رواية ضره من عالم اخر الفصل العشرون20بقلم نوسه حمد
امام الجامع حسا بي وراي سر وانا م مجنونه وجا قال لي انا عاوز اتكلم معاك انا شايف حالتك انتي م مجنونه بس في حاجه خلتك تصلي للانتي فيهو دا وانا ما جاي احلل شخصيتك ولا بحب اطيل كلام ولا النظر في حاجه ما بتخصني بس انا جيت عشان اقول ليك انا عاوز اتزوجك واسترك من الشارع انتي زوله طيبه وحرام تستمري في الحال دا وما تخافي مني انا غرضي شريف لو وافقتي ماعندي مشكله ولو ما وافقتي الجامع مفتوح ليك طالما بتحسي فيهو بالامان والاحترام بينا انا زول احتمال اكون قدر ابوك بس ما حالفني الحظ وانجبت اطفال المشكله من زوجتي انا م حبيت اجرحها بس حسيت العمر ماشي ونفسي في ولد اسندني واسندها معاي ومستعد اتقبلك باي وضع حتي لو كنتي غلطانه قبل كده بسترك بس ع شرط غلطك القديم ما يتكرر وتتوبي وترجعي لي ربنا وانا لو وافقتي ما ح ازكر ماضيك بشي ولا ح اختو مقياس لتكمله حياتنا الجايه انا غرضي الاول استرك قبل كل شي وكنت صريح معاك بكل الفي قلبي حابي انك تكوني صريحه معاي لاول مره اتكلم قلت ليهو ابدا انا ما غلطت في حياتي ولا فرطتا في شرفي بس انا الحاصل لي اصعب مما تتصور وحكيت ليهو من لحظه اتزوجت سند لغايه ما ختيت اولادي في الجامع قال لي كل الحاصل ليك دا ابتلاء وانتي صبرتي عليهو بس غلطتي لمن جدعتي اولادك كان ممكن م تضعفي وتحصنيهم وان شاءالله ما بتجيهم حاجه قلت ليهو انا في لحظه خوفي علي اولادي فقدت العقل وتركيزي كلو الشفتو انا ما يشوفو اولادي قلت احتمال يلقو زول ارحم علي قال لي م مشكله نحنا نمش مكان ختيتيهم ونسال منهم وانا بتكفل بيهم وما تشيلي هم انا زول حافظ المصحف مافي جن بهزني ح احصنك واحصنهم بس حرام انهم يتربو مجهولين النسب وهم اولاد حلال فرحت بي كلامو وقلت ليهو انا موافقه ومن مكانا داك مشينا الجامع وانا بقيت اسال عن اولادي زي المجنونه بس لا حياه لمن تنادي مافي زول افادني واتحسرت علي اي شي قلت يا ريتني طلعت بيهم بس الندم مابفيد وحياتهم معاي وقفت جواي حزن السنين ما ح تمسحو قال لي م مشكله انا اوعدك اسال منهم واجيبهم ليك ورايك شنو في عرضي موافقه ع اني اتزوجك قلت ليهو موافقه ساقني بيتهم ودخلت سلم علي مرتو وبينهم احترام حلووو في لحظه خوفت زواجي منو يخرب علاقتهم بس انا ما مؤذيه وعاوزه اعيش حياتي في ستره حال عرفني عليها وقال ليها دي ح تكون اختك قبل تكون ضره رحبت بي وقالت ليهو الف مبروك ربنا اتم علي خير قال ليها نسيبه ما مقطوعه من شجره بس عندها ظروفها الخلتها تكون كده وانا ان شاءالله ح اخليك تجهزي معاها اي شي وتشتري ليها اي شي وماعايز منكن غير تكونن اخوات انا ح اعدل بينكن م ح احوجكن لي اي شي وربنا يقدرني هي ملتزمه شديد قالت ليهو ان شاء م ح اقصر منها وح اعتبرتها اختي قلت ليها وانا كمان طبعا هو شكلو غنيان بيتهم سمح شديد قال ليها خلتيها تقعد في الغرفه الجنب الصالون وانا ح اشتري ليها غرفه نوم قالت ليهو تمام وهي شكلها نظيفه ومرتبه فضلتني وادتني ملابس منها وقالت لي لو احتجتي لحاجه انا موجوده ما حسيت اتجاها انها ممكن تضرني مشيت استحميت وصليت وبقيت ادعي في ربنا يجمع لي بي اولادي ويسترني ويسهل امري وكنت ببكي جات لقتني ابكي قالت لي مالك سعد راجل طيب قلت ليها سعد منو ابتسمت وقالت لي انتي ما عارفه اسمو قلت ليها لا والله بس كل البعرفو عنو انو امام الجامع البنوم فيهو قالت لي ربنا يصلح حالك وسعد دا زوجي والح يكون زوجك وانا ماخايفه منك انتي شكلك بت طيبه وبت حلال وحمدتا الله انو عاوز اتزوجك انتي ما يجيب لي مره تفرقنا سعد طيب وحنين وحب حياتي من اطفال مانفسي اخسرو بس ربنا ما قسم لينا الجنا وما نفسي احرمو وكنت كل مره بقول ليهو اتزوج برفض بس الحمد لله انو اقتنع وما تخافي ح اكون ليك اخت وام وما ح تحسي اني ضرتك ولا ح تشوفي مني شين خليك مطمنه قلت ليها انا م كويسه قالت لي بسم الله فشنو قلت ليها عاوزه اولادي وكنت ببكي شديد قامت قعدت جنبي وقالت لي استغفري اولادك ما بتجيهم حاجه طالما مع ابوهم قلت ليها لا ابوهم متوفي وحكيت ليها بالحاصل قالت لي حرام عليك ديل نعمه ليه تجدعيهم قلت ليها الله عالم بالفي قلبي لحظه ختيتهم انا خايفه يتأذو زي ما انا اتاذيت وهم ما عندهم ذنب في كل الحاصل قالت لي ما تبكي ادعي ربنا وان شاء الله تلقيهم ويرجعو ليك وسعد ما ح يمانع انهم يعيشو معاك انا بعرفو قلبو حنين طبطبت علي وطمنتني وحسيتا انها بت ناس محترمه ومتربيه عشره مرات ما حسيتا غارت مني بالعكس اتمنت لي الخير وماقصرت في حقي وجابت لي اي شي وسعد جاب لي غرفه جميله وقال لي جهزي نفسك اهلي ح يجو يحضرو العقد وقال لي مرتو جهزيتي وماقصرت مني جابت لي البت رسمت لي واتفقت معاها تجي تلبسني وعزم اهلو وعملو مناسبه بسيطه واهلو فرحو شديد انو قرر يتزوج وعرفت من اهلو انو هو زول عندو الحق وكانو خايفين انو ما يلقا البيرث العز العندو كلهم ناس طيبين وانبسطو بي انا حاولت اكون مبسوطه ماقدرت عديت ايام ما قادره اتقبلو كزوج كنت ببكي اليوم كلو بس طبطب علي واستحملني وبقا يفتش لي اولادي وقال لي ان شاءالله بجيبهم ليك ماقصر مني وقررت اني اكتم الحزن جواي وابدا حياه جديده معاهو وما ح انسا اولادي بالدعوات بديت حياتي معاهو وكان عادل بيني وبين زوجتو وحسيت بي استقرار كان نفسي فيهو من زمان ومرتو بقت تريدني شديد وانا كمان لدرجه انو قال لينا بقيت اخاف منكن يوم تتفقن علي كانت بترد عليهو بي اجمل الكلمات كانت لي اكبر مدرسه في الحياه اتعلمت منها اي شي في صمت وربنا قسم لي وحملتا ومرتو منال فرحت اكتر مني وقالت لي نهاي ما بتتحركي وهو ما خلا كرامه ما عملها وفرحان بحملي شديد بس نهاي ما حسس مرتو اني احسن منها كنت بحسو بميل لي انو ما يحسسها بالنقص العندها
مريت بي ايام صعبه بس منال م قصرت مني وهو كنت بلقاهو قبل كل شي وماقصر مني عوضني عن اي شيء رغم فارق السن بس نهاي م اداني احساس انو هو كبير مرات بحسو اصغر مني لانو حنين شديد
مرت الايام واكتشفت اني حامل بتؤام والفرحه بقت فرحتين وتعبت شديد لدرجه برقد ايام في المستشفى بس نهاي ما حسيت بي الم بس حملي كان صعب شديد واكل ما باكل كنت بحس اني ح اموت بس الحمد لله مرت الشهور وربنا قسم لي اولاد اتنين محمد وماذن وسعد كان مبسوط شديد وقدم لي طقوم دهب وكل الجابو لي جاب لي زوجتو واهلو فرحو شديد وعمل لي سمايه كبيره وعزم كل الناس كل لحظه فرح كانت بتمر علي انا بكون حزينه من جواي علي اولادي وبدعي ليهم ربنا يحفظهم ونهاي ما نسيتهم ومرات بتزكر سند وببكي شديد بس برجع استغفر لانو زوجي م مقصر مني وخلاص كل الحصل لي بقا ماضي وحاولت اتعايش مع الوضع وزوجت سعد ماقصرت مني ساعدتني في تربيه اولادي وكانو مبسوطين بيهم شديد وسعد كان معيشني ملكه بس الحزن الجواي مسيطر علي وهسي لو اولادي كانو جنبي ما كان اكون زعلانه كده وقلت ليهو انا ماقادره استحمل اكتر من كده انا طالعه افتش اولادي قال لي لا م ح اخليك براك نمشي سوا ورايك شنو نمشي لي الناس القلتي كنتي قاعده معاهم قلت ليهو ياريت نفسي الاقيهم قال لي تمام شيلتا اولادي ومشينا بيت ناس محمد ولقيناهو مقفل سالت الجيران قالو لي ام محمد اتوفت وابتهال اتزوجت وسافرت ومحمد اتزوج وسافر ومالقيت ليهم رقم الامل الكنت منتكله عليهو انقطع والحمد لله سعد قال لي ولا يهمك انا والله في الجرايد ح اكتب البلقاهم عندو مبلغ مادي قلت ليهو ح تكون كسبت فيني اجر قال لي انتي زوجتي والبزعلك بزعلني وانا والله عاوز راحتك اولادك محتاجين ليك وكمان م ح اكون اناني واقول ليك انسي اولادك من حقك تخافي عليهم وانا والله اوعدك وعد اني ح افتش معاك لاخر العمر وزي ما هم اولادك هم اولادي وسالني من اهلي قال لي لو عاوزه تمشي ليهم وتوريهم اولادك انا بوديك قلت ليهو تمام قال لي جهزي نفسك بكره بنمشي من ناحيه كنت مبسوطه ومن ناحيه خايفه بس الزول ما بعيش مقطوع تاني يوم جهزنا نفسنا ومشينا طقيت الباب جاني ابوي ولسه في غرورو قال لي دا منو كمان الجايباهو لي دا قلت ليهو دا سعد زوجي وسعد يا حليلو عاوز يعرفو عليهو طوالي ابوي احرجو وقال ليهو بت تمرق مني وتعرس وراي دي ما بتي وانا متبرئ منها ومرتو جات وكانت بتعاين لي عين حسد لدرجه خوفتا منها وقلت لي سعد ارح طلعنا منهم قال لي ما تزعلي هم في النهايه ديل اهلك بس اختك ما بتشبهك قلت ليهو دي مرتو م اختي احتار قال لي معقوله حسيتو عاوز يقول كلام بس م قال حاجه طلبت منو يوديني لي علا ومشينا ليهم وقالو علا طلعت الآمارات واشتغلت هناك شيلت رقمها ومشينا قال لي انتي قاريه جامعه قلت ليهو انا مهندسه بقا مخلوع وقال لي ليه طيب ما ظاهر عليك حكيت ليهو بشغلي وحياتي زمان قال لي كلو لخير ولو بتحبي وظيفتك ما عندي مانع علي الاقل تطلعي من جو الحزن المتملكك دا قلت ليهو يعني ما ح تزعل قال لي نهاي وح اجيب ليك بت تمسك اولادي ومنال ما بتقصر بتمسك شغله البيت شكرتو شديد وقررت خلاص اقتنع واعيش حياتي قال لي ح اجيب ليك عربيه رفضتا قال لي لا ما علي كيفك ما ح اخليك تركبي المواصلات ومالو بتريحيني قلت ليهو ما بعرف اسوق قال لي ح اعلمك اي شي باذن الله
مرت الايام وبقيت افتش لشغل جاب لي احدث تلفون ولقيت شغل في شركه كبيره وعملت المعاينه وقبلوني ونزلت شغل معاهم ومنال قالت لي سعد ما تجيب اي بت انا اصلا متعوده علي الاولاد قلت ليها ما عاوزه اتقل عليك قالت لي ولا يهمك انا اختك وفعلا كانت احسن من اختي وماقصرت مني وانا كمان م قصرت منها واشتغلت والشغل كان كتير طلعني من اي جو بس نهاي م نسيت اولادي
في يوم من الايام كان عندي شغل ضاغط شديد المدير قال لي ح اشووف اي مهندس من الفرع التاني يجي يساعدك لانو شغل نهايه سنه وكنت منتظراهم يجيبو لي زول يساعدني لغايه ما يوم المدير جا داخل ومعاهو متاب لمن شافتني انخلعت وانا زاتي انخلعتا المدير قال لينا بتعرفو بعض قلت ليهو اشتغلنا قبل كده مع بعض بس متاب اتعاملت معاي كانها م بتعرفني وشكلها اتزوجت رفضت تشتغل معاي قالت للمدير مابقدر واجبرها انها تشتغل معاي وكان الشغل كتير شكلو زوجها بجي يسوقها من الشغل وكانت عاوزه تطلع قبليني ماعارفه ليه حسيت انو في حاجه غلط بس هي شنو ما عارفه خليتا لمن طلعت وطلعت وراها لقيت سند واقف ليها جنب العربيه وفي نفس اللحظه الواقف فيها سند جا فيها زوجي عشان يسوقني انا بقيت مخلوعه وتلفوني وقع من يدي …