رواية ماوراء النصيب الفصل الواحد والثلاثون31والاخيربقلم دانيا

           

رواية ماوراء النصيب الفصل الواحد والثلاثون31والاخيربقلم دانيا


صلوا على النبي....
وقفت العربية قدام الباب ، الباب دق مشت تمني فتحتو استغربت لمن شافت العساكر ومعاهم معتز دخلتهم على الصالون وجات كلمت امي ليلى مشت عليهم قعدت معاهم قريب ربع ساعه قالوا ليها معتز ولدك بريئ من جريمة القتل لكن في نفس الوقت القاتل منكم وفيكم بقت تعاين ليهم بإستغراب وقالت ليهم ياولادي كيف القاتل مننا دا كلام شنو قاطع كلامها الضابط قال ليها للأسف ياخالتي دي الحقيقة القتل مريم "سفيان ود اخوكي " امي ليلى مااتقبلت كلامهم وبقت تجوط وتكورك فيهم ود اخوي مابعمل كدا. 

ومن الوقت داك خالهم ساق باقي اولادو واسرتو ورحل من جنبنا ... مرينا بفترة كلها وجع وحسرة امي وابوي جو وقفوا معانا في اوقاتنا الصعبه واهتمو بمتابعات معتز مع شيوخ الرقيه والدكاترة النفسيين ، تقى وراجلها نزلوا السودان مع بتهم الصغيره واستقروا مع اهل راجلها مره واحده. 

سنتين مضت ولسه الحصل كأنو امباح بسبب حالة معتز النفسيه... امي وابوي دائماً بقولوا لي سافرو تعالوا السعودية اطلعوا من البلد ديك فترة عشان ترتاحوا وتهدو شويه قلت ليهم مااظن امي ليلى ترضى تسافر وانا ما بقدر افتح معاها موضوع زي دا .

مسكت ايودي لماما ليلى وقلت ليها ح اطلع اشوف معتز عشان ما يطلع برا الشارع خايفاهو يمش قبلو قالت لي كويس يا بتي ،، طلعت برا في الحوش مالقيتو مشيت على الصالون دخلت لقيتو قاعد في السرير ومدنقر راسو وشابك يدينو في راسو دخلت وقفت قدامو وقلت ليهو معتز !! رفع راسو ببطء وبقى يعاين لي عيونو كانت محمرة كأنو كان ببكي قال لي "هم كانوا امانة عمي يا نوادر " عاينت ليهو بإستغراب رجع غطى وشو بأيديه وبقى يبكي قلت ليهو معتز انت رجعت رجعت كويس؟ الصدمه فكت؟ قعدت جنبو حضنتو وبقيت ابكي اكتر منو... امي ليلى وقت سمعت صوت البكاء جات مخلوعه قالت لي بسم الله يابتي في شنو؟ قلت ليها معتز معتز بقى كويس يا امي. 

بعد فتره بعنا كل شيء الورانا والقدامنا وسافرنا السعودية والحمد لله مع مرور الوقت جروحنا بدات تبرى ،، رغم إنو المرينا بيهو ماكان هين ولحد الآن معتز لمن يتزكر مريم بقول لو كنت تميت عرسي معاها ما كان حصل كدا وبس كل الحصل كان نصيبها في الحياة والكاتبو ليها الله والبركة في روان الزكرى الحلوة الخلدتها وراها ودي اكتر حاجه بتهون علينا همومنا خاصة إنو روان طفله مهضومه ومحبوبه عند الكل وشاكرة في مدرستها والمفضله عند معتز وهي كمان متعلقه بيهو شديد وبتحب اخوها إياد كمان .

إلى اللقاء....

                     تمت


تعليقات



<>