رواية خبئني بقلبك من قسوة العالم الفصل الثامن8 بقلم ميمو
مرة واحدة، الباب بيتفتح...
مازن: أبو الفوارس، عام!
ولسه هيكمل كلامه، بص، لقى ليالي.
مازن بمرح وبيصفر، وبيبص بإعجاب لليالي: إنت بقيت تجيب مزز من ورايا؟ بس دي حورية يا أبو الفوا.
لسه هيكمل، لقى بوكس في وشه.
فارس بضيق وغضب مكتوم: كلمة زيادة، والجاي مش هيبقى بإيدي.
مازن، وهو بيحط إيده مكان البوكس: إيه يا بني الغشامة دي؟ أنا عملت إيه؟
ليالي بهدوء بتقرب منهم: في إيه؟ ممكن تهدوا؟
وبتبص لمازن، وتضحك على شكله بعد البوكس.
ليالي : هو إنت مازن؟
فارس بعصبية بيحاول يخفيها وغضب مكتوم: ليااالي!
ليالي باستغراب من عصبيتو : في إيه يا فارس؟
مازن باستيعاب لفعل فارس: هو إنتِ ليالي؟
ليالي باستغراب: أيوة، إنت تعرفني؟
مازن بتوتر، وبيبص لفارس: لا، ما أعرفكيش! أنا عندي شغل، شغل كتير. أبقى أجيلك بعدين يا فارس. سلام!
وبيجري يخرج.
ليالي، بعدم فهم لأي حاجة بتحصل بتنادي على مازن : ثواني بس، استنى!
بس بيكون مازن جري، فبتبص لفارس بضيق.
ليالي: ممكن أفهم إيه اللي بيحصل؟
فارس، ولأول مرة في حياته بيتوتر وبيحاول يخفي توتره ويمثل البرود: مفيش حاجة، ولا حاجة. كل الموضوع إنك بنت عمي، ومكنش ينفع اللي قاله، بس.
ليالي باستنكار: بس مش ده صاحبك وأخوك كمان وشريكك؟ كان ممكن تفهمو من غير العصبية دي كلها إني بنت عمك، وبعدين كان بيهزر، مش بيتكلم جد!
فارس بضيق: لا هزار ولا جد يا ليالي، واللي حصل حصل خلاص.
بتخبط نادين...
نادين: مستر فارس، الفطار أهو، وشوية المهندس محمود هيكون هنا. حضرتك محتاج أي حاجة تاني؟
فارس بجمود: ماشي يا نادين، لا، مش محتاج حاجة. روحي إنتِ.
ليالي هتفرقع من أسلوبه مع اللي حواليه.
ليالي: هو إنت كده طبيعي يعني؟
فارس بعدم فهم: هو ايه الطبيعي قصدك إيه؟
ليالي بضيق: إنت بتتعامل مع اللي حواليك بجمود وبرود صعب أوي، حرفيًا روبوت!
فارس ببرود: وإيه مضايقك؟ هما اشتكولك؟
ليالي بضيق: إنت مستفز أوي! إيه البرود ده؟
فارس بتمثيل البرود، فهو بداخله بركان من وقت ما قاله مازن، لكنه بيحاول يكون هادي: ليالي، افطري وبعدين نبقى نتكلم.
ليالي بعند: مش عايزة أفطر.
فارس محاولًا الهدوء: إنتِ مفطرتيش وخرجتي على طول. افطري يلا عشان متتعبيش.
ليالي بعند أكتر: أنا مش عايزة آكل، وبعدين أنا حرة، أتعب متعبش، حاجة تخصني!
فارس وقد نفد صبره: بتعاندي كده ليه؟ عايزة إيه يا ليالي؟
ليالي بهدوء وتوتر قدرت تخفيه: صالح صاحبك! إنت ضربته جامد، حرام، و...
فارس بعصبية لا يعرف سببها: لسه في، وكمان ليالي، ملكيش دعوة بأي حاجة تخص مازن!
ليالي بعصبية وعيون مدمعة: أنا أصلًا مش فارق معايا تتصالحوا ولا متتصالحوش، بس مش عايزة أحس بالذنب إني السبب. وإنت أصلًا مش من حقك تتعصب عليا، وشركتك مش عايزة أشتغل فيها! مش عايزة أشتغل مع روبوت معندوش مشاعر!
فارس بصدمة من عصبيتها والكلام اللي قالته، وفي نفس الوقت اتعجب من الدموع اللي في عينيها، اتكلم بهدوء وصوت رجولي: أنا عايز أفهم بس، مين قالك إنك السبب؟ ولو على العصبية، حقك عليا، أنا آسف يا ستي. وخلي بالك، فارس المحمدي عمره ما اعتذر لحد، حتى لو مين، إنتِ الوحيدة.
ليالي بضيق: مغرور، وبرضه روبوت!
فارس: المهم إنك مش هتسيبي الشغل.
ليالي: ومين قالك إني رجعت في كلامي وهفضل؟
فارس بنظرة تساؤل.. يعني؟
ليالي بعند... يعني همشي.
فارس بمكر، وبيقرب منها لحد ما لزقت في الحيطة، ومبقاش يفصل بينهم شيء. ريحة برفانه اخترقت أنفاسها، وبيتكلم ونَفَسه في وشها.
فارس: يعني لسه عايزة تمشي؟
ليالي بتوتر وخجل ظهر على خدودها، وصوتها بيتهز: أ... أ... آه، همشي.
فارس بمكر، وبيحط كف إيده على خدها، وبيتكلم بهدوء وصوت رجولي: آه إيه يا لي لي؟ هتفضلي، صح؟
ليالي عقلها وقف عن التفكير من المفاجأة لفعلتو ، وهتقع من طولها. لسانها مربوط، ومش قادرة ترد من فرط الخجل والتوتر.
فارس بهدوء: ها يا لي لي، هتفضلي، صح؟ قولي صح.
ليالي بتحاول متقعش، وبتحط إيديها على صدره عشان تبعده، بس الوضع بيسوء أكتر. أول ما بتحط إيديها على صدره، بتحس بضربات قلبه اللي زادت أول ما حطت إيدها، وإيديها بتتجمد.
فارس بيحاول يتمالك أعصابه، وبيكلم نفسه في باله:
إيه يا فارس؟ هينقلب السحر على الساحر ولا إيه؟ اجمد كده!
بيبص في عيونها، ويرجع يبص في أي مكان تاني.
ليالي بتوتر، وهتعيط من الخجل والتوتر: فارس، ابعد!
فارس، وبيمثل الثبات: قولي هتفضلي، وهبعد.
ليالي، وهتعيط خلاص من الخجل والتوتر: أوكيه، هفضل. ابعد بقى!
فارس بيبصلها، لقى عيونها مدمعة، وما زاد من جمال عيونها الزرقاء إن خدودها بقت حمرا من الخجل والتوتر.
فارس بتلقائية وهمس: سبحان ما أبدع خلقك يا ليالي.
ليالي بتوتر، بتزقه بخفة: ابعد!
فارس بيفوق لنفسه، ويبعد عنها ويرجع لهدوئه.
أول ما بيبعد، ليالي لسه هتتحرك، رجلها مش شايلاها من كتر الخجل والتوتر اللي لسه مأثرين عليها، وكانت هتقع. بتغمض عينيها، بيلحقها فارس، كان واقف جنبها، وبيمسكها من وسطها، وهي بتتعلق في رقبته.
بتفتح عينيها براحة، بتلاقي نفسها في حضنه، فبتبعد بسرعة وتوتر، وكانت هتتكعبل وتقع تاني، بس لحقت نفسها.
فارس بمشاكسة: أجي أشيلك بدل ما كل شوية هتقعي؟
ليالي بتبصله بضيق وتسكت، وبتاخد شنطتها.
ليالي: أنا همشي.
فارس بطريقة لا تقبل النقاش ونفاذ صبر: ليالي، أنا مش هفضل أسايس في عنادك كتير. اقعدي افطري، ومفيش إنك هتمشي دلوقتي.
ليالي في سرها بغيظ: أوف! متكبر ومغرور وبارد أوي!
فارس: بتبرتمي، بتقولي إيه؟
ليالي بضيق: مش بقول حاجة، أنا بأكل أصلًا.
بيقعد فارس على المكتب يشتغل لحد ما تخلص أكل.
───
نروح نشوف اللي بيحصل في فيلا المحمدي
فاطمة: إنتِ يا بنت، بقالي ساعة بكلمك، وإنتِ ماسكة موبايلك ومش بتردي! إيه البرود ده؟ بقولك هتشتغل معاه، هيروحوا وييجوا مع بعض، البت هتاخد كل حاجة!
يارا ببرود: متخافيش، أنا عاملة خطة هتخلصنا منها خالص.
فاطمة بسخرية: إنتِ تعملي خطة؟ ههههه! قولي كده الخطة بتاعتك يا عبقرية.
يارا بغرور: طب اسمعي...
فاطمة بابتسامة وخبث: لا، طلع ييجي منك! أول مرة تعملي حاجة صح! ههههه.
───
في شركة F&M
الباب بيخبط.
فارس: ادخل.
نادين: مستر فارس، المهندس محمود بره.
فارس: دخليه.
محمود: حضرتك عاوزني؟
فارس: آه، اقعد يا محمود. الآنسة ليالي بنت عمي هتشتغل هنا، وعايزك تظبط المكتب اللي جنبي ليها، بس حسب طلباتها.
ليالي، اتفضلي بلّغيه باللي عايزة تعمليه.
ليالي بتقول اللي عايزاه، وبيخرج محمود.
بعد شوية...
ليالي بزهق: أوف! إيه الملل ده؟ أنا عايزة أمشي بقى!
فارس بيبصلها ويرجع يبص للاب: أنا قربت أخلص، ونخرج. إلهي نفسك في أي حاجة الشوية دول بس.
ليالي بضيق، وبتبص حواليها بملل: إلهي نفسي في إيه؟ وبعدين هنخرج فين؟
فارس، ولسه باصص على اللاب: العبي على الفون، أو كملي روايتك في النوت فون.
ليالي عجبتها الفكرة: أوكيه، بس هنخرج فين برضه؟
فارس، ولسه باصص للاب وببرود: هتعرفي وقتها.
ليالي في سرها: كتلة تلج على الأرض!
بتفتح النوت فون وتكتب:
«لا أعلم!
أأنت قاسٍ أم حنون؟
كل ما أعلمه أنني أشعر بالأمان معك وحدك، لا أهاب شيئًا، وهذا شعور جديد بالنسبة لي.
أيها القاسي متجمد المشاعر، اسمح لي أن أذيب جليد قلبك بحرارة قلبي».
ليالي المحمدي
بقلم Memo ✍🏻
فارس بيقفل اللاب: خلصت؟
ليالي بتقفل النوت: أخيرًا!
فارس بيلبس الجاكيت: يلا بينا.
ليالي: طب افهم بقى، رايحين فين؟
فارس: هشبع فضولك. هنتغدى بره، وكنت عايز أجيب هدية عيد ميلاد لبنوته صغيرة، بنت مستثمر، وعايزك تختاريها عشان مليش في الجو ده.
ليالي بتفكير: أوكيه، بس البنوته كام سنة؟
فارس: عشرة. يلا بقى.
وبيخرجوا تحت أنظار الموظفين المستغربين والغيرانين.
موظفة لصاحبتها: يا بختها، وقعت وقفة! ياختي حظوظ!
موظف لصاحبه: نفسي أعرف الصاروخ دي إزاي مع المفتري ده! يا بخته!
───
في المطعم
بيدخلوا مطعم سمك معروف وراقي.
الويتر: أهلًا فارس باشا، نوّرت المكان. ترابيزتك فاضية هناك، اتفضل.
وبيدخلوا ويقعدوا، وبيديهم المنيو ويسيبهم يختاروا.
فارس: تاكلي إيه؟
ليالي بتبص في المنيو شويه وبعد كدة بتقول: أممم، باستا بالوايت صوص والجمبري.
فارس: أوكيه.
بييجي الويتر ياخد طلباتهم ويمشي.
فارس بهدوء: ليالي...
ليالي بتبصله: إيه؟
فارس: إيه اللي حصل زمان، بسبب إنكم مكنتوش بتيجوا؟
ليالي خيّم عليها الحزن، وبصوت حزين: الموضوع كبير أوي، وخلاص عدى عليه سنين.
فارس بهدوء وحنية: بس أنا عايز أعرف، ومش مهم كبير ولا صغير، أنا هسمعك.
ليالي بابتسامة من كلامه، رغم حزنها كلما تذكرت الماضي: هحكيلك، بس مش هنا.
فارس بعدم فهم: أمال فين؟
ليالي: بعد الغدا هقولك.
فارس: ههه، إنتِ بتردهالي ولا إيه؟
ليالي بابتسامة على ضحكته اللي نادر لما تظهر: لا والله، بس مش عايزة أحكي هنا. هنروح مكان تاني أعرفه.
فارس باستسلام لرغبتها: اللي إنتِ عايزاه يا انسة لي لي.
ليالي بتبتسم بخجل، والويتر بيوصل وبيحط الأكل.
في فيلا المحمدي
فاطمة بتمثيل الطيبة: أحمد يا أخويا، أنا خايفة عليك. البنت ليالي من الصبح مع فارس. هو ابن عمها آه، بس طول عمره عايش بره ومبيعرفش عاداتنا وتقاليدنا. وكمان متنساش اللي ليالي عملته زمان إيه، هنعيده تاني؟
أحمد بتفكير وغضب من ليالي: خلاص يا فاطمة، أنا هتصرف معاها