رواية المطاريد الفصل الخامس5 بقلم رباب حسين

رواية المطاريد بقلم رباب حسين 
رواية المطاريد الفصل الخامس5 بقلم رباب حسين
توالى اللقاء وزاد معه نبضات قلبي اشتياقًا وفرحةََ وعشقًا ينبض بداخلي لأول مرة، فلم اتخيل أن أقع أسير الحب بهذه السرعة، فأصبح اللقاء يشبه حفر لوحةٍ لوجهها داخل فؤداي، وبات الليل مسرحًا لمشاهدة هذا الوجه، فكلما أغمضت عيني تذكرت وجهها الباسم، وعينيها الساحرة التي تجعل نبضات قلبي تعلو وتعلو، حتى كدت أخاف أن يسمعها من حولي.

لم نتحدث كثيرًا ولكن كان لقاء العيون يغني عن الحديث.

وفي يوم خرجت من المركز العلمي وأنا أبحث عنها، فوجدتها تركض نحوي وتخبرني أن المعلم سوف يقيم موعد خاص في منزل أحدهم، حتى يستذكر بعض الدروس التي تم شرحها، ويبحثون عن مكان لهذا. فأخبرتها أني أقيم وحدي ولا مانع لدي بأن يأتي الطلاب والمعلم.

ذهبنا معاََ وأخبرنا المعلم وحددنا الموعد وعدد الطلاب، وعلى الرغم من أن الموعد ليس بخاص بيني وبينها؛ إلا أنني كنت سعيد بقدومها إلى منزلي.

جاء الموعد وحضرت رهف، كانت تنظر حولها إلى المكان وبعينيها الكثير من التساؤلات، وعندما رحلوا جميعاََ طلبت مني أن تتحدث إليً، فنزلت إلى أسفل ووقفنا معًا أمام المنزل.

يحيى : خير يا رهف كنتي عايزة حاجة؟

رهف : هو أنت عايش لوحدك خالص؟!

يحيى : اه أنا بدرس هنا من زمان، عشان والدي كان بيتشغل هنا في إسكندرية، بس السنة دي أضطر يرجع البلد، وأنا ماقدرتش أنقل هناك، فا هكمل ثانوي هنا وهدخل جامعة هناك.

رهف : طيب عارف تعيش لوحدك؟!

يحيى : الصراحة لا، بس بحاول يعني، وكمان عشان أركز على المذاكرة، ﻷن عندي أخين صغيرين فا كده أحسن.

رهف بحزن : يعني بعد السنة دي مش هشوفك هنا في إسكندرية؟!

ابتسم يحيى وقال : يمكن أشوفك هناك في البلد... في بيتي. وتبقي معايا على طول.

ابتسمت رهف ونظرت داخل عينيه وقالت : أنا بحبك.

صُدم يحيى وقال وهو يبتسم : هو إنتي على طول كده مندفعة؟!

ابتسمت رهف وقالت : لا ده مش إندفاع دي حقيقة. أنا فعلاََ بحبك، أخبي ليه؟!

يحيى : طيب على الأقل أصبري لما أقولهالك الأول.

رهف : لا أنا لما بحس بحاجة بقولها، ولما بعوز حاجة باخدها، طالما إني شايفة إني مش غلطانة. و بعدين ما أنت لسة قايل تبقي في بيتي؛ يعني بتفكر فيا زي ما بفكر فيك. أخبي مشاعري ليه بقى؟!

ضحك يحيى وقال : هو إنتي مجنونة كده على طول؟!

رهف : قبل ما أعرفك كانوا بيحلفوا بعقلي، بس جيت إنت قلبت الموازين. أنا همشي بقى.

تركته وذهبت ولكن أوقفها وقال : طيب مش هتاخدي الجاكت؟

رهف : خليه ذكرى.

ابتسم يحيى إليها وظل ينظر إليها وهي تركض بسعادة من أمامه.

عادت الذكريات إلى يحيى الذي يجلس شاردًا، ينظر إلى المعطف الذي أعطته له قديمًا ولا يزال يحتفظ به، ولا يعلم لما يشعر بالتشوش من حديثها، فهي ترفض أن يقترب منها دون زواج. فكيف وقد رآها في هذا الوضع داخل التسجيل؟ تذكر حديثها في هذه الليلة الأخيرة.

"لا يا يحيى إنت ماتعملش كده، مش أخلاقك."

هل ترفض فعل ذلك معي لأجلي حتى لا أفقد نفسي لأجلها وأصبح مثلها، أم ترى أني مختلف عن باقي الرجال التي عرفتهم بحياتها وترفض أن تراني مثلهم؟ نفض يحيى رأسه من هذه الأفكار، وألقى المعطف داخل الخزانة وذهب إلى الفراش.

شعر بعد قليل بالتعب ولكن لم يبالي وذهب في نومٍ عميق.

في منتصف الليل نزلت رهف إلى غرفته كي تعطيه بعد الأدوية، وبعدما دخلت الغرفة لاحظت إرتعاش جسد يحيى، فأسرعت إليه بذعر وقامت بقياس حرارته، وحين وجدت الحرارة مرتفعة أعطته حقنة لتخفضها، وظلت بجواره حتى سطعت الشمس، وغفت على الكرسي بجواره.

استيقظ يحيى ووجد رهف تجلس على الكرسي، ظل يتأملها ضربات قلبه تتزايد، مما جعله يشعر بالغضب الشديد من نفسه ومن هذا القلب الذي لا يزال يتمناها بعد ما فعلت به، فقال : رهف... رهف نايمة هنا ليه؟!

فتحت رهف عينيها بصعوبة أثر السهر طوال الليل بجواره فقالت : صحيت؟! إنت كويس؟

يحيى : بلاش إستغلال للظروف، ما أنا كويس أصلًا، إيه اللي جابك هنا ونيمك في أوضتي؟ أظن اتفاقنا إنك تدخلي هنا عشان تديني الأدوية بس... اتفضلي برا.

شعرت رهف بالغضب منه فوقفت وقالت : على فكرة أنا مش قاعدة هنا عشان اتفرج عليك وإنت نايم. درجة حرارتك كانت ٣٩ ونص وأنا قعدت طول الليل أعملك في كمادات، يعني كنت بشوف شغلي مش أكتر. ما لو كنت بتسمع الكلام و بتاخد بالك من نفسك ومن الجرح ماكنش حصل فيك كده، بس بما إنك صاحي تزعق وتتخانق فا أنت كده بقيت كويس، وأنا مهمتي خلصت عن إذنك.

ذهبت رهف من الغرفة ونظر يحيى إلى جواره فوجد إناء ومحرمة كانت تستخدمهما في عمل كمادات له، فأغمض عينيه وزفر بملل، ثم دخلت أمينة الغرفة وهي تنظر إلى رهف التي تخرج وعلى وجهها علامات الغضب فقالت : مالها الداكتورة يا يحيى؟ صوتها عالي ليه؟!

يحيى : مفيش حاجة يا أما.

أمينة : عارف لو تبطل طبعك الحامي دي. البت حلوة وزي الجمر وإنت عتعاملها كيف الغفر.

يحيى : مش بالشكل.

أمينة : ولا بأي حاجة. ولا فيه حاجة عتلفت نظرك للحريم. أنا ماخبراش عتفضل من غير جواز إكديه؟

يحيى : اه يا أما مش هتجوز. وأكيد ده مش وقته ولا وقت خناق على الجواز. أبوي لو سمعك مش هيسكت، وأنا ماصدقت إنه قفل الموضوع ده بعد آخر مرة.

زفرت أمينة وقالت : طيب يا ولدي لو مش لادد عليك البنيتة اللي إهنية فكر في الداكتورة. إهي مصراوية وداكتورة ومتعلمة.

أغمض يحيى عيينه وقال بحدة : تااااني يا أما!

أمينة : خلاص خلاص عاد. سكتت.

لاحظت أمينة أن رهف تهبط الدرج في طريقها إلى الخارج، فصاحت باسمها وتوقفت رهف تنظر إليها فقالت أمينة : مستعجلة ليه؟! أفطري لول وبعدين روحي على المستوصف.

رهف : لا مليش نفس.. متشكرة.

ذهبت رهف ولاحظ يحيى صوتها المنزعج، شعر بالضيق، فهي ظلت بجواره طوال الليل وذهبت إلى عملها بالصباح.

أما في غرفة يزن فكان يتحدث عبر الهاتف مع تلك الفتاة التي أصرت قلبه وعقله منذ أول يوم رأها بها، شغلت قلبه لسنوات وصارت رغبته الوحيدة أن يجمعهما بيتًا واحد، ولكن مشاكل المطاريد وعداوتهم مع عائلته جعلت والدها يرفض الزواج منه، فحين حاول التحدث وطلب يدها رفض، ومنذ ذلك اليوم وهو يتحدث معها وكل ما يتمناه أن يتمم زواجه منها.

ليلة: وبعدين يا يزن، هنفضل كده كتير!

يزن: أنا جاهز، وبيت التهامية مستني أحلى عروسة تنوره، بس أبوكي بقى، أنا بفكر أخطفه.

ليلة : بس بقى، هو أنت ما تتكلمش جد كلمتين على بعض!

يزن: يا بنتي إحنا مهددين بالقتل في كل لحظة، لو ماستغلتش الفرص وعيشت حياتي ماعرفش هيجيلي فرصة تاني ولا ﻷ، أمال أنا مستعجل على الجواز ليه!

ليلة : بعد الشر عليك يا بارد، وبعد أهو بابا طلع معاه حق، خايف عليا أجي أعيش معاكم والمطاريد يأذوني.

يزن: ما عاش ولا كان اللي يلمس شعرة من مرات يزن التهامي. إنتي ماعرفتيش أنا عملت إيه لما كان يحيى راقد؟

ليلة : عرفت، واترعبت عليك أوي، أنا مش عارفة اللي هتتجوز يحيى هتستحمل إزاي شغله ده وإنه كل يوم معرض للخطر كده.

يزن : دي حياة أي واحدة تتجوز ظابط، لكن ما تخفيش أنا ناوي أزرع وأحصد وبس، سيبنا القتل والسلاح لوقتهم.

ليلة : أنا نفسي نخلص من المطاريد بقى يا يزن، نفسي بابا يوافق بدل ما أنا حاسة إني بسرق كده.

يزن: هيوافق يا قلب يزن.

تفاجأ يزن بسماع صوت والدها بالهاتف وهو يقول: عتكلمي مين يا بت؟

ليلة بإرتباك : دي واحدة صاحبتي يا بوي.

صديق : عاتي التليفون ديه.

وضعت ليلة الهاتف في يده وقالت : مين معايا؟

غير يزن صوته وقال بصوت نسائي : أيوة يا عمي. فيه حاجة ولا إيه؟

صديق : لاه يا بتي. خدي ليلة معاكي.

أخذت الهاتف منه وهي تنظر إليه بتعجب بعد أن هربت الدماء من جسدها، ثم قال : خلصي وحضريلي الفطور جبل ما أنزل الأرض.

أومأت إليه ليلة وانتظرت حتى خرج من الغرفة ثم قالت : إنت عملت إيه؟!

تحدث يزن بنفس النبرة وقال : ولا حاجة.

ضحكت ليلة وقالت : إنت مجنون. روح بقى عشان أحضرله الأكل.

قال يزن بنفس النبرة : وأنا هقوم أكنس الدار.

أنهى المكالمة وهي تضحك بشدة ثم سمع صوت أمل تقول : هتقوم تكنس الدار؟

ارتبك يزن وقال: خضتيني يا أمل.

أمل: لو أبوك عرف ولا سمعك بتتكلم بالصوت ده هيعلقك على باب الدار برا ووأنت ماسك المقشة كمان.

يزن : بس بقى أستري عليا.

ضحكت أمل وقالت : هستر. بس إنزل عشان ناكل سوا.
____________

أمواج البحر العاتية ترتطم بشواطئ الأسكندرية، تعبر عن الغضب الذي يكمن بداخل حازم الذي عاد بعد البحث مطولًا عن رهف ولم يجدها بالأخير.

وصل إلى منزله وفتح الباب، وركض إليه ولديه رهف وسليم وهما يصيحان : بابا.... بابا!

إنحنى إليهما وحملهما على ذراعيه وهو يضحك وقال : وحشتوني يا عفاريت.

رهف : اتأخرت أوي يا بابا.

حازم : معلش يا حبيبتي، كان عندي شغل ورجعت على طول.

اقتربت هبة ووقفت أمامه بتوتر وقالت : عملت إيه يا حازم؟!

أنزل حازم الأولاد وزفر وقال : هربت مني برده.

تنهدت هبة براحة وقالت : الحمد لله.

زفر حازم وقال : بقولك إيه يا هبة بلاش تحرقي دمي.

هبة : بحرق دمك عشان بحمد ربنا إنك ماعملتش الجريمة دي؟!

حازم : مش عايز اتكلم في الموضوع عشان كل مرة بنتخانق بسببه.

هبة : وأنا هفضل ضد اللي إنت عايز تعمله ده، وهفضل أقولك رهف ماتعملش كده، أنا مش فاهمة إزاي مصدقين عنها كده بجد؟

حازم بحدة : يا بنتي إنتي هتجننيني! ما الفيديو باين فيه كل حاجة. وبعدين إنتي ماكنتيش معاها ليل نهار عشان تعرفي هي بتهبب إيه برا. مش معنى إنك كنتي صاحبتها إنك حفظاها.

خرج عمر من غرفته وقال : بس خناق قدام الأولاد. تعالى قولي عملت إيه يا حازم.

حازم : هربت. ماعرفتش أعمل حاجة.

عمر : طيب خش غير هدومك وارتاح وبطل تتخانق مع مراتك بسببها.

حازم : هي اللي مش بتسيب فرصة غير وتقعد تدافع عنها، مش كفاية إنها غصبت عليا اسمي البت على اسمها.

هبة : أنا وإنت وعدناها بكده زمان.

عمر : خلاص يا هبة. روحي حضريلنا الفطار وتعالي.

ذهبت هبة وجلس حازم بجوار عمر وقال : كان بيني وبينها باب وقدرت تهرب برده.

عمر بحزن : اللقا نصيب، ويا عالم فيه عمر للقا ولا لأ.

حازم : حتى لو قابلناها يا بابا، هيبقى لقا بعده وداع.

عمر : بس همشي رافع راسي بعد اللي عملته فيا. كسرتني وذلتني، خلتني ماشي خايف حد يشاور عليا ويقول أبو البت ال.... 

حازم بحدة : خلاص بقى يا بابا. أوعدك هردلك شرفك وشرف العيلة كلها.

يلا هذا الزمن الذي أصبح الأخ يتوعد بقتل أخته أمام والده دون حتى أن يسمع مبررًا واحدًا.

ــــــــــــــــــــــــــــــــــــــــــــــ

كان عمار يجلس على صفح الجبل شارد الذهن ولاحظ رماح ذلك، فاقترب منه وجلس بجواره وقال : من عشية وإنت صافن. خبر إيه؟! 

تنهد عمار وقال : مفيش.. بفكر في العملية اللي بعد كام يوم. محتاجين سلاح وأكل والحكومة مش سايبلنا طريق.

رماح : هنلاجي حل ماتجلجش.

عمار : بفكر في اللي حصل امبارح. نعمل أي حاجة تتلهي فيها الحكومة، ومن ناحية تانية نهرب الحاجة. زي ما ولعت في القسم عشان أعرف أنزل ليحيى.

رماح : مش عنولع في المركز كل شوية عاد.

عمار : لا.. بفكر أولع في الأرض القبلية بتاعت التهامية. ساعتها يحيى هيجري على الأرض.

رماح : بس يحيى غضبه عيزيد إكديه.

عمار : مش مهم. قولي صحيح.. مين الدكتورة اللي قاعدة عنده دي؟! 

رماح : ماخابرش.

عمار : طيب شوف حد يدور في الموضوع ويقولي. عايز أعرف هي قاعدة تعالجه بس ولا فيه حاجة تانية. 

رماح : ليه؟! 

عمار : بعدين هقولك. بس شوفلي إيه الموضوع بالظبط.

رماح : ماشي.. اللي تشوفه.

بعث رماح أحد الرجال إلى المركز الصحي، وقام بحجز دور للكشف.

بعد وقت دخل الغرفة وبدأت رهف في فحصه، ثم جلست لتكتب له بعض الأدوية فقال رجب : خابرة يا داكتورة، إنتي جيتلنا نجدة.

ابتسمت رهف وقالت : الحمد لله ده دورنا كدكاترة يعني.

رجب : بس إنتي بتتعبي صوح. يعني بتمرضي الكبير وكومان إهنيه، الله يجويكي.

رهف : هي فترة بس وهتعدي، وإن شاء الله دكتور تاني يجي بدالي ويكون الكبير خف، وساعتها هيبقى مركز معاكم إنتوا بس.

رجب : الله يكرمك يا داكتورة.

غادر رجب بعد أن تأكد من أنها تمكث في المنزل فقط لتمريضه.

عاد إلى الجبل وأخبر عمار بما قالته رهف، وذهب وتركه مع رماح الذي يتابع ما يحدث بصمت ثم قال : ما تفهمني يا عمار خبر إيه؟!

عمار : كان نفسي تبقى حاجة تانية غير دكتورة، ساعتها كنت هخلي سمعة يحيى في التراب.

رماح : كيف يعني؟!

عمار : خلاص يا رماح اللي كان في دماغي مش هيمشي. روح شوف الرجالة وشوف التسليم هيتم إمتى.

تركه رماح وهو متعجب مما يقوله عمار، يبدو أن هناك شيء يخص الدكتورة هو لا يعرفه.

عادت رهف إلى منزل يحيى قبل الليل، ذهبت لتطمئن عليه وتعطيه الأدوية. دخلت الغرفة ولم تتحدث أو تنظر إليه، فقط أعطته الأدوية وفحصت الجرح، وأثناء ذلك دخل أحمد الغرفة وقال : حمد الله على السلامة يا يحيى.

ابتسم يحيى وقال : الله يسلمك يا أحمد.... تعالى أدخل.

اقترب أحمد وقال : القسم مضلم من غيرك.

يحيى : طمني بس حصل إيه في القسم امبارح؟!

أحمد : ماتقلقش بسيطة. أنا حاسس إنهم عملوا كده عشان عمار ينزل براحته.

وقعت عين أحمد على رهف وظهر على وجهه علامات الأعجاب فاقترب منها وقال : إنتي الدكتورة الجديدة؟

أومأت له رهف بنعم فقال : أنا شفتك اليوم اللي اتضرب فيه يحيى، بس الدنيا كانت ضلمة مادققتش أوي يعني. بس ما شاء الله زي القمر.

نظرت له رهف وقالت بهدوء : شكرًا.

ثم نظرت إلى يحيى وقالت : هجيب شاش من أوضتي وأجي.

ذهبت رهف وظل أحمد يتابعها حتى خرجت، ثم نظر إلى يحيى وقال بأعجاب : إيه القمر ده! دي حلوة أوي.

شعر يحيى بالغضب من حديثه فقال : ما خلاص يا أحمد فيه إيه؟!

أحمد : خلاص إيه بس! هي متجوزة؟

زفر يحيى وقال : ماعرفش. لما تيجي إسألها.

أحمد : إنت بجد إزاي ماحاولتش تسألها حتى. دي ماتتسبش بجد.

يحيى : طيب أخرس بقى عشان ماتسمعكش.

أحمد : ياريت تسمع وأنا أطلب إيدها حالًا.

عادت رهف إلى الغرفة ولاحظت الغضب على وجه يحيى ولكن لم تهتم، باشرت عملها وعندما انتهت قالت : خلي بالك من الجرح وياريت ماتتحركش كتير. عشان مايحصلش مضاعفات زي امبارح.

يحيى : بخصوص امبارح...

قطع حديثه دخول أمل فقالت : رهف.. فيه واحد اسمه أيهم برا عايز يشوفك.

عقدت رهف حاجبيها وقالت : أيهم.... هنا؟!

انتبه يحيى إلى اسمه وتذكر أنها كانت تتحدث معه بالهاتف بالمرة السابقة وهي مبتسمة، خرجت رهف من الغرفة وهو ينظر إلى أثرها، لم يتحمل أن يجلس دون أن يرى ما يحدث فتبعها إلى الخارج ولحق بهما أحمد.

وقفت رهف أمام أيهم وقالت : دكتور أيهم! حمد الله على السلامة. بتعمل إيه هنا؟!

أيهم : أنا أسف جدًا يا رهف بجد. أنا غلطت لما جبتك هنا، وللأسف مش لاقي حد ياخد مكانك. أنا هطوع بدالك لحد ما يلاقوا دكتور.

رهف بتعجب : إزاي يا دكتور! والمستشفى في القاهرة هتعمل فيها إيه؟

أيهم : مش مهم المستشفى، مش مهم أي حاجة غير إنك تكوني في أمان. أرجوكي خدي حاجتك وأمشي من هنا بسرعة.

قاطع حديثه يحيى الذي شعر بالغيرة من حديثه معها وإهتمامه الزائد بها، ونبض بقلبه خوف من أن تذهب حقًا وتتركه مرة أخرى، فقال : حضرتك تقدر تمسك المركز الصحي زي ما أنت عايز، لكن هي مش هتمشي من هنا.

نظرت إليه رهف بتعجب وقالت : ليه؟!

نظر لها يحيى ورفع حاجبه ونظر لها بتعجب وقال : هتمشي وتسيبي المريض بتاعك يا دكتورة! ولا القسم مابقاش ليه لزوم دلوقتي؟

رهف : بس إنت اللي طلبت دكتور مكاني.

يحيى : اه حصل فعلًا، بس مش ده.

نظر له أيهم بتعجب وقال : مش ده! يعني إيه مش ده؟ مش شايفني دكتور يعني! هو مين ده أصلًا؟

ابتسم يحيى في ثقة وقال : أنا يحيى التهامي.. كبير البلد. عارف يعني إيه كبير البلد في الصعيد يا دكتور؟!

أيهم : لا ماعرفش.

يحيى : عشان كدة بقى بقول مش ده. داخل بيت الناس لا تعرف أصول ولا إستأذان، وداخل تكلم الضيفة من غير ما تسأل مين صاحب البيت، وكمان بتأمر وتنهي إنتي أمشي وأنا هقعد. حد قالك إني هسمحلك تقعد في بيتي وتبقى الدكتور بتاعي؟ تقدر حضرتك تنزل المركز، لأن رهف مش بتنام تقريباََ بسبب الشغل والضغط، لكن تمشي أو لا دي بتاعتي أنا مش إنت.
ولما تقعد هنا في البلد ساعة واحدة بس مش هتسمع غير عني أنا، وساعتها هتفهم يعني إيه الكبير. وبعدين ماتقلقش لما المطاريد يخطفوك محدش هيعرف يرجعك غيري.

نظر له أيهم بتوتر وقال : يخطفوني! ليه بقى؟

يحيى : عشان لو حصل إصابات خلال التشابك بينا وبينهم بيخطفوا الدكتور. أنا بفهمك بس عشان تعرف إنت داخل على إيه.

أيهم بقلق : لا لو الموضوع كده يا رهف، يبقى إنتي تفضلي هنا ونسيب المركز من غير دكتور، وأنا هرجع القاهرة تاني وأدور على دكتور يمسكه. بس إنتي ماتروحيش كمان ،خليكي هنا مع أستاذ يحيى.

نظرت له رهف بتعجب بسبب تراجعه عن موقفه، وكيف يقرر ترك المرضى بالمركز الصحي دون طبيب، ثم أردف أيهم : المهم ترجعي بعد ما يخف على طول. الحقيقة ماكناش عارفين إن المستشفى هتبقى وحشة كده من غيرك... أنا مستنيكي ترجعي.

نظر له يحيى بحدة، ثم أمسك يده ليصافحه وضغط عليها بقوة وقال : نورت يا دكتور أيهم. أحمد وصل الدكتور لمحطة القطر أحسن يتخطف وهو ماشي لوحده كده.

شعر أيهم بالخوف وقال مندفعًا : لا ده أنا أطلع من هنا بسرعة بقى. خلي بالك من نفسك يا رهف.

أحمد : اتفضل يا دكتور أنا هوصلك.

مال أحمد على يحيى وهو في طريقه إلى الباب وقال : أول مرة أشوفك بتغير يا يحيى!

تركه وذهب ونظر يحيى إلى أثره، ثم نظر إلى رهف التي تنظر إلى أيهم بتعجب وهو يفر هاربًا من المنزل فقال يحيى : جبان. ذوقك بقى وحش جداََ بصراحة.

نظرت له رهف وقالت : ذوقي؟!

يحيى : اه... مش ده اللي كنتي بتضحكي معاه في التليفون؟

رهف : هو عشان ضحكت معاه يبقى فيه بينا حاجة أو هو ذوقي؟

يحيى : ما هو واحدة زيك لما بتضحك مع راجل بشوف نيتها حاجة واحدة بس.

تركها وذهب إلى غرفته فلحقت به رهف وقد طفح كيلها منه، أغلقت الباب بعنف خلفها تحت نظرات أمل التي كانت تتابع ما يحدث بصمت، وتعجبت مما فعله يحيى. وعندما دخلت رهف الغرفة وقفت أمام يحيى وجذبته من ذراعه وقالت بحدة : أنا لآخر مرة يا يحيى بحذرك. مش مسموحلك تتكلم معايا كده تاني. قولتلك امبارح تعتبرني الدكتورة اللي بتعالجك وبس.

يحيى : هو إنتي فاكرة إني أول ما هتقولي كده هنسي اللي عملتيه فيا؟!

رهف : أنا اللي عملت فيك! ده مفيش حد ماداسش عليا وأنا ماعملتش أي حاجة وإنت أولهم. كلكم بتحاسبوني غلطة ومحدش فيكوا فكر يجي يسألني ويسمعني.

يحيى بغضب : طيب فهميني. قوليلي الحقيقة.

رهف : بعد إيه! جاي تسأل على الحقيقة بعد ١٥ سنة!

تنهد يحيى وقال : فهميني يا رهف. قوليلي إزاي طلعتي كده؟ حد ضحك عليكي طيب ومشيتي في السكة دي غلط؟ أبوكى عيان وكنتي محتاجة فلوس؟ قوليلي أي سبب يخليني أنسى الوجع اللي جوايا. إكدبي عليا، أنا موافق بس ريحيني.

رهف : للأسف ماعنديش حاجة أقولها، ومش مجبرة إني أكدب ولا أدافع عن نفسي قدامك.

أمسكها يحيى من يدها وقال بغضب : لا مجبرة. بحق ال ١٥ سنة دول، وبحق الوجع اللي بحس بيه كل أما أفتكر اللي شفته زمان؛ مجبرة تقوليلي أي سبب.

نظرت إليه رهف بتحدي، فبعد أن عاشت كل هذه المدة وحيدة تدفع ثمن خطأ لم ترتكتبه ولم يثق بها أحد من اقرب الناس إليها؛ باتت ترفض الدفاع عن نفسها، وترى أنها ليست مجبرة أن تدافع عن شرفها أمام أقرب الناس إليها بعد أن صدقوا ما يقال عنها. فقالت بتحديوهي تنظر إلى عمق عينيه : مش هيحصل.

نظر يحيى إليها قليلًأ ثم قال : تمام... بس إفتكري إني قولتلك زمان لو شفتك تاني مش هسيبك غير لما أخد حقي منك.

رهف : وده هتاخد إزاي!

زفر يحيى وأعتدل في وقفته ونظر إليها وقال : من ساعة اللي حصل وأنا مش قادر أنسى غدرك ليا ومش قادر أشوف واحدة غيرك. يمكن إنتي كنتي بتتسلي بيا لكن أنا لا. والنار اللي جوايا مش هتهدي غير لما أطولك. وساعتها هقدر أكمل حياتي عادي واتجوز وأنساكي. أنا عارف نفسي مش هعرف أنساكي غير لما أخد منك اللي أنا عايزه. على الأقل ماحسش إني أقل من الرجالة اللي سبقوني.

تنهدت رهف وحاولت أن تتمالك أعصابها فقالت : وأنا قولتلك امبارح مش هتلمسني.

يحيى : هتجوزك. وبعد كام شهر هطلقك. وساعتها تختفي من حياتي كلها.

نظرت له رهف بحزن، فكم تمنت أن تصبح زوجته في يومٍ ما، ولكن لم تكن تتخيل أنها ستشعر بهذا الألم وهو يطلب منها ذلك، هو فقط يريد أن يتزوجها كي يداوي جرح قلبه. أخذت تفكر قليلًا، فلا سبيل لديها سوى الموافقة، حتى يتأكد يحيى أنها شريفة ولم تخطئ أبدًا، فنظرت إليه والدموع في عينيها وقالت : موافقة.

كانت تعلم أنها ستصفعه بالحقيقة وبعدها سترد له هذا الجرح الذي ينبض بقلبها منذ ذلك اليوم المشئوم، وحينها هو من سيتمنى أن تقبل إعتذاره. وبذات الوقت ستتحقق أمنيتها وتصبح زوجته.
تعليقات



<>