رواية عوالم بنت الباشا الفصل الثالث3بقلم صباح عبدالله فتحي
في القصر رجع مراد من بره وهو متضايق جدًا من الكلام اللي قالته ريم.. في نفس الوقت كانت عوالم قاعدة على الأرض لسه ما خلصتش مسح البلاط. ومن غير قصد مراد اتكعبل في جردل الميه الوسخة وكان هيقع بس لحق نفسه. عوالم بصت بصدمة للميه الوسخة اللي نيلة الدنيا حواليها.
عوالم
ينهار أبوك مش فايت.. مين اللي هيمسح ده كله تاني؟
مراد بص لها بصدمة وهو بيشاور على نفسه
مراد
أفندم؟ إنتي بتكلمني أنا؟
عوالم بصت له بغيظ
عوالم
لا بكلم خيالك يا خويا.. مين اللي هينضف اللي إنت هببته على عينك ده دلوقتي؟
مراد بغضب
بت إنتي اتجننتي؟ إزاي تتكلمي معايا بالشكل ده؟
عوالم
هو ماله الشكل اللي مش عاجبكم ده؟ المهم إنتوا في البيت ده تطلعوا الواحد عن شعوره وتقول الشكل ومش عارفة إيه.
حسنات طلعت بسرعة على صوت عوالم العالي.. وجريت عليها وهي بتقول بخوف
حسنات
يا خربيتك وخربيت الساعة اللي جبتك فيها.. اسكتي ربنا ياخدك.
بصت لمراد بخوف وهي بتفرك في إيديها بقلق
حسنات
حقك عليا أنا يا مراد بيه والله دي بت غلبانة بس زي ما تقول كده لسانها متبري منها شوية.. حقك عليا أنا يا بيه.
مراد بص لعوالم بزهق وعوالم بصت له بغيظ
مراد
طيب هي مين دي وبتعمل إيه هنا؟
حسنات بتوتر
دي.. دي خادمتك عوالم يا بيه.. بت غلبانة من بنات البلد جبتها معايا تسترزق وتاكل عيش وبالمرة تساعدني في الشغل شوية وزي ما حضرتك شايف العمر سرقنا والصحة بقت على القد.
مراد بزهق
والله شكلك إنتي اللي غلبانة يا حسنات.. على العموم سماح المرة دي وعلميها تقصر لسانها أحسن ما تخسر أكل عيشها.
عوالم بغيظ
نعم يا خويا؟ لساني مش عاجبك وهد الحيل اللي فيه من صباحة ربنا دي؟ وإنت هوب ماشي زي الحمار الأعمى وسوحت جردل الميه الوسخة في البت واقف تحقق كأنك ما عملتش حاجة.
حسنات بلعت ريقها بخوف وبصت لمراد اللي قال ببرود
مراد
وإنتي ليه تشتغلي بإيدك؟ أمال الأدوات اللي بالكهرباء جوه. دي بتعمل إيه؟
عوالم
وإنت عاوز أمسح الميه بالكهرباء علشان تنشف قلبي وتخلص عليا وأنا واقفة؟
مراد بص لها بزهق وخد بعضه ومشي من قدامها من غير ما يرد عليها.. عوالم بصت له بغيظ
عوالم
بقى أنا اللي شكلي مش عاجبكم يا أشكال تجيب المرض وتسد النفس.
فجأة حطت إيديها على بطنها وهي بتقول بجوع
عوالم
بمناسبة سد النفس أنا كلاب بطني بتاكل في نفسها جوه من كتر الجوع…
بصت لحسنات اللي كانت بتبص لها بغيظ وهي قربت تطق منها.. عوالم بلعت ريقها بخوف وقعدت مكانها تكمل مسح وتنظيف الفوضى اللي مراد سببها.. وهي بتمتم بحنق
عوالم
منه لله الحمار اللي دخل.. كنت خلاص قربت أخلص وأدخل أكمل اليوم نوم.. اللي شكله مش باين فيه لا نوم ولا حتى أكلي.
ـــــــــــــــــــــــــــــــــــــــ
في غرفة منى كانت قاعدة رحمة مع منى
رحمة بخبث
قولت لسليم نفس الكلام ده يا ماما مش راضي يسمع مني وأنا خايفة عليه وعلى مصلحته خصوصًا إحنا كلنا عارفين إن جده بيحب مراد وبيثق فيه خايفة لا مراد يستغل تعب جدي وياخد الوصية لنفسه
كانت منى قاعدة سرحانة وهي بتسمع كلام رحمة وبعدين قالت بشر
منى
مستحيل ده يحصل طول ما انا عايشة وعجبتني دماغك دي وسيبي سليم ليا أنا هعرف أقنعه بس في رأيك هنجيبها منين دي وإيه اللي يضمن لينا إنها تتنازل وما تطمعش في النهاية؟
رحمة ابتسمت بخبث
رحمة
من الناحية دي ما تقلقيش إنتي بس حاولي تقنعي سليم علشان زي ما إنتي عارفة مافيش تفاهم بينا وأنا هتصرف في الباقي سيبي موضوعها عليا.
منى بصت لها وسكتت شوية وبعدين قالت
منى
شكلك مش مطمني بس مافيش حل تاني غير إني أثق فيكي طالما الهدف واحد
رحمة ضحكت ضحكة صفرا
رحمة
حطي في بطنك بطيخة صيفي ده أنا تلميذتك أصلًا
منى ابتسمت وبعدين قالت بقلق
منى
طيب يا فالحة لو عملنا اللي بتقولي عليه ده وقدرنا نقنع جدك هنقنع الزفت اللي اسمه مراد ده إزاي؟
رحمة بصت لها وفكرت شوية وبعدين قالت بشرود
رحمة
ده اللي ما فكرتش فيه بس طالما إحنا مع بعض أكيد هنلاقي له حل ولا إيه يا حماتي؟
بصوا لبعض بابتسامة صفرا وكل واحدة معجبة بنفسها أكتر من التانية
ــــــــــــــــــــــــــــــــــــ
في جناح عصران.. كان عصران نايم على السرير ماسك صورة بنت صغيرة عندها عشر سنين شكلها عوالم جدًا.. رفع إيده يمسح دموعه
عصران
ما تخافيش يا حبيبة جدك لو الدنيا كلها وقفت في وشي وقالت إنك ميتة أنا هقول إنك لسه حية واثق إنك هترجعي هترجعي لحضني وهترجعي لبيتك وأهلك جدو بيحبك أوي يا فيروز زمانك دلوقتي بقيتي عروسة زي القمر ما شاء الله
سكت شوية وبعدين قال بحزن
عصران
بس يا ترى إنتي عايشة إزاي دلوقتي يا فيروز يا ترى بتلاقي كل اللي نفسك فيه ولا محرومة؟ و سيبتي حقك من السعادة لغيرك يتهنى بيها
ـــــــــــــــــــــــــــــــــــــــــــــ
في نفس الوقت في المطبخ.. دخلت عوالم بعد ما خلصت شغلها وهي مسكة جردل الميه والمساحة بإيد وبالإيد التانية حاطة إيدها على ضهرها
عوالم بوجع
الله يسامحك يا خالة حسنات هم دول يا ختي ساعتين الزمن بتوعك أمال اليوم عندك شكله إيه؟
حسنات بصت لها بغيظ وهي واقفة على البوتجاز بتحضر الغداء لأهل البيت
حسنات
إنتي هتبدأي ليا دلع من أول يوم؟ لو خلصتي مسح اطلعي على جناح رحمة هانم رتبيه وبعدين روحي جناح الأستاذ مراد رتبيه وحسك عينك تطولي لسانك اللي عاوز الحش ده على حد تاني إنتي فاهمة وحمدي ربنا إن مراد بيه عدهالك المرة دي
بس عوالم ما كانتش سامعة حاجة وسرحانة مع الحمام اللي حسنات بتحمره في السمنة البلدي. حسنات خدت باله.
حسنات بحنق
نزلي عينك اللي عاوزة حصود ملح دي لا الناس يجري لها حاجة مش ناقصين
عوالم
عيني شبعانة يا ختي مفكرني محرومة ولا إيه؟ ده إحنا أمي كانت بتجيبه لينا في السنة مرتين
حسنات بسخرية
الله وكبر في السنة مرتين وشبعانة أمال لو جعانة بقى هتاكلي كل عشر سنين
عوالم
هعمل نفسي مش سمعاكي يا خالة حسنات ومش هرد علشان بس انتي أكبر مني.. المهم أنا ما فطرتش وتهدي حيلي وأنا على لحم بطني مش كنتي تقولي إن الناس بخيلة ومش هيأكلوني كنت جبت بَلَص المش معايا
حسنات ضحكت بسخرية أكبر
حسنات
ما إنتي شبعانة وما تعرفيش غير بَلَص المش اللي فوق السطوح.. روحي يا قلبي افتحي التلاجة شوفي لك أي حاجة كلي على ما البهوات يتغدوا واللي يفيض منهم هناكل منه
عوالم بصت لها بغيظ وراحت فتحت التلاجة بس التلاجة نوع حديث بالتطش حاولت تفتحها بس ما عرفتش
عوالم بغيظ
هي المحروقة دي مش راضية تفتح ليه يا خالة حسونة.. ولا التلاجة كمان مستكترة علينا اللقمة اللي هناكلها..