رواية النغم الحزين بقلم فاطيما يوسف
رواية النغم الحزين الفصل الخامس والاربعون45 بقلم فاطيما يوسف
في واحدة من المحافظات البعيدة عن الصعيد، جوة ورشة بسيطة ومقفولة على اللي جواها، كان "حسام" قاعد على كرسي خشبي قديم، ومنحني على ترابيزة الشغل بتاعته بيصلح حاجات بتركيز وصمت تام. ملامح وشه كان باين عليها تعب السنين وهموم الدنيا، عينيه غرقانة في شجن دائم، وشعره اللي بدأ يظهر فيه الشيب مبكر كأن مظهره بيحكي قصة شاب مكسور القلب ومهدود الحيل من كتر القهرة واللي جراله في حياته،
الورشة كانت هادية، مفيش فيها صوت غير صوت حركة العدة البسيطة في إيده، لحد ما سمع صوت خبطة هادية على باب الورشة الموارب، رفع راسه ببطء، وشاف راجل غريب عنه واقف على الباب؛ راجل بهيبة ووقار، لابس جلابية صعيدي ووقفته بتوحي إنه مش إنسان عادي، بل صاحب هيبة وسلطة، "حسام" استغرب الطلة دي في مكانه، فوقف ومسح إيديه في قطعة قماش قديمة، وقرب بخطوات بطيئة وهو بيسأله بنبرة عادية كأي زبون داخل ورشة:
ـ أهلاً بيك يا باشا، تؤمر بحاجة؟ محتاج تصليح ولا حاجة في عدتك؟
ابتسم "سند" ابتسامة خفيفة وهادية، ودخل الورشة بخطوات واسعة وثابتة، وبص حواليه نظرة تفحص للمكان، وبعدين رجع بصه لـ "حسام" وقال بصوت رجولي دافي:
ـ لا يا بشمهندسي أني مش جاي أصلح حاجة، أني جاي لحاجة أهم بكَتير، جاي لراجل اسمه "حسام" .
انقبض قلب "حسام" فجأة، ووشه اتغير شوية، واحساس بالخوف والقلق هجم عليه، وبالذات لما حس بلهجة الصعيد في كلام الراجل ده اللي فكره بأيام سودة عاشها زمان، بلع ريقه بصعوبة ووقف بندية وحذر:
ـ أنا "حسام" بس خير يا باشا؟ ومين حضرتك؟ أنا معرفكش أصلاً ولا عمري شفتك قبل كده، ممكن أفهم اكتر ؟
قرب "سند" خطوتين كمان، وشد كرسي وقعد عليه بكل هدوء وثقة، وحط رجل على رجل، وبص لـ "حسام" بعيون ثابتة وقوية وقال:
ـ معاك حق.. إنت ماتعرفنيش، وأني أول مرة أجي المكان اهنه في ورشتك، وأني مش جاي من طرف حد يضرك، اطمن خالص، ارتاح، واقعد كمل شغلك عشان كلامنا هياخد وقت.
وقف "حسام" مكانه مش مطمن أبدا، وبص له بريبة وقال بصوت حاد وهو حاسس انه جاي تبع "كرم" لان لهجته نفس لهجته اللي كان بيتكلم بيها لما كان عايش معاهم في الصعيد :
ـ اقعد كيف وانت بتقولي كلام هيخليني اقلق؟! انت مين يا جدع إنت؟ وعايز مني ايه، و جاي تعمل إيه هنا وعرفت مكاني منين؟ أنا سيبت البلد وكل اللي فيها من سنين، وقافل على بابي وفي حالي.. جاين تدوروا عليا تاني ليه؟ مش كفاية اللي عملتوه فيا زمان؟!
رفع "سند" إيده ببساطة وبهدوء يمتص بيه عصبية "حسام" ، وقال بنبرة واثقة:
ـ يا ابني صلِ على النبي، واهدي كده وخد نفسك، أني لا تبع عيلتك، ولا تبع الناس اللي أذوك زمان، ولا ليا مصلحة معاك غير المصلحة اللي هترجع لك فيها روحك اللي ضاعت منك من سنين، اسمع مني للآخر، ووقتها ليك حق تعمل اللي تعمله.
فضل "حسام" باصص له بشك وريبة، وصدره بيعلو ويهبط من التوتر، وقال بصوت مهزوز:
ـ روحي اللي ضاعت مني ايه؟! انت بتقول إيه؟ وروح مين دي اللي بتتكلم عنها؟
اتنهد "سند" بعمق، ونزل بعيونه على الأرض لثواني، وبعدين رفع عيونه ليه وقال بصوت مليان شجن وصدق :
ـ أني بتكلم عن البنت اللي بتدوق مرار العذاب كل يوم بسببك وبسبب جبروت أهلها.. بتكلم عن "نورا".
أول ما الاسم نزل على ودن "حسام" كأن مية مغلية اندلقت على راسه، اتجمد في مكانه، وعيونه اتسعت بصدمة مرعبة، ورجليه بقت مش شايلاه، حس إن الدنيا لفت بيه، ونطق الاسم بصوت مكسور شبه مسموع:
ـ "نورا" ؟! انت.. انت بتقول مين؟! "نورا" جر لها إيه؟! هي لساتها فاكرة اسمي أصلا بعد كل السنين دي؟ أنا سمعت انها اتجوزت وبهدلوها.. انت مين وتعرف عنها إيه؟!
قام "سند" من مكانه، وقرب منه خطوة، وحط إيده على كتفه بحنان راجل فاهم وجع راجل زيه، وقال له بنبرة دافية:
ـ أني اسمي "سند الناجي".. الراجل اللي ربنا جعله سبب عشان يطلعها من جحيم جوزها القاسي، ويبعدها عن بطش أخوها الظالم،
أني جيت لك لحد اهنه يا "حسام" مش عشان أعاتبك ولا ألومك، لكن جاي أقول لك إن البنت بتموت بالبطيء، وعقلها راح منها من كتر القهر والضـ.ــرب والتعـ.ـذيب والتفرقة بيناتكم.
انهار "حسام" تماما مجرد ما سمع اسمها والحنين زار قلبه وبقى يدق بوجع شديد، عمره ما نسيها ولا راحت يوم عن باله، ولا عمره حب بنت ولا هيحب غير "نورا" :
ـ يعني ايه عقلها راح؟ انا بقالي كتير غايب عن البلد ما قدرتش اعيش في مكان هي موجوده فيه وما تكونش معايا، وكمان مش معاها اي وسيلة اتصال علشان اطمن عليها في اي وقت من الأوقات، كرم أخوها وابن عمي بجبروته ما خلاش اي حاجه توصلني بيها، بعد ما فضحني في البلد كلها اني خطـ.ــفت اخته واتجوزتها غصب عنه.
رد "سند" بنبرة حازمة ومطمنة:
ـ اطمن يا "حسام" ، البنت دلوك في مكان آمن، في داري وتحت حمايتي وموجود جارها اللي هيرعاها، ومفيش مخلوق دلوك يقدر يقرب لها ولا يمسها بكلمة، بس اللي لازمن تعرِفه ان هي ما بقتش "نورا" اللي انت تعرِفها من وهي عيلة صغيرة البنت فقدت عقلها واتمرمطت وعاشت ذل ومهانة ما فيش إنسان يتحملهم في الدنيا، ولا الأدوية ولا دكاترة الدنيا كلاتها مش هينفعوا معها، لأن وجعها الحقيقي مش عضوي.. وجعها إن روحها متعلقة بيك انت، وعقلها لساته واقف عند اليوم اللي أبوها مات وأخوها فرقكم عن بعض.
رفع "حسام" راسه بسرعة، وبص له بنظرات ممزوجة بالوجع والحزن والخذلان، وقال بلهفة شديدة وخوف:
ـ يعني.. يعني هي لساتها بتحبني وعايزاني؟ بس أنا مبقتش أنا؛ "حسام" اللي هي حبتهؤ أنا اتجوزت وطلقت وعندي بنت...
قاطعه "سند" بنبرة رجولية حاسمة وصارمة:
ـ اهدى واسمعني زين يا "حسام" أني مش جاي أقول لك تعالى أخطبها من جديد بكرة الصبح وهي بالوضع دي، أني جاي أقول لك إن البنت هتضيع كل يوم عن اليوم اللي قبله، ومحتاجة تشوفك، محتاجة وجودك جنبها لأن عقلها الباطن وقف حدك، محتاجة تحس إن الراجل اللي حبته لساته عايش ولساته هيحبها ورايدها ومتمسك بيها، أما عن "كرم" أخوها.. كرم دلوك في السجن ربنا هيعاقبه على عمايله السودا، ولو خرج أني موجود وفي ضهرك وفي ضهرها، ومفيش كائن من كان هيقدر يهوب ناحيتكم مرة تانية طول مانت رايد الخير والستر، وطول ما أني هسترها مع اللي ترتاح وياه، وطول ما "سند الناجي" عايش طول ماهي في أمان.
بص "حسام" للراجل اللي واقف قدامه، وحس إنه بيكلم جبل مش مجرد إنسان جاي يزوره، بص له بارتياح ووقف على حيله بثبات جديد لأول مرة يظهر في عيونه، وقال بصوت بيترعش من كتر الشوق واللهفة:
ـ أنا جاهز.. جاهز أعمل أي حاجة في الدنيا عشان أشوفها بس، حتى لو هبيع روحي في سبيل أنها ترجع تضحك زي زمان، قول لي أعمل إيه، وأنا معاك للآخر.
ابتسم "سند" ابتسامة رضا واطمئنان، ومد إيده وصافحه بقوة وقال:
ـ هو ده كلام الرجالة يا جدع اللي ينزل على الوجع بلسم، اسمع بقى الخطة اللي هتمشي عليها، وافتح مخك معاي زين.
قعدوا الاتنين جنب بعض، وبدأ "سند" يشرح له التفاصيل والخطوات اللي هيمشوا عليها واحدة واحدة، وإزاي هيجهزوا لظهوره قدام "نورا" في الوقت المناسب وبالطريقة الصح اللي تضمن إن عقلها يرجع لها وتفوق من الصدمة، وكأن "سند" كان بيرسم باكتساح خريطة جديدة لحياة اتدمرت من سنين بس ربنا أراد إنها تبدأ من جديد على إيد راجل أصيل.
******
جوّه زيارة السجن، في أوضة مقفولة ومكتومة ريحتها رطوبة، كان "كرم" قاعد على دكة خشبية قديمة، حالته تصعب على الكافر، السجن هدّ حيله وكسر غروره؛ جلابيته مبهدلة وواسعة عليه كأنها مش بتاعته، ووشه أصفر وعليه آثار إرهاق وسهر، والأصعب من كده إنه كان عمال يهرش في درعاته ورقبته بعنـ.ــف، وبشرته طالع فيها حبوب ومرض جلدي بسبب قعدته في مكان غير ملائم لطبيعة جسمه وسوء الهوا،
دخل "سند" بخطوات واسعة وثابتة، بهيبته اللي مالية المكان وقار وقوةج، أول ما وقعت عين "كرم" على "سند" حس إن جمر شغال في دمه، نط من على الدكة بسرعة جنونية، وجري عليه هجم زي الحيوان المفترس، مسك في خناقه وشده من هدومه بجنون وهو بيصـ.ــرخ بصوت مبحوح ومرتعب من الغل:
ـ انت إيه اللي جابك اهنه ، وليك عين كمان؟! انت اللي عِملت فيا اكده! انت اللي حطيتني في المغارة داي وذلتني وجاي تشمت فيا كمان! والله العظيم ما هسيبك، أول ما أخرج لأكون شارب من دمك! أنت السبب في كل اللي أني فيه دلوك!
فضل "سند" واقف مكانه زي الجبل، ولا كأن "كرم" بيعمل فيه حاجة، ولا هزه شعرة واحدة، ببرود تام وأعصاب في ثلاجة، رفع إيده بهدوء وشد إيد "كرم" من على هدومه، وزقه لوراء خطوتين بخشونة رجولية خلت "كرم" يترنح ويقع على الدكة،
عدل "سند" عبايته ببرود، وقعد على الكرسي بهدوء، وبص له بنظرة احتقار وقال بصوت رزين:
ـ اخلص من اللي فيك الأول وبعدين ابقى هدد يا "كرم" بص لروحك من جواك ولو لمرة واحدة في حياتك وشوف شكلك بقا عامل كيف؟ فاكر قسوتك وظلمك لأختك هيروحوا هباءً من غير حساب؟ اللي انت فيه دي مش شطارة مني ولا ذكاوة ولا رد اعتبار على اللي انت عِملته، دي انتـ.ــقام ربنا سبحانه وتعالى وعقابه ليك على كل دمعة نزلت من عيون أختك بسببك، أني مكنتش إلا السيف اللي ربنا حطه في طريقك عشان ياخد الحق ويعرفك إن الظلم له آخر.
اتعصب "كرم" أكتر، وفجأة حس بحكة شديدة ورهيبة في ضهره وجنبه، فبقى يحتك بعنـ.ــف، ووشه اتكشكش من الألم والقهر، صـ.ــرخ بصوت متهدج:
ـ وانت مالك ومالنا يا أخي؟! أختي أني حر فيها، أعمل فيها اللي أني عايزه! انت كنت اتعينت واصي عليها واني مخابرش؟
قاطعه "سند" بصوت حاد وقاطع وهو بيستفزه بكلامه وبيتعامل معاه بنفس سماجته:
ـ اه مالهاش ولي غيري دلوك وإن كان عاجبك، واسمعني زين أني جاي أقول لك كلمتين وإنتهى الحوار؛ "حسام" راجع لـ"نورا" وهيرجع علشان يتجوزها لأن أختك اللي انت دمـ.ــرتها علاجها وياه، ويكون في معلومك أني واخد عليك تعهد قانوني ورسمي جوه السجن وبره السجن بعدم التعرض لها ولا لحد من أهل بيتي، ولو فكرت بس تهوب ناحيتها أو تبص لها بنظرة، إنت خابر زين ايه اللي هيُحصل واظن انك جربت الحبس ومرارته فخليك عاقل احسن يا "كرم"وبلاش التهور.
ضحك "كرم" بتهكم ووجع، وهو مش متخيل انه كان ممكن يحصل كده في في يوم من الأيام وقال بتحدي واهي:
ـ تفتكر هخاف منك يعني؟! هطلع وهعمل وهسوي وهتشوف يا اللي عامل روحك حامي الحمى انت وعاجبك الدور قوي.
قام "سند" من على الكرسي، وضرب ترابيزة الزيارة بإيده ضربة هزت الأوضة كلها، ومال عليه بجسمه كله وعيونه بتشرار شرار، وقال بنبرة تزلزل الكيان:
ـ تطلع وتعمل إيه يا "كرم"لساتك فاكر اني هتهدد؟! اسمعني زين نصيب أختك في ورث أبوكم.. حق "نورا" اللي أكلته بالباطل وضحكت عليها فيه، هترجع تتنازل عنه برضاك وبالذوق، وإلا والله العظيم أرفع عليك قضايا نصب وتزوير وأجيب لها أحسن محامين يعرفوا ياخدوا حقها منك في كل مليم ليها من عينيك يا "كرم"، وبدل ما تقضي لك في السجن ست سبع سنين يكملوا تاني بقضية تزوير إنك مضيت اختك الغير واعية على حقها في ورث ابوها إنها اخدته.
انكمش "كرم" على نفسه، وحس إن السند اللي قدامه ده مش مجرد راجل عادي، ده حائط سد ملوش آخر، وخصوصاً لما حس إن ورثه وطمعه اتقفشوا صح، حاول يظهر بمظهر القوي:
ـ ورث إيه اللي هتتحدت عنيه.. هو أني أكلت ورثها؟ هي استلمته وراحت صرفته على كيفها ومزاجها.
رد "سند" ببرود وهو مطلع أوراق وجهزها قدامه على الترابيزة ولا كأنه سامع حاجة من التخاريف اللي بيقولها:
ـ أوراق التنازل جاهزة، والمحامي بتاعي مستني الإمضا، تمضي دلوك وتخلصنا، عشان ترتاح من وجع دماغ القضايا.
وكمل بتهكم وهو بيبص على جسمه الملتهب:
ـ وأوعدك هكافئك وهبعت لك كيسة مراهم وأدوية تعالج جلدك الملتهب دي هَدية مني ليك يا "كرم"، الطيب أحسن يا "كرم" امضي وارتاح وريح ضميرك، انت بقيت سوابق عند الحكومة وأي محامي هيعرف يستغل النقطة داي ويرجع لاختك حقها اللي انت نهبته.
فضل "كرم" باصص للأوراق بقلب مكسور وغيظ مالوش مثيل، حس إنه اتقبض عليه من إيده اللي بتوجعه، ومبقاش قدامه أي حيلة غير إنه يستسلم، مسك القلم بإيد بترتجف من الغيظ والمرض والقهر، وكتب إسمه على الورق وغصب عنه وقع بالتنازل التام عن حق أخته في الميراث.
سحب "سند" الورق بهدوء، وبص له نظرة أخيرة كلها ازدراء وقال:
ـ ربنا يهديك يا "كرم"، ويشيل الغشاوة من على عينيك.
كانت الشمس منورة بالدفى والجمال على دار "الناجي"، وكان "سند" راجع للبيت بخطوات سريعة وواثقة، دخل ودور بعيونه على "نغم" لحد ما لقاها قاعدة في الصالون بتظبط حاجات "نوح" أول ما شافته، جريت عليه بابتسامتها المعهودة وقالت بشوق:
ـ حمد الله على سلامتك يا حبيبي.. أخيرًا جيت، طمني عملت إيه مع أخو "نورا" ؟
ابتسم "سند" ابتسامة واسعة، وطلع ورق التنازل من جيبه وحطه قدامها على الترابيزة، وقال بصوت مليان فخر وسعادة:
ـ "كرم" مضى يا ام "نوح" وحق "نورا" رجع لها كاملاً مكملاً، ومحدش يقدر ياخد منها مليم واحد غصب عنها، ولا يتحكم في حياتها من تاني، وأصلا سبب إصرار "كرم" قبل اكده على كتمته ليها وإصراره على إنه يدفـ.ــنها بالحياه هو ورثها، وخلاص حقها رجع لها يعني هو بعد اكده مهيفكرش فيها من أساسه.
شهقت "نغم" بفرحة عارمة وهي مش مصدقة اللي سمعته من "سند" وإنه قدر يعملها ويخرج اللقمة من بق الأسد بدون ما يخاف، وحضنت دراعه وقالت بحماس طاغٍ:
ـ بجد يا "سند" ؟! عِملتها كيف داي؟
اني قلت أول ما يشوفك هيمسك في خناقك وإن المقابلة داي مهتعديش على خير واصل.
طبطب سند على شعرها بعبث وسألها :
ـ ليه يا قلب "سند" إنتي متجوَزة أي حد واصل؟
وكمل وهو بيرفع قامته بكبرياء مصطنع:
ـ أني "سند الناجي" يعني لو ركزتي على اسمي هيأكد لك الفعل ولو ركزتي على لقب عيلتي هيأكد لك إن معناه النجاه يعني بطمن كل اللي حوالي، يعني .
مطت شفايفها بدلال وقربت منه أكتر وهي بتساعده وبتخلع عبايته بهدوء، وقالت بنبرة فيها مكر خفيف وابتسامة ساحرة بتلعب على شفايفها:
ـ إنت على فكرة بقيت مغرور قوي اليومين دول يا سي "سند" وشايف نفسك عليا، ومهما أتكلم معاك هتحسسني إنك فارس الحكاية وبطلها الأوحد واصل،
وكملت وهي بتغمز له بشقاوتها ورقتها:
ـ بالراحة علينا يا أبو "نوح".
ضحك "سند" ضحكة رجولية دافية هادية، ولف دراعه بحركة سريعة واحتواها من خصرها وقربها منه لحد ما التصقت في صدره، وبص في عيونها بنظرة كلها عشق وتملك، وقال بصوت مبحوح ودافي:
ـ بقى أني مغرور؟! طب بذمتك يا "نغم" هو اللي يملك زينة الستات كلاتها بين ايديه كيف دلوك، ويملك قلبها وعقلها، يقدر يتغر بجد ولا حتى عينه تتمنى تشوف غيرها؟
وكمل بنبرة غرور مصطنعة علشان يجننها:
ـ وبعدين ما أني فارس الحكاية فعلاً بالنسبة لكي، ولا لساتك لغاية دلوك هتكابري ومعيزاش تعترفي اعتراف واضح وصريح؟
رفعت وشها له وتحدت نظراته ببريق عيونها، وحطت إيديها الاتنين على صدره بتلعب في زرار جلابيته بمكر خفيف وقالت:
ـ مين دي اللي هتكابر بقى؟ أني لاسمح الله ؟! يا روحي دي أني اللي دايماً محتمَلة غرورك دي علي، وبعدين ما تأمنليش قوي اكده، أصل ربنا قال كيدهن عظيم.
رفع حاجبه باهتمام واستمتاع بطريقتها ودلالها، وقال بصوت خافت وهو بيقرب وشها منه أكتر:
ـ اممم.. يعني ناوية على ايه يا ست "نغم" ؟ بتهدديني مثلاً؟ ولا بتجسي مدى صبري؟ اعقلي اكده وبلاش شقاوة لأنك خابرة زين اني لا بيهمني كيد ولا غيره واللي رايده هو اللي بيحصل يعني من الاخر ضاع محتواكي يا روحي.
وكمل وهو عاجبه جداً طريقتها ومستمتع بحوارهم الطريف ده:
ـ أني هحب مناغشتك قوي هحس فيها بالتجدد وفي الاخر بخرج بردوا منتصر، بس بردوا ماعايزكيش تخافي ولا تهربي.
سحبت نفسها من بين ايديه بدلال مراوغ، وراحت ناحية الكنبة وقعدت عليها يها برقة وهي بتعدل قعدتها وبتتجاهل كلامه بابتسامة شقية:
ـ ومين قال إنك هتخوفني؟ بالعكس طريقتك داي أكتر حاجة هتأكد لي إنك لسه بتحبني وان أني اللي مالكة روحك وقلبك ودايما شاغلاك، وكل ما ألاقيك بتتحمق وتتكلم بجدية، بحس إن ليا مكانة خاصة قوي في قلبك مبيشاركنيش فيها مخلوق، بس طبعاً من حق الست تتدلل على جوزها، ولا القانون دي ممنوع عند "سند الناجي"؟
اتنهد "سند" بعمق وهو بيبتسم غصب عنه على طريقته، وراح قعد قدامها على الكرسي التاني، وفرد طوله عليه وشبك صوابع ايديه وهو باصص لها بنظرة فيها شغف الدنيا كله:
ـ الدلال كله ليكي يا قلب "سند" من حقك تتدللي، ومن حقي أني بقى أدوب في دلالك دي وما أقولش لااه أبداً اكده هتبطر على النعمة، بس تعالي اهنه إنتي من شوية كنتِ بتلمحي إنك ليكي في الكيد أحب أعرفك إنك هبلة يا روحي ولا ليكي في الكيد ولا يحزنون.
ضحكت "نغم" ضحكة رقيقة هزت قلب سند، وقالت بخبث وهي بتلعب بخصلة من شعرها:
ـ يا ابني بلاش تستفزني وأخليك تجرب ، صدقني هجننك وهطير برج من دماغك وهخليك تقول حقي برقبتي كمان، وهخليك تمشي تبص وراك يمين وشمال .
هز راسه بابتسامة واسعة، وقام وقف من مكانه، وقرب منها لحد ما وقف قدامها وهي قاعدة، ومد إيده مسك كفها وباسه بحرارة وحب وغازلها بصوت رجولي خشن :
ـ تعرِفي ان عيونك لوحدها هتخليني أجري في الدنيا دي كأني شاب لسه في أول خطوة في عمره، وهحبك حب لو اتحط على جبال لهدها، يعني انتي نغمي الجميل الهادي اللي برجع آخر يومي استمتع بحضنك الدافي كأنه المكافأة عن تعب يومي.
حست "نغم" إن كلامه بيخترق دفاعاتها كلها، وابتسامة ناعمة ظهرت على ملامحها ورغم محاولتها إنها تجاريه في مكره ليها إلا إنه غلبها، فسحبت إيدها برقة وحطتها على وشه وهمست بصوت ناعم:
ـ ربنا ما يحرمني منك أبداً يا "سند" ولا يكتب عليّ يوم أبقى بَعيدة عن حضنك ولا أشم غير ريحتك، انت الهوا اللي بتنفسه، ولو كنت هتشاقى عليك بلساني فدي محبة ، أما قلبي والله ما بيعرِف ينبض غير باسمك وبس.
ملامح "سند" اتحولت في ثانية للدفى والحنان المطلق، ونزل لمستواها على ركبه قدام الكرسي، وحضن وشها بكفوف إيديه الاتنين، وطلع كل اللي في قلبه من كلام راجل عرف معنى الحب الحقيقي بعد سنين جفا :
ـ يا عمري إنتي أني لو لفيت الدنيا بحالها مهلاقيش حد هيحبني قدك ، أني فيكي لقيت كل اللي كنت بتمناه، الأمان الحقيقي، والقلب اللي هيحضن تعبي قبل فرحي، اوعي في يوم تظنِ لحظة إن فيه ست في الكون ده ممكن تملى عين "سند" أو تاخد مكانك، إنتي مش مرتي وبس، إنتي روحي اللي ماشية على الأرض.
قربت منه أكتر من غير تردد، ودفنت وشها في صدره وهي بتغمض عيونها براحة وسكينة تامة، وحست إن الدنيا بكل ما فيها بقت ملكها، واهتمت بيه وهو بيلف دراعه عليها بحنان يطمن أي خوف قديم، وفضلوا قاعدين كده لفترة طويلة، مفيش بينهم كلام، بس نبضات قلوبهم كانت بتحكي أحلى قصة عشق حقيقية لا فيها تكرار ولا ملل، قصة اتكتبت بالصبر والوفاء، قدر جميل اختاره لهم ربنا سبحانه وتعالى علشان يرمم جروح قلوبهم اللي انكسرت، وبقى "سند" و "نغم" قلب واحد متقدرش العواصف تفرقهم مهما كان .
*******
ـ مساء الخير يا "نورا" عاملة إيه؟ الدكتورة طمنتنا إنك زينة وهتتحسَني، أني جابية لك وياي مفاجأة هتعجبك قوي؟
ابتسمت "نورا" بهدوء كالعادة واكتفت بابتسامتها كأنها بتسالها بنظراتها عن المفاجأة اللي جايبها لها، وكملت "نغم" وهي بتطلع الأوراق من شنطتها وبتديها لها في إيديها:
ـ امسكي الورق دي عايزاكي تفتحيه وتشوفي اللي جواه وتقولي لي حاسة بايه؟
مسكت "نورا" الورق وفتحته وبصت فيه بإهمال وبعد كده قفلته وحطته جنبها تاني وفضلت تبص لـ "نغم" بفتور، فـ "نغم" قعدت جنبها وطبطبت على ظهرها وسألتها:
ـ إيه يا "نورا" ما فرحناش إن "سند" جاب لك ورثك من أخوكي وخلاه مضى عليه برضاه، وكمان ما بقيتيش تحت وصيته ولا رحمته وما فيش كابوس اسمه "كرم" تاني هيكبس على أنفاسك؟!
عند كلمتها الأخيرة وابتسمت "نورا" وهي بتسألها:
ـ يعني ما فيش "كرم" هيأذي "نورا" تاني ولا هيموتها؟
حركت "نغم" راسها بابتسامة وهي بتأكد لها:
ـ والله العظيم كيف ما هقول لك اكده يا "نورا" انتي كنتي تتخيلي إنه يتنازل لك عن حقك في ورث أبوكي؟
ردت "نورا" بحزن شديد:
ـ ما هيفرقش معاي فلوس ولا هيفرق وياي أرض وطين؟
حزنت "نغم" وقربت منها وحضنت إيديها وطبطبت عليها برفق:
ـ ليه يا "نورا" دي حقك اللي أبوكي سابه لك علشان يأمنك وتعيشي منه، اللي زيك المفروض تفرح إن حقها رجع لها عاد!
ردت بلا مبالاة وكأن كل حاجة في حياتها شبه بعضها:
ـ الوكل والشرب والفلوس ما يسووش حاجة قصاد راحة البال والعمر اللي راح وأيامي المرّة اللي عشتها من وأني يا عيلة صغيرة، تعرِفي الشحاتين اللي في الشارع أحسن مني على الأقل عاشوا حياتهم من غير ما حد يجيب لهم الجنان والناس تشاور عليهم ويقولوا المجنونة راحت المجنونة جت.
اتوجعت "نغم" علشانها قوي وحاولت تهديها وهي بتفتكر الأيام الصعبة اللي عاشتها هي كمان:
ـ صدقيني يا "نورا" كل واحد عاش في حياته وجعه على طريقته، أديني أكبر مثال قدامك للوجع الحقيقي في وجود أبوي اللي باعني لواحد مرمطني كيف ما "كرم" أخوكي كان هيمرمطك، أني واخواتي البنات شفنا ذل ما حدش شافه في حياته على ما تربينا وكبرنا، صدقيني لو بصينا على هموم الناس وبلاويهم هتهون علينا همومنا وبلاوينا، لازما تنسي اللي فات علشان ربنا مقدر لك الخير كله في اللي جاي.
ردت "نورا" بحزن:
ـ انتي ربنا بعت لك اللي ينتشلك من الظلام وهيدافع عنك وهيحبك، أما أني خلاص اللي راح من عمري راح واللي جاي من عمري هو كمان هيروح، أني خلاص في نظر الناس اسمي "نورا" المجنونة مهما عملت علشان يحبوني ويشوفوني إنسانة هتفشل محاولاتي ما تقارنيش نفسك بيا.
"نغم" حست بوجع شديد علشانها، وسحبتها لحضنها وهي بتطبطب عليها وبتمشي إيديها على شعرها بحنية:
ـ ربنا هيبعت لك انتي كمان اللي يرجع لك حيويتك وحياتك صدقيني يا "نورا" ربنا سبحانه وتعالى كريم قوي على عباده وخصوصا المظلومين.
ردت "نورا" بفقدان أمل وبتقرر تفتح لها قلبها وتشتكي لها وجعها:
ـ ما فيش غير واحد بس هو اللي يقدر يرجع لي حياتي وراح كيف ما كل حاجة حلوة هتروح من حياة "نورا".
طمنتها "نغم" بتأكيد:
ـ ولو قلت لك إن ربنا هيبعت لك الواحد دي يحاول يرجعك حياته وقريب قوي هيكون ردك إيه؟
جاوبتها "نورا" بروح منهكة:
ـ الواحد اللي هتتحدتي عنه دي أبعد ما يكون عني والمحاولات اللي انتي هتتكلَمي عنها هو استنفذها ويا أخوي "كرم"، ما خلاش ليا مكان حلو في قلب أي حد إنه يحاول علشاني.
حاولت "نغم" تهديها:
ـ طب خلاص مهعاندش وياكي ولا هنتحدت في الموضوع دي إلا لما ربنا يبعت لك فرجه من عِنده وقتها هسمع كلام تاني وهشوف نظرات عيون تانية وأمل جديد في قلبك يا "نورا".
اتمسكت "نورا" بحضنها وحست بحنانها وخصوصا في الشهرين الأخيرين دول كانت بتهتم بيها جدا مع "الدكتورة" واتعاملت معاها كأنها أختها وعوضتها عن الفراغ اللي هتعيشه في حياتها هي و"نوح" و"محمد" وبنتها كانت كل يوم "نغم" تجيب ولادها ويجوا يقعدوا معاها وقت كتير وهي كانت بتلعب مع ولاد "نغم" كأنهم ولادها كأنها بتشوف طفولتها اللي راحت فيهم لحد ما الأدوية وعلاج "الدكتورة" والمكان والناس اللي حواليها رجعوا لها شتات نفسها قدر ما وابتدت تشوف الدنيا بلون تاني الكابوس اللي كان محاوطها من كل مكان اختفى وسجنها اتبدل لحرية علشان كده سرعة استجابتها للعلاج كانت قوية جدا، أو لأن عقلها الباطن قرر يتنحى شوية عن مهمته في أذيتها لأن كل الظروف اللي حواليها هاجمته بكل الطرق أنها ترجع إنسانة سليمة بعقل واعي مرة تانية مش لدرجة 100% لكن بقدر المستطاع ما بقيتيش تأذي نفسها ولا تأذي اللي حواليها.
*******
ـ حمد لله على السلامة يا حضرة المصلحة الاجتماعية يا وجابة يا اللي ما يفوتكيش أي واجب في الدنيا.
اتأففت "نغم" من تريقة "رابحة" عليها وحاولت تكون هادية بقدر الإمكان وهي بترد على طريقتها المستفزة ناحيتها كعادتها :
ـ في حاجة مضايقاكي يا أما "رابحة" أني عملتها ؟
بصت لها "رابحة" بسخرية وجاوبتها بتحكم:
ـ إنتي يا بت معدومة الدم والإحساس كل يوم والتاني هتروحي وهتاخدي أحفادي عند البت المجنونة دي، أنت ما وعياش هي عملت إيه في ولدي وفرقتني عنه وطبعا أنت مبسوطه والموضوع دي جاي على هواكي ما هي خلصتك من الكابوس اسمه "سمير" كنتي هتكرهيه من كل قلبك.
ردت "نغم" بنفس الطريقة الساخرة لكن حاولت تكون نبرتها هادية:
ـ بصراحة لو كنت هحبها وههتم بيها علشان السبب دي دونا عن كل أسباب الخير والقلب الطيب اللي المفروض الإنسان يعيش بيه يبقى المفروض أحبها بكل الحب اللي في الدنيا كلاتها يا حاجة لأنها عملت معروف فيا وفي اللي حواليها ما يتقدرش بتمن .
انتفضت "رابحة" من مكانها بغيظ من "نغم" وطريقتها في الكلام للأسف هتعيش وتموت وهي بتكره اسم "نغم" طبع فيها والطبع ما بيتغيرش مهما مر الزمن:
ـ والله وبقى لك لسان تردي بقلة أدب على حماتك بعد ما كنتي خدامة تحت رجليها وهتكشي مجرد ما نفسي يكون في المكان ولما كنتي هتسمعي صوتي كنتي هتتنفضي من الرعب يا بت "حناوي".
بصت لها "نغم" نظرات خاوية وردت عليها قبل ما تسيبها وتمشي:
ـ أهو ربك مبدل الأحوال وبقت "نغم" بنت "حناوي" اللي كنت هتذليها تحت رجليك ست بيتها جوزها هيحب التراب اللي هتمشي عليه ومهننها ومعليها ومغليها فأحسن لك تعيشي اليومين اللي فاضلين لك من عمرك وتشيلي السواد اللي جوه قلبك يا حاجة علشان المظلوم ما يعيش طول عمره مظلوم وربنا هينصفه والظالم ربنا هينتقم منه فعشان ما تكونيش في طائفة الظالمين اللي ربنا هينتقم منهم نظفي قلبك من جوه يا حاجة.
وسابتها "نغم" ومشيت وهي قعدت تجز على أسنانها بغضب وتاكل في نفسها وقالت لها بغضب وهي بتعلي صوتها:
ـ يمين بالله لما جوزك اللي هتتحامي فيه يجي إن ما كانش يرنك علقة قدامي علشان هتغلطي في أمه لا هكون فايبة لكم البيت ويانا يا أنت يا بنت "حناوي" في البيت دي لو ما كنتيش تتربي على لسانك العفش دي في حق حماتك يا قليلة الرباية .
وبعد شوية رجع "سند" لقى أمه شيطة وأول ما شافته اشتكيت له من "نغم" وأنها طولت لسانها عليها وطبعا هو متعود على شكاوي "رابحة" من "نغم" وعارف إن هي اللي بتنكشها بالجامع وبتبدا بأذيتها وكمان عارف إن "نغم" ما بقتش تسكت عن حقها فرضاها بكلمتين ووعدها إنه هياخد لها حقها كلمتين بيريحها بيهم كل مرة ويسيبها ويمشي ولا يعيد ولا يزيد لـ "نغم".
********
بعد مرور شهر كامل، كان بيت حناوى متزين بالأضواء اللي مالية الشارع كله، والفرحة كانت مالية قلوب الكل، واليوم ده كان فرح "علي" و"شيماء" اللي استنوه سنين من الصبر والمغامرة والعذاب، القاعة كانت مزينة بأحدث زينة، والأنوار والورود مالية المكان، وأصوات الزغاريد والرقص الصعيدي الأصيل هزت أركان القاعة، والكل بيبارك ويهلل بمناسبة فرح "علي" والجميلة "شيماء"،
في أوضة التجهيز جوه، كانت "شيماء" قاعدة قدام المراية، لابسة فستان فرحها الأبيض الملكي المنفوش اللي كان حلم حياتها، وحجابها ومكياجها مخليينها زي الملايكة، قلبها كان بيدق بسرعة من رهبة اللحظة ومن كتر الفرحة اللي مش سايعاها، وفجأة اتفتح الباب، وظهر "سند" واقف بطلته الهيبة بجلابيته البيضا ووقفته اللي تملى العين، وهو جاي يقوم مقام أخوها الكبير ويكون سندها وضهرها قدام الكل،
بص لها "سند" بابتسامة دافية ووقار وقال:
ـ جاهزة يا دكتورة ولا لساتك متوترة؟ الفرح برة مقلوب ومستني العروسة اللي هتنور القاعة.
قامت "شيماء" بخطوات مهزوزة من كتر الفرحة، ومدت إيدها وماسكت في دراع "سند" وهي بتستمد منه القوة والأمان، وقالت بصوت مكسوف:
ـ أني جاهزة يا أبو "مازن" ربنا ما يحرمني منك أبدا، كأنك أخويا الكبير اللي مخلتنينيش أحس بأي نقص.
شد "سند" على إيدها بحنان وقال:
ـ إنتي أخت غالية وأني بالفعل أخوكي الكبير يا عروسة، يلا بينا نتوكل على الله، ربنا يفرحك ويكمل ليلتك على خير.
اتفتح باب القاعة الكبيرة، وبدأت الأنظار تتوجه ناحية العروسة وهي خارجه في ايد "سند" واخواتها حواليها هيرشوا الورود بفرحة والزفة الصعيدي اشتغلت بحماس، والكل لف وشاف العروسة داخلة بثبات وجمال ياخد العقل، النظرات كلها كانت متجهة عليهم، وعلي كان واقف في آخر الكوشة ببدلته السودا الشيك وشعره المصفف بعناية، عيونه كانت ثابتة على "شيماء" ومش قادرة تتحرك من حلاوتها وجمالها بفستان فرحها،
خطت " شيماء" خطواتها الأولى على ممشى الزفة، و"سند" سلمها لـ "علي" قدام الكل، وقال له بصوت رجولي واثق:
ـ أمانة يا "علي" تصون وردة العيلة داي، لأنك مهتلاقيش في أدبها ولا ربايتها، وخلي بالك زعلها كانه زعلي واصل.
مسك "علي" إيد "شيماء" بسعادة تكفي العالم، وباسها قدام الكل بحب جارف، وقال بصوت بيوعد بثقة:
ـ داي في عيوني يا "سند"، دي روحي اللي ردت فيا واللي ربنا حافظ لي عليها وممحتجاش توصية.
قعد العرسان على الكوشة، والأجواء كانت خيالية؛ الطبول بتضرب، والناس بترقص، والزغاريد ما بتفصلش، والكل بيبارك ويدعي لهم بالستر والحياة السعيدة، "علي" كان باصص لـ"شيماء" طول الوقت بنظرات كلها عشق وشكر، وهي بتبادله الابتسامة وعيونها بتلمع بالفرحة إن البطل بتاعها رجع يقف على رجليه زي الأول وأحسن كمان والليلة فرحهم،
و"مهرة" كانت بتبص لـ"شيماء" بسعادة مختلفة عن الكل، تعتبر مش أختها دي بنتها الصغيرة رغم فرق السن الصغير إلا إنها كانت الراعي الرسمي ليها من وهي طفلة صغيرة، احتوتها وربتها وكانت بتشيل اللقمة من بقها علشان تطعمها لـ"شيماء"، كانت عيونها بتلمع بدمعة الفرح وشقى السنين وهي بتحاول تجاهدها انها متنزلش،
لحد ما جت أغنية أم العروسة وطبعا "مهرة" و"نغم" مش هيحرموها إنها تقضي اللحظة دي لأن والدتهم تعبانة جداً وما تقدرش على أجواء دي فتقدمت "مهرة" وهي بتمشي ببطء خالص لأنها فاضل أيام بسيطة على ولادتها لكن قررت إنها ترقص رقصة أم العروسة مع "شيماء" ،
وأول ما طلعوا على المسرح التلاتة كانوا بيحضنوا بعض كأنهم بيحضنوا فرحتهم اللي ماجتش بالساهل وهما بيحاولوا يخفوا دمعتهم ورا ابتسامة أخيرا طلعت من قلوبهم،
ورقصوا على الأغنية الشهيرة بحركات هادية ورقيقة:
الفرحة اللي أنا حاسس بيها لا أنا قادر أقولها ولا أحكيها، أختي حبيبتي وضي عيوني
لعريسها بإيدي هوديها، من يوم ما وعينا على الدنيا ما فرقناش بعضنا لو ثانية، على عيني إنك تبعدي عني دمعتي مش قادر أخبيها،
وأوعي تنسي إن أنا حضنك سرك، أخوكي، سندك، ظهرك، وأوعي تخافي من أي حاجة
وهجيبلك حقك لو ضايقك وأوعي تنسي إن أنا حضنك سرك، أخوكي، سندك، ظهرك
وأوعي تخافي من أي حاجة وهجيبلك حقك لو ضايقك.
والدجي غير الأغنية وجاب أغنية أمورتي الحلوة ورقصوا وياها وفي حضنها ببهجة تانية وفرحوها وانتهت أغنيتهم ورقصتهم وهما في حضن بعض في مشهد يبكي من الفرحة،
بعد ما خلص الفرح وخلصت الليلة الطويلة، ودخلوا بيتهم الجديد اللي اتجهّز على أعلى مستوى، قفل علي الباب وراهم، والتفت لها وبص في عيونها بحب طاغٍ وابتسامة دافية،
قرب منها خطوة وباس جبهتها بحنان وقال بصوت مبحوح ودافي:
ـ ألف مبروك يا حبيبي ، ألف مبروك لأننا عدّينا العاصفة وبقينا لبعض للآخر.
رفعت "شيماء" عيونها ليه وقالت بدلال وخجل:
ـ الله يبارك فيك يا "علي" تعبنا كتير لحد ما وصلنا للحظة دي .
مسك وشها بين إيديه بحب وقال:
ـ التعب كله يهون قصاد ضحكتك دي، أني بحمد ربنا كل ثانية إنك مسبتنيش وإني قدرت أرجع أقف على رجلَي عشان أستاهلك، أني بحبك يا "شيماء" ومش هزعلك أبدا ولا هقدر أبعد عنك غير لما الموت ياخدني.
حطت إيدها على قلبه وقالت بصوت هادي:
ـ وأني بحبك يا "علي" ، ومستعدة أعيش معاك عمري كلاته والمهم إني هكون في حضنك وبس.
ضمها "علي" لصدره بكل قوته، وفضلوا واقفين سوا بيعوضوا كل لحظة وجع ویأس عاشوها، وبدأت حكايتهم الحقيقية في دارهم الجديد بالحب والستر والرضا.
******
ـ ها جاهز يا "حسام" ومظبط امورك تمام لمقابلتها؟
بص لها "حسام" من بعيد وهي قاعدة قدام البحيرة والهوا ونسيمه بيداعب جفونها ، بيملي نظراته من شكلها اللي وحشه، بيحاول يهدي ضربات قلبه السريعة بمجرد إنه شافها بس، حب الطفولة والعمر والأيام، حب الوجع والفرقه بينهم وسنين الشقى اللي عاشوها هما الاتنين، الشجن اللي بقى مالي قلوبهم أخيرا ربنا قدر له إنه ينتهي، كل ده و"سند" واقف ساكت وسايبه يستعد ويحاول يهدي ثورة مشاعره، لحد ما ممر دقايق قليلة ورد على "سند":
ـ جاهز يا أبو "مازن".
ربت "سند" على ضهره وهو بيشجعه:
ـ احنا بقى لنا شهرين بنمهد لظهورك في حياتها والدكتورة بتكلمها عنك كتير لحد ما وصلنا معاها أنها تحلم ترجع لها من جديد، وكمان هي بقى معاها موبايلها وتقريباً اتعلمت عليه كل حاجة، الحمد لله أخدنا شوط كبير في علاجها طول الشهور اللي فاتت داي علشان ترجع إنسانة طبيعية تاني، يالا يا بطل ربنا معاك وترجعوا لبعض بالسلامة، اني هناك في الاستراحة داي لما تخلصوا كلام هاتها وتعالى.
ومشي وسابه وهو اتقدم بخطواته وقرب منها وقعد نص قاعدة ورا ضهرها وعمل نفس حركته اللي كان دايما معودها عليها وغمى عيونها من ورا وهو بيبدأ كلامه معاها بغنوته اللي دايما كان بيقول لها جملتها أول ما يتقابلوا:
ـ حبيبى اللى بحبه ما شفتش زيه حد عينيه حنان وقلبه بستان أمان و ورد غالى وطول عمره غالى ومقامه فى قلبى عالى خلانى عشت جنبه أحلى وأجمل ليالى ...