رواية عيلة الجيار الفصل الثاني2بقلم سلسبيل احمد
- انت مين !!!
ادهم قرب ناحيتها: ششش اي صوتك ده ؟؟ وطي صوتك بعدين انتي الى بتعملي اي هنا ؟
فضلت بصاله بستغراب و باصه لمنظره وهدومه المتبهدله بقع بني.. فا بصلها بغرور: ايه مش عرفاني!
- لا مش عرفاك!
بص لعينيها باستقامه وقال بهدوء:
ادهم يحببتي.. ادهم الجيار
"نهي كلامه بأبتسامه صفرا"
فريده كانت متنحه وفاقت: اه.. ابن عمي التاني...
ضحك بعدم وعي: ابن عمك؟ ومالو.. مع ان الموضوع فيه حاجه غلط.. بس افرحي شوية اني ابقي ابن عمك
بصتله بنرفزه: انت قصدك ايه بكلامك ده!
- قصدي واضح! تفتكري لو انتي مكاني وفجأة ظهر شخص غريب بيقول انا ابن عمك و من عيلتك و كمان ترجعي تلاقيه واخد راحته في بيتك
بصلها من فوق لتحت: بالمناسبة البيجامه حلوة
فريده بعدته بحده: احترم نفسك واتكلم كويس
ادهم: نصابة وبجحه كمان.؟؟
بصت على منظره بعصبيه: انت فاكر اننا هنألف !! انا مكنتش اعرف اي حاجه!! محدش فينا كان يعرف!!
رد بسخريه: اه تفتكري فيلم انك اتفاجئتي ده هيدخل علينا يعني!
رديت عليه بنفس نظره السخرية وضحكت: هو انت مش شايف شكلك عامل ازاي ولا اية !! انا ميشرفنيش اصلا ابقي قريبتك ولا في حاجه تربطني بيك فرق السما و الارض بيني.. وبينك!!!
" سابته ومشيت و ادهم اتعصب جدا ومش مصدق ان حصل و واحده كلمته بالطريقة دي لا وكمان لسه ميعرفش عنها حاجه..! "
"بص على هدومه وضيق عينه بمنتهي الغضب"
"قلع الجاكيت و رماه بعصبيه"
" أدهم مكنش عارف يسيطر علي اعصابه فا طلع وراها و وقف قصادها قبل ما تدخل الاوضة ومسك ايدها "
" لكن فريده مدتوش فرصه يتكلم وصْربته بالقلم و..
شالت ايده من عليها بقوة اما أدهم فا كان وصل لقمة غضبه وقبل ما يقرب منها بيجي زين بسرعه يلحقه لأنه شاف الموقف من بعيد"
ادهم بزعيق: ده انتي نهارك اسود !!! انتي مجنونه !! انا هوريكي ازاي تعملي كده والله ما هسيبك
زعقت: انت الى مجنون لو فاكر انك هتمد ايدك وهسكت
= والله ما هسيبها !!!
زين: بس !! بس يا ادهم اسكت !!
" الأنوار اتفتحت و الكل كان بيخرج من اوضته بخصْه على صوتهم "
وليد: ايه الى بيحصل هنا؟؟
عبدالعزيز خرج بأنزعاج: فيه اييييه؟
لاحظ وجود ادهم فا بصله: وايه منظرك ده ؟؟
فاطمه: ما ترد يا ادهم ايه مبهدلك كده !!! وفيه ايه!! صوتكم عالي ليه
زين وهو بيحاول يلم الموضوع: مفيش حاجه يا ماما سوء تفافم مش اكتر
سهير: انتي كويسة يا فريده!!
زين: هي بس اتخضت منه.. وافتكرته حد غريب ملحقتش تتعرف عليه فا لما شافته زعقوا مع بعض مش كده يا فريده؟
زين بصلها بمعني هدي الموضوع وهي اتنهدت بنفاذ صبر: اه.. مختش بالي انه كان موجود و اتفاجئت بيه قدام اوضتي فا اتحْضيت
" قالت جملتها بسخريه عشان تستفزه فا قبض ايده وهو بيبصلها بتوعد.. "
عبدالعزيز: طب يلا كل واحد على اوضته.. اتفضلوا
" كل واحد راح اوضته وزين شد ادهم معاه "
>>>>>>>>>>>>>>>>>>>>>>>>>>>>>>>>>
"اللهم صلِ وسلم وبارك على سيدنا محمد"
|| في غرفة أدهم ||
- ما تقعد بقا وتلم الحوار فيه ايه !!!
= واد انت !!! انا عفاريت الدنيا بتتنطط قدامي !!
- انت الى غلطان مالك بيها !! وبعدين ايه الى عامله في نفسك ده ؟؟ هو ده منظر ؟
= هو كل الى هيشوفني هيقولي ايه ده !!!
- ايوه كنت فين وبهدلت نفسك كده
= انت مالك يا زين ؟؟ مش واخد بالك يحبيبي اني انا ذات نفسي الكبير و مش بسألك الاسئلة دي ؟؟
- ياريت انت تاخد بالك يا أدهم!!! ان انت الكبير فا لازم تاخد بالك من تصرفاتك كنت في البار تاني صح؟
ادهم بص له ببرود: زين.. اطلع بره عايز انام
- انت هتفضل تتهرب ؟
= انا عندي زفت بكره الصبح عايز اتخمد اخرج !!
" زين خرج و سابه بعصبيه "
>>>>>>>>>>>>>>>>>>>>>>>>>>>>>>>>>
' سبحان الله وبحمده سبحان الله العظيم '
|| في غرفة فريده و سهير ||
- حببتي انتي مضايقه من حاجه
فريده بتجاهل: لا.. تصبحي على خير هنام
" سهير اتنهدت بقلة حيلة و ندم.. عارفه ان فريده مش هتقدر تعدي الموضوع بسهوله وهتفضل زعلانه لكن بالنسبالها حتي لو هتفضل زعلانه المهم تبقي في أمان "
|| تاني يوم الصبح | وقت الفطار ||
" معاد الفطار معروف فا كله كان نازل في المعاد عبدالعزيز بعت حد من الشغالين يعرف فريده و سهير عشان ينزلوا.. والكل اتجمع على السفرة "
وليد: كنت فين امبارح؟
أدهم: كنت بخلص حاجات تبع الشغل
وليد: اه.. شغل بس؟ يعني مخرجتش؟
ادهم: وخرجت شوفت صحابي معتقدش فيها حاجه..
عبدالعزيز: نتكلم بعد الأكل
"كملوا اكل وسط نظرات أدهم النارية ناحيه فريده.."
زين: انا خلصت أكل هاروح الكلية عشان متأخرش
عبدالعزيز: استني يا زين.. عاوزك تاخد فريده معاك عشان تشوف الجامعة
بص لفريده: انا عارف ان فاضلك سنتين دراسة تقدري تروحي تشوفي الجامعه الى زين بيدرس فيها ولو ارتحتي هنقدم ورقك هناك عشان تلحقي الترم وميضعش عليكي ايه رأيك
" فريده كانت متوتره.. مستغربة انهم بيتعاملوا كأنهم عايشين مع بعض من سنين.. وهي لسه حتي محدش فهمها اي حاجه..!! وحاسه ان ملهاش رأي لأنها متوتره تختار اي حاجه او تقرر "
- تمام انا.. هطلع اغير..
أدهم قام: و انا هسبقكم على الشركه يا جدو بعد اذنك
عبدالعزيز: استنوا كلكوا.. انا عزمت باقي العيلة بليل هنتعشي سوا.. عشان يتعرفوا بـ فريده غياب اي حد مرفوض اظن واضح..
" وكان الكلام موجه لأدهم "
وليد: اكيد يا حبيبي كلنا هنبقي موجودين
" اتنفست بصعوبة بسبب الضغط الى جوايا كمان هتعرف على باقي عيلتي فجأة كده ومعرفش هيتقبلوني ولا هيبقوا زي ادهم ده !! بس هعمل ايه؟؟ طلعت غيرت عشان اروح مع زين ونزلنا.. "
>>>>>>>>>>>>>>>>>>>>>>>>>>>>>>>>
|| في مجموعه الجيار للمؤتمرات ||
" بيوصل أدهم بغرور كا المعتاد مش بيسلم على حد ولا حتى بيبص.. بيكون بمثابة نجم ساطع في الشركة بسبب الصفقات الى بيعملها وتعتبر اكبر من سنه..
وبعدين بيدخل وليد مع عبد العزيز كل واحد بيروح مكتبة و يبدء يشتغل وبعد ساعه عبدالعزيز بيبعت يطلب أدهم لمكتبة ضروري... بقلمي سلسبيل احمد"
- ادهم باشا ياتري عملت ايه جديد
= مش فاهم
- البوص طلبك
= جدو؟
- اه عايزك حالا
= أخبارك زي وشك يا مصطفي طول عمرك
ضحك: مش كنت بتصيع امبارح اشرب يا نجم
- انت الى فتنت عليا ولا ايه؟
= فتنت على مين بس.. الواد حازم منزل الصور فى كل حتة يابني على الانستجرام
- الله يخربيتك يا حازم..
" أدهم سابه وخرج يروح عند عبدالعزيز "
*طق طق طق*
" خبط ودخل "
- خير يا زيزو ؟
= واد انت زيزو ايه؟ قولتلك قبل كده بلاش الكلام ده
ابتسم وقعد: عبدالعزيز بيه الجيار.. حضرتك محتاج مني حاجه؟
- اه.. كل بعقلي حلاوة كل .. اتفضل شوف الصور الى نازله لك والصفحات بتكتب ايه
= واحد فرحان وبيرقص ومعاه بنات حلوة..
بص له بحده: ادهم! سبق وقولتلك تصرفاتك دي تبطلها سامع ولا لاء؟؟ انت كده هتضر اسم العيلة خد الأمر على محمل الجد فاهمني؟؟
اتنهد: انت عارف اني بحبك يا زيزو و لو حد غيرك قالي الكلام ده هعمل عكسه.. بس حاضر هحاول انفذ كلام حضرتك مع اني مش بعمل حاجه غلط او تضر اسم العيلة في شيء..
- لا .. غلط و حرام كونك من عيلة كبيرة و معروف وعندك علاقات مهمه يبقى تقدر ده.. تقدر انك شخصية معروفة..
= حضرتك مكبر الموضوع انا بسهر وافك صحابي شوية وخلصت على كده
عبدالعزيز بحزم: لو وصلني انك شربت تاني.. او شوفتك وسط اوضاع مش كويسة.. انا هيكون ليا تصرف تاني معاك.. وانت عارف ان انا كمان بحبك
أدهم بهدوء: تمام..
" أدهم خرج ولما دخل مكتبة لقى وليد قاعد "
- وفر كلامك يا بابا جدو عمل اللازم
وقف وبص له: مش هتبطل قلة ادب شوية؟ انت قدوة لأخوك عايزة يتعلم ايه؟
= متخافش على سيادة الدكتور عمره ما هيبقى زيي..
مسح على وشه: ادهم! حبيبي بطل تشوف الأمور بالطريقة دي انت ابني.. ابني الكبير و اول فرحتي و المسؤول.. انا مش عايزك تمشي في طرق تخسرك كل حاجه انت شاب عندك كل حاجه في حياتك.. متستخدمش ده غلط.. حط نفسك مكان اي واحد في الشارع بيدور على شغل ومش لاقى فرصه!
" خلص كلامه و حط ايده على دماغه وحضنه وبعدين خرج و ادهم قعد لوحده بزهق لحد ما لقى عبدالعزيز بعت له ايميل على اللاب توب "
- فيه مؤتمر في شرم الشيخ عاوزك تنظمه وتشرف عليه وتخلي بالك اوي لأن هيحضره رؤساء وناس مهمه هنتكلم في التفاصيل وقت الاجتماع.. بس هبعتلك الورق شوفه دلوقتي
ادهم رد عليه بـ ok
>>>>>>>>>>>>>>>>>>>>>>>>>>>>>>
' لا إله إلا انت سبحانك اني كنت من الظالمين '
|| في الجامعه | كلية الطب ||
- ها ياستي اي رأيك بقا ؟
= تحفه بجد.. انت كده وصلت كليتك؟
- اه.. انا كلية طب فاضلي سنتين برضو زيك واتخرج.. انتي كنتي بتدرسي ايه بره؟
= بيزنس
- اممم حلو.. ادهم برضو متخرج من بيزنس و كان في الجامعه هنا
= متسدش نفسي من الكلية بقا!
بصلها بأدراك: انتوا اية الى حصل بينكم امبارح صح!! انا جيت وانتي بترزعيه قلم.!
- لأنه يستاهل
= أدهم ده عمر ما حد كح في وشه خدي بالك
- هو الى ضايقني قعد يقولي كلام اههـ.ـبل وفى الاخر طالع يكمل خناق معايا عند الأوضة و.. و عصبني ! انا حقيقي مش عصبيه كده.. انت لحد دلوقتي شوفت عصبيتي مرتين بس انا بجد مكنتش كده معرفش ايه الى بيحصل.. انا آسفة عموما.
= حصل خير متزعليش نفسك هو كده بينكش طول الوقت.. هتتعودي عليه .. يلا بعد الكلية نكمل كلام.. انا كلمت السواق مستنيكي بره
- اوكيه مع السلامه
" اتمشيت ولقيت بنتين ماشيين سوا واتفاجئت انهم بيتعرفوا عليا "
- هاي.. انتي معانا هنا؟
= لا..انا.. انا لسه هقدم
- شكلك مش سنه اولة اكيد بتحولي كنتي في جامعه؟
= انا أ..
البنت التانيه اتكلمت بعفوية: مش مهم مش مهم اسمك ايه يا حلوة
- فريده..
= انا ساره.. و هي جنى طالما انتي جديده بقا يبقي لو عوزتي اي حاجه كلمينا هاتي رقمك
" كتبت رقمي على موبايلها و رنت عليا فا سجلت ارقامهم "
- احنا كلية هندسة اخر سنه وانتي؟
= انا بيزنس رايحه سنه تالته
" وبعد ما اتكلمنا شوية مشيوا كانو لطاف اوي معايا وانا خرجت ركبت العربية الى هتوصلني الفيلا ولما دخلت لقيت تيته قاعده شكلها كان مستنيني.. "
- حمدالله على السلامه يا حببتي.. الجامعه كويسة؟
قعدت قدامها وبصتلها: في يوم وليلة خلاص هستقر هنا وسط اهلي و في بلدي زي ما كنت بتمني طول الوقت وفكراه مستحيل؟ سبحان الله..
= فريده..
- متقوليش حاجه يا تيته مش مهم مفيش اي حاجه هتقدر تخليني اعدي الى حصل ده.. الاحسن اننا منتكلمش.. لحد ما احاول استوعب ال بيحصل.
" اتفاجئت انها سكتت.. انا قولت مش عايزه اتكلم لكن انا محتاجه افهم.. هو طبيعيي اني اتصرف زيهم كأني مفيش حاجه حصلت؟ "
>>>>>>>>>>>>>>>>>>>>>>>>>>>>>>>>>>
استغفروا
" بيدج الفيس بوك بتاعتي سلسبيل احمد.. طلعت وكنت رايحه اوضتي اتفاجئت بـ اوضة بابها مفتوح ولفت نظري بوستر على الحيطه لفيلم بحبه بصيت يمين وشمال مكنش فيه حد فا دخلت الأوضة الوانها كانت ازرق غامق في اوف وايت وكانت حلوة اوي..! عيني راحت على كل التفاصيل لحد ما شوفت صور كتير على الحيطه واكشتفت انها اوضة أدهم.. صوره وهو بيغطس.. وهو راكب موتسكل.. و صور كتير عشوائية و مجـ.ـنونه.. ونص الصور مع بنات! أكيد يعني متوقع.. تعمقت اكتر ومسكت هدومه عجبني الجاكيت الى مسكته.. لاحظت انه لابسه في كذا صورة من بتوعه اكيد بيحبه.. "
- حلو الجاكيت مش كده ؟ عجبك ؟
"بصيت ورايا بسرعه لمصدر الصوت لاقيته ادهم! "
" فضلت مبلمه ومتوتره فا قرب ناحيتي "
- مش معقول نصابة وحراميه كمان؟
بصتله بدهشه: ايه! بتقول ايه انت يا مجنون!
ابتسم: انا الى مجنون؟ بتعملي ايه في اوضتي؟
= ءء.. أنا ء كنت بـ..
" أدهم كان عاجبه توترها فا قرب منها اكتر و بص لعينيها و فريده فضلت بصاله بصمت وللحظه ادركت مدي قربهم فا حطت الجاكيت في ايده وبعدته عنها "
- انا خارجه
" لكن قبل ما تخرج وقف قصادها ومسك ايدها وهو بيقفل الباب "
بصت له بجمود: اسقفلك يعني ولا ايه؟
= رايحه على فين! متخليكي
فريده بتحذير: سيب ايدي!! ولا عاوزاني اصْربك تاني!
ضحك بأستفزاز: عجبك اوي انك صْربتيني بالقلم ها؟ طب تعرفي بقا اني مش بسيب حقي خالص؟
" فضلت تشد ايدها فا راح مسك ايدها التانيه وبقي شبه مكتفها ومقربها منه "
- متفكريش تتحديني انا مش ند ليكي يا قموره! و حقي هعرف اخده.. بس بطريقتي
- سيبني بقولك بطل تحْلف و متقربش مني!!
= مقربش؟! هو انتي تطولي؟
"اتكلمت وهي بتزقه و بتصْربه في صدره بقوة فا مسك كف ايدها بتحكم "
بغضب: سبني ! اوعي عشان مناديش جدو !
= جدو؟؟ انتي بجد مصدقه نفسك؟ ولا فاكره اننا مصدقينكم اصلا! فجأة كده هيطلع لنا واحده من عيلة الجيار وتخش وسطنا بسهوله؟ ولا انتي شكلك مش عارفه! احنا بنعمل تحليل DNA لسه عشان نتأكد! و موقفك هيبقي وحش اوي لما النتيجه تطلع
انصحك تجري من دلوقتي
"فريده بصتله بصدمه وعيونها دمعت"
- يعني ايه؟ تحليل ايه! و ازاي! انت كداب
"ساب ايدها وبصلها بشفقه"
= لا مش كداب تحليل بالعينه.. الكوباية الى كنتي بتشربي منها.. و زمان النتيجه هتطلع انهارده و شوية وتبقي بره الفيلا
" مكنتش مصدقه هو قد اي شخص مهزق!! خرجت من الأوضة في هدوء وانا بمسح وشي ودموعي نازله ورا بعض و مكنتش عارفه اروح فين دورت على تيته و لاقيتها تحت لسه قاعده "
- فريده؟ مالك يحببتي
= احنا لازم نتكلم دلوقتي!
" طلعنا الاوضة وانا حاولت اتمالك اعصابي "
- اظن ان من حقي افهم !
= اكيد.. عايزه تعرفي ايه يا فريده
- حضرتك فهميني! ازاي بعد 22 سنة تظهر عيلتي في حياتي واظهر انا في حياتهم ليه فضلتي كل ده مخبيا عليا؟؟ ليه اصلا ماما خبت عليا! وليه مشينا!
= الموضوع مش كبير زي مانتي متخيله يا فريده! الى كبير الكدبه واننا خبينا عليكي.. لكن الموضوع كله بسيط .. هو بس كبر مع الوقت
- تمام!! قوليلي!
= كانت فيه مشاكل زمان في البيت هنا امك مقدرتش تتحملها لانهم كانوا عايشين كلهم في البيت و خافت عليكي بعد موت والدك فا لما عرفت انها حامل اختفت وخلفت بعيد عنهم! وعشنا هنا في مصر ست سنين وبعدين سافرنا وكملنا باقي حياتنا بره عشان كان اوردي لينا مكان لأن جدك حسين كان بيشتغل بره ومكناش اول مره نسافر فا المره دي سافرنا بيكي واستقرينا هناك اريح
- لحظه بس انا مش فاهمه حاجه!! مشاكل مين! ومين خلاه ماما تفكر تمشي بيا وتبعد للدرجه دي
= جدتك الله يرحمها كانت دايما في مشاكل بينها وبينها ليلي.. و هي محبتش ده يستمر لما تتولدي كانت عاوزاكي تعيشي حياة هاديه.. وكانت فاكره انوه ده احسن ليكي
- وبعد كل السنين دي يا تيته جاية دلوقتي تعرفيهم؟ وتعرفيني؟؟ بعد كل ده !!! اشمعنا ؟
ردت بعياط: عشان احنا ملناش حد! وانا شوفت انتي قد اي كنتي وحيده بعد ليلي بنتي الله يرحمها فقدتي والدك قبل ما يشوفك! وكمان فقدتي امك كنت مقرره اربيكي لوحدي وفاكره ان ده احسن لكن اكتشفت ان الأحسن تبقي في مصر.. و وسط عيلتك انا لو جرالي حاجه هتعملي ايه لوحدك!!
بصتلها وانا كمان بعيط وحضنتها: تيته متقوليش كده!!
- عشان خاطري يا فريده اوعي تزعلي مني او من ليلي الله يرحمها و صدقيني انا مكنتش عارفه اتصرف وخايفة من كل حاجه.. خايفه جدك ميتقبلش الموضوع لما اكلمه وحاجات كتير!! بس ميبقاش عندك ذرة شك واحده اني عملت كده غير عشان مصلحتك
" بصتلها وانا بفتكر التحليل الى بيعملوه.. و اضايقت و لاقيت اني لازم اتكلم مع جدو.. لكن الأول طمنت تيته اني مش زعلانه واتفاهمنا.. هي ضحت كتير عشاني!! وخلت بالها عليا بدأت احاول اتقبل الموضوع لكني كنت محتاجه اتكلم مع جدو ضروري..! بقلمي سلسبيل احمد "
>>>>>>>>>>>>>>>>>>>>>>>>>>>>>>>>
" خرجت بره و لقيت زين قدامي "
- ايه الاخبار رايحه فين؟
= عايزه أشوف... عايزه اشوف جدو..
- اوديكي له هو لسه في الشركه
= اه وديني ممكن!؟
- أكيد تعالي
" ركبنا العربية و كنا ساكتين اغلب السكه لحد ما قطع الصمت "
- ادهم عمل حاجه تاني؟
= عرفت منين.؟
- اخويا وعارفه
- انتم ازاي اخوات مش قادره افهم
ضحك: انا سمعت الجملة دي كتير اوي
- انا بتكلم جد! ده لا يطاق وفظيع اسفه يعني
ابتسم وبصلي: ولا يهمك فاهمك بس الى محدش يعرفه انه من جواه طيب و حد تاني غير الى ظاهر يعني
= طبعا ما هو اخوك بقا لازم تبطله
- ايه؟
= تبطله
- انتي قصدك اطبله ؟
= ايوه ايوه.. جايه من طبله
- فريده انتي اتعلمتي عربي ازاي اصلا!
= ماما الله يرحمها وتيته.. وكنا قاعدين هنا ست سنين قبل ما نسافر
- ايوه بس ازاي لسانك متعوجش
ابتسمت: مكنتش عاوزاه يتعوج كنت بكلم مصريين كتير اوي وكان فيه مصريين جيرانا بره.. كنا بنقول امثال وحاجات من دي عشان منحسش اننا متغربين.. بس برضو يعني العيشه في مصر غير
- مصر احلي؟
= اكيد يا زين
- انا عن نفسي كنت عايز اسافر موت.. وادرس طب بره واكمل حياتي بره بس جدك رفض و بابا وماما طبعا فا قعدت بقا
= صدقني هنا أحسن..
- يلا الحمدلله.. احنا وصلنا أهو
>>>>>>>>>>>>>>>>>>>>>>>>>>>>>>>
|| في قسم الرؤساء ||
" من اول لما دخلنا الشركه وانا مبهوره بتفاصيلها.."
وليد: زين؟
بصلي: ازيك يا فريده
= الحمد الله يا اونكل.
بص لزين: بتعملوا اي هنا؟
زين برسميه: ممنوع الكلام في أمور عائلية دلوقتي
- هي فين الأمور العائلية دي
= مش بتقولي رايح فين بصفتك بابا.. وهنا في الشركه مفيش بابا والجو ده
- لا تمام بصفتي بقا رئيس مجلس إدارة الشركه فا اطلع بره بدل ما اناديلك الأمن يحدفك بره
"ضحكت على طريقتهم سوا وحبيت علاقتهم اوي"
= خلاص خلاص جايين نمسي على جدو بس
- ماشي يخويا
" خبط ودخلنا مكتب جدو الى اتفاجئ بوجودنا كان معاه حد وطلب منه يخرج وقعدنا "
عبدالعزيز: استاذ زين بنفسه في الشركه؟ ايه رجعت في كلامك وجاي عايز وظيفه
زين ضحك: ياجدو بقا قولنا انا دكتور ابعدوني عن شغلكم ده
عبدالعزيز: انت تطول يا ولد؟
زين: ما علينا.. فريده طلبت تشوف حضرتك فا جبتها هخرج بقا امسي على الواد مصطفي
عبدالعزيز ابتسم لها بود: انا عارف اني مقصر معاكي يا فريده بس عشان كده عملت تجمع انهارده
- هو مش ده الموضوع.. حضرتك
" معرفش ليه مقلتش له جدو! "
بصلي بأستفهام فا اتشجعت: هو حضرتك فاكر اننا بنضحك عليكم؟
- مش فاهم يا حببتي ؟ تقصدي ايه
= انا عارفه ان حق حضرتك تتأكد بس.. يعني..
عبدالعزيز ساب المكتب وقام قعد قصادها: مبدئيا قوليلي يا جدو بلاش حضرتك دي انتي حفيدتي الوحيده حتي وكملي كلامك وفهميني متقلقيش من حاجه بس فهميني لأني مش فاهم فيه ايه مضايقك
- موضوع التحليل
= تحليل ايه يا حببتي؟
- التحليل الى حضرتك بتعمله عشان تتأكد اني بنت جلال.. بابا انا عارفه انه ده من حقكم تتأكدوا لو انا فعلا بنته بس مش بالطريقه دي كان ممكن تعرفوني
عقد حواجبه واتمني لو الى بيفكر فيه غلط: انتي جبتي الكلام ده منين يا فريده؟
= أدهم قالي..
"بلع ريقة وهو بيحاول يهدي و ميتنرفزش"
- ادهم قالك اننا بنعمل تحليل عشان نتأكد؟
= اه
- الكلام ده أكيد محصلش يا حببتي ادهم بينكشك مش اكتر دي شخصيته وانا عارفه و أكيد موضوع الشد الى حصل بينكم امبارح عصبه فا دي طريقته في الرد مش أكتر! وانا ليا كلام معاه..لكن تحليل ايه وكلام فاضي! انا عمري ما هشكك في جدتك بعدين جلال الله يرحمه هنعمل تحليل ازاي من غير عينته هو؟؟
= مش العينه بتتاخد من الجــ.ـثة..
- مش محتاج اعمل كل اللفه دي لأني متأكد انا مش عبيـ.ـط.. جدك عنده 68 يعني رايح للسبعينات بعدين بقا غير كل ده.. انتي فيكي شبه من جلال
بصتله وانا عيوني بتلمع وضحكت: بجد يا جدو!!
ابتسم بحنان: اه يا حبيبه جدك..
" اتكلمنا شوية و بعد فترة الباب خبط وزين دخل "
- ايه اجيب لمون؟
عبدالعزيز: يلا برا يا ولد
= انت هتخليها معاك ولا ايه
- اه عاوزاها معايا روح انت
= اية ده بجد
- الله هنهزر؟ هجيبها معايا وانا جي بليل
" وفعلا زين روح وانا فضلت مع جدو فضل يحكيلي حاجات كتير كان عاوز نقرب من بعض طلع بيحبني اوي! وجالي فضول اسأل عن الشغل وفضل يفهمني بحماس.. لحد ما بقينا بليل وكنت تعبت شوية وهو خلص شغل فا خرجنا انا وجدو و عمي وليد "
>>>>>>>>>>>>>>>>>>>>>>>>>>>>>>>>>
" وصلنا ولما دخلت الفيلا شوفت كذا عربية في البارك عرفت ان اغلب العيلة وصلوا و لما دخلنا لقيت اتنين بس الى جداد عليا قعدنا وجدو بدء يعرفني بيهم وهو فخور بيا.. وكنت شايفه أدهم مش على بعضه..! "
- طبعا فريده اتعرفت علينا في البيت فاضل عمتك هبة و ابن عمتك يوسف
" سلمت عليهم ومحستش عمتي مبسوطه معرفش او يمكن شخصيتها كده "
عبد العزيز: و مفروض كانت تيجي عمه تانيه ليكي بس هي معرفتش هي قاعده في دبي مع جوزها وعيالها لكن ان شاءالله تنزل قريب وتتعرفي عليها وبس كده.. دي كل العيلة من الدرجه الاولى.
"ابتسمت ناحيه عمتو وابنها الى كنت حساه قدي"
= مبسوطه اني اتعرفت عليكوا..
"تيته سهير كانت جمبي وبطمني و كمان زين"
هبة: وانتوا كنتوا فين طول السنين دي؟
وليد: احممم المهم انهم رجعوا بالسلامه
يوسف: هتقعدوا هنا علطول!؟
عبدالعزيز: اه طبعا.. انتوا كلكوا عارفين الفيلا هنا مفتوحه لأي فرد من عيلة الجيار
" أدهم كان عمال يفرك لحد ما وصلته رسايل والباب خبط راح فتح و رجع لهم تاني "
وقف وسطهم: و هي بقا مش من عيلة الجيار زي ما كنت متخيل بالظبط
الكل بصله و عبدالعزيز رد بأنزعاج: ادهم !!؟
- امسك يا جدو شوف التحاليل!!!
زعق: تحاليل ايه و زفت ايه !!
أدهم بدهشه: مش عاوز تشوفهم!!! تمام..
راح ناحيه زين وحط الورق في ايده بأندفاع: اتفضل بص وقوله يا حضرة الدكتور !!!! ما تبص !! شوف تحليل الـDNA طالع مش مطابق دي مش بنت عمنا
" الكل بدء يتبادل نظرات الاستفهام والذهول لبعضه و الجو بقي كله توتر و فريده بصت لسهير بعدم فهم ! "
زين مسك الورق قراه ورفع عينه بتعجب: يعني ايه ده.؟ التحليل مش مُطابق؟؟
فريده بصتله بصدمه..!!