رواية النغم الحزين بقلم فاطيما يوسف
رواية النغم الحزين الفصل الثالث والاربعون43 بقلم فاطيما يوسف
رفعت حاجبها باستنكار وقالت:
ـ يقطع "جليلة" وسنينها، الست "نورا" من امبارح بالليل محطتش الزاد في بقها وهتبكي ليل ونهار وهتقول عايزة "سند" ومفيش على لسانها غير انها رايدة تشوفك يا سي "سند" بيه.
نفخ '"سند"' بضيق وسألها:
ـ يعني إيه يا '"جليلة"' مقاطعة الوكل؟ آمال إنتي لازمتك إيه؟
زمت '"جليلة"' بخنقة:
ـ والله اني والدكتورة اللي هتتابعها كل يوم عملنا اللي ما يُعمل وياها وهي اللي راسها أنشف من الحجر.
بص '"سند"' على '"نغم"' اللي نايمة جنبه وطبعاً فاقت لما سمعت مكالمة '"جليلة"' الساعة خمسة الصبح ونفخت بضيق مجرد ما جت سيرة '"نورا"', ورد '"سند"' على '"جليلة"':
ـ خلاص يا '"جليلة"' سيبيها لحالها لما الجوع هيقرصها هتطلب الوكل منها لنفسها.
مطت '"جليلة"' شفايفها باستنكار وهي بتكمل له الباقي:
ـ هي مش قاطعة الوكل بس يا سي '"سند"' بيه؛ داي كمان عورت يدها النهاردة والدَكتورة لحقتها على آخر لحظة، وهتبكي بكا واعر يشق القلوب، وواقفة قدام الشباك ليل ونهار كيف العيل الصغير اللي هيستنى أبوه، والدَكتورة هتقول إنها لازمن تشوفك النهاردة عندها علشان تخلي مسؤوليتها من اللي ممكن تعمله في روحها .
كل ده و'"نغم"' قاعدة جنبه مش طايقة نفسها وحاسة إن روحها رايحة منها، لحد ما سمعت '"سند"' هيرد على '"جليلة"':
ـ حاضر يا '"جليلة"' على بعد الضهر اكده هاجي تكون الدَكتورة وصلت .
بعد ما خلص مكالمته مع '"جليلة"' اتنهد بضيق ومن اللحظة دي بدأت مشاكل '"نورا"' الحقيقية تظهر بعد ما حست بالأمان اتعلقت في اللي رزقها بإحساس الأمان، وده فوق تحمل وطاقة '"سند"' فلازم ينفذ اللي كان ناوي عليه ولازم يحصل،
قربت '"نغم"' منه وسألته بشجن:
ـ هو ليه مينفعش أعيش وياك واني مخيرة ما بين حاجة يا اما السعادة يا إما الأمان يا '"سند"'؟
ليه الاتنين ميبقوش من نصيبي وياك؟
إني أحس بالأمان وفي نفس الوقت أفرح بيك وبحبك وبقلبك ليا لوحدي؟
أني تعبت يا '"سند"' ومبقتش محتملة واصل، خلاص صبري فاض بيا .
شدها جنبه برفق وحضن وجنتها بكفوف إيديه وقال لها بنبرة حانية:
ـ ليه يا حبيبي بس الخوف داي كلاته؟!
كل الموضوع إنها واحدة مريضة ميتخافش منها واصل، وأني مطمنك بكل العهود والوعود إن مفيش غيرك يا '"نغم"', والله ودي يمين للمرة المليون مفيش ست بعدك هتدخل حياة '"سند الناجي"' مهما كانت تكون، دي عمل خير من واحدة مريضة لا حول ليها ولا قوة،
يالا نامي وكمان ساعتين نقوم نروح لها سوا علشان خاطري، وأني وعدتك مهروحش عندها من غيرك وكل حاجة قدام عيونك لحد ما أعمل اللي لازمن يتعمل .
على الضهر راحت معاه واول ما وصلوا كانت '"نورا"' قاعدة على كرسي هزاز وملامحها شاردة وهي بتبص للشباك ولابسة بجامة بيضا بقلوب حمرا وشعرها البني الناعم منسدل على ظهرها، واول ما دخل '"سند"' و'"نغم"' وحست بوجوده قامت راحت قدامه وهي بتشده من إيده بسعادة وقالت له :
ـ '"سند"' تعالى وحشتني قوي، اني زعلانة منك.
'"نغم"' اتجننت من المنظر اللي شافته وهي بتقوله كده وبتشده من إيده ووقفت بينهم و'"سند"' كان واقف بيبص على '"نغم"' ولاحظ غيرتها الشديدة وبقى الموقف متوتر جداً، لحد ما '"نغم"' شدت إيديها من إيد '"سند"' وهي بتقول لها بحدة وبتجز على أسنانها بغضب:
ـ عيب اكده يا '"نورا"' سيبي يده مينفعش تمسكيها اكده واصل.
بصت لها '"نورا"' بنظرات طفولية حزينة وردت عليها بجرأة:
ـ حرام عليكي إنتي وحشة، '"سند"' حبيبي وبَطلي اللي أنقذني من الأشرار.
'"نغم"' كانت واقفة هتتجنن من الغيرة وهي بتبص لهم هما الاتنين، '"سند"' بص لـ '"نورا"' وهو بيسالها بنظرة عادية بدون ابتسامة وبينفخ بضيق وهو ماسك إيد '"نغم"':
ـ مالك يا '"نورا"' سمعت إنك مانعة الوكل إنتي متعرِفيش إن اكده غلط على صحتك؟
ردت '"نورا"' بحزن وهي بتبص له بتمني وفجأة قربت منه وسندت راسها على صدره وقالت له :
ـ وحشة من غيرك يا '"سند"'؟
'"نغم"' في اللحظة اتجننت وبعدتها عنه ووقفت ما بينهم وهي بتبص لـ '"سند"' وتسأله بغيرة خلتها شايطة:
ـ هو ده اللي انت عايزني أتحمله يا '"سند"'؟
والله لا هسيب لك البيت والدنيا باللي فيها وهروح دار أبوي ولا اني اتحمل دلع البت داي .
'"سند"' بعدها فورا عنه وهو بيبص لها بغضب ومسك إيد '"نغم"' بتملك قبل ما تمشي وبص لـ '"نورا"' وكلمها بحدة:
ـ عيب اكده يا '"نورا"' إنتي ست متجوَزة ومينفعش تترمي في حضن راجل غريب عنك، إنتي كبرتي ومعدتيش صغيرة على دلعك دي .
'"نورا"' في اللحظة دي انكمشت على نفسها وضمت حوالين صدرها بإيديها شكل ما تكون خايفة ومستنية في اللحظة دي إن '"سند"' يمد إيده عليها ويعنفها زي الكل ما كان بيعمل معاها، غير إن ملامح '"نغم"' كانت حادة جداً ومتعصبة وده خلى '"نورا"' بعدت عنهم الاتنين بسرعة وركنت في جنب الأوضة وقعدت على الأرض ولملمت جسمها حوالين نفسها وهي ضامة رجليها ودفنت راسها في رجليها وهي بتترجاهم بنبرة مرعوبة منهم:
ـ حرام عليكم متضربونيش... '"نورا"' تعبت من الضرب، أني هسمع الكلام بس متزعقوليش أني خايفة قوي.
وبعد ما خلصت كلامها كانت بتتجنب النظر ليهم هما الاتنين بطريقة خلتهم الاتنين واقفين مصدومين من رد فعلها وخلتهم شايفين نفسهم صغيرين قوي، هما للأسف ميعرفوش طبيعة مرضها ولا تحولاتها، بص '"سند"' لـ '"نغم"' وأخدها في جنب في الأوضة بعيد عن '"نورا"' المنكمشة على نفسها وعاتبها:
ـ مشكلتك إنك هتتعاملي معاها على إنها إنسانة طبيعية شكلي وشكلك، المفروض نعاملها بمنتهى الإنسانية والهدوء لأن عقلها غير يمكن عقل الطفلة أحسن منها وهتفهم عنها.
'"نغم"' كانت بتوزع نظراتها ما بين '"سند"' وما بين '"نورا"' اللي منظرها يقطع القلب، بنت جميلة ورقيقة وهادية واللي يدقق النظر في ملامحها لا يمكن يقول إن عندها نقص أبداً، كان جسمها بيرجف من الخوف اللي هما ميعرفوش سببه، رعب وعياط هيستيري على كلمتين ونظرتين غصب منهم وصلها للانهيار بالشكل ده، وردت '"نغم"' بصدمة على '"سند"':
ـ أني مفهماش ليه البكا دي كلاته عاد؟
وليه حسيتها انصدمت بالشكل دي مع إننا يدوب قلنا لها كلمتين عاديين ميوصلوهاش للدرجة الهستيرية داي؟
الاتنين بقوا واقفين مصدومين ومش عارفين يردوا على بعض لحد ما '"سند"' قال لها:
ـ الدكتورة على وصول هي اللي هتفهمنا حالتها.
وكمل بنبرة فيها شجن وهو مسهم نظراته عليها:
ـ أني خلاص ماشي في إجراءات طلاقها من '"سمير"' وجهزت كل حاجة فاضل موافقة '"سمير"' لما أقعد وياه النهاردة، وبعد اكده المفروض إني أوديها لأهلها وخصوصاً إني نحيت أخوها القاسي من طريقها، بس جواي حتة هتلومني اني مهكملش مساعدتها وأعالجها، هحسها كيف أختي أو بتي لو مكانش ليها حد يساعدها في ضيقتها، مقادرش اعملها وأرميها لهم تاني وأني واثق من جواي إنها هتتحبس وهتتهان وهتتذل من أمها ومش بعيد ينتهي مصيرها بإنها تخلص من روحها.
وكمل بنفس نبرة الشجن وهو بيوجه أنظاره لـ '"نغم"' :
ـ معلوم إنتي وغيرك هتقولوا ابعتها لأهلها انت مش تُبقى أحن عليها من أمها وخواتها، وكلامكم صُح إن أهلها أولى بيها، بس في حتة في ضميري منعاني إني أعملها طالما إني مقتدر أحميها وأعالجها، يمكن اللي هعمله وياها يترد لي في عيالي لو وقعو في ضيقة ملهاش مخرج غير إرادة ربنا والخير اللي هعمله.
وكمل وهو بيسأل '"نغم"' :
ـ بس فيه عائق وحيد هيخليني مقادرش أكمل وياها يا '"نغم"', تعرِفي إيه هو؟
نزلت عيونها بخجل من نفسها وهي عارفة الإجابة اللي يقصدها ومردتش عليه وخصوصاً وهي شايفة بعينيها حالة '"نورا"' الصعبة اللي تفطر القلب، مد إيده ورفع وشها ليه وخلاها تواجه عيونه وكمل:
ـ إنك موثقاش في جوزك ابو ابنك اللي تعب إنه يثبت لك إن مفيش غيرك في قلبه، ماهو أني مفاتحش قلبي مساكن شعبية يستقبل أي ست تقابله من منظورك؟
وتابع كلامه وهو بيقرب منها وبيمسكها من كتفها:
ـ لو بصيتي لنفسك زمان ومشيت بتفكيرك اني مليش صالح بيها واخترت راحة بالي كنت عِملتها وياكي قبل سابق وممدتش يدي ليكي في عز ما كنتي محتاجة معجزة تنقذك من اللي كنتي فيه، حطي نفسك مكانها وافتكري وقت ما كنتي ضعيفة لاحول ليكي ولا قوة وربنا بعت لك رحمته فيا كزوج، وبرده بتعني للمسكينة داي رحمة بس كفاعل خير علشان إنتي خابرة زين اني لا عشقت ولا هعشق ست غيرك يا '"نغم"'.
'"نغم"' غمضت عيونها بخوف إنه يضيع منها بعد ربنا ما رزقها بيه، من حقها تخاف عليه حبها الأول والأخير، أبو ابنها، واتكلمت بلسان بيرتعش:
ـ أني خايفة يا '"سند"' ومن حقي أخاف تضيع مني، اني عيوني شافتها ست جميلة هتقرب منك، شافتها عايزة تمتلك حضنك، مشيفهاش غير انها هتاخد مكاني في يوم من الأيام.
ضرب '"سند"' كف على كف وهو بيحاول يفهمها ويخليها تستوعب:
ـ يا ماما افهمي وشغلي عقلك دي شوي، شيلي من دماغك فكرة إن فيه واحدة هاتخدني منك والحوارات الهبلة داي، اني مبقتش عيل صغير عندي بنت داخلة الجامعة كمان كذا شهر وأخوها وراها بسنتين، دي أولا، وثانيا؛ رغم كل وعودي ليكي اللي انتي ممقتنعاش بيها إني مفيش ست بعدك هتدخل حياتي إلا إني بعرفك وضع المسكينة داي للمرة المليون، إنها لا تصلح للجواز مني ولا من غيري غير لما تخف إن شاء الله، ودلوك لما الدَكتورة تاجي هتسمعك بلسانها إن رحلة علاجها طويلة يمكن تاخد سنين وكمان هتفسر لنا قربها واحتياجها لوجودي أني بالذات دلوك.
جت الدكتورة "هالة" وقعدت معاهم وسمعت منهم كل الحكاية واللي حصل لها ونغم حكت غيرتها ومخاوفها، والدكتورة تفهمت الوضع كله ودخلت لـ"نورا" حاولت تهديها بطريقتها،
بعد دقايق كانت "دكتورة هالة" خرجت من جوه بعد ما اطمنت على "نورا" وطلبت إنها تاخد وقتها في النوم بعد الانهيار العصبي اللي جه لها، قعدت مع "سند" و"نغم" في ركن هادي جوه الأوضة، وبدأت تنظم أوراقها وتظبط قعدتها عشان تشرح لهم الصورة كاملة بوضوح تام وبهدوء متعودة عليه،
بصت "دكتورة هالة" لـ "سند" و"نغم" وقالت بهدوء وحكمة بعد ما سمعت من "نغم" خوفها وغيرتها على "سند" بكل صراحة :
ـ خلوني الأول أريح قلوبكم انتم الاتنين، وبالذات إنتي يا ست "نغم"، لأن اللي شوفتيه من شوية دي مش حب رومانسي ولا تعلق واحدة بسترجى بيه راجل تتعلق بيه واصل! الحكاية أعمق بكَتير وأقسى بكَتير من اكده.
بصت "نغم" للدكتورة باهتمام ولهفة وعيونها لسه آثار الصدمة فيها، وقالت:
ـ أمال إيه يا دكتورة؟ داي كانت هتموت وهي لازقة فيه وكأنها لاقية طوق نجاة، وأني كنت حاسة النار هتسري في روحي!
ابتسمت الدكتورة ابتسامة خفيفة ومطمنة، وابتدت تحكي لهم التتبع النفسي لحالة "نورا" خطوة بخطوة:
ـ بصي يا ست "نغم".. "نورا" من ساعة ما اتولدت وهي عايشة في بيئة كلها قهر وتسلط، أبوها مات وهي لسه صغيرة، وسابها لبيت فيه إخوة رجالة قساة، بيعاملوا البنت على أنها حيطة مايلة وسلعة تتباع وتشتري، مفيش حنان، مفيش سند، مفيش كلمة طيبة. ضرب وإهانة وقهر مستمر لحد ما كبرت وهي شايلة جواها رعب طفولي مخزن في عقلها الباطن، فلما اتجوزت قبل اكده من راجل عجوز وبعدها"سمير"، البؤس زاد واتأصل فيها الضرب والإهانة لحد ما وصلت لحافة الموت.
سكتت الدكتورة ثواني وراحت باصة لـ "سند" وقالت:
ـ لحد ما ظهر "سند". الراجل اللي وقف قدام الكل، وجاب حقها، وطلعها من جحيم جوزها، وحماها حتى من أخوها ابن أمها وأبوها وهو أكتر واحد عـ.ــذبها وأذاها نفسياً، وأمنها في دار محترمة، هنا بقى حصل 'الخلط النفسي' اللي بيحصل مع الناس اللي في حالتها؛ "نورا" مابتشوفش "سند" كحبيب ولا زوج خالص، عقلها الباطن شاف فيه "الأب" اللي مات وسابها بدري لبهدلة إخواتها، وشافت فيه "الأخ الكبير" والسند اللي عمر ما حد دافع عنها زيه، هي بتدور على الأمان المطلق، وأول ما لقت الأمان ده متجسد في شخص "سند"، لزقت فيه بالطريقة دي كطفلة تايهة خايفة يرجعوا يضـ.ــربوها وياخدوها تاني، هي مش شايفه فيه راجل وست، هي شايفه فيه الحيطة السد اللي هتحميها من طوفان الدنيا.
نزل كلام الدكتورة على قلب "نغم" زي نقطة مية ساقعة طفت نار الغيرة والوجع اللي كانت قايدة جواها، حست إن الصورة اتوضحت قدامها كأنها مرسومة قدام عينها، وبصت لـ "سند" بكسوف وندم خفيف لأنها اتسرعت في حكمها عليه،
كملت دكتورة "هالة" كلامها وهي بتوجه كلامها لـ "نغم" بجدية:
ـ وعشان اكده يا "نغم"، دورك إنتي جاي ومهم جداً.. لو "نورا" شافت منك الحنية، وبطلتي تشوفيها ضرة وخصم، لو فتحتي لها قلبك واحتضنتيها كإنسانة مكسورة، هتشوف فيكي "الأم" اللي اتحرمت منها، و"الأخت" اللي تحكي لها أسرارها، و"الصديقة" اللي تطمن لها، وساعتها هتلاقيها بتجري عليكي إنتي وتستخبى في حضنك إنتي مش في حضن "سند"، لأن الأنثى في وقت الكسر بتدور على حضن أنثى زيها يطبطب عليها، مش على راجل تخاف منه حتى لو كان تحت مسمى جوزها، ودي طبعاً لانها برده محرومه من إحساس الأم والأخت والصديقة ما شافتش أي نوع من دول في حياتها.
حست "نغم" برعشة في قلبها من كلام الدكتورة، وبصت لـ "سند" اللي كان بيبص لها بنظرة رضا وتأكيد على كلام الدكتورة، فقالت "نغم" بصوت مهزوز ودافي:
ـ يعني أني لو قربت منها وعاملتها كأختي، هتهدى ومش هتتعلق بـ "سند" بالطريقة دي؟
ردت الدكتورة بثقة:
ـ أكيد.. بس محتاجين نمشي على خطة علاج واضحة وصحيحة، ودي بيوديني للنقطة التانية والمهمة جداً في حالتها.
سأل "سند" بجدية وهو بيعدل قعدته:
ـ إيه هي النقطة التانية يا دَكتورة؟ قولي وأني تحت أمرك، أي حاجة تخليني أخلصها من العذاب دي أني هعملها.
اتنهدت الدكتورة وقالت بتركيز:
ـ وأني هتابع حالتها وهي نايمة وبتهلوس، لاحظت إنها بتنطق اسم شخص تاني، وبتتكلم عن إنسان قديم في حياتها قبل ما تتجوز "سمير" أو غيره، سألتها واستفسرت منها، وطلع إن "نورا" زمان كانت متجوزة شخص تاني أو كانت مرتبطة بقصة حب حقيقية طاهرة، وأخوها القاسي هو اللي هددها وطفشه وكسر قلبها ودي خلاها اتجوزته من ورا أهلها علشان تخلص من خنقة أخوها ليها وبعدها اكتشف أخوها الموضوع وطلقها منه من قبل حتى ما يدخل عليها وجوزها بالغصب لـ "سمير" وغيره عشان مصلحة تانية، "نورا" لحد اللحظة دي، عقلها وجرحها الأساسي واقفين عند النقطة دي، هي بتحلم بالشخص دي دايماً، وحاسة إن حياتها اتقطعت يوم ما فرقوها عنه.
بص "سند" باستغراب وقال:
ـ شخص تاني؟! مين دي؟ أني أول مرة أسمع الكلام دي!
كملت دكتورة هالة:
ـ دي بقى يا حضرة المفتاح السحري لعلاجها! لو قدرنا نوصل للشخص دي، ونعرِف هو فين دلوك، وهل لسه متذكرها وهيحبها ولا لأ، ولو لسه فيه أمل إنه يدخل حياتها تاني ويصلح اللي أفسده أهلها، دي هيصنع معجزة في شفائها، لأن إحساسها إن فيه حد كان بيحبها بجد ولسه بيدور عليها أو مستنيها، هيرجع لها ثقتها في نفسها وفي الحياة، وهيخليها تبطل تدور على الأمان عند شخص تاني كيف حضرتك.
بص "سند" لـ "نغم" ورجع بص للدكتورة وقال بقلب جامد:
ـ تمام يا دكتورة.. اعتبريني من اللحظة دي بدأت أبحث عنه، هسأل وهستفسر لحد ما أوصل له، وأعرف كل حاجة عنه، ولو ليه نصيب يرجع من تاني، أني هكون أول واحد يسهل له الطريق.
ابتسمت دكتورة هالة بارتياح وقالت:
ـ عظيم جداً يا أستاذ "سند".. وكمان فيه مهمة تانية مطلوبة منكم انتم الاتنين كفريق واحد، كتبت لكم شوية مهام يومية تنفذوها معها؛
أولاً؛ ممنوع أي صوت عالي أو حركة مفاجئة قدامها، عشان عقلها ما يترجمش دي لـخطر وضرب كيف ما اتعوَدت في بيت أهلها ومن جوزها "سمير"
ثانياً؛ لازم تشركيها يا "نغم" في تفاصيل يومها على قد ما تقدري ، حسيسها إنها جزء من العيلة مش نزيلة في مستشفى أو ملجأ،
ثالثاً؛ بخصوص مامتها وأهلها.. مبدئياً اكده وجود مامتها في الوقت الحالي هيجيب نتيجة عكسية تماماً وهيرجعها لورا سنين بسبب الخوف، لكن لو قدرنا نطمئنها تدريجياً إن أي إهانة مش هتتكرر تاني، وإن فيه سند وعزوة وراها، ده هيبقى أفضل بكتير.
قامت دكتورة "هالة" وهي بتلم شنطتها وقالت بابتسامة دافية:
ـ أني هسيبكم دلوك وهمشي وراي استشارات تانية وكتبت لكم الأدوية والتعليمات في الورقة داي، فكِروا في كلامي زين، وشوفوا موضوع الشخص اللي كانت بتحبه دي، لأنه فعلاً طوق النجاة الحقيقي لـ "نورا".
قام "سند" مع الدكتورة ووصلها لحد الباب وشكرها بامتنان، ورجع لـ "نغم" اللي كانت قاعدة مكانها سارحة في كلام الدكتورة وكل اللي عرفته عن "نورا"، قرب منها "سند"، وقعد جنبها على الكرسي، ومد إيده مسك كفها بحنان وقال بصوت مبحوح ودافي:
ـ ها يا ست "نغم".. لساتك زعلانة مني؟ ولا قلبك ارتاح بعد ما فهمتي الحكاية؟
بصت له "نغم" وعيونها بتلمع بدموع الفهم والإنسانية، وسحبت إيدها بحركة رقيقة وحطتها على لحيته وقالت بصوت كله حب:
ـ أني آسفة يا "سند" آسفة إني اتسرعت في ظني فيك، وكنت غرقانة في أنانيتي وغيرتي لحد ما نسيت إن فيه إنسانة بتموت بالبطيء قدامنا، كلام الدَكتورة فتح عيني على حاجات كَتير قوي وأني معاك، من بكره هنفذ كل اللي طلبته الدكتورة، وهعتبر "نورا" كيف أختي اللي مقصرة في حقها، وهساعدك لحد ما نرجع لها حياتها ونلاقي الشخص اللي هينقذها بجد.
دق قلب "سند" بالفرحة والاعتزاز بعقلها الكبير وشدها لحضنه بكل قوته، وطبع بوسة طويلة على راسها وقال بصوت رجولي :
ـ يا زينة البنات إنتي عمرك ما خيبت ظني فيكي أبداً، وعارف إن قلبك أبيض كيف اللبن الحليب ،يلا بينا ندخل نطمن عليها سوا، ونبدا صفحة جديدة نقفل بيها باب الوجع لكل الناس اللي حوالينا.
قامت "نغم" معاه، وفتحوا باب الأوضة بالراحة، ودخلوا وهما بيبصوا لـ "نورا" النايمة بهدوء على السرير، وحسوا إنهم قدام اختبار إنساني جديد، بس المره دي، هيدخلوه وهم إيد واحدة وقلب واحد، مفيش حاجة تقدر تفرقهم أبدًا.
******
"رابحة" كانت قاعدة في الجنينة حزينة على حال "سمير" واللي حصل له رجع "سند" من شغله وهو ناوي يدخل عند "سمير" ويفتح موضوع طلاق "نور" بعد ما حس ان صحته اتحسنت وبقى كويس جدا شاف امه قاعدة وحزينة قرب منها وهو مبتسم كعادته وباسها من راسه وسالها:
ـ كيفك يا امي شايفك زعلانة وباين عليكي عدم الراحة؟
جاوبته "رابحة" بصوت حزين:
ـ هو بعد اللي حصل لاخوك يا ولدي ما احزنش دي حالة يصعب على الكافر.
وكملت وهي بتلومه:
ـ وبصراحة اكده اني زعلانة منك لانك اكرمت اللئيمة اللي عملت في اخوك اكده المفروض كنت ترجعها لاهلها وتخلصنا منها بدل ما انت هتعطف عليها وهي السبب في دمار اخوك دي يا حبه عيني بقى حابس نفسه في الاوضه وما هيخرجش منها واصل بعد البلد كلاتها ما عرفت اللي حصل له ما بقاش له عين يخرج من الدار اني حاسة انه هينتحر او يعمل حاجة في روحه عفشة.
اتنهد "سند" بتعب على حال اخوه واللي حصل له لانه كان الجاني على نفسه وما سمعش تحذيراته وحاول يفهم امه:
ـ شوفي يا امي من وقت ما عرفنا قصة "نورا" واني كنت منبه عليه يبعد عنيها وما يجيش ناحيتها واصل، مش هنفتح في القديم ولا هنقول مين اللي غلط ومين اللي ابتدى الاتنين مجني عليهم يا امي، هي ما ذنبهاش حاجة ان امها خدعتك وجوزتها لولدك وهي ما تصحلش للجواز، ولا ذنبها حاجة في ان ابنك اعتدى عليها وعاملها بابشع معاملة تتحملها اي ست فطبيعي واحدة زيها مش في عقلها تدافع عن نفسها بالطريقة اللي شايفاها ولو سالنا القانون والعادات والعرف هيقولوا ان هي بريئة من فعلتها لانها مرفوعه عن الخطا بحكم الدين والشرع.
وكمل "سند" وهو بيطلب من امه:
ـ دلوك يا امي الغلط لازم يتصلح ندخل دلوك لـ "سمير" علشان يتمم اجراءات الطلاق ويرمي عليها اليمين ويمضي على قسيمة الطلاق، عايزك تدخلي وياي تقنعيه لانه حالته النفسية صعبة وبعدها تسيبيني وياه تحدت شوي اني واخوي يمكن ربنا يصلح حاله المرة دي ويشوف ان عقاب ربنا بداية لانه يغفر له ذنوبه.
عاندت "رابحة" فكرة طلاق "نورا" وهي بتعترض على راي "سند" وحكمه كعادتها:
ـ وليه تطلق منه ولا هو علشان ضيعت مستقبله كراجل تطلق منه وتروح تشوف راجل غيره وتعيش حياتها بعد ما كسرته عقابها انها تفضل على ذمته طول العمر؟
"سند" دور وشه للناحية التانية ونفخ بضيق من تفكير امه وحاول يفهمها ويفهمها:
ـ عقاب ايه يا امي اللي هتتحدتي عني في واحده كيف دي جوازها من ولدك من البدايه كان باطل، حاولي تفهميني يا امي داي لا تنفع لولدك ولا تنفع لراجل غيره ولا تنفع للجواز من اساسه، داي مريضة وعلى حافة الجنون دي إن ما كانتش اكده واظن كلاتكم شفتوا جنانها واللي عملتو فطلعيها من دماغك خالص واخرجيها من حياه ولدك بدل المرة الجاية لو فكرتي تحطي في دماغه ان هو يرجعها البيت وتعيش خادمة تحت رجليه كيف ما هتقولي يبقى ابنك هيرجع لك جثة ارجوك يا امي المرة دي اسمعي كلامي.
خافت "رابحة" من كلام "سند" وخصوصا ان كل حاجة كان بيقول عليها حصلت وفي الاخر "سمير" خسر اغلى حاجة عنده لانه ما سمعش كلام اخوه ولا نصايحه وتنهدت بتعب وغلب على حال ابنها "سمير" وهي بتقوم من مكانها:
ـ حاضر يا "سند" هعمل اللي انت رايده قوم ندخل له دلوك، بس حاول تتحدت وياه بهدوء بلاش الحدة والعصبية وياه اللي فيه مكفيه يا ولدي خده بالسياسة واصل.
ابتسم "سند" بهدوء وطمنها وهو بيقرب منها وبيسندها علشان تمشي جنبه لان صحتها تعبت وما بقتش زي الاول وخصوصا من بعد اللي حصل لـ "سمير" هز جسمها جامد:
ـ اطمني يا امي من غير ما تطلبي مني اللي ما هيشوفش من الغربال يبقى اعمى، ودي أخوي ما هحبش حد في الدنيا قده.
ومشيوا هم الاثنين ناحيه اوضه "سمير" واول ما دخلوا الاثنين برقوا بصدمة لما شافوا "سمير" قاعد على السرير ماسك مصحف بيقرا فيه ولأول مرة "سمير" يعملها في حياته في اللحظة دي "سند" حس ان المهمة اللي جايه علشانها ما بقتش صعبة نهائي وان اخوه عرف الطريق اخيرا بعد ما داء طعم العقاب من ربنا سبحانه وتعالى على كل اللي عمله وقرب منه "سند" وباسه من راسه وهو بيساله:
ـ ازيك يا اخوي عامل ايه النهارده الدكتور هيقول ان صحتك اتحسنت الحمد لله وتقدر تعيش حياتك طبيعية تخرج وتعمل اللي انت عايزه عادي جدا.
قفل "سمير" المصحف وهو بيصدق وبص لـ "سند" ورد عليه بحزن لاول مرة يبقى في نبرة "سمير":
ـ ملهوش لازمة الخروج يا أخوي اني انكتب علي اعيش في الاوضه دي لحد ما اموت ما هقدرش اخرج واني هشوف نظرات الناس ليا اني راجل ناقص بعد ما كنت هدب في الارض دب.
حاول "سند" يخفف عنه:
ـ والناس مالها ومال احوالك يا "سمير" كل واحد الله يعينه على حاله ما حدش فاضي يركز في حياة التاني واذا كان ولا بد انك تخرج يبقى علشان حالك ومالك وحاجة مهمة كمان انت غفلان عنها يا "سمير" وعيالك.
كمل "سند" وهو بيحاول يخرج "سمير" من حالته وبيفتح قدامه طاقه نور جديدة عمره ما جربها ولا جرب يقرب منها ولا جرب يحتوي عياله قبل كده ويحس معاهم بمعنى الابوه:
ـ عيالك اللي انت طول عمرك حارم نفسك من برهم انت هتحتاجهم بعد عمر طويل كيف ما هم محتاجينك دلوك، صدقني ما هتلاقيش الراحة في الدنيا غير في حضن ولادك، هما اللي هينسوك كل همومك وهينسوك الكسرة اللي انت حاسس بيها، وكمان تخرج تراعي ارضك ومصنعك اللي انت عمرك ما هوبت ناحيتهم واصل، الشغل برده هيلهيك وهينسيك كل حاجة عفشة انت مريت بيها وما هيبقىش عندك وقت لا للحزن ولا البكا على اللي راح.
لأول مرة "سمير" قلبه يدق بتيهة ولاول مرة يحس بمعنى الابوه اللي دايما حارم نفسه منها ولاول مره بسبب كلام "سند" يحس قد ايه فعلا هو محتاج لعياله وقربهم لكن من جواه حاسس انه اقذر ما يكون انه يقرب لاولاده ورد على اخوه بتخوف:
ـ ولادي ما يستحقوش اب زيي اني عار عليهم واخاف عليهم مني، اخاف يتلوثوا بسبب سمعه ابوهم خليهم يكبروا على انك ابوهم ولا انهم يكبروا على انهم يعرفوني من الاساس.
"سند" حس بوجعه وكان لازم يخرجه من حالة الضياع ويعمل منه انسان جديد راجل بجد وحاول يحتويه ويحتوي وجعه:
ـ انت دلوك هتمسك مصحف ربنا وهتقرا فيه معنى اكده انك اتغيرت يا "سمير", ربنا سبحانه وتعالى هيقول في القران الكريم ان الله يغفر الذنوب جميعا ما عدا الشرك به، يعني مجرد ما ربنا يحس انك تبت عن معصيه توبه نصوحة هيتقبل منك توبتك وهتبقى عبد من عباده الصالحين لو مشيت على طريق الهدى والهدايه، وفي الوقت دي ولادك هم اللي هيتشرفوا بيك والزمن والايام بينسوا الناس وهم ملهيين في حالهم وفي همهم، ولادك لساتهم صغيرين ما هيفهموش حاجة فلما يكبروا على انك جارهم وهتحبهم وهتخاف عليهم صدقني وقتها هيكونوا "سندك" وضهرك.
"سمير" ابتسم بحزن على كلام "سند" ومصمم على اللي في دماغه:
ـ كل حاجة هتتنسي الا السمعه والشرف اللي كيف اللبن لو اتعكر عمره ما يصفى، ولادي لو مشيت جنبهم في شارع هيشاوروا عليهم انهم ولاد مجرم والسيره ما بتموتش مع الزمن ولا الذكريات بتقدر تمحيها بتفضل مرسومة في عقول الناس ويسلمها جيل لجيل، فبعد عن ولادي افضل ليهم وكيف ما كنت هاملهم من وهم حته لحمه حمرا هكمل علشان مصلحتكم، اني خلاص حددت طريقي وعرفت اني هعمل ايه.
سأله "سند" باستغراب:
ـ هتعمل ايه يا "سمير" وناوي على ايه؟
جاوبه وهو بيبص للفراغ قدامه بعيد عن عيون امه:
ـ هسافر لبلاد الله الحرام هعيش هناك وهقضي الباقي من عمري بجوار رسول الله هترجى من ربنا يغفر لي ويسامحني على كل اللي عملته وهبعد عن البلد بحالها لحد الناس ما تنسى ان في واحد اسمه "سمير" الناجي.
في اللحظة دي "رابحة" اتجننت لما سمعت ان هو هيسافر ويبعد عنها:
ـ لا يا ولدي ما تفوتنيش اني ما هقدرش اعيش من غير واحد فيكم يا "سمير" حرام عليك اسمع كلام اخوك وخليك جارنا راعي ارضك وعيالك؟
"سمير" صمم على قراره:
ـ لو قعدت اهنه احتمال كبير يا امي تلاقيني موت روحي وتخلصت من حياتي اني ما هتحملش نظرات الناس ولا تلقيحهم وكلامهم لان دول اكيد هيبقوا عقاب من ربنا ليا يرضيكي ولدك يمشي مذلول بين الناس؟
ولا يفضل محبوس في اوضه لحد ما يموت وما يشوفش بني ادمين خالص؟
"رابحة" بقت محتارة وحزينة وقربت منه واخدته في حضنها وهي بتطبطب عليه:
ـ ما هقدرش اني اشوفك تعيش بعيد عني طول عمرك يا ولدي ارجوك يا "سمير" بلاها كلام الناس اللي لا هيودي ولا هيجيب.
"سمير" كان قرر ولا يمكن حد يزحزحه عن اللي في دماغه:
ـ معلش يا امي انت قدامك فرصة تاجي تحجي كل سنه وتقعدي وياي هناك شهرين ولا تلاتة وهو اكده حجة السفر تبقى هانت عليكي عاد لان قرار السفر اني ما هرجعش فيه واصل مهما حصل.
وبص لاخوه "سند" وطمنه:
ـ وكمان أني عارف انت رايد مني ايه يا "سند" تقدر تجيب الماذون علشان ننهي موضوع جوازي من "نورا" وارمي عليها اليمين قبل ما اسافر لاني خلاص هسافر كمان اسبوع.
*******
ـ أني عايزة أسافر وياك يا "علي" لا يمكن أسيبك تسافر لوحدك .
اتأفف "علي" بضيق وهو رافض إنها تسافر معاه:
ـ مينفعش يا "شيماء" احنا يدوب كاتبين كتابنا وميصحش تسافري معاي، أني هكلمك من هناك وهطمنك عليا.
الهدوء اللي ساد الأوضة بعد قراره كان مقلق، بس جوه صدر "علي" كانت فيه عاصفة تانية خالص شغالة تدمـ.ــر في هدوءه، كان قاعد على كرسيه المتحرك، باصص للأرض بشرود، وايديه بتفرك في بعضها بعصبية خفية كأنه بيلف في دايرة مغلقة من الأفكار السودا اللي مش عاوزه تخلص،
قربت منه "شيماء" بخطوات خفيفة كأنها خايفة ترعب هدوءه المكسور، ووطت قعدت على ركبتها قدامه، وحطت ايديها الاتنين على كفوفه، وقالت له بصوت دافي كله حنية وطمأنينة:
ـ مالك يا "علي"؟ إيه نظرة الحزن اللي في عيونك دي من الصبح؟ بدل ما تفرح إننا بقينا لبعض، وشايفاك تايه في دنيا تانية خالص، كأنك مش قاعد معاي؟!
رفع "علي" عيونه ليها، وكانت نظراته مليانة وجع مخفي وخوف حقيقي مش على نفسه، لأ، خوف عليها هي، اتنهد بحرقة وطلع صوته مبحوح وصعب:
ـ أني مش تايه يا "شيماء" أني بس بفكر بعقل الراجل مش بقلبه كيف ما إنتِ بتفكري، السفر قرب، وميعاد العملية برة مصر خلاص مابقاش عليه كتير، وأني... أني واخد قراري ومش هقدر أرجع فيه.
رفعت حاجبها باستغراب وقالت بصوت قلقان:
ـ قرار إيه دي كمان اللي واخده من وراي ومضايق روحك ووشك ميبشرش بالخير خالص يا "علي"؟
بص في عيونها مباشرة وقال بجدية :
ـ اني هسافر لوحدي يا "شيماء" مش هتنفعي تسافري معاي، السفر برة مش مشوار للبلد اللي جنبنا، داي رحلة علاج طويلة، وبهدلة، وأني مش هقدر أخدك معاي تتبهدلي وتضيعي وقتك ومستقبلك ورا واحد سلامته مش مضمونة، وأمك.. أمك محتاجاكي، ومينفعش تسيبي بيتك وأهلك وتروحي في مهب الريح مع إنسان لسه مش عارف بكرة مخبي له إيه.
أول ما سمعت كلامه، حسّت إن الأرض بتلف بيها. قامت وقفت قدامه بسرعة، وعيونها لمعت بشرار الغضب والرفض، وكتفت إيديها قدام صدرها وقالت بصوت عالي نسبياً من كتر القهرة:
ـ تسافر لوحدك ليه؟! هو ليه التصميم اللي مش مقتنعة بيه دي يا "علي" ؟! رايح تعمل عملية خطيرة في مستشفى برة، ورايح لوحدك! أمال أني لازمتي إيه في حياتك؟
دي رحلة علاج جوزي وعمري كله، وبصراحة اكده ومن الآخر وفر كلامك دي لنفسك، لأني أصلاً كلمت أمي وأقنعتها، وماما بنفسها قالت لي اوعي تسيبي جوزك لحظة واحدة، يعني موضوع رفضك للسفر دي شيله من دماغك خالص لأني مش هقعد اهنه وأنت هناك لوحدك في أزمتك داي.
وكملت بتصميم:
ـ ما أني سافرت برة مصر قبل سابق في مؤتمر سياحي وانت بقيت جوزي وهنحجز انت في غرفة وأني في غرفة.
هز "علي" راسه برفض شديد، وشد ايده من بين ايديها بغضب متبادل وقال:
ـ إنتِ مش فاهمة يا "شيماء" ! إنتي لساتك صغيرة، وما تعرفيش الدنيا ماشية كيف، أني ظروفي هتُبقى متعبة ليكي، ومش عارف العملية دي هتنفع ولا هتفشل، مش عارف هرجع أقف على رجلي كيف الأول ولا هفضل طول عمري قاعد على الكرسي دي!
وموضوعنا أكيد هيختلف حسب نجاح العملية.
وقفت دقيقة مذهولة من كلامه، حست إن كلامه كأنه صدمة نزلت على قلبها مش مجرد خوف عليها ،نزلت دموعها على خدودها، بس مسحتها بسرعة بضهر ايديها، وقربت منه تاني ووطت لمستواه وقالت بصوت متوتر من كتر العصبية والوجع:
ـ عالة؟! هو دي اللي فكرت فيه يا "علي" ؟ هو دي اللي تفكيرك جابه عن حبي ليك؟ إنت مفكرني حبيت شكلك ولا طولك وعرضك يا "علي"! لو فكرت بالطريقة داي يُبقى عمرك ما عرفت مين هي "شيماء" ولا فهمت قلبها بيدق لمين! أني حبيتك انت.. لشخصك، روحك، طيبتك، وصبرك على كل البلاء اللي نزل عليك، تُبقي مجنون لو فاكر إني ممكن أبيعك أو أسيبك عشان نجاح عملية أو لاقدر الله حصل حاجة بإرداة ربنا هتعطل شفاك ما علينا غير الصبر .
بص لها "علي" بعيون قلقانة وقال بصوت حزين من كتر القسوة على نفسه قبل ما يكون قسوة عليها:
ـ اسمعيني يا "شيماء" .. إنتِ مش فاهمة البُعد التاني للموضوع، تعالي نفترض الفرضية اللي بتوجع قلبي كل ما بتيجي على بالي.. لو سافرت، ودخلت العمليات، والعملية فشلت.. لو رجعت زي ما أني، بل أسوأ، وقعدت في البيت لا هطلع ولا بنزل، هتعيشي مع واحد مكسور طول عمره؟ هتقبلي على نفسك تشيلي هم واحد مقادرش حتى يخدم نفسه؟ أني مش أناني لدرجة إني أظلمك معاي ، ولو حُصل ولقيت نفسي مش هقوم على رجلي، يُبقى لازم أطلقك يا "شيماء" و تشوفي نصيبك وتتجوزي راجل سليم يقدر يسعدك ويكون عوضك.
أول ما سمعت كلمة طلاق و"تتجوز غيره، حسّت كأن قطر سرعة خبط في قلبها، وقالت له:
ـ لااااه يا علي! اوعى تُنطق الكلمة داي تاني على لسانك، اوعى! طلاق إاييه ؟! أني وانت بقى قدرنا واحد، والله ما هيحصل ولا هسيبك ولا قبل العملية ولا قبل العملية.
حاول "علي" يقاطع كلامها وهو بيبلع ريقه بصعوبة من كتر التأثر:
ـ بس يا " شيماء" اسمعي العقل هيقول ...
قاطعته وهي بتحط ايديها الاتنين على بقه عشان تمنعه من الكلام، وقالت بصوت متهدج، ومليان إصرار :
ـ مفيش عقل في الحب يا علي! العقل دي تخليه لنفسك ولشغلك، لكن في حبي ليك.. أني مجنونة، وجنون بيك أنت وبس! تسمع مني كويس ولا لأ؟ لا فيه طلاق، ولا فيه سفر لوحدك، ولا فيه كلام فارغ من اللي هتقوله دي إنت في عيوني واحد، وهتسافر، وهتعمل العملية، وهترجع تقف على رجليك.
فضل "علي" باصص لها وهو مش مصدق إن فيه بنت في الدنيا دي كلها ممكن تحبه بالشكل الاسطوري ده، بالشكل اللي يخليها تتحدى كل ظروفه وإعاقته ومستقبله المجهول، فمد ايده المرتجفة ولمس وشها بحنان طاغٍ وقال بصوت شبه ميت من كتر العشق:
ـ أني عِملت حلو إيه في دنيتي عشان ربنا يرزقني بواحدة زيك يا "شيماء" ؟ إنتِ مش مجرد بنت عادية دخلت حياتي، إنتِ رحمة ربنا اللي نزلت عليّ في وقت كنت خلاص بموت فيه.
نزلت "شيماء" ايديها، ومسكت وجهه بكفوفها الاتنين ، وقالت بصوت هادي وواثق:
ـ ربنا رزقك بيا لأنك أصلاً إنسان طيب وابن أصول وتستاهل كل خير، يُبقى اتفقنا خلاص؟ السفر مش لوحدك، هكون معاك خطوة بخطوة، وهنقف في وش أي ظروف، ولو الدنيا كلها وقفت قصادنا، أني وأنت هندوس على الصعاب وهنعدي كل حاجة سوا، صُح يا "علي" ؟
ابتسم "علي" ابتسامة واسعة، ابتسامة نورت وشه ورجعت له شبابه وروحه اللي كان مفكرها ماتت، وشدها لحضنه بكل قوة وقبل راسها وقال بكلمة قطعت شكوكه للأبد:
ـ صُح يا قلب "علي"، صح يا سندي الجميل وعمري كلاته، خلاص نجهز نفسنا للسفر .
*******
ـ هتعرفي تنفذي اللي قلت لك عليه يا "دعاء" ولا مش هتقدري ؟
ابتسمت دعاء بثقة وطمنته:
ـ متقلقش يا سند عيب عليك ما يجيبها إلا دعاء، دي أني هخليها تاجي لحد عندها وتترجاها كمان انها تسامحها كمان .
طلع موبايله وهو بيبعت لها فيديو وقال لها:
ـ الفيديو معاكي اهو، محدش يشوفوا غيرها يا دعاء ولا توريه لحد نهائي، دي أسرار والمفروض مفيش بني آدم يعرف عنه حاجة غير اللي انتي رايحة لها وهتاخدي معاكي "سعدية" و"جليلة" .
ابتسمت "دعاء" وهي بتسأله السؤال اللي صدمه :
ـ قل لي يا "سند" انت ممكن تتجوزها في يوم من الأيام؟
برق "سند" عيونه بصدمة من سؤالها الغير متوقع منها نهائي ...