رواية زهرة المشمش الفصل الخامس5بقلم هدير اسامة
مكنتش عارفه إن ليلى بتخاف عليا بالشكل دا ، هو في صاحبه كده بجد ..
أول ما سألتها عن رقم لينا لقيتها بتقولي : لينا كلمتني علشان تعرف تفاصيل عنك وأنا مريحتهاش ، بجد يا زهرة البنت دي مش تمام خالص وانا خايفه عليكي منها ..
زهرة : ربنا يهديها ، أنا بجد فرحتي متتوصفش يا ليلى ، مش مصدقه إن سُليم خطبني أنا ..
ليلى بحب: انتي كتير على أي حد يا زهرة بجد ..
زهرة : علشان انتي بس بتحبيني يا ليلى وشيفاني كده ..
ليلى : لأ يا زهرة ، انتي جميلة ما شاء الله ومثقفة وملتزمة وناجحه وقلبك جميل اوي يا زهرة ، سُليم محظوظ بيكِ ، الله يتملك على خير يارب يا حبيبتي..
وفجأه لقيتها حضنتني حضن جميل شبهها واستأذنت ومشيت ..
ــــــــــــــــ
سُليم : ممكن أقعد مع زهرة شوية يا عمي؟
والد زهرة : اه طبعا يا حبيبي ،هنادي عليها واظبط شوية الشجر اللي في الجنينة جنبكم هنا ..
أول ما بابا قالي اقعد مع سُليم قلبي كان بيرقص من الفرحة ..
طلعت قعدت مع سُليم ولقيته باصصلي كده كتير فاتكسفت أوي
سُليم: انتي ازاي كده يا زهرة ؟
زهرة بخجل: ازاي ايه
سُليم: بحس إني مرتاح وأنا قاعد معاكي ، كإن في قلبي طفل صغير بيجري في جنينه وبيضحك ، بحس إن كل حاجه جميلة ومافيش ناس وحشه، انتي ازاي كده بجد..
زهرة : انتم شايفين ايه أنا مش شيفاه ، ليلى لسه قيلالي كلام زي دا ، بس أنا إنسانه بسيطه جدا وبحاول أتشعبط في رضا ربنا مش أكتر .. انت حاسس كده يا سُليم علشان قاعد بعيد عن الكاميرا..
سُليم : أنا عيلتي كلها بعيد عن الكاميرا ومش بحس معاهم كده.
زهرة : صحيح فين عيلتك ، وليه مش بيجوا معاك .
سُليم بتلعثم: عيلتي موجوده في الشرقية ، بس مش بقدر ازورهم علشان الناس هيتلموا وكده ، وعرضت عليهم كتير يجوا معايا هنا القاهرة ورفضوا .
زهرة : طب رفضوا ليه؟
سُليم بتنهيده: والدي كان عاوزني أطلع شيخ الجامع ، لكن أنا كنت هاوي كورة الصراحه فخيبت ظنه .
زهرة : طب ما انت ممكن تعمل الاتنين على فكره وتشتغل كمان .
سُليم ضاحكا: اشتغل ! ما انا بشتغل اهه ورصيدي في البنك كويس .
زهرة: لأ يا سُليم ، شغل تتعب فيه وتكسب من تعبك ، الكورة دي هواية ، العب كورة زي ما انت عاوز ، بس اعمل مشروع شغل فيه ناس كتير وباشر العمل بنفسك ساعتها هتحس إنك بتشتغل ..
سُليم : فكره جميله جدا ، بس أنا مبعرفش أعمل حاجه غير إني ألعب كورة .
زهرة : اتعلم ، خد كورسات ، طور من نفسك ، اتعلم لغة ، راجع حفظ القرآن ، وعلم غيرك وخد الأجر ، انت محتاج تعمل حاجات كتير اوي خلاف الكورة والإعلانات ، بجد فايتك كتير اوي يا سُليم ..
سُليم باهتمام: هحاول أعمل كده .
زهرة : مبسوطه إنك بتقبل مني الكلام .
سُليم : انا مش قادر اوصفلك أنا كنت محتاج وجودك في حياتي ازاي .
أول ما قالي كده حسيت بالخجل واستأذنت ودخلت أوضتي ..
سُليم ضحك من خجل زهرة واستأذن علشان يقوم
بعد ساعة سُليم اتفاجئ إن السوشيال ميديا كلها بتتكلم عن خطوبته من لينا عارضة الأزياء وصور كتير ليهم على النت ..
سُليم معرفش يعمل حاجه غير إنه يكلم زهرة
ألو زهرة عامله ايه؟ عاوز أقولك حاجه كل اللي على النت دا كذب وإشاعات .
زهرة بهدوء: من غير ما تقول حاجه يا سُليم ، أنا عارفه إن دي اشاعات ومخي أكبر من كده ..
سُليم خد تنهيده: الحمد لله أنا كده ارتحت .
أول ما قفل معاها كلم لينا وهو متعصب : أنا عارف إن انتي اللي عملتي كده ، وأنا ليا تصرف تاني معاكي .
لينا بهدوء أعصاب: عملت ايه مش فاهمه، قصدك الخطوبه وكده ، أنا مش عارفه مين عمل كده ، بس كده كده في يوم من الأيام كنا هنعلن خطوبتنا يعني ..
سُليم : لا خطوبتنا ولا غيره ، انا خطبت .
لينا : خطبت الجربوعه بتاعة الورد صح ، طب فكرت كده الناس هتقول عنك ايه ؟! هتقول كابتن سُليم خاف من الدوشة بتاعة بياعة الورد وقال يستغلها ، وانت اللي سمعتك هتنهار وهتخسر كل حاجه ..
سُليم : عادي أخسر كل حاجه يا لينا علشانها، ومش هسمحلك تعيبي فيها تاني ، سلام ..
ـــــــــــــــــ
أول ما سُليم قفل ،لينا فضلت تكسر في البيت زي المجنونه : بيحب فيها ايه دي ، دي بيئة ، دي واحده جربوعه متسواش ، بقا يسيبني أنا علشانها..
بس المشكلة مش في لينا إنها كسرت البيت أو عابت في زهرة ، المشكلة الحقيقية في البنت اللي كانت معاها في الأوضة بتحاول تهديها وهي بتقولها: زهرة مش جربوعه ولا بيئة ، دي حاجه واو أوي يا لينا ، واو لدرجة أما بشوفها بيجيلي ضيق تنفس ، واحده كده مافيهاش غلطه ، ناجحه ذكية ملتزمة عندها عزة نفس ،عندها أب وأم بيدعموها ، عندها كل حاجه ، حتى أنا جبت أعلى منها في الدراسة ، كنت بذاكر علشان هي متبقاش أعلى مني ، وعملتها فعلا ..
أتفاجئت إنها فرحانه ليا على مجموعي وبتشجعني وبتدعمني ، اللي هو كفاية يا زهرة المدينة الفاضلة اللي انتي عايشه فيها دي ، أنا حتى كنت بحاول أقربها من سُليم علشان يبقى الذنب الحقيقي الحرام اللي في حياتها بس للأسف هي حولت الذنب دا لحلال.. لأ كفاية كده يا زهرة ، كفاية مثالية ، كفاية تبقي فوق لوحدك ...
لينا بحقد: ها ناوية على ايه يا ليلى؟
ليلى بابتسامة خبيثة: ناوية أخليها تريند مصر..
——————————
السلام عليكم يا رفاق ، الخبر المنتشر بخصوص خطوبتي من عارضة الأزياء كاذب ، أنا بالفعل خاطب ، ولكن خاطب فتاة ملتزمة من بيت طيب ، وبطلب منكم تهتموا ب كابتن سُليم لاعب الكورة فقط ، أما حياتي الخاصة ياريت محدش يتدخل فيها وشكرا جدا ..
سُليم بعد ما عمل كده حس كإن جبل نزل من على قلبه ،
نزل بوست من صفحته الرسمية ودخل نام ..
لكن صحي على صوت التليفون بيرن كتير من والد زهرة
ألو ازيك يا عمي أخبارك ايه ؟ في حاجه ولا ايه؟
والد زهرة: انا قولتلك زهرة ملهاش علاقة بالنت ولا بالناس وعاوزه تعيش في حالها ايه اللي انت عملته دا ؟
عملت ايه يا عمي بس فهمني .
صور زهرة في كل مكان ، ونازله من الأكونت الشخصي بتاعك..
لأ يا عمي أكيد في حاجه غلط ، أنا متكلمتش خالص عن زهرة.
افتح الفيس وشوف بنفسك، سلام ...
ـــــــــــــــ
أول ما سُليم فتح الفيس اتفاجئ بكلام غير اللي هو كاتبه ..
انا بنفي خبر خطوبتي المنتشر حاليا ، لإني في علاقة الفترة دي ادعولي تكمل على خير، أنا وبياعة الورد زهرة المشمش اللي أنا بقيت تريند بسببها وهي سبب شهرتي أكتر وأكتر ، دعواتكم ..
أول ما سُليم شاف البوست دا وصور كتير لزهرة في البوست اتصدم .
ورن على مازن المسئول عن السوشيال ميديا الخاصه ب سُليم ، مازن دا صاحبه وواثق فيه ،لكن كل ما يرن عليه تليفونه مقفول ...
للأسف مازن كان عند لينا اللي اقنعته إنها بتحبه وسُليم بيغير منه علشان هي فضلته عليه ..
ليلى أول ما شافت الخبر جريت على زهرة تطمن عليها ..
ليلى بقلق: زهرة انتي كويسه؟
زهرة بحزن : اه يا ليلى الحمد لله، اخبارك ايه؟
ليلى: سيبك مني أنا ، طمنيني عليكي ، أنا مش عارفه سُليم قال كده ليه ونشر صورك ، يمكن علشان مشهور ومتعود على كده وفاكرها عادي ..
زهرة بحزن : الحمد لله على كل حال..
ليلى : طب ناوية تعملي ايه؟ تيجي نروحله؟
زهرة : بيتي موجود قدام والدي ، وقت ما يكون عنده مبرر هيجي
ليلى بغضب: وكل دا مش لاقي مبرر يا زهرة ، انتي عمرك ما نزلتي صورة واحده ع النت ، دلوقتي كل الناس معاها صورك ، أنا اللي صدمني البوست بتاع واحد بيقول إنك كنتي عاوزه تطلعي تريند عن طريقه وعملتي كل دا علشان توصليله، ازاي كده بجد!
زهرة بحزن : أهو كلام يا ليلى ، ربنا هينجيني بإذن الله، هو عارف قلبي وهو أدرى بيه ..
ليلى بضيق: ما هو مش هينفع تسكتي بردو ، لازم تفكري في حل ، ايه رأيك أطلع لايف من عندي ونحكي الحوار من أوله ونطلب من الناس بأدب إنها تبعد عن حياتك الخاصة ، والناس أما يشوفوكي كده هيعرفوا انك فعلا حد جميل ..
زهرة : لأ يا ليلى، بقا أنا زعلانه علشان كام صورة ليا على النت اقوم اطلعلهم بفيديو ، وكمان أنا الجو دا مش مناسب معايا ، ربنا كريم بإذن الله وشايف قلبي وعشمي فيه كبير..
ليلى : طب هتعملي ايه دلوقتي؟
زهرة : هقوم أصلي يا ليلى ، أنا بحل أموري بالصلاة الحمد لله، ولا مرة ربنا خذلني..
ليلى جالها ضيق تنفس من كلام زهرة وقررت تمشي ..
عارفين ليلى دي بتفكرني بقوم سيدنا لوط أما كانوا زعلانين على صلاحه وبيتضايقوا طول ما هما شايفينه صالح
﴿فَمَا كَانَ جَوَابَ قَوْمِهِ إِلَّا أَنْ قَالُوا أَخْرِجُوا آلَ لُوطٍ مِنْ قَرْيَتِكُمْ إِنَّهُمْ أُنَاسٌ يَتَطَهَّرُونَ﴾
النفوس المريضة مبيزعجهاش وجود الشر ، بالعكس بيزعجها وجود الخير ..
------------------------------
سُليم مكنش يعرف إن دي ضريبة الشهرة ، إن حياتك كلها هتبقى على الملأ لو معرفتش تسيطر عليها ..
رن على زهرة تاني يوم وهو مكسور ، مش عارف هيقولها ايه ولا ايه ، البنت اللي كانت عايشه في هدوء وحب يعيش معاها في نفس الهدوء لكن اتفاجئ إنه سحبها من إيدها للدوشه بتاعته ..
السلام عليكم
زهرة بحزن: وعليكم السلام ورحمة الله وبركاته، أخبارك ايه ؟
سُليم بإنكسار: المفروض أنا اللي اسألك أخبارك ايه؟
زهرة : الحمد لله بخير
سُليم : أنا مش قادر أقول حاجه يا زهرة ولا عارف أعتذرلك عن ايه ولا ايه ، من يوم ما قابلتك وانتي حياتك كلها بقت ضوضاء، انا آسف ، أنا خلاص يا زهرة هسيبك للعالم بتاعك للهدوء وقررت أنسحب من حياتك ...
سُليم كان بيقول كده وقلبه بيتعصر ، هو عرف زهرة من فترة بسيطه لكن كإنه عرفها من سنين ..
لكن اتفاجئ ب رد زهرة الغريب اللي خلاه يقرر يعتزل الكورة يعتزل الشهرة يعتزل أي حاجه بس ميعتزلش زهرة المشمش..