رواية الفستان الابيض الفصل الرابع4بقلم يارا علاء الدين
بصلي وقال الجملة اللي كسرت آخر حتة جوايا:
"خايف تفتكري."
سكت، حتى النفس وقف جوايا.
قولتله بصوت مخنوق:
"أفتكر إيه يا كريم؟"
بص بعيد عني، وكأنه مش قادر يبص في وشي وهو بيقول:
"اللي حصل لسليم."
اتجمدت مكاني وقولتله بصوت مهزوز:
"إيه اللي حصل لسليم؟ سليم كويس...
قالي بصوت مهزوز:
سليم مات ياندى..
مات من سنة في الحادثة بتاعت العربية.
قولتله:
سليم مات.. إزاي ؟ سليم فوق أنا سبته عند أم هدى
مكملتش كلامي وجريت على أوضة سليم، فتحت الباب لقيتها أوضة باردة. مترتبة بشكل مزعج، الألعاب في مكانها ، الملايات نضيفة..
طب إزاي؟
فتحت الدولاب وأنا قلب بيدق، بس لقيته مليان هدوم سليم، الهدوم اللي اشتريتها له بنفسي!
كريم أتنهد وقالي:
يوم الحادثة كنا راجعين من عند مامتك، وأنا كنت سايق وانتي جنبي وسليم ورا في الكرسي بتاعه، بس غصب عني بصيت لورا وحصل اللي حصل..
من يومها وإنتي مش قادرة تتقبلي اللي حصل..
ولا إن سليم خلاص مبقاش موجود..
حطيت إيدي على ودني وأنا بصرخ:
"اسكت... اسكت!"
لكنه كمل:
"خدتك لأكتر من دكتور نفسي.
كلهم قالوا إن الصدمة عندك عنيفة وإنك دخلتي في حالة إنكار كامل.
قالوا لازم علاج وجلسات...بس إنتِ كنتِ بترفضي كل حاجة.
كل ما تفتكري دقيقة...تنهاري.
أكتر من مرة حاولتي تأذي نفسك.
ومرة جريتي من البيت الساعة 4 الفجر تدوري على سليم في الشارع."
افتكرت...أم هدى لما قالتلي:
"إنتِ كنتِ خارجة من العمارة الساعة 4 الفجر..."
بصيت لكريم ببطء..بقيت الصورة بتتركب...حتة حتة...ببطء مرعب.
قالي:
"أنا غلطت..عارف إني غلطت.
بس كنت بموت وأنا شايفك بتموتي كل يوم.
الدكتور كتبلك دوا يخفف الهلاوس والهيستيريا بجرعات بسيطة في الأول... بس مكنش بيعمل حاجة!
وبعدين بدأت أزودلك الجرعات وأحطهولك من غير ما تعرفي.
كنت فاكر إني بحميكي.
فاكر إن لو ذاكرتك تشوشت شوية، وجعك هيخف.
فاكر إن النسيان أرحم من إنك تفتكري ابنك وهو بيموت قدامك.
كان بيتكلم وأنا جوايا كل حاجة بتنهار.
مش بس ثقتي فيه...حياتي كلها.
قومت وقفت بالعافية، وقلت بصوت مبحوح:
"يعني كنت بتديني دوا عشان تخلص من الدوشة والصداع اللي عاملة ليك مش كده؟
بتسرق مني عقلي؟ بتقرر أنا أفتكر إيه وأنسى إيه؟"
مش قادرة تحس بالقهر اللي جوايا؟
قال وهو بيقرب:
"ندى، والله كنت بحاول أنقذك.
صرخت فيه:
"بس إنت دمرتني!"
سكت وهو عارف إن مفيش رد يتقال.
قضيت الليلة دي في أوضة سليم، مكنتش قادرة أبصله..ولا أبص لنفسي..
في اليوم اللي بعده، طلبت من كريم كل التقارير القديمة.
كل الروشتات.
كل الأشعة.
كل حاجة.
وجابهم.
وقعدت أقرا...
وأقرا...
وأقرا...
وأنا بحاول أستوعب كل اللي بيحصل بس معرفتش..
قررت أروح للدكتور وحكيتله كل حاجة، بس المرة دي من غير ما أهرب من نفسي.
بدأت رحلة علاج طويلة..أطول مما كنت أتخيل.
جلسات..أدوية حقيقية المرة دي.
نوبات بكا.
نوبات غضب.
وأيام كنت بصحى فيها حاسة إن قلبي متخيط بخيط رفيع وهيتقطع.
كريم حاول يرجع البيت أكتر من مرة.
كان بيكلمني..يبعتلي.
يقف تحت البيت ساعات.
كل مرة يقول نفس الجملة:
"أنا أذيتك وأنا بحبك لازم تسامحيني"
بس فيه نوع من الأذى...مينفعش يتغفر بسهولة!
بعد شهور، رفعت قضية طلاق.
مش عشان مبقتش بحب كريم...
لكن عشان بقيت أخاف من الحب لما يبقى فيه كذب بالشكل ده.
لما يبقى فيه حد شايف نفسه من حقه يقرر أنا أفتكر إيه وأنسى إيه، وأعيش إزاي، وأواجه وجعي إمتى.
لمايكون أقرب حد ليك مش بس مش واقف جمبك في أهم فترة في حياتك لأ ده واقف الجمب التاني ضدك!
اتطلقت أخيرًا، وخرجت من الجوازة دي وأنا حاسة إني طالعة من حريق.
متبهدلة...لكن حية.
بدأت مرحلة جديدة في العلاج النفسي .
كنت بروح الجلسات وأنا حرفيًا بجمع نفسي حتة حتة.
مرة أعيط.
مرة أزعق.
مرة أفضل ساعة كاملة ساكتة أبص للدكتور من غير ما أقول كلمة.
بس كنت بتحسن.
ببطء...
لكن بتحسن.
وفي يوم، وأنا برتب الدولاب، وقعت إيدي على كيس أبيض كبير في آخر الرف.
سحبته باستغراب...
ولما فتحته، لقيت فستان فرحي.
اتجمدت.
فضلت باصة له ثواني طويلة.
أنا متأكدة إن كريم خد كل الحاجات اللي تخصه بعد الطلاق، وخصوصًا الفستان ده لإني أكدت عليه ياخدوا عشان مش عايزة أي حاجة تفكرني بيه!
فستان الفرح ده جه هنا إزاي؟
قررت أطلعه وأرميه!
أيوة لازم أرميه...
بس......
لقتني غصب عني بخده في حضني وبمرر إيدي على كل جزء فيه، كل جزء كان بيرجعلي ذكريات جميلة ماتت جوايا..
لحد ما حسيت بحاجة ناشفة مستخبية في البطانة من جوه.
دخلت إيدي وطلعت ظرف صغير مطبق بعناية.
كان مكتوب عليه بخط كريم:
لو لقيتي الورقة دي ياندى اوعديني متقريهاش إلا وإنتِ مستعدة!
فتحت الظرف وأنا إيدي بتترعش. كان جواه ....
