رواية حكاية حياة الفصل الخامس5 بقلم اية الفرجاني

رواية حكاية حياة بقلم اية الفرجاني
رواية حكاية حياة الفصل الخامس5 بقلم اية الفرجاني

فتح لقى ظابط ومعاه عساكر، ووراهم حسن مبتسم

حسن:
أخرك ده يا محمود؟ 
الظابط:
انت محمود عبد التواب؟ المعلم حسن رافع عليك 3 شيكات بمليون و200 ألف، مطلوب القبض عليك 
محمود ضحك بحزن ومشي معاهم

أول ما نزلوا الحارة، الناس كلها اتلمت، حسن استنى لحد ما الشارع اتملى وعلّى صوته:

اتفرجوا يا أهل الحارة على النصاب الحرامي هو وبنته! الراجل ده كان شغال عندي وبياكل من خيري،
بص لمحمود وقال:
ازاي تطمع فيا كده يا محمود بعد ما كنت عايش من خيري؟! 
الناس شهقت وكله وبدأت يتكلم

حسن كمل والكذب طالع من بقه زي السم، وشاور على شقة محمود:
ده ضحك عليا! جالي وقالي هجوزك بنتي يا معلم عشان تجبلك عيل يورثك ولعب فى دماغى، وخد مني شقة ومحل و500 ألف مهر، وبنته قضت معايا ليلة في بيتي كزوجة وخدوا اللي هما عاوزينه، وبعد ما شبعتوا فلوس جاي يقولي الجوازة باطلة وراحت تتجوز ابن خالتها! 
الجملة نزلت زي القنبلة في الحارة

واحدة صرخت: يا لهوي!

واحد تاني: قضت معاه ليلة؟

ست واقفه فى البلكونة: يبقى أبوها باعها وبيتاجر بيها عشان الفلوس 

واحدة تانية: عشان كده هربت لابن خالتها، ما هي خلاص..خافت 

محمود واقف في نص الحارة ووشه أسود من الفضيحة، سامع الناس بتنهش في عرض بنته وهو مش قادر حتى يرد........ 

بس فجأة مقدرش يتحمل اكتر وصرخ فيهم:

كداب! بنتي أشرف منكم كلكم! محصلش! 

حسن ضحك ببرود قدام الظابط:
أشرف من مين؟ اسأل بنتك كانت بتعمل إيه في شقتي، الناس كلها شافتها وانا شايلها ونازل بيها! وشافوها وهيا طالعه معايا 

الظابط زق محمود قبل ما يرد:
يلا يا محمود 
ركبوه البوكس وهو بيعيط، وحسن واقف في نص الحارة بيتفرج على سمعة محمود وحياة وهي بتتدمر ، والناس عمالة تتكلم:

شوفت البت اللي أبوها باعها؟
أه اللي هربت مع ابن خالتها بعد ما باتت عند الراجل وخدت فلوسه؟ 

عند ريان بيكون قاعد و
تليفونه بيرن 
بعد القبض على محمود بساعة
= يا باشا، المعلم حسن خد الحكومة وراح على بيت محمود وقبضوا عليه قدام الحارة كلها وفضحه وبيقول للناس إن حياة باتت معاه وخدت فلوسه وهربت عندك! 
ريان وشه احمر وعروقه برزت، قفل التليفون وفضل يفكر طول الليل واول ما النهار طلع اخد مفاتيحه

ونزل راح القسم 

اول ما دخل القسم قال للعسكري:

عايز أقابل المقدم سامح، قوله ريان الألفي

دقيقة والعسكري رجع:
اتفضل، المقدم مستنيك

سامح اول ما شافه قام حضنه:
ريان! ابن عمي اللي واحشني، فينك يا جدع؟ 

بعد السلام والكلام، ريان قعد ووشه مقلوب:

جايلك في خدمة تخص حد قريبي يا سامح، بس موضوع كبير ومعقد 
وحكاله كل حاجة من أول جواز حياة بالإكراه لحد ما حسن قبض على أبوها بالشيكات وشوه سمعتها

سامح مصدوم:
إيه اللي انت بتقوله ده يا ريان! ده جواز إكراه واتجار بالبشر كمان! بس بص يا ريان، اللي حصل في الجوازة ده القانون والدين ممكن يعتبره باطل، لكن عشان نحبس حسن ده محتاجين نمسك عليه حاجة كبيرة، يعني مثلاً لو هنقول إنه ضرب حياة وحاول يقتلها هنحتاج شهادتها هي، بس هو هيقول كنت فاكرها مراتي وقربي منها شيء عادي

ريان فكر وقال:
بس يا سامح، حسن ده بيتاجر في الخشب، بس اللي مش داخل دماغي إن تجارة خشب تكسب الفلوس دي كلها؟ شقة ومحل ونص مليون مهر وعربيات ورجالة؟ ده مش مكسب خشب! 

سامح بصله وبدأ يربط الكلام... 
عندك حق فعلاً.. تجارة الخشب متعملش الفلوس دي كلها مرة واحدة.. تفتكر ممكن فعلا مشبوه؟ 
وبعدين سامح ضرب على المكتب وقال:
سيبلي الموضوع ده يومين، وهجيبلك أصله وفصله، لو وراه حاجة هنجيبه

في اللحظة دي تليفون ريان رن، باسم أمه... فتح وريهام كانت بتعيط:

إلحق يا ريان، محمود اتقبض عليه، وحياة مموته نفسها من العياط وبتقول أنا السبب أنا اللي ضيعت أبويا! ومصممه تروحله 
ريان غمض عينه بغضب مكتوم وقال:
عارف يا أمي عارف.. قوليلها متعيطش، قوليلها ريان بيقولك هيلاقي حل وهيخرجه، أنا مش هسيبه

قفل معاها وبص لسامح:
زي ما سمعت، الراجل بدأ ينفذ تهديده انا خايف يوصل ل حياة 
سامح قام وقف:
متقلقش يا ريان، أبوها ده هيخرج بس سيبني أشوف حكاية الخشب دي عشان ممكن ده يكون ده الخيط اللى هيوصلنا ليه ...... 

ريان خلص من عند سامح ورجع البيت عند أمه، أول ما فتح الباب لقى حياة قاعدة على الكنبة بتعيط بصوت مكتوم وريهام جنبها بتحضنها..... 

قلبه وجعه عليها

قعد جنبها على الكنبه وقال بصوت هادي:

حياة.. حياة بصيلي، اهدي يا حياة
حياة بعياط:
بسببي.. أبويا اتحبس بسببي يا ريان..هو ميستهلش كده حتى بعد اللى عملوا معايا... 
ريان:
ششش مش بسببك، بسبب طمعه وبسبب راجل ظالم، وأنا وعدتك أبوكي هيطلع وهخرجه، صدقيني هلاقي حل، انتي بس اهدي عشان خاطري وبعدين عشان انت لسه تعبانه.... 
فضل يقولها كلام يهديها لحد ما سكتت ومسحت دموعها

ريهام عشان تطلعها من المود قالت:
بقولك إيه يا حياة، انتي مش كنتي شاطرة في الدراسة؟ وصلتي لفين دلوقتي؟ 

حياة افتكرت وسكتت، عنيها دمعت تاني:
قعدت بعد تالتة ثانوي يا خالتي.. بسبب المصاريف 
ريهام:
قعدتي ليه ؟ 
حياة بحزن:
أبويا مقدرش يدفع مصاريف الكلية، أنا كنت داخلة علوم.. 
ريهام اتصدمت:
علوم! مجموعك كان كام ؟ 
حياة بهمس:
87% 
ريهام قامت وقفت:
87% وقاعدة في البيت! لا يا حياة انتي لازم تكملي، من بكرة هتروحي تقدمي ملفك في الكلية وأنا هتكفل بكل مصاريفك، كتب ومواصلات وكل حاجة

حياة اعترضت بسرعةوقالت:
لا يا خالتي مقدرش.. 
ريهام زعقتلها بحنية:
بس اسكتى خالص! أنا زي أمك، ومفيش بنت تقول لأمها لا، هتكملي يعني هتكملي
حياة بصت في الأرض ووافقت وهي مكسوفة، وبعدين قالت بزعل:
بس الدراسة بدأت من شهر خلاص، حتى السنة دي كمان ضاعت عليا.. 
وقتها ريان اللي كان ساكت وبيشوف ردة فعلا وقال:

متخافيش مفيش حاجة ضاعت عليكى 
حياة بصتله 

ريان كمل:
أنا هتصرف، وهقدملك بكرة في أحسن كلية علوم، وهرجعلك السنة دي كمان، متشيليش هم
حياة بتبصله ومش مصدقة، كانت ساكتة بس عينها بتلمع

ريان قام وقف وقال وهو بيبص لها:
جهزي نفسك، هاجي آخدك بكرة بدري عشان اقدملك فى الكليه 
وفعلاً قام مشي وسابها قاعدة مكانها قلبها بيدق لأول مرة من شهور حد يقولها فكري في مستقبلك....

تاني يوم 7 الصبح

ريان كان نايم، تليفونه رن بيتعدل وفتح 

ريان بصوت نايم:
ألو.. 
سامح:
صباح الخير ، صحيتك؟ 
ريان قام مفزوع:
سامح! صباح النور.... قول عملت إيه؟ 

سامح....... 
 
لقراءة باقي الفصول اضغط هنا


تعليقات



<>