يارا جت جري على صوت والدتها:
— إيه يا مامي؟ في إيه؟ صوتك عالي ليه؟
فاطمة وهي بتبص لها بجدية:
— بقولك إيه يا حبيبتي... خالك جاي بكرة هو وبناته، وعايزاكي تاخدي بالك وتركزي. متديش فرصة للزفتة ليالي إنها تتكلم مع فارس، وعايزاكي تلزقي له. سامعة؟ عشان ميضيعش من إيدك، وكل الشركات دي تروح لبنت سارة.
يارا بلامبالاة:
— ماما، أنا بقالي سنة بحاول أقرب منه، وهو جبل جليد! لا بيتحرك ولا بيتغير. ده حتى راح اشترى شقة يعيش فيها لوحده، ومحدش قدر يغير رأيه أو يقوله ليه... ولا حتى جدو. مفكرة ليالي هي اللي هتحركه؟
فاطمة بغضب:
— إنتِ غبية يا بنت! نسيتي أول يوم جه فيه إيه اللي حصل؟ وشوفتي إزاي وقف في وش خالك وفي وشي لما جيت أضربها؟ متفكريهاش طيبة. دي سوسة زي أمها، بتتمسكن لحد ما تتمكن. وأنا عارفاها كويس.
سكتت لحظة، ثم أكملت بحدة:
— ولو فضلتي كده، كل حاجة هتضيع من إيدك... وهي هتبقى الكل في الكل.
بدأ الخوف يظهر على ملامح يارا:
— طب أعمل إيه يا مامي؟
فاطمة بحقد:
— متسيبيهاش هي وفارس يتجمعوا، حتى لو للحظة. وحاولي تخلي فارس ياخد باله منك. خليها تحس إن بينكم حاجة... والأهم، حطي في دماغك إنك لو كسبتي فارس، إنتِ كسبتي ثروة.
ظهرت ابتسامة على وش يارا، ولمعت عيناها بالطمع:
— متخافيش يا مامي... اعتبري فارس بقى معايا من دلوقتي.
ــــــــــــــــــــــــــــــــــــ
نهار جديد في القاهرة...
نور كانت بتهز ليالي:
— قومي يا ليالي، يلا بقى! إنتِ حتى قولتي هنكمل كلام بليل ونمتي. اصحي يلا!
فتحت ليالي عينيها بصعوبة، وقعدت على السرير وهي بتفرك وشها:
— سوري يا نوري، بس نمت غصب عني... الشغل كان كتير.
نور بحنية:
— عادي يا ليلو، ولا يهمك. المهم، هتعملي إيه؟
ليالي بهدوء:
— هسافر معاكو خلاص.
نور بصت لها بفرحة وصدمة في نفس الوقت:
— بجد؟ وإيه اللي غير رأيك؟ إحنا حتى متكلمناش!
ليالي بتلقائية:
— عادي يعني... قولت لو ما روحتش، عمتك هتفرح، وأنا هروح أضايقها... وكمان فا...
سكتت فجأة.
حست إنها لو كملت، هتدخل نفسها في تحقيق من نور مش هينتهي إلا وهي مش عارفة ترد على أي سؤال.
نور بشك:
— سكتي ليه؟ كملي، كنتِ هتقولي إيه؟ وبعدين الكلام ده مش مقنع... ده مش تفكيرك أصلًا.
بدأ التوتر يظهر على ليالي، وحاولت تخفيه وهي بتتحرك بعشوائية:
— مكنتش هقول حاجة. هو اللي قولته وبس، مفيش حاجة تانية. وبعدين ماله تفكيري؟
نور بعدم تصديق:
— ليالي، أنا أختك، مش واحدة صحبتك ولسه بتعرف عليكي. قولي كنتِ هتقولي إيه؟
ليالي بضيق:
— في إيه يا نور؟ هو تحقيق؟ وأنا الكبيرة ولا إنتِ عشان تحققي معايا كده؟
نور، رغم تأكدها إن في حاجة مستخبية، اتكلمت بهدوء:
— من إمتى لما بنخاف على بعض أو نسأل بعض يبقى تحقيق؟ ومين الكبير والصغير؟ مالك يا ليلو؟
تنهدت ليالي، وحست إن مفيش مفر:
— فارس كلمني امبارح.
نور بصدمه:
— فارس؟!
قبل ما تكمل، ليالي قالت بسرعة:
— أنا هحكيلك كل حاجة.
وحكت لنور كل اللي حصل، ما عدا كلام فارس اللي كان بيدلعها وبيستفزها.
نور باستغراب:
— بس جاب رقمك منين؟
ليالي:
— ما أنا قولتلك، سألته. وقعد يقول لي «مصادري الخاصة» وحاجات كده. وبعد كده قال لي إن مضايقة عمتك هي السبب اللي يخليني أسافر معاكو.
نور بشك:
— وإنتِ اقتنعتي بالفكرة؟
ليالي:
— آه، وليه لأ؟ شوية من اللي كانت بتعمله فيا، وأهو نتسلى. وإنتِ كده كده بتحبي تتسلي.
نور بضحك:
— حلو كده، أنا في الخطة صح؟
ليالي بابتسامة:
— صح يا حبيبتي.
نور بلهفة:
— وأنا اللي هحط الخطة؟ أوكيه!
ليالي بتنهيدة:
— أوكيه.
نور بدأت تفكر، ثم قالت:
— بس الواد فارس ابن عمنا ده باين عليه حكاية! ده شكله كده بيقول «روبوت» أو «رجل الجليد». أنا فاكرة أول يوم شوفناه، دخل يسلم على جدو: «إزيك يا جدي؟ إزيك يا عمي؟»... وشه مكنش عليه أي تعبير! والله مستغربة إزاي جاتله الفكرة دي.
ليالي في سرها:
والله ولا أنا عارفة إزاي فكر كده...
ثم قالت بسرعة:
— احمم... المهم، اخرجي يلا. روحي جهزي شنطتك وأنا هجهز شنطتي، عشان نلحق نتحرك كمان ساعتين ونوصل على بليل.
نور وهي بتجري بفرحة زي الأطفال:
— أوكييي!
ــــــــــــــــــــــــــــــــــــ
بعد ساعتين...
أحمد من تحت:
— نووور! ليااالي! يلااا!
نور وليالي وهما نازلين على السلم:
— حاضر، جايين!
حطوا الشنط في العربية، وركبوا، وتحرك أحمد في طريقه إلى الغردقة...
في العربية...
كانت ليالي قاعدة جنب نور في العربية، وكل واحدة فيهم مشغولة بحاجة، لحد ما موبايل ليالي اهتز بإشعار رسالة.
فتحت الشات، ولقت رسالة من فارس.
فارس:
_ ليالي
ليالي باستغراب:
— إيه يا فارس؟
فارس:
— اتحركتوا ولا لسه؟
ليالي باستغراب:
— اتحركنا آه... بتسأل ليه؟
فارس بهدوء:
— عشان أعرف هتوصلوا إمتى، وأبقى موجود.
ليالي عقدت حواجبها:
— موجود إزاي؟ مش إنت في الفيلا أصلًا؟
فارس:
— لا... أنا في بيتي.
ليالي بدهشة، وهي مش فاهمة حاجة:
— أنا مش فاهمة حاجة! بيت مين؟
جاءها رده بهدوء، وكأن الموضوع عادي جدًا:
فارس:
— لما توصلوا أفهمك... عشان عارف إن استيعابك بطيء.
ليالي بضيق:
— أوكيه.
قفلت الشات وهي بتبص للموبايل باستغراب، مش فاهمة فارس يقصد إيه، لكنها قررت إنها تسأله أول ما توصل.
ــــــــــــــــــــــــــــــــــــــــــــ
في الغردقة...
وصل فارس بالعربية، وأول ما دخل من البوابة، خرجت يارا بسرعة، وأول ما شافت فارس وقفت مكانها بصدمة.
يارا بفرحة:
— فارس؟! إنت جيت؟ قررت تعيش هنا خلاص؟
فارس ببرود:
— لا.
يارا باستغراب:
— أومال إيه اللي جابك؟
فارس من غير ما يديها فرصة تكمل:
— هفضل في شقتي.
وسابها ومشي، واتجه للفيلا.
طلع أوضته، غيّر هدومه، وبعدها نزل للجنينة، وقعد قدام اللابتوب يكمل شغله، وكأنه مستني حاجة.
أو بالأصح... مستني حد.
ــــــــــــــــــــــــــــــــــــــــــــ
وبعد ساعات...
بدأ الليل ينزل على الغردقة، وأخيرًا وصلت عربية أحمد.
فتح لهم البواب البوابة، ودخل أحمد بالعربية، وبعدها نزلت نور وليالي ومعاهم شنطهم.
نور بفرحة:
— أخيرًا وصلنا!
وبيقرب البواب ياخد الشنط وهما داخلين بيقابلو فارس في الجنينه ....
أحمد بود: — إزيك يا فارس؟ عامل إيه؟
فارس، ببرود ومن غير ما يتحرك من مكانه: — الحمدلله يا عمي.
نور قربت من ليالي وهمست لها وهي بتبص لفارس باستغراب:
— بقولك إيه يا ليالي... هو لسه جبل جليدي من ساعة ما شوفناه أول مرة؟ أنا مش مصدقة إن ده فارس اللي كلمك واقنعك بخطته! إنتِ كنتِ بتضحكي عليا ولا إيه؟
ليالي كانت لسه باصة لفارس، ومصدومة من جموده.
دي أول مرة تشوفه بالشكل ده.
حتى أول مرة قابلته فيها، كان مختلف... كان بيتكلم معاها بطريقة أهدى، وفي كلامه استفزاز واضح، لكن مكنش بالجمود ده.
همست لنور وهي لسه تحت تأثير الصدمة:
— مش يمكن بدلوه؟ أكيد اتبدل.
نور حاولت تمنع ضحكتها، لكن قبل ما ترد، فارس قام من مكانه واتجه ناحيتهم.
وقف على مسافة مناسبة، وحاول يحافظ على نفس ملامحه الجامدة، لكن للحظة قصيرة عينيه ثبتت على ليالي قبل ما يرجع لنبرته الباردة:
— احمم... حمدلله على السلامة. ادخلوا يلا.
ليالي بصت له باستغراب، وبعدها قالت بهدوء:
— الله يسلمك.
فارس اكتفى بهزة بسيطة من رأسه، ورجع لجموده المعتاد.
دخل أحمد، وراه نور وليالي، بينما فارس فضل واقف للحظات مكانه قبل ما يلحقهم.
أما نور، فمالت على ليالي وهمست:
— لأ... أنا لسه مش مقتنعة.
ليالي وهي بتبص قدامها: — اتبدل اكيد