رواية نقطة عمياء الفصل الخامس عشر15بقلم منة احمد
آدم وندي فضلوا باصين لنسمة بصدمة، وكل واحد فيهم بيحاول يستوعب اللي قالته ونسمة بصتلهم هما الاتنين بتوتر، ومقدرتش تثبت عينيها على آدم.
آدم بهدوء حذر: إنتي متأكدة من قرارك يا نسمة؟ أنا مش عايزك تاخدي خطوة زي دي لمجرد إنك مضايقة أو بتحاولي تهربي من حاجة تانية.
نسمة بثبات مصطنع: أيوه يا آدم، أنا خلاص قررت... وفكرت كويس قبل ما أقولك.
آدم بلع ريقه، وعقله رجع لكل اللي حصل من أول ما معتز عرف بموضوع جوازهم، ولطريقة تصرفه معاها، وكلام ندي اللي سمعه من شوية عن حب نسمة لمعتز وبدأت الصورة تتجمع قدامه، وفهم إن مشاعرهم لسه موجودة، وإنه يمكن كان الطرف التالت في حكاية هو عمره ما كان بطلها.
حس بوخزة في قلبه، وحاول يخفي وجعه ووقف من مكانه بملامح ثابتة : أنا شايف إنك تاخدي وقتك وتفكري أكتر يا نسمة. الجواز مش قرار يتاخد في لحظة، وأنا مش عايز أكون اختيارك لمجرد إنك محتاجة حد يقف جنبك.
نسمة قامت بسرعة، وبصتله بقلق : بس أنا فكرت كتير يا آدم! وقلبي اختارك إنت... أنا مش بقولك كده عشان أهرب من حاجة، أنا عايزة أبدأ معاك.
آدم نزل عينيه للأرض للحظة، بيحاول يلمّ شتات نفسه، وبعدها رفع عينيه وبصلها بحزن مستخبي ورا هدوئه و بصوت هادي: بس أنا شايف حاجة تانية يا نسمة.
نسمة باستغراب: إيه هي؟
آدم: شايف إن فيه حد تاني لسه واخد مكان كبير جواكي... ومهما حاولتي تقولي العكس، تصرفاتك بتقول غير كده.
نسمة اتلخبطت، وحاولت ترد، لكنه كمل كلامه بحسم: أنا مش عايز أتجوز واحدة قلبها مع حد تاني، ولا عايز أبقى حل مؤقت لمشكلة بينكم. إنتي تستاهلي تختاري وإنتي مرتاحة، وأنا كمان من حقي أكون اختيار حقيقي مش مجرد محاولة لنسيان حد.
نسمة بصدمة: انت بتقول ايه بس ياادم مفيش حد في قلبي وبعدين إنت اللي طلبت مني آخد وقتي وأفكر، ولما قررت وجيت أقولك، بترجع في كلامك ليه؟
آدم بضيق مكتوم: أنا مقولتش إني برجع في كلامي، بس من البداية الموضوع ماكملش، ومعتز كان سبب في إن كل حاجة تتلخبط. يمكن إنتي نفسك عارفة إيه اللي خلاه يتصرف بالطريقة دي... وأنا مش عايز أفضل واقف في النص.
اتنهد بحزن، وبص لها نظرة أخيرة: عن إذنك يا نسمة، أنا همشي... عندي شغل.
ومشي من غير ما يستنى ردها، وسابها واقفة مكانها مصدومة، مش فاهمة إيه اللي اتغير فجأة، وليه جاب سيرة معتز، وإزاي عرف إن فيه حاجة لسه بينها وبينه.
ندي كانت ساكتة طول الوقت، لكن ملامحها اتبدلت لما استوعبت إن كلامها عند الباب هو اللي وصل آدم للحقيقة وقالت بتأنيب ضمير: نسمة... أنا آسفة. مكنتش أتخيل إن الموضوع يوصل لكده.
نسمة باستغراب: آسفة على إيه؟ عملتي إيه يا ندي؟
ندي نزلت عينيها بحرج و بحزن: أنا افتكرته معتز... ولما سألني، قلتله إنك بتحبيه، وفضلت أتكلم عليه قدامه. والله ما كنت أعرف إنه آدم.
نسمة هزت راسها بعدم تصديق، وحطت إيدها على جبينها بوجع: ليه يا ندي؟ ليه تتكلمي في حاجة زي دي من غير ما تتأكدي؟ إنتي عارفة إن الموضوع ده حساس عندي، وعارفة أنا تعبت قد إيه بسببه.
ندي: أنا مكنتش أقصد أأذيكي، والله افتكرته هو...
نسمة رفعت إيدها بهدوء توقفها و بتعب: خلاص يا ندي، كفاية. اقفلي على الموضوع ده... هي كده كده خربانة.
لفت وسابت ندي، ودخلت أوضتها وقفلت الباب وراها.
قعدت على طرف السرير، ودموعها بدأت تنزل من غير ما تقدر تمنعها. كانت فاكرة إن موافقتها على آدم ممكن تكون بداية جديدة لنسيان معتز، لكن في لحظة واحدة كل حاجة اتقلبت، وبقت مش عارفة تخسر آدم ولا تقدر تنسى معتز.
أما ندي، ففضلت واقفة مكانها، حاسة بالذنب، ومش عارفة تعمل إيه عشان تصلح اللي حصل.
بعد شويه...كان معتز قاعد على الكنبة، حاطط رجل على رجل، وماسك سيجارته بين صوابعه. سحب منها نفس طويل، وبعدها نفخ الدخان لفوق وهو مبتسم برضا واضح.
كان مستمتع بفكرة إن نسمة اتصدمت لما شافت نتيجتها، وإنه قدر يرجعها لنقطة ضعفها من جديد و بابتسامة باردة: كده أحسن... أخيرًا شوفتك ضعيفة تاني يا نسمة. يمكن دلوقتي تعرفي قيمتي، وتفهمي إن تجاهلك ليا مش هيعدّي من غير تمن.
سحب نفس تاني من سيجارته، وعينيه ضاقت وهو بيكمل بصوت منخفض: هتفضلي تحاولي تبعدي وتثبتي إنك مش محتاجاني، لحد ما تيجي بنفسك وتطلبي مني أقف جنبك واتجوزك... وساعتها هتعرفي إن مفيش حد هيقدر ياخدك مني.
ابتسم ابتسامة جانبية، ورفع السيجارة لشفايفه تاني، وكأنه واثق إن النهاية هتكون زي ما هو عايز...بعد شوية...
خبط آدم على باب مكتب معتز، فرفع معتز عينه بضيق: مين؟
فتح الباب، ولما شاف آدم، ابتسم بسخرية ولف ضهره من غير ترحيب. آدم دخل وقفل الباب وراه، بينما معتز رجع قعد مكانه، طفى السيجارة وولّع واحدة جديدة وهو مركز مع سيجارته: خير؟
آدم بضيق: ممكن أفهم إيه مشكلتك مع نسمة؟!
معتز ببرود: مفيش مشكلة. عندك حاجة تانية؟
آدم بصوت عالي: متعملش نفسك مش فاهم! أنا بتكلم عن اللي بتعمله معاها من أول يوم عرفتها فيه!
معتز رفع عينه بضيق و بعصبية: بقولك إيه، وطي صوتك. مش ناقص وجع دماغ. أنا مالي بنسمة؟ وإيه مشكلتي معاها؟
آدم بسخرية: واضح فعلًا إنك مالكش مشكلة معاها!
معتز وهو بيسحب نفس من سيجارته: أنجز كلامك بدل ما تفضل تهب فيا وخلاص.
آدم: إيه اللي بينك وبين نسمة يا معتز؟
معتز بابتسامة ساخرة: طالبة عندي، وأنا الدكتور بتاعها. الموضوع بسيط، متحاولش تعقده.
آدم رافع حاجبه: يعني مش بتتخنق كل ما تشوفني معاها عشان بتحبها مثلًا؟
معتز ضحك باستهزاء: حب؟ إنت عبيط يا آدم؟ دي مش على بالي أصلًا، ولا هنزل من مستوايا عشان طالبة عندي.
آدم سقف بإيده بسخرية و بغضب: أيوه، مش على بالك! أمال ليه كل ما أقرب منها تتنرفز؟ وليه اتخانقت معايا في المستشفى وأنا جنبها؟ وليه خدتها ومشيت؟ والأهم من ده كله، لما طلبت منها الجواز، دخلت بوظت كل حاجة وكسرت فرحتي!
معتز قام من مكانه ورمى السيجارة في الطفايه بضيق و ببرود: أنا عملت كده عشان مصلحتك. واحدة مطلقة، ومش عارفين عنها حاجة، وحياتها كلها مشاكل... كنت عايز أدخلك في حكاية إنت مش قدها؟
آدم بانفعال: دي حياتي أنا، وأنا اللي أقرر أتجوز مين! وبعدين أنا مش مقتنع بكلامك ده، إنت مشكلتك مش في نسمة... مشكلتك إنك مش طايق تشوفني معاها... كمل بغضب: وغير كدا أنا عرفت كمان إنها بتحبك... وإنك إنت كمان بتحبها، بس عامل نفسك مش شايف!
معتز سكت للحظة، وبلع ريقه، لكنه حاول يحافظ على بروده وقال بجمود: مفيش الكلام ده، إنت فاهم غلط.
آدم بسخرية وزعيق: آه طبعًا، كلنا فاهمين غلط وإنت الوحيد اللي فاهم! كفاية كدب على نفسك يا معتز!
معتز جز على سنانه ورد بثبات: وانا هكدب علي اهلي ليه والسبب قولته خلاص، ومش هكرره تاني.
آدم قرب منه وخبط بإصبعه على صد..ره بغضب: إنت بتكدب على نفسك مش عليا... إنت بتحب نسمة!
معتز جز على سنانه بغضب مكتوم: مبحبهاش... اتخرس.
آدم وعينيه لمعت بالدموع: كداب يا معتز! إنت بتحبها، بس كبريائك مش مخليك تعترف!
معتز مسكه من هدومه بعنف: قولتلك مبحبهاش انت مبتفهمش! اطلع بره يا آدم!
آدم بإصرار وبغضب: إنت أناني، عايز كل حاجة تحت إيدك! ولما شوفتني قربت منها، قررت تدخل بينا عشان مش قادر تستحمل إنها تبقى لحد غيرك وهي لما استحملتلكش تصرفاتك، بعدت واختارتني أنا!
معتز فقد أعصابه ومد إيده وضربه بالقلم على وشه بغضب: أنا أصلًا محبتهاش، وهي كمان مش بتحبني! افهم بقى، مفيش حاجة بينا!
آدم رجع خطوتين لورا، وحط إيده على خده، وبعدها ضحك بسخرية موجوعة : بتضربني عشانها؟ طب اسمع بقى... البنت اللي إنت مش على بالك دي وافقت تتجوزني، من نفسها ومن غير ما أضغط عليها. وأنا هتجوزها يا معتز.
معتز اتجمد مكانه، والصدمة ظهرت في عينيه رغم محاولته يخفيها وقال بحدة: هي قالتلك كده؟
آدم بابتسامة ساخرة: أيوه، هي اللي اختارت. وأنا وافقت... وهكمل في الجواز.
معتز بلع ريقه، وحس إن كل حساباته اتقلبت ضده. كان فاكر إنه لما يكسر نسمة هترجعله، لكنه اكتشف إنها ممكن تبعد عنه وتختار أخوه وآدم اتحرك ناحية الباب، وقبل ما يخرج بصله للمرة الأخيرة: أنا كده اتأكدت إنك مش بتحبها زي ما بتقول... بس أنا هتجوزها، ومش هسمحلك تبوظ حياتها تاني.
فتح الباب وخرج، وساب معتز واقف مكانه، مصدوم من فكرة واحدة بس...نسمة وافقت تتجوز آدم!
في نفس الليلة...
كانت نسمة قاعدة لوحدها في أوضتها، سرحانة في اللي حصل بينها وبين آدم. هي كانت وافقت عليه، لكن كلامه الأخير لما طلب منها تفكر تاني فضل شاغل بالها. مكانتش فاهمة ليه بعد ما سمع موافقتها قرر يطلب منها وقت.
وفجأة، سمعت خبط على الباب و بتوتر: مين؟!
معتز من بره: افتحي يا نسمة.
اتجمدت مكانها أول ما سمعت صوته، وقامت من مكانها وبصت ناحية الباب بقلق: عايز إيه يا معتز؟ وإيه اللي جابك هنا؟!
معتز من بره: افتحي الأول... متخافيش، مش هخطفك.
فضلت مترددة لحظات، وفتحت الباب بحذر. لقت معتز مستند بكتفه على الحيطة، وأول ما شافها اعتدل وبصلها بهدوء و بابتسامة خفيفة: لو هستأذن حضرتك أدخل، ولا وجودي هيضايقك؟
نسمة بضيق: هو إنت لسه هتضايقني؟ ما إنت عملت كل حاجة تضايقني! عايز إيه يا معتز؟
رفع حاجبه بسخرية: معتز مرة واحدة؟! خدتي عليا أوي يا نسمة.
نسمة بخنقة: امشي من هنا، مش عايزة أشوفك. مش كفاية اللي عملته؟ مش كفاية إنك سقطتني في مادتك؟!
معتز بابتسامة باردة: تستاهلي.
بصتله نسمة بصدمة، لكنه دخل الشقة من غير ما يستنى ردها وبسخرية: بس أنا مش جاي أتكلم عن المادة... أنا جاي أباركلك.
نسمة باستغراب: تباركلي على إيه؟!
معتز: على موافقتك على أخويا طبعًا. واضح إنك عرفتي تكسبي قلبه، لدرجة إنه ساب خطيبته عشانك.
اتسعت عينا نسمة بصدمة: خطيبته؟! آدم كان خاطب؟!
معتز: أيوه، كان خاطب. والغريب إنه سابها بعد ما قرب منك... مش غريبة شوية؟
نسمة باستنكار: والله ما كنت أعرف إنه كان خاطب أصلًا! آدم كان موجود من زمان، ووقف جنبي في وقت كنت محتاجة فيه حد. أنا عمري ما حاولت ألفت نظره، ولا عملت أي حاجة عشان يحبني!
معتز بضحكة ساخرة: يعني هو اللي حبك لوحده، وإنتي ملكيش دعوة؟
نسمة: أيوه! هو اللي اختار يقرب مني، وأنا مش فاهمة إنت ليه مصمم تشوفني بالشكل الوحش ده؟!
معتز بص لها لحظة، وبعدها قال بنبرة حادة: لما ألاقيكي قربتي من أخويا لدرجة إنه ييجي يقولي بنفسه إنه قرر يتجوزك، وإنك وافقتي عليه؟! إنتي فاكرة إن الموضوع عادي؟! إنتي دخلتي بيني وبين أخويا، ووصلتيه لمرحلة إنه يختار يتجوزك... ولسه واقفة قدامي بتسأليني أنا ليه شايفك كده؟!
اتسعت عينا نسمة، وسكتت للحظة كأنها مش مستوعبة اللي سمعته و بصدمة: إيه؟!
معتز: هو إيه اللي ايه ؟ هو الكلام غريب؟
نسمة فضلت باصة له، وجواها أسئلة كتير. إزاي آدم قال لمعتز إنه قرر يتجوزها، وهو لما اتكلم معاها طلب منها تفكر شوية، وقال إنه هو كمان هيفكر؟ هل غيّر رأيه؟ وإمتى قرر؟ وليه ماقالهاش؟
حاولت تخفي صدمتها، لكن معتز لاحظ سكوتها.
معتز بسخرية: مالك؟ اتفاجئتي ليه؟ مش إنتي وافقتي عليه؟
نسمة لمّت نفسها بسرعة، ورسمت ابتسامة صغيرة على وشها وقالت بغيظ: أيوه، وافقت. عندك مشكلة؟
معتز ضيق عينيه: يعني كلامه صح؟ إنتي وافقتي فعلًا؟
نسمة: أيوه يا معتز، وافقت. إيه؟ كنت فاكر إني هرفض؟
معتز: يعني إنتوا وافقتوا تتجوزوا فعلًا؟
نسمة بابتسامة مستفزة: أيوه، وإنت مالك؟ ولا مضايقك إننا ممكن نبقى عيلة واحدة؟
معتز بحدة: واضح إنك مستعجلة أوي على الجوازة دي.
نسمة: وليه لأ؟ آدم راجل محترم، وبيعرف يقدّر اللي قدامه. وبعدين هو اختارني، وأنا كمان اخترته.
كانت من جواها لسه مصدومة من كلام معتز، لكنها خبّت ده كويس، وماحبتش تديله فرصة يعرف إن كلامه لخبطها.
معتز بضحكة قصيرة خالية من المرح: متحاوليش تستفزيني يا نسمة.
نسمة: أنا اللي بستفزك؟! ده إنت اللي داخل عليّا تتكلم وكأنك من حقك تحاسبني على اختياراتي! وبعدين لو مش عاجبك إني اخترت آدم، فدي مشكلتك إنت مش مشكلتي.
معتز قرب منها خطوة، وملامحه بدأت تتغير: الموضوع مش لعبة؟ إنك توافقي على أخويا عشان تغيظيني وبعدين كل حاجة تبقى عادي؟
نسمة: أنا وافقت عليه عشان هو إنسان كويس، ووقف جنبي لما كنت محتاجة حد! مش كل حاجة في حياتي لازم تكون ليها علاقة بيك يا معتز!
معتز مقتربًا منها: يبقى ليه آدم اختارك انتي بالذات؟!
نسمة باستنكار: هو أنا المفروض أجاوبك على سؤال زي ده؟ اسأله هو.
معتز: متتهربيش من الكلام.
نسمة: أنا مش بتهرب، أنا بس مش فاهمة إنت ليه مهتم أوي تعرف تفاصيل علاقتي بآدم.
معتز بحدة: عشان آدم أخويا، ومش هسمحلك تلعبي بيه عشان تغيظيني.
نسمة بدموع: أنا مش بلعب بيه! إنت ليه مش قادر تفهم إن آدم وقف جنبي؟! هو اهتم بيا واحترمني، وأنا وافقت عليه عشان شوفت منه حاجات عمري ما حسيت بيها معاك.
معتز: وإنتي نسيتي اللي بينا؟!
نسمة بوجع: لا منستش أنا حبيتك بجد يا معتز، وإنت عارف ده كويس. إحنا اعترفنا لبعض بحبنا، ومكنش كلام لحظة وخلاص. بس إنت عملت إيه بعد كده؟! فضلت تعاملني بقسوة، وتبعدني عنك، وكل ما كنت أحاول أفهمك كنت بتقابلني بإهانة أو شك!
معتز بعصبية: وأنا مش هفضل أسمع تبريراتك دي! ابعدي عن آدم يا نسمة.
نسمة باستغراب: نعم؟!
معتز بحدة: زي ما سمعتي. ابعدي عنه، ومتوافقيش على الجواز ده.
نسمة: وإنت مالك؟! هو إنت فاكر إنك من حقك تقررلي أعيش إزاي ومع مين؟!
قرب معتز منها لحد ما بقت ضهرها ملاصق للحيطة، وحط إيده جنبها وقال بصوت منخفض: لو لسه بتحبيني زي ما قولتيلي يومها، متوافقيش عليه... خليكي معايا أنا.
نزلت دموع نسمة، وبصتله بوجع وخوف في عيونها: إنت فاكر إن الموضوع بالسهولة دي؟! أنا حبيتك، بس بقيت بخاف منك يا معتز. بقيت مش عارفة أتكلم معاك من غير ما أخاف من رد فعلك، ولا أقرب منك من غير ما أتوقع إنك هتجرحني تاني.
معتز بعصبية: وأنا عمري ما طلبت منك تخافي مني!
نسمة: بس إنت اللي وصلتني لكده! أنا كنت مستنية منك تحسسني إنك عايزني، إنك متمسك بيا... لكن كل اللي شوفته منك كان قسوة ووجع: يعني هتروحي لأخويا عشان شوية اهتمام؟!
نسمة بغضب: آدم وقف جنبي لما إنت خذلتني. عاملني باحترام وحنية، ومخلانيش أحس إني قليلة أو إني عبء عليه!
معتز: إنتي مش بتحبيه يا نسمة!
نسمة بدموع وعناد: يمكن لسه مش حبيته، بس هدي نفسي فرصة أحبه! آدم يستاهل إني أحاول عشانه، وأنا مش هفضل مستنية منك حاجة إنت مش عايز تدّيهالي.
قبض معتز على دراعها بقوة، وضغط عليه أكتر وهو بيبصلها بغضب.
معتز: إنتي بتكذبي! إنتي بتعملي ده كله عشان تغيظيني، ومش هتقدري تحبيه مهما حاولتي!
نسمة بتألم: سيب دراعي يا معتز! إنت بتوجعني!
معتز: وأنا بقولك أهو... سيبي آدم وتعالي معايا أنا والا هبوظ كل حاجه!
نسمة بصتله بذهول، وحاولت تسحب دراعها: إنت بتقول إيه؟!
معتز بنرفزة: اللي سمعتيه! ابعدي عنه، ومتفكريش تكملي معاه. أنا مش هسيبك تتجوزي أخويا!
نسمة: لأ يا معتز، مش هسيبه عشان إنت قررت فجأة إنك عايزني جنبك!
معتز شد إيده على دراعها أكتر، وملامحه اتبدلت تمامًا. عروقه برزت في رقبته وجبينه، وفكه اتشنج من شدة الغضب: إنتي مش فاهمة أنا بقولك إيه؟! أنا مش بطلب منك، أنا بقولك تبعدي عنه!
نسمة بصت في عينيه، ولأول مرة ماقدرتش ترد بنفس القوة. نظراته كانت مخيفة، وإيده اللي قابضة على دراعها كانت بتوجعها. حاولت تسحب إيدها تاني، وصوتها خرج أضعف من الأول وقالت بخوف: سيب إيدي يا معتز...
لكنه فضل ماسكها، فرفعت عينيها له تاني، والدموع واقفة في عينيها: بص في عيني... شوفت إنت بتخوفني منك إزاي؟! أنا بقيت بخاف منك يا معتز، من صوتك ومن عصبيتك ومن إيدك اللي مش بتعرف تتحكم فيها. إنت كل مرة بتأكدلي إني عمري ما هحس بالأمان معاك.
الكلام وقف للحظة في حلقه، لكن غضبه كان لسه مسيطر عليه.
نسمة كملت بصوت مرتعش: إنت عايزني أسيب آدم وأجيلك... طب هاجي على إيه؟ على نفس القسوة؟ على نفس التملك؟ إنت عايزني ليك، بس مش عايز تفهم أنا محتاجة إيه. أنا مش حاجة تملكها يا معتز!
معتز قرب وشه منها، وصوته بقى مكتوم من العصبية: أنا مش هقبل إنك تبقي لواحد غيري، فاهمة؟ خصوصًا لو كان أخويا!
نسمة: وأنا مش هسيب آدم عشان إنت مش قادر تتقبل ده. أنا مش هفضل طول عمري واقفة مستنياك تقرر تحبني بطريقتك!
فضل باصص لها، وإيده لسه محاوطة دراعها. عينه نزلت للحظة على شفايفها، وبصلها بغضب مكبوت، كأنه بيحاول يمنع نفسه من أي تصرف تاني. قبض على فكه، وبعدها نفخ بضيق، وساب دراعها فجأة ورجع خطوتين لورا.
نسمة رجعت إيدها لصدرها، وفركت مكان قبضته وهي بتتألم.
معتز لف بعصبية، وعينه وقعت على الكرسي اللي جنبه. مسكه بكل قوته وخبطه في الأرض بعنف لحد ما اتكسر.
نسمة اتخضت ورجعت لورا: إنت اتجننت؟!
معتز بغضب شديد: كفاية! أنا مش هفضل واقف أسمعك بتتكلمي عن أخويا وكأنك خلاص بقيتي بتحبيه! إنتي فاكرة إنك تقدري تعملي اللي إنتي عايزاه ومحدش هيحاسبك؟!
نسمة بصوت مرتعش: أنا مش بعمل حاجة غلط! آدم عارف هو بيعمل إيه، وأنا كمان عارفة أنا بعمل إيه. إنت بس مش قادر تتقبل إن حياتي ممكن تكمل من غيرك!
بصلها معتز بنظرة حادة، وكان واضح إنه على وشك ينفجر من جديد، لكنه اتجه ناحية الباب.
نسمة: معتز... إنت رايح فين؟
معتز فتح الباب، ووقف لحظة من غير ما يبصلها وقال بغيظ: اشبعو ببعض!
خرج من الشقة وقفل الباب وراه بعنف وفضلت نسمة واقفة، ماسكة دراعها اللي بيوجعها وباصة للكرسي المكسور، قبل ما تسند ضهرها على الحيطة وتقعد على الأرض منهارة في العياط وأما معتز، فنزل السلم غاضبًا؛ آدم حسم قراره وهيتجوز نسمة، وهي كمان وافقت، والأسوأ إنها رفضت تسيبه وتختاره هو، رغم إنه طلب منها ده لأول مرة بوضوح.
بعد يوم...
كانت نسمة قاعدة على سريرها، ماسكة موبايلها وبتقلب فيه من غير تركيز، لحد ما رنّ باسم آدم. اترددت لحظة قبل ما ترد: ألو يا آدم.
آدم بابتسامة باينة في صوته: إزيك يا نسمة؟ عاملة إيه؟
نسمة: الحمد لله، كويسة... إنت عامل إيه؟
آدم: الحمد لله. بصي، أنا كنت بفكر في موضوعنا، وحاسس إننا منأجلش أكتر من كده... إيه رأيك نحدد معاد للخطوبة ونخليها قريب؟
سكتت نسمة باستغراب، وبعدها قالت: مش إنت قولتلي أفكر، وإنك إنت كمان هتفكر؟ وحسستني إن فيه حد في قلبي... أنا مش فاهماك يا آدم.
آدم بهدوء: أنا قولتلك كده عشان مكنتش عايزك تحسي إني بضغط عليكي، ولا تاخدي قرار وإنتِ مش متأكدة منه. كنت عايز أديكي فرصة تفكري تاني، وتتأكدي إنك فعلًا عايزة تكملي معايا، مش لمجرد إني طلبت منك.
نسمة: وقرارك إنت؟
آدم: أنا قراري معروف يا نسمة. أنا عايزك إنتي، وقولت لأهلي كلهم إني قررت أتجوزك، ومش عايز أستنى أكتر من كده. بس في الآخر القرار قرارك... إنتي موافقة ولا لأ؟ ومش هضغط عليكي مهما كان ردك.
سكتت نسمة، وعقلها رجع لكلام معتز، ونبرة صوته وهو بيقول إنه مش هيقبل تكون لحد غيره. للحظة حست إنها استعجلت، وإنها يمكن أخدت قرار غلط، لكنها كانت عارفة إن الرجوع لمعتز مش سهل، وإنها تعبت من خوفها ووجعها معاه.
آدم بقلق: نسمة؟ إنتي معايا؟
أخدت نفس طويل، وحاولت تثبت صوتها: أيوه يا آدم... موافقة. أنا قولتلك قبل كده إني موافقة.
آدم بفرحة: بجد؟ ربنا يخليكي ليا يا نسمة، مش عارفة أنا فرحان قد إيه!
نسمة بابتسامة باهتة: ربنا يتمم بخير.
آدم: يبقى نتفق إن الخطوبة تكون يوم الخميس الجاي، وهكلم أهلي ونرتب كل حاجة.
نسمة: ماشي، زي ما تشوف.
فضلوا يتكلموا شوية، وآدم كان واضح عليه فرحته وحماسه، وبعدها قفلوا المكالمة وحطت نسمة الموبايل جنبها، وفضلت باصة قدامها بشرود. فجأة دموعها نزلت من غير ما تحس، وافتكرت إنها حبت معتز بجد، لكن هو بتصرفاته خلاها توصل للقرار ده. مسحت دموعها وهي بتحاول تقنع نفسها إنها لازم تنساه، وإن آدم بيحبها وبيعاملها كويس، ويمكن مع الوقت تقدر تحبه وتبدأ معاه من جديد... حتى لو قلبها لسه متعلق بحد تاني.
بعد أيام، وجيه يوم الخطوبة...
كانت نسمة واقفة قدام المراية، وندي بتظبطلها الطرحة، وبمجرد ما خلصت رجعت خطوة وبصتلها بإعجاب وقالت بفرحة: الله أكبر! إيه القمر ده؟ آدم هيقع من طوله أول ما يشوفك.
نسمة بابتسامة هادية: يا رب اليوم يعدّي على خير، ونبدأ صفحة جديدة من غير وجع دماغ.
ندي: هو إنتِ لسه مش فرحانة؟ أنا بقالي ساعة بحاول أطلع منك ضحكة عدلة!
بصتلها ندي في عينيها، ولاحظت إن ابتسامتها مش حقيقية وقالت بجدية: نسمة، في إيه؟ إنتي من الصبح مش طبيعية، وفي حاجة شاغلاكي.
اتنهدت نسمة، وعينيها لمعت بالدموع وقالت بصوت مكسور: خايفة يا ندي... حاسة إني داخلة على خطوة مش عارفة إذا كانت صح ولا لأ. وخايفة معتز ميخلّيش اليوم ده يعدّي على خير.
ندي باستنكار: معتز تاني؟ يا نسمة كفاية تفضلي حاطة نفسك تحت رحمته! هو إنتي هتفضلي عايشة مستنية هو هيعمل إيه؟ آدم راجل محترم وبيحبك، وبيحاول يسعدك، ادي لنفسك فرصة تبصي لقدام بدل ما تفضلي أسيرة للي فات.
نسمة وهي بتمسح دموعها: نفسي أعرف أعمل كده.
ندي بابتسامة: وهتعرفي، بس بطلي تفكير بقى، ووريني ضحكتك الحلوة دي.
ابتسمت نسمة أخيرًا، وقبل ما ندي ترد، رن موبايلها.
آدم: مساء الخير يا عروستي، أنا اتحركت خلاص، شوية وأكون عندك.
نسمة بخجل: ماشي يا آدم، إحنا جاهزين.
آدم: طب خدي بالك من نفسك، أشوفك على خير.
قفلت نسمة المكالمة، وفضلت واقفة لحظة بتحاول تهدي نفسها، لحد ما سمعت خبط على الباب.
نسمة باستغراب: مين ده؟ آدم لسه في الطريق.
ندي بعصبية: استني، أنا هفتح وأشوف مين ليكون معتز.
نسمة: خليكي يا ندي أنا مش ناقصه مشاكل .
راحت نسمة ناحية الباب وفتحته، لكن أول ما شافت الست اللي قدامها اتسمرت مكانها.
نسمة بصدمة: إنتي؟! إيه اللي جابك هنا؟ عرفتي مكاني إزاي؟!
ظهرت ندي وراها، وبصت للست باستفهام.
الأم ببرود: هو ده استقبال أمك بعد الغيبة دي كلها؟
نسمة بسخرية موجوعة: أمّي؟ لسه فاكرة إن الكلمة دي تنفع تتقال بعد كل اللي عملتيه؟
الأم: أنا متابعاكي من يوم ما سيبتك، وعارفة كل خطوة خدتيها لحد ما وصلتي للبيت ده.
نسمة بغضب: وبتراقبيني كمان؟! إنتي مش كفاية عليكي السنين اللي ضحكتي فيها عليّا؟ عيشتيني طول عمري فاكرة إني بنتك، وفي الآخر طلع كل اللي بينا كدبة!
الأم: أنا مش جاية أفتح معاكي حساب قديم. أنا جاية أقولك الحقيقة اللي كان المفروض تعرفيها من زمان.
نسمة: حقيقة إيه؟! هو لسه عندك حاجة متعرفينيش عليها؟!
الأم: جاية أعرفك مين أهلك الحقيقيين... ومين أمك اللي ولدتك.
اتبدلت ملامح نسمة، واختفت نبرة الغضب للحظة، وبصت لها بعدم تصديق وقالت بصوت مرتعش: أهلي؟! إنتي بتتكلمي عن إيه؟
الأم: لو عايزة تعرفي، تعالي معايا وأنا هوصلك ليهم.
ندي بقلق وهي بتشد نسمة من إيدها: لا يا نسمة، متروحيش معاها. استني آدم ييجي، ومش لازم نصدق أي كلمة بتقولها.
فضلت نسمة باصة للست، جواها رغبة كبيرة تعرف أصلها، وفي نفس الوقت خايفة تكون بتتسحب لفخ جديد.
نسمة بحزم: هاجي معاكي، بس خليكي فاهمة إن المرة دي مش هعدّي أي كدب. لو اكتشفت إنك بتلعبي بيا، هروح القسم وهخليكي تتحاسبي على كل اللي عملتيه.
الأم ببرود: براحتك، أنا مش جاية أجبرك على حاجة.
ندي برجاء: نسمة، أرجوكي فكري كويس.
نسمة وهي بتضغط على إيدها: متقلقيش، هكلمك أول ما أوصل.
خرجت نسمة مع الست، وندي فضلت واقفة مش مطمنة. أول ما اختفوا من قدامها، طلعت موبايلها واتصلت بآدم.
آدم: أيوه يا ندي، نسمة جاهزة؟ أنا قربت أوصل.
ندي بسرعة: آدم، إنت لازم تيجي حالًا! نسمة مشيت مع واحدة ظهرت فجأة وبتقول إنها أمها، وأنا مش مرتاحة للموضوع خالص.
آدم بقلق: إيه؟! مشيت معاها على فين؟!
ندي: معرفش، بس أرجوك الحقها قبل ما يحصلها حاجة!