رواية فرصة ثانية الفصل الثالث عشر13بقلم همس هشام
ابتلع ريقه بتوتر، بينما هي كانت تقف أمامه، تنظر إلى صورة يحيى وتقول بخفوت:
-يعني المريض اللي بعالجه انت وصلته لكدا
ثم رفعت عينيها ونظرت له بعيون منكسرة وهدرت:
-ليييه.....ليييه عملت كدا
لكمته على صدره وقالت:
-انت عارف انت خليته يعيش إيه، كل ده عشان انت أناني...أناااني
اجتمعوا في الشرفة على صوت صراخها، قال عادل بتساؤل:
-بتزعقي ليه كدا يا ملك في إيه
التفتت لهم ووجهت حديثها إلى أمير ونهى:
-المهندس يحيى، فاكرينه؟؟؟
وجهت نظرها إلى ماهر وأشارت بسبابتها:
-البيه هو السبب في اللي حصله، هو اللي دمر حياته وخلاه يوصل للمرحلة دي
وضعت نهى يدها على فمها بصدمة فقالت ناهد:
-تعالوا نتكلم جوا، يلا
دلفوا واحداً تلو الآخر، كان عادل يحتوي ملك بيده التي كانت ترتعش، بينما كان ماهر ينظر إلى الأرض يشعر بالخجل، فقالت ملك:
-انت إزاي بتنام وانت عامل كل ده، إزاي يا أخي
قالت جملتها الأخيرة بصراخ، جعل عادل يقول لها:
-اهدي يا ملك، اهدي يا حبيبتي وفهمينا في إيه
-في إن ماهر كان سبب في إنه يدمر حياة شخص وده كان سببه إنه أناني....أناني ومش عايز يتعب عايز كل حاجة على الجاهز، وفوق كل ده أنا دكتورة المريض ده
كاد ماهر أن يفتح فمه يتحدث، فأخرسته قائلة:
-هتقول إيه، إيه مبررك على عملتك دي
اقتربت منها ناهد وقالت لها بخفوت:
-براحة يا ملك، اسمعيه شوفي هيقول إيه
تحدث ماهر قائلاً:
-ملك أنا عارف إني غلطان وبصلح غلطي، ياريت تساعديني
ابتسمت بسخرية وقالت:
-أساعدك، أساعدك إزاي، أروح أقوله يحيى ماهر أخويا اللي دمر حياتك وطردك من الشركة عشان كان غيران منك، وهو دلوقتي حاسس بغلطه
تنهد عادل وقال:
-ملك الأحسن إننا نأجل النقاش ده دلوقتي، تعالي نروح
نظرت إلى ماهر بازدراء، وقالت:
-أنا عايزة أمشي أنا مش عايزة أقعد قدامه كتير
ذهبت تأخذ حقيبتها وغادرت سريعاً، فقال عادل وهو يرتدي جاكيت بدلته:
-أنا آسف على اللي حصل النهاردة، كان المفروض يبقى عشا عائلي ونحتفل لكن تتعوض
قال أمير يخفف عنه الحرج:
-ولا يهمك يا عمو عادل، إحنا عيلة
ودع عادل الجميع، وألقى على ماهر نظرة خاطفة ورحل، كانت ملك تنتظره بجانب السيارة، صعداها بهدوء وانطلقوا إلى البيت، بينما ماهر كان يسند ذقنه بيده وينظر إلى الأسفل ويهز قدمه، اقتربت منه ناهد وقالت:
-هي شوية وهتهدى، ومافيش غلط مبيتصلحش
نظر لها وكانت ملامحها ممتلئة بالحنان، وضع رأسه على كتفها وقال:
-أنا عارف إني عملت حاجات غلط، بس كان غصب عني
ربتت على كتفه وقالت:
-مش مهم دلوقتي الكلام ده، المهم إنك تعرف غلطك وتصلحه مهما حصل لازم تفضل وراه لحد ما تصلحه
اعتدل في جلسته وقال:
-ادعيلي يا خالتو
ابتسمت وقالت:
-بدعيلك يا حبيبي، ربنا يهديك وينور طريقك
نهض وقال:
-أنا لازم أمشي
-ماشي يا حبيبي، تروح بالسلامة
نهضت تصطحبه إلى الباب، صعد سيارته، فأتاه اتصال، أجاب عليه وكان خالد:
-إيه يا هندسة بقية فلوسي هتوصل إمتى
زفر ماهر بضيق وقال:
-خالد أنا بعتلك النص إمبارح، وده كان اتفاقنا
-لا ما اتفاقنا اتغير، ومنكم نستفيد
-قصدك إيه يعني
-قصدي إني عايز بقية فلوسي
-ملكش فلوس عندي يا خالد
ثم أغلق الهاتف بوجهه، وزفر بقوة قائلاً:
-نقصاكي هي، كفاية ملك اللي عايزاني أطلب السماح من واحد شمام
ثم انطلق بالسيارة، وعلى الناحية الأخرى كانت تجلس ناهد مع أمير ونهى، وكان أمير يقول:
-أنا بجد مش فاهم دماغ ماهر، إزاي يعمل كدا لمجرد إنه مهندس ناجح
أجابته نهى:
-ماهر طول عمره، مبيحبش حد أحسن منه، من وإحنا صغيرين
وضعت ناهد يدها على وجنتها وقالت:
-ربنا يرحمك يا أختي، ويهدي عيالك
فقالت نهى بعبوس:
-زمان ملك دلوقتي عقلها بيودي ويجيب
ليعلق أمير:
-هي في موقف وحش برضو، بتعالج واحد أخوها كان مصدر أذيته ووصله للحالة دي
فقالت ناهد:
-مش مبرر يخليه مدمن، ما لو كل واحد حصلت معاه مشكلة يتجه للمخدرات وتبقى خربت
فقالت نهى موضحة:
-بس يا ماما، يحيى كان مهندس كبير أوي ومشهور، وماهر كان سبب في إنه يوصل للحالة دي وأكيد مرت عليه لحظات ضعف خلته كدا
-ماشي يا بنتي أنا فاهمة إن ماهر كان سبب في إنه بقى مدمن، لكن إنه يبقى مدمن دي ملهاش مبررات ومش بدافع عن ماهر لكن لازم الإنسان يبقى أقوى من كدا ويقف قدام الصعب، تقدري تقوليلي لما اتجه للمخدرات مشكلته اتحلت.. لا، طب نسيها.... لا، هو بدل ما يحل مشكلته الأولى دخل نفسه في مشكلة أكبر بكتير، ولو كان بعيد عن اللي هو عايزه خطوة بقى بعيد خطوات
عقب أمير قائلاً:
-ماما عندها حق يا نهى، المخدرات مش حل، هي بتغرقك أكتر
تنهدت نهى وقالت:
-ربنا يطلعه منها على خير
ربتت ناهد على يد نهى وقالت:
-ويقومك بالسلامة يا حبيبتي
نهضت سريعاً وقالت:
-فكرتيني
ثم انطلقت إلى غرفتها وأتت ببرواز صغير وبه صورة للجنين، قدمتها لها وقالت وهي تشير إلى نقطة صغيرة:
-أول صورة لحفيدك
أخذتها ناهد بعيون تلمع وقالت:
-ما شاء الله صغير أوي
ابتسم أمير قائلاً:
-بكرا يكبر ويجي بالسلامة
-ربنا يقومك بالسلامة
ثم طبعت قبلة حنونة على وجنتها، فضمتها نهى وهي تنظر إلى صورة جنينها بسعادة
__________________
دلفت ملك المنزل وتكاد الأرض تحترق من خطواتها الغاضبة، سار عادل خلفها وقال:
-ملك، استني
كانت متجهة إلى غرفتها، وعندما سمعت صوته التفتت له، فقال:
-لازم نتكلم، مينفعش تنامي وإنتي متضايقة كدا
اقترب منها وكلما كان يقترب كانت تتحول ملامحها الغاضبة إلى ملامح باكية، عانقها وفور أن عانقها، نزلت دموعها التي امتلأت عيناها بها، مسد عليها وقال بحنان:
-عيطي، وخرجي كل اللي في قلبك
قالت وسط بكائها:
-حطني في موقف صعب أوي يا بابا
وأجهشت في البكاء، فقال لها:
-كله هيعدي، كله هيعدي متقلقيش
-إزاي هقول ليحيى إن ماهر أخويا اللي عمل فيك كدا.... إزاي أكمل علاجه، أنا بقالي ١٠ أيام معاه لحظة بلحظة.....
وبحاول أخليه يتعافى من اللي حصل
كانت كلماتها متقطعة، وعادل يستمع لها ويمسد على ظهرها بحنان وقال:
-لما تهدي هتعرفي تحلي كل حاجة، وأنا جنبك
تمسكت به وقالت:
-أنا تعبت أوي يا بابا
كان يحتويها ويحاول تهدئتها، فكانت منهارة تماماً، مرت دقائق حتى هدأت قليلاً، ثم ابتعدت وقالت:
-أنا بقيت كويسة، هدخل أنام عشان شغلي بكرا
ابتسم لها عادل ابتسامة حنونة وربت على شعرها وقال:
-ماشي يا حبيبتي تصبحي على خير
-وانت من أهله
ذهبت إلى غرفتها وفور أن أغلقت الباب، أحست وكأن الحياة قد أغلقت أبوابها في وجهها، واستحال لون حوائط غرفتها الوردية إلى السواد كما حال العالم من حولها
___________________
في صباح يوم جديد، دلفت ملك إلى المصحة بوجه جامد، سارت متجهة إلى مكتبها، ودلفت ريهام خلفها فوراً، وأملت عليها جدولها وعند ذكر اسم يحيى، قالت لها ملك:
-تمام يا ريهام وبالنسبة ليحيى هستأذن الدكتور إبراهيم يديله الجلسة النهاردة
عقدت ريهام حاجبيها وقالت:
-بس حضرتك مبتحبيش حد يكمل جلساتك
نهضت ترتدي البالطو وترفع شعرها على هيئة ذيل حصان وقالت:
-مؤقتاً يا ريهام لحد ما أشوف هعمل إيه
لم تفهم ريهام شيئاً، ولم تعلق، فحالة ملك غريبة اليوم وعلى غير المعتاد، اتجهت ملك إلى غرفة إياد لعمل آخر جلسة والنظر على تحاليله، والتأكيد على الإجراءات اللازمة لخروجه غداً
________________
وضع حسين الترمومتر في فم أنس، فكان وجهه أحمر ويبدو عليه الإرهاق، انتظر حسين حتى أصدر الترمومتر صوت صفير يدل على انتهائه من قراءة درجة الحرارة، أخذه ونظر به وكانت الحرارة ٣٩، نظر لها بعيون متسعة وقال:
- ٣٩ دي نسمة لو عرفت هتسويني على درجة حرارة ٣٩
ظل يفكر ماذا يفعل، لينتهي به الأمر يبحث على الإنترنت كيفية جعل الحرارة تنخفض، وبعد دقائق من البحث لم تدم طويلاً توصل إلى طريقة لخفض حرارته، ذهب سريعاً إلى المطبخ وأخذ طبقاً وملأه بماء من صنبور المياه، وأخذ قماشة نظيفة، واتجه إليه سريعاً، بللها وعصرها جيداً ثم وضعها على جبهته، أخذ يكررها عدة مرات، فقطع تكراره هذا صوت هاتفه برنة مميزة خصصها لنسمة وفور أن سمعها، أصابه الارتباك فهي بالتأكيد تتصل لكي تتحدث مع أنس، أمسك الهاتف، وأجاب، ليأتيه صوتها:
-إيه يا حسين ساعة عشان ترد
-عاملة إيه يا نسمة
-كويسة، فين أنس
نظر إلى أنس النائم وقال:
-نايم
عقدت حاجبيها وقالت:
-نايم دلوقتي، أنا قولتلك مواعيد نومه وصحيانه يا حسين، وانت لازم تنيمه وتصحيه فيهم
-خلاص يا نسمة ده ويك إند خليه ينام براحته
قالت بإصرار:
-لا وصحيه دلوقتي وأنا معاك في التليفون
نظر إلى الهاتف وإلى أنس النائم من شدة التعب، ناداه بخفوت، ليأتيها صوتها الصاخب عبر الهاتف، تقول:
-بالرقة دي مش هيصحى يا حسين ناديه عدل
ابتلع ريقه وقال:
-بصراحة يا نسمة، أنس حرارته عالية فعشان كدا نايم
-إيييه، وسايبني كل ده، اقفل اقفل أنا جاية
أغلقت الهاتف بوجهه، فنظر إلى الهاتف وتركه جانباً، وأخذ يكرر الكمادات، حتى سمع صوت طرق، ذهب يفتح الباب ولم يتوقع أنها كانت ستصل بهذه السرعة، فقال لها:
-إنتي جيتي إزاي بسرعة كدا
أجابته وهي تبحث عن أنس:
-كنت في مول جنبك هنا مع صحابي، فين أنس يا حسين
-في الأوضة بتاعتنا
وقفت تنظر له عندما قال غرفتنا، ذهبت بخطى بطيئة إلى الغرفة، قبضت على المقبض وفتحته ببطء، دلفت وتنظر إلى الأرجاء وفور أن وقعت عيناها على أنس اتجهت إليه سريعاً، تقيس حرارته، لتجدها ٣٨، وقد بدأ يفيق قليلاً، ذهبت تبدل الماء وأكملت الكمادات حتى وصلت للدرجة الطبيعية، فتح أنس عينيه وقال:
-ماما
مسحت نسمة على شعره وقالت:
-نعم يا حبيب ماما
وضع يده على رأسه وقال:
-حاسس إني دايخ
قبلت رأسه وقالت:
-هديك دوا وتنام وترتاح هتصحى تبقى كويس
أومأ لها وأغلق عينيه مرة أخرى، كان حسين متكئاً على الباب يراقبهم، وعندما نهضت اعتدل في وقفته، غادرت الغرفة سريعاً، ليسير خلفها فقالت تنهره:
-أنا كنت سيباه معاك زي الفل إمبارح إيه اللي حصل
-هو استحمى وقعد قدام التكييف ممكن عشان كدا
تنهدت بضيق وقالت:
-عدت على خير المرادي يا حسين، ياريت تبقى مسؤول أكتر المرة الجاية، هكتبلك على دوا وهاته
كتبت له الدواء على الهاتف، ذهب وتركها بمفردها في بيت يعج بالذكريات منها السعيدة ومنها المؤلمة، كانت تسير بين زواياه ببطء تتذكر كل شيء، ورغم الذكريات السيئة شعرت بالحنين، أغمضت عينيها تأخذ شهيقاً قوياً، ماذا تفعل وإن كانت تحب حسين رغم ما قدمه لها من ألم، زفرت الشهيق بقوة وفتحت عينيها التي امتلأت بالدموع، جلست على الأريكة وشردت، ولم تشعر بدموعها التي سالت على وجنتها، ولم تشعر بحسين الذي أتى وأجفل فور أن رآها تبكي، اقترب منها وجلس أمامها على ركبتيه وقال:
-بتعيطي ليه يا نسمة
نظرت له بعيونها الشاردة وقالت له بصوت مختنق:
-بعيط على اللي حصل واللي هيحصل
نهض وأشار لها:
-طب استني أنا هدي بس لأنس الدوا وجاي علطول
ركض باتجاه الغرفة، نظرت لأثره يبدو عليه القلق والحيرة، أتى إليها سريعاً، وجلس أمامها مرة أخرى مسح دموعها وقال:
-متعيطيش على اللي حصل لأنه خلاص حصل، لكن مافيش داعي تعيطي على اللي هيحصل مش ممكن تطلع أيام حلوة
قالت باستنكار:
-أيام حلوة!!!
-آه أيام حلوة، أخوكي خلاص بيخف وهيرجع زي الأول، ابننا كويس وبصحة كويسة، وأنا وإنتي مع بعض
-مع بعض!!
أومأ وقال مؤكداً:
-أيوا مع بعض، مش لازم بالمكان والأجسام، روحنا وقلوبنا سوا، وطالما دول سوا فـ إننا نجتمع في المكان هي مسألة وقت بس، وأنا مستني اليوم اللي هتقوليلي فيه أنا موافقة نحاول تاني
نظرت بعيونها التائهة، إلى عينيه الحنونة الواثقة، نهض واتجه إلى المطبخ، أخذ كوباً من الماء وقدمه لها، أمسكته بيد مرتعشة وارتشفت منه القليل، مدت يدها بالكوب فأخذه منها بابتسامة، نظرت له وقالت:
-أنا خايفة وحاسة إني مخنوقة
أنهت جملتها ووضعت يدها على عنقها، ليمسك يدها وحثها على النهوض واتجه بها إلى الشرفة، فقال لها:
-خايفة من إيه
فقالت بارتباك:
-خايفة... خايفة أديك فرصة زي ما بتقول ويطلع كابوس تاني مش فرصة
-أنا مش عايز الفرصة إلا وإنتي واثقة إني أستحقها، متضغطيش على نفسك في التفكير، إنتي لما تحسي إنك قادرة تديني فرصة تانية، هتلاقي نفسك لا إرادياً جاية وبتقوليلي إنك موافقة وجاهزة نحاول تاني
شردت في كلامه وعم الصمت، فقال:
-طنط سوسن تعرف إنك هنا؟
هزت رأسها بالنفي، فقال:
-طب خلاص إنتي روحي وأنا هعرف آخد بالي من أنس متقلقيش
نظرت له وانتبهت أن وجودها هنا خطأ، فقالت:
-هتعرف تخلي بالك منه
-آه متقلقيش، دخلت على اليوتيوب وأخدت شوية خبرة
قال آخر جملة مازحاً، فقالت له:
-أنا هتصل بيك كل شوية أتطمن عليه ولو حسيت إنك مش عارف تعمل حاجة كلمني وأنا هقولك تعمل إيه
-ماشي
خرجت من الشرفة، وأخذت حقيبتها، ونظرت بتردد إلى باب الغرفة الموصد التي ينام فيها أنس، اقتربت وهي تؤخر خطوتها، فدخول المنزل بحد ذاته ثقيل عليها، لكن هذه الغرفة عندما تدخلها تشعر وكأن الدنيا تضيق بها، نظرت إلى أنس نظرة سريعة مطمئنة، وضعت يدها على جبهته تستشعر حرارته، ثم خرجت سريعاً، لتجد حسين في المطبخ يعد الطعام، فقالت له:
-تحب أساعدك
نفى برأسه وقال:
-لا، لا إنتي بس روحي قبل ما طنط تقلق عليكي
-تمام، لما أتصل رد عليا علطول
-أوكي خلي بالك من نفسك، وطمنيني لما تروحي
أومأت برأسها وفور أن خرجت من المنزل، تنفست الصعداء، وكأن أنفاسها كانت هاربة منها
________________
كانت ملك تجلس على أحد المقاعد وبيدها كوب مزركش، تحتسي منه، نظر لها بحواجب معقودة فظن أنها لم تأتِ ولهذا السبب أعطى له الطبيب الجلسة، اقترب منها ووقف أمامها، فقال لها:
-أقدر أفهم ليه الدكتور إبراهيم هو اللي كان معايا في الجلسة مش إنتي
أجابته بكلمات مقتضبة:
- دكتور إبراهيم اللي هيبقى مسؤول عن حالتك بعد كدا يا يحيى
جلس بجانبها وقال:
-ليه
-كدا هيبقى أحسن ليك، هو أشطر و.......
ليقاطعها قائلاً:
-أنا مش موافق، على التغيير ده
-بس التغيير ده لمصلحتك
-وأنا مش عايزه، مظنش صدر مني أي حاجة تضايقك خلال فترة علاجي
-الموضوع مش إني مضايقة منك، أنا شايفة إن دكتور إبراهيم هيبقى دكتور مناسب ليك أكتر مني
نظر لها بعدم فهم، وكانت هي تتجنب النظر له طوال محادثتهم، فقال لها:
-هو في حاجة تانية؟
-حاجة تانية زي إيه
تنهد وقال:
-خلاص، خلاص
ثم نهض وقال:
-لو دكتور إبراهيم هو اللي هيكمل معايا، فأنا مش هكمل الجلسات، ومش هكمل علاج، أنا مش لعبة هنا عشان ترموني كل شوية لدكتور شكل، أنا اتكلمت معاكي عشان وثقت فيكي، لكن هو أنا معرفهوش
تركها وغادر إلى غرفته، أخذ دفتر الرسم والقلم واتجه إلى المكتبة، بينما هي كانت تجلس لا تعرف ماذا تفعل، فهي تعلم أن يحيى من النوع العنيد، وإن لم تكمل هي علاجه لن يكمله كما قال، نهضت بتثاقل، واتجهت إلى مكتب الدكتور إبراهيم، دقت الباب، ودلفت بعد أن سمح لها إبراهيم بالدخول، جلست بصمت، وكان ينتظرها أن تقول ما أتت لقوله، فقال يحثها على الحديث:
-اتفضلي يا دكتورة ملك
نظرت له بعينين تائهتين، ثم قالت:
-ممكن ملف يحيى، خلاص أنا هكمله
أعطاها الملف وقال:
-بصراحة قرار إني أكمل علاج يحيى استغربته جداً خصوصاً من دكتورة زيك
أخذت الملف وقالت:
-اشمعنى
-عشان عمرك ما سبتي مريض في نص الطريق، علطول كنتي بتبقي معاه للاخر، لحد ما يبقى كويس وقادر يكمل حياته تاني بشكل طبيعي
تنهدت وكأن الدنيا على أكتافها، نظر إبراهيم لها ولهيئتها الحزينة، فقال لها:
-ساعات الدكتور النفسي، بيبقى محتاج دكتور نفسي كل فترة، وطبعاً إنتي فاهمة كدا يا دكتورة ملك
أومأت له بتفهم، وقالت:
-أكيد فاهمة حاجة زي كدا يا دكتور إبراهيم
ثم نهضت وقالت:
-استأذنك عشان عندي جلسات
أومأ لها بصمت، وغادرت إلى مكتبها وتمسك بيدها ملف يحيى وتشد عليه بقوة كأنها تفرغ فيه كل حزنها وغضبها
______________________
كان يحيى يجلس في المكتبة يرسم خطوطاً متداخلة، يرسم لكي ينفس عن غضبه، حتى انكسر سن القلم فأحس أنه يضغط على حاله، تنهد وأراح ظهره على المقعد، أغمض عينيه ووضع إصبعيه السبابة والإبهام بين عينيه، يحاول أن ينظم تنفسه، لم تكن العصبية يوماً من طباعه، فكان هادئ الطبع، أخذ دفتره واتجه إلى غرفته ألقى الدفتر على الطاولة ووقف أمام النافذة، يشاهد الحديقة، رأى حياة تسقي النبتة فتذكر أنه لم يسقها اليوم، ليخرج من غرفته متجهاً إلى الحديقة، أخذ الإبريق، ووقف بجانبها بصمت يسقي النبتة، نظرت له بطرف عينيها ولم تتحدث، ولاحظها وابتسم ابتسامة صغيرة، التفتت لتغادر، فترك هو الإبريق وناداها:
-حياة استني
كان يفرد كفه ويضمه عدة مرات، يبدو أن تلك الرعشة لن تتركه، التفتت وكتفت يديها أمام صدرها وقالت بمضض:
-يا نعم أؤمرني
ضحك عليها وقال:
-هتفضلي واخدة موقف كدا، ده إنتي الوحيدة اللي أعرفها هنا
-معرفتك تجيب الغم والله
تلاشت ابتسامته وقال بجدية:
-تصدقي أنا غلطان إني عبرتك، آخرة التعامل مع العيال
أنهى جملته وتخطاها ليغادر فقالت بصياح:
-عالفكرة أنا مش عيلة ولما نكون بنتكلم وتمشي دي تصرفات.... إيه كبار
أغمض عينيه من ردودها المستفزة بالنسبة له، التفت إليها وقال:
-بقولك إيه مش على آخر الزمن إنتي اللي هتعلميني إيه اللي هيتعمل وإيه لا
نظرت له ثم رفعت يدها بجانب رأسها وأشارت إشارة معناها الجنون، وقالت:
-هو انت مجنون
أغمض عينيه وزفر بقوة، فهو لم يعد يعرف أن يتحكم بأعصابه، وهي تثير أعصابه وتجعله يريد الفتك بها، فقال بهدوء مريب:
-بصي، هو أنا فعلاً مجنون عشان بتعامل مع واحدة زيك
تركها وغادر وكانت هي تنظر إلى أثره بتأثر، فحديثه قد أحزنها
____________________________
تجلس نهى في مكتبها تمسك هاتفها وتتصفح ملابس الأطفال، كانت تشاهده وتبتسم بحنان، حتى تلاشت ابتسامتها تدريجياً، عندما شعرت بهمس في أذنها بأصوات غير مفهومة، نظرت بجانبها بفزع لتأتيها الأصوات في أذنها الأخرى، لتلتفت بسرعة
ولم تجد شيئاً أيضاً، نظرت حولها برعب، وأخذت هاتفها وانطلقت تركض خارج المكتب، متجهة إلى مكتب أمير، فتحت باب المكتب ولم تجده، اتجهت إلى مكتب الاستقبال الخاص بقسم الجراحة لتسأل عنه بصوت لاهث:
-شوفتي الدكتور أمير
نظرت لها بقلق على حالتها وقالت:
-في العمليات، أعتقد قرب يخلص
أومأت لها، وجلست على المقعد وتعابيرها توحي بالألم، أمسكت معدتها وكان تنفسها بطيئاً، نظرت لها الفتاة واقتربت منها تسألها:
-حضرتك كويسة يا دكتورة نهى
أجابتها بوهن:
-لا... أنا... مش
صمتت غير قادرة على الكلام، أغلقت وفتحت عينيها عدة مرات بوهن فكانت الرؤية مشوشة، رفعت يدها تضعها على أذنها بألم بسبب صوت الصفير الحاد، لتغمض عينيها وتسقط بين يدي الفتاة مغشياً عليها
_______________________
نهضت ملك وقد انتهت من ساعات العمل، خلعت البالطو وعلقته في المكان المخصص، ثم اتجهت إلى المرحاض تعدل من مظهرها وتنزع رابطة شعرها، لينسدل على ظهرها، صففته بطريقة مرتبة، ثم خرجت من المرحاض وأخذت حقيبتها السوداء، واتجهت إلى مكتب إبراهيم، طرقت الباب، ودلفت بعد أن سمح لها، تقدمت عدة خطوات وقالت:
-أنا مش جاية على أساس إني الدكتورة ملك، أنا جاية على إني ملك عادل، أنا فعلاً محتاجة أتكلم مع حد
ابتسم لها إبراهيم وأشار لها لتجلس وقال:
-اتفضلي، وأنا مستعد أسمعك
