رواية اخر نفس صبر الفصل الثاني والخمسون52 بقلم حنين عادل
كانت قاعدة قدام اوضة العمليات علي الأرض حاضنة نفسها و عينيها متوجهه عليها ودموعها بتنزل وهي بتنطق كلمة واحدة بتلخص كل اللي جواها: يارب ...يارب ..
خرجت الممرضة تجري من اوضة العمليات فـ قامت ميادة بسرعة ولكنها اتنعقلت في طرف عبايتها قبل ما تقف فـ وقعت علي بطنها و
صرخت بألم : ااااه .
حاولت تقوم تقف وهي ماسكة بطنها بألم وبتجز علي سنانها بصت علي الممرضة اللي بتكون بعدت ودخلت طُرقة تانية ..
سندت ضهرها علي الحيطة وشهقاتها بتعلي تدريجياً وماسكة بطنها وقالت وهي بتتألم: يارب ...راغب يارب! ..
جت الممرضة وخطواتها سريعة وفي ايديها كيسين دم فـ قربت منها ميادة بسرعة: هو ...هو حالته كويسة ؟
طمنيني بالله عليكي ..
الممرضة : فقد دم كتير وضغطه واطي جدًا والرصاصة ...
وقبل ما تكمل كلامها طلعت ممرضة تانية من اوضة العمليات تستعجلها فـ جرت بسرعة ليها ..
حطت ميادة ايدها علي بوقها وهي بتكتم صوت عياطها وانهارت : ما تسبنيش يا راغب ...أنا مش عاوزة حاجة من الدنيا غيرك ..
رفعت راسها لـ فوق وهي بتفتكر شكله وهو علي ركبته علي الكورنيش ماسك قلبه وبيعيط وبيقول:
نزلتيه يا ميادة !
نزلتي ابننا !
هان عليكي ابننا يا ميادة !
حطت ايدها علي بطنها وهي بتقول: آنا آسفة ياراغب سامحني بالله عليك أنا عارفة اني وجعتك اوي بس انا كمان اتوجعت اوي ..
حتي لو ما سمحتنيش أنا راضية بس ترجع كويس
حست انها مش قادرة تقف علي رجليها فـ قعدت علي الأرض وهي بتقول :
ليه يا حضرة الظابط ..
ليه تحميني وتاخد الرصاصة عني ..
زاد عياطها اكتر واكتر : ليه حياتك مش غالية عندك واخد الدنيا بصدرك وزي ما تيجي تيجي !..
وايه يعني لما أخد أنا الرصاصة ؟
عارف ...انت لو جرالك حاجة أنا مش هسيبك لوحدك أبدًا تاني..
ابتسمت ودموعها علي وشها: بس انت هتبقي كويس ونرجع لـ بعض تاني صح !.
بص لها العسكري اللي واقف علي باب العمليات بيحرس راغب وهو بيتنهد :
ربنا يقومك بالسلامة يا راغب باشا ..
دخلت مي بخطوات سريعة بطنها كبيرة ومأثرة علي حركاتها بتنهج وأحمد ماسك ايدها :
ميادة ...
رفعت ميادة عينيها وبصت لها وقامت حضنتها بدون اي كلام وهي بتعيط : راغب يا مي ...راغب !
مي بحزن: هيقوم بالسلامة بإذن الله خلي أملك في ربنا كبير يا ميادة ..
اتنهد أحمد وهو بيبُص علي اوضة العمليات : بإذن الله خير ...ربنا يقومه بالسلامة .
*ــــــــــــــــــــــــــــــــــــــــ*
ياولاد ..
بت يا ميادة !
يا مي ؟
صرخت كوثر بصوت عالي: يا ولاد ..اه يا قلة حيلتي ياني!
كانت قاعدة في اوضتها علي السرير شكلها متبهدل وعيونها مليانة دموع ...
اتكلمت وهي كاتمة دموعها : عاوزة ادخل الحمام مش قادرة هعملها علي روحي يا بشر!
وماكلتش لقمة من امبارح العشا !
ايديها اترعشت وهي بتحاول تتحكم في نفسها وبتجز علي سنانها ولكن ما قدرتش وثواني وحست بـ ماية سخنة تحتها ..
حطت ايديها عليها ودموعها بتنزل بقهر علي نفسها : يارب ...والله تعبت ...
في نفس الوقت دخل محمود ومعاه وعد اللي استغربت من شكلها المتبهدل .
ملامح وشها اتغيرت للخوف والخجل وحطت وشها في الأرض وهي بتداري بقعة المياه الكبيرة اللي علي السرير بالغطا..
حطت وعد ايدها علي مناخيرها وهي بتبُص لها بقرف: ايه الريحة دي يا طنط ؟
حاولت تبتسم ودموعها بتنزل علي وشها مسحتها بسرعة وايديها بتترعش وقالت بصوت متقطع: يـ ..
يـمكن ...يمكن الرطوبة ...اصل ...اصل الأوضة عاوزة تتهوي..
بص لها محمود بصات مش مفهومة وبعدين مسك ايدين وعد وهو بيقول: يلا يا وعد تبقي تيجي تزوريها مرة تانية !
وعد ببرود: اه أنا بقول كده برده !
عن اذنكم .
مشت وعد فـ بص محمود لـكوثر بغضب:
ايه دي ياما ...انتِ عملتيها علي روحك !
كوثر بدموع: اصل مالقتش حد يساعدني اروح الحمام ومن الصبح مادخلش جوفي الزاد ولا الميه والله يابني !
شوف لي اخواتك فين ...
اتنهد محمود وهو بيطلع تليفونه وقال: ايوه يامي أنتم فين أنتِ واختك ...
ملامحه اتغيرت للصدمة : ايه؟
طيب انا جاي حالاً
بصت له باستغراب: في ايه يا محمود اخواتك فين ؟
محمود : مي مع ميادة في المستشفي اصل حضرة الظابط أخد رصاصة وحالته خطيرة ..
أنا رايح لهم ..
اتكلمت كوثر بسرعة: طب وانا يابني هتسيبني كده ؟
محمود بقرف: وانا ياما هعرف اعملك ايه انا ماليش في شغل الحريم ده ..
أنا هروح وابعتلك حد منهم !
مشي وسابها قبل ما يسمع اي رد منها .
بصت علي السرير المبلول تحتها وعلي هدومها :
وصل بيا الحال للدرجة دي ؟
ابني يستعر مني قدام خطيبته ويقرف مني !
صوت عياطها زاد : ده أنا أمه اللي ياما سهرت و شيلت وغيرت وعمري ما قرفت منه
هو الانسان تقيل اوي كده ..
وحياة حبيبك النبي يارب أنا استويت واتهديت
أنا كان عندي صحة تهد جبال وفلوس بالكوم وعيلة بتحسد عليها وابن يتمنالي الرضا ارضي ...زي اسمه ...
كل ده راح ...في غمضة عين راحت الفلوس والعيلة اتشتت والصحة وابني!
*ـــــــــــــــــــــــــــــــــــــ*
وفي السجن ...
رضا كان قاعد وشه اللي كان مدور ومليان بقا طويل وجلد علي عضم ...
لونه اصفر وعيونه الصفار طاغي علي اللون الأبيض فيها..
بيهرش في كل جسمه بطريقة غريبة ...
العسكري فتح باب الزنزانة وزق راجل وقفل الباب فـ جري عليه رضا ونام علي جزمته يبوسها وهو بيقول : شدة واحدة بس يا معلم شدة واحدة بس وحياة عيالك..
الصداع هيموتني ...
ضحك وهو بيقول : كان علي عيني يا نور عيني انت عارف الشدة دي بتكلفني كام جُندي .
هرش في دماغه ....وفي رقبته وهو بيصب عرق وظاهر عليه أعراض الانسحاب ..
نام علي الأرض وهو بيتلوي: تعبان يا معلم هموووت!
جسمي بيتقطع سكاكين بتقطع في جسمي..
ضحك ببرود : ماتموت يا أخي يعني العالم هيخسر عالم ذرة !
ههههه
*ـــــــــــــــــــــــــــــــــــــــــ*
وفي شقة بسيطة بيقف عبد الحميد بخضة والخوف والقلق واضح علي وشه بعد ما سمع حد بيخبط علي الباب ..
وبيجري ولد وبنت صغيرين علي اوضتهم وبيسيبوا كتبهم علي الأرض وهما مرعوبين ...
بتمشي أخته زينات بخطوات سريعة وهي بتقرط طرحتها علي دماغها وهي بتقول: مين ...
بيرد اللي ورا الباب: محصل النور يا حاجة ...
اتنهدت براحة : طيب ياخويا حاضر ....
اتنفس عبد الحميد براحة وقرب من الشباك الكبير المفتوح اللي داخل منه ضوء شمس بسيط وبص علي الشارع الفاضي اللي العربيات راكنة علي كل جنب فيه بشرود:
وبعدين أنا هفضل هربان كده كتير ايه الورطة السودة اللي انا حطيت نفسي فيها دي يارب ..
كان لازم اعمل فيها فلحوس واناسب بلطجية
لا وكمان اكتب علي نفسي ربع مليون !
ده أنا لو بعت نفسي مش هجيب المبلغ ده !
منك لله يا فاتن أنتِ وأهلك .
رجع بسرعة لورا وهو شايف اتنين رجالة جسمهم ضخم داخلين مدخل البيت ...
قفلت زينات الباب فـ طلع يجري وطلع علي ضهر الدولاب واستخبي ورا البطاطين بسرعة وهو دقات قلبه عالية ..
و كتم صوت نفسه العالي من الخوف .
بصت عليه بغضب مكتوم وفي نفس الوقت بتسمع خبط جامد علي الباب لدرجة أنه هيتكسر ...
قربت منه وعلي وشها الخوف وفتحته وهي بتبتسم ابتسامة مزيفة:
ا.ايوه ..
بص لها واحد منهم وقال بحدة : عبد الحميد فين يا ولية
زينات بخوف: أعدمك يا خويا لو اعرف مكانه !
مسكها التاني من طرحتها بقوة لدرجة أن شعرها هيطلع من مكانه : احنا متأكدين أنه هنا
الدموع ملت عينيها وقالت وهي بتتألم: وانا هكدب ليه يا خويا هو انا عاوزة اتهزق كده علي كبر !
فتشوا البيت لو مش مصدقين ...
رفع الأول صباعه في وشها بتحذير: لو طلعتي مخبياه هنوريكي ايام سودة .
اتكلم التاني اللي بيكون لسه ماسكها : لو جه أو عرفتي عنه أي أخبار وما عرفتيناش مش هقولك هيجرالك ايه أنتِ والصغننين ولادك
هسيبهالك مفاجأة...
ردت بخوف : ولادي !
ابتسم بشر : ايوه ولادك ..
مش جايين لك علي كبر بعد شوقة !
خلي بالك منهم بقا ...
زقها بقوة فـ وقعت علي الأرض ومشوا وسابوها ورزعوا الباب وراهم
استربعت ومسكت وشها وهي بتعيط بانهيار. ..
نزل عبد الحميد من علي الدولاب وهو بينفض عن نفسه التراب واتسحب بخطوات بطيئة لحد ما اتأكد أنهم مشوا ...
جري علي زينات وطبطب عليها : أنا آسف حقك عليا والله بس.....
قاطعته بغضب ودموعها علي خدها :
أنا تعبت يا عبده....أنا المفروض في السن ده اتعكز عليك ...دول هددوني بولادي اللي جايين بعد 40 سنة كنت قولت خلاص ما ليش نصيب في الخلفة وربنا رزقني بيهم ...
وانت عارف ...أنا اللي ربيتهم لوحدي بعد حادثة ابوهم الله يرحمه وهما عندهم سنتين ...
ذنبهم ايه عيال في رابعة ابتدائى يعيشوا في الخوف والقلق ده كله ...
عبد الحميد بتنهيدة: أنا آسف بس ...
زينات بحدة : أسف دي اعمل بيها ايه ولا اصرفها فين ..أنا بقيت بنام بحلم بحد بيكسر عليا باب الشقة
العيال بيعملوها علي روحهم من الخوف ...
وقفت وهي بتمسح دموعها: أنا بقولهالك ويعلم ربنا قلبي بيتقطع عليك ازاي ...بس مابقاش ينفع تقعد عندي هنا يا عبده ....
ابتسم بحزن وهو بيهز رأسه بالموافقة: عندك حق ...حقك عليا أنا همشي حالاً...
مشي خطوات فـ مسكت ايده بسرعة: استني أما تتغدي...
ابتسم : شبعان يا حبيبتي...شبعان..
فتح الباب فـ قالت بسرعة والدموع بتنزل علي وشها: خلي بالك من نفسك يا عبده لا اله الا الله
هز رأسه بابتسامة : محمد رسول الله .
قفل الباب وراه فـ قعدت علي الكرسي تعيط بصوت مسموع: دول ولادي يا عبده ...سامحني ...
خرج العيال من الأوضة جروا عليها وهما بيعيطوا و بيطبطوا عليها من كل جنب ...
حضنتهم الاتنين وهي بتمسح دموعها : ما تخافوش يا حبايبي أنا كويسة والناس الوحشة دي ماعدتش هتيجي تخبط علينا تاني ..
*ــــــــــــــــــــــــــــــــــــــــــ*
وفي اوضة ليالي...
بيكون مفرش السرير متغرق دّm..وفي جــُ.ـثــ.ـة متغطية بملاية بيضا ...
وقف الظابط يبُص للموجودين :
هي ليها عداوات مع حد ؟
مين اللي عمل فيها كده!
زبون من زباينكم ولا حد سكران .
اتكلمت واحدة من الواقفين : الزباين كلها كانت روحت ودخلنا ننام يا باشا وكانت زي الفل .
بصت ليالي علي البنت اللي علي السرير وقالت بخوف: لا يا باشا ماكنتش هي المقصودة ...
أنا المقصودة ..
دي اوضتي أنا مش اوضتها ...
الظابط باهتمام : وأنتِ كنتي فين وقت وقوع الحادث ؟
ليالي بصوت مرتعش : كنـ كنت في اوضتها ....هي كانت علطول بتقول لي الأوضة دي شرحة وهواها بحري ومُرزقة ...
عشان اكتر الزباين بيجوا كلهم عليا ...اصل انا هنا البريمو.
قعدت تزن عليا امبارح نبدل الأوض حتي يومين تلاتة وانا وافقت ...
وعشان طبيعة شغلنا بنصحي متأخر ...جينا نصحيها عشان نفطر سوا زي عادتنا .....
انهارت في العياط : لقيناها سايحة في دمها ...
الظابط : طيب وليه تكوني أنتِ المقصودة ؟
ليالي بدموع : عشان ...عشان ساعدت راغب باشا يوقع اللواء ممدوح الجندي وانا اللي جبت له الأوراق والمستندات من فيلته
أنا ساعدت الحكومة يا باشا المفروض تحموني
أنا عاوزة راغب باشا ..
عاوزة أقابله ...
رد الظابط : راغب باشا أخد رصاصة ووضعه الله اعلم بيه ...
بصت له ليالي بصدمة وغالب عليها الخوف : ايه !
*ــــــــــــــــــــــــــــــــــــــــ*
وفي المستشفى ...
كانت ميادة قاعدة علي الأرض عينيها علي باب أوضة العمليات ...
ومي جنبها وأحمد راكن برجله علي الحيطة وواقف بعيد عنهم شوية ...
خرج الدكتور من أوضة العمليات فـ قامت ميادة بسرعة وقربت منه وقالت بـ قلق:
طمني يا دكتور راغب عامل إيه؟!
الدكتور : الرصاصة كانت بعيد عن القلب سنتيمترات بس الإصابة خطيرة قدرنا نوقف النزيف لكن حالته لسه حرجة ..
مي بقلق لما شافت تغير لون وش ميادة :يعني إيه يا دكتور؟
الدكتور: إحنا عملنا اللي علينا لكن للأسف حصلت مضاعفات أثناء العملية وحاليًا المريض دخل في غيبوبة!
ميادة بصدمة وهي بتحرك راسها بالنفي: غيبوبة؟! يعني إيه غيبوبة يا دكتور؟
دموعها نزلت وقالت وشفايفها بتترعش : غـ غيبوبة ايه ....
الدكتور بهدوء: اهدَي يا مدام هو محتاج متابعة دقيقة وهننقله دلوقتي للعناية المركزة والـ48 ساعة الجايين مهمين جدًا في استقرار حالته.
ميادة بدموع : طب عاوزة اشوفه والنبي حتي لو دقيقة
الدكتور: أول ما يستقر في العناية هنشوف ينفع تشوفيه ولا لأ لكن دلوقتي لازم نتابع حالته كويس.
مشي الدكتور وفضلت ميادة واقفة مكانها مش قادرة تستوعب كلامه لحد ما رجليها خانتها وسندت راسها على كتف مي وهي بتعيط
مي بحزن: اهدي يا ميادة عشان خاطري وادعي ربنا .
أحمد وهو بيحاول يطمنها: ادعيله يا ميادة ربنا قادر يردهولك بالسلامة
دخل محمود عليهم وهو بيقول :
العساكر اللي علي أول الطرقة ما كانوش راضيين يدخلوني بقالهم ساعة بيستجبوني وفين وفين لما سابوني ..
رد أحمد: ما هما عملوا معانا كده ..
رفعت ميادة راسها من علي كتف مي ..
بص لـ وشهم بقلق: ايه طمنوني عليه حالته كويسة !
مي بتنهيدة: ربنا يقومه بالسلامة ويشفيه
ميل محمود علي مي وقال بصوت واطي:
أنا اخدت وعد وروحت لأمك وحالتها بالبلا
عاملة علي روحها ولحد دلوقتي مافطرتش
بصت له مي بصدمة: طب وعملت لها حاجة ...
هز رأسه بالنفي: لأ ...هو انا هعرف اعمل لها حاجة !
مي عيونها اتملت دموع: اخص عليك يا محمود طب كنت اكلها حتي حرام عليك يا شيخ ده احنا دلوقتي العشا
بص محمود ليها وسكت فـ بصت مي لـ ميادة وهي بتقول : أنا هروح لأمك يا ميادة عشان لوحدها من الصبح
هزت ميادة راسها بتوهان...مشت مي وأحمد معاها ...ووراهم محمود ...
*ــــــــــــــــــــــــــــــــــــــ*
بيكون محمود قاعد علي القهوة وهو بينفخ بـ ضيق ...
بيتكلم صاحبه : مالك يا صاحبي شايل طاجن ستك ليه بس ..
محمود : الدنيا ملخبطة معانا اوي مش عارف ليه كده..
أختي جوزها مضروب بالرصاص
وامي حالها لا يسر عدو ولا حبيب .
وانا ...كل شوية تظهر لي ظروف أأجل فيها كتب كتابي ...
بس بفكر مع نفسي كده ...
مين اللي هيشيل امي بعد جوازي
أنا اللي هشيل الهم ده ...
مي علي آخرها حاجة بسيطة وتولد
وميادة من شكلها هترجع لجوزها لو قام بالسلامة منها يعني ..
يبقي ماعدش فاضل غيري انا ومراتي أما اتجوز !
يعني عاوز أبدأ حياتي واعيش لي يومين دلع
هبدأها بالهم والقرف!
بص له صاحبه وكأن لمعت في دماغه فكرة وقال:
طيب انا عندي الحل !
بص له محمود وقال بسرعة: قول بسرعة الله لا يسيئك!
*ــــــــــــــــــــــــــــــــــــــــــ*
دخلت مي علي كوثر بخطوات سريعة ...
كانت نايمة علي جنبها بتعيط وعيونها حمرا من كتر العياط ...
حضنتها مي بسرعة : والنبي ما تزعلي مني انا اتكلت علي ميادة واديكي عرفتي اللي حصل ..
كوثر ماردتش كانت بتعيط بحرقة..
عيطت مي : والله الدنيا ماتسوي دمعة من عينك يا حبيبتي ....
طلعت لها سندوتشات جاهزة وهي بتقول:
جبتلك الشاورما اللي بتحبيها اهي..
كُلي يا حبيبتي عما أجهز لك الحمام ...
كوثر : أنا مش جعانة .
هزت مي راسها: لا كده هزعل منك هاتردي ايدي...يلا ياما بقا ...
باست مي ايدها وحطت فيها الساندوتش ...
ابتسمت كوثر ودموعها علي خدها ورفعت ايدها وقعدت تاكل فيها وهي بتبُص علي مي بتطلع هدومها النضيفة من الدولاب ...
ورايحة تشغل السخان ....
كوثر في نفسها : جبت الولاد وكنت مبسوطة وقولت اهو ضهري بيهم اتسند ...
ضهري بيهم اتعوج....والبنات اللي قولت مسيرهم لبيت اجوزهم هما اللي شالوني....
ويقولوا يا مخلفة البنات يا شايلة الهم للممات ؟
المفروض يا اللي مش شايلة هم للممات .
*ــــــــــــــــــــــــــــــــــــ*
بص له محمود بصدمة : انت بتقول ايه يا عم انت
دار مُسنين ايه أنت عاوز الناس تاكل وشي !
*يابني ناس مين وخرا ايه ...هنا الناس هيجوا يشتالوا معاك شيلتك ...ولا هيقطعوا عنك رزقك
سيب اللي يتكلم يتكلم طز فيهم المهم راحتك
أنت عارف اني وحيد امي
واما أمي كبرت وخرفت وماعدتش قادر علي خدمتها وديتها وبعدين خطيبتي كانت شاطرة عليا أنها مش جاية خدامة وعندها حق طب هخدمها أنا ؟
لا طبعًا احنا رجالة ماينفعش امنا تتكشف علينا!
نقي بس دار كويسة !
سكت محمود شوية وكأنه بيفكر في كلامه وبعدين هز رأسه بالرفض: لا ياعم لا ...دي أمي ارميها في دار مسنين ايه ...
كان صاحبه هيتكلم فقاطعه بحدة:
اقفل علي السيرة دي بقا عشان مانزعلش من بعض
*خلاص ياعم أنا نصحتك وانت براحتك!
*ــــــــــــــــــــــــــــــــــــــــــ*
وقفت رُقية قدام محل دهب بتبُص علي البترينة بإعجاب..
لاحظ مروان إعجابها بيهم فـ شاور لواحد من اللي شغالين في المحل: تعالي أنا عاوز كل اللي في البترينة ده ..
بصت له رُقية وقالت بسرعة : اييييييه حيلك حيلك ...أنا هعمل بده كله ايه ...
ضحك وهو بيقول : عشان تشخللي بيهم وأنتِ بتقطعي لي البطة وتديني فص في بوقي وتقولي خد دي كمان يا سي مروان !
وانا اقولك مش قادر ...
تقولي بدلع : طب اخر لقمة !
ضحكت وهي بتقول : أنت مش طبيعي والله ..
بص اللي انا هنقيه هاخده ...تمام
مروان : اوك مدام ! بس ده ما يمنعش اني انقي أنا كمان ..صح
ضحكت رُقية : صح !
دخلت المحل وقعدت تتفرج وهي محتارة من جمالهم
ابتسم مروان : بصي بما انك محتارة سيبي لي الطلعة دي ..
هزت راسها بالموافقة بابتسامة ...
شاور علي طقم سلسلة وحلق وخاتم لازوردي علي شكل عصفور متزين بفصوص خضرا وفضي ..
وشاور علي اسورة زي التعبان معاها خاتم ...
هرش مروان وهو بيبُص لها : كده ناقص ايه ؟
وقبل ما ترد قال : اه ...عاوزين دبلة ومحبس
ميل مروان علي رُقية وقال بصوت واطي: أنا مش عارف ايه المحبس ده بس بسمعها علطول ايه هو بقا؟
ردت عليه رُقية بصوت واطي: ده بيحبس الدبلة ...
قاطعها بضحك: ليه عاملة جريمة ههههه
ضحكت رُقية: بس بقا يا مروان وبعدين المحبس بقا موضة قديمة أنا عاوزة توينز ..
مروان بابتسامة : أوامر ...
بص للراجل وقال بتلقائية: هات لها اتنين توأم لو سمحت.
*ــــــــــــــــــــــــــــــــــــــــــ*
وقفت ميادة قدام ازاز العناية المركزة وهي شايفة راغب علي الأجهزة وعيونها مليانة دموع
حطت كفها علي الازاز وكأنها بتحاول تمسكه وقالت : قوم بقا يا راغب ...قوم يا حبيبي
ميادة خايفة ومرعوبة اوي من غيرك ...
كلهم مشيوا وسابوني معذورين كل واحد ليه حياته ....وأنتَ حياتي .
اتخضت لما حست بايد بتخبط علي كتفها ولفت تبُص عليه بخوف
*مدام ميادة؟
ردت بقلق: أيوه مين حضرتك ؟
*أنا النقيب حسام من المباحث محتاج أسألك كام سؤال بخصوص حادث إطلاق النار اللي حصل.
هزت راسها بالموافقة: اتفضل
الظابط: احكيلي من البداية كنتوا فين وقت الحادث؟
ميادة بتنهيدة : كان عندي في بيت أهلي وخرجنا سوا وروحنا علي الكورنيش وقفنا ثواني وفجأة سمعنا صوت فرملة عربية و لقيته بيشدني وراه
دموعها نزلت وهي بتكمل: وضربوه بالنار .
الظابط: شوفتي الشخص اللي ضرب النار؟
هزت رأسها بالنفي: لا كل حاجة حصلت بسرعة أنا حتى ما لحقتش أفهم إيه اللي حصل غير لما شوفته ...
غرقان في دمه.
الظابط: كان فيه حد واقف قريب منكم؟
أي حاجة لفتت نظرك؟
هزت ميادة راسها : لأ مكنتش مركزة ...
الظابط: طيب هل راغب كان حاسس إن حياته مهددة الفترة الأخيرة؟
أو قالك إن فيه حد بيراقبه؟
بصت له ميادة بحزن: راغب كان داخل في قضية كبيرة بس هو ماكنش معرفني وكان بيبعدني عنه عشان يحميني
الظابط: تقصدي قضية اللواء ممدوح الجندي؟
هزت راسها: أيوه هي دي.
الظابط: اسمعيني يا مدام ميادة لحد ما نعرف مين ورا الحادث لازم تاخدي بالك من نفسك ومتتحركيش لوحدك الفترة دي
ميادة بخوف: مش مهم أنا المهم هو يعني ممكن يكونوا لسه عاوزين يئذوه؟
بص لها لـ لحظات قبل ما يرد:
بصي إحنا مش هنستبعد أي احتمال
بصت ميادة ناحية باب العناية ودموعها اتجمعت في عينيها.
الظابط: إن شاء الله يقوم بالسلامة ما تقلقيش الحراسة مشددة عليه ...خلي بالك من نفسك
هزت راسها بشرود ..
مشي الظابط ...
دموعها نزلت :محاولة قتل وحراسة
وشغل عصابات !
ايه ده كله !
قربت منها واحدة من الممرضين ومدت ايديها بساندوتش ليها : أنا شايفاكي من ساعة ماجيتي من الصبح ماكلتيش حاجة ...
ميادة : شكرًا يا حبيبتي ماليش نفس ..
ابتسمت الممرضة: لازم تأكلي عشان تقدري تقفي علي رجليكي وتفضلي جنبه ...
مسكته ميادة ....ومشت الممرضة ...
حست بمغص في بطنها فمسكت بطنها بألم وهي بتقول : أنا ماكلتش من الصبح لازم أكل!..
رفعت الساندوتش تأكله وهي مالهاش نفس وشاردة..
*ـــــــــــــــــــــــــــــــــــ*
دخل سعيد علي أمه فـ بصت له بغضب:
واد يا سعيد انت واقف مع الواد الجاحد ده ليه
ده ودي ستهم حبيبتي وعشرة عمري دار المسنين
قعد سعيد وهو بيقلع الجزمة : وانا مالي بـ اللي عمله أو هيعمله اللي بيحاسب العباد ربنا وبعدين هو كان بيسألني عن حاجة في الشغل...
عيونها اتملت دموع : اوعي يا سعيد.
قلبك في يوم يقسي عليا وترميني بره بيتي وتبهدلني في اخر أيامي
قرب منها وهو بيقول : انتِ بتقولي ايه ياما ...ده أنت روحي حد يعرف يعيش من غير روحه
ده ان ما شلتكيش الأرض اشيلك فوق راسي
ده أنا ماشي ببركة دعاكي ورضاكي عني
باس ايدها فـ طبطبت علي رأسه : راضية عنك يا بني ربنا يغنيك لما يرضيك ويحنن عليك خلقه
ويوقف في طريقك ولاد الحلال ويبعد عنك ولاد الحرام ويكفيك شر الحاكم الظالم..
*ــــــــــــــــــــــــــــــــــــــــ*
وفي زنزانة ممدوح الجندي ..
بتكون عتمة عدا شعاع ضوء من القمر داخل من شباك صُغير في السجن ...
رزع التليفون في الأرض بغضب :
يعني ما ماتش .....ليه بنتي تموت وهو يفضل عايش ....ليه
ملامحه اتغيرت للحزن : ياتري يا سُهي يوم ما رجعتي متأخر وحضنتيني وعيطتي ايه اللي جرالك يومها ...
اتحولت ملامحه للشر: أنا هقضي علي اي حد زعلك في يوم او آذاكي ...
ابوكي هيجيب لك حقك ..
وبزيادة .
*ـــــــــــــــــــــــــــــــــــــــــ*
وفي فيلا مروان ..
كانت رُقية بتوري الدهب لـ سلوي بفرحة...
سلوي بابتسامة : تحفة تتهني بيه يا حبيبتي
مروان بفخر: زوقي ..
سلوي : ما انت طلعت عندك ذوق حلو اهو يا ولا!
طلع من جيبه علبه وهو مبتسم :
عشان أنا ولد صالح وبار بأمه
وعشان أنا مش عاق
وعشان عارف انك بتحبي البساطة
وعشان
ردت بنفاذ صبر:
وعشان لازم نكون مع بعض عشان شايلانا نفس الأرض ....
ما تخلص يا روح أمك !
مروان : احم....عنيفة اوي يا ماما...
كمل بنبرة موسيقية:
عشان بكره اللي مستني ومش عاوز
سكت لما لقاها بتزغر له وفتح العلبة: احم .. جبت لك مصحف دهب عيار 24 ..
فرحت سلوي وهي بتقول: يا حبيبي يا مروان قلب أمه ...ده ..
ضحك مروان وهو بيقول لـ رُقية : ايوه انا قلب أمي ...
سلوي بضحك: ابني
مروان بيضحك: أمي
ضحكت رُقية عليهم : ربنا يخليكم لـ بعض
مروان بحب: ويخليكي ليا !
*ـــــــــــــــــــــــــــــــــــــــــــ*
كانت قاعدة حاضنة نفسها من البرد عينيها موجهة علي الازاز :
الدنيا برد من غيرك يا حضرة الظابط .
صوت الأجهزة بتصفر...بتقف بسرعة وهي مخضوضة الدكاترة بتيجي تجري ووراهم الممرضين وبيدخلوا اوضة العناية وهي بتبُص عليهم برعب وعلي راغب اللي باين بإضاءة بسيطة من الازاز و........