رواية فرصة ثانية الفصل الثامن عشر18بقلم همس هشام

رواية فرصة ثانية الفصل الثامن عشر18بقلم همس هشام

انتهت حياة من حزم أمتعتها، أغلقت الحقيبة وجلست بجانبها تحدق في الفراغ بتيه، لتفيق على صوت طرق على الباب، مسحت دمعة فرت من عينيها ولم تشعر، وقالت:

\- ادخل

طلّ عليها الطبيب إبراهيم، قائلًا:

\- أحسن دلوقتي؟

أجابته بصوت مبحوح:

\- الحمد لله

جلس على أقرب مقعد وقال:

\- أنا عارف إن خسارة الأب صعبة، وحتى لو كان أوحش الناس يا حياة فهي هتفضل صعبة.

أدمعت عيناها عند سماع كلماته، فقال لها:

\- لكن إنتِ بنته الوحيدة، لازم تقفي جبل وتاخدي العزا، لازم تبقي قوية.

هزت رأسها عدة مرات بالنفي وقالت بنحيب:

\- مش هقدر.... مش هقدر.

دنا منها وقال يحفزها:

\- لا هتقدري يا حياة، إنتِ قوية، وأنا حضرتلك كل حاجة تخليكي مرتاحة برا، مش هتحتاجي أي حاجة، هيكون معاكي مرافق وهيتعامل مع أي حاجة بتوجهيها.

مسحت دموعها، ليردف:

\- أيوه امسحي دموعك، وأنا في ظهرك، وهتلاقيني في العزا.

\- بجد هتيجي؟

\- أيوه، ده واجب عليا.

أشار بيده على حقيبتها ونهض قائلًا:

\- هبعتلك حد ياخد شنطتك وجهزي بسرعة عشان متتأخريش.

\- حاضر.

نظر لها نظرة أخيرة ثم غادر، لتبدأ في تغيير ملابسها.

_____________

يجلس أنس بجانب حسين وبيده شطيرة من البطاطس والكاتشب، يتهمها بنهم وقد أفسد وجهه وملابسه بسبب الكاتشب، بينما حسين يصب كل تركيزه على الجهاز اللوحي، يقوم ببعض الأعمال، فقال أنس:

\- بابا تعرف أنا شوفت خالو يحيى النهاردة؟

\- وعامل إيه خالو يحيى؟

أجابه وهو يمسح بأصبعه الكاتشب من على تيشيرته:

\- كويس، كان قاعد في جنينة كده، بس كان واحشني أوي.

\- طب كويس إنك شوفته.

تنهد الصغير وقال:

\- بس عارف يا بابا، أنا مضايق عشان مش بشوف خالو يحيى كتير، لكن في حاجة مضايقاني أكتر.

\- إيه يا حبيبي اللي مضايقك؟

\- نفسي نرجع سوا أنا وإنت وماما نقعد في مكان واحد على طول.

أغمض عينيه وأخذ نفسًا عميقًا، ثم التفت له ليصدمه هيئة أنس، فصاح به:

\- إيه اللي عملته في نفسك ده؟

نظر أنس إلى نفسه قائلًا:

\- يا بابا هتدخل الآلة السحرية وهيطلع نضيف.

\- والآلة السحرية دي المفروض الغسالة صح؟

\- أعتقد، بس هي سحرية بجد، الهدوم بتدخل وسخة تدخل نضيفة.

هز حسين رأسه بنفاد صبر، ثم قال:

\- طب إيه رأيك يا أنوس تساعدني نرجع أنا وإنت وماما في مكان واحد؟

نظر له أنس بعيون متسعة من الفرحة وفم ممتلئ من الطعام، وقال بصوت غير مفهوم بسبب الطعام:

\- طبعًا يا بابا.

نهض حسين يلتقط شريط الدواء وقال:

\- أخد بس الدوا ده وأفكر وأتكتك عشان حاسس إني داخل على دور برد.

التهم أنس الشطيرة بالكامل وقال:

\- هروح أغير هدومي وأحطهم في الآلة السحرية.

_______________

تجلس دينا على طاولة استقبال قسم الجراحة، ويقف على مقربة وائل ممسكًا بيده ملفًا ويرمقها بين الحين والآخر، ولاحظت هي ذلك ولم يرق لها، لتأتي سمر تجلس بجانبها وعيناها معلقة على وائل قائلة:

\- ماله الدكتور وائل واقف كده ليه؟

تأففت دينا قائلة:

\- بقاله كام يوم على الحال ده لازق فيا بطريقة غريبة، ده عَزمني على القهوة الصبح.

ضحكت سمر وقالت بسخرية:

\- كان عينك من الدكتور أمير، جالك الدكتور وائل.

نظرت لها دينا بضيق وقالت:

\- دمك سم يا بت يا سمر.

\- والله إنتِ خيبة، ده دكتور وائل حتة سكرة.

ضربتها بكفها على كتفها وقالت:

\- اتفضلي يا أختي، ميغلاش عليكي، أنا قايمة.

ضحكت سمر وقالت:

\- رايحة فين بس؟

أشاحت بيدها وأكملت سيرها مغادرة وهي تفكر لما مفعول السحر لم يظهر على أمير، اتجهت إلى مكتبه ودقت الباب ودلفت عندما سمح لها بالدخول، فوجدته يتحدث عبر الهاتف:

\- خلاص أنا هجيلك النهاردة يا طنط ناهد وأشرحلك الوضع.

ثم صمت قليلًا وقال:

\- تمام، مع السلامة، سلام.

ثم أغلق المكالمة ونظر إلى دينا ينتظر أن تتحدث، فاقتربت تحادثه برقة:

\- دكتور أمير، حبيت أفكر حضرتك إن وراك عملية.

هز رأسه بالإيجاب قائلًا:

\- فاكر متقلقيش.

\- تحب أساعد حضرتك في أي حاجة؟

هز رأسه بالنفي، ثم نهض أمير يرتدي البالطو لتقترب تعدل من ياقته، ليبعد يدها بحدة قائلًا:

\- إنتِ بتعملي إيه؟

ابتلعت ريقها قائلة بتقطع:

\- أنا...... بس لاقتها مش معدولة وحضرتك مخدتش بالك.

\- اتفضلي يا دينا نتقابل في أوضة العمليات.

غادرت دينا وهي تزفر بضيق، وأثناء سيرها متجهة إلى غرفة العمليات أوقفها وائل يسألها:

\- دينا، إنتِ كويسة؟

أجابته دينا بتنهيدة:

\- كويسة، محتاج أي حاجة يا دكتور وائل؟

\- لا أنا بس شوفتك مضايقة، فقلت أطمن عليكي.

أجابته باقتضاب:

\- لا أنا كويسة، عن إذنك.

لتتركه وتغادر متجهة إلى غرفة العمليات، وظل وائل يحدق في أثرها ببال منشغل.

___________

دخلت حياة غرفة والدها بعد انتهاء اليوم الأول من العزاء، جلست على الفراش تتمسحه بيدها وعيناها ممتلئتان بالدموع، فهمست:

\- روحت يا بابا.. مشيت وسبتني، حتى قبل ما نتصالح.

ليزداد وتيرة بكائها، استلقت على الفراش بوضع الجنين، كانت تبكي وكأنها لم تبكِ من قبل، بكاء تشكو فيه مرارة الفراق، ليأتيها صوت طرق على الباب، نهضت بوهن وهي تمسح دموعها، فتحت الباب وكان المرافق الذي أتى معها من المصحة، مد يده بالهاتف، وقال:

\- دكتورة ملك على التليفون.

أخذت الهاتف وقالت:

\- شكرًا.

تركته وذهبت تجلس على الفراش وقالت:

\- دكتورة ملك.

\- حياة عاملة إيه دلوقتي؟

\- كويسة.

\- معرفتش أجي النهاردة مع دكتور إبراهيم، لكن هاجي معاه بكرة إن شاء الله.

\- ولا يهمك، سؤالك عني دلوقتي كفاية.

لتصمت ملك قليلًا، ثم نظرت بجانبها وقالت:

\- يحيى عايز يكلمك يا حياة.

ثم أعطت الهاتف ليحيى الذي قال:

\- حياة، طمنيني عليكي.

\- بخير يا يحيى.

\- صوتك مش كويس، إنتِ بجد كويسة؟

حمحمت وقالت:

\- آه كويسة صدقني.

\- عملتي إيه النهاردة، حد ضايقك؟

\- عمو جلال معايا طول اليوم، وكمان المرافق حمزة معايا على طول.

ليقول بتساؤل:

\- مين جلال؟

\- ده عمي أخو بابا الوحيد.

\- تمام، أنا قلت أطمن عليكي.

\- شكرًا يا يحيى.

ليصمت قليلًا، ليبتعد قليلًا عن ملك وقال بخفوت:

\- لسه خايفة؟

سؤاله أثار مشاعرها، جعلها تبكي مرة أخرى، ولم يجبه إلا صوت أنينها، فقال:

\- لا متعيطيش يا حياة.

\- أنا خايفة شوية، بحاول أتغلب عليه، حاسة إني لوحدي، محدش أعرفه معايا.

\- ليه عمك جنبك؟

\- عمو جلال طول عمره عايش برا.

لتأتي ملك من خلفه وتنبهه لكي ينهي المكالمة، فقال:

\- رسمتي مش معاكي؟

\- معايا.

\- اعتبريني جنبك بيها، مش كنتي عايزاني أجي معاكي؟

\- حاضر.

\- أنا لازم أقفل، لو عرفت أكلمك تاني هكلمك.

\- مع السلامة.

\- سلام.

ثم أغلق المكالمة، وأعطى الهاتف لملك، لتأخذه منه فقال لها:

\- إنتِ هتروحي العزا بكرة؟

\- أيوه، تحب أوصلها حاجة؟

هز رأسه بالنفي، ثم صمت قليلًا، وفتح فمه لكن لم يجد الكلمات يقولها، فقالت ملك بعد أن راقبت حالته:

\- مالك يا يحيى؟

وضع رأسه بين يديه وقال:

\- معرفش بس حاسس بنفس العجز اللي بحسه ناحية ماما ونسمة، نفس العجز لما خبطت أمي وفتحت دماغها عشان عايز فلوس بسبب الزفت، دلوقتي حاسس نفسي ناحيتها هي خايفة وكانت عايزة حد جنبها ووجودي هنا مانعني إني أبقى معاها.

\- متحملش نفسك فوق طاقتها، حياة لازم تواجه خوفها، كان المفروض تخرج من بدري لكن خوفها مانعها من كده.

\- مش عارف مش عااارف.

قالت بصوتها الدافئ:

\- متشغلش بالك، وأنا بكرة هروحلها وفكر لو عايز توصلها حاجة أنا في الخدمة.

ثم أنهت كلامها بغمزة مشاكسة، ليضحك قائلًا:

\- أنا مش عارف أرد وقفتك جنبي دي إزاي، مكنتش حاسس إني مجرد مريض وإنتِ الدكتورة بتاعتي طول فترة علاجي هنا، بحسك أخت واقفة جنب أخوها بتساعده.

حاولت رسم ابتسامة صغيرة على وجهها وقالت:

\- ترد ليه وقفت جنبك ليه بقى طالما إنت بتعتبرني أختك، الأخوات بيقفوا جنب بعض بدون مقابل، صح ولا إيه؟

هز رأسه بالإيجاب وقال:

\- صح عندك حق.

نهضت قائلة:

\- همشي أنا بقى وأشوفك بكرة.

\- تمام، مع السلامة.

لوحت له وقالت:

\- باي باي.

بادلها التلويح، وجلس على الفراش بعد أن أغلقت الباب وراءها، تمدد بجسده يطالع السقف بشرود، بينما هي في الخارج تسير بتخبط إثر حديثه الذي أوجع ضميرها.

__________

تجلس ناهد مع نهى المرتسم على وجهها علامات الإعياء، تمسح ناهد على شعر نهى وهي تقول بحنان:

\- أحسن دلوقتي يا حبيبتي؟

هزت رأسها وهي غير قادرة على فتح عينيها من شدة الإرهاق، عاونتها ناهد على الاستلقاء، ودثرتها بالغطاء جيدًا وذهبت إلى أمير الجالس بالخارج، جلست بجانبه وربتت على فخذه قائلة:

\- متقلقش يا حبيبي، إنها تستفرغ ده شيء طبيعي في فترة الحمل، هو أنا اللي هقولك ولا إيه يا دكتور؟

أغمض عينيه بقوة وهز رأسه بالنفي قائلًا:

\- لا أنا مش قصدي على كده، شكلها مطفي، وشها بقى باهت ومبقتش زي الأول، حتى تصرفاتها تحسيها على طول تايهة، بتحلم بكوابيس على طول....

لم ينتهِ من حديثه، ليسمعوا صوت صراخ مكتوم، لينهض أمير يركض ناحية غرفتها، ليجدها تنازع في نومها وكأنها تغرق، دنا منها يحاول أن يوقظها، لتأتي ناهد من خلفه وتفزع من منظر ابنتها، لتقترب منها:

\- اصحي يا نهى، اصحي يا حبيبتي.

ليذهب أمير ويجلب بعض الماء، ويرش قليلًا على وجهها، لكن لم تأتِ بنتيجة، ليبعد الغطاء عنها، وحملها وذهب بها إلى المرحاض وقال:

\- افتحي حنفية البانيو يا طنط.

ذهبت سريعًا تفتح الصنبور، ليأتيهم صوت نهى تقول:

\- لا متخنقنيش، لا... متموتنيش..... لا... لا.

ليضعها أمير أسفل المياه، لتشهق شهقة قوية، لحقتها فتح عينيها ومدت يدها تتشبث بأمير، قائلة بارتعاش:

\- أمير... أمير.

أغلق المياه وأبعد شعرها القصير عن وجهها وقال:

\- أنا جنبك يا حبيبتي.

وعند سماع صوته غمرها الأمان، اقتربت تعانقه، وهي تبكي قائلة:

\- كانت بتخنقني يا أمير، عايزة تخلص مني.

ربت على ظهرها قائلًا:

\- مين دي يا حبيبتي؟

\- واحدة معرفهاش، شكلها وحش أوي وليها شعر طويل مصبوغ خصل صفرا.

ضمها له أكثر قائلًا:

\- متقلقيش يا حبيبتي، إنتِ جنبي خلاص.

كانت تشاهدهم ناهد والدموع في عينيها، لتخرج سريعًا، تبكي على حال ابنتها، نهض أمير وحمل نهى معه وخرج من المرحاض الملحق بالغرفة، وقام بتغيير ملابسها المبللة، وأمسك الفرشاة يمشط شعرها، لتبتسم له نهى في انعكاس المرآة، لتضع يدها على بطنها، وتمد يدها الأخرى تأخذ يده تضعها على بطنها، ليبتسم لها واقترب منها يضع ذقنه على كتفها، فقالت له:

\- عارف اللي مهون عليا اللي أنا فيه ده إيه؟

أغمض عينيه وهز رأسه بمعنى ماذا، فقالت:

\- وجودك أنت وابننا اللي هيجي.

حاوطها بيديه الاثنين وقال:

\- حاسس لما يجي هيجي الخير كله.

\- وأنا كمان حاسة كده، هنربي سوا صح يا أمير؟

\- طبعًا يا روح أمير من جوا.

طبع قبلة رقيقة على وجنتها وأردف:

\- نكمل بقى شعرك عشان نشوف طنط ناهد أكيد قلقانة عليكي.

أومأت له بخفوت، وأكمل أمير تمشيط شعرها ثم صففه على هيئة ضفيرة، ونهض، ومد يده لها، لتتشابك الأيدي، واتجها إلى الخارج سويًا، وفور أن رأتها ناهد، اقتربت تعانقها، وقالت بقلق:

\- إنتِ كويسة يا حبيبتي؟

بادلتها نهى العناق وقالت:

\- أنا بخير يا ماما متقلقيش يا حبيبتي.

ابتعدت عنها ناهد تتفحصها قائلة:

\- قلبي اتقطع عليكي يا قلب أمك، دي عين وصيباكي.

ابتسمت نهى وهي تهز رأسها، وقالت:

\- أنا هموت من الجوع هروح أشوف حاجة أكلها.

ثم تركتهم وغادرت، لتوجه ناهد حديثها لأمير:

\- أنا هكلم جارتي تعرف شيخ كويس أوي هخليه يجي يختم القرآن في البيت ويبخر الشقة.

جلس أمير بإرهاق، قائلًا:

\- الصح اعمليه.

______________________

في صباح يوم جديد، وأثناء تحدث سوسن في الهاتف، خرجت نسمة من غرفتها تتثاءب بنعاس لتتحول نظراتها إلى التعجب وحاجبين معقودين من حديثها:

\- ألف سلامة عليك يا حسين، لو مش عارف تخلي بالك من أنس هاته وتعالى اقعد معانا اليوم، صوتك تعبان.

جلست بجانبها تحاول أن تسترق السمع، لكن لم تسمع إلا صوت والدتها:

\- خلاص، هستناك أنت وأنس، عقبال ما تيجي أكون عملتلك شوربة الخضار، تيجوا بالسلامة.

ثم أغلقت الهاتف ونظرت لنسمة وأردفت:

\- قومي اغسلي وشك وصلي كده بدل ما إنتِ بتتصنتي.

فركت عينيها وقالت:

\- هو اللي سمعته صح، إنتِ قولتي لحسين تعالى وأعملك شوربة خضار عشان أنت تعبان؟

نهضت تعدل من مفرش الطاولة، وهي تجيبها:

\- أيوه اتصل يسأل عليا زي كل يوم، فلقيت صوته تعبان أوي، تلاقيه اتعدى من أنس.

مطت شفتيها باستغراب قائلة:

\- حسين بيسأل عليكي كل يوم!!! ده يوم القيامة قرب.

نهضت تتجه إلى المرحاض، تحت نظرات سوسن التي تدل على نفاد الصبر، دلفت المرحاض وأغلقت الباب خلفها، استندت بيدها على المغسلة، تنظر إلى المرآة بشرود، فقلبها كاد أن ينتصر وعقلها اقترب من أن يقتنع من إلحاح القلب، تنهدت بعمق، وفتحت الصنبور تغسل وجهها.

______________

ارتدى حسام ملابسه التي كانت عبارة عن قميص زيتوني وبنطال قماشي أسود، أدخل القميص داخل البنطال والتقط الفرشاة يمشط شعره بعناية، ثم رش عطره، وخرج من الغرفة، ليجد والدته تجلس على الأريكة، نظرت له بطرف عينيها، فقال:

\- صباح الخير ياما.

التقطت الوسادة بجانبها وألقتها عليه وصاحت:

\- صباح الهم والغم، مفيش لقمة في البيت، بسببك.

التقط الوسادة وقال:

\- ما لسه جايبلك ١٠٠ امبارح، مش مكفيينك؟

وضعت يدها على خدها وقالت:

\- لا مش مكفيين، ودول يكفوا إيه دول؟

ألقى الوسادة على الأريكة وقال:

\- حاضر يا أمي، كده كده هخلص شغل في المصنع وهروح الوردية بتاعتي في المحل وهجيلك اللي إنتِ عايزاه.

نظرت له بازدراء دون أن تتحدث، ليرتدي حذاءه ويهم بالخروج، متجهًا إلى موقف الباصات لكي يذهب إلى العمل، كان يسير شاردًا في همومه فوالدته بدلًا من أن تكون عونه أصبحت تزيد عليه العبء، أفاق من شروده على صوت بوق إحدى الدراجات النارية التي كادت أن تصطدمه، نظر إلى الرجل الذي صاح به:

\- مش تخلي بالك، هتودينا في داهية!

أشار بيده وقال:

\- أنا آسف، آسف.

ثم اتجه إلى وجهته، وصل إلى الموقف وكان يعج بالناس، انتظر حتى صعد أحد الباصات وبعد معاناة، ولم ينفك تفكيره عن كيفية تدبير أموره، ليشعر بإصبع ينكزه برفق على كتفه، نظر بجانبه وكانت رحمة، ارتسمت الابتسامة على وجهه وقال:

\- رحمة.

هزت رأسها بالإيجاب وقال:

\- سرحان في إيه؟

ضحك وقال بخفة:

\- قولي مسرحتش في إيه.

ثم أردف:

\- رايحة الكلية؟

\- أيوه، عليا أربع محاضرات.

\- طب يلا شدي حيلك عشان هدية تخرجك هتبقى جوازنا.

أنهى جملته بغمزة من عينيه، أربكتها.

نظرت إلى الأرض بخجل وهي تبتسم، ليقول لها:

\- خلي بالك من نفسك يا ست المحامين كلهم.

لتقول بخفوت:

\- مش هتقولي كنت سرحان في إيه؟

\- أشوفك بليل وأحكيلك؟

\- موافقة.

\- خلاص وهيبقى معايا مفاجأة.

رفعت نظرها تطالعه بفضول:

\- إيه هي؟

\- متبقاش مفاجأة.

مطت شفتيها وقالت:

\- خلاص نشوف بليل.

تعليقات



<>