رواية جدو حبيبي مغلبني الفصل الثالث3بقلم حياة محمد الجدوي
إمام : أقصد هتعيشى هنا بس أنا اللى بحط القواعد والقوانين وإنتى وأولادك هتمشوا على النظام بتاعى قلتى إيه
ساره: هقول ايه ماشي يا عمو
إمام : تعالى إنتى وأولادك عشان تشوفوا أوضتكم
دخل بها اوضه صغيره فيها سرير ودولاب
إمام : إنتى وبنتك هتناموا هنا والتوأم هينام في الأوضه التانيه
مازن باعتراض: إيه القرف ده الأوضه صغيره جدا دى أوضه الشغاله اكبر منها
إمام: والله لو مش عاجبك ابقى روح بات فى أوضة الشغاله فيه حد عنده اعتراض
ساره: لا يا عمى الأوضه حلوه ماتاخدش على كلامه ده لسه عيل
إمام: طيب غيرى هدومك وارتاحى وأنا هحضر الغداء (. سابهم وخرج)
مروان: عجبك القرف ده
ساره: اسمعونى كويس إحنا دلوقتي في ازمه وعايزين نعديها سوا فإحمدوا ربنا أن جدكم رضي إننا نعيش معاه من أصله وياريت نحترم نفسنا واحنا بنتكلم معاه ماشي
الأولاد الثلاثة: أف
ساره: من غير أفأفه واعتراض يالا الكل بغير هدومه ويخرج عشان نتغدى سوا
الساعه الخامسه فجرا
إمام : اصبحنا واصبح الملك لله قومى يا ساره صلى الفجر .........ياساره اصحى وصحي الأولاد عشان يصلوا الفجر .....اصحوا وأنا هجيب الفطار بعد ما ارجع من الجامع
الساعه السادسه دخل إمام البيت وهو شايل الفطار
إمام : يا ساره يا أولاد إيه ده دول لسه نايمين لحد دلوقتي
بعد الظهر صحيت ساره وقالت بكسل: صباح الخير يا عمو
إمام: الظهر أذن من بدرى وإنتى بتقولى صباح الخير
ساره: معلش كنت تعبانه شويه فين الفطار؟
إمام : الفطار برد على السفره سخنيه وصحى اولادك عشان يفطروا معاكى
بعد الفطار الكل قعد وكل واحد مسك موبايل بإيده وانشغل
إمام : يا أولاد العصر هيأذن وإنتوا لسه ما صلتوش الظهر
مازن: هتبقى نصلى ( وإنشغلوا في اللعب)
إمام: أنا خارج وهرجع بعد المغرب
مروان فى سره: أحسن ده راجل خنيق
إمام: يا اولاد ياريت ترتبوا المكان عشان متبهدل من العابكوا دى أنا مش بحب اعيش في مكان متبهدل
وبعد أيام صحيت ساره كعادتها بعد الظهر وصحت أولادها
ساره بكسل: صباح الخير يا عمو فين الفطار
إمام: مفيش قطار إلا لما يترتب البيت ده
ساره: ياعم أنا
إمام بغضب: إنتى إيه من ساعة ما جيتى إنتى وأولادك وإنتوا بتبهدلوا وأنا برتب البيت والمطبخ وبعمل كل الشغل وكنت بقول معلش دى تعبانه بكره تمشي على نظامى بس مفيش أى نظام
ساره : ياعمو إنت عارف إن أولادى صغيرين
إمام : مفيش حاجه اسمها صغيرين فيه حاجه اسمها نظام والكل هيمشى عليه من اللحظه دي والبيت ده لازم ينضف ويرتب حالا
ساره: ماشي بس نفطر
إمام : مفيش فطار إلا بعد الشغل ومن دلوقتي الأولاد مسؤولين عن ترتيب اوضتهم وإللى يبهدل حاجه مسؤول يرتبها وشغل المطبخ هيتقسم علينا كلنا فاهمين
الأولاد بإعتراض : لأ ماينفعش
ساره : ياعمو الأولاد طول عمرهم متدلعين مايعرفوش يعملوا حاجه
إمام: يبقى يتعلموا من دلوقتي وفيه حاجه كمان أنا الفطار هيكون بعد ما ارجع من صلاة الفجر يعنى على الساعه ٦ الصبح وإللى هيفوت الصلاه مالوش أكل يالا ابدأوا رتبوا البيت
مروان: شفتى عمك بيعمل معانا إيه
مرام ببكاء: ماليش دعوه أنا جعانه وعايزه أكل
مروان ومازن: وإحنا كمان جعانين
ساره: يا عمى الأولاد جعانه ممكن ياكلوا الأول وبعدين نبقى نرتب البيت
إمام: لو جعانين يبدأوا في الشغل عشان ياكلوا بسرعه يالا أنا هقعد بره نص ساعة وهاجى ألاقى البيت نضيف ومترتب يالا
مرام : اتصرفى يا ماما هاتى لنا أكل
مروان: أيوه هو مش هيذلنا على الأكل أطلبى لنا دليفرى بيتزا أو كريب
ساره بقلة حيلة: أنا مش معايا فلوس فغصب عننا لازم نسمع كلامه
فى يوم كمان كان مازن بيغسل الاطباق فدخل عليه جدو إمام وبدأ يشخط بعصبية
إمام: غسيلك وحش والاطباق مش نضيفه عيد غسيلهم من تانى ( وسابه وخرج)
رمى مازن علبة الصابون فى الأرض بضيق فدخل عليه اخوه مروان
مروان: مالك زعلان كده ليه
مازن: إنت مش شايف جدك بيعمل فيا إيه مفيش حاجه بعملها وتعجبه
ضحك مروان : عشان خايب مش عارف تضحك عليه زيى
مازن: ليه إنت بتعمل ايه
مروان : ولا حاجه كل ما يقولى رتب حاجه اقوله مش عارف علمنى إزاى يا جدوا يقعد جدو يرتب لى ولما يخلص خالص يقولى شفت اتعلم وأنا بقى مش بتعلم وبورطوا هو يرتب لى
مازن: يابختك ده أنا هعمل زيك المره الجايه
دخل مروان الأوضه فوجد جده
إمام: كام مره اقولك رتب الأوضه يا مروان
مروان : أنا مش عارف ياجدو ورينى وأنا هتعلم منك
إمام : يا مروان كام مره اقولك وإنت مش بتتعلم الأوضه بتترتب كده ونكنس ونطبق الهدوم كده
( وبعد ما رتب الجد الأوضه كلها )
إمام : فهمت
مروان : فهمت يا جدو المره الجايه هرتب الأوضه حلو زيك
قام إمام وسحب الملابس المرتبه ورماها في الأرض وافسد ترتيب الأوضه
مروان: ليه كده يا جدو
إمام: عشان تعيد ترتيبها تانى وأعرف إنك فهمت يالا نص ساعة وألاقى الاوضه دى بتلمع
( وخرج وسابه فنفخ مروان فى ضيق)
دخل عليه مازن
مازن: هاهاها واضح إنك بتعرف تضحك على جدو هاهاها
فى الصاله
إمام: مرام إنتى يا بنت يا مرام مش قلت لك مائه مره تجمعى العابك دى
مرام : أنا لسه بلعب يا جدو
إمام : خلاص مفيش لعب لمى الألعاب دى من هنا بدل ما ارميها في الزباله إتعلمى الترتيب والنظام إنتى مش صغيره يالا
خافت مرام منه وجمعت ألعابها بسرعه
الأولاد بضيق : يرضيكى يا ماما إللى بيعملوا جدو ده
ساره : معلش يا حبايبي جدوا كبير ولازم نتحمله
إمام من وراهم: يالا كله يخش ينام عشان هصحيكوا تصلوا الفجر معايا وإللى مش هيصحى هرشه بالميه
قام كل الأولاد بضيق ودخلوا أوضتهم
ساره: يا عمو مش كده حضرتك بتعامل الأولاد بقسوه
إمام: ماهو دلعك ده إللى بيشجعهم على الغلط لازم تبقى حازمه عشان يخافوا منك ويسمعوا كلامك
ساره: ياعمو تقدر تخليهم يعملوا كل اللى إنت عايزه بس بالراحه مش كده
إمام: قلت لك ده بيتى والكل لازم يمشي على نظامى ويالا إنتى كمان نامى بدرى عشان تعرفى تصحى الفجر
وفى اليوم التالى دخل الجد البيت وجد التلفزيون شغال والأولاد كل واحد ماسك موبايل بيلعب عليه
إمام بغضب: مادمتوا مشغولين والموبايلات سايبين ده شغال على الفاضي ليه ولا من كتر الكهرباء قوموا اقفلوا الزفت ده
جت ساره بسرعه على صوته
ساره: مالك يا عمو متعصب ليه ؟
إمام: إنتى دريانه بحاجة ولا حاسه بحاجه سايبه أولادك ليل ونهار ماسكين الموبايلات مش المفروض إحنا فى دراسه يعنى يذكروا ويشوفوا مستقبلهم بدل اللعب والكلام الفاضي ده
ساره: ياعمو إنت عارف إنى بحول لهم في مدرسه حكوميه هنا وهما مش معاهم كتب ومش عارفين هيذاكروا إيه
إمام: اقعدى برري لهم الغلط بدل ما تشدى الموبايلات من إيديهم وتقولوا لهم يعملوا حاجه مفيده
ساره : ياعمو أنا بوضح لك بس
إمام: بلا عمو بلا قرف وأنا قدهم كنت بشتغل وبذاكر وبساعد أبويا في الأرض وكنت بطلع الأول على المدرسه عشان كده طلعت راجل مش زيهم هيدنهم كده زي ماهما مش هيكبروا أبدا ( وسابهم وخرج)
مازن: سامعه يا ماما بيقول ايه؟
ساره : معلش يا حبايبي جدوا كبير في السن واحنا لازم نستحملوا
مروان: كل شويه تقولى جدكم كبير ولازم نستحملوا أنا زهقت من هنا لاعارف ألعب ولا عارف انام براحتى
مرام ببكاء: أنا عايز اروح بيتنا أنا مش بحب هنا
مروان : وأنا كمان مش بحب هنا ومش بحب جدو
سالت الدموع من عيون ساره
ساره : ومين قال لكم إنى كمان مرتاحه أنا زيكم مش حاسه بأى راحه بس بستحمل عشان مفيش عندى حل تانى اعمل ايه بس لو إنتوا مش مرتاحين أنا كمان مش مرتاحه إنتوا بتحسيوا أن سهل عليا ابقى في السن ده وماليش مكان يبقى بتاعى ولا سهل عليا انى بعد ما كان عندى ڤيلا إنى أجى اسكن عند عمى أو استنى إنه يصرف عليا وعلى أولادى
والله العظيم صعب أوى أنا محتاسه وتايهه والدنيا بتخبطنى ومش لاقيه حد يقف جنبى حتى عمى الوحيد اللى كنت بحسبه سند ليا بقى اول واحد يزل فيا ويتحكم فيا وأنا واقفه عاجزه لا معايا فلوس ولا بعرف اشتغل حاجه عشان اصرف عليكم اعمل ايه بس والله العظيم مش عارفه ( وانفجرت في البكاء)
بعيد عنها شويه كان واقف امام بيسمع كلامها وهو متأثر وحزين بعد عنهم شويه وبعدين نادى
إمام : العشاء جاهز يالا عشان تأكلوا
ساره: ماليش نفس كل إنت ياعمو بالهنا والشفا
إمام: يا اولاد تعالوا كلوا
الأولاد الثلاثة: مش عايزين
قعد إمام على السفرة من غير ما يمد إيده على الأكل هو كمان لأنه اكتشف إنه اتعود على وجود الأولاد وهما بياكلوا معاه
يتبع