*الأبطال:*
*جميلة* وهي فتاة طيبة القلب وجميلة الروح والملامح، تمتلك عربة لبيع الفول والبليلة، في الـ 23 من عمرها وليس لها في الدنيا سوى والدتها.
*العم فرج* وهو رجل طيب كان يعمل على عربة الفول والبليلة طوال حياته، وحينما أقعده المرض تولت جميلة المهمة بدلاً منه.
*أما والدتها فهي السيدة كريمة* سيدة مصرية أصيلة كجميع أمهاتنا، وهي تحب ابنتها وزوجها جداً، ولكنهم فقراء وبالكاد يحصلون على طعام يومهم، لكنهم راضيين ومقتنعين ويعيشون في سعادة.
*سرياقوسي* وهو صبي جميلة وتناديه بسرسأ.
*صاحب المطعم المجاور لعربة جميلة وهو المعلم رضا* ولكنه غير راضٍ عن حياته بالمرة، فهو ينافس جميلة في أكل عيشها، وصبيانه هما *سيد فولة وزيزو* وهما محور الشر في القصة.
*أهل الحارة:*
*السيدة عيشة أم عبده* وهي سيدة طيبة القلب، وولدها *عبده* يمتلك ورشة صغيرة لتصليح السيارات، وبيحب جارته *نهى* ودلعها *نؤة* وهي فتاة طيبة القلب وتحب جميلة وتساعدها، ووالدها *العم مختار* يعمل سائقاً في شركة كبيرة يمتلكها عاصم بيه نوار.
*عاصم بيه نوار* هو بطل روايتنا، فهو شاب في الثلاثين من عمره، شاب عصامي ورث شركة واقعة مفلسة من بعد وفاة والده، ولكنه عمل بجهد ليلاً نهاراً حتى أوقف الشركة على قدميها، ولا يعرف في الحياة سوى العمل، ووالدته *السيدة حنان* فهي اسم على مسمى.
*خالد صديق عاصم* وهو صديق على حق متزوج وله ولد وبنت ويحب زوجته جداً، وزوجته أيضاً طيبة القلب واسمها *سامية*.
*السيدة نعمات* وهي سيدة لا تعرف في حياتها سوى النميمة، بالبلدي بتقلب عيشها، وزوجها موظف يعمل في مصلحة حكومية واسمه *نعيم* ولكنه عكسها فهو رجل طيب ويعيش في حاله، أما ابنتيها *شادية وفادية* فهم في مدرسة ابتدائية كباقي أولاد الحي.
*السيدة فهيمة أم محمود ورانيا* فهي سيدة تعمل في إحدى المصالح الحكومية وأولادها أيضاً أطفال في المدرسة الابتدائية وزوجها يعمل مهندس ولكنه دائماً مسافر وتسكن مع حماتها في نفس المنزل *السيدة عفاف* ولكنها حما سليطة اللسان ودائماً تذكرها بما ليس فيها ولكنها صابرة من أجل حبها لزوجها وأولادها.
أما بائعة الخضروات السيدة أم ليلى* سيدة أرملة تبيع الخضروات في محل صغير وأحياناً أيضاً تبيع الفواكه بجانب الخضروات، أما ليلى ابنتها أيضاً في نفس المدرسة الابتدائية
الفصل الاول
في حي من أحياء القاهرة الجميلة، هو حي شعبي، وفي حارة النجا تقطن بطلتنا جميلة. تعالوا معاً لنتعرف عليها.
في منزل مكون من طابق واحد، منزل قديم متهالك لكنه يسترهم. الساعة الآن الثالثة صباحاً، هنا تستيقظ جميلة وتخرج من غرفتها إلى غرفة المستوقد التي تعد فيها الفول والبليلة.
شقتها مكونة من ثلاث غرف: غرفة لها، وغرفة لوالدها ووالدتها، وغرفة أخرى تستعملها كمستوقد.
وها هي جميلة في المستوقد تتفقد قدرة الفول:
- كده الحمد لله الفول قرب، أشوف البليلة.. عال أوي هي كمان قربت، أعمل السلطة وأحضر الطحينة وأجهز العيش يكون الفجر أذن، أصلي وأنزل عشان الولاد بتوع المدارس. ناقص إيه كده بقى؟ آه أفرم السكر وأحط الخلطة السحرية على البليلة.
وهنا تستيقظ والدتها وتدخل غرفة جميلة:
- إيه ده أكيد في المستوقد، أنا عارفة مش بتريح نفسها ليه ديه، ربنا يريح قلبك يا بنتي ويستر عرضك ويوسع رزقك ويرزقك برزقنا، صغيرة على الشقا ده يا قلب أمك، أخش أشوفها.
لتدخل عليها والدتها:
- *كريمة:* صباح الخير والسعادة على السكر الزيادة.
- *جميلة:* صباح الهنا والرضا عليكي يا كرملة يا ست الحبايب.
- *كريمة:* مش قولتلك خليني أنا أجهز الحاجة وكفاية عليكي الوقفة في الحارة.
- *جميلة بمرح:* عايزة تعرفي سر الصنعة؟ أبداً مش هعرفهولك.
- *كريمة:* يا بنتي نفسي أريحك، أنتي بتتعبي أوي.
- *جميلة:* تعبكم راحة يا أم جميلة، أقولك خدي أعملي السلطة، هيصي يا ستي بس بسرعة، فاضل ساعة على الفجر وأنتي عارفة رجالة الحارة بيصلوا الفجر وييجوا عشان ياخدوا الفول والبليلة.
- *كريمة:* ده أنا كمان امبارح بالليل بعد ما دخلتي نمتي حدقتلك بتنجان عشان يبقى في حاجة حرشة مع الفول.
- *جميلة تقبلها من خدها:* طب حد يقولي ألاقي أم قمر زيك فين.
- *كريمة:* ربنا يحلي أيامك.
- *جميلة:* شوفتي قعدنا نرغي ومطحنتش السكر للبليلة.
- *كريمة:* أطحنهولك أنا.
- *جميلة:* لا يا قلبي أنتي عايزة تهربي من السلطة، كملي السلطة.
- *كريمة:* طيب براحتك.
وبعد ساعة ها هو أذان الفجر:
- *جميلة:* أما أنا هصلي وأنزل.
- *كريمة:* طيب هصلي أنا كمان بس أصحي أبوكي الأول.
- *جميلة:* صحيه يصلي بينا إمام.
- *كريمة:* نصلي في الحرم سوا إن شاء الله.
- *جميلة:* اللهم آمين.
وبعد صلاة الفجر نجد أن جميلة تقف في الشرفة:
- *جميلة:* سرسأ ولا أنت فين.
- *سرسأ:* أنا هنا يا ست الكل.
- *جميلة:* طب أطلع يلا عشان ننزل القدر.
- *سرسأ:* حاضر.
وبعد أن صعد سرسأ وأنزلوا قدر الفول والبليلة:
- *جميلة:* أطلع لأمي بقى هات منها السلطة والمخلل والعيش يلا بسرعة.
- *جميلة:* يا رب صبحنا وربحنا وبين عبيدك ما تفضحنا، ارزقنا بالحلال يا رب وأبعد عنا ولاد الحرام وجنبنا الشيطان وأعماله واجعلنا من عبادك الصالحين يا رب، بسم الله توكلت على الله.
- *جميلة:* يا رب راضيني وأرضى عني وأرزقني يا رب العالمين.
وهنا يبدأ أهل الحي في التوافد على جميلة لشراء طعام الإفطار:
- *جميلة:* يا مسهل الحال يا رب، أهلاً وسهلاً بيكم. النهارده بقى عندنا بتنجان حادق عمايل إيد أم جميلة، مين قال عاوز.
- *السيدة أم عبده:* صباح الخير يا وش الخير، هاتيلي بعشرة فول وعشرة بليلة وعشرة بتنجان بس بسرعة عشان مستعجلة.
- *جميلة:* هات طلبات خالتك أم عبده يا سرسأ، أنجز.
- *سرسأ:* عيوني لخالتي أم عبده.
- *السيدة أم كريم وكارما:* يا جميلة يا بنتي أنا واقفة بقالي حبة، هاتي سندوتشين فول للعيال كده هنتأخر، أنتي عارفة إن المدرسة بعيدة وعلى ما أوقف توكتوك فيها موال.
- *جميلة:* من عيوني، أم كريم وجهزيلي الطلب بتاع كل يوم على ما أرجع عشان ألحق أفطر عمك أبو كريم، يا أختي ده إيه الهدة ديه.
- *أم كريم:* ربنا يديكي الصحة يا خالتي.
- *جميلة:* شهل يا سرسأ وجهز صينية وظبطها ووديها لعمك نوح، الراجل قاعد لوحده معهوش حد ولسه بدري على أول الشهر والقبض والراجل بيتكسف، أنجز متبقاش بارد.
وها هي السيدة نعمات قد حضرت:
- *جميلة في سرها:* استرها يا رب، ظهر الفساد في البر والبحر.
- *نعمات:* بتقولي حاجة؟
- *جميلة:* لا تسلمي.
- *نعمات:* عايزة بعشرين فول واتوصي وبعشرة بليلة.
- *جميلة:* أحطلك بتنجان محدق؟
- *نعمات:* يا أختي مش عارفين تعملوا إيه ولا إيه، حظكم قايم واحنا حظنا نايم.
وهنا تقع البليلة الساخنة جداً على يد جميلة لتصرخ جميلة:
- *سرسأ:* يا ستي حرام عليكي هتجيبي أجلنا، متعرفيش تسمي بالله، ربنا يحمينا من عيونك ديه.
- *نعمات:* في إيه يا زفت أنت، هي اللي مش واخدة بالها.
- *نعمات:* مش عايزة حاجة منكم هروح أشتري من المعلم رضا.
- *سرسأ:* أحسن برضك، روحي أحسديه شوية يمكن يبطل شر، ما أنتوا شبه بعض.
لتتركهم نعمات وتذهب إلى مطعم رضا:
- *نعمات:* صباح الخير يا معلم، عايزة فول وطعمية.
- *رضا:* وأنتي من أمتى بتشتري مننا زيك زي أهل الحارة، سايبين النضافة وبتجروا على العربية المعفنة.
- *نعمات:* خلاص وحياتك معدتش هشتري غير منك أنت.
- *رضا:* ولا يا فولة هات لخالتك نعمات شوية فول وظبطهم زيت ولمون واعملها كام قرص طعمية وحبش التحابيش.
أما جميلة فها هي تلف يدها بشاش مكان الحرق:
- *سرسأ:* الولية ديه عيونها مدورة.
- *جميلة:* خلاص بقى الحمد لله، يلا أعمل السندوتشات عشان نخف الزحمة من على العربية.
أما نعمات فكانت تتحدث مع رضا:
- *نعمات:* خد يا معلم وهات الباقي.
- *رضا:* لا الفطار النهارده على حسابي جدعنة مني.
- *نعمات:* تعيش يا كايدهم يا سيد الحتة كلها.
- *رضا:* تشكري يا أم شادية.
وتتركه نعمات وتذهب إلى منزلها لتعد طعام الإفطار:
- *نعمات:* يلا يا بنات عشان تفطروا قبل ما تروحوا مدارسكم.
- *شادية:* يلا يا فادية.
وبعد أن تناولت شادية الطعام:
- *شادية:* إيه ده يا أما الفول طعمه وحش أوي ده كله عيش والطعمية كمان بتقرش.
- *فادية:* عندك حق الأكل استغفر الله طعمه وحش أوي ده مش فول جميلة، وبعدين فين البليلة.
- *نعمات:* هو ده الموجود اطفحوا وأنتوا ساكتين هو يعني أكل جميلة موصوفلكم، داهية تاخدها البنات.
- *البنات:* مش واكلين، احنا هنروح المدرسة جعانين عشان يعجبك.
- *نعمات:* أنتوا حرين.
وبعد خروج الفتاتان وتركهما لوالدتهما، ها هما تذهبان إلى عربة جميلة:
- *شادية:* أبلة جميلة أنتي معملتيش بليلة النهارده؟
- *جميلة:* ليه؟
- *فادية:* وبعدين الفول طعمه وحش أوي.
- *سرسأ:* أمكم اشترت من المطعم، أصل لمؤاخذة يعني عينها وحشة أوي، حتى شوفوا إيد الأبلة جميلة.
- *جميلة:* أنت بتقول إيه اسكت يا ولا، خدوا يا حبايبي علب البليلة بالهنا والشفا.
- *شادية:* أيوه بس احنا مش معانا فلوس.
- *جميلة:* دول هدية مني ليكم، يلا بقى هتتأخروا على المدرسة.
- *شادية:* ربنا يخليكي لينا يا أبلة جميلة.
وها هي جميلة قد انتهت من بيع الفول والبليلة:
- *جميلة:* تعالي يا سرسأ ناكل لقمة مع أبويا وأمي وبعدين نحبس بالشاي على ما أجهز الدرة عشان والعيال راجعين من المدارس بيشتروا الدرة مننا.
- *سرسأ:* حاضر يا أبلة.
لتصعد جميلة ومعها سرسأ لتجد والدتها قد حضرت الطعام:
- *فرج:* إيه جبرتي يا بنتي؟
- *جميلة:* آه الحمد لله يا أبا.
- *كريمة:* يلا اقعدوا افطروا.
- *سرسأ:* الله، بتنجان بالدقة وبطاطس مهروسة وجرجير وخس، ده احنا هنهيص.
- *كريمة:* وفي جبنة قديمة كمان، يلا كلوا بالهنا.
- *جميلة:* تسلم إيدك يا أمي.
- *كريمة:* تسلمي يا حبيبتي.
- *جميلة:* خد يا أبا ده إيراد العربية وحاسبت سرسأ كمان.
- *فرج:* حقك عليا يا بنتي شيلتك الهم وأنتي لسه صغيرة.
- *جميلة:* متقولش كده يا أبا، المهم ربنا يديك الصحة ويخليك لينا.
- *كريمة:* جميلة جدعة وشاطرة واقفة معانا وقفة رجالة، تربيتنا ثمرت فيها.
- *جميلة:* ربنا يخليكم ليا، الحمد لله شبعت، على ما تعملي الشاي يا أما أكون جهزت المنقد عشان الدرة.
- *كريمة:* وأنا كمان علقتلك على الحمص عشان بالليل.
- *جميلة:* من بكره إن شاء الله نعمل ترمس جنب الحمص، العيال بيسألوا عليه.
كريمة:* من عيوني حاضر، ربنا يوسع رزقك يا رب يا جميلة يا بنت حوا وآدم
يتبع