رواية حق الرفض الفصل الثالث3بقلم اية طه
البارت 3
في اخر الليل ملك كانت واقفة في المطبخ بتشرب مية لما دخلت دينا بهدوء.
ملك بصت لها: هو إنتي كنتي موافقة على سامح من الأول؟
دينا قفلت الازازه: ليه بتسألي؟ ولسه فاكره تسالي بعد السنين دي كلها؟
ملك: مفيش فضول.ومجتش فرصة اسال ونتكلم عن الموضوع او سامح مكنش بيسمحلك تتكلمي اصلا
دينا: كذابة. دا مش فضول انتي عايزه تعرفي وتثبتي حاجه جواكي...
ملك ضحكت: واضح إنك عرفتيني.وكشفتيني طب جاوبي
دينا: امال عشر سنين كفاية.بردو اني افهمك واعرف كل واحد فى البيت دا.... المهم لا مكنتش موافقة.
ملك مصدومة: امال اتجوزتيه ليه؟ وعيشتي معاه كل السنين دي...
دينا بباس: وافقت واتجوزته عشان كنت فاكرة إني هتعود.
ملك: واتعودتي؟
دينا ضحكت بس ضحكتها كانت قصيرة: أهو إحنا عايشين.
ملك: دي مش إجابة سؤالي.... طب إنتي بتحبيه؟
دينا بصت لها: إنتي بتسألي أسئلة صعبة ليه؟ مالك النهارده فايقه عليا...
ملك: اسالتي مش صعبه بس مفيش محدش بيرد عليا بإجابات واضحة. علشان كدا بتحسوها صعبه..
دينا: وأنتي بقى فاكرة إن الإجابة الواضحة دايما مريحة؟ وهتهدي بالك؟ طب اسمعي.أنا يوم ما اتقدمت لي سامح كنت بحب واحد تاني.
ملك اتفاجئت: بجد؟مين؟
دينا: مش مهم.اللي حصل أهلي رفضوه. علشان كان أقل من سامح في الفلوس. وسامح كان شغله ثابت واهله معروفين
ملك: يعني اتجوزتيه عشان كان اختيار آمن.وندمتي؟
دينا فكرت شويه: مش كل الندم بيبقى إنك تتمنى إنك ما عملتش الحاجة.ساعات الندم إنك تتمنى لو كنت عملتها بطريقة مختلفة أنا مش بقول لك سامح وحش.ولا بقول لك إني مظلومة.بقول لك إني في أول سنة جواز كنت كل ما أختلف معاه أقول لنفسي: معلش كل البيوت كده.بعد خمس سنين بقيت أقول لنفسي: يمكن أنا اللي حساسة زيادة.بعد عشر سنين بقيت مش بسأل نفسي أصلا.
ملك بصت لها بحزن: طب ليه؟
دينا ابتسمت: عشان تعبت من الإجابات. والمبررات اللرىمش بتحل ولا تقدم ولا بتاخر بالعكس ممكن تخليني ازعل واشيل واكتر وليه كل دا ما انا في غنى عنه واخلي وقتي وطاقتي ونفسيتي للبيت وبنتي افضل...
ملك قالت: طب ليه لما بابا كان بيضغط عليا النهارده، إنتي كنتي بتقوليلي أدي الراجل فرصة؟
دينا نزلت عينيها: عشان خايفة عليكي..
ملك: خايفه عليا ولا عشان خايفة ابقي زيك؟
دينا رفعت عينيها بسرعة: بس إنتي مش زيي.يا ملك انتى واقفتي وقولتي لا....
ملك: مش زيك ازاى إنتي بنفسك قولتي إنك مكنتيش عايزة تتجوزي سامح.وعايزه حد تانى واتجوزيه علشان اهلك والناس بردو وعلشان هو فرصه...
دينا: وأنا مش بقول لك اتجوزيه علشان هو فرصه واهلك والناس بقول لك ما تعمليش اللي أنا عملته.واتجوزي فعلا اللى مقتنعه بيه وعايزاه وفي بينكم قبول وتفاهم....
ملك بصت لها باستغراب: بس إنتي من شوية كنتي بتقولي العكس.
دينا: صح بس عشان كان قدامهم.وقدام سامح.
ملك: طب ليه؟ قولي رايك بصراحه...
دينا ابتسمت ابتسامة حزينة: عشان في بيوت كتير الست بتتعلم تقول كلام مش مقتنعة بيه عشان البيت يفضل واقف.
ملك سألتها: هو سامح بيحبك؟
دينا ردت بعد لحظة: هو بيحبني بطريقته.وانا خلاص اتعودت عليها...
ملك: وإنتي بتحبيه؟ او حبتيه بعد العشرة زى ما بتقولو....
دينا: أنا متعلقة بيه.
ملك: بس دي مش نفس الحاجة. ليه مكملة؟
دينا بصت ناحية باب المطبخ وكأنها بتتأكد إن محدش بيسمع: عشان عندي بنت. خايفه عليها
ملك فهمت.من إنها تشوف أمها مطلقة.
ملك اتصدمت: يعني إنتي فكرتي في الطلاق؟ وسامح يعرف؟
دينا سكتت.وبعدين قالت: أكتر من مرة.لأ ميعرفش علشان كل مرة كنت بوصل للباب أفتكر كلام الناس.
ملك قربت منها: طب لو مفيش ناس؟
دينا بصت لها.وطولت في السكوت.وبعدين قالت: يمكن كنت مشيت. ومن بدري بس دلوقتي مش عارفه علشان بقيت جزء من البيت اللي كنت خايفة أخرج منه. وكمان هحس ان كل تضحياتي وتنازلاتى طول العشر سنين دول راحو على الفاضي؟ عشان كده لما أبوكي قال لك الجملة بتاعته...اعملي اللي إنتي عايزاه واتحملي النتيجة.صدقيها. واختاري يا ملك.
ملك: طب وإنتي اخترتي إيه؟
دينا ابتسمت بحزن: أنا اخترت السلام.بس اكتشفت متأخر إن السلام اللي بيتبني على سكوتك طول الوقت... مش دايما سلام.
ومشت ناحية اوضتها بس قبل ما تدخل وقفت وبصت لملك: ومتقوليش لسامح إني قلت لك حاجة.ومتقوليش لبابا.ومتقوليش لنفسك إني ضعيفة.
ملك ردت فورا: انا عمري ما هقول كده.
دخلت أوضتها.وملك فضلت وحدها في المطبخ.لأول مرة، متشوفش دينا باعتبارها الست اللى بتنصحها بالقبول.شافتها باعتبارها ست اختارت مرة و دفعت تمن اختيارها و قضت عشر سنين وهي بتحاول إقناع نفسها انها مدفعتش حاجه...
تاني يوم ملك كانت قاعدة في الشغل بتحاول تركز قدام الكمبيوتر لكن موبايلها ماكانش بيسكت.
رسالة من خالتها.
رسالة من بنت عمتها.
ومكالمة فائتة من رقم مش متسجل.
فتحت رسالة خالتها: يا ملك أبوكي حكالي اللي حصل. فكري كويس مش كل يوم هيجيلك عريس بالمواصفات دي.
قفلت الرسالة.
بعدها رسالة تانية: يا بنتي إحنا مش ضدك بس متخليش العند يضيع منك فرصة.
قفلتها بردو
زميلتها في الشغل سارة لاحظت انها سرحانه
ساره: مالك؟ من إمبارح وإنتي مش طبيعية.أبوكي ضغط عليكي تاني؟
ملك بصت لها: إنتي عرفتي منين؟ شكل الناس كلها بقت بتعرف كل حاجة.بجد ولا ايه
سارة ضحكت: امال دي مصر يا حبيبتي. وعلى راي بهاء سلطان يا مصر بتعمليها ازاى....
ملك ابتسمت: المشكلة إن كل واحد شايف نفسه له حق يقرر في حياتي.وكل ما ارد بسمع كلام أكتر.
سارة قربت كرسيها: أنتي عارفة إن في ناس نفسها تقول لأ ومش قادرة متستهونيش باللي عندك.
ملك: أنا مش مستهونة. انا خايفة. أكون غلط.
سارة هزت رأسها: عادي كلنا ممكن نكون غلط.المهم نتعلم من غلطنا وندافع على حقنا... ومنخافش..
ملك: انتى مش فاهمه أنا لو غلطت الغلط هيعيش معايا.طول حياتي هفضل ادفع تمنه من عمري....
ساره: ولو وافقتي غصب عنك بردو هيعيش معاكي طول العمر وهتدفعي تمنه يبقى على الأقل اختاري الغلط اللي إنتي مقتنعة بيه.
قبل ما ملك ترد تليفونها رن.أبوها.
ملك: ألو؟
جمال: إنتي لسه في الشغل؟
ملك: ايوا قربت اخلص هو في حاجه؟
جمال: لا كنت عايزك تخلصي بدري النهارده.علشان عمتك جاية.
ملك: ايه عمتو؟ وهي عايزة إيه؟ انت اللى قولتلها تيجي؟
جمال: يلا من غير كتر اسئله خلصي وتعالى وهتعرفي لما تيجي.
وقفل.ساره بصت لملك: في إيه؟ وشك بيقول إن في مصيبة.
ملك: غالبا كدا ربنا يستر ويعدي اليوم على خير.....
ملك رجعت البيت لقت عمتها قاعدة في الصالون وجانبها بنتها ريهام.أول ما دخلت عمتها قامت وحضنتها.
ملك ابتسمت: أهلا يا عمتي. شرفتي ونورتي...
عواطف: إيه يا بنتي؟ عاملة إيه؟ البيت منور باصحابه... وشك باين عليه التعب.
ملك: ربنا يخليكي يا عمتي... لا دا بس ارهاق من الشغل.
عواطف: شغل بردو ولا العريس؟
ملك ضحكت: اهو لسه هنبدأ؟ كنت عارفه والله العظيم...
عواطف قعدت: يا حبيبتي اأنا مش جاية أضغط عليكي انا جايه اتكلم معاكى كلام ام لبنتها.... مش انا بردو مكان امك الله يرحمها وانتى زي ريهام بنتى تمام....
ملك بصت لأبوها.كان ساكت: طبعا حضرتك على عيني وراسي بس انا خلصت وقفلت الموضوع مع بابا واصلا العريس نفسه جاه لحد هنا وقال انه رافض الجواز كمان يبقى ايه لازمته دا كله وفروها طيب للعريس الجاي معرفش الصراحه انتو بتجيبو الطاقه دى كلها منين...
عواطف قالت: يا حبيبتي انا جايه علشان افهمك ان الحياة فرص ومش دايما بتمشي زى ما احنا عايزين يعني ساعات الواحد بيتنازل عن حاجة عشان يكسب حاجة أكبر.وبعدين كنتى مستنيه ايه من الشاب لما ترفضيه مرتين مره بينك وبينه ومره تانيه قدام البيت كله طبيعي هيقول الكلمتين دول بس ملحوقه احنا ممكن نبعت اخوكي سامح يقعد معاه كدا قاعده شباب كدا ويعرفوا انك خايفه ومتوتره ويصلح الموضوع.....
ملك: طب خلينا فى الجزء الاول من كلام حضرتك اتنازل علشان اكسب حاجات اكبر زي إيه؟
عواطف: ماشي همشي معاكى خطوة بخطوة... زي مثلا الاستقرار.يا ملك....
ملك: يعنى هو الجواز استقرار بالنسبه لك؟
عواطف: لو الراجل كويس، آه.وشغله ثابت آه واهله كويسين ومحترمين ونعرفهم آه..
ملك: حتى لو أنا مش عايزاه؟ ومش حاسه بينا في قبول؟
عواطف: عادي بعد الجواز تحبيه.بالعشره والاولاد كلنا كنا كدا منعرفش ازواجنا غير بعد الجواز وبالمعامله والعشره واهو البيوت كانت عمرانه ولا عمرنا سمعنا عن الطلاق زي الايام دي....
ريهام بنت عمتها كانت ساكتة من أول ما ملك دخلت.
ملك بصت لها: وإنتي رأيك إيه؟موافقه على كلام عمتو دا؟
ريهام اتوترت.: أنا؟ مش عارفة.
عواطف قالت بسرعة: انتى مالك ومال ريهام هي لسه صغيرة.متعرفش المواضيع دي... مادخلهاش في الكلام بينا...
ملك ضحكت: الله يا عمتو صغيرة؟ الصغيره دي عندها 24 سنة. وانا عندي 27 سنه وكلكم حكمتم عليا اني كبيره وعنست وفرصي قلت ومش هلاقي اللى اتجوزه...
عواطف سكتت.ملك بصت لها: شايفة التناقض؟ علشان انا مش بنتك عادي تجرحي وتتحكمي فيا في حين انك مستحملتيش كلمه صغيره بسيطه على ريهام يبقى بلاش والنبي ياعمتو فكره انك جايه تنصحيني زي ماما الله يرحمها وخلي الكلام بينا واضح وصريح...
عواطف: ه دا يا ملك إنتي بتتكلمي بعصبية.كدا ازاى وايه الكلام اللى بتقوليه دا...
جمال بعصبيه: مللللللك...
ملك: نعم يا بابا أنا مش غلطانة. وحضرتك شفت الكلام.... هي مستحملتش تسمع كلمه على بنتها ليه انت سايب الكل يجرح فيا هو انا مش بنتك كمان... الله يرحمك يا امي..
عواطف قالت: يا بنتي ماتخديش المواضيع بالحساسيه الزياده دي إحنا خايفين عليكي... إحنا بنشوف حاجات إنتي مش شايفاها.انتي مش هتفضلي صغيرة طول العمر.والجواز مش عيب.
ملك: كل مرة حد يقول لي خايف عليكي ألاقيه عايزني أعمل حاجة مش عايزاها. أنا عارفة وفاهمه كل اللى حضرتك بتقوليه دا وأنا ما قولتش على الجواز انه عيب.انا بس مش مقتنعة.
ريهام قالت فجأة: هو لازم البنت تبقى مقتنعة مية في المية؟
الكل بص لها.ملك قالت: أيوه.لان ببساطه انتى بتختاري العيشه اللى هتعيشيها يمكن اكتر ما عيشتى فى بيت اهلك يبقى لازم تكوني مقتنعه وواثقه انك تسيبي بيت اهلك علشانها ياما تفضلي فى بيت اهلك افضل معززه مكرمه...
عواطف قالت لريهام: إنتي مالك؟ اسكتي. ومتدخليش سامعه؟
ملك تدخلت: ليه ياعمتي خليها تتكلم بكرا تبقى مكاني وفى وضعي خليها تفهم اللى انتو كلكم خايفين تفهمونا وتقولولنا عليه علشان طبعا خايفين من الناس وانه عيب والسمعه والاهم كلام الناس علينا هيكون ايه....
ريهام بصت لملك: بس يا ملك أنا شايفة إن البنت ساعات بتوافق عشان خايفة تفضل لوحدها.والعمر يجري بيها وتلاقي نفسها من غير ونس...
ملك: وبعد الجواز بتكتشف إنها لسه لوحدها.والونس اللى بتتكلمى عنه دا ممكن يكون هو شر الجليس ليها وتفضل جول عمرها ندمانه وتفضل تدعي وتقول ياريتنى كنت لوحدي بجد....
عواطف اتعصبت: ريهام! إنتي عايزة تفتحي علينا باب مش هنخلص منه.... رأيك ده هيخليكي تفضلي من غير جواز.
ريهام سكتت.ملك بصت لها.ولأول مرة لاحظت إن ريهام مش مجرد بنت عمتها الهادية.كان عندها كلام كتير.بس محدش بيسمح لها تقوله.
ملك قالت: طب سؤال يا عمتي.لو ريهام قالت لك بكرة إنها مش عايزة تتجوز الشخص اللي اخترتيه ليها هتعملي إيه؟
عواطف ردت بسرعة: هحاول أفهمها.
ملك: طب ولو مصممة؟
عواطف: هسيبها وهي حره بقى تشيل شليتها مليش دعوة...
ملك ابتسمت: بجد؟ طب ليه مش بتسيبيني؟ وانا مستعده اشيل شيلتى كمان....
الصمت نزل على المكان.أبوها بص في الأرض.عمتها ماعرفتش ترد.ريهام ابتسمت ابتسامة صغيرة.
ريهام قالت: عشان ملك كبيرة.ولما الست تكبر الناس بتعتبر إن لازم يكون عندها سبب قوي لكل حاجة.انما أنا لسه مسموح لي أكون غبية.
ملك ضحكت.حتى أبوها ابتسم غصب عنه.
لكن عمتها ما ضحكتش.
عواطف قالت: إنتوا الاتنين فاكرين الحياة سهلة.
ملك ردت: لا. إحنا عارفين إنها صعبة عشان كده مش عايزين نختار حياة أصعب بإيدينا.
بعد ما عواطف وريهام مشيوا ملك دخلت المطبخ.لقيت دينا هناك.
ملك: سمعتي؟ ريهام دي أول مرة أسمعها تتكلم كده.
دينا ابتسمت: يمكن عشان أول مرة حد سألها هي عايزة إيه.
ملك: دينا؟ هو لو إنتي رجع بيكي الزمن كنتي هتختاري نفس الاختيار؟
دينا بصت لها: لا.عشان أنا اخترت أول مرة
ملك اتفاجئت من صراحتها: بكل سهولة كده؟ طب ليه مكملة؟ ومين قال إنك لازم تكملي نفس الاختيار للأبد؟
دينا بصت لها: إنتي بتقولي كلام يخوف...... عشان ساعات الحقيقة لما تدخل دماغ الواحد صعب يخرجها تاني.
ملك قربت منها: يمكن مش لازم تخرجيها.
وفجأة صوت سامح جه من الصالة دينا اتشد جسمها تلقائي
ملك: مالك؟ إنتي اتخضيتي.كدا ليه؟
دينا بتوتر: عادي. بتحصل..
قطع كلامها سامح وهو بينادى تاني
دينا بصت لملك: متدخليش.عشان مش كل خناقة لازم يبقى فيها حد ينقذ حد.فاهمه؟
ومشيت ناحية الصالة.ملك فضلت مكانها.
بس فهمت حاجة جديدة:دينا مش بس ست اختارت غلط.دينا ست قضت وقت طويل وهي تقنع نفسها إن السكوت اختيار...لحد ما بقت مش عارفة فعلا:هل هي ساكتة لأنها اختارت السكوت؟ولا لأنها نسيت أصلا شكل صوتها؟