رواية في طريقنا الفصل الساس6بقلم زياد محمد


رواية في طريقنا الفصل الساس6بقلم زياد محمد


مريم اتصلت قبل ما أقفل الجروب.

رديت، وسمعتها بتاخد نفس.

= كان لازم تكتبي كده قدام العميل؟

بصيت للصورة المفتوحة على اللابتوب.

= وكان لازم يعرف إني موافقة على حاجة مشوفتهاش؟

= أنا كنت هبعتلك التفاصيل، بس هو استعجل الرد.

= فقولتيله موافقة؟

سكتت لحظة.

= قولتله إننا نقدر نعملها. إنتِ ليه بتاخدي الكلام كأني بقصد أوقعك؟

= أنا بسألك على اللي قولتيه. إنتِ عارفة إن كلمة موافقة دي هترجعلي أنا.

= وهو لما يشوفك بتقولي معرفش، هيشوفني إزاي؟

رجعت بضهري للكرسي.

= طب إنتِ فكرتي هيشوفني إزاي لو سكت، وبكرة ملقاش اللي وعدتيه بيه؟

صوتها هدي.

= أنا كنت بحاول أمشي الشغل.

= يبقى ابعتي طلبه، ونراجع تكلفته. متبعتيلوش موافقتي بدل ما تسأليني.

لقيت رسالة جديدة في الجروب. العميل طالب نوقف اعتماد الطباعة لحد ما تتوضح الإضافات.

قريتها بصوت واطي.

مريم قالت:

= ممكن تصلحي ده من غير ما تكبريه.

= وأنا هصلحه. بس مش هقول إني وافقت وبعدين غيرت رأيي.

قفلت بعدها، وبعتّ لشريف النسخة المعتمدة. رد إنه هيحضر معاينة عشرة الصبح، وإن أي تنفيذ إضافي يتوقف لحد ما نتكلم.

دخلت المطبخ أحط الطبق، ولقيت ماما بتحط الأكل الباقي في علبة.

= مكالمة شغل؟

هزيت راسي.

= هي مريم؟

بصيتلها.

= عرفتي منين؟

= صوتك بيختلف لما اللي مزعلك حد إنتِ مستنية منه غير كده.

مسكت العلبة منها. كنت عايزة أحكيلها، لكن جنى نادتني من الأوضة عشان أتأكد إن ورقة الاشتراك في الشنطة.

دخلت، ولقيتها طالعاها تاني.

= هتوصّليني للميس؟

= لحد باب الفصل. والورقة إنتِ تديهالها.

حطتها في جيب الشنطة الصغير، وقفلت السوستة بإيدين الاتنين.

الصبح، فضلت ماسكة إيدي لحد ما شافت صاحبتها عند الفصل. سابتني، وبعدين رجعت خطوتين.

= لو الميس سألتني أنا هعمل إيه، أقول مطبخ؟

= قولي اللي إنتِ عايزة ترسميه.

= ما هو مطبخ.

= يبقى أيوه.

ضحكت ضحكة صغيرة، وطلعت الورقة قبل ما تدخل. استنيت لحد ما شفتها بتديها للميس، وبعدها مشيت.

رجعت البيت قبل معاد فايزة بشوية. ماما كانت محضّرة فنجانين لهناء، وفاتحة الدولاب تدور على طبق.

مديت إيدي أجيبه، فقالت:

= الكبير يا سلمى. هي جاية تشرب شاي، مش تتفرج على البسكوت من بعيد.

ضحكت، ونزلته.

فايزة وصلت تسعة. ماما طلبت منها تساعدها في المطبخ الأول، وبعدها قالتلي أروح أجهز.

كنت بلبس وأنا براجع رسائل الشغل، فدخلت ماما وناولتني كيس فيه سندوتشين.

= دول معاكي.

= أنا هاكل لما أرجع.

حطتهم جوه شنطتي.

= ما إنتِ كل يوم بتقولي كده، وبترجعي زعلانة من الناس ومن الأكل البارد.

بصيتلها، فابتسمت ومشيت. قفلت الموبايل لحد ما خلصت لبس، وسألت فايزة عن الخميس قبل ما أنزل. قالت إنه متاح في نفس الوقت.

كنت هبدأ أشرح لماما كل حاجة فايزة المفروض تعملها، فلقيتها كاتبة المطلوب على ورقة.

= إنتِ كتبتي دي إمتى؟

= وإنتِ بتلبسي. وهناء هتيجي بعد حداشر، زي ما اتفقنا.

قريت الورقة. فيها الحاجات اللي بتتعبها فعلًا، وسايبة لنفسها حاجات صغيرة بتحب تعملها.

كنت مستنية تعترض على المصاريف، لكنها سألتني إذا كنت حطيت لنفسي سندوتش ولا الكيس كله لجنى.

= جنى أخدت أكلها.

= يبقى خدي بالك من أكلك إنتِ بقى.

وصلت الفرع قبل عشرة. مالك كان واقف قدام الصورة اللي مريم بعتتها، وشريف جنبه.

أول ما قربت، مالك سأل:

- دي اتبعتت إمتى؟

= امبارح. وأنا شوفتها معاهم.

شريف بص في موبايله.

- خلينا نعرف حصل إيه الأول.

مريم وصلت، وبعدها مسؤول التسويق عند العميل. دخلنا المساحة اللي المفروض يتعمل فيها الركن، والراجل فتح الصورة.

- أنا عايز اللي اتبعتلي ده، وإنتوا أكدتوا إنه ضمن الاتفاق.

شريف رد:

- الإضافة دي مش في الاتفاق المعتمد. فيه تأكيد اتبعت قبل ما تتراجع، وإحنا بنتحمل مسؤولية تصحيح ده.

مريم قربت.

= أنا فهمت إننا هنستخدم الخامات الموجودة، فالتكلفة مش هتختلف.

مالك بص للصورة.

- الخلفية دي مقاسها مختلف، والإضاءة اللي فيها مش موجودة هنا. ده يتعمل، بس محتاج حساب لوحده.

الراجل رفع عينه ليا.

- وإنتِ مكنتيش عارفة؟

= لأ. وده اللي وضحته امبارح. دلوقتي نقدر نحدد إيه ينفع يتنفذ، وإيه محتاج تكلفة زيادة، وتختار حضرتك على أساس واضح.

مريم بصت للأرض. شريف طلب منه يدينا وقت نراجع بديل، فخرج يعمل مكالمة.

مالك شاور على حائط جنبنا.

- نستخدمه بدل الخلفية الجديدة، ونشيل وحدة الدعاية اللي هنا. يبقى وفرنا جزء من التكلفة.

= والوحدة دي فيها المنتج اللي الحملة كلها مبنية عليه.

- نغيّر مكانها.

= فين؟

شاور ناحية الداخل.

قربت من المكان، وبصيت له.

= كده هتستخبى ورا الأثاث.

- طب تقترحي إيه؟ إحنا مش هنطلع ميزانية جديدة من الهوا.

= وأنا مش هبوّظ اللي العميل وافق عليه عشان نوفر وعد اتقال من غير حساب.

عقد حواجبه.

- وأنا مش بقول نبوظه. بقول نشوف حل.

أخدت نفس، ورجعت للصورة.

كانت الخلفية فيها تفصيلة كبيرة هي اللي مديّاها شكل مختلف. باقيها كان قريب من ألوان الحملة.

فتحت التصميم على التابلت.

= نعرض عليه خلفية أصغر تتحرك، تتصور في الركن ده وقت الافتتاح. نفس الألوان، بس من غير التفصيلة دي. والإضاءة تتحسب لوحدها.

مالك قرب وبص.

- هتتخزن فين؟

ورّيته المكان اللي ممكن تتخزن فيه بعدها، فطلب مني أسيب مساحة زيادة في التصميم. عدّلتها قدامه، وهو راجع المقاس.

شريف تابعنا لحد ما اتفقنا على نموذج نقدر نعرضه.

رجع مسؤول التسويق، وسمع الاختيارين. اختار يشوف عينة البديل يوم الخميس قبل ما يعتمد، وفضل مصر إن الطباعة تستنى.

شريف وافق إن الشركة تتحمل تكلفة العينة بسبب الوعد اللي اتبعت. أما التجهيز النهائي فهنبعت تكلفته مكتوبة، ومفيش تنفيذ قبل موافقته.

الراجل قال:

- أنا محتاج أعرف المرة الجاية الموافقة جاية من مين.

شريف هز راسه.

- هنتفق على ده كتابة بعد ما نراجع التعديل.

بص لمريم بعد ما العميل مشي.

- ابعتيلي النهارده كل الكلام اللي اتقال بخصوص الركن. ولحد ما نخلص المراجعة، أي رد فيه موعد أو تكلفة يعدّي عليا الأول.

هزت راسها. فتحت موبايلها، لكنه كمل:

- وكلمي المطبعة، وقفي الأمر لحد الاعتماد. إحنا خسرنا ميعاد التشغيل اللي كنا حاجزينه.

كنت شايفة وشها، ومقدرتش أفرح.

أنا اللي واقفة من امبارح أدافع عن توقيع محطتوش، ومع ذلك منظرها وهي بتلم حاجتها وجعني.

بعد ما شريف خرج يرد على مكالمة، قربت مني.

= كده إنتِ ارتحتي؟

= لأ يا مريم.

= بس وصلتي إن الغلط مني.

= لأنه منك. وده مش معناه إننا مش هنشتغل على إصلاحه.

ضحكت من غير فرحة.

= أنا كل ما أحاول أعمل حاجة، ألاقي لازم أرجعلك.

= عشان دي مسؤوليتي في المشروع. زي ما أنا برجعلك في تفاصيل العميل اللي عندك.

بصت بعيد.

= وأنا فضلت تنسيق ومواعيد وخلاص.

سكتُّ لحظة.

= لو إنتِ مضايقة من دورك، نتكلم مع شريف. لكن متكبّريهوش بموافقة مني أنا مديتهاش.

رجعت بصتلي.

= أنا صاحبتك يا سلمى.

حسيت عيني سخنت.

افتكرت مريم يوم وفاة ندى، لما لقت شعر جنى معقّد وأنا مش قادرة حتى أدوّر على مشط. نزلت جابت واحد صغير، وقعدت تفكّ شعرها براحة، وسابتني أروح لماما.

كنت كل ما البنت تعيط أبصلهم من الباب، ألاقيها لسه قاعدة جنبها.

ومريم دلوقتي كانت واقفة مستنية أرد عليها.

= ما أنا عارفة. عشان كده لسه واقفة أتكلم معاكي، ومش قادرة أعدّي اللي عملتيه بسهولة.

استنيت تقول حاجة. هي بصت للموبايل لما المطبعة ردت، وبعدت عشان تكلمهم.

مالك كان بيقفل شنطته. قال إننا محتاجين نبعت المقاسات قبل ما نمشي، فخلصناهم، وخرجت من الفرع قبل اتناشر.

في الشركة، كنت مستنية طباعة ورقة المقاسات لما سمعت مالك عند الشباك بيتكلم في التليفون.

- أنا عارف إن المورد مستني. بس الدفعة اللي حسبناها لسه منزلتش... لأ، العقد الجديد خلاص مضيناه.

سكت يسمع، وبعدها وطّى صوته. رجعت ناحية الطابعة من غير ما أفضل واقفة.

لما دخل، كان بيشد كُمّه ويرفعه، وبعدين ينزله تاني. حط الملف، وطلب نسخة إضافية.

طلعت السندوتشين من شنطتي.

= فطرت؟

رفع عينه.

- ده سؤال شغل؟

= لأ. بس ممكن تجاوب من غير ما تطلب استمارة.

ابتسم، وبص للكيس.

- لسه.

حطيت واحد قدامه، وقعدت آكل التاني.

فتح ورقة السندوتش.

- إيه ده؟

= جبنة. لو عندك اعتراض على توزيعها، قوله قبل ما تاكل.

ضحك.

- لا، المقاسات مناسبة.

أخدت لقمة، ولقيت الزيتونة اللي ماما حطتها وقعت على الورقة. مالك بص لها، فشيلتها بسرعة.

= إنتَ بالذات متتكلمش.

رفع السندوتش قدام وشه وهو بيضحك.

- أنا ساكت أهو.

سكتنا شوية. كنت مستنية تعليق منه على مريم، لكنه سألني عن مكان الخلفية.

رديت، وبعدها قلت:

= أنا اتعصبت عليك في المعاينة.

بصلي.

= اقتراحك كان عشان نلاقي حل. كان ينفع أرد أهدى.

هز راسه.

- وأنا زنقتك بسؤال كأنك لازم تطلعي حل فورًا. إحنا الاتنين محتاجين نفكر.

فضل باصص للورقة قدامه، وبعدين ضحك بخفة.

- واضح إني محتاج أعمل كده في حاجات تانية كمان.

مكنتش هسأله، لكنه كمل:

- حسبت شغل جديد على فلوس لسه مقبضتهاش. دلوقتي لازم أرتّب التزامات الاتنين.

= وهتقدر؟

أخد نفسه.

- هحاول. بس شريكي له حق يضايق من الحسابات دي.

بصيت له. كان فيه حاجات كتير بيفكر فيها وأنا ماشية من المعاينة شايفة إن كل وقته متاح للمشروع بتاعنا.

= أنا كنت هرتّب مساعدة البيت على مكافأة المشروع قبل ما آخدها. ولما حسبتها على مرتبي، قدرت أبدأ بساعات أقل.

رفع عينه ليا.

= لسه بجرب، بس على الأقل عارفة هحاسب على إيه آخر الأسبوع.

هز راسه، وفضل ساكت شوية قبل ما يسأل:

- وجنى سلّمت الورقة؟

= أيوه. كنت واقفة بره الفصل مستنياها تطلعها.

ابتسم وهو بيلم ورقة السندوتش.

- حلو. هي كانت عايزة تشارك فعلًا.

افتكرت إنه سمعها كام دقيقة بس، ومع ذلك افتكر يسأل. شرحتله إن المعرض آخر الشهر، وبعدها رجعنا نبص للمقاسات.

اشتغلت الطابعة، وأنا جمعت ورق الأكل.

بعد ما خلصنا، ثبتنا معاينة الخميس عشرة. بعتت لشريف المطلوب، ونزلت أستلم جنى في معادها.

خرجت وهي بتقول إن الميس كتبت اسمها في القائمة.

= قالتلي أكمّل الرسمة، وأجرّب أحكي كل يوم شوية.

= وإنتِ قولتيلها إيه؟

= حاضر. بس هي متعرفش إن البان كيك وقع.

ضحكت وأنا بمسك شنطتها.

= خلّيه سر بينا لحد المعرض.

رجعنا البيت، ولقينا هناء لسه قاعدة مع ماما. جنى سلّمت عليها، وقعدت تاكل.

ماما حكتلي إن فايزة خلصت المطلوب قبل حداشر، وسألتها عن ترتيب الخميس. بعدها فتحت رسالتها وورّتني إنها عايزة تثبت اليومين.

كلمت فايزة، واتفقنا على التلات والخميس، تسعة لحد حداشر. كتبت الحساب في نوتة المصاريف، وقفلتها.

لقيت جنى بتعدّل الكرسي اللي كنت رسمت رجله.

= مش عاجبك؟

= هو مش زي كرسيّنا.

مسكت الأستيكة، وفضّلت أمسح لحد ما اختفى الخط اللي عملته. رجعتلها الورقة، ورسمته بطريقتها.

ماما كانت بتضحك مع هناء على حكاية قديمة، وأنا قعدت أسمع. لأول مرة من الصبح، مكنش فيه حد مستني مني إجابة.

هناء كانت بتحكي عن يوم نزلوا يشتروا هدوم، وماما طلعت مع البياع لحد الدور التالت من غير ما تسأله المحل فين بالظبط.

جنى بصتلها.

= طب دلوقتي ليه بنختار اللي فيه أسانسير؟

ماما مسكت إيدها.

= عشان دلوقتي ركبي بتسأل قبل ما أنا أسأل.

هناء ضحكت، والبنت نزلت تبص لركبتها.

= بتسأل إزاي؟

ماما وطّت لها صوتها:

= أول سلّمة تقوللي، إنتِ ناوية على إيه؟

ضحكت، وجنى حطت خدها على رجلها وقالت إنها هتجيب لها الكرسي. ماما خلتها تقعد جنبها، وأنا قرّبتلهم طبق البسكوت.

موبايلّي نور برسالة من مالك.

- شكرًا على السندوتش. كان في معاده.

ابتسمت، وكتبت:

= العفو. والمرة الجاية ابقى فاطر قبل ما تقترح نشيل حاجات من التصميم.

رد:

- حاضر. هاجي ومعايا حل وفطار.

جنى قرّبت رسمة المطبخ مني، فسِبت الموبايل وأخدت القلم اللي طلبته.

بالليل، بعد ما نامت، فتحت اختبار وائل اللي شريف بعته من الضهر. راجعته زي أي شغل مطلوب مني، وكتبت ملاحظتين، وبعتهم.

شريف اتصل بعدها.

- أنا راجعت ملاحظاتك. شغله كويس، وهنقبله.

فضلت باصة للشاشة.

- هيبدأ بكرة. هيشتغل معاكي على تجهيز البديل، وإنتِ المسؤولة عن متابعة شغله في المشروع.

مسكت الموبايل بإيدي التانية.

كان ملف تقديم من كام يوم.

دلوقتي بقى يوم شغل كامل، ومكتب قريب، وكلام لازم يحصل كل صباح.

فتحت صفحة الاختبار تاني. الملاحظة اللي كتبتها على العنوان لسه قدامي؛ بكرة هو اللي هيسمعها مني. افتكرت قد إيه كنت زمان بخاف أقول له إن حاجة ضايقتني، عشان ميفهمنيش غلط ويبعد. دلوقتي كان مطلوب مني أتكلم، وأراجع، وأختلف معاه لو الشغل محتاج. وإني أعمل ده كل يوم، بهدوء.

سندت ضهري واستنيت باقي كلامه.

شريف سألني:

- سلمى، معاكي؟

بصيت لباب أوضة جنى، وبعدين للملف المفتوح.

= معاك. ابعتلي ميعاد حضوره.

                الفصل السابع من هنا
تعليقات



<>