طلعتا من المدرسه مع صحباتي كنا بنتناقش في سؤال في الاحياء كنتا في تانيه ثانوي شفتو واقف بعيد إستأذنتا من البنات ومشيت ليهو عاين لي مسافه وهو ساكت قال لي خلصتي قلتا ليهو اكيد خلصتا لو ما خلصتا كنتا ح اطلع قال لي ما ممكن تقوليها عديل قلتا ليهو في شنو يا أمجد وإنتا الليله جيتني في المدرسه في حاجه قال لي لالا مافي حاجه بس عشان الاسبوع الجاي مسافر م ح اقدر الاقيك ، طلع من جيبوا قروش قال لي خليها معاك عاينتا ليهو قلتا ليهو يا أمجد انا عندي الاديتني ليهم المره الفاتت لسه ما خلصوا بعدين إنتا مسافر وين؟ قال لي ماشي عندي شغل قلتا ليهو بالتوفيق إن شاء الله قال لي إن شاء الله شال مني شنطتني ومشينا سواا وصلني البيت لحدي ما وصلنا مدى لي شنطتي قال لي خلي بالك من نفسك تماام قلتا ليهو سمح مشى وانا دخلتا البيت سلمتا على امي وابوي،، علي اخوي كان لسه ما جاء دخلتا غرفتنا انا ولجين لقيتا قاعده شلتا ملابس من الخزانه ومشيت إستحميت وحشيت حشوه وجيت قعدتا في سريري آكل لجين قالت لي مالك إتأخرتي قلتا ليها مافي حاجه كنت مع البنات بناقش معاهم في موضوع قالت لي امجد لاقاك قلتا ليها اي جاني قالت لي قال مسافر قلتا ليها كلمني قال ماشي لي شغل قالت لي على فكره يا لمار امجد دا بحبك وخاتي ليك الف إعتبار بس إنتي مالك بتعامليهو كدا قلتا ليها يا لجين انا ما بحبو ولا زفت فهمتي شوفي هو صاح عاقد علي لكن مستحيل العقد يتم يا لجين انا ما ممكن اطلع من عيشه فقر امشي لي عيشه افقر من كدا قالت لي عيشتنا مالا كمان هوي يا لمار إتقي الله يا زوله النعيم النحن عايشين فيهو دا في ناس كتار ما عايشين فيهو وبتمنوا نصوا قلتا ليها عليك الله اسكتي خلاص ما تفتحي لي محاضره فتحتا شنطتي طلعتا كتاب لقيت ربطه بتاعت قروش عرفتا دا أمجد قفلتا شنطتي وقعدتا وفتحت الكتاب وقعدتا اقرأ فجأه سرحتا بي خيالي وانا دكتوره عندي قروش كتييره وساكنه في فيلا وعندي عربيه سايقاها ياااه دا حلمي اكيد انا مستحيل ادمر حياتي بالعرس دا....
الفصل الثاني
صباح اليوم التاني امي صحتني بدري قالت لي امجد بره منتظرك لبست توب وطلعتا ليهو لقيتو قاعد في الصاله قال لي جيت اودعك قلتا ليهو طيب مع السلامه تصل بالسلامه إن شاء الله وكنتا ماشه مسكني من يدي قال لي على الاقل ودعيني كويس يمكن ما تشوفيني تاني قعدتا اقول في نفسي يا الله دي شنو المحن دي قلتا ليهو اودعك كيف يعني ما اهو ودعتك مسكني من يدي وعدلني قال لي نفسي اعرف إنتي بتكرهيني ولا شعورك تجاهي شنو ما فاهم قلتا ليهو اها بدينا يا أمجد في شنو ياخ قال لي مافي حاجه ضماني وقال لي مع السلامه ومشى قفل لي نفسي من الصباح ياخ مشيت رتبتا سريري ودخلتا إستحميت ولبستا وشلتا شنطتي مشيت المدرسه لمن وقت الفطور جاء شلتا قروشي مشيت إشتريت فطور وشلتا كتبي مشيت بي ورا الفصول المكان كان هادي كنتا طوالي بجي اقرأ فيهو انا من النوع البحب القرايه شديد وعندي احلام كتيره نفسي احققا بعد خلصتا قريت دروس الليله مريت عليها سريع الجرس دقه رجعتا الفصل ادونا باقي الحصص الاستازه قالت لينا من الشهر الجاي ح ننزل الامتحانات النهائيه ياخ فرحتا فرح واخيرا ح إتخارج من تانيه طلعتا مشيت البيت لقيت العده مردومه والصاله عليها حاله كوكت لي لجين ما ردت كوكت لي امي شكلهم الاتنين مافي طلعتا ملابسي وغسلتا العده كلها ورتبت الصاله وبخرتها ودخلتا إستحميت فرشتا المصلايه صليت الضهر وجبتا كتبي قعدتا في الصاله وقعدتا اقرأ بعد مسافه امي ولجين جو لقوا البيت مرتب اصلا انا قلبي حار ما بقدر اقعد والبيت جايط كدا وهم عارفين الكلام دا مع إني اصغر وحده في البيت بس مسئوله دخلوا الحاجات شكلهم كانوا في السوق امي قالت لي فوزيه دي جايه علينا بعدين تشرب معانا القهوه بركه الرتبتي الصاله لمن قالت كدا إتوترتا طبعا فوزيه دي مرت خالي وأم امجد خفتا تكون عايزه تفتح موضوع العرس مع امي وانا نهائي ما عندي اخلاق للكلام دا هسي وانا اساسا عايزه إتخارج من الموضوع دا لكن كيف...
بتزكر لحدي هسي لمن أمجد دا جا إتقدم لي وافقتا عليهو بس عشان امغرز صحباتي كنتا بومه شديد وكنتا مفتكره ح يعملوا خطوبه وبس بعدها عادي ممكن افركش الموضوع بس لمن عقدوا حسيت الدنيا كلها ضلمت في وشي يااخ انا امجد دا نهائي ما خاتاهو في بالي نهائي اوصفو هو طويل طولو ١٨٠ ابيااض هو وجيه شديد بس عيبو انو هو ما قاري وصل لحدي تالت وخلاها وإشتغل في محل بتاع تصليح تلفونات وبيع وكدا صح هو بدخل قروش كتيره بس كونو إنو ما قرأ دي هي الحاجه البكرها فيهو مع إنو. زول واعي وفاهم بس برضو انا رافضاهو نهائي ولو حتى العرس تم انا ح إطلق منو....
يتبع