رواية قبل ان تهب العاصفة الفصل السادس6بقلم منة الله عبد الناصر


رواية قبل ان تهب العاصفة الفصل السادس6بقلم منة الله عبد الناصر

: قَبْلَ أنْ تَهَبُّ العَاصْفْه 

بين دفء العائلة:

عاد كل منهما إلى بيته بعد ذلك اللقاء الخفيف الذي أضاء شيئاً من عتمة أيامهما. عند نور، دخلت المنزل ومزاجها العام غارق في صفاء غريب، وجدتها تبتسم لنفسها دون سبب واضح. وجدت والدها ووالدتها يجلسان في غرفة المعيشة، فاقتربت منهما بخطوات خفيفة ووجه مشرق:

— "مساء الفل يا أحلى ناس في الدنيا."

رد الأب بابتسامة حانية وهو يزيح نظارته قليلاً:

— "مساء النور يا دكتورة البيت.. شكلك راجعة النهاردة مبسوطة، يا رب دايماً."

قالت والدتها وهي تنهض لتعد طاولة العشاء البسيط:

— "تعالي يا نور، جهزي معايا العشاء عقبال ما أنا أصب الشاي."

التف الثلاثة حول مائدة صغيرة دافئة يملؤها الحب والضحكات الهادئة.

— الأب وهو يحتسي الشاي باهتمام: "طمنينا يا بنتي، الامتحان اللي جاي أخباره إيه؟ حاسس إنك بتهتمي بتفاصيل المادة."

— نور بابتسامة مطمئنة وهي تقضم لقمة خبز: "كله تحت السيطرة يا بابا، والمذاكرة ماشية بفضل الله ثم بفضل دعواتكم."

— الأم بحنان لافت: "ربنا يوفقك يا نور عيني، بس ما تجهديش نفسك أكتر من اللازم، صحتك بالدنيا."

بعد أن انتهوا، ساعدت نور والدتها في ترتيب المطبخ، ثم دخلت غرفتها بهدوء، راجعت رؤوس أمور سريعة للمادة التي ستُمتحن فيها في اليوم التالي، واستسلمت لنوم عميق ومريح.

على الجانب الآخر، في الجهة المقابلة من القاهرة، دخل عمر بيته وهو يشعر بإرهاق وتعب من ضغط اليوم والمذاكرة. لكنه، وقبل أن يخلد للنوم، تذكر امتحان الغد الصعب؛ فقرر أن يقاوم الكسل، فتح كتبه، وراجع أهم النقاط الصعبة لأكثر من ساعة كاملة، ثم أطفأ نوره ونام بعمق وهو يفكر في حال نور وكيف ستمر امتحاناتها.

مرت الساعات سريعاً، ومع خيوط الفجر الأولى، استيقظت نور كعادتها؛ توضأت وأدت صلاتها بخشوع تام، ثم ارتدت ملابسها الجامعية واتجهت مباشرة بخطوات خفيفة نحو المطبخ لتعد إفطار الصباح لوالديها.

لكنها وقفت مكانها بدهشة حين لم تجد والدتها تقف كالمعتاد عند الموقد. استغربت الأمر كثيراً، فبدأت في تجهيز الشاي وبعض الفطائر بنفسها. وفجأة، فتح باب غرفه النوم وخرجت والدتها وبوجهها علامات الإرهاق والقلق الواضح. تطلعت الأم لنور وتفاجأت بوجودها، فقالت بصوت خافت ومرتبك:

— "يا حبيبتي يا نور.. إنتي صحيتي بدري كده ليه؟"

اقتربت نور نحوها بلهفة وقالت:

— ".. استغربت إنك مش هنا كالعادة، فقلت أبدأ أنا.. بس مالك؟ وشك أصفر وقلقان، في إيه؟ وبابا فين؟"

تنهدت الأم بقلق خفي وقالت بصوت مهتز:

— "باباكي يا نور.. تعب شوية بالليل متأخر، قعد يكح بكحة شديدة وصدره وجعه أوي. فضلت صاحية معاه لحد طلوع الفجر، عملت له مشروب دافئ، واديته الدواء بتاعه لحد ما هدي ونام من ساعة تقريباً."

اتسعت عينا نور من الذعر بلهفة:

— "يا حبيبي يا بابا! طيب هو كويس دلوقتي؟ ليه ما صحيتنيش أقف معاكي؟"

ردت الأم بحنان أموي طاغٍ:

— "كنتِ هتعملي إيه يا بنتي وإنتِ وراكِ امتحان الصبح؟ راضية ذمتك أسهرك معايا وأضيع تركيزك؟ أنا فضلت جنبه لحد ما اطمنت إنه نام، وقمت عشان ألحق أجهز لك فطارك قبل ما تنزلي."

قالت نور بنبرة عتاب محبة وعينيها تلمعان بالدموع:

— "فطار إيه يا ماما في الظروف دي؟! حضرتك سهرانة وتعبانة، وكان المفروض تصحيني.. المهم، هو نايم كويس دلوقتي؟"

— الأم: "الحمد لله يا بنتي.. نايم بس مش هيروح الشغل النهارده طبعاً، محتاج يرتاح."

— نور بإصرار وحزم: "طبعاً أحسن إنه يرتاح.. بس لازم يروح للدكتور عشان نطمن إيه سبب الكحة الشديدة دي، مفيش هزار في تعب بابا."

ابتسمت الأم بحنان واحتضنت ابنتها بقوة وهي تمسح على شعرها:

— "ربنا ما يحرمني منك يا دكتورة قلبي.. إنتِ بقيتي عاقلة وشايلة البيت جوه عيونك."

بادلَتْها نور العناق بحرارة، وتناولتا بعض اللقيمات السريعة معاً لكي تكتسب نور طاقة لامتحانها.

وقبل أن تتوجه نحو باب الشقة، دخلت نور غرفة والدها بهدوء تام، مشت على أطراف أصابعها كي لا توقظه، وقفت بجانب السرير وتأملت وجهه المتعب، ثم انحنت بحنان وطبعت قبلة عميقة ومقدسة على رأسه الطاهر، وهمست بصوت خافت:

— "شفاك الله وعافاك يا حبيبي..."

وصلت نور إلى الكلية والتوتر يملأ قلبها؛ فالامتحان اليوم كان غاية في الصعوبة، والبال منشغل تماماً بتعب والدها في البيت. تنفست بعمق مراراً وتكراراً، وسيطرت على أفكارها بقوة الإرادة، ودخلت اللجنة لتؤدي ما عليها.

وبعد ساعات مضنية، انتهى الوقت وخرجت نور من القاعة تشعر بإرهاق شديد. توجهت نحو حديقة الكلية الهادية، وجلست على مقعد خشبي بعيد، تمسك مذكرتها وتنظر ببصرها نحو الفراغ، وملامح وجهها تحمل إرهاق الأيام الماضية لكنها تبدو هادئة.

في تلك اللحظة، كان آدم ماراً من نفس الطريق، وما إن وقعت عيناه عليها وهي جالسة وحدها بهذا الشكل المتعب، حتى تخلى عن كل خطواته وقصدها بثبات، وفي يده علبة قهوه دافئه اشتراها خصيصاً.

وقف أمامها بهدوء، ومد يده بالعلبة قائلاً بنبرة دافية وخالية من أي غرور:

— "اتفضلي.. واضح إن لجان الامتحانات طلعت القديم والجديد فيكي."

رفعت نور عينيها إليه بندهشة، وتأملت العلبة ثم انتقلت بنظراتها إلى عينيه، وحاولت التمسك بدفاعها المعتاد بصوت هادئ:

— "شكراً يا دكتور آدم.. بس أنا مش محتاجة."

لم يتردد آدم، بل جلس على الكرسي المجاور من غير استئذان، وقال بابتسامة صافية:

— "مش عزومة أكل هي، دي حاجة تروق دمك عشان تعرفي تركزي في اللي جاي.. بطلي كبرياء شوية وخديها."

نظرت إليه نور لبرهة، وغصب عنها ظهرت ابتسامة خفيفة جداً على شفايفها من طريقته التي تغيرت جذرياً. مدت يدها وأخذت العلبة منه وقالت بهدوء:

— "شكراً."

سكت الطرفان دقائق في هدوء دافئ ولطيف، قبل أن يكسر آدم الصمت بفضول حقيقي ونبرة خافتة:

— "قولي لي يا نور.. إنتي مبتفصليش أبداً؟ طول الوقت مذاكرة، رماية، وبيت.. هو إنتي مش بتتأثري بكل الضغط ده؟"

تطلعت أمامها إلى المساحة الخضراء الممتدة وأجابت كمن تفضفض لأول مرة:

— "الحياة مش بتدينا فرصة نفصل يا آدم.. لما تكون عارف إن وراك ناس سندك في الدنيا، وإنك لازم تكون قد المسؤولية، التعب بيبقى تفصيل صغير."

دخلت كلماتها إلى قلب آدم كالسحر؛ شعر بمدى قوة هذه البنت وعمقها مقارنة بحياته السابقة. قال بنبرة امتنان واحترام حقيقي:

— "تعرفي؟ كل ما بتكلم معاكي، بتخليني أعيد حسابات في حاجات كتير قوي كنت شايفها تافهة.. بجد بحترم فيكي الصلابة دي."

نور التفتت إليه بطرف عينها وقالت بمشاكسة لطيفة على غير عادتها:

— "تصدق يا دكتور آدم؟ إنت لما بتتكلم جد بتبقى شخص تاني.. أحسن بكتير من ساعة ما بتنكش."

هنا، لم يملك آدم نفسه إلا أن ضحك بصوت عالي وملء شدقيه.. ضحكة صافية وجميلة نابعة من أعمق نقطة في قلبه. وما إن رأته يضحك هكذا بتلقائية، حتى ضحكت نور معه لأول مرة بصوت عادي، عفوي وجميل.

تسمر آدم مكانه، وبص لها وعيونه تلمع ببريق غريب، وقال بصوت شبه هامس:

— "الله.. أخيرًا ضحكتِ وظهر النور الحقيقي.. لو كنت عارف إن كلمة هتطلع الضحكة دي، كنت قعدت أنكش طول السنة!"

انقلب وجه نور إلى لون وردي خجول من شدة الكسوف، فانتفضت بخفة وبدأت تلملم حاجتها بسرعة وقالت بارتباك:

— "أنا كفاية عليا كده.. ورايا مراجعة طويلة.. بعد إذنك يا دكتور."

نهضت ومشيت بخطوات سريعة وهي تشعر بقلبها ينبض بغرابة شديدة داخل أضلعها، بينما فضل آدم جالساً مكانه، يتابع أثرها بعينين تملؤهما ابتسامة واسعة، وهو يعلم يقيناً أن "العاصفة" الحقيقية لم تكن خارجاً.. بل هي من دخلت قلبه وما تزال ترفض الخروج!

توجهت نور بعد ذلك لمنزلها، وفور دخولها الشقة، وجدت والدها جالساً في الصالون بصحبة والدتها وهما يتناولان الغداء الخفيف. اقتربت بلهفة وطبعت قبلة على جبين أبيها وهي تسأله بقلق:

— "مساء النور يا بابا.. حاسس بايه دلوقتي؟ أحسن شوية؟"

ابتسم الأب بصعوبة وقال بصوت مبحوح:

— "الحمد لله يا حبيبتي.. بقيت أحسن بكتير، متقلقيش."

جلست نور على مقعد قريب، وعبست بملامح حازمة ومحبة:

— "لأ يا بابا، الكحة دي مش عادية، ولازم تروح للدكتور النهارده بالليل عشان نكشف ونعرف إيه السبب."

تدخل الأب باعتراض خفيف:

— "يا بنتي أنا كويس، ده دور برد عابر وهيعدي لوحده، بلا دكاترة بلا تعب."

— نور بإصرار لا يقبل النقاش: "لا يا بابا، معلش، هتروح يعني هتروح.. صحتك مش لعبة عشان نسيبها للصدفة."

ابتسم الأب لصلابتها وحنانها الطاغي، واستسلم لطلبها قائلاً برضا:

— "خلاص يا ستي.. اللي تشوفيه، حاضر."

تناول الجميع وجبة الغداء في أجواء عائلية دافئة ومطمئنة، وبعدها دخلت نور غرفتها، ذاكرت ما تيسر لمادة اليوم التالي، واستعدت للذهاب إلى تمرينها المسائي لتفرغ بعض الضغط العصبي.

على الجانب الآخر، عاد عمر إلى بيته بعد يوم شاق ومتعب؛ لم يستطع تناول الطعام بل استلقى على فراشه ونام بعمق لعدة ساعات ليعوض الإرهاق. وما أن استيقظ، حتى جهز نفسه وسارع بالذهاب إلى النادي لتفريغ طاقته في التمرين.

وهناك، في أروقة النادي الرياضي، التقى صدفة بـ نور بعد انتهاء تمرينها. وقفا معاً لبعض الوقت وتبادلا الحديث الهادئ عن أحوال اليوم والدراسة والبيت.

— عمر بابتسامة واسعة: "غريبة أشوفك في النادي النهارده يا نور بعد يوم امتحان متعب زي ده.. ما استريحتيش في البيت ليه؟"

— نور وهي تلتقط أنفاسها بعد التمرين: "التمرين بيصفي دماغي يا عمر.. بيمسح كل توتر الامتحانات، ولما رجعت لقيت بابا تعبان شوية فقلقِت، فنزلت أطلع الطاقة السلبية هنا."

— عمر بتعاطف واهتمام: "سلامته ، ربنا يطمنكم عليه.. لو احتاجتي أي حاجة، أي دواء أو مشوار، أنا تحت أمرك في أي وقت، انا موجود."

— نور بامتنان صادق: "ربنا يخليك، تسلم يا رب."

افترق الاثنان بعد ذلك، وكل واحد منهما انطلق في طريقه نحو البيت، وقلوبهم تحمل من التعب والسكينة مقادير متساوية.

                  الفصل السادس من هنا


تعليقات



<>