رواية الطلقه التالثه الفصل التاسع9بقلم هند ايهاب الحبال
ابتسمت وقُلت:
- شُكراً جداً ليك يا أُستاذ تميم
ابتسم وهز راسه، مشيت عشان ألحق الشُغل.
يومي مشى عادي جداً في الشُغل، مفيش أي جديد.
روحت البيت ودخلت المطبخ، كانت ماما في المطبخ، قعدت على كُرسي الترابيزه اللي محطوطه في المطبخ.
كُنت بساعدها في أي حاجه، كانت عامله محشي، فى كُنت بحشي معاها.
وفي وقت ما أنا قاعده بساعدها حكيت لها على الموقف اللي حصل معايّ.
- طب والله كتر خيره
- أنا خوفت، لقيت نفسي لواحدي وكأنه جالي من السما
ابتسمت وقالت:
- لو عايزاني أخلي أبوكي يوصلك!!
- لاء طبعاً، أنا بس بحكيلك كان شكلي عامل أزاي وقتها
هزت راسها وكملنا الأكل،
خلصت وعملت كوباية قهوه ودخلت البلكونه.
قعدت على كُرسي وكُنت بشرب من فنجان القهوه.
شويه وبابا جه، وبدأنا نحضر الأكل.
كُنت قاعده بتغدا وسط الهزار والضحك، أكتر وقت بحبه هو وقت اللمه.
ماما كانت محضره كُنافه بالمهلبيه، وما أدراك من كُنافة ماما.
قومت فرغت كوبايات كولا، وحطيت أطباق كُنافه، وطلعت، كان بابا وماما قاعدين بيتفرجوا على فيلم عربي قديم.
أبتسمت لأنه فيلمي المُفضل، السبع بنات.
قعدت وسطيهُم وكُل واحد خد طبقه وبدأ ياكُل.
وبعد شوية وقت ماما دخلت تنام وبابا قال:
- تيجي ننزل نتمشى شويه!!
ابتسمت وقُلت:
- زي زمان!! ألبسي حاجه في رجليك
ضحك وقال:
- قومي يلا
جريت لبست بنطلون وشميز، طلعت وكان هو لبس، نزلنا.
فضلنا نتمشى، كُنت مُفتقده التمشيه دي من زمان.
وكالعاده حكالي حكاوي زمان تخُصه من الي بحبها.
بابا كان جميل وجدع مع الكُل وأي شخص كان يعرف بابا كان يحكي عن جدعنته.
فضلنا نتكلم لحد ما وقفنا عند معصره.
جابلي كاساتا، والأحلى من كدا أن بابا دايماً لما بيجيب حاجه، لازم يجيب لماما.
فضلنا ناكُل وأحنا بنتمشى، وقال:
- يعني أنتِ مش زعلانه!!
هزيت راسي وقُلت:
- ده أكتر وقت مبسوطه فيه، تخيل أن بُعد يوسف عني مفرحني!!
هز راسه وقال:
- ياريتك كُنتي عرفتيني اللي بيحصلك من بدري، وأنا كُنت خدتك من بدري
- يمكن محكيتش، عشان لما يجي الوقت المُناسب لعدم الرجوع ليه لما يجي، يكون هو أتمحى من حياتي للأبد
هز راسه وفضلنا مكملين تمشيه لحد ما روحنا.
دخل عشان ينام وأنا عملت كوباية قهوه وخدت بسكوته معمول وطلعت البلكونه.
كان الجو جميل أوي، جميل بطريقه تخطف القلب.
وفي وسط ما أنا بتفرج على الشارع، شوفت شخص عيونه عليّ.
بستغراب بصيت عليه، ده نفس الشخص اللي دافع عني الصُبح!!
بعدت عيوني عنه بسُرعه ودخلت.
نمت وأنا بفكر ليه!! ليه جه لحد بيتي، هل هي صُدفه!!
نمت من كُتر التفكير.
صحيت من النوم وأنا بجري في الشقه، كُنت متأخره على شُغلي.
نزلت من البيت وأنا بشاور لأول تاكس، ولكن موقفش.
بضيق قُلت:
- هو ده وقته
فضلت عيوني تروح يمين وشمال، مكنش فيه أي عربيه معديه.
لحد ما لقيت عربيه جت وقفت قُدامي.
كان يوسف، عيوني وسعت من العصبيه، وقال:
- تحبي أوصلك!!
مشيت من غير ما أرُد عليه، ولكن جه ورايّ وقال:
- هتروحي مني فين بس، بورسعيد أوضه وصاله، ومسيرك تجيلي
كان بيرمي كلام اي الزفت، لقيت موتوسيكل وقف قُدامي، خلاني وقفت بخضه، كان هو تميم.
فضل يبُص له بضيق وبعدين بص لي وقال:
- في حاجه مضيقاكي!!
يوسف نزل بعصبيه وقال:
- وأنتَ دخلك أيه!!
- أمشي يا تميم، أمشي
تميم نزل من على الموتوسيكل وقرب منه وقال:
- أنتَ مالك بيها
- وأنتَ مالك!!
رفع حاجبه وقال:
- حاجه غريبه أوي، هو فيه حد يسأل حد عن حاجه تخُصه!!
يوسف بصدمه قال:
- تخُصه!!
بص له من فوق لتحت وقال:
- تعالي يلا عشان أوصلك
ركب الموتوسيكل وأنا فضلت عيوني عليه، وقال:
- أركبي
قربت وقُلت بصوت واطي:
- أركب أزاي بس
- أركبي
ركبت وحاولت أكون بعيده عنه، عيوني لمحت يوسف، كان متعصب جداً.
تميم مشى ولكن لفينا وشنا ناحية يوسف، كان بيرزع على العربيه وبيزعق.
