رواية ماوراء النصيب الفصل الخامس والعشرون25بقلم دانيا
صلوا على النبي.....
اتلفت عاينت ليها وعاينت لياسين كانت واقفه جنبو بتبارك ليهو ماسكه يدو وبتضحك وانا بعاين ليها وماقادرة افهم بتقصد شنو البت دي فيها شيء مامريح.. جن امي وعمتي ليلى سلمن وباركن للعرسان وبعدهن معتز ونوادر.
نوادر:
الحفله بدت والفنان بغني والناس بترقص انا شفت اقرب كرسي قعدت فيهو وبقيت اعاين فيهم شويه واحس بي زول قعد في الكرسي الجنبي عاينت لقيتها دي البت البتبقى لياسين.. عاينت لي وابتسمت قالت لي شنو شكلك ما من ناس الرقص والجوطه دي !! قلت ليها يعني ممكن تقولي مالي بالرقص بس بحب اشاهد من بعيد اتلفت على الناس القاعدين يرقصو وقالت لي لكن راجلك رقاص ماشاء الله وبت عمو كمان بتعرف ترقص اتلفت عاينت ليهم وقلت ليها ااي هم ما عايشين هنا ومتعودين على جو الحفلات ما زي.
قالت لي دايرة اقول ليك شنو انا هسي؟ عاينت ليها وقلت ليها قولي سامعاك قالت لي ما تخادي فيها حاجه لكن كلامي ليكي دا كأخت يعني عاينت ليها بإستغراب واصلت في كلامها وقالت مريم دي اعملي حسابك منها... زاد إستغرابي وكشرت وشي وانا بعاين ليها قلت ليها مريم؟ قالت لي ااي في النهايه انتي العرستي دا ود عمها شوفيها بتعاين ليهو كيف؟ إبتسمت وقلت ليها إسمك منو انتي انا نسيت إسمك قالت لي ناديه ؛ قلت ليها انتي يابت جايه هنا لشنو عرس ود عمك صاح؟ قالت ايوه قلت ليها معناها استمتعي بالحفله وافرحي لود عمك وخلي الجري وراء الفتن ملامحها اتغيرت وإبتسامتها اختفت قالت لي يابت فتنة شنو؟ قاطعت كلامها وقلت ليها انتي ماتشوفيني كدا وجهي بشوش ومبتسمه دائما انا قاريه علم نفس والخبيث بعرفو من نظره عشان كدا اقعدي ساي وماتنسي الفتنه اكبر من القتل.
خليت خشمها ملح ملح وقبل اتم كلامي معاها جاء معتز وقف قدامي وقال ليها عن إذنك بس اقعد مع مرتي حبه...عاينت ليهو ورجعت عاينت ليها وإبتسمت وهي لسه بتعاين فيني م قدرت تقول اي شيء قامت من الكرسي وقالت لمعتز اتفضل ومشت طوالي وراء، ، معتز قعد جنبي وبقى يتونس معاي قال لي قومي نرقص سوى قلت ليهو لا ما بعرف قال لي ساهلة انا بعلمك .
بعد اسبوع من عرس تقى كنت قاعده مع ناس امي ليلى وعمتي فاطمه في البرندا بنعمل في الجبنه بعد الظهر كدا وبنتونس عن الشتاء قرب وأجواء الشتاء حلوه جاء معتز خاشي سلم علينا وقال لي نوادر قومي اجهزي طالعين امي ليلى قالت ليهو مارقين وين ياولدي؟ قال ليها ماشين مشوار مع العرسان ياامي عامنهم قعدة ظريفه على طرف البحر قالت ليهو كويس ياولدي اخير والله تغيرو جو.. قلت ليهو دقيقه بس وبجي مريم عاينت ليهو وقالت سوقوني معاكم عليكم الله والله من امبارح نفسي في سمك بس، ، كلنا بقينا نعاين ليها امها قالت ليها اجي يابتي خليهم يجيبو ليك معاهم او امشي انتي هنا طرف الظلط دا جيبي وتعالي تمشي معاهم تسوي شنو ؟ معتز قال ليها مامشكله ياعمتي لو حابه تمشي معانا طوالي... امي ليلى قالت زي ما كلام فطومه خليها تمشي مع تمني هنا المحل الجنب الظلط دا عندو سمك سمح والله تمني هسي بتجي من الجامعه.
مريم طوالي قامت قالت خلاص امشو خليتو ما دايرهو امشو ساي وطلعت من البرندا مشت غرفتها... معتز قال ليهم ياجماعه مالكم هسي مصعبين الموضوع احرجتو البت المسكينه حامل راعو ليها شويه ،، عمتي فاطمه قالت ليهو ما كلام احراج لكن هي تمشي معاكم لشنو زحمه ساي ياولدي امشو ماتشتغلو بيها انا بعدين وقت تمني تجي بسوقها بمش اجيبو ليها قال ليها لالا ياخ ماتصعبوها عليها كدا في الحاله دي مريم بتحتاج مننا لسياسه وحذر في التعامل المرت بيهو مريم ماهين ونفسياً بتكون مجروحه انتوا م تدققو على اي شيء هي بتعملوا خليكم لينين في التعامل معاها.
ركزت في كلام معتز كويس وشفت إنو كلامو منطقي الظروف المرت بيها مريم ما هينه " عنف زايد طلاق زايد إنتظار طفل بعد الإنفصال " حاجه ماساهله عليها قلت لمعتز مامشكله انت امشي اتكلم معاها واقنعها تمشي معانا وانا ح اخش اجهز قال لي كويس، ، دخلت اتجهزت لبست لي فستان وقعدت قدام المرايا اسرح شعري فجأة جاء كلام ناديه في راسي قلت لا لا يا نوادر البت دي دايرة تعمل فتنه ساي جهزت وطلعت لقيت معتز واقف جنب الباب قال لي ورح طلعنا مشينا المنتزه اتلاقينا مع ناس تقى هناك سلمنا عليهم تقى قالت ليها مريم؟ كويس إنك جيتي تغيري جو احسن من تقعدي في البيت الوقت كله.
دخلنا المنتزه قعدنا في الكراسي ومعتز وياسين مشو على البوفي تقى بقت تعاين لي وتعاين لمريم حسيتها في بالها في سؤال بس ما قادرة تسأل... شويه وناس معتز جو شايلين العصير والأكل قعدنا اتونسنا كتير وبعد خلصنا الغداء قالوا الألعاب ماالألعاب تقى قالت ليهم نفسي في السفينه الطايرة لكن مريم ما بتقدر تركبها قالت ليها مامشكله امشو انتوا انا بنتظركم هنا معتز قال ليهم تقى وياسين انتوا خدو راحتكم ماتتقيدو بينا نحن ح نتمشى شويه رأيكم شنو؟ قلت ليهو حلو مريم قالت ليهو وانتوا ما تتقيدو بي خدو راحتكم انا اتمليت ماقادرة اتحرك زاتو كان دايرين تتمشو اتمشو قال ليها متأكده؟ قالت ااي.
مشينا لفينا المنتزه لف ماخلينا مكان معتز قال لي بتعرفي انا ما داير استقر هنا والله عديل البلد دي غلبتني يعني هي حلوه واي شيء لكن انا حاليا ما جاهز استقر فيها لو ما الوضع الحالي المارين بيهو دا ومسؤولية عمتي وبتها كان سافرنا تاني المفروض نرجع السعودية ونجي لناس امي ديل في الإجازات لكن حاليا ما قادر حاسي نفسي مقيد شديد لكن هانت، ، قلت ليهو قصدك شنو؟ قال لي في زول طلب مريم مني للزواج وبعد تلد بكلمهم بالموضوع واشوف رأيهم لكن حالياً الموضوع دا سر ماتكلمي زول.