رواية غيرة السلايف الفصل الثالث3 بقلم صباح عبد الله فتحي
في شقة هادي.. هادي قاعد على السرير.. تدخل رحمة وتبص له باستغراب.
رحمة:
هادي، إنت ما لبستش اللبس اللي حطيتهولك في الحمام ليه؟
هادي يفضل قاعد ما يردش.
رحمة بغيظ:
هادي، أنا بكلمك، رد.
هادي يقوم:
أنا هنزل أشوف الجماعة تحت.
هادي يتحرك علشان يطلع، رحمة تقف قدامه.
رحمة باستغراب:
هادي، هو حصل إيه لكل ده…؟
هادي:
طالما حضرتك شايفة إنه ما حصلش حاجة، يبقى ما حصلش حاجة، ويلا غوري من وشي دلوقتي.
رحمة تبص له بدموع:
هادي، بجد كلامك بيزعلني، ثم أنا عملت إيه لكل ده.. كل ده عشان نزلت لأمك؟
هادي يمسح وشه بإيديه وهو بيقول:
هادي:
رحمة، معلش، أنا مخنوق أوي دلوقتي، مش عارف مالي. هنزل تحت شوية وهِجي، ماشي؟ مش هتأخر عليكي، نص ساعة بس أشم شوية هوى وأجيلك.
هادي يسيبها ويطلع، ورحمة تمسح دموعها وتروح وتقعد على السرير بزعل.
—-----------
على بسط السلم
هادي خارج من شقته… في نفس الوقت قمر خارجة من شقتها بلبس جريء… هادي يبص لها بصدمة.
هادي:
إنتِ إيه اللي مطلعك بالشكل ده؟
قمر بكسوف:
ماله شكلي ما قمر اهو ثم أنا لسه عروسة وكده…وعاوزة افرح بنفسي شويه.
هادي بحنق:
عروسة في شقتك قدام جوزك، مش قدام أمة لا إله إلا الله.
قمر:
أنا جوزي شافني وأنا خارجة، ما عملش اللي بتعمله ده. إنت إيه بقى اللي مزعلك؟ مش فاهمة. ولا يكون الفستان مش عجبك؟
هادي بقرف:
غوري من وشي، يا دي القرف فيكي وفي النعجة المربوطة جوه…
هادي يسيبها وينزل… قمر تبص ناحيته بغيظ وهي بتكلم نفسها:
قمر:
أووووف، أعمل إيه أكتر من كده علشان ألفت نظره؟ ده شكله أبرد من الغبي اللي جوه ده.
على باب شقة هادي، رحمة واقفة حاطة إيديها على جنبها وبتبص لقمر بغيظ.
رحمة:
معلش بقى يا عروسة، تستاهلي الكلمتين اللي سمعتيهم. أصلًا اللي معانا رجالة مش خرفان. وابقي لفي نفسك واستري لحمك قبل ما تطلعي، ولا هو لحم رخيصة مش لاقي اللي يشتري؟
قمر تبص لها بغيظ، وقبل ما تقول حاجة، رحمة تدخل شقتها وتقفل الباب وهي بتقول:
رحمة:
أستغفر الله العظيم وأتوب إليه، أنا ما كنتش ناقصة حرق الدم دي على الصبح. حقيقي اللي اختشوا ماتوا.
قمر تكلم نفسها بغيظ:
طيب يا وش الغبرة، اصبري عليا بس، لما العمل يشتغل وشوف هعمل فيكي إيه.
قمر تتحرك علشان تنزل السلم..
—---------
في الدور الأرضي
هادي يدخل وباين عليه الزهق… زينب تطلع من المطبخ وهي ماسكة فوطة، تبص لهادي باستغراب.
زينب:
بسم الله الرحمن الرحيم، مالك يا هادي؟ سايب عروستك ونازل تعمل إيه؟
هادي بزهق:
مخنوق أوي يا أمي، مش عارف ليه. المهم الحج فين؟
زينب بقلق:
بسم الله الرحمن الرحيم، مخنوق من إيه يا روح أمك؟ أكيد عين وصبتك يا ضنايا. قول أعوذ برب الفلق ومن شر ما خلق.. اقعد يا ابني أرقيك.
هادي بزهق:
ونبي يا أمي أنا مخنوق لوحدي، مش ناقص هبل.
خلف هادي واقفة قمر بتبتسم بخبث وهي بتقول بتفكير:
قمر:
أكيد العمل بدأ يشتغل.. يا رب هادي يحبني بقى..
قمر تقرب وهي بتقول بكسوف ودلع:
قمر:
صباح الخير يا ماما..
زينب تبص لقمر بصدمة وهي بتقول:
زينب:
يا مصيبتي، إنتِ إيه اللي منزلك كده انتي كمان؟
هادي يبص ناحية قمر فجأة يشوفها قرد. يرجع لوري بفزع وهو بيقول بخوف.
هادي
بسم الله الرحمن الرحيم انتم جيبين قرد في البيت ولا اي.
زينب وقمر يبصوا له باستغراب وزينب تقول.
زينب
انت بتقول ايه يا هادي واي اللي يجيب قرد في البيت دي قمر مرات اخوك.
هادي يفرك في عينيه، وكل ما يبص لقمر بيشوفها قرد. وقمر تبص له باستغراب.
هادي باستغراب:
هو أنا اتهبلت ولا إيه؟
زينب بقلق:
خير، مالك يا هادي يا ابني؟ إنت كويس يا حبيبي؟
هادي:
مش عارف، شكلي تعبان. هطلع أرتاح شوية.
زينب بقلق:
أنا بقول عين وصبتك يا ابني، تعالي أرقيك يا حبيبي.
هادي بزهق:
ترقي وعين إيه بس يا أمي؟ وبالله عليكي تسكتي..انا مش ناقص
قمر بدلع:
تحب أعملك حاجة تشربها؟
هادي يبص ناحيتها بخوف وهو شايفها قرد:
هادي:
لا، ونبي خليكي إنتِ على جنب دلوقتي.
هادي يسيبهم ويطلع، قمر تبص ناحيته باستغراب، وزينب تبص لها بغيظ.
زينب:
بت، إنتِ مش مكسوفة من نفسك وإنتِ واقفة قدام سلفك بالمنظر ده؟
قمر بحنق:
ماله منظري بس يا ماما؟ مش فاهمة. ثم أنا لسه عروسة، لو ما فرحتش دلوقتي هفرح إمتى؟
زينب ترفع إيديها وتدعي:
ربنا يكملك بعقلك يا رحمة يا بنتي..(تبص لقمر) وهي رحمة مش عروسة زيك، اللي الله أكبر عليها نزلت حتى مش حاطة الكحل ولا شعرها مبيّن.
قمر تبص لها بغيظ وبعدين تقول بغرور:
قمر:
وأنا مالي ومال الناس؟ كل واحد حر. وأنا عاوزة أفرح بالنعمة اللي ربنا مدهالي وما اداهاش لغيري. على العموم، أنا كنت نازلة أطمن عليكي واطمنت. أنا هطلع بقى علشان سيبه زيزو حبيبي لوحده.
قمر تسيبها وتمشي… زينب تنفخ بزهق وهي بتقول:
زينب:
أستغفرالله العظيم وأتوب إليه، بت تحرق الدم.
—----------
في شقة رحمة
رحمة قاعدة بتتكلم في التليفون بغضب.
رحمة:
الله ياخدك إنتِ وتعملي شكل اللي عملتيه. اتقلب عليا، قولتلك عاوزة جوزها يشوفها قردة، وشكل جوزي أنا اللي شايفني قردة من صبحت ربنا مش طايقني.
تسكت شوية وبعدين تقول:
رحمة:
يعني إيه مش فاهمة؟ والله شكلك هتخربي، يا بتي.
تسمع صوت الباب بيتفتح، تقفل وتقول بسرعة قبل ما تقفل التليفون:
رحمة:
طيب طيب، اقفلي إنتِ دلوقتي، شكل هادي دخل.
تقفل التليفون وتعمل نفسها نايمة… هادي يدخل الأوضة… يبص لها وهو بينفخ بزهق ويقرب منها وهو بيقول:
هادي:
رحمة… رحمة… رحمة، قومي اعملي ليا حاجة أطفحها..
رحمة تقوم وهي بتمثل إنها نعسانة:
رحمة:
مالك يا هادي بتتكلم كده ليه؟ من الصبح وإنت مش على بعضك.
هادي يقعد جنبها وهو بيقول باستغراب:
هادي:
مش عارف مالي، مخنوق من ساعة ما قومت من النوم.
يبص لها شوية ويسكت.
رحمة باستغراب:
خير يا هادي، مالك؟ في إيه؟ احكيلي، أنا رحمة حبيبتك..
هادي يحط إيده على راسه:
مش عارف يا رحمة مالي، بجد في حاجة غريبة بتحصل معايا ومش عارف ليه. تتخيلي شوفت قمر قرد؟ فكرت بتخيل، بس كل ما أبص لها أشوفها قرد.
رحمة تبص له بصدمة وتفضل ساكتة… هادي ينفخ بزهق.
هادي:
أنا عارف إن اللي بقوله ده مش طبيعي.. بس ده اللي حصل. المهم قومي اعملي حاجة أكلها على ما أخد دش، يمكن يفوقني.
هادي يقوم ويتحرك ويدخل الحمام.. رحمة تلطُم وشها وهي بتقول:
رحمة:
منكِ لله يا أم معيز، بقى أقولك خلي جوزها يشوفها قردة، تروحي تخلي جوزي هو اللي يشوفها. يا لهوي أعمل إيه دلوقتي؟ الراجل هيروح مني ولسه ما فرحتش بيه