مجرمين وقتلوا بنت عمي وعاوزين يخلصوا عليا أنا كمان
المؤمر باستغراب
طيب اهدا وقولي إنت مين وناس مين اللي عاوزين يقتلوك
رائفت بعد السكينة عنه ووقف قدامه هو ووسام
رائفت
إحنا جايين لك وعشمنا فيك خير ومتأكدين إنك هتسند المظلوم والغلبان
المؤمر
وده واجبي ووظيفتي اهدا واحكيلي إيه الحكاية
(الحاضر) اتفاجئ رائفت بالمؤمر بيرفع دراعه وهو بيقول
المؤمر
وأنا بنفسي برشح لكم رائفت راجل حكيم وعارف ربنا ومتربي في وسطكم وداق المرار زيكم واثق إنه مش هييجي على واحد فيكم في يوم من الأيام
رائفت بص له بصدمة وبعدين بص للناس بقلق وخوف والناس بدأت تهمس وتتشاور وبسبب حب الناس لرائفت الكل وافق عليه عمدة ليهم
المؤمر خد حمدان وعمران اللي كانوا بيغلوا في نفسهم ورائفت وقف مصدوم وفجأة وسام جريت عليه وحضنته وهي بتقول بفرحة
وسام
مبروك يا عمدة ما تنساش حبايبك بقى في اللحمة
رائفت استوعب اللي حصل وحضنها جامد ولف بيها وهو بيضحك وفرحة
رائفت
أنا عمدة الكل وإنتي عمدتي يا حلوة إنتي( همس في ودنها) وما تنسيش يا عمدة إنتي كمان وعدك ليا
وسام ضحكت بخجل وحضنته أكتر
وسام
بحبك قوي يا رائفت
رائفت بحب
ورائفت بيعشقك يا قلب وروح رائفت
وفاتت الأيام والليالي ورائفت اتعين عمدة وعرف الكل إنه متجوز وسام وقرر يعمل لها أكبر فرح علشان يشهر جوازهم وعمران اتحكم عليه بالإعدام وحمدان خد مؤبد. وجِه اليوم المنتظر يوم فرح العمدة على بنت عمه.
البلد كلها متزينة بالأنوار والزينات والورد والناس متجمعة قدام بيت العمدة الجديد والطبل والمزمار البلدي شغالين والخيول مزينة وبتتحرك وسط الزغاريد والضحك
رائفت واقف وسط الرجالة لابس جلابية صعيدية نضيفة وعمة بيضا وعلى وشه فرحة مش قادر يخبيها وفجأة تظهر وسام من وسط الستات لابسة فستان ابيض بسيط وجميل ومطرز وعلى رأسها طرحة بيضا والفرحة مالية عينيها. رائفت فضل باصص لها كأنه أول مرة يشوفها. جري عليها وحضنها ولف بيها قدام الكل.
رائفت بفرحة
يا ناس حد يقول لي أني بحلم ولا دي بجد وسام اللي كانت طول عمرها في عيني أختي بقت النهارده عروستي وأجمل عروسة شافتها عيني
وسام ضحكت بخجل وتنزل عينيها
وسام
إنت هتفضل تكسفني قدام الناس كده يا عمدة
رائفت
أكسفك إيه بس ده أنا لو فضلت أمدح فيكي من هنا لبكرة مش هوفيكي حقك يا وسام إنتي مش بس مراتي إنتي عوض ربنا اللي جه بعد الوجع والمرار اللي شوفته في دنيتي
وسام بدموع فرحة
وأنت كمان عوض ربنا ليا يا رائفت ربنا ما يحرمني منك أبدًا
رائفت مسك إيدها وسط فرحة الناس
رائفت
من النهارده مافيش خوف ولا فراق ولا دموع دي بلدنا وإحنا أهلها وكل اللي فات بقى ورا ضهرنا
المزمار يعلى والناس تبدأ ترقص والدبكة الصعيدية تنتشر وسط الرجال والستات والزغاريد ملت المكان.. رائفت يضحك ويبص لوسام
رائفت
بس خلي بالك يا عمدتي أنا لسه مستني وعدك
وسام بخجل
وعد إيه يا رائفت
رائفت يبتسم
إنك تبقي عروستي كل يوم وكل ليلة وكل ساعة وكل للحظة انتي نسيتي ولا اي
وسام تضحك وتحط إيدها على دراعه
وسام
وأنا من النهارده عروستك العمر كله
رائفت يقرب منها بحب
رائفت
بحبك يا وسام
وسام
وأنا بموت فيك يا رائفت
تتعالى الزغاريد والمزمار وهما يمشوا وسط أهل البلد والفرحة مالية المكان
🌹🌹🌹🌹🌹🌹🌹🌹🌹🌹🌹🌹🌹🌹
💚 مرحبا بكم ضيوفنا الكرام 💚
هنا في كرنفال الروايات ستجد كل جديد
حصري ورومانسى وشيق ابحث من جوجل باسم الروايه علي مدوانة كرنفال الروايات وايضاء اشتركو في قناتنا👈علي التليجرام من هنا يصلك اشعار بكل جديد من اللينك الظاهر امامك
🌹🌹🌹🌹🌹🌹🌹🌹🌹🌹🌹🌹🌹🌹
تمت بحمد الله
💚 مرحبا بكم ضيوفنا الكرام 💚
هنا في كرنفال الروايات ستجد كل جديد
حصري ورومانسى وشيق ابحث من جوجل باسم الروايه علي مدوانة كرنفال الروايات وايضاء اشتركو في قناتنا👈علي التليجرام من هنا يصلك اشعار بكل جديد من اللينك الظاهر امامك
🌹🌹🌹🌹🌹🌹🌹🌹🌹🌹🌹🌹🌹🌹
تمت بحمد الله